1. Садиг инсанларын Јеһова Аллаһла неҹә мүнасибәти ола биләр?

 ЈЕҺОВАНЫН аиләсинә «бүтүн хилгәтин илки» олан Иса Мәсиһ вә бөјүк сајда мәләкләр дахилдир (Кол. 1:15; Зәб. 103:20). Иса Мәсиһ јер үзүндә оланда ҝөстәрмишди ки, садиг инсанлар да Јеһоваја «Ата» дејә мүраҹиәт едә биләр. О, шаҝирдләри илә Јеһова һаггында данышаркән «Атам» вә «сизин Атаныз» сөзләрини ишләтмишди (Јәһ. 20:17). Биз өзүмүзү Јеһоваја һәср едиб вәфтиз олунанда баҹы-гардашлардан ибарәт меһрибан аиләјә дахил олуруг (Марк 10:29, 30).

2. Бу мәгаләдә нәдән сөһбәт ҝедәҹәк?

² Бәзиләри үчүн Јеһоваја меһрибан Ата кими бахмаг чәтиндир. Бир башгалары исә баҹы-гардашлара мәһәббәтини ифадә етмәји баҹармыр. Бу мәгаләдән өјрәнәҹәјик ки, Иса Јеһоваја Ата кими бахмағымыза, Она јахын олмағымыза неҹә көмәк едир. Һәмчинин ҝөрәҹәјик ки, баҹы-гардашларымызла мүнасибәтдә Јеһовадан һансы саһәләрдә өрнәк ҝөтүрә биләрик.

3. Нүмунә үчүн олан дуа Јеһоваја јахынлашмағымыза неҹә көмәк едир?

³ Јеһова мәһәббәтли Атадыр. Иса Мәсиһ истәјир ки, биз Јеһоваја онун кими јанашаг; Јеһованын лагејд Аллаһ олмадығыны, меһрибан, гајғыкеш олдуғуну, истәдијимиз вахт Она јахынлаша биләҹәјимизи анлајаг. Бу, Исанын шаҝирдләринә өјрәтдији дуадан ајдын ҝөрүнүр. О, бу дуанын әввәлиндә Јеһоваја «Атамыз» дејә мүраҹиәт етмишди (Мәт. 6:9). Јери ҝәлсә, Иса дејә биләрди ки, биз Аллаһа «Гүдрәт Саһиби», «Јарадан», «әбәдијјәт Һөкмдары» дејә мүраҹиәт едәк. Бу, сәһв олмазды, чүнки Мүгәддәс Китабда Јеһоваја бу ҹүр сөзләрлә хитаб олунур (Јар. 49:25; Әшј. 44:2;  1 Тим. 1:17). Амма Иса истәди ки, биз Јеһоваја «Ата» дејә мүраҹиәт едәк.

4. Һарадан билирик ки, Јеһова бизим Онунла сых мүнасибәтимизин олмасыны истәјир?

⁴ Сизин үчүн Јеһованы меһрибан бир Ата кими тәсәввүр етмәк чәтиндир? Бәзиләримиз үчүн бу, чәтиндир. Ола билсин, елә аиләдә бөјүмүшүк ки, атамыз чох сәрт олуб. Она ҝөрә дә бизим үчүн меһрибан ата анлајышы јаддыр. Амма нә јахшы ки, Јеһова бизим кечирдијимиз һиссләри анлајыр! О истәјир ки, бизимлә јахын мүнасибәти олсун. Одур ки, Кәламы бизи сәсләјир: «Аллаһа јахынлашын, О да сизә јахынлашаҹаг» (Јаг. 4:8). Јеһова бизи севир вә истәјир ки, ән јахшы Атаја саһиб олаг.

5. Лука 10:22 ајәсинә әсасән, Јеһоваја јахынлашмағымызда Исанын һансы ролу вар?

