1-2. Otshikitelo wɔkɔnge ɔprɔfɛtɛ Angayi ndatepela ante wongonanghema l’etsho wɛso wɛnɛ?

“LÁ MINITƐ imangha toko, ambangashinyi la ntshasaka dj’amvulu djewangaka mvutshɛmvutshɛ etengo oloyi w’akishi wa longanda yovutshɛka.” “Anto ankfumɔ wayalaka la wɔma . . . Efula k’anto watepelaka ambɔ nkambo djɛsɔ djenanghemaka l’ilá k’etengo minitɛ ipe toko. Koko, lemi nyɛnaka etengo apangoyala l’ekomo.” Ɔsɔ ayalaka kɔmantɛrɛ y’anto amɔtshi wayalisa winá wɔ ntshikito djɛ looko yananghemá lá Nepal lá 2015. Ntsha nkambo mɔtshi djɛ wɔma etengo djɛsɔ djekokomelaka, mbɔkoko opavungɛki lotshinda.

² Koko, winá wɔsɔ, yopo inkina yɛ ntshikito yetshikitanyi yenanghema ape ngo lá ngando kɛmɔ kana l’owila ɔmɔ toko. Koko nkambo djɛsɔ ndendanaka l’ewila enkfumɔ edjinge djenanghema l’ilá k’ɛnɔnyi efula. Ɔprɔfɛtɛ Angayi ewoyɛka lá ntondo nkambo djelendana la ntshikito djɛsɔ. Nde afunaka ante: ‘Djɛkondeke, Yehova kanga lɔndjɛndjɛyi l’angala ndeke lotepela ante: ‘Mbala kenkina lako ilá, lemi langotshikitshɛ olongo, looko, ndjale la andja.’’​—Ang. 2:6.

3. Wopo wɔkɔnge otshikitelo wɔ djingingi otshikitanande la tshikito djɛ looko djɛ nsɔsɔlɔ?

³ Otshikitelo wɔ Angayi ndatepela wopalekɔ etengo otshikitelo wɔ looko, wotshitaka ngo nkete toko. Koko otshikitelo wɔsɔ wolekɔ l’eposelo wɛ wɔlɔ. Yehova nyɔmɛlɛ ntoshimelaka ante: ‘Lemi langotshikitshɛ ewila enkfumɔ edjinge nkete djɛ ntsho dj’ewila djengoyɛ, ko langolodjɛ mvulu kɛnɛ la lomo.’ (Ang. 2:7) Prɔfɛsi kɛsɔ yasakisolaka nge le anto wawikaki l’etsho wɛ Angayi? Ko osakisolawɔ nge lɔɔko kɛnɛ leso? Tongokadjimola  lá weepó wɛsɔ la tɔngɛna lonkina wopo w’okokaso ndjila lɔwɔ l’olemo w’otshikitelo w’ewila wonanghema lɔɔko kɛnɛ.

4. Lamo Yehova ndatome Ɔprɔfɛta Angayi te enkambi wɛnde?

⁴ Ɔprɔfɛtɛ Angayi awaka odjito wɔ djonyi efula me Yehova. Tɔkɔtɔnɔla ndambo lá kɛnɛ kehetisa lá ntondo kɛ lasɔ. Nyɛnamaka etengo Angayi ayalaka esanga la wanɛ watakalɔki tá Jerusalɛmɛ má lokfumbe lɔ Babilɔnɛ lá 537 N.Ɛ.K. Winá wɔ yakome lá Jerusalɛmɛ, antɛmɔdji yɛ Yehova yɛ nkɔmano yɛsɔ, wawangaka olemo wɔ mvulu kɛ Yehova, ntepela ente tɛmpɛlɔ ipa la ntshatshimba. (Ɛzr 3:8, 10) Koko ataheta ilá, nkambo mɔtshi djɛ yɛnyi mposaka. Iwɔ walɛmbaka ko watshikaka olemo m’ɔtɛ w’antonyi wawɔ. (Ɛzr 4:4; Ang. 1:1, 2) Djɛkondeke lá 520 N.Ɛ.K., Yehova apɛyɛka Angayi odjito wɔ ndaakotshɛ dj’iwɔ nkalɔ ndjala l’entete la ndaapɛyɛ mposɛ k’iwɔ nshiyɛ olemo wɔ tɛmpɛlɔ. *​—Ɛzr 6:14, 15.

