1, 2. მუ სიმბოლურ დოზარზალაფა რდჷ ნაწინასწარმეტყველებ ჩქინ დროშე?

 „მუსხირენ წუთშა მაღაზიეფ დო ჯვეშ შენობეფქ აკოცუმა ქიდიჭყჷ“; „ირკოჩ პანიკას რდჷ . . . ბრელ იჩიებ, ნამდა თექ მუსხირენ წუთის გეგრძელ, მარა ჩქიმო თე წუთეფქ დღას ვეთუ“ — თენა 2015 წანას ნეპალს მოხვალამირ მიწისძვრას გინოსქილადირეფიშ სიტყვეფ რე. თეცალ მუდგარენ თქვა ხოლო გეგმოიცადებუნან-და, ალბათ დღას ვაგგოჭყორდნა.

² ასე განსხვავებულ დოზარზალაფას ბგინაფლენთ; ხვალე ართ ქალაქის ვარდა ქიანას ვარინ, იეჰოვა არძა ხალხის უზარზალუანს დო თენა წანეფ რე, მუთ ხვადუ. თე დოზარზალაფაშ გურშენ ანგიაქ იწინასწარმეტყველ: «თეს იჩიებ ლაშქარეფიშ ღორონთ იეჰოვა: „ჭიჭე დო ხოლო ართშა ქუდუზარზალუანქ ცა დო დედამიწას, ზღვა დო დიხას“» (ანგ. 2:6).

3. მუთ გენესხვავებ სიმბოლურ დოზარზალაფა მიწისძვრაშე?

³ დოზარზალაფა, ნამდგას ანგია მიშინუანს, პირდაპირ გაგებათ მიწისძვრაცალ ვა რე. თის ხვალე განადგურება ვარინ, ჯგირ შედეგეფ ხოლო მოჸუნს. იეჰოვა მირაგადნა: „ქუდუზარზალუანქ ხალხეფს დო ქუმურს ხალხეფიშ საუნჯე თე ტაძარშა; დიდებათ გევოფშანქ თის“ (ანგ. 2:7). მუს ნიშნენდჷ თე წინასწარმეტყველება ანგიაშ დროს მახორუ ხალხშო დო მუს ნიშნენს თინა ამდღა ჩქინო? თე სტატიას გუვარჩიენთ თე კითხვეფიშ პასუხეფს დო ქიგებგენთ, მუჭო ბღებულენთ მონაწილებას ხალხეფიშ დოზარზალაფას.

4. მუშენ გოუტუ იეჰოვაქ წინასწარმეტყველ ანგია მუშ ხალხშა?

⁴ წინასწარმეტყველ ანგიაქ იეჰოვაშე მნიშვნელოვან დავალება მიღჷ. გუვარჩუათ, მუ მოვლენეფ ეწოჸუნდჷ თეს. ანგია საეგებიოთ ბაბილონშა გინოხორაფილ თი იუდეველეფ შქას რდჷ, მიდგაქ ჯვ. წ. 537 წანას იერუსალიმშა დირთჷ. იეჰოვაშ თე ართგურ თაყვანიშმცემელეფქ დორთინაშ უკულ ჭიჭე ხანშა თიშ ტაძარიშ აშენება ქიდიჭყეს (ეზრ. 3:8, 10). მარა სიტუაციაქ ხეთეშე გლახაშა დითირ. წინააღმდეგობაშ გურშენ თინეფს გურქ გუტირხეს დო მიოტუეს მშენებლობა (ეზრ. 4:4; ანგ. 1:1, 2). ათეშენ ჯვ. წ. 520 წანას იეჰოვაქ ანგიას უწუ, ქიმეხვარკო იუდეველეფს ენთუზიაზმიშ დორთინაფას დო აღძრკო თინეფ, ნამდა გათუესკო ტაძარიშ მშენებლობა * (ეზრ. 6:14, 15).

5. მუშენ იჸუაფუდ ანგიაშ ცნობა იუდეველეფშო გურიშემაკინალ?

