1-2. Umphrofethi Hagayi wakhuluma ngakuphi kunyakatiswa lebekutawenteka esikhatsini setfu?

“NGEMAMINISHANA nje, titolo kanye netakhiwo letindzala tacala kudzilika.” “Wonkhe muntfu bekatfukile . . . Bantfu labanyenti batsi kwatsatsa imizuzu lengaba mibili. Kimi kwaba shengatsi kutsetse sikhatsi lesidze.” Lawa ngemavi alabanye labasindza ngesikhatsi kutamatama umhlaba eNepal nga-2015. Nangabe nawe ungabona intfo leyetfusa kanjena, angeke sewuyikhohlwe.

² Nobe kunjalo, nyalo sibhekene nalolunye luhlobo lwekunyakatiswa, lolungenteki edolobheni linye nobe eveni linye. Kodvwa lwenteka emhlabeni wonkhe, futsi sekuneminyaka leminyenti lwenteka. Umphrofethi Hagayi wakhuluma ngalo. Wabhala watsi: “Ngobe naku Jehova wemabutfo lakushoko: ‘Ngesikhashana nje ngitawuphindze nginyakatise emazulu, umhlaba, lwandle kanye nendzawo leyomile.’”—Hag. 2:6.

3. Kunyakatiswa Hagayi lakhuluma ngako kwehluke njani ekutamatameni kwemhlaba?

³ Kunyakatiswa lakhuluma ngako Hagayi, akufani nekutamatama kwemhlaba lokuletsa umonakalo kuphela. Kunaloko, kunemiphumela lemihle. Jehova utsi: “Ngitawunyakatisa tonkhe tive futsi tintfo letiligugu tato tonkhe tive titawungena; mine ngitawugcwalisa lendlu ngenkhatimulo.” (Hag. 2:7) Lesiphrofetho besisho kutsini kulabo lebebaphila ngemalanga aHagayi? Sisho kutsini kitsi lamuhla? Sitawucoca ngetimphendvulo talemibuto, siphindze sifundze ngekutsi yini lesingayenta kuze sibe yincenye yalokunyakatiswa kwetive lamuhla.

4. Kungani Jehova atfumela umphrofethi Hagayi kubantfu bakhe?

⁴ Jehova waniketa umphrofethi Hagayi umsebenti lobalulekile kutsi awente. Cabanga ngaloko lokwenteka ngaphambi kwekutsi aniketwe lomsebenti. Kungenteka Hagayi bekasemkhatsini walabo lababuyela eJerusalema nga-537 B.C.E., babuya ekutfunjweni eBhabhulona. Ngekushesha nje ngemuva kwekutsi letikhonti letetsembekile tifike eJerusalema, tacala kwakha indlu yaJehova, nobe lithempeli. (Ezra 3:8, 10) Kodvwa kwatsi kungakapheli sikhatsi lesingakanani, kwenteka lokutsite lokwaticedza emandla. Tadvumateka futsi tayekela kwakha ngenca yekuphikiswa. (Ezra 4:4; Hag. 1:1, 2) Ngako nga-520 B.C.E., Jehova watfuma Hagayi kulamaJuda kutsi awasite aphindze abe nemdlandla futsi awakhutsate kuze acedze kwakha lelithempeli. *—Ezra 6:14, 15.

5. Kungani kungenteka kutsi umlayeto waHagayi wabacinisa bantfu baNkulunkulu?

⁵ Injongo yalomlayeto waHagayi bekukucinisa kukholwa kwemaJuda kuJehova. Ngesibindzi, lomphrofethi watjela lamaJuda lebekadvumatekile watsi: “‘Cinani nonkhe nine bantfu bakulelive, nisebente,’ kusho Jehova. ‘Ngobe mine nginani,’ kusho Jehova wemabutfo.” (Hag. 2:4) Kungenteka lamavi latsi “Jehova wemabutfo” awacinisa lamaJuda. Jehova unelibutfo lelikhulu letingilosi, ngako emaJuda bekufanele etsembele kuye kuze aphumelele.

6. Bewutawuba yini umphumela walomlayeto waHagayi wekunyakatisa?

⁶ Jehova watfumela Hagayi kutsi atjele emaJuda kutsi utawunyakatisa tonkhe tive. Lombono wawacinisa lamaJuda lebekaphelelwe ngemandla, sekayekele nekwakha lithempeli, futsi bewuveta kutsi Jehova utawunyakatisa iPheresiya, lebeyingumbuso wemhlaba ngaleso sikhatsi. Bewutawuba yini umphumela walokunyakatiswa? Kwekucala, bantfu baNkulunkulu bebatawucedza kwakha lelithempeli. Ngemuva kwaloko, ngisho nalabo bebangasiwo emaJuda bebatawukhonta Jehova kanye nawo kulelithempeli lelakhiwe kabusha. Lomlayeto wabakhutsata kakhulu bantfu baNkulunkulu!—Zak. 8:9.

