1-2. He kwini ku tsrekatsreka loku muprofeta Hagayi a hlayiki leswaku a ku ta va kone?

“HI NKAMANYANA wutsrongo switolo ni mapredu ya khale swi sungule ku hohloka. Vhanu hinkwavu va ngheneliwe hi ku txhava . . . Vanyingi va hlaya leswaku ku tsrekatsreka ka misava ke teka 2 wa maminutu. Kambe kwanga a swi yentxa ingi swe teka nkama wa ku leha swinene.” Lawa i mazritu lama hlayiwiki hi vhanu va kukazri lava hulukiki ka ku tsrekatsreka lokukulu ka misava loku viki kone a Nepal hi 2015. Loko a wu kumane ni xiyimu lexo xa ku txhavisa, handle ka ku ganaganeka a wu nge ti xi dzrivala.

² A masikwini yezru hi langutana ni ku tsrekatsreka loku hambaniki, a ku tsrekatsreka koloko a ku nga ti va ntsena ka doropa dzra kukazri kumbe tiko. Kambe ku khumba vhanu hinkwavu nakone ku le ku yentxekeni hi malembe manyingi. Muprofeta Hagayi a profete leswaku ku tsrekatsreka koloko a ku ta yentxeka a masikwini yezru, a tsrale leswi: ‘Yehovha wa makhandzra a hlaya swoleswo, a ku: Ndzra ha ta tsrekatrsekisa kan’we, a nkameni lowu nga kusuhi, a tilu ni misava, ni likhulu ni tiko ledzra ku woma.’​—Hg 2:6.

3. Ha yini hi nga hlayaka leswaku ku tsrekatsreka loku muprofeta Hagayi a khaneliki ha kone ku hambanile ni ku tsrekatsreka ka misava?

³ A ku tsrekatsreka loku muprofeta Hagayi a khaneliki ha kone a ku fani ni ku tsrekatsreka ka misava loku honetelaka mintxhumu ntsena. A matsrhan’wini ya leswo, ku tisa mabindzru lamanene. Yehovha ha byake a li: ‘Ndzri ta tsrekatsrekisa ni matiko hinkwawu, kutani leswi zrandzrekaka swa matiko hinkwawu swi ta ta, ndzri va ndzri tata yindlu leyi hi ku phatima.’ (Hg 2:7) Xana wuprofeta lebyi a byi tlhamuxela yini ka vhanu lava a va hanya a masikwini ya Hagayi? Nakone wuprofeta lebyi byi tlhamuxela yini a masikwini yezru? A hi voneni nhlamulo hi tlhela hi gungula leswaku he xini xiyenge xezru ka ntizro lowu yentxaka matiko ma tsrekatsreka.

4. Ha yini Yehovha a zrumele muprofeta Hagayi ka malandzra yake?

⁴ Yehovha a lelete muprofeta Hagayi leswaku a yentxa ntizro wa lisima swinene. Vona leswi yentxekiki na a nga si na yamukela xiyavelo lexi. Swi tikomba na Hagayi a a li mun’we ka Vayuda lava sukiki a wukazraweni a Babilona, akuva va tlhela a Yerusalema hi 537 M.N.Y. Loko va tlhasile, malandzra lawa ya ku dumbeka ya Xikwembu Nkulukumba ma sungule ku yaka tempele, ku nga yindlu ya Yehovha. (Ezr 3:8, 10) Kambe ntsrhakunyana ku yentxeke ntxhumu lowu vavisaka. Valala va kukazri va va hete ntamu nakone va yime ku yaka tempele. (Ezr 4:4; Hg 1:1, 2) Kutani hi 520 M.N.Y, Yehovha a zrumele Hagayi akuva a pfuna malandzra yake leswaku va tlhela va hiseka ni ku tlhela va yaka tempele. *​—Ezr 6:14, 15.

5. Ha yini hi nga hlayaka leswaku a dzrungula dzra Hagayi dzri tiyise vhanu va Xikwembu Nkulukumba?

⁵ A nkongometo wa dzrungula ledzri Hagayi a dzri byeliki Vayuda a a li ku va a tiyisa lipfumelo dzravu ka Yehovha. Hi xixixi a byele vhanu lava a va hele ntamu a ku: ‘Tiyisani, na n’wine hinkwenu vhanu va tiko ledzri, ku hlaya Yehovha, n’wi va n’wi tizra; hikusa ndzri na n’wine, ku hlaya Yehovha wa makhandzra.’ (Hg 2:4) Swi nga yentxeka xiga lexi liki ‘Yehovha wa makhandzra’ xi va tiyise ngopfu Vayuda. Yehovha a ni khandzra dzra tintsrumi leti mu yingisetaka.

