1-2. O le ā le ituaiga lūlūina na valoia o le a tupu i o tatou aso?

NA FAAMATALAINA e nisi na sao mai i le mafuiʻe tele na taia ai Nepal i le 2015: “I ni nai minute, ae ua amata ona solo i lalo faleoloa ma fale tuai. Na matuā faateʻia tagata uma. E toʻatele tagata na faapea mai e pe ā ma le lua minute na lūlū ai le mafuiʻe. Ae o aʻu, na foliga e umi se taimi na lūlū ai.” E mautinoa e lē mafai ona galo iā te oe se mea mataʻutia faapena e tupu.

² Peitaʻi, o loo tatou lagonaina i le taimi lava lenei se isi ituaiga o lūlū o loo aofia ai atunuu uma, ma ua tele tausaga o lūlū. O lenei lūlūina faafaatusa, na valoia e le perofeta o Hakai. Na tusi o ia: “Auā o le fetalaiga lenei a Ieova o ʻau, ʻE toe tasi, e toe itiiti lava, ona ou lūlūina lea o le lagi ma le lalolagi, o le sami ma le laueleele mātūtū.’”​—Ha. 2:6.

3. E faapefea ona ese le lūlūina na faamatala e Hakai ma le lūlū a se mafuiʻe moni?

³ O le lūlūina na faamatala e Hakai, e lē o faasino atu i se mafuiʻe moni lea e na o le faaleagaina ai o mea. Ae na faasino atu Hakai i se lūlūina e maua ai iʻuga lelei. Na fetalai mai Ieova: “Ou te lūlūina atunuu uma, ona ō mai ai lea o mea ua manaʻomia mai i atunuu uma; ou te faatumuina lenei fale i le mamalu.” (Ha. 2:7) O le ā le uiga o lenei valoaga iā i latou na ola i aso o Hakai? O le ā le uiga mo i tatou i aso nei? O le a tatou talanoaina tali o na fesili, ma o le a tatou aʻoaʻoina ai foʻi le auala e faia ai so tatou sao i le lūlūina o atunuu i aso nei.

4. Aiseā na auina atu ai e Ieova le perofeta o Hakai i ona tagata?

⁴ Na maua e le perofeta o Hakai se tofiga tāua mai iā Ieova. Seʻi mafaufau i le mea na tupu a o leʻi maua e Hakai lona tofiga. Na ono aofia Hakai iā i latou na toe foʻi i Ierusalema i le 537 T.L.M., mai i le tafeaga i Papelonia. O le taimi lava na taunuu ai na tagata tapuaʻi faamaoni, na latou fausia ai loa le faavae o le malumalu o Ieova. (Esera 3:8, 10) E leʻi umi lava, ae tupu loa se faafitauli. Na lotovaivai na tagata ma taofi le galuega ona o teteega. (Esera 4:4; Ha. 1:1, 2) O lea la, i le 520 T.L.M., na tofia ai e Ieova Hakai e toe faamalosia le maelega o ana auauna ma uunaʻia i latou e faauma le fausiaina o le malumalu. *​—Esera 6:14, 15.

5. Aiseā na tatau ai ona faamalosia tagata o le Atua i le feʻau a Hakai?

⁵ O le fuafuaga o le feʻau a Hakai, o le faamalosia o le faatuatua o tagata iā Ieova. Na taʻu atu ma le lototele e lenei perofeta i tagata Iutaia lotovaivai upu nei: “ʻIa faamalolosi outou o tagata uma o le atunuu,’ ua fetalai mai ai Ieova, ʻma ia galulue. Auā ou te faatasi ma outou,’ ua fetalai mai ai Ieova o ʻau.” (Ha. 2:4) E lē taumatea le faamalosia o tagata Iutaia i lenei faaupuga o “Ieova o ʻau.” E taʻitaʻia e Ieova se ʻautau toʻatele o agelu malolosi. O lea la, na manaʻomia ona faalagolago tagata Iutaia iā Ieova, ina ia taulau ai.