⁵ Иса Мәсиһ көмәк едә биләр ки, бизим Јеһова илә даһа сых мүнасибәтимиз олсун. О, Јеһованы елә јахшы таныјыр, Онун хүсусијјәтләрини елә мүкәммәл әкс етдирир ки, өзү һагда белә демишди: «Мәни ҝөрән Атаны да ҝөрүб» (Јәһ. 14:9). Иса Мәсиһ аиләнин бөјүк оғлу кими, Атамыза һөрмәт ҝөстәрмәји, итаәт етмәји, Ону мәјус едән әмәлләрдән узаг дурмағы, Онун разылығыны газанмағы өјрәдир. Амма Иса јер үзүндә јашадығы мүддәтдә диггәти әсасән Јеһованын неҹә мәһәббәтли, меһрибан Ата олмасына јөнәлтмишди. (Лука 10:22 ајәсини охујун.) Ҝәлин бәзи нүмунәләрә бахаг.

6. Јеһова Исанын дуаларына неҹә ҹаваб верирди?

⁶ Јеһова өвладларынын дуасыны ешидир. Ҝәлин ҝөрәк О, илкин Оғлунун дуасына неҹә ҹаваб вермишди. Иса јер үзүндә оланда чохлу дуалар едирди вә әлбәттә ки, Јеһова онун бүтүн дуаларыны ешидирди (Лука 5:16). Иса мүһүм гәрарлар верәндә, мәсәлән, 12 һәварисини сечәндә дуа етмишди (Лука 6:12, 13). Јеһова һәмчинин Исанын чәтин анларында етдији дуаны ешидирди. Јәһуда Искәрјутун хәјанәтиндән өнҹә Иса ону гаршыда ҝөзләјән сынаглара дөзмәк үчүн һәрарәтлә дуа етмишди. Јеһова онун дуасыны садәҹә  динләмәди, мәләјини ҝөндәрди ки, әзиз Оғлуну ҝүҹләндирсин (Лука 22:41—44).

7. Јеһованын дуаларынызы динләдијини билмәк сизә неҹә тәсир бағышлајыр?

⁷ Јеһова бу ҝүн дә хидмәтчиләринин дуасыны динләјир. Онлара дүзҝүн вахтда вә ән јахшы шәкилдә ҹаваб верир (Зәб. 116:1, 2). Ҝәлин ҝөрәк Һиндистанда јашајан бир баҹы буна неҹә шаһид олуб. Онда ҹидди емосионал проблемләр вар иди вә о, бу барәдә һәрарәтлә Јеһоваја дуа едирди. О јазыр: «JW телевизијасынын 2019-ҹу ил мај бурахылышы мәним дуама ҹаваб иди. Орада нараһатчылыг вә тәшвишлә мүбаризә апармаг үчүн мәсләһәтләр верилирди. Бу, мәһз мәнә лазым олан мәсләһәтләр иди».

8. Јеһова Исаја севҝисини һансы јолларла ҝөстәрирди?

⁸ Јеһова Иса Мәсиһә јер үзүндә хидмәти заманы гајғы вә мәһәббәт ҝөстәрдији кими, бизә дә ҝөстәрир (Јәһ. 5:20). О, Исаја руһани, физики вә мәнәви ҹәһәтдән дајаг олурду. Јеһова Оғлуну севдијини, ондан разы галдығыны ачыг шәкилдә билдирирди (Мәт. 3:16, 17). Иса билирди ки, һәр заман сәмави Атасынын көмәјинә архалана биләр, она ҝөрә дә өзүнү һеч вахт тәнһа һисс етмирди (Јәһ. 8:16).

9. Јеһованын бизи севдијинә нәләр дәлаләт едир?