5. Lamo losango l’Angayi yakembɛ enkambi wɛ Ndjambe?

⁵ Losango lɔ Angayi loyalaka l’okoma wɔ nkembɛ djawo djɛ ase Juda te Yehova. L’oloko wolo onkfumɔ, ɔprɔfɛtɛ ashimelaka ase Juda walɛmbisa ante: ‘Yehova ndeke lotepela ante: ‘Nyo anto ankfumɔ wa l’owila, nyoyale la lokembo edjinge nyokambe olemo. Mande lemi ndekɔ esanga isanyo,’ ndeke lotepela Yehova kanga lɔndjɛndjɛyi l’angala.’ (Ang. 2:4) Ape l’ehamo itepela y’ente ‘Yehova kanga lɔndjɛndjɛyi l’angala’ yaakembɛka. Yehova alekɔ l’eloyi w’angala w’andjelo w’ɔlɔndjɛnde, djɛkondeke ase Juda wayalaka ladjɛ ndawɛkɛ tende dj’iwɔ ndonga.

6. Eposelo wɛkɔnge weposisa má otshikitelo wɔ Angayi ndatepela?

⁶ Yehova atshindaka Angayi djɛ mpɛyɛ losango l’otshikitelo wɔ djingingi w’ewila enkfumɔ. Ɛnɛlɔ kɛsɔ k’ɛnyɛki djɛ Yehova akɔpa ntshikitshɛ Pɛrɛsiya, owila woyalaki la nkfulu k’andja w’otondo l’etsho wɛsɔ, kekembɛka wanɛ walɛmbisa watshikisa mpika tɛmpɛlɔ. Eposelo wɛkɔnge weyalisa l’otshikitshelo wɔsɔ? Ntondontondo, enkambi wɛ Ndjambe washiyɛka olemo w’opikelo wɔ tɛmpɛlɔ. Masɔ, kaanga wanɛ watayalaki ase Juda, wayalaka ladjɛ ntɛmɔla Yehova esanga l’ase Juda lá tɛmpɛlɔ kɛ bango kɛsɔ. Ɔsɔ ayalaka nsɔsɔlɔ losango lokembɛ le enkambi wɛ Ndjambe!​—Zak. 8:9.

7. Olemo wɔkɔnge w’otshikitshelo w’olendana laso lɔɔko kɛnɛ? Pakisola.

⁷ Prɔfɛsi kɛ Angayi osakisolande nge leso lɔɔko kɛnɛ? Winá wɔsɔ lonkina Yehova atshikitshɛ ewila enkfumɔ edjinge nkambo djɛsɔ ndendanaka laso. Tɔkɔtɔnɔla lá nkambo djɛnɛ: Lá 1914, Yehova ilaka Yeso Kristo Nkfumi k’Onkfumi wɔnde wɔ l’olongo. (Yee. 2:6) Ndjoka ente Onkfumi wɔ Ndjambe wombotateyɛ ndɔndjɛ, ayalaka losango lɔ nyɛtshi le ewandji wel’andja wanɛ. Kɛsɔ nsakisolaka ante ‘winá woshikikamisa w’ase ewila,’ ntepela ente winá wɔ lako kaanga owandji wɔsɔnamisa me Yehova wokokaka, wokomamaka l’ekomo kɛnde. (Luka 21:24) Djɛkondeke, pekapeka má 1919, enkambi wɛ Yehova wakɔkɔmɛ nghɔmɔ ɛnsɔsɔ ambɔ ngo Onkfumi wɔ Ndjambe ndeke longoyakala nkando l’ekakasano w’anto. Esambishelo kɛnɛ kɛ ‘losango lɔ wɔlɔ l’Onkfumi,’ ketshikitshɛ andja w’otondo.​—Mat. 24:14.

