1-2. Ano nga simboliko nga pagbay-og an igintagna nga mahitatabo ha aton panahon?

“HA SULOD hin pipira ka minuto, nagtikang magkarurumpag an mga tindahan ngan an daan nga mga bilding.” “Nagpapanik an mga tawo . . . Damu an nagsiring nga an linog inabot hin mga duha ka minuto. Pero para ha akon, baga hin nag-iha gud adto.” Ito an mga komento han pipira nga nakatalwas ha usa nga linog ha Nepal han 2015. Kon nakaeksperyensya ka hin sugad hiton makaharadlok nga panhitabo, diri mo gud ito dayon hingangalimtan.

² Pero yana, nakakaeksperyensya kita mismo hin naiiba nga klase hin pagbay-og, usa nga pagbay-og nga nahitatabo diri la ha usa nga syudad o nasud. Lugod, nahitatabo ito ha ngatanan nga nasud ngan ha sulod hin mga dekada na. Ini nga pagbay-og igintagna ni propeta Hagai. Hiya nagsurat: “Ini an siring ni Jehova han mga hugpo, ‘Makausa pa​—diri na mag-iiha​—ngan babay-ugon ko an langit ngan an tuna ngan an dagat ngan an mamara nga tuna.’”​—Hag. 2:6.

3. Paonan-o naiiba ha literal nga linog inin simboliko nga pagbay-og?

³ An pagbay-og nga ginsiring ni Hagai diri pariho hin literal nga linog, nga nagriresulta la hin kabungkagan. Lugod, may-ada ito mag-opay nga resulta. Hi Jehova mismo nagsiring ha aton: “Babay-ugon ko an ngatanan nga nasud, ngan an presyoso nga mga butang han ngatanan nga nasud masulod; ngan pupun-on ko hin himaya ini nga balay.” (Hag. 2:7) Ano an iginpapasabot hini nga tagna para hadton nabuhi ha panahon ni Hagai? Ngan ano an iginpapasabot hini para ha aton yana? Hihisgotan naton an baton hito nga mga pakiana ngan mahibabaroan naton kon paonan-o kita makikigbahin ha pagbay-og ha mga nasud yana.

4. Kay ano nga ginsugo ni Jehova hi propeta Hagai ngadto ha Iya katawohan?

⁴ Hi propeta Hagai nakakarawat hin importante nga sugo tikang kan Jehova. Tagda an nahitabo antes hito. Posible nga hi Hagai usa hadton binalik ha Jerusalem han 537 B.C.E. tikang ha pagkadistyero ha Babilonya. Waray pag-iha tikang han inabot hira ha Jerusalem, inin matinumanon nga mga magsiringba naghimo han pundasyon han balay, o templo, ni Jehova. (Ezra 3:8, 10) Pero waray pag-iha, may makasurubo nga nahitabo. Nanluya hira ngan inundang pagtrabaho hito nga proyekto tungod han pagkontra. (Ezra 4:4; Hag. 1:1, 2) Salit han 520 B.C.E., ginsugo ni Jehova hi Hagai nga dasigon hira ngan aghaton nga tapuson an templo. *​—Ezra 6:14, 15.

5. Kay ano nga an mensahe ni Hagai sigurado nga nagparig-on gud ha katawohan han Dios?

⁵ Katuyoan han mensahe ni Hagai nga parig-unon an pagtoo han mga Judio kan Jehova. Maisugon nga iginsumat han propeta ini nga mga pulong ha nanluluya nga mga Judio: “‘Magin marig-on, kamo ngatanan nga katawohan han tuna,’ nasiring hi Jehova, ‘ngan pagtrabaho. Kay kaupod ako niyo,’ nasiring hi Jehova han mga hugpo.” (Hag. 2:4) Sigurado nga naparig-on hira han mga pulong nga “hi Jehova han mga hugpo.” Hi Jehova may-ada damu gud nga girriro nga mga anghel, salit an mga Judio kinahanglan sumarig ha iya basi maglampos.

