1. Ano an puwedeng iapod ki Jehova kan maimbod na mga tawo?

KAIBA sa pamilya ni Jehova nin mga parasamba si Jesus, na iyo “an panganay sa gabos na linalang,” asin an dakulon na mga anghel. (Col. 1:15; Sal. 103:20) Kan si Jesus yaon digdi sa daga, itinukdo niya na an maimbod na mga tawo puwedeng mansayon si Jehova bilang saindang Ama. Kan kaulay ni Jesus an saiyang mga disipulo, inapod niya si Jehova na “sakuyang Ama asin saindong Ama.” (Juan 20:17) Asin pag idinusay ta an satong sadiri ki Jehova tapos nagpabawtismo, nagigin kabilang kita sa nagkakaminuruutan na pamilya nin magturugang.—Mar. 10:29, 30.

2. Ano an pag-uulayan ta sa artikulong ini?

² An nagkapira nasasakitan na mansayon si Jehova bilang sarong mamumuton na Ama. An iba man tibaad dai aram kun paano ipapahiling an pagkamuot sa saindang mga tugang. Sa artikulong ini, pag-uulayan niyato kun paano kita tinatabangan ni Jesus na mansayon si Jehova bilang sarong mamumuton na Ama, an saro na puwede kitang rumani. Aaramon ta man an mga paagi kun paano ta maaarog si Jehova sa pagtratar sa satuyang mga tugang.

3. Sa paanong paagi na an modelong pamibi irinarani kita ki Jehova?

³ Si Jehova sarong mamumuton na Ama. Gusto ni Jesus na mansayon niyato si Jehova arog kan pagmansay niya sa saiya—bilang sarong mapagpadangat asin mamumuton na magurang na madaling dulukon, bako bilang saro na daing pagmalasakit. Risang-risa ini sa itinukdo ni Jesus sa saiyang mga disipulo na ipamibi. Pinunan niya an modelong pamibi paagi sa mga tataramon na ini: “Ama niyamo.” (Mat. 6:9) Puwede kutang sinabi sato ni Jesus na apudon si Jehova na “Makakamhan sa Gabos,” “Kaglalang,” o “Hading daing sagkod”—gabos iyan angay saka maka-Kasuratan na mga titulo. (Gen. 49:25; Isa. 40:28; 1 Tim. 1:17) Imbes, ginamit ni Jesus an termino na “Ama” na nagpaparisa nin dayupot na relasyon.

4. Paano ta naaraman na gusto ni Jehova na rumani kita sa saiya?

 ⁴ Nasasakitan ka daw na mansayon si Jehova bilang sarong mamumuton na Ama? An iba sato iyo. Puwedeng masakitan kita na masabutan an ideya manungod sa sarong mamumuton na magurang huling bakong arog kaiyan an satong magurang. Nakakaranga nanggad na maaraman na lubos na nasasabutan ni Jehova an satong namamatian! Gusto niya na magin harani sa sato. Iyan an dahilan kaya dinadagka kita kan saiyang Tataramon: “Rumani kamo sa Diyos, asin marani siya sa saindo.” (Sant. 4:8) Namumutan kita ni Jehova, asin sinasabi niya na puwede ta siyang magin pinakamarahay na Ama.

5. Sigun sa Lucas 10:22, paano kita matatabangan ni Jesus na mas maparani ki Jehova?

⁵ Matatabangan kita ni Jesus na mas maparani ki Jehova. Midbid na marhay ni Jesus si Jehova asin perpekto niyang ipinapahiling an Saiyang mga kuwalidad kaya sinabi niya: “An siisay man na nakahiling na sako nakahiling naman sa Ama.” (Juan 14:9) Siring sa matuang tugang, tinutukduan kita ni Jesus kun paano igagalang asin susunudon an satuyang Ama, kun paano lilikayan na mapaanggot Siya, asin kun paano makakamtan an pag-uyon Niya. Pero an paagi nin pamumuhay ni Jesus digdi sa daga lalong nagpahiling kun gurano kabuot asin kamamumuton si Jehova. (Basahon an Lucas 10:22.) Pag-ulayan ta an nagkapirang halimbawa.

6. Magtao nin mga halimbawa kun paano dinangog ni Jehova si Jesus.

⁶ Dinadangog ni Jehova an saiyang mga aki. Pag-isipan kun paano dinangog ni Jehova an saiyang panganay na Aki. Siguradong dinangog ni Jehova an dakul na pamibi kan saiyang Aki kan ini nasa daga. (Luc. 5:16) Dinangog niya an pamibi ni Jesus manungod sa magabat na mga desisyon, arog kan magpili siya nin 12 apostol. (Luc. 6:12, 13) Dinangog man ni Jehova an pamibi ni Jesus kan grabe an kapurisawan kaini. Kan madali na si Jesus na trayduron, udok sa puso siyang namibi sa saiyang Ama manungod sa masakit na pagbalo na kaipuhan niyang agihan. Dai sana dinangog ni Jehova an pamibi ni Jesus kundi nagsugo man siya nin sarong anghel para pakusugon an Saiyang namumutan na Aki.—Luc. 22:41-44.

7. Ano an dapat na mamatian ta sa pakaaram na dinadangog ni Jehova an satong mga pamibi?

 ⁷ Ngunyan, padagos na dinadangog ni Jehova an mga pamibi ka saiyang mga lingkod, asin sinisimbag niya sinda sa tamang panahon asin sa pinakamarahay na paagi. (Sal. 116:1, 2) Pag-isipan kun paano ini naeksperyensiyahan mismo kan sarong sister sa India. Nag-agi siya nin grabeng problema sa emosyon, asin udok niyang ipinamibi iyan ki Jehova. Nagsurat siya: “An Mayo 2019 na JW Broadcasting^® program manungod sa kun paano aatubangon an paghadit asin kapurisawan tamang-tama nanggad sako. Simbag iyan sa sakong mga pamibi.”

