1-2. Ndi u dzinginyiswa hufhio ha tshifhingani tshashu he Hagai a hu amba?

HO VHUYA ha vha na mudzinginyo muhulu ngei Nepal nga 2015. Vhaṅwe vhe vha ponyoka vho amba zwi tevhelaho: “Mavhengele na zwifhaṱo zwa kale zwo mbo ḓi thoma u wa nga kufhinganyana.” “Muṅwe na muṅwe o vha o ḓaḓa . . . Vhathu vhanzhi vha ri wonoyo mudzinginyo wo dzhia mimunithi mivhili fhedzi, fhedzi kha nṋe wo dzhia ṅwaha woṱhe.” Zwithu zwi ofhisaho nga u ralo ni nga si zwi hangwe arali zwo itea kha inwi.

² Naho zwo ralo, ṋamusi hu na u dzinginyiswa hu sa fani na mudzinginyo une wa itea kha ḓorobo nthihi kana kha shango ḽithihi. Yehova u khou dzinginyisa tshaka dzoṱhe nahone zwenezwi zwo no vha na miṅwaha zwi tshi khou itea. Honoho u dzinginyisa ho ambiwa nga muporofita Hagai. O ṅwala a ri: “Ngauri Yehova wa mavhuthu u ri, ‘Hu si kale, ndi ḓo dzinginyisa ḽiṱaḓulu, lwanzhe na ho omaho, musi ndi tshi dovha nda dzinginyisa ḽifhasi.’”—Hag. 2:6.

3. U dzinginyisa he ha ṱaluswa nga Hagai ho fhambana hani na mudzinginyo wa vhukuma?

³ U dzinginyisa ho ṱaluswaho nga Hagai ho fhambana na mudzinginyo wa vhukuma une tshawo ha vha u tshinyadza fhedzi. Nṱhani hazwo, u dzinginyisa he Hagai a hu ṱalusa, hu na mvelelo dzavhuḓi. Yehova ene muṋe u ri: “Ndi ḓo dzinginyisa tshaka dzoṱhe, madzanga a tshaka dzoṱhe a ḓo ḓa kha yeneyi nnḓu; nṋe nda i ḓadza nga vhugala.” (Hag. 2:7) Uvhu vhuporofita ho vha vhu tshi amba mini kha vhe vha vha vha tshi khou tshila tshifhingani tsha Hagai? Nahone vhu amba mini kha riṋe ṋamusi? Ri ḓo fhindula dzenedzo mbudziso nahone ra guda uri riṋe  ri nga shela hani mulenzhe kha u dzinginyisa dzitshaka ṋamusi.

4. Ndi ngani Yehova o rumela muporofita Hagai kha vhathu vhawe?

⁴ Yehova o ṋea Hagai mushumo wa ndeme. Kha ri humbule zwe zwa itea musi a sa athu u mu ruma. Zwi vhonala uri Hagai o vha e muṅwe wa vhe vha vhuyelela Yerusalema nga 537 B.C.E. vha tshi bva vhuthubwani Babele. Musi vhenevho vhagwadameli vha Yehova vha fhulufhedzeaho vha tshi swika Yerusalema, vho mbo ḓi thoma u fhaṱa nnḓu ya Yehova kana thembele. (Esera 3:8, 10) Fhedzi musi zwi sa athu u ya thambo, ha itea zwithu zwi sa takadzi. Vha kulea nungo vha litsha u fhaṱa nge vha thivhelwa nga vhathu vha dzulaho henefho tsini. (Esera 4:4; Hag. 1:1, 2) Nga 520 B.C.E., Yehova a ruma Hagai u ṱuṱuwedza Vhayuda uri vha fhisetshele u fhedzisa u fhaṱa thembele. *—Esera 6:14, 15.

5. Ndi ngani mulaedza wa Hagai wo ṱuṱuwedza vhathu vha Mudzimu?

⁵ Tshipikwa tsha mulaedza wa Hagai tsho vha tshi u khwaṱhisa lutendo lwa Vhayuda. Hagai o amba nga tshivhindi na vhenevho Vhayuda vho kuleaho nungo a ri: “‘Na inwi vhathu vhoṱhe vha shango, ivhani na tshivhindi,’ u ralo Yehova, ‘shumani. Ngauri ndi na inwi,’ u ralo Yehova wa mavhuthu.” (Hag. 2:4) Maipfi a no ri “Yehova wa mavhuthu” a tea u vha o vha ṱuṱuwedza. Yehova u na mmbi khulu ya vharuṅwa ine a i shumisa. Ngauralo, Vhayuda vho vha vha tshi tea u mu fhulufhela arali vha tshi ṱoḓa u vha vha bvelelaho.

