1-2. Gini zigizohe gu nebi nangia Agai ape gupai nga si nika manga ti gi gaani regbo re?

“VURU bete aminiti yo, ababagaahe gbiati abambu atona ka gburuwa.” “Aboro dunduko naamanga mbangirimbangiri . . . Badungu aboro aya, rago azigizo tipa he wa aminiti ue. Tipa re tigimi, si adu wa ka i ya si aima dia gbanga regbo.” Gere nga bete agu apai agu aboro agumbaha nga aguyo nabati ti regbo gu bazigizo namangi Nepal yo rogo 2015. Ka ngbatunga iiriwopai wa gure mangi ro, bangiro gonga ti ni taata te.

² Ono awere tie, kura ngbatunga zigizohe kia namanga rogo badungu agbata watadu aringara. Yekova nazigizo arikaaboro dunduko rogo zegino, na ko aima digo nimangi gipai re tipa dungu agarã. Gu nebi nangia Agai aima fura tipa gi zigizohe re kumbatayo. Ko ake gupai nga: “Ya Yekova nga ga arimbasa ko wẽ: Mi azígizo angbangbaturũ na kpotosende na baime, na ugu sende bara sa berewe ti rago ngbutuko.”—Agai 2:6.

3. Waigu du gu zigizohe Agai afura tipaha kia ti ndikidi bazigizo?

³ Gu zigizohe Agai afura tipaha re wa ndikidi bazigizo nga gu naye na kina gbarasahe te. Kuba gure, gu zigizohe Agai afura tipaha re nasa weneapai asa si mangi. Yekova nitiko nape gupai furani nga: “Mi ki zigizo arikaaboro dunduko, si du agu ahe ngba bangiri arikaaboro dunduko aye kono, mi ki hisi gi bambu re na baweneahe.” (Agai 2:7) Ginipai gi sangbanebi re ayuguhe fu agu aboro naraki ti regbo Agai? Na ginipai si ayugoho furani areme? Ani nika sakapai tipa akaragapai kuti agu asanahe re na ki wiriki wai a ani amanga gu sunge nga ga zigizo arikaaboro areme.

4. Tipagine Yekova akedi gu nebi ti ni nangia Agai fuo Gako aboro?

⁴ Gu nebi nangia Agai agbia nyanyakipa sunge be Yekova. Oni berẽnga kurii gupai namangi mbata fu ko gbia gu sunge re. Rogo gu garã nangia 537 Mbata fu Batikayo Kristo, badona nga ga aYudo aru Babera yo ka karagatiyo ku Yerusarema yo. Na si nawira gupai nga Agai adu kina dagbayo. Ngbutuko tingbafuo i da Yerusarema yo, gu ruru airisi Yekova re atona ka me ga Yekova bambu watadu yekaru niipo. (Eza.3:8, 10) Ono fuoho aaturongo te gbegberẽpai ki mangi. I adu na gberãrago na ki mbu manga gu sunge re mbiko sogote. (Eza 4:4; Agai 1:1, 2) Rogo gu garã nangia 520 Mbata fu Batikayo Kristo, Yekova aya fu Agai ko undo aYudo i du zaaza berewe na ki nyasi me yekaru. *—Eza. 6:14, 15.

5. Tipagine ga Agai pangbanga arengbe kadu ti ni nipa ngarasaro fu ga Mbori aboro?

⁵ Ga Agai pangbanga adu tipa ka nyakasa ga aYudo idapase kuti Yekova. Gu nebi re agumba gupai ni wingbaduse fu agu aYudo naadu na gberãrago nga: “Oni aboro ringara dunduko, oni dú nyanyaki, wo poi Yekova; oni mángi sunge, bambiko mi du na oni, wo poi Yekova nga ga arimbasa ko.” (Agai 2:4) Gu fugo nga “Yekova nga ga arimbasa ko” aima fu kido fuyo. Yekova na pagbia beko kurii badungu arimbasa amaraika, sidu, si aaida aYudo du na kido kutiko ka i aida kadu na diabese.

