1-2. Ko e hā ʻa e luluʻi fakaefakatātā naʻe tomuʻa tala fekauʻaki mo hotau taimí?

“ʻI HA laui miniti pē, naʻe kamata ke holafa ʻa e ngaahi falekoloá mo e ngaahi fale motuʻá.” “Naʻe hohaʻatuʻu ʻa e feituʻu kotoa . . . Naʻe pehē ʻe he tokolahi naʻe feʻunga nai mo e miniti ʻe ua. Kiate au, naʻe hangē ia heʻikai ke toe ʻosí.” Ko e fakamatala ia ʻa e niʻihi naʻa nau hao ʻi ha mofuike naʻe tō ʻi Nepolo ʻi he 2015. Kapau naʻá ke hokosia ha meʻa fakalilifu pehē, ʻe faingataʻa ke ngalo ia ʻiate koe.

² Kae kehe, ʻi he taimí ni ʻoku tau hokosia ha luluʻi ʻoku kehe, ko ha luluʻi ʻoku ʻikai kaunga ki ai ha kolo pe ko ha fonua pē taha. ʻI hono kehé, ʻoku kaunga ki ai ʻa e kotoa ʻo e ngaahi puleʻangá, pea kuo faai mai ia ʻi he laui hongofuluʻi taʻu. Ko e luluʻi ko ení naʻe tomuʻa tala ʻe he palōfita ko Hākeaí. Naʻá ne tohi: “Ko e meʻa eni ʻoku folofolaʻaki ʻe Sihova ʻo e ngaahi kau taú, ‘ʻI ha kiʻi taimi siʻi mei heni​—te u toe fai ai hano luluʻi ʻa e ngaahi langí mo e māmaní mo e tahí pea mo e fonua mōmoá.’”​—Hāk. 2:6.

3. ʻOku anga-fēfē ʻa e kehe ʻa e luluʻi fakaefakatātā ko ení mei ha mofuike?

³ Ko e luluʻi ʻoku fakamatala ki ai ʻa Hākeaí ʻoku ʻikai ke hangē ia ha mofuiké, ʻa ia ko e maumau pē ʻokú ne ʻomaí. ʻI hono kehé, ʻokú ne ʻomai ha ola lelei. ʻOku tala mai tonu ʻe Sihova: “Te u luluʻi ʻa e kotoa ʻo e ngaahi puleʻangá, pea ko e ngaahi meʻa mahuʻinga ʻo e kotoa ʻo e ngaahi puleʻangá te nau haʻu; pea te u fakafonu ʻa e falé ni ʻaki ʻa e lāngilangi.” (Hāk. 2:7) Ko e hā ʻa e ʻuhinga ʻo e kikite ko ení ki he faʻahinga naʻe moʻui ʻi he taimi ʻo Hākeaí? Pea ko e hā ʻene ʻuhinga kiate kitautolu ʻi he ʻaho ní? Te tau lāulea ki he tali ʻo e ongo fehuʻi ko iá pea ako foki ki he founga ke tau kau ai ʻi hono luluʻi ʻo e ngaahi puleʻangá ʻi he ʻahó ni.

4. Ko e hā naʻe fekauʻi atu ai ʻe Sihova ʻa e palōfita ko Hākeaí ki Heʻene kakaí?

⁴ Naʻe maʻu ʻe he palōfita ko Hākeaí ha fekau mahuʻinga meia Sihova. Fakakaukau ki he puipuituʻá. ʻOku ngalingali naʻe kau ʻa Hākeai ʻi he faʻahinga naʻe toe foki ki Selusalema ʻi he 537 K.M. mei hono ʻave fakamālohi ki Pāpiloné. ʻI he hili pē ʻenau aʻu ki aí, ko e kau lotu faitōnunga ko iá naʻa nau fakatoka ʻa e fakavaʻe ʻo e fale ʻo Sihová pe temipalé. (ʻĒsela 3:8, 10) Ka naʻe ʻikai fuoloa, naʻe kamata ke hoko ha tuʻunga fakamamahi. Naʻa nau loto-siʻi pea taʻofi ʻa e ngāue langá koeʻuhi ko e fakafepakí. (ʻĒsela 4:4; Hāk. 1:1, 2) Ko ia ʻi he 520 K.M., naʻe fekauʻi atu ʻe Sihova ʻa Hākeai ke ne langaʻi ʻenau faivelengá pea ueʻi kinautolu ke fakakakato ʻa e temipalé. *​—ʻĒsela 6:14, 15.