6. O le ā le iʻuga o le lūlūina na valoia e Hakai?

⁶ Na auina atu e Ieova Hakai e taʻu atu i tagata Iutaia, o le a ia lūlūina atunuu uma. O lenei feʻau na faamautinoa atu ai i tagata Iutaia lotovaivai na fausiaina le malumalu, o le a lūlūina e Ieova Peresia le malo e sili ona malosi i le lalolagi na puleaina le tele o atunuu i lenā taimi. O le ā na iʻu i ai lenā lūlūina faafaatusa? Muamua, o le a māeʻa ona fausia e tagata o le Atua le malumalu. Lua, e oo foʻi i tagata e lē o ni Iutaia, o le a tapuaʻi faatasi iā Ieova i le malumalu ma tagata Iutaia. Maʻeu le faalaeiau o lenā feʻau i tagata o le Atua i lenā taimi!​—Saka. 8:9.

7. I aso nei, o le ā le galuega o loo lūlūina ai le lalolagi atoa lea o loo tatou fesoasoani e fai? Ia faamatala.

⁷ O le ā le uiga o le valoaga a Hakai mo i tatou i aso nei? Ua toe lūlūina foʻi e Ieova atunuu uma, ma i le taimi lenei o loo tatou fesoasoani i lenā lūlūina. Seʻi mātau le mea lenei. I le 1914, na tofia ai e Ieova Iesu Keriso e avea ma tupu i lona Malo i le lagi. (Sala. 2:6) O le faavaeina o le Malo, o se tala lē lelei mo taʻitaʻi o malo o le lalolagi. O lona uiga ua faamutaina “taimi atofaina o nuu ese” po o le vaitaimi na lē toe iai ai se pule e fai ma sui o Ieova i le lalolagi. (Luka 21:24) O le māfuaaga lenā, talu mai le 1919, na taʻu atu e tagata o Ieova e na o le Malo o le Atua le faamoemoe mo tagata. O le talaʻia o le “tala lelei o le malo” ua lūlūina ai le lalolagi atoa.​—Mata. 24:14.

8. E tusa ai o le Salamo 2:1-3, ua faapefea ona tali atu le tele o malo i lenei feʻau?

⁸ O le ā le tali mai a tagata i lenā feʻau? O le toʻatele o tagata na teena lenā feʻau. (Faitau le Salamo 2:1-3.) Na feita atunuu ma na latou teena le Tupu tofia a Ieova. E latou te manatu e lē o se “tala lelei” le feʻau o le Malo o loo tatou talaʻia. O nisi malo ua latou faasāina le galuega talaʻi. E ui o loo faapea mai  nisi o taʻitaʻi o nei malo o loo auauna i le Atua, ae e latou te lē mananaʻo e tuuese la latou pule ae amanaʻia le pule a le Atua. I aso o Iesu na teena o ia e pule o malo, ma i aso nei ua teena foʻi o ia e pule o malo o le Tupu Faauuina a Ieova e ala i lo latou sauāina o ona soo faamaoni.​—Galu. 4:25-28.

9. O le ā le auala ua tali atu ai Ieova i le lē talileleia e malo o lenei feʻau?

⁹ O le ā le auala ua tali atu ai Ieova i le lē talileleia e malo o lenei feʻau? Ua faapea mai le Salamo 2:10-12: “O outou tupu e, ia iā te outou le tofā mamao; o outou faamasino o le lalolagi, ia aʻoaʻia outou. Ia auauna iā Ieova ma le mataʻu, ma ia olioli ma le gatete. Inā sogi atu ia i le atalii, ina neʻi toʻasā mai le Atua, ma ina neʻi faaumatia outou i le ala, auā e faafuaseʻi ona sasao aʻe lona toʻasā. E fiafia foʻi i latou uma o ē e sulufaʻi atu iā te ia.” E agalelei Ieova, ma ua ia tuu atu i malo le avanoa e fai ai le filifiliga saʻo. E mafai ona latou faia suiga ma talia le Malo o Ieova. Peitaʻi, ua itiiti le taimi o totoe. Ua tatou ola i “aso e gata ai” o lenei faiga o mea. (2 Timo. 3:1; Isa. 61:2) O le taimi lenei ua matuā vave manaʻomia ai ona iloa e tagata le upu moni ma fai le filifiliga saʻo.