7. Chaza kutsi ngumuphi umsebenti lesiwentako lamuhla lonyakatisa umhlaba wonkhe.

⁷ Lesiphrofetho saHagayi sisho kutsini kitsi lamuhla? Jehova uphindze unyakatisa tonkhe tive, futsi sinencenye kuloku. Cabanga nganaku: Nga-1914, Jehova wabeka Jesu Khristu kutsi abe yiNkhosi yeMbuso wakhe wasezulwini. (Hla. 2:6) Kwaba tindzaba letimbi kubabusi bemhlaba ngesikhatsi loMbuso ucala kubusa. Loku bekusho kutsi “sikhatsi lesibekiwe setive” bese siphelile. Ngalamanye emavi, bese siphelile sikhatsi lapho khona bekute umbusi lomelele Jehova. (Luk. 21:24) Ngaleso sizatfu, ikakhulukati nga-1919, bantfu baJehova bebasolo batjela bonkhe bantfu kutsi uMbuso waNkulunkulu nguwo kuphela lolitsemba lebantfu. Kushunyelwa ‘kwetindzaba letimnandzi teMbuso’ kunyakatise umhlaba wonkhe.—Mat. 24:14.

8. Ngekusho kweTihlabelelo 2:1-3, linyenti letive liwemukele njani lomlayeto?

⁸ Bawemukele njani bantfu lomlayeto? Labanyenti abakawemukeli. (Fundza Tihlabelelo 2:1-3.) Tive titfukutsele kakhulu. Atifuni kwemukela uMbusi lobekwe nguJehova. Umlayeto weMbuso lesiwushumayelako  atiwutsatsa ‘njengetindzaba letimnandzi.’ Labanye bohulumende baze bawuvimba lomsebenti! Ngisho nobe linyenti lalababusi baletive litsi likhonta Nkulunkulu, abafuni kuyekela kubusa. Njengobe kwenta babusi bangemalanga aJesu, babusi lamuhla bamelene naLogcotjiwe waJehova ngekuhlasela balandzeli bakhe labetsembekile.—Imis. 4:25-28.

9. Yini Jehova layishoko ngaletive letingafuni kwemukela lomlayeto?

⁹ Yini Jehova layishoko ngaletive letingafuni kwemukela lomlayeto? Tihlabelelo 2:10-12 titsi: “Ngako-ke banini nekucondza nine makhosi; vumani kuyalwa, nine behluleli basemhlabeni. Khontani Jehova ngenhlonipho lenkhulu, futsi nimesabe nijabulile. Hloniphani indvodzana, ngale kwaloko Nkulunkulu utawutfukutsela futsi nitawushabalala endleleni, ngobe intfukutselo yakhe isheshe ivutse. Bayajabula bonkhe labakhosela kuye.” Jehova unemusa, futsi unika letive litfuba lekutsi tente sincumo lesikahle. Tisengashintja ingcondvo futsi temukele uMbuso waJehova. Kodvwa sikhatsi siyaphela. Siphila “emalangeni ekugcina” alelive. (2 Thim. 3:1; Isa. 61:2) Kuphutfuma kakhulu kunakucala kutsi bantfu bati liciniso futsi bakhonte Jehova.

10. Ngumuphi umphumela lomuhle lobe khona ngalomsebenti wekunyakatiswa lochazwe kuHagayi 2:7-9?

¹⁰ Labanye bantfu bayakwemukela lokunyakatiswa Hagayi lakhuluma ngako. Hagayi utsi umphumela walokunyakatiswa kutsi “tintfo letiligugu [lokubantfu labanetinhlitiyo leticotfo] tato tonkhe tive” batawukhonta Jehova. * (Fundza Hagayi 2:7-9.) Bo-Isaya naMikha nabo baphrofetha kutsi loku bekutawenteka “emalangeni ekugcina.”—Isa. 2:2-4, umbhalo longentasi; Mik. 4:1, 2, umbhalo longentasi.

11. Lomunye umzalwane wenta njani nakawuva kwekucala umlayeto weMbuso?

¹¹ Cabanga ngalokwentiwa ngumzalwane Ken, ngemuva kwekuva lomlayeto, nyalo losebenta endlunkhulu. Ukhumbula kahle ngesikhatsi  acala kuva umlayeto weMbuso eminyakeni lengaba ngu-40 leyendlulile. Ken utsi: “Ngesikhatsi ngicala kuva liciniso leliseVini laNkulunkulu, ngajabula kakhulu kufundza kutsi siphila emalangeni ekugcina alelive. Ngacondza kutsi kuze ngemukelwe nguNkulunkulu futsi ngitfole kuphila lokuphakadze, bekudzingeka ngibe seluhlangotsini lwaJehova, ngingabi yincenye yalelive. Ngathantaza kuJehova futsi ngenta njalo. Ngayekela kusekela lelive futsi ngekushesha ngemukela sivikelo seMbuso waNkulunkulu longeke unyakatiswe.”