6. Ano an magigin resulta han pagbay-og nga igintagna ni Hagai?

⁶ Ginsugo ni Jehova hi Hagai nga sidngan an mga Judio nga simboliko nga babay-ugon niya an ngatanan nga nasud. Ito nga mensahe nagpasarig ha nanluluya nga mga Judio nga nagtutukod han templo nga babay-ugon ni Jehova an Persia, nga hito nga panahon amo an gahum han kalibotan. Ngan ano an magigin resulta hito nga pagbay-og? Siyahan, matatapos han katawohan han Dios an pagtukod han templo. Katapos, bisan adton diri mga Judio maupod ha ira ha pagsingba kan Jehova dida hiton natukod utro nga templo. Makaparig-on gud ito nga mensahe para ha katawohan han Dios!​—Zac. 8:9.

7. Ano nga pagbay-og nga buruhaton an kaapi kita yana? Isaysay.

⁷ Ano an iginpapasabot han tagna ni Hagai para ha aton panahon? Makausa pa, ginbabay-og ni Jehova an ngatanan nga nasud, ngan hini nga panahon kaapi kita hito nga buruhaton. Tagda ini nga kamatuoran: Han 1914, ginpalingkod ni Jehova hi Jesu-Kristo sugad nga Hadi han Iya langitnon nga Ginhadian. (Sal. 2:6) An kaestablisar hito nga Ginhadian maraot nga sumat para ha mga lider han kalibotan. Karuyag sidngon hito nga “an itinanda nga mga panahon han mga nasud”​—an peryodo diin waray na magmarando nga direkta nga nagrirepresentar kan Jehova​—natapos na. (Luc. 21:24) Tungod hito, labi na han 1919, iginpapasamwak han katawohan ni Jehova nga an Ginhadian han Dios amo la an paglaom han katawohan. Inin pagsangyaw han “maopay nga sumat han Ginhadian” nagbabay-og han bug-os nga kalibotan.​—Mat. 24:14.

8. Sumala ha Salmo 2:1-3, ano an reaksyon han kadam-an nga nasud hito nga mensahe?

⁸ Ano an reaksyon han mga tawo hito nga mensahe? Kadam-an an nadiri hito. (Basaha an Salmo 2:1-3.) Nasisina gud an mga nasud. Diri nira ginkakarawat an Magmarando nga ginpili ni Jehova. Para ha ira, an mensahe han Ginhadian nga aton iginsasangyaw diri “maopay nga sumat.” Ngani, igindidiri han pipira nga gobyerno an pagsangyaw nga buruhaton! Bisan kon damu han magmarando hini nga mga nasud an nasiring nga nag-aalagad hira ha Dios, diri nira karuyag bayaan an ira gahum ngan awtoridad. Salit sugad la han ginbuhat han mga magmarando ha panahon  ni Jesus, an mga magmarando yana nakontra ha Usa nga Dinihogan ni Jehova pinaagi ha pag-atake ha iya maunungon nga mga sumurunod.​—Buh. 4:25-28.

9. Ano nga oportunidad an iginhahatag ni Jehova ha mga nasud nga diri nakarawat han mensahe?

⁹ Ano nga oportunidad an iginhahatag ni Jehova ha mga nasud nga diri nakarawat han mensahe? Ginbabaton ito han Salmo 2:10-12: “Salit yana, kamo nga mga hadi, pagpakita hin hilarom nga pagsabot; karawata an pagsaway, kamo nga mga hukom ha tuna. Pag-alagad kan Jehova nga may kahadlok, ngan pagrayhak nga may daku nga pagtahod. Pasidunggi an anak, kay kon diri, masisina an Dios ngan mamamatay kamo dida ha dalan, kay an Iya kasina madagmit maglarab. Malipayon an ngatanan nga naayop ha Iya.” May pagkabuotan nga gintatagan ni Jehova hin higayon ini nga mga nakontra. Mahimo pa hira magbag-o ngan karawaton an Ginhadian ni Jehova. Pero gutiay na la an nabibilin nga panahon. Nagkikinabuhi na kita ha “kataposan nga mga adlaw” hini nga sistema. (2 Tim. 3:1; Isa. 61:2) Mas kinahanglan na gud yana nga mahibaroan han mga tawo an kamatuoran ngan magdesisyon nga mag-alagad kan Jehova.