6. He dzrini bindzru ledzri viki kone hi ku tsrekatsreka loku Hagayi a ku profetiki?

⁶ Yehovha a lelete Hagayi akuva a byela Vayuda leswaku a a ta tsrekatsrekisa matiko hinkwawu. Dzrungula ledzro dzri tiyise Vayuda lava a va hele ntamu va tlhela va yima ku yaka tempele; afa ku li xitiyisekiso xa leswaku Yehovha a a ta tsrekatsrekisa Persia. Phela tiko dzra Persia afa ku li tiko dzra ntamu swinene a nkameni luwani. Dzri ve dzrini bindzru dzra kone? Xa ku sungula, vhanu va Xikwembu Nkulukumba a va ta swi kota ku hetisa ku yaka tempele. Handle ka leswo, nambi vhanu lava a va nga li Vayuda a va ta tipatsra ni vhanu va Xikwembu Nkulukumba akuva va mu gandzrela ka tempele ledzri pfuxetiwiki. Hakunene a dzrungula dzra Hagayi dzri tiyise vhanu va Xikwembu Nkulukumba!​—Zk 8:9.

7. Xana he wini ntizro lowu hi patsrekaka ka wone lowu yentxaka matiko ma tsrekatsreka? Tlhamuxela.

⁷ Xana wuprofeta lebyi byi tlhamuxela yini ka hine namunhla? Yehovha a tlhela a tsrekatrsekisa misava, kambe swoswi na hine ha patsreka. Pimisa hi leswi: Hi 1914 a Mfumu wa Xikwembu Nkulukumba wu sungule ku fuma a matilweni, nakone Yehovha a beke Yesu akuva va Hosi ya Mfumu wake. (Ps 2:6) Ledzro ku ve dzrungula dzra ku biha ka tihosi ta misava. Minkama ya vamatiko kutani a yi helile. Hi mazritu mambeni, a wu helile nkama lowu ku kalaka ku nga ha na mhunu lweyi a yimelaka Xikwembu Nkulukumba hi ku kongoma. (Lk 21:24) Xileswo, ngopfungopfu ku sukela hi 1919, vhanu va Yehovha va byela vhanu leswaku Mfumu wa Xikwembu Nkulukumba hi wone ntsena lowu nga kotaka ku helisa swikazratu swa vhanu. Ku zrezriwa ka “madzrungula lamanene ya Mfumu” ku le ku tsrekatsrekiseni ka matiko ku sukela a nkameni luwani.​—Mt 24:14.

8. Hi ku ya hi Amapsalma 2:1-3, xana matiko manyingi ma dzri vonisa kuyini dzrungula dzra Mfumu?

⁸ Xana vhanu va yentxa yini loko va twa dzrungula ledzri? Vhanu vanyingi a va dzri yamukeli. (Dondzra Amapsalma 2:1-3.) A matiko ma le ku kazratekeni. Ma yala Mufumi lweyi a hlawuliwiki ha Xikwembu Nkulukumba. Ka vone dzrungula dzra Mfumu ledzri hi dzri zrezreka a hi ‘madzrungula lamanene’. Ku hlaya ntiyiso  mimfumu yimbeni yi tsimbisile akuva ntizro wa ku zrezra wu yentxiwa! Nambi leswi mimfumu yoleyo yi hlayaka leswaku yi tizrela Xikwembu Nkulukumba, ya ha djula ku tama yi va ni ntamu ni wulawuli. Kutani ku fana ni vafumi va le masikwini ya Yesu, vone va lwa ni mutotiwa wa Yehovha, hikuva va hlasela valandzreli vake va ku dumbeka.​—Min 4:25-28.

9. I yini leswi Yehovha a swi yentxaka nambi loko matiko ma yangula hi ndlela leyi hoxekiki?

⁹ Xana Yehovha a hlamulisa kuyini ka mavonela lama hoxekiki ya matiko? Amapsalma 2:10-12 yi li: ‘Kutani swoswi, tlhazrihani, n’wine tihosi; n’wine, vatsremi va misava, layekani! Tizrelani Yehovha hi ku txhava, n’wi tsrhava hi ku zruzrumela. Khisamelani n’wana, a nga ti hlundzruka. N’wi fa ndleleni yenu; hikusa ku sele nkamanyana, a mahlundzru yakwe ma pfuzra. Va ni ndjombo hinkwavu lava tsrhavelaka ku yene.’ Hi lizrandzru Yehovha a ha nyika nkama valala vake akuva va va ni mukhandlu wa ku txintxa mavonela yavu, va tlhela va pfumela Mfumu wa Xikwembu Nkulukumba. Kambe nkama lowu wu le ku heleni. Swoswi hi le ‘masikwini ya wugamu’ ya xiyimu lexi xa misava. (2Tm 3:1; Eza 61:2) Swoswi ku tlula dzrini, i swa xihatla kuva vhanu va tiva ntiyiso va tlhela va teka swiboho leswinene.

