1-2. Nyen la a yeke yengi ni na ngoi ti e so prophète Aggée asara tënë ni?

MBENI zo so asö kuâ na peko ti so sese ayengi ngangu na Népal na ngu 2015 atene: “Gï na yâ ti kete penze-ngbonga, amagazin nga na angbene da akomanse ti kungbi.” Mbeni zo ni nde atene: “Na ndo kue li ti azo aga kirikiri . . . Azo mingi atene so yengingo ti sese ni aninga gï penze-ngbonga use tongaso. Na mbi, sese ni ayengi aninga mingi.” Tongana mara ti ye ti mbeto tongaso asi na mo, mo yeke girisa ni hio ape.

² Ye oko, ti ndembe so, e yeke tâ na ngoi ti mbeni yengingo ti sese so ayeke nde, gï mbeni gbata wala mbeni kodro la ayeke yengi ape. Jéhovah ayeke yengi amara kue ti dunia, na lo yeke sara ni a sara angu mingi awe. Prophète Aggée asara lani tënë ti yengingo amara so. Lo tene: “Jéhovah ti aturugu atene: ‘Na yâ ti kete ngoi, mbi yeke kiri ande ti yengi yayu, sese, ngu-ingo nga na kuru sese.’”—Ag. 2:6.

3. Tongana nyen la yengingo amara so ayeke nde na tâ yengingo ti sese?

³ Yengingo amara so Aggée asara tënë ni ayeke tongana tâ yengingo ti sese ape, so ayeke futi gï aye. Me yengingo amara ni aga na anzoni ye. Jéhovah wani atene na e, atene: “Mbi yeke yengi amara kue, nga aye ti nginza ti amara kue ayeke ga ande na yâ ti da so, na mbi yeke sara si da ni asi na gloire.” (Ag. 2:7). Prophétie so aye ti tene nyen ndali ti azo so ayeke lani na fini na ngoi ti Aggée? A ye nga ti tene nyen ndali ti e laso? E yeke kiri tënë na ahunda so nga e yeke bâ tongana nyen la e lingbi ti mû mbage na yâ ti kua ti yengingo amara laso.

4. Ngbanga ti nyen la Jéhovah atokua lani prophète Aggée na azo ti lo?

⁴ Jéhovah amû na prophète Aggée mbeni kpengba kua ti sara. Gbu li na ndö ti ye so asi kozo na ni. Aggée ayeke peut-être lani na popo ti azo so alondo na Babylone akiri na Jérusalem na ngu 537 kozo na ngoi ti e. Kete na peko ti so awakua be-ta-zo ti Jéhovah so akiri na Jérusalem, ala zia fondation ti da ti Jéhovah, wala temple (Esdras 3:8, 10). Me gï kete na pekoni, mbeni ye ti vundu asi. Azo ni adécouragé, ala zia lege ti kua ni ndali ti so a kanga lege na ala (Esdras 4:4; Ag. 1:1, 2). Tongaso, na ngu 520 kozo na ngoi ti e, Jéhovah atene na Aggée ti mû maboko na aJuif ti kiri ti yapu nga ti wa ala ti hunzi kua ti lekengo temple ni. *—Esdras 6:14, 15.

5. Ngbanga ti nyen la atënë ti Aggée adoit lani ti kpengba awakua ti Nzapa?

⁵ Atënë so Aggée atene ayeke lani ti kpengba mabe so aJuif ayeke na ni na Jéhovah. Sân mbeto, prophète ni atene lani atënë so na aJuif so adécouragé, lo tene: “Jéhovah akiri atene: ‘Ala azo ti kodro ni kue, ala sara ye tongana koli nga ala sara kua. Biani, mbi yeke na ala,’ tënë ti yanga ti Jéhovah ti aturugu la.” (Ag. 2:4). Tënë “Jéhovah ti aturugu” adoit lani ti kpengba ala. Jéhovah ayeke na komandema na ndö ti gbâ ti a-ange so ayeke aturugu, tongaso aJuif abezoin lani ti zia bê ti ala kue na lo ti hunzi kua ti ala.

