1-2. Osutshesutshelo akɔna wa didjidji wakatama wayosalema lo nshi yaso nyɛ?

 “LO MINITƐ ngana tsho, waa makashinyi la mvudu y’emusu yakatatɛ nyukɔ oko watɔkɔka bwatɛ ya longanda.” “Anto wa l’ahole tshɛ wakoke wɔma . . . Anto efula wakate ɔnɛ dui sɔ diakasalema l’edja ka minitɛ oko hiende tsho. Le mi, aki oko dui sɔ diakatshikala edja.” Ngasɔ mbakate anto amɔtshi wakahandɔ lo didimu dia nkɛtɛ diakasalema la Népal lo 2015. Otondonga ndo wɛ mbakɛnyi dui dia kɔlɔ diakasalema sɔ, tshike totoyodiohɛ esadi.

² Koko, l’etena kɛnɛ tekɔ lo mɛna woho ɔmɔtshi w’osutshesutshelo wotshikitanyi, mbuta ate osutshesutshelo wahendana la osomba ɔtɔi kana la wodja ɔtɔi. Koko dui sɔ mendanaka la wedja tshɛ ndo diɔ diambosalema l’edja k’ɛnɔnyi akumi. Omvutshi Hangayi akate dikambo di’osutshesutshelo ɔsɔ. Nde akafunde ate: “Jehowa kanga lolembelembe kata ate: ‘Mbala kekina, keema edja, dimi layosutshasutsha olongo, nkɛtɛ, ndjale ndo nkɛtɛ y’ofumbo.’”​—Hang. 2:6.

3. Ngande wotshikitanyi osutshesutshelo wa didjidji ɔsɔ la didimu dia nkɛtɛ dia mɛtɛ mɛtɛ?

³ Osutshesutshelo wakate Hangayi ntshikitana la didimu dia nkɛtɛ, nɛ dia dui sɔ mbelaka paka elanyelo. Koko, osutshesutshelo ɔsɔ mongaka l’etombelo w’amɛna. Jehowa ndamɛ totɛka ate: “Dimi layosutshasutsha wedja tshɛ ndo diangɔ di’oshinga wolo dia wedja diayoya; ko dimi layolodia luudu lɔnɛ la lotombo.” (Hang. 2:7) Kakɔna kakalembetshiyaka prɔfɛsiya kɛsɔ le wanɛ wakasɛnaka lo nshi ya Hangayi? Ndo kakɔna kalembetshiyatɔ le so ɛlɔ kɛnɛ? Tayɔsɛdingola ekadimwelo wa ambola asɔ ndo tayɔsɛdingola nto woho wakokaso mbisha lonya l’olimu w’osutshesutshelo wa wedja ɛlɔ kɛnɛ.

4. Lande na kakatome Jehowa omvutshi Hangayi otsha le ekambi ande?

⁴ Omvutshi Hangayi akalongola ɔkɛndɛ w’ohomba efula oma le Jehowa. Tɔsɛdingole kɛnɛ kakasalemaka yema la ntondo ka laasɔ. Ondo Hangayi aki l’atei wa wanɛ wakakalola otsha la Jɛrusalɛma oma lo lɔhɔmbɔ la Babilɔna lo 537 N.T.D. Yema tshitshɛ l’ɔkɔngɔ wa vɔ nkoma lɛnɛ akawatatshɔka, atɛmɔdi waki la kɔlamelo asɔ wakatatɛ mbika luudu la Jehowa, mbuta ate tɛmpɛlɔ. (Ɛzr. 3:8, 10) Koko kombeta edja, dui dimɔtshi dia lonyangu diakatombe. Vɔ wakakɔmɔ ndo wakatshike olimu wa wokelo l’ɔtɛ w’ɔlɔshamelo. (Ɛzr. 4:4; Hang. 1:1, 2) Diakɔ diele lo 520 N.T.D., Jehowa akasha Hangayi ɔkɛndɛ wa mbakimanyiya dia vɔ nyomonga l’ohetoheto ndo wa mbatshutshuya dia vɔ nshidiya mbika tɛmpɛlɔ. *​—Ɛzr. 6:14, 15.