⁹ Иса Мәсиһ кими, һәр биримиз Јеһованын мәһәббәтинә бир чох саһәләрдә шаһид олмушуг. Бир дүшүнүн: Јеһова бизи Өзүнә ҹәлб едиб, бизә бирлијин вә мәһәббәтин һөкм сүрдүјү руһани аилә бәхш едиб. Бу аилә бизә мәнәви ҹәһәтдән чох дајаг олур (Јәһ. 6:44). Јеһова бизи бол-бол руһани гида илә тәмин едир. Үстәлик, һәр ҝүн мадди тәләбатларымызын гајғысына галыр (Мәт. 6:31, 32). Јеһованын бизи нә гәдәр чох севдији һагда дүшүнәндә Она олан мәһәббәтимиз артыр.

10. Јеһованын баҹы-гардашларымыза мүнасибәтиндән нә өјрәнә биләрик?

¹⁰ Јеһова руһани аиләмиздәки баҹы-гардашларымызы севир. Амма бәзән бизә онлары севмәк вә севҝимизи ифадә етмәк чәтин ола биләр. Ахы һәр биримиз мүхтәлиф мәдәнијјәтләрдән, фәргли аиләләрдән ҝәлмишик. Һамымыз кимләрисә гыҹыгландыран, әһвалыны позан сәһвләрә јол веририк. Буна бахмајараг, руһани аиләмиздә мәһәббәтин һөкм сүрмәси үчүн һамымыз өз төһфәмизи верә биләрик. Неҹә? Јеһова кими, баҹы-гардашларымызы севмәклә (Ефес. 5:1, 2; 1 Јәһ. 4:19). Ҝәлин ҝөрәк Јеһовадан неҹә нүмунә ҝөтүрә биләрик.

11. Иса Јеһованын «шәфгәтини» неҹә әкс етдирмишди?

¹¹ Јеһова хидмәтчиләринә шәфгәт ҝөстәрир (Зәб. 145:8). Адәтән шәфгәтли инсан башгасынын әзаб чәкдијини ҝөрәндә биҝанә галмыр. Чалышыр ки, јоллар тапыб она көмәк етсин, тәсәлли версин. Иса инсанларла рәфтарында Јеһованын шәфгәтини әкс етдирирди (Јәһ. 5:19). Бир дәфә Иса ҹамааты ҝөрәндә онларын «һалына аҹыды, чүнки бу адамлар чобансыз гојунлар кими јазыг вә дағыныг идиләр» (Мәт. 9:36). Амма Иса садәҹә олараг онларын һалына аҹымады, о онлары сағалтды, һәмчинин дәвәт етди ки, «зәһмәткешләр вә јүкү ағыр» оланлар јанына ҝәлиб тәравәт тапсын (Мәт. 11:28—30; 14:14).

12. Шәфгәтли олдуғумузу һансы үсулларла ҝөстәрә биләрик?

¹² Баҹы-гардашларымызын проблемләри һаггында дүшүнсәк, онлара шәфгәт ҝөстәрә биләҹәјик. Мәсәлән, тутаг ки, бир баҹынын сағламлығында ҹидди проблем вар. О, һеч вахт бундан шикајәт етмәсә дә, мүәјјән саһәләрдә көмәк ҝөстәрилсә, она хош олар. Јәгин аиләсини зәрури тәләбатларла  тәмин етмәк онун үчүн чәтиндир. Бәлкә дә, јемәк биширмәкдә, евин тәмизлик ишләриндә көмәјә еһтијаҹы вар. Јахуд ола биләр, һансыса гардаш ишини итириб. Гардаш иш тапана кими аиләсини тәмин едә билсин дејә, пулун кимдән олдуғуну билдирмәдән, она мүәјјән мәбләғдә пул јардымы едә биләрик?

13, 14. Јеһова кими сәхавәтли олмаг үчүн нә етмәлијик?

¹³ Јеһова сәхавәтлидир (Мәт. 5:45). Биз ҝөзләмәмәлијик ки, баҹы-гардашлар өзләри десин, сонра онлара көмәклик ҝөстәрәк. Јеһовадан өрнәк алараг өзүмүз тәшәббүс ҝөстәрмәлијик. Јеһова һеч ҝөзләмир, биз Ондан хаһиш едәк, һәр ҝүн ҝүнәш чыхарыр. Ҝүнәшин истисиндән һәр кәс, нашүкүр инсанлар белә бәһрәләнир. Мәҝәр разы дејилсинизми ки, Јеһованын гајғымыза галмасы бизә мәһәббәтинин ифадәсидир? Белә сәхавәтли вә хејирхаһ Аллаһы неҹә севмәмәк олар?!