5. Ko e hā kuo pau naʻe fakalototoʻa ai ʻa e pōpoaki ʻa Hākeaí ki he kakai ʻa e ʻOtuá?

⁵ Ko e pōpoaki ʻa Hākeaí naʻe fakataumuʻa ke ne langa hake ʻa e tui kia Sihová. Naʻe fakahaaʻi loto-toʻa ʻe he palōfitá ʻa e ngaahi lea ko ení ki he kau Siu loto-siʻí: “‘Ke mou loto-toʻa, ʻa kimoutolu kotoa kakai ʻo e fonuá,’ ko e fakahaaʻi ia ʻe Sihová, ‘pea ngāue. He ʻoku ou ʻiate kimoutolu,’ ko e fakahaaʻi ia ʻe Sihova ʻo e ngaahi kau taú.” (Hāk. 2:4) Ko e kupuʻi lea “Sihova ʻo e ngaahi kau taú” kuo pau pē naʻe fakalototoʻa. ʻOku ʻi ai ʻa e fuʻu kau tau ʻo e kau ʻāngelo ʻa Sihova, ko ia naʻe fiemaʻu ki he kau Siú ke falala kiate ia ka nau lavameʻa.

6. Ko e hā ʻa e ola ʻo e luluʻi naʻe tomuʻa tala ʻe Hākeaí?

⁶ Naʻe fakamānavaʻi ʻe Sihova ʻa Hākeai ke ne ʻoatu ha pōpoaki naʻe fakamatalaʻi ai ha luluʻi fakaefakatātā ʻo e kotoa ʻo e ngaahi puleʻangá. Naʻe fakapapauʻi ʻi he meʻa fakahā ko ení ki he kau langa loto-siʻi ʻo e temipalé ʻe luluʻi ʻe Sihova ʻa e puleʻanga hau ʻo Pēsiá, ʻa ia naʻá ne kapa ʻa e ngaahi puleʻanga lahi ʻi he taimi ko iá. Pea ko e hā ʻa e ola ʻo e luluʻi ko iá? ʻUluakí, ʻe fakaʻosi ʻe he kakai ʻa e ʻOtuá ʻa e langa ʻo e temipalé. Pea naʻa mo e kakai ʻikai ko ha kau Siú te nau kau fakataha ʻi he lotu kia Sihova ʻi he temipale ko ia ne toe langá. Kuo pau pē naʻe hoko ia ko ha pōpoaki fakalototoʻa ki he kakai ʻa e ʻOtuá!​—Sāk. 8:9.

7. Ko e hā ʻa e ngāue luluʻi ʻoku tau kau ki ai he ʻaho ní? Fakamatalaʻi.

⁷ Ko e hā ʻa e ʻuhinga ʻo e kikite ʻa Hākeaí kiate kitautolú? ʻOku toe luluʻi ʻe Sihova ʻa e kotoa ʻo e ngaahi puleʻangá, pea ko e taimi ko ení ʻoku tau kau ki ai. Fakakaukau ki he moʻoniʻi meʻa ko ení: ʻI he 1914, naʻe fokotuʻu ʻe Sihova ʻa Sīsū Kalaisi ko e Tuʻi Hono Puleʻanga fakahēvaní. (Saame 2:6) Ko hono fokotuʻu ʻo e Puleʻanga ko iá ko ha ongoongo kovi ia ki he kau taki ʻo e māmaní. Naʻe ʻuhinga iá ko e “taimi kotofa ʻo e ngaahi puleʻangá”​—ʻa e vahaʻa taimi naʻe ʻikai ke ʻi ai ha pule ke ne fakafofongaʻi hangatonu ʻa Sihová​—naʻe fakahoko pe naʻe ngata. (Luke 21:24) ʻI he lāuʻilo ki he moʻoniʻi meʻa ko iá, tautefito talu mei he 1919, ko e kakai ʻa Sihová kuo nau talaki ko e Puleʻanga ʻo e ʻOtuá ʻa e ʻamanakiʻanga pē taha ki he faʻahinga ʻo e tangatá. Ko hono malangaʻi ʻo e “ongoongo lelei ko ʻeni ʻo e Puleʻangá” kuó ne luluʻi ʻa e māmaní kotoa.​—Māt. 24:14.