5. Lande na kele ndooko onyake losango la Hangayi lakakeketsha ekambi wa Nzambi?

⁵ Losango la Hangayi laki l’oyango wa nkeketsha ase Juda dia monga la mbetawɔ le Jehowa. La dihonga tshɛ omvutshi ɔsɔ akatɛ ase Juda wakakɔmɔ ɛtɛkɛta ɛnɛ: “‘Jehowa kata ate: ‘Anto tshɛ wa lo wodja, nyokeketale ndo nyokambe olimu.’ ‘Nɛ dia dimi lekɔ kaamɛ la nyu,’ mbata Jehowa kanga lolembelembe.” (Hang. 2:4) Ndoko onyake etelo k’ɔnɛ “Jehowa kanga lolembelembe” kakaakeketsha. Jehowa ekɔ la nyemba nyemba y’andjelo wele andɔshi wa ta walɔmbɔlande, diakɔ diele ase Juda wakahombe ndjaɛkɛ le nde dia vɔ ntondoya.

6. Etombelo akɔna wakahombe monga la osutshesutshelo wakate Hangayi?

⁶ Jehowa akasambiya Hangayi dia mbewoya losango l’osutshesutshelo wa didjidji wa wedja tshɛ. Ɛnɛlɔ k’ɔnɛ Jehowa ayanga nsutshasutsha Pɛrɛsiya, wodja wakolɛka andja w’otondo lo nshi shɔ, kakakeketsha wanɛ wakakɔmɔ wakakaka tɛmpɛlɔ. Ndo etombelo akɔna wakahombe monga la osutshesutshelo ɔsɔ? Ntondotondo, ekambi wa Nzambi wakahombe nshidiya wokelo wa tɛmpɛlɔ. Oma laasɔ, kaanga wanɛ waki komonga ase Juda wakahombe monga kaamɛ la wɔ dia ntɛmɔla Jehowa lo tɛmpɛlɔ kakakama nto kɛsɔ. Ɔsɔ mɛtɛ aki losango l’ekeketshelo le ekambi wa Nzambi!​—Zɛk. 8:9.

7. Olimu akɔna w’osutshesutshelo wendana la so ɛlɔ kɛnɛ? Lembetshiya.

⁷ Kakɔna kalembetshiya prɔfɛsiya ka Hangayi le so ɛlɔ kɛnɛ? Jehowa ekɔ lo nsutshasutsha nto wedja tshɛ ndo l’etena kɛnɛ dui sɔ mendanaka la so. Tɔsɛdingole dui nɛ: Lo 1914, Jehowa aketɛ Yeso Kristo Nkumekanga ka lo Diolelo diande dia l’olongo. (Os. 2:6) Losango l’ɔnɛ Diolelo sɔ diakashikikɛma laki kɔlɔ le ewandji wa l’andja ɔnɛ. Dui sɔ nembetshiyaka dia “etena kakashikikɛma k’ase wedja,” mbuta ate etena kele ndooko ɔnɔmbɔdi waki onyimpala wa Jehowa kakakoke kana kakakome l’ekomelo katɔ. (Luka 21:24) Diakɔ diele, djekoleko oma lo 1919, ekambi wa Jehowa wekɔ lo mbidja dikako vɔlɛ lo Diolelo dia Nzambi oko tshɔi y’elongamelo k’anto. Esambishelo kɛnɛ ka “lokumu l’ɔlɔlɔ . . . la Diolelo” kekɔ lo nsutshasutsha andja w’otondo.​—Mat. 24:14.