6. Sangbana gu zigizohe Agai afura tipaha kumbatayo angia gine?

⁶ Yekova akedi Agai ko gumba gupai fu aYudo nga ko nika zigizo arikaaboro dunduko. Gi yugoti re angarasi agu aYudo naadu na gberãrago na ki mbu me yekaru. Gu yuguyugupai re ayugu gupai nga Yekova nika zigizo Parasa nga gu ringara naadu na bakere ome ti ni ti gu regbo re. Sangbana gu zigizohe re angia gine? Ni bambataha, ga Mbori aboro anyasi me yekaru. Fuo gure, zavura agu aboro naangianga aYudo ya akoditiyo na aYudo tipa iriso Yekova rogo gu yekaru i amehe berewe re. Gi pangbanga re aima ngarasa ga Mbori aboro ni bakerehe!—Zek. 8:9.

7. Gini sunge zigizohe rengbe ani ka undo namangaha areme? Oni sakingo rogoyo.

⁷ Ginipai ga Agai sangbanebi ayugoho furani areme? Yekova nazigizo arikaaboro berewe, na ti gi regbo re, ani naundo na manga gu sunge re. Oni berẽnga kurii gipai re: Rogo 1914, Yekova amoi Yesu Kristo ni Bakindo gu Gako Kindo du ngbangbaturũ yo. (Tam. 2:6) Ho gu Kindo re atona zogarago ni, si angia gbegberẽ pangbanga fu agu abangbembatayo nga ga zegino yo. Si aayugo gupai nga “rago aGendiria” aima susa, naida ka ya gu regbo bazogo aadunga ho naarukuba Yekova ya aima digo. (Rk. 21:24) Mbiko gu ndupai re, gbe naatona rogo gu garã nangia 1919, ga Yekova aboro aima digo ni gumba gupai fu aboro dunduko nga ga Mbori Kindo nga yangara maabangirise fu arikaaboro dunduko. Gi tungusapai nga ga “wene pangbanga nga ga ngbi re” ima zigizo zegino dunduko.—Mt. 24:14.

8. Ringbisihe kuti Atambuahe 2:1-3, waigu badungu arikaaboro namangipai kuti gi pangbanga re?

⁸ Waigu aboro namangipai kuti gi pangbanga re? Badungu aboro ima sogaha. (Oni gedi Atambuahe 2:1-3.) Rago ima gberã ti rikaaboro. I ima ká ka ida na gu Bazogo Yekova namoi ni. I abingo gu pangbanga nga ga Kindo ani atungusaha wa “wene pangbanga” te.  Kura abazogo ima rugusa gaani sunge tungusapai! Wa vura duhe nga badungu abazogo nga ga arikaaboro yo namanga tiyo nga i nairiso Mbori, i aidanga ka mbu gu ome gbiati pagbia du yo na ni te. Sidu, kina wai abazogo amangipai ti rago Yesu, kinawo a i amangapai areme, i nasoga ga Yekova Mbedimbedi Boro ni zubo yo gako ruru abawiriki.—Amo. 4:25-28.

9. Arikaaboro adianga gu pangbanga nga ga Kindo kugume te, ginipai Yekova nambu regbo fuyo i mangihe?

⁹ Waigu Yekova namangipai kuti gu sogote nga ga arikaaboro? Atambuahe 2:10-12 nafu gu karagapai nga: “Ako abakindo, awere oni dú ni tatamana aboro; Ako abasapungbanga rogo kpotosende, oni wiriki pai. Oni tá manga pa Yekova ni gunde, ki du pusiapusia ni kio, oni údi wiri ni rengo, ko ka zinga, oni ki kpiki gene; bambiko gako zinga narunguda ni ipo. Aboro maku nga agu yo dunduko nafu tiyo ku be ko.” Yekova nga wene sino boro, na ko ima fu regbo fuyo tipa i mangi ruru diaberã. I kindi naima rengba ka manga ariapai na ki diberã ka ida na ga Yekova Kindo. Ono tie, kiingo gu regbo nye koyo te. Ani naraka “rogo kusa rago” nga ga gi sino raka re. (2 Tim. 3:1; Yes. 61:2) Si naida aboro ini rengo awere niˈipiˈipihe na ki sia ka iriso Yekova.