8. Lá nkilika Yeembo 2:1-3, wopo wɔkɔnge ewila efula elolawɔ lá losango lɔsɔ?

⁸ Wopo wɔkɔnge anto elolawɔ lá losango lɔsɔ? Efula k’anto ntonaka losango lɔsɔ.  (Wala Yeembo 2:1-3.) Ewila welekɔ lá lokfunguso. Wapakɔpɛ ndjawola Owandji wɔ Yehova ndile. Iwɔ wapɔshi losango l’Onkfumi lopoposanyɛso etengo ‘losango lɔ wɔlɔ.’ Djɛkondeke, ewandji ɛmɔtshi wangoshimbake kaanga olemo w’ipoposanyɛ! Kaanga ewandji efula w’ewila otepelakawɔ ambɔ wakambela Ndjambe, iwɔ wapakɔpɛ ntshika lowandji lolekɔ lawɔ. Djɛkondeke ngo ngete ewandji weyalaki l’etsho wɛ Yeso iyananghe, ewandji wɛ lɔɔko kɛnɛ nanyɛka Onkfutami w’avuta wɔ Yehova má nyɛnyɛ ambeki wande ndjolo.​—Ele. 4:25-28.

9. Wopo wɔkɔnge Yehova elolande winá wɛnade ewila watona losango l’Onkfumi?

⁹ Wopo wɔkɔnge Yehova elolande winá w’ɛnade ewila watona losango l’Onkfumi? Yeembo 2:10-12 nkadjimolaka ante: ‘Winá wɔsɔ, nyo nkfumi yɛ nkanga nyowadjɛ, nyo tososhi telá looko, nyawole dj’iwɔ nyosembola. Nyokambele Yehova la wɔma, edjinge nyosasange la lokomba. Nyɔpɛyɛ wɔna lomo, ntsha lako, Ndjambe angomala ko wangonyimɛ má mboka, mande nkɛlɛ kɛ Nde mfulaka lankeke. Osasa le anto ankfumɔ wahona djisa le Nde.’ La ngandji kenkfumɔ Yehova mpɛyɛka antonyi wande wasɔ mbamba kɛ wɔlɔ k’iwɔ ndɔsa akano wa wɔlɔ. Iwɔ nkoka ntshikitanyɛ tokanyi tɔwɔ ko ndjawola Onkfumi wɔ Yehova kaanga winá wɔsɔ. Koko winá wotalote lankeke. Towika ‘l’etsho w’ekomo’ wɛ nkfumbo dj’akambo djɛnɛ. (2 Ti. 3:1; Iza. 61:2) Winá wɔnɛ ndeke anto oyɛwɔ ladjɛ ndjewa edjinge nsɔna djɛ nkambela Yehova lankekelankeke.

10. Ndjelo kɛkɔnge kɛ wɔlɔ kelendana l’olemo w’otshikitshelo ketepelama lá Angayi 2:7-9?

¹⁰ Anto amɔtshi ndjelolaka wɔlɔ lá otshikitshelo wɔ djingingi wɔ Angayi ndewoyɛ. Nde ntoshimelaka ante eposelo wengoyala l’otshikitshelo wɔsɔnde, ‘nkete djɛ ntshó ntepela ente [anto ankfumɔ w’eloko wɔlɔ] w’ewila enkfumɔ’ wangoyɛ ndɔtɛmɔla Yehova. * (Wala Angayi 2:7-9.) Kaanga, Izaya nya Mika, wewoyɛka djɛ nkambo djɛsɔ ngonanghema  ‘l’etsho w’ekomo.’​—Iza. 2:2-4, nɔtɛ; Mik. 4:1, 2, nɔtɛ.

11. Wopo wɔkɔnge wɔnanyɔ ɔmɔtshi ndelola winá wɔ ndooke losango l’Onkfumi mbala kɛ ntondo?

¹¹ Kokanela eposelo weyalisa la losango l’otshikitshelo te wɔnanyɔ wetawɔ Ken, kanga lokamba lá biro djɛlɔndjɛ olemo wɔso. Nde avungɔ tii winá wɔsɔ mbala kɛ ntondo kɛ ndekameyɛ losango l’Onkfumi amboheta ɛnɔnyi etengo 40. Ken ntepelaka ante: “Mbala kɛ ntondo kɛ moke akambo wa nsɔsɔlɔ wa m’Otepela wɔ Ndjambe, ndjalaka l’osasa efula djɛ ndjewa ente towika l’etsho w’ekomo wɛ nkfumbo dj’akambo djɛnɛ. Nsipisoyɛka ente, djɛ lemi ndjawolama me Ndjambe la mba lowiko l’etshinda ngo lemi ndashikikɛ dj’ipa ndɔsa opiko l’andja wa nyɛtshi wanɛ koko ntshikala ndii l’ompandju wɔ Yehova. Ndɔmbaka Yehova ko nanghaka nkambo djɛsɔ lankeke. Ntshikaka nsuka andja wanɛ edjinge mbala kɛkɔ kɛmɔ ndjawolaka namema m’Onkfumi wɔ Ndjambe wopatshikitaki etshinda etshinda.”