10. Ano an positibo nga epekto han pagbay-og nga buruhaton nga iginsasaysay han Hagai 2:7-9?

¹⁰ An simboliko nga pagbay-og nga igintagna ni Hagai may positibo nga epekto ha pipira nga tawo. Ginsidngan kita niya nga tungod han pagbay-og, “an presyoso nga mga butang [an mga tawo nga tangkod an kasingkasing] han ngatanan nga nasud masulod” basi magsingba kan Jehova. * (Basaha an Hagai 2:7-9.) Igintagna liwat nira Isaias ngan Micas nga mahitatabo ini “ha kataposan nga mga adlaw.”​—Isa. 2:2-4, ftn.; Mic. 4:1, 2, ftn.

11. Ano an ginbuhat han usa nga brother han siyahan nga nabatian niya an mensahe han Ginhadian?

¹¹ Tagda an epekto han nagbabay-og nga mensahe ha brother nga hi Ken, nga nag-aalagad ha world headquarters. Matin-aw la gihapon ha iya hunahuna han siyahan nga nabatian niya an mensahe han Ginhadian mga 40 ka tuig na an naglabay. Hi Ken nagsiring: “Han siyahan ko nga  nabatian an kamatuoran tikang ha Pulong han Dios, mapasalamaton ako nga nahibaroan ko nga nabubuhi na kita ha kataposan nga mga adlaw hini nga sistema. Nasabtan ko nga basi uyonan ako han Dios ngan mabuhi ha waray kataposan, kinahanglan bayaan ko inin diri masasarigan nga kalibotan ngan marig-on nga dumapig kan Jehova. Nag-ampo ako ngan ginbuhat ko dayon ito. Ginbayaan ko an kalibotan ngan ginkarawat ko dayon an proteksyon han Ginhadian han Dios, nga diri mawawara.”

12. Paonan-o an espirituwal nga templo ni Jehova napuno hin himaya hinin kataposan nga mga adlaw?

¹² Klaro nga ginbibendisyonan ni Jehova an iya katawohan. Hinin kataposan nga mga adlaw, nakikita naton nga nagtitikadamu gud an mga magsiringba niya. Han 1914, pipira la kita ka yukot. Yana, sobra na walo ka milyon an aktibo nga nagsisingba ha Dios, ngan kada tuig, minilyon pa an naupod ha aton ha pagsaurog han Memoryal. Hini nga paagi, an tunan-on nga bungsaran han espirituwal nga templo ni Jehova​—an iya kahikayan para ha putli nga pagsingba​—napuno han “presyoso nga mga butang han ngatanan nga nasud.” Nahihimaya liwat an ngaran ni Jehova tungod han ginhihimo nga mga pagbag-o hini nga mga indibiduwal samtang iginsusul-ot nira an bag-o nga personalidad.​—Efe. 4:22-24.

13. Ano an iba pa nga natutuman nga mga tagna tungod han pagtikadamu han mga magsiringba ni Jehova? (Kitaa an retrato ha kobre.)

¹³ Tungod han pagtikadamu han magsiringba ni Jehova, may natutuman pa nga iba nga tagna, sugad han tagna nga mababasa ha Isaias kapitulo 60. Ha bersikulo 22 hito nga kapitulo nasiring: “An pipira la magigin usa ka yukot ngan an gutiay magigin usa nga makusog nga nasud. Ako mismo, hi Jehova, an magpapadagmit hito ha kalugaringon nga panahon hito.” Tungod han pagtikadamu han tinuod nga mga magsiringba, may maopay nga nahitatabo. Inin “presyoso nga mga butang” may iba-iba nga skill ngan abilidad, ngan may hingyap liwat hira nga makigbahin ha pagsangyaw han “maopay nga sumat han Ginhadian.” Tungod hito, an “gatas han mga nasud,” sugad han ginsiring ni Isaias, napapahimulosan han katawohan ni Jehova. (Isa. 60:5, 16) Pinaagi han bulig hinin presyoso nga kalalakin-an ngan kababayin-an, an pagsangyaw nga buruhaton ginhihimo na ha 240 nga nasud ngan an aton mga literatura iginpupublikar na ha sobra 1,000 nga linggwahe.

