1. Wat ango ma jo ma lugen gitwero bedo kwede ki Jehovah?

I KIN jo me ot pa Jehovah tye iye Yecu, ma en aye “latin kayo me ginaketa ducu,” ki lwak lumalaika mapol ata. (Kol. 1:15; Jab. 103:20) I kare ma Yecu onongo tye i lobo, en okonyo dano me niang ni gitwero lwongo Jehovah ni Wongi. I kare ma Yecu onongo tye ka lok ki lupwonnyene, en olwongo Jehovah ni, “Wora ki Wonwu.” (Jon 20:17) Dok i kare ma wadyere bot Jehovah dok wanongo batija, wadonyo i kin jo me ot pa Jehovah ma tye ki omege ki lumege ma lumar.—Mar. 10:29, 30.

2. Wabinyamo gin ango i pwony man?

² Jo mukene ginongo ni tek me neno Jehovah macalo Wego ma lamar. Jo mukene pe gingeyo kit me nyuto mar bot omege ki lumege. I pwony man, wabinyamo kit ma Yecu konyowa kwede me neno Jehovah calo Wonwa ma lamar dok ma watwero nyikke cok kwede. Wabineno bene yo mapatpat ma waromo lubo kwede lanen pa Jehovah i kit ma watero kwede omegiwa ki lumegiwa.

3. I yo ango ma lega ma Yecu omiyo macalo lapor-ri nyikowa cok ki Jehovah?

³ Jehovah obedo Wego ma lamar. Yecu mito ni wanen Jehovah kit ma en nene kwede—macalo lanyodo ma lamar dok lakica ma watwero lok kwede i cawa mo keken, ento pe calo ngat mager ma tittiwa gin me atima keken. Man onen woko ka maleng i kit ma Yecu opwonyo kwede lupwonnyene me lega. En ocako lega ma en omiyo macalo lapor ki lok man ni: “Wonwa.” (Mat. 6:9) Yecu onongo kono otitiwa ni walwong Jehovah ni “Won Twer Ducu,” “Lacwec,” nyo “Kabaka ma loyo kare ducu.” Man onongo pe bibedo rac pien Baibul tiyo ki nying me dog tic magi  ducu me lok i kom Jehovah. (Jab. 91:1; Latit 12:1; 1 Tem. 1:17) Me ka meno, Yecu owaco ni walwong Jehovah ni “Wonwa.”

4. Wangeyo nining ni Jehovah mito ni wanyikke cok kwede?

⁴ Tika inongo ni tek me neno Jehovah macalo Wego ma lamar? Jo mukene i kinwa giwinyo kit meno. Ka wonwa ma onywalowa onongo ger, watwero nongo ni tek me goyo kit ma wego ma lamar bedo kwede. Pud dong kweyo cwinywa ya me ngeyo ni Jehovah niang kit ma wawinyo kwede kikome! En mito bedo cok kwedwa. Meno aye tyen lok mumiyo Lokke cuko cwinywa ni: “Wunyik cok bot Lubanga, ci en bene binyiko cok botwu.” (Yak. 4:8) Jehovah marowa, dok en omine me bedo Wego ma pud dong ber loyo ma watwero bedo kwede.

5. Ma lubbe ki Luka 10:22, Yecu twero konyowa nining me nyikke cok bot Jehovah?

⁵ Yecu twero konyowa me nyikke cok bot Jehovah. Yecu ngeyo Jehovah maber dok lubo kite macok adada. Pi tyen lok man, en owaco ni: “Ngat ma oneno an dong oneno Won.” (Jon 14:9) Macalo ominwa madit, Yecu pwonyowa kit me woro Wonwa kacel ki bedo luwiny bote, kit me gwokke ki timo jami ma cwero cwinye, ki dong kit me nongo Cwakke. Ento tutwalle Yecu konyowa me niang ni Jehovah lakica dok lamar adada. (Kwan Luka 10:22.) Kong wanenu labol mogo.

