1-2. Masaalaanchu Hage dirinkera hiittoo shafama heedhanno yee masaalino?

“SHIIMU daqiiqi giddo, suuqqanna lowo diro heedhino minna toˈe uulla ubbu.” “Mannu baalu mase qece yiino . . . Batinyu manni baatto mito lame daqiiqalla huxidhino yiino. Ani kayinni mase quuxxi yoommo daafira, lowo saate huxidhinoha lawinoe.” Tenne coyidhinori 2015nni Neppaali gobbara baatto huxidhu woyite gatte saˈino mannootaati. Aterano togoohu waajjishanno coyi tuncu yiinoheha ikkiro, horo hawattokkiti egennantinote.

² Ikkollana, yannankera aleenni kulli shafamanni baxxitino shafama ikkitanna laˈnanni heeˈnoommo. Yihowa yannankera mitto katama woy mitte gobba calla ikkikkinni daga baala shafanni no; qoleno konni garinni daga shafanna lowo diri saino. Masaalaanchu Hage tenne shafama daafira masaalo coyiˈrino. Togo yee borreessino: “Olantote Mootichi Kaaliiqi [togo yaanno]: ‘Harancho yanna giddo, galagale gordonna gobba baaranna baatto shafeemmo.’”—Hage 2:6.

3. Hage masaalino shafama baattote huxanowiinni baxxitannohu hiittoonniiti?

³ Hage masaalino shafama baattote huxano gede diˈˈikkitino; baattote shafama gawajjitannota ikkinnina kaaˈlitannori dino. Hage masaali shafama kayinni danchuri ikkanno gede assitannote. Yihowa umisi togo yiino: “Daga baala shafeemmo; daga baalate mereero noohu ayirradu coyi daanno; konne mineno ayirrinyu woˈmanno gede asseemmo.” (Hage 2:7, NW) Tini masaalo Hage waro noo manna kaaˈlitinohu hiittoonniiti? Ninke yannara mayi tiro afidhinoyya? Konni birxichira kuri xaˈmuwara  dawaro afiˈneemmo; qoleno yannankera daga shafate looso kaaˈla dandiineemmo gara ronseemmo.

4. Yihowa mannisiwa masaalaancho Hage soyinohu mayiraati?

⁴ Yihowa Hagera mitto lowo geeshsha hasiisanno looso uyinosi. Hanni hakkuyira albaanni mayi ikkinoro laˈno. Gamu Ayihudete manni 537 K.A., Baabiloonete qafadonni fule Yerusaalame higino; Hageno insa ledo higikki digatino. Kuni ammanamino manni Yerusaalame iillihunni shiima yanna gedensaanni, Yihowa mine wirro minate safo safino. (Izi. 3:8, 10) Ikkollana, mulenni dadillisanno coyi tuncu yiinonsa. Insa qooxeessaho noo manni waadinonsa daafira, hexxo mudhite qullaawa mine mina agurtino. (Izi. 4:4; Hag. 1:1, 2) Konni daafira 520 K.A., insa wirro diinaggaabbe loosse qullaawa mine minte guddanno gede jawaachishansara Yihowa Hage soyino. *—Izi. 6:14, 15.

5. Hage kulino sokka Maganu manna jawaachishshukki digattino yineemmohu mayiraati?

⁵ Yihowa Hage tenne sokka kulanno gede assinohu Ayihudete manni ammana kaajjishateeti. Masaalaanchu Hage hili geeshshano waajjikki, hexxo mudhinohura Ayihudete mannira togo yee kulino: “‘Xa kayinni baalunku jawaatte! Ani ledoˈne noommona minne!’ yaanno Olantote Mootichi Kaaliiqi.” (Hag. 2:4) “Olantote Mootichi Kaaliiqi” yitanno yaatto, jawaachishshinonsati dihuluullissannote. Yihowa lowota sokkaasinete olanto hajajanno Mootichaati; hakko daafira, Ayihudete manni qinaannonsa gede iso addaxxa hasiissannonsa.

6. Hage masaalino shafama mayi ikkanno gede assitanno?

⁶ Yihowa daga baalanta shafannota Ayihudete mannira kulanno gede Hage soyino. Yihowa soyinoti tini sokka hexxo mudhe qullaawa mine mina agure nooha Ayihudete manna jawaachishshino. Hatti sokka, Yihowa hakkawaro alame woˈmate wolqaataamo ikkinoha Faarsi gashshoote shafannota kultannote. Tini shafama abbitanno gumi maati? Umihunni, Maganu manni qullaawa mine mine gudanno. Layinkihunni, haarote minnoonnihu qullaawu minira Ayihude ikkinokki manni insa ledo Yihowa mitteenni magansiˈranno. Konni daafira, hatti sokka Maganu manna lowo geeshsha jawaachishshinoti dihuluullissannote!—Zak. 8:9.