14. Ano nga desisyon an kinahanglan himoon yana han mga tawo?

¹⁴ Hinin panahon han kataposan, napipiritan an mga tawo nga maghimo hin desisyon tungod han pagbay-og ha mga nasud. Masuporta ba hira ha Ginhadian han Dios, o masarig hira ha mga gobyerno hini nga kalibotan? Kinahanglan magdesisyon hini an ngatanan. Bisan kon an katawohan ni Jehova nasugot ha mga balaud han gobyerno ha nasud nga ira gin-uukyan, nagpapabilin hira nga neutral gud ha politika hini nga kalibotan. (Roma 13:1-7) Maaram hira nga an Ginhadian gud la an tinuod nga solusyon han mga problema han mga tawo. Ito nga Ginhadian diri bahin hini nga kalibotan.​—Juan 18:36, 37.

15. Paonan-o iginpapakita han libro han Pahayag nga matitestingan an pagkamaunungon han katawohan han Dios?

¹⁵ Ginsasaysay han libro han Pahayag an usa nga pagsari ha pagkamaunungon han katawohan han Dios ha kataposan nga mga adlaw. Ito nga pagsari padayon nga maghahatag ha aton hin duro nga presyur. Oobligaron kita han politikal nga mga sistema hini nga kalibotan nga singbahon hira, ngan ira pagtitimarauton adton nadiri pagsuporta ha ira. (Pah. 13:12, 15) ‘Pipiriton [nira] an ngatanan nga tawo​—an mga ubos ngan an mga prominente, an mga riko ngan an mga pobre, an mga may kagawasan ngan an mga uripon​—nga sadang hira markahan ha ira too nga kamot o ha ira agtang.’ (Pah. 13:16) Ha kadaan nga panahon, an mga uripon ginmamarkahan basi ipakita kon hin-o an nagtatag-iya ha ira. Ha pariho nga paagi, an mga tawo yana ginlalaoman nga magkaada hin simboliko nga marka ha ira kamot o agtang. An ira panhunahuna ngan mga buhat magpapakita nga panag-iya hira han politikal nga mga sistema ngan nasuporta hira hito.

16. Kay ano nga kinahanglan parig-unon naton yana an aton pagkamaunungon kan Jehova?

¹⁶ Kakarawaton ba naton iton simboliko nga marka ngan susuportaran an politikal nga mga gobyerno? Adton nadiri pagkarawat hito nga marka makakaeksperyensya hin mga kakurian ngan peligro. An libro han Pahayag padayon nga nasiring: “Waray bisan hin-o nga makakapalit o makakagbaligya labot la ha tawo nga may-ada han marka.” (Pah. 13:17) Pero maaram an katawohan han Dios kon ano an bubuhaton han Dios hadton may-ada han marka nga gin-uunabi ha Pahayag 14:9, 10. Salit imbes nga karawaton ito nga marka, sugad hin magsusurat lugod hira ha ira kamot hin “Kan Jehova.” (Isa. 44:5) Yana na an panahon nga siguruhon naton nga marig-on an aton pagkamaunungon kan Jehova. Kay kon maunungon kita, malilipay hi Jehova ha pagsiring nga panag-iya kita niya!