8. Fakatatau ki he Saame 2:1-3, kuo anga-fēfē fakafeangai ʻa e tokolahi taha ʻo e ngaahi puleʻangá ki he pōpoaki ko ení?

⁸ Kuo anga-fēfē fakafeangai ʻa e kakaí ki he pōpoaki ko ení? Ko e tokolahi tahá kuo nau fakafeangai ʻikai lelei. (Lau ʻa e Saame 2:1-3.) Kuo hohaʻatuʻu ʻa e ngaahi puleʻangá. ʻOku nau fakafisi ke tali ʻa e Tokotaha Pule kuo fakanofo ʻe Sihová. ʻOku ʻikai ke nau vakai ki he pōpoaki ʻo e  Puleʻangá ʻoku tau malangaʻí ko ha “ongoongo lelei.” Ko hono moʻoní, kuo tapui ʻe he ngaahi puleʻanga ʻe niʻihi ʻetau ngāue fakamalangá! Neongo ko e tokolahi ʻo e kau pule ʻo e ngaahi puleʻanga ko ení ʻoku nau taku ʻoku nau tauhi ki he ʻOtuá, ʻoku ʻikai ke nau loto ke tuku ange honau mālohí mo e mafaí. Hangē ko ia naʻe fai ʻe he kau pule ʻi he ʻaho ʻo Sīsuú, ko e kau pule ʻi he ʻaho ní ʻoku nau fakafepaki ki he Tokotaha Pani ʻa Sihová ʻaki hono ʻohofi hono kau muimui mateakí.​—Ngā. 4:25-28.

9. ʻOku anga-fēfē tali ʻa Sihova ki he fakafeangai ʻikai lelei ʻa e ngaahi puleʻangá?

⁹ ʻOku anga-fēfē tali ʻa Sihova ki he fakafeangai ʻikai lelei ʻa e ngaahi puleʻangá? ʻOku tali ia ʻi he Saame 2:10-12: “Ko ia ai, ʻa kimoutolu ngaahi tuʻi, mou fakahāhā ʻa e ʻiloʻilo; tali ʻa e fakatonutonú, ʻa kimoutolu kau fakamaau ʻo e māmaní. Tauhi kia Sihova ʻi he manavahē, pea fiefia fakataha mo e tetetete. Fakalāngilangiʻi ʻa e ʻaló, telia naʻa houhau ʻa e ʻOtuá pea te mou ʻauha ʻi he halá, he ʻoku vave ʻa e ʻalu hake ʻa ʻEne houhaú. Fiefia ē ka ko e faʻahinga kotoa ʻoku hūfanga kiate Iá.” ʻOku anga-lelei ʻa Sihova ʻo ʻoange ki he kau fakafepaki ko ení ha faingamālie. ʻE kei lava pē ke liliu ʻenau fakakaukaú pea tali ʻa e Puleʻanga ʻo Sihová. Kae kehe, ʻoku tāiʻi ʻa e taimí. ʻOku tau moʻui “ʻi he ngaahi ʻaho fakaʻosí” ʻo e fokotuʻutuʻu ko ení. (2 Tīm. 3:1; ʻAi. 61:2) Kuo teʻeki ai ha taimi ki muʻa ʻe fakavavevave ange ki he kakaí ke maʻu ʻa e moʻoní pea fai ʻa e fili totonú.