6. Mi labol ma nyuto ni Jehovah onongo winyo lega pa Yecu.

⁶ Jehovah winyo lok pa lutinone. Tam kong i kom kit ma Jehovah owinyo kwede lok pa latin kayone. Labongo akalakala mo, Jehovah owinyo lega mapol ma Wode olego i kare ma en tye i lobo. (Luka 5:16) En owinyo ka Yecu lego ma peya omoko tam ma pigi tek, calo i kare ma tye ka yero lukwenane 12. (Luka 6:12, 13) Jehovah bene owinyo lega pa Yecu i kare ma en tye ki par mapol. Ma onongo Juda dong cok bino ka dote, Yecu olego bot Wonne i kom atematema ma onongo en cok kato ki iye. Jehovah  pe owinyo lega pa Yecu keken ento bene ocwalo lamalaika me cuko cwiny Wode me amara.—Luka 22:41-44.

7. In iwinyo nining me ngeyo ni Jehovah winyo legawa?

⁷ I kare-ni, Jehovah pud medde ki winyo lega pa luticce, dok en gamo legagi i karene kikome dok i yo maber loyo. (Jab. 116:1, 2) Nen kong kit ma laminwa mo i lobo India oneno kit ma Jehovah ogamo kwede legane. En onongo tye ki par mapol adada, dok obako doge bot Jehovah i lega i kom lok man. En ocoyo ni: “Yub me JW Broadcasting^® me Mai 2019 ma loko i kom kit me lweny ki par obedo gin ma onongo amito kikome. Man obedo lagam me legana.”

8. I yo mapatpat ango ma Jehovah onyuto kwede marre pi Yecu?

⁸ Jehovah nyuto marre piwa i yo marom aroma ki kit ma en onyuto kwede marre pi Yecu i kare me kwo pa Yecu i lobo. (Jon 5:20) En okonyo Yecu me bedo ki niye matek, ocuko cwinye i kare ma en tye ki par, dok omiyo ki Yecu jami me kom ma mitte pi kwo. Dok Jehovah otito ki Wode ni emare dok cwinye yom i kome. (Mat. 3:16, 17) Yecu onongo ngeyo ni Wonne me polo bibedo kwede kare ducu dok bikonye, pi meno Yecu pe owinyo calo etye kene.—Jon 8:16.

9. Wangeyo nining ni Jehovah marowa?

⁹ Calo Yecu, wan ducu dong waneno mar pa Jehovah i yo mapol. Tam kong: Jehovah onyikowa cok bote dok ominiwa omege ki lumege ma gimarowa dok giweko wawinyo maber kun gicuko cwinywa ka watye ki par. (Jon 6:44) Jehovah bene miniwa jami ducu ma wamito wek wabed ki niye matek. Medo i kom meno, en konyowa me nongo jami me kom ma mitte pi kwo. (Mat. 6:31, 32) Ka watamo i kom mar pa Jehovah piwa, marwa pire bene dongo.

10. Gin ango ma watwero pwonyone ki i kit ma Jehovah tero kwede omegiwa ki lumegiwa?

¹⁰ Jehovah maro omegiwa ki lumegiwa. Ento twero bedo tek piwa me marogi ki i cwinywa ki me nyuto mar pigi. Tye kit meno pien waa ki i tekwaro ki yo me kwo mapatpat. Dok wan ducu watimo jami ma cwero cwiny jo mukene. Kadi bed kit meno, pud watwero tute matek me jingo marwa pi utmegiwa. I yo ma nining? Ka walubo lanen pa Wonwa i nyuto mar pi omegiwa ki lumegiwa. (Ep. 5:1, 2; 1 Jon 4:19) Kong dong wanenu gin ma waromo pwonyo ki i lanen pa Jehovah.

11. Yecu onyuto “kica madwong” ma Jehovah tye kwede nining?

¹¹ Jehovah nyuto “kica madwong.” (Luka 1:78) Ngat ma lakica cwinye cwer ka oneno kit ma jo mukene gitye ka deno kwede can; dok en yenyo yo me miyogi kony ki kwe cwiny. Yecu onyuto kica pa Jehovah pi dano ki i kit ma en oterogi kwede. (Jon 5:19) I nino mo acel ma Yecu oneno lwak, “kica omake i komgi mada, pien onongo gitye ka unogi matek, dong gudoko goro, calo romi ma lakwatgi pe.” (Mat. 9:36) Yecu pe ogik ki winyo mar pigi keken, ento en otimo gin mo me konyogi. En ocango lutwo dok okweyo cwiny ‘jo ducu muol ki ma yec onurogi.’—Mat. 11:28-30; 14:14.