10. O le ā le iʻuga lelei o le lūlūina o loo valoia i le Hakai 2:7-9?

¹⁰ Ua talileleia e nisi lenei lūlūina faafaatusa na valoia e Hakai. Na taʻua e Hakai le iʻuga o lenā lūlūina, “ona ō mai ai lea o mea ua manaʻomia [tagata lotofaamaoni] mai i atunuu uma” ina ia tapuaʻi iā Ieova. * (Faitau le Hakai 2:7-9.) Na valoia foʻi e Isaia ma Mika mea talitutusa o le a tutupu i “aso e gata ai.”​—Isa. 2:2-4; Mika 4:1, 2.

11. O ā iʻuga lelei o le feʻau o le Malo i se uso ina ua faatoʻā faalogo i ai?

¹¹ Seʻi mātau le iʻuga lelei o lenei feʻau i se uso e igoa iā Ken o loo galue i le ofisa ulu. E manatua lelei e le uso le taimi muamua na faalogo ai i le feʻau o le Malo, i le pe ā ma le  40 tausaga ua mavae. Na faapea mai Ken: “Ina ua faatoʻā ou faalogo lava i le upu moni mai i le Afioga a le Atua, na matuā ou lotofaafetai ona na ou iloa ua tatou ola i aso e gata ai o lenei faiga o mea. Na ou malamalama ai, ina ia ou maua le finagalo malie o le Atua ma maua le ola e faavavau, e lē tatau ona toe faia saʻu vaega i lenei lalolagi fevaevaeaʻi ma ia ou tūmausalī i le itu a Ieova. Na ou tatalo iā Ieova ma fai loa na suiga. Na ou tuua le lalolagi ae sulufaʻi atu i le puipuiga a le Malo o le Atua e lē mafai ona maluelue.”

12. Ua faapefea ona faatumulia i le mamalu, le malumalu faaleagaga o Ieova i nei aso e gata ai?

¹² Ua matuā manino mai le faamanuia a Ieova i ona tagata. Ua tatou vaaia le matuā faateleina o tagata e tapuaʻi iā Ieova i nei aso e gata ai. I le 1914, e leʻi toʻatele nisi na tapuaʻi iā Ieova i lenā taimi. Ae i le taimi lenei ua silia ma le valu miliona i latou o loo maelega i le tapuaʻiga i le Atua. E faitau miliona foʻi i latou e auai i le faamanatuga i tausaga taʻitasi. O lea, ua faatumulia ai lotoā i le lalolagi o le malumalu faaleagaga o Ieova po o lana faatulagaga mo le tapuaʻiga mamā i “mea ua manaʻomia mai i atunuu uma.” Ua faamamaluina foʻi le suafa o Ieova, ona o suiga ua faia e ona tagata tapuaʻi e ala i le oofu i le tagata fou.​—Efe. 4:22-24.

13. O ā isi valoaga ua faataunuuina ona o mea mataʻina o loo tutupu? (Tagaʻi i le ata i le faavaa.)

¹³ O mea mataʻina o loo tutupu ua faataunuuina ai isi valoaga e pei o le valoaga i le Isaia 60. O loo faapea mai le fuaiupu 22 o lenā mataupu: “O le a avea lē e toʻaitiiti ma toʻaafe, e avea foʻi lē e faatauvaa ma se atunuu malosi. O aʻu o Ieova ou te faavave ona fai i ona aso.” E matuā mataʻina le mea o loo tupu ona o le lolofi mai o tagata i le tapuaʻiga moni. Ua aumaia e nei tagata po o mea ua manaʻomia tomai eseese, ma e latou te lotomalilie e talaʻia le tala lelei o le Malo. O le iʻuga, e pei ona taʻua e Isaia ua feinu ai tagata o Ieova i le “suāsusu o atunuu.” (Isa. 60:5, 16) O le fesoasoani a nei tane ma fafine peleina, ua mafai ai ona oo atu le galuega talaʻi i atunuu e 240 ma ua faaliliuina ai lomiga i le silia ma le 1,000 gagana.