8. Lo ndjela Osambo 2:1-3, kakɔna kasala wedja efula la losango lɔsɔ?

⁸ Kakɔna kasala wedja la losango lɔsɔ? Anto efula tonaka losango lɔsɔ. (Adia Osambo 2:1-3.) Wedja wambɔtɔ lo lofunguso. Vɔ tonaka dia mbetawɔ Ɔnɔmbɔdi wakasɔnama oma  le Jehowa. Vɔ hawɔshi losango lasambishaso oko “lokumu l’ɔlɔlɔ.” Diakɔ diele, mandji mɔtshi yakakome polo ndo lo nshimba olimu w’esambishelo! Kaanga mbata ewandji efula wa lo wedja ɛsɔ ɔnɛ wekɔ lo kambɛ Nzambi, vɔ hawolange ntshika lowandji lawɔ. Diakɔ diele, oko wakasale emboledi wa lo nshi ya Yeso, emboledi wa lo nshi yaso nyɛ wekɔ lo ntona Okitami w’esɔ wa Jehowa lo ndɔshana l’ambeki ande wa kɔlamelo.​—Ets. 4:25-28.

9. Kakɔna kasala Jehowa etena katona wedja losango la Diolelo?

⁹ Kakɔna kasala Jehowa etena katona wedja losango la Diolelo? Osambo 2:10-12 kadimolaka ɔnɛ: “Kakianɛ nyu nkumi ya dikanga, nyonge la shɛnɔdi; nyu toshushi ta la nkɛtɛ, nyetawɔ engwelo. Nyokambe Jehowa la wɔma, ndo nyɔngɛnɛngɛnɛ la lokomba. Nyosha ɔna kɛnɛmɔ, naka aha ngasɔ, Nzambi ayomala ko nyayonyɛma oma lo mboka, nɛ dia nkɛlɛ kande mbidɛka esadi. Ɔngɛnɔngɛnɔ le wanɛ tshɛ wayanga eshamelo le Nde.” Jehowa ekɔ ɔlɔlɔ ndo ekɔ lo mbasha etena ka vɔ nsala ɛsɔnwɛlɔ w’amɛna. Vɔ waakakoke ntshikitanya tokanyi tawɔ ndo mbetawɔ Diolelo dia Jehowa. Koko etena kekɔ lo tatshu esadi esadi. Tekɔ lo nsɛna lo “nshi y’ekomelo” ka dikongɛ nɛ di’akambo. (2 Tim. 3:1; Isa. 61:2) Etena kɛnɛ kamboleka monga dui dia waanyandja di’anto mbetawɔ akambo wa mɛtɛ ndo kambɛ Jehowa.

10. Naa shɛngiya ya dimɛna yayonga la olimu w’osutshesutshelo yakate Hangayi 2:7-9?

¹⁰ Olimu w’osutshesutshelo wa didjidji wakate Hangayi wekɔ la shɛngiya ya dimɛna le anto amɔtshi. Nde totɛka dia etombelo wayonga la osutshesutshelo ɔsɔ ele, “diangɔ di’oshinga wolo [anto w’etema ɛlɔlɔ] dia wedja tshɛ diayoya” dia ndjɔtɛmɔla Jehowa. * (Adia Hangayi 2:7-9.) Isaya nde la Mika wakate di’akambo akɔ waamɛ wayosalema “lo nshi y’ekomelo.”​—Isa. 2:2-4, nɔtɛ; Mika 4:1, 2, nɔtɛ.

11. Kakɔna kakasale ɔnangɛso ɔmɔtshi etena kakandoke losango la Diolelo mbala ka ntondo?

 ¹¹ Tɔsɛdingole shɛngiya yakonge la losango l’osutshesutshelo le ɔnangɛso ɔmɔtshi lelɛwɔ Ken, lakamba lo mbalasa kalɔmbɔla olimu aso. Nde mbohɔka dimɛna mbala ka ntondo kakawosambisha losango la Diolelo ambeta oko ɛnɔnyi 40. Ken mbutaka ate: “Etena kakamoke akambo wa mɛtɛ w’oma l’Ɔtɛkɛta wa Nzambi mbala ka ntondo, lakangɛnangɛna dia mboka dia tekɔ lo nsɛna lo nshi y’ekomelo ka dikongɛ di’akambo nɛ. Lakashihodia ɔnɛ dia mbetawɔma le Nzambi ndo ndjokondja lɔsɛnɔ la pondjo, lakahombe mimɔ oma l’akambo wa l’andja ɔnɛ wahasungana anto ndjaɛkɛ lɔkɔ ndo ntshikala nge lo wedi wa Jehowa. Lakalɔmbɛ Jehowa ndo lakasale dui sɔ. Lakatshike nsukɛ andja ɔnɛ ndo aha la ntshimbatshimba laketawɔ ekokelo ka Diolelo dia Nzambi diahakokaki minyɛma.”