12. Mi labol ma nyuto kit ma watwero nyuto kwede cwiny me kica.

¹² Ma peya wanyuto cwiny me kica bot omegiwa ki lumegiwa, mitte ni kong watam i kom pekki ma gitye ka kato ki iye.  Me labolle, twero bedo ni laminwa mo tye ki two malit. En pe loko i kom two man, ento cwinye twero bedo yom adada ka ngat mo okonye. Pe yot bote me miyo jami ma mitte pi jo me ode. Tika waromo jalle me konye ki tedo nyo gwoko lengo me gange i kare mo? Nyo ket ni omego mo orwenyo ticce woko. Watwero mine mic mo me cente, labongo kuto pany, me konye pi kare mo wang ma en onongo tic mukene.

13-14. Watwero bedo ma cingwa yot calo Jehovah nining?

¹³ Jehovah cinge yot. (Mat. 5:45) Pe mitte ni wakur wang ma omegiwa ki lumegiwa gulegowa pi kony ka dong wacak nyutigi kica. Calo Jehovah, watwero timo jami pigi ma peya gupenyowa. En weko kot cwer kadi bed pe wapenyo pire! Dok ka kot ocwer, dano ducu nongo adwogi maber, ento pe jo ma gipwoyo Lubanga keken. Jehovah nyuto ni emarowa ki miniwa jami ducu ma mitte pi kwo. Pud dong wamaro Jehovah ya pi nyutiwa kica ki yot cinge!

¹⁴ I lubo lanen pa Wongi me polo, omegiwa ki lumegiwa mapol gikwanyo kare me nyuto yot cinggi ma peya kipenyogi. Me labolle, i mwaka 2013, yamo lapiru mo magwar (Super Typhoon Haiyan) obalo piny adada i lobo Philippines. Omegiwa ki lumegiwa mapol gurwenyo gangigi ki jamigi ducu. Ento omege ki lumege ma i twok lobo-ni ducu gumiyo kony oyotoyot. Jo mapol gumiyo mic me cente nyo gunywako i roco nyo gero gangi pa omege ma romo 750 i kine ka mwaka acel keken! I kare me two Korona (COVID-19), Lucaden pa Jehovah gutiyo matek me konyo utmegigi. Ka pe wagalle ki miyo kony bot omegiwa ki lumegiwa, ci wanyuto botgi ni wamarogi.

15-16. Ma lubbe ki Luka 6:36, i yo ma pire tek ango ma watwero lubo kwede lanen pa Wonwa me polo?

¹⁵ Jehovah lakica dok weko balwa. (Kwan Luka 6:36.) Nino ducu Wonwa me polo timiwa kica pi balwa. (Jab. 103:10-14) Lulub kor Yecu onongo gubedo jo ma gitye ki roc; kadi bed kit meno, en  onyutigi kica dok oweko balgi. En obedo atera me miyo kwone wek kitimwa kica pi balwa. (1 Jon 2:1, 2) Tamo i kom kica ma Jehovah ki Yecu ginyuto botwa mono pe weko inyikke cok botgi?

¹⁶ Wajingo mar ma tye i kinwa ka ‘watimo kica i kinwa kekenwa.’ (Ep. 4:32) Ngene kene ni, timo kica ki jo mukene twero bedo tek i kine mukene, pi meno mitte ni wati matek me timone. Laminwa mo acel owaco ni pwony me Wi Lubele ma onongo wi lokke tye ni “Wutim Kica i Kinwu Kekenwu” okonye me timo meno. * En ocoyo ni: “Kwano pwony man okonya me niang kit ma timo kica ki jo mukene konya kwede. Pwony man otito ni timo kica bot jo mukene pe tyen lokke ni icwako timgi marac-ci nyo icayo adwogi ma balgi kelo. Ento timo kica obedo jwayo akemo ma tye i cwinywa pi jami maraco ma kitimo kun wabedo ki kuc.” Ka watimo kica ki omegiwa ki lumegiwa labongo dic mo, wanyuto ni wamarogi dok ni walubo lanen pa Wonwa, Jehovah.