10. Waigu kura aboro amangapai kuti gu sunge zigizohe i nafura tipaha rogo Agai 2:7-9?

¹⁰ Kura aboro naida aida na gu zigizohe Agai afura tipaha kumbatayo. Ko ape gupai furani nga, ni sangbana gu zigizohe re, ‘agu ahe ngba bangirise [nga agu aboro du na ruru ngbaduyo yo] nga arikaaboro dunduko aye’ka iriso Yekova. * (Oni gedi Agai 2:7-9.) AYesaya na Mika aima gumba gupai kumbatayo nga gipai re nika manga amanga “rogo yangara arame.”—Yes. 2:2-4, Mika 4:1, 2.

11. Ginipai kura wirina amangihe ho ko agi gu pangbanga ni nga ga Kindo?

¹¹ Oni berẽnga pa gupai kura wirina sa du rimoko nga Ken nga gu ko namangasunge rii-basunge  nga ga zegino yo amangihe ho ko agi gu bawene pangbanga ni nga ga zigizo arikaaboro. Ko natingidapa gu regbo re atingida wenengai ho ko agi gu pangbanga nga ga Kindo ni agarã wa 40 kusayo. Ken aya: “Ti gu bambata regbo mi agi gu rengo du rogo Fugo Mbori yo ni, mi adu na ngbarago ka wirika gupai nga ani naraka ti yangara arame nga ga gi sino raka re. Mi arugu tire na gupai nga, tipa Mbori idi na mi na mi ki gbia nyenye unga, si naida mi kpara tire kusayo ti gi zegino adunga rurupai ti ni re ya na ki ru nyanyaki kubara Yekova yo. Mi amangi kparakpee fu Yekova na ki mangi gupai re. Mi ambu songoda gi zegino re na ki idi niipo na gu bandahe nga ga ga Mbori Kindo nga gu ka i aadianga ha kusayo ya.”

12. Waigu ga Yekova yekaru nga ga toro nahi be taarimo ti gi yangara arame re?

¹² Si tie ziazia nga, Yekova aima digo nifu maku fu gako aboro. Ti gi yangara arame re, badungu aboro ima tona kaa irisoko. Rogo 1914, bange rani asusi 5,000 gbua. Awere, bangerani ima susa amirioni muambe, nga agurani nairiso Mbori zaaza, na badungu amirioni aboro nakoda tiyo na ani na agarã dunduko tipa Tingida Pakpio Yesu. Rogo gi gene re, ga Yekova vurukporo nga gu yekaru nga ga toro du auru kpotosende—du nga gako mbakadapai nga ga ziazia irisombori—ima hi be “agu ahe ngba bangiri arikaaboro dunduko.” Rimo Yekova ima du ni tasitasihe mbiko agu aˈariapai agi aboro re amangaha ho i aukadi vovo borose ni.—Ef. 4:22-24.

13. Mbiko gi weneapai mangi re, gini kura sangbaanebi digisitihe? (Oni bi gu sura duti kpotoho.)

¹³ Gi weneapai mangi re ima digiso kura asangbanebi, wa ngbatunga gu du rogo Yesaya kapita 60. Veresi 22 nga ga gu kapita re naya: “Gu umba pa boro adú wa ngbatunga kutu sa, gu toni ni ki ngia nyanyaki rikaaboro; mi nga Yekova; mi nikaipisa paha ti ragoho.” Bawenepai mangi mbiko gupai nga badungu aboro tona ka iriso Yekova. Agi ‘ahe ngba bangirise’ watadu aboro re naye na abirĩ-sunge ni bakiakia gbiati nyemu tungusa “wene pangbanga nga ga ngbi.” Ni sangbanaha, ga Yekova aboro ima rengba ka mangasunge na agu abirĩ re nga gu Yesaya afura tipaha nga si nga “gu mamuanya nga ga arikaaboro.” (Yes. 60:5, 16)  Mbiko gu undo nga ga agi akumba na adee re, ani natungusapai awere rogo aringara nga 240 na kini kusi awaraga rogo afugo naima susa 1,000.