7. Yannankera ninke kaaˈlinanni heeˈnoommohu daga shafate loosi hiikkoyeti? Xawisi.

⁷ Hage masaalino masaalo yannankera mayi tiro afidhino? Xaa yannarano Yihowa daga baalanta shafanni no; ninkeno konne looso kaaˈla dandiineemmo. Hanni tenne hedi: Yihowa 1914nni gordu Gashshootisira Moote ikkanno gede Yesuusi Kiristoosi shoomino. (Far. 2:6) Tini Mangiste xintantinota alamete gashshaano dibaxxino. Maganu Mangiste gashsha hanaffu yaa, “dagate yanna” saˈino yaate; wole yaattonni, Yihowa shoomino gashshaanchi nookkiha mannu insaneeto gashshino yanna gooffino yaate. (Luq. 21:24) Konninni kainohunni, hakko iso 1919 kawa, Yihowa soqqamaasine mannu ooso qarra baalanka tirtannoti Maganu Mangiste calla ikkitinota dudubbanni keeshshitino. Kuni ‘Maganu Gashshootiha Dancha Duduwo’ duduwate loosi, alame woˈma shafino.—Mat. 24:14.

8. Faarso 2:1-3 kultanno garinni, roore daga dudumbeemmo sokka macciishshite hiitto ikkitino?

⁸ Mannu tenne sokka maahoyye yee macciishshino? Rooru manni macciishsha giwino. (Faarso 2:1-3 nabbawi.) Daga macciishsha gibbe gunguntino. Insa Yihowa  shoomino Gashshaanchira hajajama gibbino. Dudumbeemmoti Maganu Mangiste sokka insara “dancha duduwo” diˈˈikkitino. Mite mangistubba isinni sabbakate loosonke hooltino! Hattee gobbuwara heedhannoti batinye gashshaasine Magano magansiˈneemmoreeti yiturono, silxaanensa sayisse aa dihasidhannoreeti. Konnira Yesuusi waro noo gashshaasine assitinonte gede, yannankera noo gashshaasineno ammanantinore Yesuusi rosaano gawajjite Yihowa buurinoha konne Moote gibbannota leellishshino.—Soq. 4:25-28.

9. Yihowa Maganu Mangiste sokka macciishsha gibbino daga kaaˈlate maa assino?

⁹ Yihowa Maganu Mangiste sokka macciishsha gibbino daga kaaˈlate maa assino? Faarso 2:10-12 togo yitanno: “Xaano kiˈne mootoolla, wodana asse; kiˈne gobba gashshitinoonniri qorophe. Kaaliiqira waajjatenni soqqamme; isono huxidhine waajje. Hanqisi rahe daye hunannoˈnekki gedenna, kiˈneno hedeweelcho baˈinannikki gede isira kumbuulle. Iso golo assidhannori baraadhinoreeti.” Yihowa, tini daga gara ikkinore doodhitanno gede shaqqillunni yanna uyino. Insa hedonsa biddi assidhe Yihowa Mangiste doodha dandiitanno faro noonsa. Ikkollana, uyinoonni yanna gooffe daggino. Heeˈnoommohu ‘goofimarchu barruwa’ giddooti. (2 Xim. 3:1; Isa. 61:2) Mannu halaale macciishshe Yihowara soqqama doodha dandaanno yanna xaati.

10. Hage 2:7-9 Yihowa daga baala shafanno woyite hiikku danchu coyi ikkannota kultanno?

¹⁰ Hage masaalino garinni, Yihowa daga baala shafanno woyite mitu manni maahoyye yaanno. Masaalo kultanno garinni, Yihowa daga baala shafeenna “daga baalate mereero noohu ayirradu coyi [suwashshu wodani noonsa manni]” Yihowa magansiˈrara daanno. * (Hage 2:7-9 (NW) nabbawi. *) Isayaasino Mikiyaasino  “goofimarchu yannara” togoori ikkannota masaaltino.—Isa. 2:2-4; Mik. 4:1, 2.

11. Mittu rodii Maganu Mangiste sokka macciishshi woyite ma assino?

¹¹ Hanni xa qara biironkera soqqamanni noohu Keeni yinanni rodii, tenne baatto shaffanno sokka macciishshi woyite ma assinoro laˈno. Isi mitu 40 diri albaanni Maganu Mangiste sokka macciishshi woyite hiitto ikkinoro xaa geeshsha qaaganno. Keeni togo yiino: “Maganu Qaali giddo noo halaale macciishshummo woyite, heeˈnoommohu goofimarchu barruwa giddo ikkinota rosaˈyanni hagiidhoommo. Magano hagiirsiisatenna hegere heeshsho afiˈrate, tenne hembeelantanni noo alamewiinni baxxe Yihowa wido ikka hasiissannoeta huwatoommo. Huuccatto assiˈre bayichonko hatto assoommo. Hakkawoyintenni tenne alame facci asse agure, shashshafantannokkita Maganu Mangiste cuˈmiˈroommo.”