12. Ngande wambolodiama tɛmpɛlɔ ka Jehowa ka lo nyuma la lotombo lo nshi y’ekomelo nyɛ?

¹² Mɛnamaka hwe dia Jehowa ekɔ lo ntshɔkɔla ekambi ande. Lo nshi y’ekomelo nyɛ, tambɛna dia lofulo la wanɛ watɛmɔla Jehowa lekɔ lo tadɛ tsho. Lo 1914 taki nunu dingana to. Kakianɛ taya anto ndekana miliyɔ enanɛi watɛmɔla Nzambi l’ohetoheto ndo ɔnɔnyi tshɛ miliyɔ y’anto wekɔ lo nsangana kaamɛ la so dia nsala Eohwelo. Lo yoho shɔ mbele sɛkɛ dia la nkɛtɛ dia tɛmpɛlɔ ka Jehowa ka lo nyuma, mbuta ate yɛdikɔ yande yendana l’ɔtɛmwɛlɔ wa pudipudi, diambololanɛ la “diangɔ di’oshinga wolo dia wedja tshɛ.” Lokombo la Jehowa lambotombɔma nto oma lo etshikitanu wambosala anto asɔ lo ndɔta lonto l’oyoyo.​—Ɛf. 4:22-24.

13. Naa prɔfɛsiya kina yambokotshama l’ɔtɛ wambohama lofulo l’atɛmɔdi wa Jehowa? (Enda osato wele lo lohoso.)

¹³ Ohamelo wa dimɛna ɔsɔ wambokotsha prɔfɛsiya kina, ɛnyɛlɔ oko prɔfɛsiya kɛmɔtshi kele lo Isaya tshapita 60. Divɛsa 22 dia lo tshapita shɔ mbutaka ɔnɛ: “Ɔnɛ lele tshitshɛ ayonga kinunu (1 000) ndo ɔnɛ lele shekaseka wodja wa wolo. Dimi Jehowa dimɛ layosala dia dui sɔ salema esadi esadi lo etena kadiɔ.” L’ɔtɛ wambofula l’ofulo l’atɛmɔdi wa mɛtɛ, dui dimɔtshi dia diambo diambosalema. “Diangɔ di’oshinga wolo” sɔ diamboya la akoka  ndo la diewo diotshikitanyi, kaamɛ ndo la nsaki k’efula ka ndjasha l’esambishelo ka “lokumu l’ɔlɔlɔ la Diolelo.” Etombelo wambonga ele, ekambi wa Jehowa koka nkamba l’akoka asɔ wakelɛ Isaya ɔnɛ “abɛlɛ wa wedja.” (Isa. 60:5, 16) L’ekimanyielo k’apami la wamato wa nɛmɔ asɔ, olimu w’esambishelo wekɔ lo salema lo wedja 240 ndo ekanda wekɔ lo tondjama l’ɛtɛkɛta ndekana 1 000.

14. Yɛdikɔ yakɔna yahomba anto mbɔsa nshi nyɛ?

¹⁴ Lo nshi y’ekomelo nyɛ, osutshesutshelo wa wedja wekɔ lo ntshutshuya anto dia mbɔsa yɛdikɔ mɔtshi. Onde vɔ wayosukɛ Diolelo dia Nzambi ko kana vɔ wayokitsha wɛkamu awɔ le mandji ya l’andja ɔnɛ? Ɔsɔ mbele ɔsɔnwɛlɔ wahomba onto tshɛ nsala. Kaanga mbele ekambi wa Jehowa wekɔ lo nkitanyiya ɛlɛmbɛ wa lo wodja wadjasɛwɔ, vɔ tshikalaka la lomangemange tshɛ lo tshɛ lo kɛnɛ kendana l’awui wa pɔlitikɛ wa lo wodja akɔ. (Rɔmɔ 13:1-7) Vɔ mbeyaka ɔnɛ Diolelo mbele tshɔi y’ehomɔ kayokandola ekakatanu w’anto. Diolelo sɔ bu dia l’andja ɔnɛ.​—Jni. 18:36, 37.