6. Nyen la ayeke si na peko ti yengingo amara so Aggée asara tënë ni?

⁶ Jéhovah atokua Aggée ti tene na aJuif so lo yeke yengi amara kue. Ye so a fa so akpengba lani aJuif so adécouragé nga so azia ti leke temple ni. Vision ni afa so Jéhovah ayeke yengi kodro ti Perse so ayeke na ngangu mingi na ngoi ni kâ. Nyen la ayeke si na pekoni? Kozoni, awakua ti Nzapa ayeke hunzi lekengo temple ni. Na pekoni, même azo so ayeke aJuif ape ayeke bungbi na ala ti voro Jéhovah na yâ ti temple so a kiri a leke ni. Tënë so adoit lani ti kpengba awakua ti Nzapa mingi.—Zach. 8:9.

7. Kua wa la ayeke yengi azo so e yeke sara ni laso? Fa ndani so mo tene tongaso.

⁷ Prophétie ti Aggée aye ti tene nyen ndali ti e laso? Ge encore Jéhovah ayeke yengi amara kue, na ti so ni so e yeke mû mbage dä. Gbu li na ndö ti ye so: Na ngu 1914, Jéhovah azia Jésus Christ Gbia ti Royaume ti lo na yayu (Ps. 2:6). So Royaume akomanse ti komande, a yeke mbeni sioni sango ndali ti azo so ayeke na komandema na yâ ti dunia. A ye ti fa so “ngoi so a fa ndali ti amara” ahunzi awe. So ti tene, ngoi so mbeni gbia ti komande na iri ti Jéhovah ayeke dä ape ahunzi awe (Luc 21:24). Ndani la ngbene ye na ngu 1919 ti ga na ni, awakua ti Jéhovah afa so gï Royaume ti Nzapa la ayeke oko beku ti azo. Fango “nzoni tënë ti Royaume” so ayengi dunia kue.—Mat. 24:14.

8. Ti gue oko na Psaume 2:1-3, mingi ti amara asara ye tongana nyen na peko ti so ala mä tënë so e fa?

⁸ Azo asara ye tongana nyen na peko ti so ala mä tënë so e fa? Mingi ti ala ake tënë ni. (Diko Psaume 2:1-3.) Amara alondo na wusuwusu. Ala ke ti yeda na gbia so Jéhovah asoro lo. Ala pensé ape so tënë ti Royaume so e yeke fa ayeke “nzoni tënë”. Ambeni gouvernement akanga même lege na kua ti fango tënë. Atâa so agbia mingi ti amara atene ala yeke voro Nzapa, ala ye pëpe ti zia lege ti komandema ti ala. Laso, agbia ake Lo so  Jéhovah asoro lo na lege so ala sara aye ti ngangu na adisciple ti lo so ayeke be-ta-zo, gï tongana ti so ala sara lani na ngoi ti Jésus.—Kus. 4:25-28.

9. So amara ake ti yeda na tënë ti Royaume, Jéhovah azia ngoi na ala ti sara nyen?

⁹ So amara ake ti yeda na tënë ti Royaume, Jéhovah azia ngoi na ala ti sara nyen? Psaume 2:10-12 akiri tënë, atene: “Tongaso, agbia, ala sara ye na ndara; ajuge ti sese, ala yeda si a kiri na ala na nzoni lege. Ala sara na Jéhovah na mbeto na bê, ala duti na ngia me ala kpe mbeto ti lo. Ala ne molenge ni, tongaso pëpe Nzapa ayeke sara ngonzo, na ala yeke kui na lege, ndali ti so ngonzo ti lo ayeke londo hio. Ngia ayeke na azo kue so akpe na mbage ti lo ti bata terê ti ala.” Na nzoni bê, Jéhovah azia ngoi na ala ti mû nzoni desizion. Ala peut ti changé nga ti mû desizion ti yeda na Royaume ti Jéhovah. Me ngoi angbâ mingi ape. E yeke na “lâ ti nda ni” ti aye ti ngoi so (2 Tim. 3:1; És. 61:2). Azo adoit ti sara ye hio ti hinga tâ tënë nga ti mû nzoni desizion.