12. Wopo wɔkɔnge tɛmpɛlɔ kɛ Yehova kelá nyuma yombolola la lomo l’etsho w’ekomo wɛnɛ?

¹² Nyɛnamaka papoo djɛ Yehova atshɔkɔla enkambi wɛnde. L’etsho w’ekomo wɛnɛ, tɔmbɛna wopo wotahande lofulo lɔ wanɛ wɔtɛmɔla. Lá 1914 tayalaki ngo mili imangha toko. Koko winá wɔsɔ tombolekana anto miliyɔ enanɛyi yɛtɛmɔla Ndjambe l’entete, edjinge miliyɔ inkina y’anto wasanghana laso lá Bokfɔ. Lá lɛdji lɔsɔ ndeke bandja djelá looko djɛ tɛmpɛlɔ kɛ Yehova kɛ lá nyuma, ntepela ente nonghanyi yɛnde yelendana l’ɔtɛmwɛlɔ wɔ piyɔɔ, djembolola la ‘nkete djɛ ntshó dj’ewila enkfumɔ.’ Lonkina, djiina djɛ Yehova djembolumɛma má etshikitano wenangha anto wasɔ djɛ ndɔta l’onto lɔ bango.​—Ɛfɛ. 4:22-24.

13. Prɔfɛsi yɛkɔnge inkina yembokotshama m’ɔtɛ wɔ ofulelo w’enkambi wɛ Yehova? (Lenda ntshango djelá loposo.)

¹³ Ofulelo wɔ nkamɔ wɔsɔ w’ombokotshɛ prɔfɛsi inkina, ndjɔmbɔmba prɔfɛsi k’otanaso lá Izaya 60. Vɛrse 22 djɛ shapitrɛ kɛsɔ ntepelaka ante: ‘Kanga lolekɔ daambi angoyala kinunu edjinge kanga lolekɔ intshitshi angoyala owila wɔ wolo. Lemi Yehova langonangha nkambo djɛsɔ mɔmɛlɛ lankekelankeke lá winá wɛdje.’ Mande anto efula wambotateyɛ ntɛmɔla Yehova, nkambo mɔtshi djɛ wɔlɔ  efula mbonanghema. ‘Nkete djɛ ntshó’ djɛsɔ ndjemboyakala akoka la awalo watshikitanyi, ndjila edjinge ikanyi yɛ ndapɛyɛ l’ɛkɔpa l’olemo w’ipoposanyɛ wɔ ‘losango lɔ wɔlɔ l’Onkfumi.’ Eposelo wemboyalande, enkambi wɛ Yehova nkoka nkamba l’akoka wasɔ wa Izaya ndeete ante ‘awɛlɛ w’ewila.’ (Iza. 60:5, 16) M’okotshɔ w’ampame la w’amato wa ntshina wasɔ, olemo w’ipoposanyɛ wonanghema l’ewila ndekana 240 edjinge enkanda weposa l’etepela ndekana 1 000.

14. Nkano djɛkɔnge anto oyɛwɔ la ndjɛ ndɔsa má winá wɔsɔ?

¹⁴ L’etsho w’ekomo wɛnɛ, otshikitelo w’ewila w’otshinda anto djɛ ndɔsa nkano mɔtshi. Iwɔ wangosuka Onkfumi wɔ Ndjambe, ndokoko wangoyawɛkɛ t’enkfumi welá andja wanɛ? Ɔsɔ alekɔ nkano djɛ djonyi efula dj’onto onkfumɔ oyɛnde ladjɛ ndɔsa. Ayale kaanga enkambi wɛ Yehova nɛmɛyɛka ɛlɛmbɛ wel’ewila w’intansɛwɔ, iwɔ wapɔsaka opiko lá wayi wa pɔlitikɛ wel’andja wanɛ. (Ɔrɔ. 13:1-7) Iwɔ ndjewaka ambɔ ngo Onkfumi toko ndeke epeko kɛmɔ kengoyakala nkando l’ekakasano w’anto. Onkfumi wɔsɔ wopalekɔ kaanga la ndambo kɛ djokanelo l’andja wanɛ.​—Dj. 18:36, 37.