6. U dzinginyisa he ha ambiwa nga Hagai ho vha hu tshi ḓo bveledza mini?

⁶ Yehova o ruma Hagai u vhudza Vhayuda uri o vha a tshi ḓo dzinginyisa tshaka dzoṱhe. Wonoyu mulaedza wo ṱuṱuwedza Vhayuda vhe vha vha vho kulea nungo vha litsha u fhaṱa thembele. Wonoyo mulaedza wo vha u tshi amba uri Yehova o vha a tshi ḓo dzinginyisa ḽa Peresia, ḽe ḽa vha ḽi muvhuso wa ḽifhasi ḽoṱhe nga tshenetsho tshifhinga. U dzinginyiswa honoho ho vha hu tshi ḓo bveledza mini? Vhathu vha Mudzimu vho vha vha tshi ḓo fhedzisa u fhaṱa thembele. Nga murahu, tshaka dzi si Vhayuda na dzone dzo vha dzi tshi ḓo gwadamela Yehova navho kha yeneyo thembele yo vusuluswaho. Wonoyo mulaedza wo ṱuṱuwedza vhathu vha Mudzimu zwihulu!—Sak. 8:9.

7. Ndi ufhio mushumo wa u dzinginyisa une ra u ita ṋamusi? Ṱalutshedzani.

⁷ Vhuporofita ha Hagai vhu amba mini kha riṋe ṋamusi? Yehova u khou dovha a dzinginyisa tshaka dzoṱhe, fhedzi na riṋe ri khou shela mulenzhe kha wonoyu mushumo. Humbulani hezwi: Yehova o ita uri Yesu Kristo a vhe Khosi ya Muvhuso wawe wa ṱaḓulu nga 1914. (Ps. 2:6) Musi wonoyo Muvhuso u tshi thoma u vhusa, zwo vha zwi sa ḓo takadza vhavhusi vha ḽifhasi. Zwo vha zwi tshi amba uri “zwifhinga zwo vhewaho zwa dzitshaka” zwo fhela. Nga maṅwe maipfi, tshifhinga tsha musi hu si na khosi ine ya imela Yehova tsho vha tsho fhela. (Luka 21:24) Nga zwenezwo, zwihuluhulu u bva nga 1919, vhathu vha Yehova vho vha vha tshi khou vhudza vhathu vhoṱhe uri Muvhuso wa Mudzimu ndi wone fhedzi fhulufhelo ḽa vhathu. U huwelelwa ha “mafhungo maḓifha a Muvhuso” ho dzinginyisa ḽifhasi ḽoṱhe.—Mat. 24:14.

8. U ya nga Phisalema 2:1-3, tshaka nnzhi dzo ita mini musi dzi tshi pfa mulaedza wa Muvhuso?

⁸ Vhathu vho ita mini musi vha tshi pfa wonoyu mulaedza? Vhathu vhanzhi a vha u ṱanganedzi. (Vhalani Phisalema 2:1-3.)  Tshaka dzo sinyuwa. Dzi hana u ṱanganedza Muvhusi o vhewaho nga Yehova. Mulaedza wa Muvhuso a si “mafhungo maḓifha” khavho. Miṅwe mivhuso yo ita na u thivhela mushumo wa u huwelela! Naho vhunzhi ha vhavhusi vha dzenedzi tshaka vha tshi ri vha shumela Mudzimu, a vha ṱoḓi u vhuswa nga Muvhuso wa Mudzimu. Ngauralo, vhavhusi vha pikisa Muḓodzwa wa Yehova ṋamusi nga u tshoṱela vhatevheli vhawe vha fhulufhedzeaho sa zwe vhavhusi vha misini ya Yesu vha zwi ita.—Mish. 4:25-28.

9. Yehova u ita mini musi tshaka dzi sa ṱanganedzi mulaedza wa Muvhuso?

⁹ Yehova u ita mini musi tshaka dzi sa ṱanganedzi mulaedza wa Muvhuso? Phisalema 2:10-12 i a fhindula. I ri: “Zwino inwi mahosi sumbedzani ṱhalukanyo; tendani u khakhululwa, inwi vhahaṱuli vha ḽifhasi. Shumelani Yehova ni mu ofhe, ni takale ni tshi tetemela nga nyofho. Hulisani murwa uri Mudzimu a si sinyuwe uri ni si fe nḓilani, ngauri vhuhali Hawe vhu ṱavhanya u duga. Hu takala vhoṱhe vhane vha khuda Ngae.” Yehova nga vhuthu hawe u khou ṋea vhenevha vhapikisi tshifhinga tsha uri vha ite phetho yo teaho. Vha nga shanduka vha ṱanganedza Muvhuso wa Yehova. Fhedzi tshifhinga tshi khou fhela. Ri khou tshila “maḓuvhani a vhufhelo” ha ano maitele a zwithu. (2 Tim. 3:1; Yes. 61:2) Zwo ṱavhanyiswa u fhira naho hu lini uri vhathu vha ḓivhe ngoho nahone vha nange u shumela Yehova.