14. Gini diaberã si aida aboro mangihe awere?

¹⁴ Ti gi digido regbo re, sunge zigizo arikaaboro nasa aboro i mangi diaberã. Ya mo i asongoda ga Mbori Kindo, watadu i nika maa gayo kido kuti agu azogarago nga ga gi zegino re? Gere nga gu siapai si nika ida aboro dunduko mangihe. Wa vura duhe nga ga Mbori aboro nairisa agu andiko airisa agu abazogo nga ga gu ringara i araka rogoho amaaha, i nakparatiyo kusayo ti gu birĩ-zogarago nga ga gi zegino re. (Rom. 13:1-7) I ima ino gupai nga, kina ga Mbori Kindo sa nga ndikidi ziga tipa agu akpakarapai nga ga ngbatunga aboro dunduko. Gu Kindo re nga papara gi zegino re te.—Yo. 18:36, 37.

15. Gini bakere asada nga ga padu ni ruruse i nafura tipaha rogo gu buku nga Yugoti?

¹⁵ Gu buku nga Yugoti nasakapai tipa gupai nga i nika asada gu padu ni ruruse aˈasada nga ga ga Mbori aboro ti yangara arame. Gu asada he re nikaa ndu kumbatayo kaa ye na kere sogote na arungosiro kuti rani. Agu abazogo nga ga gi zegino re nika ida ani naafu iriso fuyo na i nika rungosi agu aboro nika ká ka songoda yo. (Yugo. 13:12, 15) I nika ‘tina he fu aboro dunduko, watadu umba pa yo na kikindigi pa yo, watadu kumukokumuko yo na rungorungo yo, watadu adukpuru na akanga, i nogodi he ti yo, watadu ti kumbabeyo na ngbanda kpakpuyo.’ (Yugo. 13:16) Ti agu aregbo nadu bakuru kusayo, i anagbahe ti akanga tipa si naayugo pa aira yo. Wakina gure a, aboro areme nikaa ida aboro dunduko yugu da i asongoda ni. I nikaa ida aboro dunduko yuguhe rogo gayo aberã yo na gayo mangaapai nga i nga avuru gu birĩ-zogarago nga ga gi sino raka re na i nasongoda ha.

16. Tipagine si aida ani nyakasi gaani padu ni ruruse fu Yekova awere ti ni niˈipiˈipihe?

¹⁶ Ya mo ani aida na gi nogodahe re na ki songodi birĩ-zogarago? Agu aboro nika ká i nogodihe tiyo nika gbiatiyo na akpakarapai na kidu ngba kerepai yo. Gu buku nga Yugoti naya: “Ka boro rengbe nga na ngbe ahe na ka baga ahe wa sa ya, kina agu yo i anogodi he ti yo.” (Yugo. 13:17) Ono ga Mbori aboro ima ino gupai Mbori nika mangaha fu agu aboro du na gu nogodinogodihe tiyo i nafura tipaha rogo Yugoti 14:9, 10. Kuba gupai nga ga Mbori aboro idi na gu nogodinogodihe re, si nika du wa ka i ya i na gu kekeapai ti beyo nga, “Ga Yekova ni.” (Yes. 44:5) Awere nga gu regbo si aida ani bihe nga gaani padu ni ruruse fu Yekova ni nyanyakihe. Ka singia si ni nyanyakihe, Yekova nika du na ngbarago ka pe gupai nga, ani nga gako aboro!