12. Tenne goofimarchu barruwara Yihowahu ayyaanaamittennihu qullaawu minira ayirrinyu woˈminohu hiittoonniiti?

¹² Yihowa mannasi maassiˈrinoti xabbe leeltino. Tenne goofimarchu barruwara, iso magansiˈranno manni kiiro lowo geeshsha lexxitino. Alba 1914nni kiironke shiima kumella ikkitanno. Xa kayinni sette miliyoone saˈˈanno manni Yihowara diinaggaawe soqqamanni no; qoleno lowo miliyoone ikkanno manni diru dirunku Qaagooshshu Ayyaana ledonke ayirrisanno. Konni garinni, “daga baalate mereero noohu ayirradu coyi” daye, Yihowahu ayyaanaamittennihu qullaawu minite uullayidi hoowera (Yihowa halaalu magansiˈrara qixxeessino qixxaawooti) woˈmino. Qoleno kuni manni haaro mannimma uddiˈre heeshshonsa biddi assiˈranno woyite Yihowa suˈmi gotti gotti yaanno.—Efe. 4:22-24.

13. Tini dhagge ikkitanno lopho wole hiitti masaalo woˈmitanno gede assitino? (Aaniidi qoolira noo misile lai.)

¹³ Tini dhagge ikkitanno lopho wole masaalono woˈmitanno gede assitino; kuri giddo mitte Isayaasi fooliishsho 60te noote. Isayaasi 60:22 togo yitanno: “Insa giddonni ajjino ilama kume, woˈmunkura maaˈne ikkitinori, wolqaataame gosa ikkitanno; ani Kaaliiqi kuni coyi yannasinni rahe woˈmanno gede asseemmo.” Batinyu manni Yihowa minira daanni noo daafira, dhagge ikkanno coyi ikkanni no. Kuni  “ayirradu coyi” woy manni addi addi dandoonna ‘Maganu Gashshootiha Dancha Duduwo’ duduwate hasatto noonsareeti. Konninni kainohunni, Isayaasi masaalinonte gede, Yihowa manni “dagate ado” aganni no. (Isa. 60:5, 16, NW) Kuri muxxe labballinna meenti kaaˈlonni, sabbakate loosonke 240 gobbara loonsanni heeˈnoonni; hattono borronke 1,000 saˈˈanno qaalinni tirranni heeˈnoonni.

14. Xaa yannara mannu maa doodha hasiissannonsa?

¹⁴ Tenne goofimarchu yannara, Yihowa daga baala shafasi mannu mitte doodhanno gede assitanni no. Mannu Maganu Mangiste doodhannonso, tenne alame gashshoote addaxxa ikka? Baalunku manni lamente giddo mitte doodha hasiissannonsa. Yihowa manni heeˈranno gobba gashshooti seera ayirrisannoha ikkirono, tenne alame poletikira horonta anga diwodhanno. (Rom. 13:1-7) Insa mannu ooso qarra tira dandiitannoti Maganu Mangiste calla ikkitinota affino. Maganu Mangiste tenne alame wido diˈˈikkitino.—Yoh. 18:36, 37.

15. Ajuujate maxaafi Maganu manni ammanama fonqolantannota kulannohu hiittoonniiti?

¹⁵ Ajuujate maxaafi, goofimarchu barruwara Maganu manni ammanama fonqolannori heeˈrannota kulanno. Kuni fonqoli dartu iillannonke gedenna feexiˈne gimbanninke gede assannoho. Tenne alame gashshaasine Maganoho uyinannire uyinammonsara murrissannonke; hattono insa wido ikka gibbannore xiibbanno. (Aju. 13:12, 15) Insa “jajjabbuno shiimmaadduno, dureeyyeno buxaneno, mootoolluno faantootu baalu, qiniiticho angara woy albaho malaate wodhitanno gede [giddeessitanno].” (Aju. 13:16) Biˈree waro borojjootaho insa ayireetiro leellishanno malaate bisinsa aana malaatinsanni. Hatteente gede, yannankera dagoomu mittu mittunku manchi aye widootiro leellishanno malaate angasira woy albaho wodhara hasiˈranno. Qoleno insa mannu baalu hedonsanninna assootinsanni poletiku gashshootira halamara hasidhanno.