10. Ko e hā ʻa e fakafeangai lelei ki he ngāue luluʻí ʻoku fakamatalaʻi ʻi he Hākeai 2:7-9?

¹⁰ Ko e luluʻi fakaefakatātā naʻe tomuʻa tala ʻe Hākeaí kuo ʻi ai hono ola lelei ki he kakai ʻe niʻihi. ʻOkú ne tala mai ko e ola ʻo e luluʻí, “ko e ngaahi meʻa mahuʻinga [kakai loto-totonú] ʻo e kotoa ʻo e ngaahi puleʻangá te nau haʻu” ke lotu kia Sihova. * (Lau ʻa e Hākeai 2:7-9.) Ko ʻAisea pehē foki kia Maika naʻá na tomuʻa tala ʻa e meʻa tatau ʻe hoko “ʻi he ngaahi ʻaho fakaʻosí.”​—ʻAi. 2:2-4, fkm. ʻi lalo; Mai. 4:1, 2, fkm. ʻi lalo.

11. Naʻe anga-fēfē fakafeangai ha tokoua ki he pōpoaki ʻo e Puleʻangá ʻi heʻene fuofua fanongo ki aí?

 ¹¹ Fakakaukau ki he meʻa naʻe hoko ki ha tokoua ko Ken, ʻokú ne ngāue ʻi he ʻuluʻi ʻapitangá, ʻi heʻene maʻu ʻa e pōpoaki ʻokú ne luluʻi ʻa e māmaní. ʻOkú ne kei manatuʻi lelei pē ʻa e fuofua taimi naʻá ne fanongo ai ki he pōpoaki ʻo e Puleʻangá ʻi he taʻu nai ʻe 40 kuo maliu atú. ʻOku pehē ʻe Ken: “ʻI heʻeku fuofua fanongo ki he moʻoni mei he Folofola ʻa e ʻOtuá, naʻá ku houngaʻia ke ʻiloʻi ʻoku tau moʻui ʻi he ngaahi ʻaho fakaʻosi ʻo e fokotuʻutuʻu ko ení. Naʻá ku mahinoʻi koeʻuhi ke maʻu ʻa e hōifua ʻa e ʻOtuá pea moʻui taʻengatá, naʻe pau ke u hola mei he māmani feliuliuaki ko ení pea tuʻu maʻu ʻi he tafaʻaki ʻa Sihová. Naʻá ku lotu peá u fai leva ia. Naʻá ku liʻaki ʻa e māmaní pea hola ki he malu ʻo e Puleʻanga ʻo e ʻOtuá, ʻa ia heʻikai lava ke luluʻi.”

12. Kuo anga-fēfē hono fakafonu ʻa e temipale fakalaumālie ʻo Sihová ʻaki ʻa e lāngilangí lolotonga ʻa e ngaahi ʻaho fakaʻosi ko ení?

¹² ʻOku hā mahino kuo tāpuakiʻi ʻe Sihova ʻene kakaí. Lolotonga ʻa e ngaahi ʻaho fakaʻosi ko ení, kuo tau vakai ki ha tupu kāfakafa ʻi he tokolahi ʻo e kau lotu kiate iá. ʻI he 1914 naʻa tau toko laui afe siʻi pē. ʻI he taimí ni ʻoku ʻi ai ʻa e toko valu miliona tupu ʻoku nau longomoʻui ʻi he lotu ki he ʻOtuá, pea ʻoku ʻi ai mo ha toe laui miliona ʻoku nau kau fakataha mo kitautolu ʻi he taʻu taki taha ke kātoangaʻi ʻa e Fakamanatú. ʻI he foungá ni, ko e lotoʻā fakaemāmani ʻo e temipale fakalaumālie ʻo Sihová​—ʻa ʻene fokotuʻutuʻu ki he lotu maʻá​—kuo fakafonuʻaki ia ʻa e “ngaahi meʻa mahuʻinga ʻo e kotoa ʻo e ngaahi puleʻangá.” Kuo toe fakalāngilangiʻi mo e huafa ʻo Sihová ʻi he ngaahi liliu ʻoku fai ʻe he faʻahinga ko ení ʻi heʻenau kofuʻaki ʻa e angaʻitangata foʻoú.​—ʻEf. 4:22-24.