10. Nzoni ye ti peko ti kua ti yengingo amara so Aggée 2:7-9 asara tënë ni ayeke nyen?

¹⁰ Ambeni zo ayeda na tënë so azo ti sarango kua ti yengingo amara, so Aggée asara tënë ni, ayeke fa. Lo tene so ye ti peko ni ayeke so “aye ti nginza ti amara kue [azo so aye ti hinga Jéhovah] ayeke ga ande” ti voro Jéhovah. * (Diko Aggée 2:7-9.) Ésaïe na Michée atene nga lani so ye so ayeke si “na lâ ti nda ni.”—És. 2:2-4, kete tënë na gbe ni; Mi. 4:1, 2, kete tënë na gbe ni.

11. Mbeni ita-koli asara ye tongana nyen na ngoi so lo mä ti kozoni tënë ti Royaume?

¹¹ Gbu li na ndö ti ye so Ken, mbeni ita-koli so ayeke sara kua fadeso na kota ndokua ti e, asara na ngoi so lo mä pendere tënë so. Lo ngbâ ti dabe ti lo na ngoi so lo mä tënë ti Royaume ti kozoni a sara ngu 40 tongaso awe. Ken atene: “Na ngoi so mbi mä tâ tënë ti  Bible ti kozoni, mbi yeke lani na ngia ti hinga so e yeke na lâ ti nda ni ti aye ti ngoi so. Mbi bâ lani so ti zia ngia na bê ti Jéhovah nga ti wara fini ti lakue lakue, mbi doit ti mû mbage ti dunia so ape, so zo adoit ti zia bê ti lo dä ape, nga ti luti ngangu na mbage ti Jéhovah. Hio mbi leke na bê ti mbi ti sara tongaso nga mbi fa ni na Jéhovah na yâ ti sambela. Mbi zia ti mû mbage ti dunia so nga mbi kpe na mbage ti Royaume ti Nzapa ti bata terê ti mbi, Royaume so mbeni ye apeut ti yengi ni ape.”

12. Tongana nyen la temple ti Jéhovah ti yingo asi na gloire na lâ ti nda ni so?

¹² A yeke polele so Jéhovah ayeke sara tufa na ndö ti awakua ti lo. Na lâ ti nda ni so, e bâ so wungo ti azo so ayeke voro lo ague na li ni mingi. Na ngu 1914, wungo ti e lani ayeke saki mingi ape. Fadeso, e so e yeke voro Jéhovah, wungo ti e ahon kutu miombe, na azo kutu mingi ayeke bungbi na e ngu oko oko ti sara Mémorial. Ye so asara si, na sese ge, alacour ti temple ti Jéhovah ti yingo, so ti tene, ye so lo leke ti tene a voro lo na lege ni, asi singo na “aye ti nginza ti amara kue”. Achangement so azo so asara ti yü fini zo asara nga si iri ti Jéhovah awara gloire.—aÉph. 4:22-24.

13. Wungo ti awakua ti Jéhovah so ague na li ni asara si ambeni prophétie wa aga tâ tënë? (Bâ foto ti couverture ni.)

¹³ Wungo ti awakua ti Jéhovah so ague na li ni asara si ambeni prophétie aga tâ tënë, na tapande, ti so a yeke na Ésaïe chapitre 60. Versê 22 atene: “Azo so wungo ti ala ayeke gï kete ayeke ga saki oko, na asenge zo ayeke ga mbeni ngangu mara. Mbi Jéhovah, mbi yeke sara si ye ni asi hio tongana ngoi ni alingbi.” So gbâ ti azo akomanse ti voro Jéhovah, mbeni ye so apika bê mingi asi. “Aye ti nginza”, wala azo so, ayeke na akode nde nde nga ala yeda na bê ti ala wani ti fa “nzoni tënë ti Royaume”. Ye so asara si azo ti Jéhovah alingbi ti sara kua na akode so, so Ésaïe ahaka ni na “ngu ti me ti amara”. (És. 60:5, 16). Grâce na mungo maboko ti azo so, e yeke fa tënë na yâ ti akodro 240 nga e yeke sigi na ambeti ti e na ayanga ti kodro ahon 1 000.