15. Ohemba akɔna wa wolo wendana l’olowanyi watɛkɛtama lo dibuku dia Ɛnyɛlɔ?

¹⁵ Dibuku dia Ɛnyɛlɔ mbutaka dia olowanyi w’ekambi wa Nzambi wayɔtɔ l’ohemba lo nshi y’ekomelo. Ohemba ɔsɔ wayotetemala tokonya dia ndɔshama ndo pɛnyahɛnyama wolo. Dikongɛ dia pɔlitikɛ dia l’andja ɔnɛ diayɔsɔmana l’ɔtɛmwɛlɔ aso ndo diayɔhɛnyahɛnya wanɛ wayotona disukɛ. (Ɛny. 13:12, 15) Vɔ “[wayo]tshutshuya anto tshɛ dia vɔ mbidjama djembetelo lo lonya l’omi kana lo mfumu yawɔ, oyadi anto wa totshitshɛ kana wa weke, akanga w’ɛngɔnyi kana ase wola, wanɛ wele la lotshungɔ kana mfumbe.” (Ɛny. 13:16) Wakadjaka mfumbe ya lo nshi y’edjedja djembetelo dia mɛnya onto lowakanga. Woho akɔ waamɛ mbele, anto wa lo nshi yaso nyɛ wayotshutshuyama dia monga la djembetelo ya didjidji lo lonya kana lo mfumu. Tokanyi ndo etsha awɔ ayɛnya lo wedi wewɔ ndo kana wekɔ lo nsukɛ dikongɛ dia pɔlitikɛ.

16. Lande na kele ekɔ dui dia waanyandja dia sho nkeketsha olowanyi aso le Jehowa ɛlɔ kɛnɛ?

¹⁶ Onde tayetawɔ djembetelo shɔ ya didjidji ndo tayosukɛ mandji shɔ ya pɔlitikɛ? Wanɛ watona nongola djembetelo shɔ wayohomana l’ekakatanu ndo wayonga lo waale. Dibuku dia Ɛnyɛlɔ komaka polo lo mbuta ɔnɛ: “Ndooko onto [lakoka] nsomba kana nsondja, onyake paka onto lele la djembetelo.” (Ɛny. 13:17) Koko, ekambi wa Nzambi mbeyaka kɛnɛ kayosalɛ Nzambi wanɛ wele la djembetelo yɔtɛkɛtami lo Ɛnyɛlɔ 14:9, 10. Lo dihole dia mbetawɔ djembetelo shɔ, ekɔ oko vɔ mfunda lo lonya lawɔ ɔnɛ: “Dimi lekɔ laki Jehowa.” (Isa. 44:5) Ɔnɛ mbele etena ka sho ndjashikikɛ dia tekɔ l’olowanyi w’efula le Jehowa. Naka sho nsala ngasɔ, kete Jehowa ayɔngɛnangɛna dia mbuta ɔnɛ sho tekɔ anto ande!

17. Kakɔna kahombaso mbohɔka lo kɛnɛ kendana la solo dia lotutsha dia Jehowa?

¹⁷ Jehowa ambɛnya solo dia lotutsha di’efula lo nshi y’ekomelo nyɛ. Nde halange kaanga onto ɔtɔi ndanyema. (2 Pe. 3:9) Nde ambosha onto tshɛ diaaso dia ndjatshumoya ndo mbɔsa yɛdikɔ ya dimɛna. Koko solo diande dia lotutsha diekɔ l’elelo. Wanɛ watona diaaso sɔ wayotanema la ntondo ka dikambo diele oko nɛ diaki la Farawɔ ka lo nshi ya Mɔsɛ. Jehowa akatɛ Farawɔ ate: “Otondongaka lakasembola lonya lami dia kɔkɔmɔla wɛ l’anto ayɛ lo nyotomɛ mpokoso ka wolo, tshike wɛ amboshishɔka oma la nkɛtɛ. Koko l’ɔtɛ wa dikambo nɛ mbakamakotshike la lɔsɛnɔ: Dia kɛnya wolo ami ndo dia lokombo lami mbewoyama lo nkɛtɛ k’otondo.” (Eto. 9:15, 16) Wedja  tshɛ wayohomba mbeya dia Jehowa mbele Nzambi ɔtɔi ka mɛtɛ. (Ɛzk. 38:23) Ngande wayosalema dui sɔ?