14. O le ā le filifiliga e tatau ona faia e tagata i le taimi lenei?

¹⁴ O le lūlūina o atunuu i lenei taimi o le iʻuga, ua uunaʻia ai tagata e fai sa latou faaiʻuga. Po o le a latou lagolagoina le Malo o le Atua pe maufaatuatuaina malo o lenei lalolagi? O le filifiliga lea e tatau ona faia e tagata uma. E ui e usiusitaʻi tagata o Ieova i tulafono a atunuu o loo nonofo ai, peitaʻi e faaauau pea ona latou solitū i mataupu faapolotiki o lenei lalolagi. (Roma 13:1-7) Ua latou iloa, e na o le Malo o le Atua le vaifofō moni mo faafitauli uma o tagata. E lē mai i le lalolagi nei lenā Malo.​—Ioa. 18:36, 37.

15. O le ā le tofotofoga sili o le faamaoni o loo faamatalaina e le Faaaliga?

¹⁵ O loo taʻua i le tusi o Faaaliga, o le a tofotofoina le faamaoni o tagata o le Atua i aso e gata ai. O le a faaauau ona aumai e na tofotofoga sauāga ogaoga ma teteega iā i tatou. O le a faasāina e malo faapolotiki o lenei lalolagi la tatou tapuaʻiga, ma o le a latou sauāina i latou e mumusu e lagolagoina i latou. (Faaa. 13:12, 15) O le a latou “faamalosia foʻi tagata uma, o ē e faatauvaa ma ē e aloaʻia, o tagata mauʻoa ma matitiva, o tagata saʻoloto ma pologa, ina ia faailogaina i latou nei i o latou lima taumatau po o latou muāulu.” (Faaa. 13:16) I aso anamua, na faailogaina pologa ina ia iloa ai o latou matai. E faapena foʻi i aso nei, e faatalitalia tagata ina ia faailogaina faafaatusa o latou lima po o latou muāulu. E faaalia i a latou gaoioiga ma manatu, e latou te lagolagoina faiga faapolotiki ma e pulea i latou e na faiga.

16. Aiseā ua matuā manaʻomia vave ai ona faamausalī lo tatou faamaoni iā Ieova i le taimi lenei?

¹⁶ Po o le a tatou taliaina lenā faailoga faafaatusa, ma lagolagoina malo faapolotiki? O i latou e lē taliaina le faailoga, o le a oo i ai faigatā ma lamatiaga. Ua faapea atili mai le tusi o Faaaliga, e “lē mafai e se tasi ona faatau mai pe e faatau atu seʻi vaganā ai le tagata o loo iai le faailoga.” (Faaa. 13:17) Ae ua iloa e tagata o le Atua le mea o le a faia e le Atua i ē e iai le faailoga lea o loo taʻua i le Faaaliga 14:9, 10. E lē taliaina e tagata o le Atua lenā faailoga, ae e latou te tusiaina i o latou lima le faaupuga, “E mo Ieova.” (Isa. 44:5) O le taimi lenei e faamautinoa ai, ua mausalī lo tatou faamaoni iā Ieova. Pe afai o loo mausalī lo tatou faamaoni iā Ieova, o le a fiafia o ia e taʻua i tatou o ona tagata.