10. Ndi zwifhio zwithu zwavhuḓi zwine zwa itea nga u dzinginyisa ho ṱaluswaho kha Hagai 2:7-9?

¹⁰ U dzinginyisa he ha ambiwa nga Hagai ho vha na mvelelo dzavhuḓi kha vhaṅwe vhathu. U ri vhudza uri honoho u dzinginyisa hu ḓo ita uri ‘madzanga [kana vhathu vha mbilu dzavhuḓi] a tshaka dzoṱhe a ḓe’ u gwadamela Yehova. * (Vhalani Hagai 2:7-9.) Yesaya na Mika na vhone vho amba uri zwenezwi zwo vha zwi tshi ḓo itea “maḓuvhani a vhufhelo.”—Yes. 2:2-4; Mika 4:1, 2.

11. Muṅwe wahashu o ita mini musi a tshi pfa mulaedza wa Muvhuso?

 ¹¹ Kha ri humbule nga ha zwe muṅwe wahashu ane a pfi Ken ane zwino a shuma ofisini dzashu khulwane dza ḽifhasi ḽoṱhe a zwi ita musi a tshi pfa wonoyo mulaedza u takadzaho. U kha ḓi zwi humbula zwavhuḓi musi a tshi thoma u pfa mulaedza wa Muvhuso miṅwahani i ṱoḓaho u vha 40 yo fhiraho. U ri: “Musi ndi tshi thoma u pfa ngoho Ipfini ḽa Mudzimu, ndo takala musi ndi tshi pfa uri ri khou tshila maḓuvhani a vhufhelo ha ano maitele a zwithu. Nda zwi pfesesa uri zwine nda tea u ita uri ndi takalelwe nga Mudzimu na uri ndi wane vhutshilo vhu sa fheli ndi uri ndi si vhe tshipiḓa tsha shango ḽino ḽi sa fhulufhedzei nahone ndi ime siani ḽa Yehova. Nda rabela Yehova nahone nda ita zwenezwo nga u ṱavhanya. Nda litsha u tikedza shango ḽino nahone nda ṱavhanya nda shavhela Muvhusoni wa Mudzimu u tsireledzaho na u sa dzinginyei.”

12. Thembele ya Yehova i sa vhonali yo ḓadzwa hani nga vhugala kha ano maḓuvha a vhufhelo?

¹² Zwi tou pfala uri Yehova u khou fhaṱutshedza vhathu vhawe. Vhathu vhanzhi vha vho gwadamela Yehova kha ano maḓuvha a vhufhelo. Nga 1914 ro vha ri si vhanzhi. Zwa zwino ri vho fhira miḽioni dza malo nahone ṅwaha muṅwe na muṅwe hu vha na vha dzimiḽioni vhane vha ḓa vha vha na riṋe Tshihumbudzoni. Nga zwenezwo, muṱa wa kha ḽifhasi wa thembele ya Yehova i sa vhonali, ine ya imela ndugiselo ya vhurabeli ho kunaho, wo ḓala “madzanga a tshaka dzoṱhe.” Tshanduko dzine vhenevha vhathu vha dzi ita musi vha tshi ambara vhumuthu vhuswa dzi rendisa dzina ḽa Yehova.—Vhaef. 4:22-24.

13. Ndi vhufhio vhuṅwe vhuporofita he ha itea nga nṱhani ha u engedzea ha vhagwadameli vha Yehova? (Sedzani tshifanyiso tshi re kha gwati.)

¹³ Zwenezwi zwiitea zwi takadzaho zwo ita uri vhuṅwe vhuporofita vhu itee vhu ngaho vhu re kha Yesaya ndima ya 60. Ndimana ya 22 ya yeneyo ndima i ri: “Kha a nyadzeaho hu ḓo bva vha tshigidi na kha a re muṱuku hu ḓo bva lushaka lwa maanḓa. Nṋe Yehova ndi ḓo zwi ṱavhanyisa nga tshifhinga tshazwo.” Hu khou itea zwithu zwi mangadzaho ngauri vhathu vha khou dzhena kha vhurabeli ha ngoho nga vhunzhi. Haya “madzanga,”  kana vhenevha vhathu, vha ḓa na vhutsila na vhukoni vhu sa fani khathihi na lutamo lwa u huwelela “mafhungo maḓifha a Muvhuso.” Nga zwenezwo, vhathu vha Mudzimu vha shumisa honoho vhutsila he Yesaya a ri ndi “mafhi a dzitshaka.” (Yes. 60:5, 16) Nga thuso ya vhenevha vhanna na vhafumakadzi vha ndeme, mushumo wa u huwelela u khou itwa mashangoni a 240 nahone khandiso dzashu dzi bveledzwa nga nyambo dzi fhiraho 1 000.