12. Lithempeli laJehova lelingumfanekiso ligcwele njani inkhatimulo kulamalanga ekugcina?

¹² Kusebaleni kutsi Jehova solo uyababusisa bantfu bakhe. Kulamalanga ekugcina, silibona landza kakhulu linani lalabo labamkhontako. Nga-1914, besitinkhulungwane letimbalwa nje kuphela. Nyalo bangetulu kwetigidzi letingu-8 bantfu labakhonta Nkulunkulu, futsi letinye tigidzi tiba natsi njalo ngemnyaka nasigubha Sikhumbuto. Ngako, emabala elithempeli laJehova lelingumfanekiso lelilamhlabeni, lokusho lilungiselelo lakhe lekumkhonta ngendlela lehlantekile, agcwele “tintfo letiligugu tato tonkhe tive.” Libito laJehova liphindze lingcweliswe njengobe labantfu bagcoka buntfu lobusha.—Ef. 4:22-24.

13. Kwandza kwetikhonti taJehova kugcwalise tiphi letinye tiphrofetho? (Buka sitfombe lesisekhasini lekucala.)

¹³ Loku lokwentekako kugcwalisa letinye tiphrofetho, njengaleso lesiku-Isaya 60. Vesi 22 walesehluko utsi: “Lomncane uyawuba yinkhulungwane longasilutfo abe sive lesinemandla. Mine Jehova lucobo lwami ngitakusheshisa loko ngesikhatsi sako.” Kwenteka intfo lenhle ngenca yekutsi bantfu labanyenti bacala kukhonta Jehova. ‘Letintfo letiligugu,’ lokungulabantfu, beta nemakhono lehlukahlukene baphindze babe nesifiso sekushumayela ‘tindzaba letimnandzi teMbuso.’ Ngenca yaloko, bantfu baJehova bangasebentisa lamakhono Isaya lawachaza ngekutsi “lubisi lwetive.” (Isa. 60:5, 16) Sisitwa ngulamadvodza nalabafati labaligugu, umsebenti wekushumayela wentiwa emaveni langu-240, futsi kukhicitwa tincwadzi letisekelwe eBhayibhelini ngetilwimi letingetulu kwa-1 000.

14. Ngusiphi sincumo bantfu lokufanele basente nyalo?

¹⁴ Kulesikhatsi sekuphela, kunyakatiswa kwetive kuphocelela bantfu kutsi bente sincumo. Batawusekela yini uMbuso waNkulunkulu, nobe batawetsembela kubohulumende balelive? Wonkhe muntfu kufanele asente lesincumo. Nanobe bantfu baJehova bayihlonipha imitsetfo yabohulumende bemave labahlala kuwo, kodvwa abatingeneli sanhlobo tepolitiki talelive. (Rom. 13:1-7) Bayati kutsi uMbuso ukuphela kwelikhambi letinkinga tebantfu. LoMbuso awusiyo incenye yalelive.—Joh. 18:36, 37.

15. Incwadzi yeSembulo ikhombisa njani kutsi kwetsembeka kwebantfu baNkulunkulu kutawuvivinywa?

¹⁵ Incwadzi yeSembulo ichaza kutsi kwetsembeka kwebantfu baNkulunkulu kutawuvivinywa ngemalanga ekugcina. Ngenca yalokuvivinywa, sitawuchubeka siphikiswa futsi siphatfwa kabi. Bohulumende balelive batasiphocelela kutsi sibakhonte futsi batawubaphatsa kabi labo labangafuni kubasekela. (Semb. 13:12, 15) Batawuphocelela “bonkhe bantfu, labancane nalabakhulu, labanjingile nalabeswele, labakhululekile nalabatigcili, kutsi babekwe luphawu etandleni tabo tangesekudla nobe emabuntini.” (Semb. 13:16) Kadzeni, tigcili betibekwa luphawu kuze kubonakale kutsi ngubani umphatsi wato. Ngendlela lefanako, bonkhe bantfu lamuhla kutawudzingeka bakhombise kutsi basekela bani. Indlela labacabanga ngayo kanye netento tabo kutawukhombisa kutsi basekela labohulumende.