16. Yihowara albinni roore ammanamate xaanni jawaata hasiissannonkehu mayiraati?

¹⁶ Ninke konne malaate wodhine poletiku gashshootira halammeemmo? Konne malaate adha gibbannore qarru amadannonsati egennantinote. Ajuujate maxaafi hakkiinni aanche togo yaanno: “Moyichu suˈma ikkino malaati woy suˈmisi kiiro noosikki manchi ayino hirano hidhano didandaanno.” (Aju. 13:17) Ikkollana, Maganu Yohaannisi Ajuuja 14:9, 10 kulloonni malaate adhitinore ma assannoro Maganu manni afino. Maganu manni konne malaate adhantenni, lawishshu yaattonni angansara “Ninke Maganu mannaati” yee borreessiˈranno. (Isa. 44:5) Maganoho addinta ammanammoommore ikkinoommota buuxiˈra hasiissannonkehu xaati. Hatto ikkiro, Yihowa hagiidhe ‘Kiˈne ane mannaati’ yaannonke!

17. Yihowa cinca daafira maa qaaga hasiissannonke?

¹⁷ Yihowa tenne goofimarchu barruwara cincasi lowota ikkitinota leellishino. Isi ayino baˈˈara dihasiˈranno. (2 Phe. 3:9) Isi baalunku manni aagintaawe higanno gedenna gara ikkinore doodhanno gede yanna uyino. Ikkollana cincasi gooffanno yanna no. Maganu Mangistera halama gibbannorira Muse waro Ferioonira iillinori iillannonsa. Yihowa Feriooni togo yiino: “Atenna mannakki dhibbunni ganoommoro, baalunku baattote aaninni gooffinanni. Kayinnilla, reyattokki gede assoommohehu, wolqaˈya afatto gedenna suˈmiˈya gobba baalate ayirranno gede assateeti.” (Ful. 9:15, 16) Daga baalanti halaalaanchu Magani Yihowa calla ikkinota affanno yanna dagganno. (Hiz. 38:23) Kuni ikkannohu hiittoonniiti?

18. (a) Hage 2:6, 20-22 wole hiittee shafama daafira kulloonni? (b) Hage coyiˈrino masaalo albillitte woˈmitannota ikkitinota mayinni anfeemmo?

 ¹⁸ Hage heeˈrihunni lowo xibbi diri gedensaanni, soqqamaasinchu Phaawuloosi Hage 2:6, 20-22 noo masaalo albillitte woˈmitannota qullaawu ayyaaninni coyiˈrino. (Qummeeshsha nabbawi.) Phaawuloosi togo yee borreessino: “Xa kayinni, ‘Baatto calla ikkitukkinni, layinkimeeshsho gordono shafeemmo’ yee coyiˈrino. Kuni, ‘layinkimeeshsho’ yaanno qaali, shafamannokki coyi kaajje heeˈrannotanna shafamannohu woy kalaqamino coyi baˈˈannota malaatisanno.” (Ibi. 12:26, 27) Kowiicho kulloonni shafama, Hage 2:7 kulloonni shafamanni baxxitinote. Tini shafama, Yihowara gashshate qoosso noosita Feriooni gede ammante adha gibbannori hegerera baˈannota leellishshannote.

19. Shafamikki gatannori maati? Tenne mayinni anfeemmo?

¹⁹ Shafamikki woy baikki gatannori maatiyya? Phaawuloosi lede togo yiino: “Ninke shafamannokki gashshoote ragiˈneemmo daafira Magano galaxxineemmo. Hagiidhanno garinni ayirrinyunninna waajjatenni magansiˈnosi.” (Ibi. 12:28) Tenne jeefote shafama gedensaanni, gattannoti Maganu Mangiste callate. Tini Mangiste hegerera kaajjite heedhanno!—Far. 110:5, 6; Dan. 2:44.

20. Mannu maa doodha hasiissannonsa? Ninke insa kaaˈla dandiineemmohu hiittoonniiti?

²⁰ Gattino yanna lowo geeshsha shiimate! Mannu tenne alamera halama doodhannoha ikkiro, baˈˈanno; Yihowara soqqamanna fajjosi wonshate heeshshonsa biddi assiˈra doodhannoha ikkiro kayinni hegere heeshsho afiˈranno. Konni daafira tenne lamente giddo mitte doodha hasiissannonsa. (Ibi. 12:25) Sabbakate loosonke loonseemmo woyite, tenne hasiissanno hajo lainohunni mannu mitte doodhanno gede kaaˈlineemmo. Dandaami deerrinni batinyu manni Maganu Mangistera halamanno gede kaaˈlino. Qoleno Mootichinke Yesuusi coyiˈrino qaale woˈmanka woyite qaango; isi togo yiino: “Gosa baalate naqaashshe ikkanno gede kuni Maganu Gashshootihu Danchu Duduwi gobba baalate kulamanno; hatte yannara goofimarchu daanno.”—Mat. 24:14.