15. Ohemba wɔkɔnge w’ekekete w’olendana la nkɔmano wotepelama lá onkanda wɔ Ndjiso?

¹⁵ Onkanda wɔ Ndjiso ntepelaka djɛ nkɔmano dj’enkambi wɛ Ndjambe ngingela l’ohemba l’etsho w’ekomo. Ohemba wɔsɔ wongokindjɛ ntoyakala ndjolo. Nkfumbo dj’akambo wa pɔlitikɛ wel’andja wanɛ ngohona ɔtɛmwɛlɔ wɔso ko ngɛnyɛ anto watona ndaasuka ndjolo. (Ndj. 13:12, 15) Iwɔ ‘wangotshinda anto ankfumɔ djɛ ndjila ilembetelo lá lɔwɔ lɔ wome kana l’awɔkɔ wawɔ, ayale anto wa daambi kana wa nkekete, akanga w’ekfudji kana w’ɛmvɔ, wanɛ walekɔ la lotshungɔ kana anfumbe.’ (Ndj. 13:16) L’etsho wɛ ntondo wilaki anfumbe ilembetelo djɛ nyɛnyɛ onto wɔkɔnge w’okanga. Wopo wɔk’ɔmɔ ndeke, wangɔlɔmba anto wa l’etsho wɛso wɛnɛ djɛ ndjila ilembetelo lá lɔwɔ kana lá bɔkɔ. Iwɔ wangɔkɔpa djɛ onto onkfumɔ nyɛnyɛ má tokanyi la má nanghedji djɛnde ntsha walekɔ edjinge wasuka nkfumbo dj’akambo djɛ pɔlitikɛ.

16. Lamo oyɛwɔ djonyi djɛ nkembɛ nkɔmano djɛso te Yehova má winá wɔsɔ?

¹⁶ Tongawola ilembetelo yɛ djingingi yɛsɔ edjinge mpɛyɛ ewandji w’ase pɔlitikɛ osukɔ wɔso? Wanɛ wangotona ndongola ilembɛtelo yɛsɔ wangoyala l’ekakasano edjinge wangingela lá mbalaka. Onkanda wɔ Ndjiso nsipisoyɛka ante: ‘Lako onto wongosomba kana wongosadjɛ nyimɛ ngo onto wolekɔ l’ilembetelo.’ (Ndj. 13:17) Koko enkambi wɛ Ndjambe ndjewaka kɛnɛ kɛ Ndjambe ndongonanghela wanɛ w’awola ilembetelo yɛ Ndjiso 14:9, 10 otepelande. L’edjena kɛ iwɔ ndjawola ilembetelo yɛsɔ, iwɔ wangofuna l’ɛwɔ wɛwɔ ambɔ: ‘Lemi ndekɔ wɔ Yehova.’ (Iza. 44:5) Ɔnɛ ndeke winá wɔ ndashikikɛ djɛ kana tolekɔ la nkɔmano dj’efula te Yehova. Ntsha iso nangha nghɔsɔ, Yehova angoyala l’onfuno wɔ ntepela ante tolekɔ anto wande!

17. Kɛkɔnge k’oyɛso ladjɛ mvungɔka lá kɛnɛ kelendana la balentshitshi djɛ Yehova?

¹⁷ Yehova ambɛnyɛ balentshitshi dj’efula l’etsho w’ekomo wɛnɛ. Nde apakɔpɛ kaanga onto ɔmɔ ndjakema. (2 Pɛ. 3:9) Nde ambɔpɛyɛ onto onkfumɔ mbamba kɛ ndapɛla la nsɔna djɛ ndokambela. Koko balentshitshi djɛnde dekɔ l’elelo. Wanɛ watona mbamba kɛ Ndjambe apɛyɛnde kɛsɔ wangoyala etengo Faraɔ kɛ l’etsho wɛ Mɔsɛ. Yehova ashimelaka Faraɔ ante: ‘Otayalawɔnde nsembolaka lɔwɔ lɔmi djɛ nkovuta wɛ nya anto wako má nyotomela olando w’ekekete, ntshimi wɛ ombodjipisana má looko. Koko  m’ɔtɛ w’elonga kɛnɛ ndeke makotshikaka la lowiko: Djɛ nkɛnyɛ nkfulu kɛmi la djɛ djiina djɛmi numɛma lá looko l’otondo.’ (Epo. 9:15, 16) Ekomo ekomo, ewila enkfumɔ wangewa ambɔ ngo Yehova ndeke Ndjambe kɛ nsɔsɔlɔ. (Ezk. 38:23) Wopo wɔkɔnge nkambo djɛsɔ yongonanghema?