13. Ko e hā ʻa e ngaahi kikite kehe kuo fakahoko ʻi he ngaahi tupulekina fakafiefia ko ení? (Sio ki he tā ʻi he takafí.)

¹³ Ko e ngaahi tupulekina fakafiefia ko ení kuo fakahoko ai ʻa e ngaahi kikite kehe, hangē ko ia ʻoku maʻu ʻi he ʻAisea vahe 60. ʻOku pehē ʻi he veesi 22: “Ko e kiʻi siʻí ʻe hoko ko e toko afe pea ko e momoʻi meʻá ʻe hoko ko ha puleʻanga mālohi. Ko au Sihova, te u fakavaveʻi ia ʻi hono taimi.” Koeʻuhi ko e ʻaukolo mai ʻa e kau lotu moʻoní, ʻoku hoko ai ha meʻa fakaofo. Ko e “ngaahi meʻa mahuʻinga” ko ení ʻoku nau haʻu fakataha mo e ngaahi pōtoʻi mo e malava kehekehe fakataha mo ha laumālie loto-lelei ke kau ʻi hono  malangaʻi ʻa e “ongoongo lelei ʻo e Puleʻangá.” Ko ia ai, hangē naʻe fakamatalaʻi ʻe ʻAiseá, ko e “huʻakau ʻo e ngaahi puleʻangá” kuo ʻai ke ala maʻu ʻe he kakai ʻa Sihová. (ʻAi. 60:5, 16) ʻI he tokoni ʻa e kau tangata mo e kau fefine mahuʻinga ko ení, ko e ngāue fakamalangá kuo fakahoko ia ʻi he fonua ʻe 240 pea ko e ʻū tohí ʻoku faʻu ʻi he lea ʻe 1,000 tupu.

14. Ko e hā ʻa e fili kuo pau ke fai ʻe he kakaí he taimi ní?

¹⁴ ʻI he taimi ko eni ʻo e ngataʻangá, ko e luluʻi ʻo e ngaahi puleʻangá ʻoku kounaʻi ai ʻa e kakaí ke nau fai ha fili. Te nau poupou ki he Puleʻanga ʻo e ʻOtuá pe te nau tuku ʻenau falalá ki he ngaahi puleʻanga ʻo e māmaní? Ko e fili eni kuo pau ke tau fai kotoa. Neongo ʻoku talangofua ʻa e kakai ʻa Sihová ki he ngaahi lao ʻo e puleʻanga ʻoku nau nofo aí, ʻoku nau hanganaki tuʻu-ʻatā fakaʻaufuli mei he ngaahi meʻa fakapolitikale ʻo e māmaní. (Loma 13:1-7) ʻOku nau ʻiloʻi ko e Puleʻangá ko e fakaleleiʻanga moʻoni pē ia ʻe taha ki he ngaahi palopalema ʻa e tangatá. Ko e Puleʻanga ko iá ʻoku ʻikai ko ha konga ia ʻo e māmani ko ení.​—Sione 18:36, 37.

15. Ko e hā ʻa e ʻahiʻahi lahi ʻo e mateakí ʻoku fakamatalaʻi ʻi he tohi ʻa Fakahā?

¹⁵ ʻOku fakamatalaʻi ʻi he tohi ʻa Fakahā ha ʻahiʻahiʻi ʻo e mateaki ʻa e kakai ʻa e ʻOtuá ʻi he ngaahi ʻaho fakaʻosí. Ko e ʻahiʻahi ko iá ʻe hokohoko atu ke ne tenge lahi kitautolu. Ko e ngaahi tuʻunga fakapolitikale ʻo e māmani ko ení te nau kounaʻi ʻetau lotú pea fakatangaʻi ʻa e faʻahinga ʻoku nau fakafisi ke poupouʻi kinautolú. (Fkh. 13:12, 15) Te nau “kounaʻi ʻa e kakai kotoa pē​—ʻa e iiki mo e lalahi, ʻa e koloaʻia mo e masiva, ʻa e tauʻatāina mo e pōpula​—ke fakaʻilongaʻi ʻa e faʻahingá ni ʻi honau nima toʻomataʻú pe ʻi honau laʻé.” (Fkh. 13:16) Ko e kau pōpula ʻi he kuonga muʻá naʻe tutuʻi ha fakaʻilonga ʻiate kinautolu ke fakahaaʻi ko hai honau pulé. ʻI he tuʻunga meimei tatau, ko e kakai kotoa ʻi hotau ʻahó ʻoku ʻamanekina ke nau maʻu ʻa e fakaʻilonga fakaefakatātā ko ení ʻi honau nimá pe laʻé. Ko ʻenau fakakaukaú mo e tōʻongá ʻe fakahaaʻi ai ʻoku nau kau mo poupou ki he ngaahi tuʻunga fakapolitikalé.