10. Xana buku dzra Hagai 2:7-9 dzri hlaya leswaku a ku tsrekatsreka ka matiko a ku ta yentxa leswaku vhanu va yangula hi ndlela yini leyinene?

¹⁰ Vhanu va kukazri va yangula hi ndlela leyinene ka ku tsrekatsreka loku profetiwiki ha Hagayi. A hi byela hi mabindzru ya ku tsrekatsreka koloko, a li: ‘Leswi zrandzrekaka swa matiko’, ku nga vhanu lava timbilu letinene, va ta sungula ku gandzrela Yehovha. * (Dondzra Hagai 2:7-9.) Nakone vaprofeta vambeni va ku fana na Ezaya na Mika va khanele hi swiyentxakalu swa ku fana ni leswo leswi a swi ta humelela a ‘masikwini ya wugamu’.—Eza 2:2-4; Mik 4:1, 2.

11. Xana makwezru wa kukazri a yangulise kuyini loko a twe dzrungula dzra Mfumu hi khambi dzra ku sungula?

¹¹ Hi xikombiso, vona leswi yentxekeliki makwezru Ken, lweyi swoswi a tizraka a ntsindzra wa misava hinkwayu. Ku khaluta 40 wa malembe na a yingele dzrungula dzra Mfumu hi khambi dzra ku sungula. Loko a dzrimuka ndlela leyi a titwiki ha yone hi khambi dzra ku sungula ingi hi  loko e swi twa namunhla. A li: “Loko ni twe ntiyiso wa Zritu dzra Xikwembu Nkulukumba hi khambi dzra ku sungula ni nyonxe ngopfu swinene hi ku dondzra leswaku hi hanya ka masiku ya wugamu ya xiyimu lexi xa mintxhumu. Ni twisise leswaku akuva ni yamukeliwa ha Xikwembu Nkulukumba ni ku va ni kuma wutomi lebyi nga helikiki a ni fanela ku tsrhika misava leyi ni va ni yima na Yehovha. Kolanu ni khongotile ni va ni yentxa leswi a swi vileleka. Ni tsrhike mintxhumu ya misava leyi, ni va ni djuletela nsizrelelo ka Mfumu wa Xikwembu Nkulukumba lowu taka kala wu nga helisiwi.

12. Ka masiku lawa ya wugamu hi hanyaka ka wone xana tempele dzra moya dzra Xikwembu Nkulukumba dzri tale hi lidzrumu hi ndlela yini?

¹² A hi na ku ganaganeka ka leswaku Yehovha a tovokisa vhanu vake. Ka masiku lawa ya wugamu, nhlayu ya vhanu lava pfumelaka ku gandzrela Xikwembu Nkulukumba yi ya yi yandzra. Hi 1914 a ho va nhlayunyana ntsena. Namunhla hi tlula 8.000.000 wa vagandzreli lava hisekaka va Xikwembu Nkulukumba, nakone vhanu va ntsrandzravahlayi va tipatsra na hine lembe ni lembe akuva hi dzrimuka lifu dzra Yesu. Hi ndlela leyo, a xiyenge xa lani misaveni xa tempele dzra Yehovha dzra moya, ku nga lulamiselo dzra wugandzreli bya ku xwenga lebyi a byi simekiki, dzri tala hi ‘leswi zrandzrekaka swa matiko’. Handle ka ku ganaganeka leswo swi dzrumisa Yehovha, kambe ntxhumu wumbeni lowu wu dzrumisaka vito dzra Yehovha i ku txintxa loku vhanu volavu va ku yentxaka akuva va yambala wumhunu lebyimpshwa.​—Ef 4:22-24.

13. Xana he byini wuprofeta lebyi hetisekaka hi ku yengeteleka ka vagandzreli va Yehovha? (Vona xifaniso lexi nga ka kapa.)