⁵ ანგიაშ ცნობაშ მიზან რდჷ, ნამდა იეჰოვაშ მიმართ იუდეველეფიშ რწმენა გამანგარკო. წინასწარმეტყველქ გაბედულო გინოჩ თე სიტყვეფ გურგოტახილ იუდეველეფს: „გემანგარით, თე დიხაშ მახორუეფქ, — იჩიებ იეჰოვა — დო იხანდით! მა თქვანწკუმა ვორექ, — იჩიებ ლაშქარეფიშ ღორონთ იეჰოვა“ (ანგ. 2:4). სიტყვეფ „ლაშქარეფიშ ღორონთ“ გურიშემაკინალ იჸუაფუდ თინეფშო. იეჰოვას მუშ მეთაურობაშ თუდო მებრძოლ ანგელოზეფიშ ჯარ ჸუნს, თაშ ნამდა, იუდეველეფ წარმატებულ ქოჸოფედესკონ, თის ოკო ენდესკო.

6. მუ შედეგ მაჸუნუდ ანგიაშ ნაწინასწარმეტყველებ დოზარზალაფას?

⁶ იეჰოვაქ გოუტუ ანგია, ნამდა ხალხშა გეგნუჩამუდკო ცნობა სიმბოლურ დოზარზალაფაშ გურშენ. თე ცნობაქ, ნამდა იეჰოვა დუზარზალუანდჷ სპარსეთის, თიმ დროშ მსოფლიო მპყრობელს, გურშა ელუკინ გურგოტახილ იუდეველეფს, მით ტაძარს აშენენდეს. მუ მაჸუნუდ თე დოზარზალაფას შედეგო? პირველ, ღორონთიშ ხალხ გათენდჷ ტაძარიშ მშენებლობას. თეშ უკულ თინეფ ხოლო, მით ვა რდეს იუდეველეფ, ქიდიჭყანდეს იეჰოვაშ თაყვანიშცემას აღდგენილ ტაძარს. მართალო, მუ გურიშემაკინალ ცნობა იჸუაფუდ თენა ღორონთიშ ხალხშო! (ზაქ. 8:9).

7. მუ დუმაზარზალაფარ საქმეს ბღებულენთ მონაწილებას? გენწყით.

⁷ მუს ნიშნენს ანგიაშ წინასწარმეტყველება ამდღა ჩქინო? იეჰოვა ამდღა ხოლო უზარზალუანს ხალხეფს დო თე საქმეს უკვე ჩქი ხოლო ბღებულენთ მონაწილებას. დეფიქრით თე ფაქტშე: 1914 წანას იეჰოვაქ იესო ქრისტე მუშ ზეციერ სამეფოშ მეფედ გიორინუ (ფსალმ. 2:6). თე სამეფოშ დამყარება მსოფლიო ლიდერეფშო ვა რდჷ სახიოლო ამბე. თენა ნიშნენდჷ, ნამდა „უცხოტომელეფშო დანიშნულ დროეფქ“ — თი პერიოდიქ, მუჟამსით ვა რდჷ მართველ, ნამუთ იეჰოვაშ პირდაპირ წარმომადგენელ რდჷ — გეთუ (ლუკ. 21:24). იეჰოვაშ მოწმეეფს არჩქილენა თენა დო ათეშენ, განსაკუთრებულო 1919 წანაშ უკულ, თინეფ აცხადენა, ნამდა ხვალე ღორონთიშ სამეფო რე კაცობრიობაშ იმენდ. სამეფოშ გურშენ თე სახიოლო ამბეშ ქადაგებაშ საქმე უზარზალუანს მთელ მსოფლიოს (მათ. 24:14).

8. მუჭოთ ფსალმუნიშ 2:1—3-ს ჭარჷ, მუ რეაქცია უღჷ ხალხიშ უმენტაშის სამეფოშ ცნობაშ მიმართ?