16. Ko e hā ʻoku fakavavevave ai he taimí ni ke fakaivimālohiʻi ʻetau mateaki kia Sihová?

¹⁶ Te tau tali ʻa e fakaʻilonga fakaefakatātā ko ení pea ʻave ʻetau mateakí ki he ngaahi puleʻanga fakapolitikalé? Ko e faʻahinga ʻoku nau fakafisi ke maʻu ʻa e fakaʻilonga ko ení te nau fehangahangai mo e faingataʻa mo e fakatuʻutāmaki. ʻOku hoko atu ʻa e tohi ʻa Fakahā ʻo pehē: “ʻOua naʻa ʻi ai ha taha ʻe lava ke ne fai ha fakatau mai pe ha fakatau atu, tuku kehe pē ha taha ʻokú ne maʻu ʻa e fakaʻilongá.” (Fkh. 13:17) Ka ʻoku ʻiloʻi ʻe he kakai ʻa e ʻOtuá ʻa e meʻa ʻe fai ʻe he ʻOtuá ki he faʻahinga ʻoku nau maʻu ʻa e fakaʻilonga ʻoku lave ki ai ʻi he Fakahā 14:9, 10. ʻI he ʻikai maʻu ʻa e fakaʻilonga ko iá, ʻe hangē ia ʻoku nau tohi ʻi honau nimá, “ʻOku ou kau kia Sihova.” (ʻAi. 44:5) Ko e taimi eni ʻoku totonu ke tau fakapapauʻi ai ko ʻetau mateaki kia Sihová ʻoku mālohi. Kapau ko ia, ʻe fiefia ʻa Sihova ke ne lau kitautolu ko ʻene meʻa!

17. Ko e hā ʻoku fiemaʻu ke tau manatuʻi ʻi he fekauʻaki mo e kātaki ʻa Sihová?

¹⁷ Kuo fakahaaʻi ʻe Sihova ʻa e kātaki lahi lolotonga ʻa e ngaahi ʻaho fakaʻosi ko ení. ʻOku ʻikai te ne finangalo ke fakaʻauha ha taha. (2 Pita 3:9) Kuó ne ʻoange ʻa e faingamālie ki he tokotaha kotoa ke fakatomala pea fai ʻa e fili totonú. Ka ʻoku fakangatangata ʻene kātakí. Ko e faʻahinga ʻoku nau siʻaki ʻa e faingamālie ko ení te nau ʻi ha tuʻunga meimei tatau mo Felo ʻi he ʻaho ʻo Mōsesé. Naʻe tala ʻe Sihova kia Felo: “ʻI he taimi ní ne mei lava ke u mafao atu hoku nimá ʻo taaʻi koe mo ho kakaí ʻaki ha mala fakatupu ʻauha, pea naʻe mei tafiʻi atu koe mei he māmaní. Ka ko eni ʻa e ʻuhinga tofu pē kuó u kei  tuku ai koe ke ke moʻuí: Ke fakahaaʻi kiate koe ʻa hoku mālohí pea ke talaki ʻa hoku huafá ʻi he kotoa ʻo e māmaní.” (ʻEki. 9:15, 16) Ko e ngaahi puleʻangá kotoa ʻe faai atu pē ʻo nau ʻiloʻi ko Sihova ʻa e ʻOtua moʻoni pē tahá. (ʻIsi. 38:23) ʻE hoko fēfē eni?

18. (a) Ko e hā ʻa e toe luluʻi ʻoku fakamatalaʻi ʻi he Hākeai 2:6, 20-22? (e) ʻOku anga-fēfē ʻetau ʻiloʻi ko e ngaahi lea ʻa Hākeaí ʻe toe fakahoko ʻi he kahaʻú?