17. Ginipai si aida ani tingidihe nibipa ga Yekova zerangbaduse?

¹⁷ Yekova ima yugo bakere zerangbaduse ti gi yangara arame re. Ko akpingo nyemu aboro kpi wa sa te. (2 Pet. 3:9) Ko ima mbu regbo fu aboro dunduko i saberã yo na ki sia ka irisoko. Ono ko adunga na zerangbaduse nyeanye kindi te. Agu aboro ká ka songoda ga Mbori Kindo nika gbiatiyo na kina gu bangisa asangbanapai Faro agbiatiko na ni ti rago Moize. Yekova agumba gupai fu Faro nga: “Wa mi arengbe ka taa bere ki mangi ro na gamo aboro na tata kaza, ka i adi ro ku sa yo ri kpotosende; ono tipa kina gi pai re mi aidi he ti ni mo nye ni ungaro, nga ka yugo pa gi tandu, i ki taki pande pa rimore rogo kpotosende yo dunduko.” (Gate 9:15, 16) Arikaaboro dunduko nika ino gupai nga Yekova nga ndikidi  Mbori. (Yeze. 38:23) Waigu gipai re nika manga?

18. (a) Gini kura ngbatunga zigizohe i nafura tipaha rogo Agai 2:6, 20-22? (b) Waigu ani aino gupai nga afugo Agai nika digisotihe adigiso kumbatayo?

¹⁸ Fuo dungu agarã fuo kpio Agai, gu mokedi nangia Pauro ake gupai fu agu aKristano nangia aEbere nga agu afugo du rogo Agai 2:6, 20-22 nika digiso tihe adigiso kumbatayo. (Oni gedihe.) Pauro akepai nga: “Awere ko akido he, niya, ‘Bara sa berewe mi amanga nga kina kpotosende sa si zigizo te, ono ngbangbaturũ a.’ Na gi pai re nga, ‘bara sa berewe,’ si nayugo dia agu ahe ku sa yo i ka zigizo ho, wa du mangimangi ahe, ya agu ahe i azigizo nga ha ya si ki nye.” (Eb. 12:26, 27) Gi zigizohe re kia ti gu zigizohe i nafura tipaha rogo Agai 2:7. Gi zigizohe re nayugo gupai nga, agu aboro du wa Faro ká ka ida kuti gupai nga, Yekova du na rengo beko ka zogarago i nika gbarasa yo nyeanye kindi.

19. Ginihe i nikaa zigizongoho ya, na wai du ani ainoho?

¹⁹ Ginihe i nikaa zigizongoho watadu ka diaha kusayo ya? Pauro aya: “Wa ani nadia gu ngbi ku gume i arengba nga na wo ti ni ya, ani dú na undahe, mbiko ho ani ki rengbe na tumo na mangapase nga gu ngba gbe fu Mbori, ni umbasiti na gunde.” (Eb. 12:28) Fuo gi yangara zigizohe re mangi, kina ga Mbori Kindo sa nika nye. Si nika nyeanye kindi!—Tam. 110:5, 6; Dan. 2:44.

20. Gini siapai si aida aboro mangihe na waigu rengbe ani ka undo yo?

²⁰ Regbo ho tipa gbirisaha te! Si naida aboro mangi siapai: Ka i sia kaa ndu kindi kumbatayo kaa songoda gi zegino re, i nika kpi akpi. Ka i sia ka iriso Yekova na ki mangi agu aariapai si aidaha rogo gayo raka yo, i nika gbia nyenye unga. (Eb. 12:25) Vurube gaani sunge tungusapai, ani ima rengba ka undo aboro i mangi gi nyanyakipa diaberã re. Ani undongo badungu aboro aundo i diberã ka songoda ga Mbori Kindo. Na ani naatingidanga agu afugo atingida ti aregbo dunduko nga ga gaani Gbia Yesu nga gu naya: “Gi wene pangbanga nga ga ngbi re i atungusa ha rogo zegino dunduko mbiko ndika fu arikaaboro dũ; ragoho ki digi adiga.”—Mt. 24:14.