⁸ მუ რეაქცია უღჷ ხალხის თე ცნობაშ მიმართ? თინეფიშ უმენტაშ ვა ღებულენს თის (წეკითხით ფსალმუნიშ 2:1—3). ერეფ გარისხებულეფ რენა. თინეფ ვა ღებულენა იეჰოვაშ დანიშნულ მართველს დო სამეფოშ ცნობა, ნამდგას ჩქი ფქადაგენთ,  „სახიოლო ამბეთ“ ვემიორჩქუნა. ნამთინე მთავრობაშე ქადაგებაშ საქმე ვარიებულ რე. მართალ რე, თე მართველეფიშ უმენტაშ ამტკიცენს, ნამდა ღორონთის ომსახურნა, მარა თინეფს ვაკონა მუნეფიშ ძალაუფლებაშ დათმება. ათეშენ, იესოშ დროს მახორუ მართველეფცალო, თინეფ ოწინააღმდეგნა ართგურ მსახურეფს დო თეშნერო იეჰოვაშ ცხებულიშ წინააღმდეგ მეულა (საქ. 4:25—28).

9. მუჭო პასუხენს იეჰოვა ხალხეფიშ უარყოფით რეაქციას?

⁹ მუჭო პასუხენს იეჰოვა ხალხეფიშ უარყოფით რეაქციას? ფსალმუნიშ 2:10—12 იჩიებ: „დო ასე, მეფეეფ, აზრშა ქუმორთით, ქიგიგონეთ შეგონება, დედამიწაშ მოსამართლეეფ! შიშით ემსახურით იეჰოვას, გოხიოლდან დო შიშით კანკალანდათ! განადიდით სქუა, ნამდა ვეგერისხას ღორონთიქ დო ვემისპათ თქვან შარაშე, მუშენდა უცბას გერისხებ თინა; ბედნერ რე არძა, მით თის გითუფორუანს დუდის“. იეჰოვა სიკეთეს გიმირჩქინანს დო მოწინააღმდეგეეფს დროს არზენს. თინეფს დიო ხოლო შეულებნა, დითირუან აზროვნება დო ხუჯ ქუდუკინან იეჰოვაშ სამეფოს. მარა დრო ილიებ; ჩქი თე ქვეყნიერებაშ „ბოლო დღალეფს“ ფცხოვრენთ (2  ტიმ. 3:1; ეს. 61:2). ასე რე დრო, ნამდა ადამიანეფქ ქიგეგან ჭეშმარიტება დო გაკეთან სწორ არჩევან.

10. დოზარზალაფაშ მუ დადებით შედეგ რე ეჭარილ ანგიაშ 2:7—9-ს?

¹⁰ ანგიაშ ნაწინასწარმეტყველებ სიმბოლურ დოზარზალაფაქ ნამთინეწკუმა დადებითო იმოქმედ. თინა მირაგადნა, ნამდა დოზარზალაფაშ შედეგო, „ქუმურს ხალხეფიშ საუნჯე [ჯგირ გურიშ ადამიანეფ] თე ტაძარშა“ * (წეკითხით ანგიაშ 2:7—9). ესაია დო მიქაქ ხოლო იწინასწარმეტყველეს, ნამდა თენა „ბოლო დღალეფს“ მოხვადუდ (ეს. 2:2—4; მიქ. 4:1, 2).

11. მუ რეაქცია უღუდ ართ ჯიმას, მუჟამსით პირველო მირჩქილუ სამეფოშ ცნობა?

¹¹ გუვარჩუათ, მუჭო იმოქმედ დუმაზარზალაფარ ცნობაქ ჯიმა კენშა, ნამუთ მთავარ სამართველოს მსახურენს. თის ასე  ხოლო ჯგირო შჷ, მუჭო მირჩქილუ პირველო სამეფოშ ცნობა, სოდგარენ 40 წანაშ წოხოლე. კენი იჩიებ: „მუჟამსით პირველო მიფრჩქილე ჭეშმარიტება ღორონთიშ სიტყვაშე, გუმახარ თიშ გაგებაქ, ნამდა თე ქვეყნიერებაშ ბოლო დღალეფს ფცხოვრენთ. ქიმეფხვად, ღორონთიშ მოწონებაშ დო მარადიულ სიცოცხლეშ მიოღებელო, ოკო გეგშამრთუმუდკო თე ქვეყნიერებაშე, ნამუთ ვა რე საიმენდო, დო იეჰოვაშ მხარეს მტკიცეთ ქიგემრინუდკო. ქიბლოც დო ხეთეშე თაშ მიფქცი. ქიდიბტე ქვეყნიერება დო დუდ გეგთუფორე ღორონთიშ სამეფოს, ნამდგაშ დოზარზალაფა მუთუნს ვეშულებ“.