18. a) Yopo inkina yɛkɔnge y’otshikitelo yotepelawɔ lá Angayi 2:6, 20-22? b) Wopɔ wɔkɔnge w’ewaso djɛ etepela welekɔ lá Angayi wengokotshama l’etsho weyaye?

¹⁸ Ɛnɔnyi efula m’ɔkɔngɔ wɔ nyɔyi kɛ Angayi, ɔpɔstɔlɔ Poolo atshindamaka djɛ nyɛnyɛ ente etepela wɛ lá Angayi 2:6, 20-22 wengokotshama l’etsho w’ekomo. (Wala.) Poolo afunaka ante: ‘Lá winá wɔnɛ nde alakaka ante: ‘Mbala kenkina lemi langotshikitshɛ looko l’olongo.’ Itepela y’ente: ‘Mbala kenkina’ nyɛnyɛka wimelo wɔ nkete djetshikitshama etengo oyɛwɔ nkete djenanghemisa, djɛ nkete djepatshikita ntshikala.’ (Heb. 12:26, 27) Otshikitelo wɔsɔ, ntshikitana l’otshikitelo w’otepelawɔ lá Angayi 2:7, otshikitelo wɔsɔ nsakisolaka etshitanelo kɛ lotshinda kɛ anto watona ndjawola ɛlɔndjɛlɔ kɛ Yehova etengo Faraɔ.

19. Kɛkɔnge kepangotshikitshama, ko wopɔkɔnge ewaso nkambo djɛsɔ?

¹⁹ Kɛkɔnge kepangotshikitshama kana kepangima? Poolo akindjɛ ntepela ante: ‘Ladjikɛnde iso ladjɛ ndongola Onkfumi wopakoke ntshikitshama, nyontshɔ tokindjɛ mba wapɔ má wɔlɔ w’ipawɔsɔdjɔmba wotokotshɛ dj’iso nkambela Ndjambe olemo w’ekina lá wopo w’awolande la wɔma edjinge la lokomba.’ (Heb. 12:28) Lá nsɔsɔlɔ, lá winá w’otshikitshelo w’ekomo, ngo Onkfumi wɔ Ndjambe toko ndeke lopangotshikitshama. Wongotshikala ndii l’edjena kɛnde!​—Yee. 110:5, 6; Dan. 2:44.

20. Nkano djɛkɔnge djɛ anto oyɛwɔ la djɛ ndɔsa, ko wopɔkɔnge okokaso ndaakotshɛ?

²⁰ Ɔnɛ apalekɔ winá wɔ ndjengenga! Anto ladjɛ ndɔsa nkano djɛnɛ: Nkindjɛ nsuka yopo yɛ lowiko yel’andja wanɛ yɛtɔla tá etshitanelo, kana nangha la wolo djɛ mbika yopo yɛ lowiko yɛtɔla tá lowiko letshinda, yokana l’ɛkɔpa kɛ Ndjambe. (Heb. 12:25) Má olemo wɔso w’ipoposanyɛ, iso nkoka nkotshɛ anto dj’iwɔ ndɔsa nkano djɛ djonyi. Nyontshɔ tokotshɛ anto efula walekɔ etengo nkete djɛ ntshó dj’ewila djɛ nsuka Onkfumi wɔ Ndjambe. Nyontshɔ lonkina tovungɔke winá enkfumɔ etepela wɛ Nkfumi kɛso Yeso wɛnɛ: ‘Losango lɔ wɔlɔ lɔnɛ l’Onkfumi longopoposanyema lá looko l’otondo etengo owakɛ le anto wa l’ewila enkfumɔ, ko masɔ ekomo kengoyɛ.’​—Mat. 24:14.