¹⁸ ʻI he laui senituli hili ʻa e ʻaho ʻo Hākeaí, naʻe fakamānavaʻi ʻa e ʻapositolo ko Paulá ke ne fakahaaʻi ko e ngaahi lea ʻi he Hākeai 2:6, 20-22 ʻe toe fakahoko ʻi he kahaʻú. (Lau.) Naʻe tohi ʻe Paula: “Ko eni kuó ne palōmesi: ʻKa te u toe fai hano luluʻi ʻo ʻikai ngata pē ʻi he māmaní kae toe pehē foki ki he langí.’ Pea ko e kupuʻi lea ʻka te u toe,’ ʻokú ne fakahaaʻi mai ʻa e toʻo atu ʻo e ngaahi meʻa kuo luluʻí, ʻa e ngaahi meʻa kuo faʻú, koeʻuhi ke kei tuʻu pē ʻa e ngaahi meʻa ia ʻoku ʻikai ke luluʻí.” (Hep. 12:26, 27) ʻI he ʻikai hangē ko e luluʻi naʻe lave ki ai ʻi he Hākeai 2:7, ko e luluʻi ko ení ʻoku ʻuhingá ko e fakaʻauha taʻengata ki he faʻahinga, hangē ko Feló, ʻoku nau fakafisi ke tali ʻa e totonu ʻa Sihova ke pulé.

19. Ko e hā heʻikai ke luluʻí, pea ʻoku anga-fēfē ʻetau ʻiloʻi iá?

¹⁹ Ko e hā heʻikai ke luluʻí pe toʻo atú? Naʻe hoko atu ʻa Paula: “ʻI he vakai atu ko ia te tau maʻu ha Puleʻanga ʻoku ʻikai lava ke luluʻí, tuku ke hokohoko atu ʻetau maʻu ʻa e ʻofa maʻataʻataá, ʻa ia ʻoku fakafou ai ʻetau malava ʻi he tuʻunga fakahōifua ke fai ki he ʻOtuá ʻa e ngāue toputapú fakataha mo e manavahē-ʻOtuá mo e ʻapasiá.” (Hep. 12:28) ʻIo, ʻi he hili ʻa e fuʻu luluʻi lahi fakaʻosi ko ení, ko e Puleʻanga pē ʻo e ʻOtuá heʻikai ke luluʻí. ʻE kei tuʻu maʻu pē ia!​—Saame 110:5, 6; Tan. 2:44.

20. Ko e hā ʻa e fili kuo pau ke fai ʻe he kakaí, pea ʻe lava fēfē ke tau tokoniʻi kinautolu?

²⁰ ʻOku ʻikai ha taimi ke fakamoleki noa! Kuo pau ke fai ʻe he kakaí ha fili: Te nau hokohoko atu ke pouaki ʻa e founga moʻui ʻoku poupouʻi ʻe he māmaní, ʻo taki atu ki he fakaʻauhá, pe te nau ngāue ke fehoanaki ʻenau moʻuí mo e finangalo ʻo e ʻOtuá, ʻo taki atu ki he moʻui taʻengatá? (Hep. 12:25) Fakafou ʻi heʻetau ngāue fakamalangá, ʻe lava ke tau tokoniʻi ʻa e kakaí ke nau fili pe ko fē tafaʻaki te nau kau ki ai ʻi he ʻīsiu mahuʻinga ko ení. ʻOfa ke tau tokoniʻi ʻa e faʻahinga mahuʻinga tokolahi ange ke nau tuʻu maʻá e Puleʻanga ʻo e ʻOtuá. Pea ʻofa ke tau manatuʻi ʻa e lea ʻa hotau ʻEiki ko Sīsuú: “Ko e ongoongo lelei ko ʻeni ʻo e Puleʻangá ʻe malangaʻi ia ʻi he kotoa ʻo e māmani kuo nofoʻí ko ha fakamoʻoni ki he ngaahi puleʻanga kotoa pē, pea ʻe toki hoko mai ʻa e ngataʻangá.”​—Māt. 24:14.