14. Vhathu vha tea u ita phetho ifhio zwino?

¹⁴ U dzinginyiswa ha dzitshaka hu khou kombetshedza vhathu u ita phetho kha ano maḓuvha a vhufhelo. Naa vha ḓo tikedza Muvhuso wa Mudzimu kana vha ḓo fhulufhela mivhuso ya shango ḽino? Ndi phetho ya ndeme ine vhathu vhoṱhe vha tea u i ita. Naho vhathu vha Yehova vha tshi tevhedza milayo ya muvhuso wa shango ḽine vha dzula khaḽo, a vha dzhii sia na zwiṱukuṱuku kha politiki ya shango. (Vharoma 13:1-7) Vha a zwi ḓivha uri Muvhuso wa Mudzimu ndi wone une wa nga fhelisa thaidzo dza vhathu. Wonoyo Muvhuso a si tshipiḓa tsha shango.—Yoh. 18:36, 37.

15. Bugu ya Nzumbululo i zwi sumbedza hani uri vhathu vha Mudzimu vha ḓo lingwa u fhulufhedzea havho?

¹⁵ Bugu ya Nzumbululo i ri vhudza uri vhathu vha Mudzimu vha ḓo lingwa u fhulufhedzea havho maḓuvhani a vhufhelo. Honoho u lingwa hu ḓo bvela phanḓa hu tshi ita uri ri pikiswe na u tovholwa lu vhavhaho. Mivhuso ya shango ḽino i ḓo ṱoḓa uri ri i gwadamele nahone i ḓo tovhola vhane vha hana u i tikedza. (Nzumb. 13:12, 15) I ḓo “kombetshedza vhathu vhoṱhe, vhaṱuku na vhahulwane, vhapfumi na vhashai, vhalanda na vha si vhalanda, uri vha swaiwe kha tshanḓa tsha u ḽa kana kha phanḓa dzavho.” (Nzumb. 13:16) Phuli dza kale dzo vha dzi tshi vhewa luswayo lu sa thuthei lu sumbedzaho uri muṋe wavho ndi nnyi. Nga nḓila i fanaho na yeneyo, vhathu vha ṋamusi vha ḓo lavhelela uri muṅwe na muṅwe a vhe na luswayo lwa pfanyisedzo kha tshanḓa kana kha phanḓa. Vha ḓo ṱoḓa uri muṅwe na muṅwe a zwi sumbedze nga mihumbulo na nga mishumo uri u tikedza mivhuso ya politiki.

16. Ndi ngani zwo ṱavhanyiswa zwino uri ri khwaṱhise u fhulufhedzea hashu kha Yehova?

¹⁶ Naa ri ḓo ṱanganedza lwonolwo luswayo lwa pfanyisedzo ra tikedza mivhuso ya politiki? Vhane vha hana u swaiwa vha ḓo fara tsha u konḓa nahone vha ḓo vha khomboni. Bugu ya Nzumbululo i ri: “Uri hu si vhe na ane a renga kana u rengisa arali e si na luswayo.” (Nzumb. 13:17) Fhedzi vhathu vha Mudzimu vha a ḓivha zwine Mudzimu a ḓo ita vha re na luswayo lwo bulwaho kha Nzumbululo 14:9, 10. Nṱhani ha uri vha tende u vhewa lwonolwo luswayo, vha ḓo nga vho ḓiṅwala kha tshanḓa uri: “Ndi wa Yehova.” (Yes. 44:5) Zwino ndi tshifhinga tsha uri ri khwaṱhise u fhulufhedzea hashu kha Yehova. Arali ho khwaṱha, Yehova u ḓo amba o takala uri ri vhathu vhawe!