¹⁴ Бу ҝүн дә бир чох баҹы-гардашымыз Јеһовадан өрнәк алараг өзләри тәшәббүс ҝөстәриб, диндашларына сәхавәт ҝөстәрирләр. Мәсәлән, 2013-ҹү илдә Филиппини ҹәнҝинә алан супертајфун «Һаијан» бөјүк дағынтылара сәбәб олмушду. Чохлу сајда баҹы-гардашымыз евләрини, мал-мүлкүнү итирмишди. Дүнјанын дөрд бир јанындан диндашларымыз дәрһал онларын дадына чатды. Кимиси мадди ҹәһәтдән әл тутду, кимиси тикинти ишиндә көмәк етди. Бунун сајәсиндә бир илдән аз мүддәтә тәхминән 750 ев јенидән бәрпа олунду! COVID-19 пандемијасы заманы Јеһованын Шаһидләри диндашларына дәстәк олмаг үчүн әлләриндән ҝәлән көмәји ҝөстәрдиләр. Руһани аиләмизин дадына чатанда онлара севҝимизи ҝөстәририк.

15, 16. Лука 6:36 ајәсинә әсасән, һансы ваҹиб мәсәләдә Атамыз Јеһовадан өрнәк ҝөтүрмәлијик?

¹⁵ Јеһова мәрһәмәтли вә бағышлајандыр. (Лука 6:36 ајәсини охујун.) Биз һәр ҝүн Онун мәрһәмәтини дујуруг (Зәб. 103:10—14). Иса да давамчыларынын сәһвләринә бахмајараг, онлары бағышлајырды, онлара гаршы мәрһәмәтли иди. О һәтта ҝүнаһларымызын бағышланмасы үчүн өз  ҹаныны гурбан верди (1 Јәһ. 2:1, 2). Јеһованын вә Исанын белә мәрһәмәтли вә бағышлајан олмасы бизи онлара даһа да јахынлашдырыр.

¹⁶ Биз бир-биримизи үрәкдән бағышлајанда руһани аиләмиздәки мәһәббәт бағларыны мөһкәмләндиририк (Ефес. 4:32). Дүздүр, бәзән кимисә бағышламаг чох чәтин олур, буна ҝөрә дә инсаны бағышламаг үчүн чалышмаг лазым ҝәлә биләр. Бир баҹыја бу саһәдә «Ҝөзәтчи гүлләси» журналында дәрҹ олунан «Бир-биринизи үрәкдән бағышлајын» мәгаләси чох көмәк етмишди *. О јазыр: «Бу мәгалә мәнә бағышламаға башга јөндән бахмаға, онун хејрини баша дүшмәјә көмәк етди. Орада изаһ олунурду ки, кимисә бағышламаг о демәк дејил ки, биз онун јанлыш һәрәкәтини бәјәнирик, јахуд башгаларына зәрәр вердијини ҝөрмәздән ҝәлирик. Бағышламаг инҹиклик һиссиндән гуртулуб, үрәјиндә сүлһү горумаг демәкдир». Биз баҹы-гардашлары үрәкдән бағышлајанда онлары севдијимизи вә Атамыз Јеһоваја бәнзәдијимизи ҝөстәририк.

17. Мәтта 5:16 ајәсинә әсасән, сәмави Атамызын адыны неҹә уҹалда биләрик?