17. O le ā e tatau ona tatou manatuaina e faatatau i le onosaʻi o Ieova?

¹⁷ O loo matuā onosaʻi mai Ieova i nei aso e gata ai. E lē finagalo o ia e faaumatia se tasi. (2 Pete. 3:9) Ua ia tuuina le avanoa i tagata uma e faaalia ai le salamō ma faia filifiliga saʻo. Peitaʻi, e iai le taimi e muta ai lona onosaʻi. O i latou e teenaina lenā avanoa, o le a oo i ai mea na oo iā Farao i taimi o Mose. Na fetalai atu Ieova iā Farao: “E mafai ona ou tuu atu loʻu lima e taia ai oe ma ou tagata i le faamaʻi, ma soloiesea oe mai i lenei lalolagi. Ae o le mea lenei ua ou tuu ai pea oe ia e ola, ina ia ou faaali atu ai iā te oe loʻu mana, ma faailoa atu loʻu igoa i le lalolagi uma.” (Eso. 9:15, 16) O lea, o le a iloa e atunuu uma e na o Ieova lava le Atua moni e toʻatasi. (Eseki. 38:23) E faapefea ona tupu lenā mea?

18. (a) O le ā le isi ituaiga lūlūina o loo faamatalaina i le Hakai 2:6, 20-22? (e) E faapefea ona tatou iloa e iai se faataunuuga i le lumanaʻi o upu a Hakai?

¹⁸ I senituri mulimuli ane ai, na faailoa mai ai e le aposetolo o Paulo e iai se faataunuuga i le lumanaʻi o le valoaga i le Hakai 2:6, 20- 22 (Faitau.) Na tusi Paulo: “A o lenei ua ia folafola mai e faapea: ʻE toe tasi ona ou lūlūina lea o le lalolagi atoa ma le lagi.’ O le faaupuga lenei, ʻe toe tasi’ ua faaalia ai le aveesea o mea ua lūlūina o mea ia na faia e se tasi, ina ia tumau ai mea e leʻi lūlūina.” (Epe. 12:26, 27) E lē tutusa le lūlūina o loo i le Hakai 2:7, ma le lūlūina o loo taʻua i inei. O lenei lūlūina e uiga atu i le faaumatia e faavavau o i latou e pei o Farao, o ē e teena le aiā a le Atua e pule ai.

19. O le ā o le a lē lūlūina, ma e faapefea ona tatou iloa?

¹⁹ O le ā o le a lē lūlūina pe faaumatia? Na faapea atili mai Paulo: “I le iloa o le a tatou maua se malo e lē mafai ona lūlūina, seʻi faaauau ona tatou maua le agalelei faifua, lea e mafai ai ona tatou tuuina atu le auaunaga paia e talileleia e le Atua ma le migao ma le mataʻu iā te ia.” (Epe. 12:28) Ioe pe a māeʻa lenei lūlūina tele mulimuli, e na o le Malo o le Atua e lē mafai ona lūlūina. O le a tumau e faavavau.​—Sala. 110:5, 6; Tani. 2:44.

20. O le ā le filifiliga e tatau ona faia e tagata, ma e faapefea ona tatou fesoasoani iā i latou?

²⁰ E lē o toe telē se taimi o totoe. E tatau i tagata ona latou filifili: Po o le a faaauau ona latou lagolagoina ala o loo faaauiluma e lenei lalolagi, e iʻu atu ai i le faaumatiaga? Po o le a faaōgatusa o latou ala ma ala o le Atua lea e iʻu atu ai i le ola e faavavau? (Epe. 12:25) O la tatou galuega talaʻi, ua mafai ai ona tatou fesoasoani i tagata e filifili po o fea le itu e latou te lagolagoina. O lea, seʻi o tatou fesoasoani pea i tagata lotofaamaoni ina ia latou filifili e lagolagoina le Malo o le Atua. Ia aua lava neʻi galo iā i tatou fetalaiga a lo tatou Alii o Iesu: “O le a talaʻiina atu lenei tala lelei o le malo i le lalolagi atoa e fai ma molimau i atunuu uma; ona oo mai ai lea o le iʻuga.”​—Mata. 24:14.