12. მუჭო ეიფშჷ იეჰოვაშ სულიერ ტაძარქ დიდებათ ბოლო დღალეფს?

¹² არგამა რე, იეჰოვა კურთხევეფს ვარკენს მუშ ხალხის. ჩქი ქობძირით, მუჭო მირდჷ თიშ თაყვანიშმცემელეფიშ რიცხვიქ თე ქვეყნიერებაშ ბოლო დღალეფს. 1914 წანას ხვალე მუსხირენ ანთას იეჰოვაშ მოწმე რდჷ, მარა ასე 8 მილიონშე მეტ ადამიან ომსახურ ღორონთის აქტიურო დო თეს გეძინელ, მილიონეფ აღნიშნენა ჩქინწკუმა ართო გოშინაშ ონჯუას, მუთ ოძირანს, ნამდა იეჰოვაშ მოწმეეფიშ რიცხვიქ შილებე ხოლო უმოსო მირდას. თეშნერო, იეჰოვაშ სულიერ ტაძარიშ მიწიერ ოზეეფქ — თიშ გენწყილ წმინდა თაყვანისმცემლობაქ — გეიფშჷ „ხალხეფიშ საუნჯეთ“. თეს გეძინელ, იეჰოვაშ სახელშა დიდება მოუღ, მუჟამსით ადამიანეფ ითირუნა დო ახალ პიროვნებას „მიკიქუნანა“ (ეფეს. 4:22—24).

13. ნამ შხვა წინასწარმეტყველებეფქ შისრულ თე საინტერესო მოვლენეფიშ მოხვალამათ? (ქოძირით სურათ გალენ გვერდის)

¹³ თე მნიშვნელოვან მოვლენეფქ შეასრულ შხვა წინასწარმეტყველებეფ ხოლო, მუნერით რე ესაიაშ მა-60 დუდის მოჩამილ წინასწარმეტყველება. თე დუდიშ 22-ა მუხლ იჩიებ: „აკაბცხა ანთასო გინირთუ დო ჭიჭე ხალხ — ძალიერ ხალხო. მა, იეჰოვა, მუშ დროს დუვაჩქარენქ თეს“. იეჰოვაშ თაყვანიშმცემელეფიშ რიცხვიშ რდუალათ, მანგარ ჯგირ მუდგარენ ხვადუ. თე „საუნჯეს“ ბრელნერ უნარ დო შესაძლებლობაწკუმა ართო თიშ სურვილ ხოლო უღჷ, იქადაგას სამეფოშ გურშენ სახიოლო ამბე. შედეგო იეჰოვაშ ხალხის შეულებ გიმირინუას თინეფიშ უნარეფ, ნამუთ ესაიაქ ეჭარ, მუჭოთ „ხალხეფიშ ბჟა“ (ეს. 60:5, 16). თე  ძვირფას ქომოლკათაშ დო ოსურკათაშ მოხვარათ ქადაგებაშ საქმე 240 ქიანას მეურს დო ლიტერატურა 1 000-შე მეტ ნინაშა გიშურს.

14. მუ არჩევან ოკო აკეთას ხალხიქ?

¹⁴ თე ბოლო დროს, დოზარზალაფა გეგნაჭყვიდირაფუანს ხალხის, გაკეთან არჩევან — ღორონთიშ სამეფოს დუკინენა ხუჯის დოვარ ქვეყნიერებაშ მთავრობეფს მიენდებნა? თენა რე გადაწყვეტილება, ნამუთ არძას აჸი მიოღებელ. თიშ უმკუჯინუო, ნამდა იეჰოვაშ ხალხ ომორჩილ ადგილობრივ მთავრობაშ კანონეფს, თინეფ პოლიტიკაწკუმა დაკავშირებით სრულ ნეიტრალიტეტის იცვენა (რომ. 13:1—7). იეჰოვაშ ხალხის უჩქჷ, ნამდა ხვალე ღორონთიშ სამეფო, ნამუთ ვა რე ქვეყნიერებაშ ნაწილ, გეგნოჭკირუნს კაცობრიობაშ პრობლემეფს (იოან. 18:36, 37).