¹³ Hinkwaswu leswi yentxekaka swi hetisisa wuprofeta byimbeni bya ku fana ni lebyi nga ka Ezaya ndzrima 60. A ndzrimana 22 ya ndzrima leyi yi li: ‘Lwentsrongo a ta ndzruluka khume dzra madzana; lwentsrongo a ta a ndzruluka tiko ledzra ntamu. Mine Yehovha, ndzri ta hangweyesisa mintxhumu leyi a minkameni ya yone.’ Hi mhaka ya ku yengeteleka ka vhanu lava va gandzrelaka Xikwembu Nkulukumba, ku yentxeka ntxhumu wa ku hlamalisa. Loko swi ta nhlengeletanwini ya Yehovha, ‘leswi zrandrekaka swa matiko’ swi ta ni wuswikoti bya ku hambanahambana, ngopfungopfu ku tinyikela a ku zrezreni ka ‘madzrungula lamanene’. Ezaya a vitane wuswikoti lebyi byi tizrisiwaka hi vhanu va Xikwembu Nkulukumba swanga ‘mafi  ya vamatiko’. (Eza 60:5, 16) Hi ku pfuniwa hi vavanuna ni vavasati lava nga ni wuswikoti, a ntizro wa ku zrezra wu yentxiwa a matikweni lama tlulaka 240 nakone ku ndzruluteliwa mabuku hi tindzrimi leti ti tlulaka 1.000.

14. He xini xiboho lexi vhanu va fanelaka ku xi teka swoswi?

¹⁴ A nkameni lowu wa wugamu hikuva Yehovha a yentxaka matiko ma tsrekatsreka, vhanu va tivona na va sindzriseka ku teka xiboho xa kukazri. Xana va ta seketela Mfumu wa Xikwembu Nkulukumba kumbe va ta dumba mimfumu ya misava leyi? Lexo i xiboho lexi hinkwezru hi fanelaka ku xi teka swoswi. I ntiyiso leswaku a hi vaxandzruki. Swanga malandzra ya Yehovha, hi yingiseta milawu ya tiko kambe a hi tipeti ka mintxhumu ya politika ya misava leyi. (Ro 13:1-7) Ha swi tiva leswaku a Mfumu lowu dumbekaka lowu nga helisaka swikazratu swa vhanu o va Mfumu wa Xikwembu Nkulukumba ntsena. Mfumu lowo a wu hambi xiyenge xa misava leyi.​—Yh 18:36, 37.

15. He kwini ku dzringiwa ka lipfumelo loku buku dzra Apfuletelo dzri khanelaka ha kone?

¹⁵ A buku dzra Apfuletelo dzri vulavula hi ku dzringiwa ka vhanu va Xikwembu Nkulukumba va ku dumbeka a masikwini ya wugamu. Ku dzringiwa loko, ku ta patsra ku xanisiwa ngopfu swinene. A mimfumu yi ta sindzrisa leswaku hi yi gandzrela hi tlhela hi yi seketela, nakone yi ta xanisa lava va yalaka ku yentxa leswo. (Mpf 13:12, 15) Yi ta sindzrisa kuva hinkwavu ‘lavatsrongo ni lavakulu, vafuyi ni swisiwana, vantsrhunxeki ni vandjema, va nyikiwa swifungu a vokweni dzravu dzra xinene, kumbe a mimombyeni yavu’. (Mpf 13:16) A minkameni ya khale a swikazrawa a swi yamukela mfungu lowu a wu kombisa leswaku swi lumba mani. Hi ndlela leyi fanaka, a mimfumu yi ta yimela leswaku vhanu hinkwavu va va ni mfungu kumbe va kombisa leswaku va seketela mani. Nakone a ta va mimpimiso ni mintizro ya vhanu leyi taka kombisa leswaku vhanu va seketela mimfumu ya politika.

16. Ha yini swi li swa xihatla kuva hi kambela ku dumbeka kwezru ka Yehovha?

¹⁶ Hine ke? Xana hi ta pfumela ku yamukela xifungu? Xana hi ta seketela mimfumu? Lweyi a yalaka ku yentxa leswo a ta kumana ni swikazratu. A buku dzra Apfuletelo dzri tlhamuxela leswaku a ku na ‘mhunu lweyi a nga kotaka ku xava ni ku xavisa, loko a nge lweyi a nga ni xifungu’. (Mpf 13:17) Kambe malandzra ya Xikwembu Nkulukumba ma swi tiva leswi taka yentxekela lava taka yamukela xifungu lexi kombisiwiki ka buku dzra Apfuletelo 14:9, 10. Xileswo, a matsrhan’wini ya ku yamukela xifungu, va ta tsraliwa leswi a mavokweni yavu: ‘Mine ndzri wa Yehovha.’ (Eza 44:5) Swoswi i nkama wa ku tikambela loko hi li lava dumbekiki ka Yehovha. Loko hi dumbeka ka Yehovha a ta tikhuza hi ku va hi li vhanu vake!