17. Ndi zwifhio zwine ra tea u zwi humbula malugana na u sa fhela mbilu ha Yehova?

¹⁷ Yehova o sumbedza u sa fhela mbilu vhukuma kha ano maḓuvha a vhufhelo. Ha ṱoḓi na muthihi a tshi fheliswa. (2 Pet. 3:9) O ṋea vhathu vhoṱhe tshifhinga tsha u rembuluwa na u nanga u mu shumela. Fhedzi u sa fhela hawe mbilu hu ḓo guma. Vhane vha hana u tikedza Muvhuso wa Mudzimu vha ḓo ṱangana na zwe Farao a ṱangana nazwo misini ya Mushe. Yehova o amba na Farao a ri: “Ndo vha ndi tshi ḓo vha ndo no imisa tshanḓa tshanga nda u rwa na vhathu vhau nga dwadze, wo vha u tshi ḓo vha wo fheliswa kha ḽifhasi. Fhedzi ndo u litsha uri u tshile, uri ndi u sumbedze maanḓa anga na uri dzina ḽanga ḽi ḓivhadzwe ḽifhasini ḽoṱhe.”  (Ek. 9:15, 16) Mafheleloni tshaka dzoṱhe dzi ḓo ḓivha uri Yehova ndi ene Mudzimu e eṱhe wa ngoho. (Hesek. 38:23) Zwenezwi zwi ḓo itea hani?

18. (a) Ndi hufhio huṅwe u dzinginyisa ho ṱaluswaho kha Hagai 2:6, 20-22? (b) Ri zwi ḓivha hani uri maipfi a Hagai a kha ḓi ḓo itea tshifhingani tshi ḓaho?

¹⁸ Musi ho no fhela miṅwaha minzhi Hagai o no fa, muapostola Paulo o ṅwalela Vhakriste vha Vhahevheru uri maipfi a re kha Hagai 2:6, 20-22 o vha a tshi kha ḓi ḓo itea. (Vhalani.) Paulo o ṅwala a ri: “Zwino o fhulufhedzisa a ri: ‘Musi ndi tshi dovha nda dzinginyisa ḽifhasi, ndi ḓo dzinginyisa na ḽiṱaḓulu.’ Maipfi ane a ri ‘ndi tshi dovha,’ a sumbedza uri Mudzimu u ḓo bvisa zwithu zwo dzinginyiswaho, zwenezwi ndi zwe Mudzimu a si zwi sike, uri hu sale zwi songo dzinginyiswaho.” (Vhahev. 12:26, 27) Honohu u dzinginyisa a hu fani na ho ambiwaho kha Hagai 2:7 ngauri hu ḓo amba u fheliswa tshoṱhe ha vhane vha hana u ṱanganedza ndugelo ya Yehova ya u vhusa u fana na Farao.

19. Ndi zwifhio zwine zwa sa ḓo dzinginyiswa nahone ri zwi ḓivha hani?

¹⁹ Ndi zwifhio zwine zwa sa ḓo dzinginyiswa kana u fheliswa? Paulo o bvela phanḓa a ri: “Samusi ri tshi ḓo wana Muvhuso une wa sa ḓo dzinginyiswa, kha ri dzule ri tshi vhuyelwa nga vhuthu vhuhulu, vhune ha ḓo ita uri ri ofhe Mudzimu na u mu hulisa musi ri tshi mu itela mushumo mukhethwa.” (Vhahev. 12:28) Musi ḓumbu ḽa u dzinginyisa huhulu ha u fhedza ḽo no dzika, hu ḓo sala Muvhuso wa Mudzimu fhedzi. U ḓo sala wo ṱoka midzi!—Ps. 110:5, 6; Dan. 2:44.

20. Ndi ifhio phetho ine vhathu vha tea u i ita nahone ri nga vha thusa hani?

²⁰ A hu tsheena tshifhinga! Vhathu vha fanela u khetha. Arali vha khetha u bvela phanḓa vha tshi tikedza shango ḽino, vha ḓo fheliswa. Arali vha khetha u shumela Yehova nahone vha ita tshanduko dzi ṱoḓeaho vhutshiloni havho uri vha ite zwine a zwi funa, vha ḓo wana vhutshilo vhu sa fheli. (Vhahev. 12:25) Ri nga thusa vhathu nga mushumo washu wa u huwelela uri vha ite yeneyi phetho ya ndeme. U nga ri ri nga thusa vhaṅwe vhanzhi vha mbilu dzavhuḓi uri vha khethe u tikedza Muvhuso wa Mudzimu. U nga ri ri nga dzula ri tshi humbula maipfi a Murena washu Yesu ane a ri: “Huno aya mafhungo maḓifha a Muvhuso a ḓo ḓivhadzwa ḽifhasini ḽoṱhe uri a pfiwe nga tshaka dzoṱhe, nga murahu ndi hone vhufhelo vhu tshi ḓo ḓa.”—Mat. 24:14.