18. a) Naa woho okina w’osutshesutshelo wɔtɛkɛtami lo Hangayi 2:6, 20-22? b) Ngande weyaso dia ɛtɛkɛta wa Hangayi wayokotshama lo nshi yayaye?

¹⁸ Ntambe efula l’ɔkɔngɔ wa nshi ya Hangayi, ɔpɔstɔlɔ Pɔɔlɔ akasambiyama dia mɛnya dia ɛtɛkɛta wele lo Hangayi 2:6, 20-22 wayokotshama lo nshi yayaye. (Adia.) Pɔɔlɔ akafunde ate: “L’etena kɛnɛ nde akalake ate: ‘Mbala kekina dimi layosutshasutsha aha nkɛtɛ tsho koko ndo olongo.’ Etelo k’ɔnɛ: ‘Mbala kekina’ mɛnyaka wonyelo wa diangɔ diasutshasutshama oko wediɔ diangɔ diakasalema, dia diangɔ diahasutshasutshama ntshikala.” (Hɛb. 12:26, 27) Otshikitanyi la osutshesutshelo wakatɛkɛtama lo Hangayi 2:7, osutshesutshelo ɔsɔ wayolembetshiya elanyelo ka pondjo ka wanɛ wele oko Farawɔ, watona mbetawɔ dia Jehowa mbele la lotshungɔ la nɔmbɔla.

19. Kakɔna kahatosutshasutshama, ndo ngande weyaso dui sɔ?

¹⁹ Kakɔna kahatosutshasutshama kana kahatonyɛma? Pɔɔlɔ akatetemala mbuta ɔnɛ: “Lam’ele sho pombaka nongola Diolelo diahakoke sutshasutshama, nyɛsɔ totetemale nongola ɔlɔlɔ waheyama mbɛdika watokimanyiya dia sho kambɛ Nzambi olimu w’ekila lo yoho yetawɔnde la wɔma ndo la lokomba.” (Hɛb. 12:28) Lo mɛtɛ, etena kayonga osutshesutshelo w’ekomelo, onyake Diolelo dia Nzambi to mbahatosutshasutshama. Diɔ diayotshikala nge lo dihole diadiɔ!​—Os. 110:5, 6; Dan. 2:44.

20. Ɔsɔnwɛlɔ akɔna wahomba anto nsala, ndo ngande wakokaso mbakimanyiya?

²⁰ Ɔnɛ bu etena kahombaso mbetsha wenya wetshetsha! Anto pombaka nsala ɔsɔnwɛlɔ ɔmɔtshi: Onde vɔ wayotetemala nsukɛ yoho ya lɔsɛnɔ yakeketshama l’andja ɔnɛ, yakonya l’elanyelo, ko kana vɔ wayosala la wolo dia nsɛna lo yoho yɔtɔnɛ la lolango la Nzambi, dui diakonya lo lɔsɛnɔ la pondjo? (Hɛb. 12:25) L’ekimanyielo k’olimu aso w’esambishelo, sho koka nkimanyiya anto dia vɔ mbɔsa yɛdikɔ y’ohomba. Nyɛsɔ tokimanyiya anto efula wa nɛmɔ dia vɔ mbɔsa yɛdikɔ ya nsukɛ Diolelo dia Nzambi. Ndo nyɛsɔ totetemale mbohɔ ɛtɛkɛta wa Nkumadiɔndjɔ Yeso ɛnɛ: “Lokumu l’ɔlɔlɔ lɔnɛ la Diolelo layosambishama lo nkɛtɛ k’otondo oko ɔmɛnyi le anto wa lo wedja tshɛ, ko oma laasɔ ekomelo kayoya.”​—Mat. 24:14.