15. ართგურობაშ მუ დიდ გამოცდა რე ეჭარილ გამოცხადებაშ წიგნის?

¹⁵ გამოცხადებაშ წიგნ ეჭარუნს, მუჭო გეგმიცადებ ღორონთიშ ხალხიშ ართგურობა ბოლო დღალეფს, მუდგას წინააღმდეგობეფ დო თხოზინ ქუმაჸუნუ. თე ქვეყნიერებაშ მთავრობეფ ჩქინდე თაყვანიშცემას მითხინა დო თინეფიშ თხოზინს ქიდიჭყანა, მით თეს ვა გაკეთენს (გამოცხ. 13:12, 15). თინეფ დანძალენა არძას, „დიდ დო ჭიჭეს, მდიდარ დო ღარიბის, თავისფალ დო მონას, ნამდა ნიშან ქიგიდვან მარძგვან ხეს ვარდა ჸვას“ (გამოცხ. 13:16). ჯვეშო მონეფშა გედვალირ ნიშან ოძირანდჷ, მიშ საკუთრება რდეს თინეფ. თეშნერო, ამდღა ხალხ არძაშე მითხინდას იჸი, ნამდა უღდან სიმბოლურ ნიშან ხეს ვარდა ჸვას. თინეფიშ აზროვნება დო მოქმედება ქაძირანს, ნამდა ოკუთვნუნა დო ხუჯის უკინენა მთავრობეფს.

16. მუშენ რე ასე თიშ დრო, ნამდა იეჰოვაშ მიმართ ჩქინ ართგურობა გუვამანგარათ?

¹⁶ მიბღენთო სიმბოლურ ნიშანს დო ხუჯის დუკინენთო თე ქვეყნიერებაშ მთავრობეფს? თინეფ, მით ვარიას თქუანა თე ნიშანიშ მეღებაშე, სირთულეეფიშ დო საფრთხეშ წოხოლე ქიგედირთუნა. გამოცხადებაშ წიგნ იჩიებ, ნამდა მითინს ვეშიალებე „ჸიდირ დო გიმოჩამა, თინეფიშ გარდა, მიდგას ნიშან უღჷ“ (გამოცხ. 13:17). მარა ღორონთიშ ხალხის უჩქჷ, მუს გუკეთენს ღორონთ თინეფს, მიდგას გამოცხადებაშ 14:9, 10-ის მოშინაფილ ნიშან უღჷ. თე ნიშანიშ მეღებაშ მანგიორო, ღორონთიშ ხალხის, თაშ ქოფთქუათინ, ხეშა აჸინა გეჭარილ, „მა იეჰოვას ვოკუთვნუქია“ (ეს. 44:5). ასე რე დრო, დებრწმუნათ, ნამდა იეჰოვაშ მიმართ ჩქინ ართგურობა ძალიერ რე. თეცალ ართგურობაშ შედეგო იეჰოვა ხიოლით მემრჩქინანა მუშ საკუთრებათ!

17. მუ ოკო ფშუდან იეჰოვაშ მოთვინებაშ გურშენ?

¹⁷ იეჰოვა თე ბოლო დღალეფს დიდ მოთვინებას გიმირჩქინანს, მუშენდა თის ვაკო, მითინქ გენადგურას (2 პეტ. 3:9). თინა არძას არზენს საშვალებას, ნამდა მინანუან დო მიღან სწორ გადაწყვეტილება, მარა თიშ მოთვინებას ხოლო უღჷ საზღვარ. თი ადამიანეფ, მით ვეგმირინუანა თე შესაძლებლობას, თიცალ შედეგეფს მიღენა, მუნერით მოსეშ დროს ფარაონქ მიღჷ. იეჰოვაქ თის უწუ: „ასე ხოლო გებჭოფუნდჷ ხეს სქან წინააღმდეგ დო ოღურალ ჭირს ქოირღვანდით სი დო სქან ხალხის ხოლო დო გეშაჭყორდუდით, მარა თიშ გურშენ დოიტე ცოცხალ, ნამდა ქუგოძირუე ჩქიმ ძალა დო მთელ დედამიწაქ ქიგეგას ჩქიმ სახელ“ (გამ. 9:15, 16). საბოლათ არძა ქიგეგენს, ნამდა იეჰოვა რე ჭეშმარიტ ღორონთ (ეზეკ. 38:23). მუჭო მოხვადუ თენა?