14. Desizion wa la azo adoit ti mû laso?

¹⁴ Na lâ ti nda ni so, kua ti yengingo amara ayeke pusu azo ti mû mbeni desizion. Eskê ala yeke mû maboko na Royaume ti Nzapa wala ala yeke zia bê ti ala na agouvernement ti dunia so? So ayeke desizion so zo kue adoit ti mû. Atâa so awakua ti Jéhovah ayeke sara ye alingbi na andia ti agouvernement ti akodro so ala yeke dä, ala yeke yôro terê ti ala oko pëpe na yâ ti aye ti poroso ti dunia so (aRom. 13:1-7). Ala hinga so gï Royaume la ayeke tâ yorö ti akpale ti azo. Royaume so ayeke ti dunia so ape.—Jean 18:36, 37.

15. Tongana nyen la mbeti ti Apocalypse afa so a yeke tara awakua ti Nzapa ti bâ wala ala yeke duti ande be-ta-zo?

¹⁵ Mbeti ti Apocalypse afa so, na lâ ti nda ni, a yeke tara awakua ti Nzapa ti bâ wala ala yeke duti ande be-ta-zo. Na ngoi ti tara so, azo ayeke ngbâ ti kanga lege na e ngangu nga ti sara aye ti ngangu na e mingi. Agouvernement ti dunia so ayeke hunda ande ti tene e voro ala nga ala yeke sara ye ti ngangu na azo so ake ti mû maboko na ala (Apoc. 13:12, 15). Ala yeke “gbu azo kue na ngangu, akete zo na akota zo, azo ti mosoro na awayere, azo so ayeke ngbâa pëpe na angbâa, ti tene a zia mbeni marque na ndö ti maboko ti ala ti koli wala na ndö ti lê ti ala”. (Apoc. 13:16). Na ngoi ti giriri, a yeke zia mbeni marque na terê ti angbâa ti fa zo so ayeke wa ti ala. Legeoko nga, a yeke hunda ande na azo kue ti ngoi ti e ti wara mbeni marque na maboko ti ala wala na ndö ti lê ti ala. Aye so ala yeke gbu li na ndö ni nga na asarango ye ti ala ayeke fa so ala yeke ti abungbi ti poroso nga ala yeke mû maboko na ni.

16. Ngbanga ti nyen la a yeke kota ye laso ti tene e duti be-ta-zo na Jéhovah ahon ti kozo?

¹⁶ Eskê e yeke yeda ti wara ye so ayeke tongana marque nga ti mû maboko na agouvernement ti azo? Azo so ake ti wara marque so ayeke wara akpale nga aye ti sioni apeut ti si na ala. Mbeti ti Apocalypse atene: “Mbeni zo awara lege ti vo ye wala ti kä ye pëpe, me gï zo so ayeke na marque ni.” (Apoc. 13:17). Me awakua ti Nzapa ahinga ye so Nzapa ayeke sara ande na azo so ayeke na marque so a sara tënë ni na Apocalypse 14:9, 10. Ahon ti tene ala yeda na marque so, a yeke duti mo bâ mo tene ala sû na ndö ti maboko ti ala: “Zo ti Jéhovah.” (És. 44:5). Laso ayeke ngoi so e doit ti sara kue ti duti be-ta-zo na Jéhovah mingi. Tongana e sara tongaso, a yeke nzere ande mingi na Jéhovah ti tene so e yeke ti lo.