17. Xana i yini leswi hi fanelaka ku swi dzrimuka hi ku lehisa mbilu ka Yehovha?

¹⁷ A masikwini lawa ya wugamu Yehovha a lehisa ngopfu mbilu. A nga djuli leswaku ni mun’we a suvisiwa. (2Pe 3:9) Nakone a nyika mukhandlu hinkwavu akuva va tisola va tlhela va teka xiboho lexinene. Kambe Yehovha a nga ti lehisa mbilu hi lani ku nga helikiki. Lweyi a yalaka mukhandlu lowu Yehovha a nyikaka vhanu hinkwavu, a ta va ka xiyimu xa ku fana na Faro, a masikwini ya Moxe. Yehovha a byele Faro a ku: ‘Loko a fa ndzre ku tlakuxa voko dzranga, dzri ku ba, wene ni vhanu vaku hi ntungu, anha u suvile misaveni. Kambe kunene ndzri ku yimisi hi leswi, akuva ndzri ku komba ntamu wanga, ni kuva vito dzranga dzri twala a misaveni hinkwayu.’ (Eks 9:15, 16) Matiko hinkwawu ma ta sindzriseka ku pfumela leswaku Yehovha hi yene Xikwembu Nkulukumba wa ntiyiso. (Ezk 38:23) Xana swi ta yentxekisa kuyini leswo?

18. a) He kwini ku tsrekatsreka kumbeni loku ku kombisiwiki ka Hagai 2:6, 20-22? b) Hi swi tivisa kuyini leswaku a mazritu ya Hagayi ma ta hetiseka a nkameni lowu taka?

 ¹⁸ Malembe ya kukazri ntsrhaku ka loko Hagayi a file, mupostola Pawulo a huhuteliwe ku tsrala leswaku a mazritu lama kumekaka ka Hagai 2:6, 20-22 a ma ta hetiseka a nkameni lowu ta ka. (Dondzra.) Pawulo a tsrale leswi: ‘Swoswi a hi dumbisa a ku: ‘Kan’we kambe ndzri ta tsrekatsrekisa, mi nge misava ntsena, kambe ni dzro tilu. A zritu [dzra ku] kan’we kambe, dzri kombisa ku susiwa ka mintxhumu lemi tsrekatsrekaka, lemi yentxiwiki khale, akuva ku tsrhama leswi nga tsrekatsrekikiki.’ (Hb 12:26, 27) Kambe ku tsrekatsreka loku ku hambanile ni loku ku kombisiwaka ka Hagai 2:7. Swi tlhamuxela leswaku vhanu lava, ku fana na Faro, va ta helisiwa hi lani ku nga helikiki.

19. I yini lexi taka kala xi nga tsekatsrekisiwi, nakone hi swi tivisa kuyini leswo?

¹⁹ Xana i yini lexi nga tiki tsrekatsrekisiwa kumbe ku helisiwa? Pawulo awa tlhamuxela: ‘Leswi hi yamukeliki a Mfumu lowu nga tsrekatsrekikiki, a hi veneni ni ku tlangela, loku hi nga gandzrelaka Xikwembu Nkulukumba ha kone, hi laha a tsrhavisiwaka ha kone, hi xitxhavu ni ku zruzrumela.’ (Hb 12:28) Ntsrhaku ka ku tsrekatsreka ka wugamu, ko va mfumu wa Xikwembu Nkulukumba ntsena lowu taka va kone. Wu tava kone hi lani ku nga helikiki!​—Ps 110:5, 6; Dn 2:44.

20. He xini xiboho lexi vhanu vanyingi va fanelaka ku xi teka, nakone hi nga va pfuna hi ndlela yini?

²⁰ A nkama lowu saliki i wutsrongo! A vhanu va fanela ku langa leswaku va ta tama va hanya hi ku landzra mahanyela ya misava kumbe va ta tikazratela ku hanya hi ku landzra ku zrandzra ka Xikwembu Nkulukumba. Loko va langa swa ku sungula va ta helisiwa, kambe loko va langa swa wubidzri va ta kuma wutomi lebyi nga helikiki. (Hb 12:25) Loko hi zrezrela vambeni, hi ta va pfuna kuva va teka xiboho lexo xa lisima, hi ta tama hi pfuna leswi zrandzrekaka akuva swi tama swi seketela Mfumu wa Xikwembu Nkulukumba. Hi fanela ku tama hi dzrimuka leswi Hosi Yesu a hi leletiki swone, loko a ku: “Nakone madzrungula lamanene ya Mfumu ma ta zrezriwa a misaveni hinkwayu akuva ku va wumboni ka matiko hinkwawu, kutani hi kone wugamu byi taka tlhasa.”​—Mt 24:14.