18. ა) მუ განსხვავებულ დოზარზალაფა რე ეჭარილ ანგიაშ 2:6, 20—22-ს? ბ) სოვრეშე მიჩქნა, ნამდა ანგიაშ სიტყვეფ მომავალს შისრულებ?

¹⁸ ანგიაშ ღურაშე საუკუნეეფიშ უკულ, პავლე მოციქულქ ჭარჷ, ნამდა ანგიაშ  2:6, 20—22-ს მოჩამილ წინასწარმეტყველება მომავალს შისრულებუდ (წეკითხით). თიქ ჭარჷ: «თინა ასე ხოლო მოპირნა: „ხოლო ართშა ქუდუზარზალუანქ ხვალე დედამიწას ვარინ, ცას ხოლო“. სიტყვეფ „ხოლო ართშა“ თის ოძირანს, ნამდა ღორონთ მაშორენს გუნაჭყეფუს, შხვა სიტყვეფით ქოფთქუათინ თის, მუდგაქ ქიდიზარზალუ, ნამდა ქუდოსქიდას თიქ, მუთ ვედიზარზალუანს» (ებრ. 12:26, 27). თი დოზარზალაფაშე განსხვავებით, ნამუთ ანგიაშ 2:7-ის რე მოშინაფილ, თე დოზარზალაფა თინეფიშ სამუდამო განადუგრებას ნიშნენს, მით ფარაონცალო ვაღიარენს, ნამდა იეჰოვას უღჷ მართველობაშ უფლება.

19. მუ ვედიზარზალუანს დო სოვრეშე მიჩქნა თენა?

¹⁹ მუ ვედიზარზალუანს დო ვეგენადგურებ? პავლე აგრძელენს: „რახანს ვორწყეთ, ნამდა დევმკვიდრენთ სამეფოს, ნამუთ ვედიზარზალუანს, კინ მიბღათ ღორონთიშ ჭყოლოფა, მუდგაშ საშვალებათ შემალებენა, ღორონთის მუშ მოსაწონო ვემსახურათ შიშით დო მოწიწებათ“ (ებრ. 12:28). მუჟამსით ბოლო დიდ დოზარზალაფა გეთებ, ხვალე ღორონთიშ სამეფო ვედიზარზალუანს, თინა მტკიცას გესქიდუ მუშ ადგილს! (ფსალმ. 110:5, 6; დან. 2:44).

20. მუ არჩევან ოკო აკეთას ხალხიქ დო ჩქი მუჭო შემლებნა თინეფიშ მოხვარა?

²⁰ ოდინაფალ დრო ვა რე! ხალხიქ ოკო გიშეგორას — გაგრძელენა თე ქვეყნიერებაშ შემოთავაზებულ ცხოვრებაშ ხუჯიშ დაკინებას, ნამუთ საბოლათ განადგურებაშა მიჸონანს, დოვარ ირფელს გაკეთენა, ნამდა მუნეფიშ ცხოვრება იეჰოვაშ ნებას მეურდას, მუდგას საბოლათ მარადიულ სიცოცხლე მაჸუნუ? (ებრ. 12:25.) ქადაგებათ შემლებნა მივეხვარათ ხალხის, თე მნიშვნელოვან გადაწყვეტილებაშ მეღებას. მორთ მუთ შილებე მეტ ძვირფას ადამიანს ქიმვეხვარათ, ქიდეკინას ღორონთიშ სამეფოშ მხარე დო ირო ფშუდან ჩქინ უფალ იესოშ სიტყვეფ: „იქადაგენა სახიოლო ამბეს სამეფოშ გურშენ მთელ მსოფლიოს არძა ხალხშა გაცხადებელო დო თიმწკუმა ქუმურს აღსასრულ“ (მათ. 24:14).