17. Nyen la e doit ti girisa ape na ndö ti kangango bê ti Jéhovah?

¹⁷ Jéhovah akanga bê mingi na lâ ti nda ni so. Lo ye ti tene a futi zo oko ape (2 Pi. 3:9). Lo zia ngoi na azo kue ti changé bê ti ala nga ti mû nzoni desizion. Me lo yeke ngbâ ti kanga bê lakue lakue ape. Azo so ake ti changé bê ti ala nga ti mû nzoni desizion ayeke wara mara ti ye so asi lani na Pharaon na ngoi ti Moïse. Jéhovah atene lani na Pharaon, lo tene: “Mbi lingbi fade ti yôro maboko ti mbi ti punir mo na azo ti mo na kobela so afuti kodro, si mo girisa na ndö ti sese. Me, a yeke ndali ti ye so la si mbi zia mo ti ngbâ na fini: ti fa na mo ngangu ti mbi na ti sara si a fa iri ti mbi na ndö ti sese kue.” (Ex. 9:15, 16). Nyen na nyen, amara kue ayeke hinga ande so Jéhovah ayeke oko tâ Nzapa (Ézéch. 38:23). A yeke si ande tongana nyen?

18. (a) Mara ti yengingo ye wa la a sara tënë ni na Aggée 2:6, 20-22? (b) E hinga tongana nyen so atënë ti Aggée so ayeke ga ande tâ tënë na yâ ti angoi so ayeke ga?

 ¹⁸ Angu ngbangbo mingi na peko ti Aggée, yingo vulu apusu bazengele Paul ti fa so atënë so ayeke na Aggée 2:6, 20-22 ayeke ga tâ tënë na yâ ti angoi so ayeke ga. (Diko ni.) Paul atene: “Me ti fadeso lo mû zendo so: Mbi yeke kiri ande ti yengi gï sese pëpe, me yayu nga. So lo tene ‘mbi yeke kiri ande ti’, a ye ti fa so lo yeke zi aye so a yeke yengi ni, so ti tene aye so a leke ni, si aye so a yengi pëpe angbâ ti ala.” (aHéb. 12:26, 27). Nde na yengingo so a sara tënë ni na Aggée 2:7, yengingo ti so aye ti tene a yeke futi biani biani azo so, legeoko tongana Pharaon, ake ti yeda na droit ti Jéhovah ti komande.

19. Nyen la a yeke yengi ni ande ape? E hinga ni tongana nyen?

¹⁹ Nyen la a yeke yengi ni, wala a yeke zi ni, ande ape? Paul atene: “Na bango so e yeke wara ande mbeni Royaume so a lingbi ti yengi ni pëpe, zia e ngbâ ti duti na kota nzobe, so na lege ni e lingbi ti sara kusala so ayeke nzoni-kue na lê ti Nzapa na kpengo mbeto ti lo nga na dongo bê.” (aHéb. 12:28). Na peko ti ndangba kota yengingo ye so, gï Royaume ti Nzapa oko la ayeke yengi ni ape. A yeke ngbâ ti luti ngangu na place ni.—Ps. 110:5, 6; Dan. 2:44.

20. Desizion wa la azo adoit ti mû ni? Tongana nyen la e peut ti mû maboko na ala?

²⁰ Azo adoit ti sara ye hio. Ala doit ti soro na popo ti aye so: Tongana ala soro ti ngbâ ti mû maboko na dunia so, a yeke futi ande ala. Me tongana ala soro ti sara na Jéhovah nga ti sara achangement so a hunda ti sara ye so bê ti lo aye, ala yeke wara ande fini ti lakue lakue (aHéb. 12:25). Na lege ti fango tënë ti e, e lingbi ti aidé azo ti mû kpengba desizion so. Zia e aidé azo mingi encore so ayeke aye ti ngangu ngere ti mû maboko na Royaume ti Nzapa. Nga, zia e girisa ape atënë ti Seigneur ti e Jésus, so atene: “A yeke fa ande nzoni tënë ti Royaume na ndö ti sese kue so azo ayeke dä tongana mbeni tënë ti témoin ndali ti amara kue. Na pekoni, nda ni ayeke ga.”—Mat. 24:14.