16. Kungani kuphutfuma kutsi siciniseke kutsi nyalo setsembeke mbamba kuJehova?

¹⁶ Sitalwemukela yini loluphawu futsi sisekele bohulumende? Labo labangeke balwemukele loluphawu batawubhekana netinkinga futsi babe sengotini. Incwadzi yeSembulo ichubeka itsi: ‘Kutawuba bete lotsengako nobe lotsengisako, ngaphandle kwemuntfu lonaloluphawu.’ (Semb. 13:17) Kodvwa bantfu baNkulunkulu bayakwati loko latawukwenta kulabo labanaloluphawu lokukhulunywa ngalo kuSembulo 14:9, 10. Kunekutsi balwemukele, kutawuba shengatsi babhale etandleni tabo kutsi, “NgiwaJehova.” (Isa. 44:5) Nyalo sikhatsi sekuciniseka kutsi setsembeke mbamba kuJehova. Nangabe setsembekile, Jehova utawujabula futsi atsi sibakhe!

17. Yini lokufanele siyikhumbule mayelana nekubeketela kwaJehova?

¹⁷ Jehova ubeketele kakhulu kulamalanga ekugcina. Akafuni kubhujiswe ngisho namunye. (2 Phet. 3:9) Sonkhe usinikete litfuba lekutsi siphendvuke futsi sente sincumo lesikahle. Kodvwa angeke abeketele kuze kube phakadze. Labo labangafuni kusekela uMbuso waNkulunkulu batawubona saFaro wangemalanga aMosi. Jehova watsi kuFaro: “Nanyalo ngabe sengiselulile sandla sami, ngakushaya wena nebantfu bakho ngesishayo lesibulalako, futsi ngabe sengikucotfulile emhlabeni. Kodvwa ngikuyekele ngesizatfu sekutsi ngifuna kukukhombisa emandla ami, ngente nekutsi libito lami limenyetelwe kuwo wonkhe umhlaba.” (Eks. 9:15, 16) Ekugcineni, tonkhe tive titawukwati kutsi Jehova nguye kuphela Nkulunkulu weliciniso. (Hez. 38:23) Kutawenteka njani loko?

18. (a) Nguluphi lolunye luhlobo lwekunyakatiswa loluchazwe kuHagayi 2:6, 20-22? (b) Sati njani kutsi emavi aHagayi atawugcwaliseka esikhatsini lesitako?

¹⁸ Ngemuva kweminyaka leminyenti Hagayi afa, umphostoli Pawula waphefumulelwa kutsi abhalele emaKhristu langemaHebheru kutsi lamavi lakuHagayi 2:6, 20-22 atawugcwaliseka esikhatsini lesitako. (Fundza.) Pawula wabhala watsi: “Nyalo wetsembisile watsi:  ‘Ngitawuphindze nginyakatise, hhayi umhlaba kuphela kodvwa nelizulu.’ Emavi latsi ‘ngitawuphindze’ aveta kususwa kwetintfo letinyakatiswako, lokutintfo letentiwe ngulotsite, kuze kutsi tintfo letingeke tinyakatiswe tihlale tikhona.” (Heb. 12:26, 27) Lokunyakatiswa lokukhulunywa ngako lana kwehlukile kunaloko lokukhulunywa ngako kuHagayi 2:7. Loku kusho kutsi labo labafana naFaro, labangafuni kubuswa nguJehova, batawubhujiswa phakadze.

19. Yini lengeke inyakatiswe, futsi sati njani?

¹⁹ Yini lengeke inyakatiswe nobe isuswe? Pawula wachubeka watsi: “Njengobe sitawutfola uMbuso longeke unyakatiswe, asichubeke semukela umusa lomkhulu waNkulunkulu lesingenta ngawo umsebenti wakhe longcwele ngendlela leyemukelekako, ngekumesaba nangekumhlonipha.” (Heb. 12:28) Ngemuva kwekunyakatiswa kwekugcina, nguMbuso waNkulunkulu kuphela longeke unyakatiswe. Utawusala umile!—Hla. 110:5, 6; Dan. 2:44.

20. Ngusiphi sincumo bantfu lokufanele basente, futsi singabasita njani?

²⁰ Sekusele sikhatsi lesincane kakhulu! Bantfu kufanele bakhetse: Batawuchubeka yini basekela lelive, lokutawuholela ekubhujisweni, nobe batawukhetsa kuphila ngekuvumelana nentsandvo yaNkulunkulu, lokutawuholela ekuphileni lokuphakadze? (Heb. 12:25) Umsebenti wetfu wekushumayela ungabasita bantfu kutsi bente lesincumo lesibalulekile. Shengatsi singasita bantfu labanyenti kutsi bakhetse kusekela uMbuso waNkulunkulu. Shengatsi singahlala siwakhumbula nemavi lashiwo yiNkhosi yetfu Jesu latsi: “Letindzaba letimnandzi teMbuso titawushunyayelwa emhlabeni wonkhe, kuze tiviwe ngito tonkhe tive, bese-ke kuphela kuyefika.”—Mat. 24:14.