¹⁷ Мәһәббәтин һөкм сүрдүјү үмумдүнја аиләјә саһиб олмаг бөјүк шәрәфдир. Истәјирик ки, мүмкүн гәдәр чох инсан Јеһоваја ибадәтдә бизә гошулсун. Буна ҝөрә дә еһтијатлы олмалыјыг ки, Јеһованын вә Онун халгынын адына ләкә ҝәтирәҹәк һәрәкәтә јол вермәјәк. Биз чалышырыг, елә давранаг ки, инсанлар хош хәбәри өјрәнмәк истәсин. (Мәтта 5:16 ајәсини охујун.)

18. Ҹәсарәтлә шаһидлик вермәјә бизә нә көмәк едә биләр?

¹⁸ Сәмави Атамыза итаәт етдијимиз үчүн бәзән тәгибләрә вә тәһгирләрә мәруз галырыг. Инсанлара етигадымыз һагда данышмаға горхуругса, нә едә биләрик? Јеһованын вә Иса Мәсиһин көмәјимизә  чатаҹағына архајын ола биләрик. Иса шаҝирдләринә демишди: «Нәдән вә ја неҹә данышаҹағыныз барәдә нараһат олмајын, чүнки һәмин ан нә демәк лазым олдуғуну биләҹәксиниз. Данышанда тәк олмајаҹагсыныз, Атанызын мүгәддәс руһу сизин васитәнизлә данышаҹаг» (Мәт. 10:19, 20).

19. Ҹәсарәтлә шаһидлик верән бир нәфәрин нүмунәсини чәкин.

¹⁹ Роберт адлы гардаш өзү бунун шаһиди олуб. Мүгәддәс Китабы јени өјрәндији вахтларда о, Ҹәнуби Африкада һәрби мәсәләјә ҝөрә мәһкәмә гаршысына чыхарылмышды. Һәмин вахт онун Мүгәддәс Китаб билији аз иди. Амма о, ҹәсарәтлә мәһкәмәдә изаһ етди ки, иман баҹы-гардашларыны севдији үчүн битәрәф галмаг истәјир. О, руһани аиләсиндәки јерини гијмәтләндирирди. Бирдән һаким ондан сорушду: «Кимдир сәнин баҹы-гардашын?» Роберт бу суалы ҝөзләмирди, амма дәрһал һәмин ҝүнүн ајәси јадына дүшдү. Бу, Мәтта 12:50 ајәси иди: «Ҝөјдәки Атамын ирадәсини јеринә јетирән мәним гардашым, баҹым вә анамдыр». Роберт Мүгәддәс Китабы јени өјрәнсә дә, Јеһованын руһу она һәм бу суалы, һәм дә ҝөзләмәдији диҝәр суаллары ҹавабландырмаға көмәк етди. Сөзсүз ки, Јеһова Робертлә фәхр едирди! Ејнилә биз дә чәтин анларда Јеһоваја ҝүвәниб, ҹәсарәтлә шаһидлик верәндә Јеһова бизимлә гүрур дујур.

20. Биз нәјә гәти гәрарлы олмалыјыг? (Јәһја 17:11, 15).

²⁰ Ҝәлин бундан сонра да меһрибан аиләмиздәки јеримизи дәјәрләндирәк. Бизим тајы-бәрабәри олмајан Атамыз вә бизи севән чохлу баҹы-гардашымыз вар. Буна ади бир шеј кими јанашмамалыјыг. Шејтан вә онун мәнфур тәрәфдарлары чалышыр ки, Јеһованын севҝиси илә бағлы үрәјимиздә шүбһә ојатсынлар вә арамыздакы бирлији позсунлар. Амма Иса биздән өтрү дуа едиб Атамыздан хаһиш етмишди ки, аиләмиздәки бирлик позулмасын дејә ҝөзү үстүмүздә олсун. (Јәһја 17:11, 15 ајәләрини охујун.) Јеһова онун дуасына ҹаваб верир. Иса кими, ҝәлин биз дә Јеһованын мәһәббәтинә вә бизә дајаг олаҹағына һеч вахт шүбһә етмәјәк. Руһани аиләмизә даһа да јахын олмаг үчүн әлимиздән ҝәләни етмәјә давам едәк.