17. Ano an kinahanglan naton hinumdoman may kalabotan ha pagpailob ni Jehova?

¹⁷ Hi Jehova nagpapakita hin daku nga pagpailob hinin kataposan nga mga adlaw. Diri niya karuyag nga an bisan hin-o mabungkag. (2 Ped. 3:9) Gintatagan niya an ngatanan hin higayon nga magbasol ngan magdesisyon nga mag-alagad ha iya. Pero may tubtoban an iya pagpailob. Adton diri nakarawat hito nga oportunidad makakaeksperyensya han pariho han naeksperyensyahan han Paraon ha panahon ni Moises. Hi Jehova nagsiring ha Paraon: “Yana igin-unat ko na unta an akon kamot basi sirotan ka ngan an imo katawohan hin makamaratay nga peste, ngan napara ka na unta ha tuna. Pero gintugotan ko ikaw nga padayon nga mabuhi tungod hini mismo nga hinungdan: basi ipakita ha imo an akon gahum ngan basi maipasamwak an akon ngaran ha bug-os nga tuna.” (Ex. 9:15, 16) Ha urhi, makikilala han ngatanan nga nasud nga hi Jehova gud la an tinuod nga Dios. (Ezek. 38:23) Paonan-o ito mahitatabo?

18. (a) Ano nga klase hin pagbay-og an iginhuhulagway ha Hagai 2:6, 20-22? (b) Paonan-o kita nahibaro nga an ginsiring ni Hagai magkakaada katumanan ha tiarabot?

¹⁸ Mga siglo an naglabay tikang ha panahon ni  Hagai, gin-giyahan hi apostol Pablo basi ipakita nga an mga pulong ha Hagai 2:6, 20-22 magkakaada katumanan ha tiarabot. (Basaha.) Hi Pablo nagsurat: “Yana nagsasaad hiya: ‘Makausa pa, babay-ugon ko diri la an tuna kondi pati an langit.’ Yana an mga pulong nga ‘makausa pa’ nagpapasabot han pagkuha han mga butang nga ginbabay-og, mga butang nga ginhimo, basi magpabilin an mga butang nga diri ginbabay-og.” (Heb. 12:26, 27) Diri pariho han pagbay-og nga gin-unabi ha Hagai 2:7, ini nga pagbay-og mangangahulogan hin kabungkagan ha kadayonan para hadton, pariho han Paraon, diri nakarawat nga hi Jehova gud la an may katungod ha pagmando.

19. Ano an diri mababay-og, ngan paonan-o kita nahibaro hito?

¹⁹ Ano an diri mababay-og, o mawawara? Hi Pablo nagpadayon: “Tungod kay makarawat kita hin Ginhadian nga diri mababay-og, padayon nga karawaton naton an diri matupngan nga pagkabuotan, nga pinaagi hito makakabuhat kita hin kinakarawat han Dios nga sagrado nga pag-alagad nga may kahadlok ngan pagtahod ha iya.” (Heb. 12:28) Oo, kon matapos na inin ultimo nga pagbay-og, an Ginhadian han Dios la an magpapabilin nga diri nababay-og. Marig-on la gihapon ito nga matindog!​—Sal. 110:5, 6; Dan. 2:44.

20. Ano nga desisyon an kinahanglan himoon han mga tawo, ngan paonan-o naton hira mabubuligan?

²⁰ Waray na angay karagan nga panahon! An mga tawo kinahanglan magpili: Padayon ba hira nga masuporta ha paagi han pagkinabuhi nga igin-aaghat hini nga kalibotan, nga magriresulta hin kabungkagan, o maniningkamot hira nga maipahiuyon an ira pagkinabuhi ha kaburut-on han Dios, nga magriresulta hin kinabuhi nga waray kataposan? (Heb. 12:25) Pinaagi han aton pagsangyaw nga buruhaton, mabubuligan naton an mga tawo nga magdesisyon kon hain hini an ira pipilion. Hinaot mas damu pa nga presyoso nga mga tawo an aton mabuligan nga dumapig ha Ginhadian han Dios. Ngan hinaot padayon naton nga hinumdoman ini nga ginsiring han aton Ginoo nga hi Jesus: “Inin maopay nga sumat han Ginhadian isasangyaw ha bug-os nga inuukyan nga tuna sugad nga pamatuod ha ngatanan nga nasud, ngan katapos hito maabot an kataposan.”​—Mat. 24:14.