17. Ma lubbe ki Matayo 5:16, watwero kelo deyo bot Wonwa me polo nining?

¹⁷ Watye ki pwoc madit me bedo i kin omege ki lumege ma gia ki i twok lobo-ni ducu dok gitye ki mar i kingi. Wamito ni dano mapol guribbe kwedwa i woro Lubangawa. Pi meno, omyero wagwokke ki timo gin mo keken ma twero weko dano tamo marac i kom Jehovah nyo Lucadenne. Watute me kwo i yo ma weko dano bedo ki miti me pwonyo lok i kom Jehovah ki tic pire.—Kwan Matayo 5:16.

18. Gin ango ma twero konyowa me tito kwena ki tekcwiny?

¹⁸ I kine mukene, dano twero cayowa nyo bene keto aunauna i komwa pien ni wabedo luwiny bot Wonwa me polo. Gin ango ma watwero timone ka lworo omakowa ma watye ka nywako niyewa ki jo mukene? Watwero bedo ki gen ni Jehovah gin ki Wode gibikonyowa. Yecu ocuko cwiny lupwonnyene ni pe omyero gupar kit me lok nyo gin ma gibilokone.  Pingo? Yecu otito ni, “Lok ma myero wuloki gibimiyowu i cawa meno pien pe wun aye wubilok, ento cwiny maleng pa Wonwu aye bilok ki i iwu.”—Mat. 10:19, 20.

19. Mi labol pa ngat mo ma otito kwena ki tekcwiny.

¹⁹ Nen kong labol pa ominwa mo ma nyinge Robert ma a ki i lobo South Africa. I kare mo mukato angec ma onongo en pud ocako kwano Baibul nyen dok ngecce me Baibul nok, kitere i kot me tito bot langolkop pingo en pe ye donyo i mony. Ki tekcwiny, en otito bot kot man ni emito bedo ma pe ecwako tung ka mo pi marre pi utmegine. En onongo tye ki pwoc me bedo i kin jo me ot pa Jehovah! Langolkop openye atura ni, “Utmegini gubedo angagi?” Robert onongo pe oyubbe pi lapeny meno, ento cutcut wiye opo i kom ginacoya me nino meno. Onongo obedo Matayo 12:50 ma waco ni: “Dano ma tiyo gin ma Wora ma tye i polo mito, meno aye omera ki lamera, ki maa bene.” Kadi bed Robert onongo obedo latin kwan me Baibul manyen, cwiny maleng pa Jehovah okonye me gamo lapeny meno ki lapeny mukene ma onongo en pe oyubbe pire. Jehovah nen calo cwiny obedo yom adada i kom Robert! Dok Jehovah cwinye yom i komwa bene ka wajenge i kome pi tekcwiny me tito kwena i kare ma nongo timone tek.

20. Gin ango ma omyero wamok tamwa me timone? (Jon 17:11, 15)

²⁰ Dong omyero wamedde wunu ki bedo ki pwoc pi mot me bedo i kin omege ki lumege ma gimarowa. Watye ki Wego ma pud dong ber loyo kacel ki omege ki lumege ma gimarowa. Omyero kare ducu wabed ki pwoc pi mot meno. Catan kacel ki lulub kore ma kitgi raco-ni gimito ni wabed ki akalakala i kom mar pa Wonwa me polo dok gitemme me balo notewa. Ento Yecu olego piwa, kun penyo Wonne ni ogwokwa wek wamedde ki bedo ma wanote. (Kwan Jon 17:11, 15.) Jehovah tye ka gamo lega meno. Calo Yecu, wan bene omyero pe wabed ki akalakala mo keken ni Wonwa me polo marowa dok bikonyowa. Dong omyero wamoku tamwa me medde ki nyiko cok bot Jehovah kacel ki omegiwa ki lumegiwa.