8. Sa anong mga paagi ipinahiling ni Jehova na namumutan niya si Jesus?

⁸ Kun paanong namutan ni Jehova si Jesus asin nagmalasakit sa saiya, durante kan saiyang masakit na asignasyon digdi sa daga, namumutan man niya kita asin nagmamalasakit siya sa sato. (Juan 5:20) Itinao niya an gabos na espirituwal, emosyonal, asin pisikal na pangangaipo ni Jesus. Asin ipinahayag ni Jehova an saiyang pagkamuot asin pag-uyon sa saiyang Aki. (Mat. 3:16, 17) Huling pirming nagtitiwala si Jesus sa saiyang mamumuton na Ama sa langit, nungka niyang namati na nagsosolo siya.—Juan 8:16.

9. Ano an pruweba na namumutan kita ni Jehova?

⁹ Arog ni Jesus, gabos kita nakaeksperyensiya na nin dakul na kapahayagan nin pagkamuot ni Jehova. Isipa na sana: Irinani kita ni Jehova sa saiya asin itinao niya sa sato an sarong mamumuton saka nagkakasararong espirituwal na pamilya para magin maugma kita asin para matabangan kita sa satuyang emosyonal na mga pangangaipo. (Juan 6:44) Tinatawan man kita ni Jehova nin dagos-dagos na suplay nin nakakapakusog na espirituwal na kakanon. Asin tinatabangan pa ngani niya kita sa satong materyal na mga pangangaipo sa aroaldaw. (Mat. 6:31, 32) Mantang hinuhurop-hurop ta an pagkamuot ni Jehova sa sato, nagkukusog man an satong pagkamuot sa saiya.

10. Ano an manunudan ta sa paagi kan pagtratar ni Jehova sa satong mga tugang?

¹⁰ Namumutan ni Jehova an satong mga tugang. Pero tibaad bako pirming pasil sa sato na mamatian asin ipahiling an pagkamuot para sa mga miyembro kan satuyang espirituwal na pamilya. Kun sabagay, magkakalain an satuyang kultura asin dinakulaan. Asin gabos kita nakakagibo nin sala na puwedeng makakulog sa buot asin makapamundo sa iba. Pero, makakakontribwir pa man giraray kita sa pagpakusog kan pagkamuot kan satong espirituwal na pamilya. Paano? Paagi sa pag-arog sa satong Ama sa pagpahiling nin pagkamuot sa satong mga tugang. (Efe. 5:1, 2; 1 Juan 4:19) Hilingon ta kun ano an manunudan ta sa halimbawa ni Jehova.

11. Paano ipinahiling ni Jesus an “mapagpadangat na pagmalasakit” ni Jehova?

¹¹ Si Jehova nagpapahiling nin “mapagpadangat na pagmalasakit.” (Luc. 1:78) An sarong mapagmalasakit na tawo nahahadit pag nahihiling niya na nagsasakit an mga tawo; naghahanap siya nin mga paagi para matabangan asin maranga an iba. An paagi nin pagtratar ni Jesus sa mga tawo nagpapahiling na inarog niya an pagmalasakit ni Jehova sa sainda. (Juan 5:19) Sa sarong pagkakataon, kan mahiling ni Jesus an dakul na tawo “nahirak siya sa sainda, huli ta naanitan sinda asin napabayaan arog nin mga karnero na daing pastor.” (Mat. 9:36) An pagmalasakit ni Jesus bako lang sagkod sa pagmati niya. Pinaumayan niya an mga may hilang asin nagtao nin kaginhawahan sa mga “nagpapagal saka nagagabatan.”—Mat. 11:28-30; 14:14.

12. Magtao nin halimbawa kun paano kita makakapahiling nin pagmalasakit.

¹² Bago kita makapagpahiling nin pagmalasakit sa mga tugang ta, kaipuhan ta ngunang ikonsiderar kun anong mga kadipisilan an inaagihan ninda. Halimbawa, an sarong sister tibaad igwa nin malalang hilang. Dai man niya pigpaparapangistorya  iyan, pero posibleng marhay na papahalagahan niya an ano man na praktikal na tabang. Paano niya inaasikaso an pisikal na mga pangangaipo kan saiyang pamilya? Maugma daw niyang aakuon an simpleng tabang sa pagpreparar nin kakanon o paglinig kan harong? An sarong brother tibaad nawaran nin trabaho. An pagtao daw nin dikit na tabang na kuwarta, na tibaad dai na kaipuhan sabihon kun kiisay hali, makakatabang sa saiya sagkod sa makahanap siya nin bagong trabaho?

13-14. Paano kita magigin bukas-palad arog ni Jehova?

¹³ Si Jehova bukas-palad. (Mat. 5:45) Dai ta kaipuhan na halaton an mga tugang na maghagad nin tabang sato bago kita magpahiling nin pagmalasakit. Arog ni Jehova, puwede kitang gumibo nin paagi para tumabang. Aroaldaw, pinapasirang niya an saldang para sato dawa dai ta iyan hinahagad! Asin an gabos nakikinabang sa init kan saldang, bako sana an mga mapagpasalamat. Mauyon ka daw na an pagtao ni Jehova kan satong mga pangangaipo kapahayagan kan pagkamuot niya sa sato? Namumutan ta nanggad si Jehova huli ta siya mabuot asin bukas-palad!

¹⁴ Bilang pag-arog sa saindang Ama sa langit, dakul sa mga tugang niyato an naggigibo nin paagi para ipahiling an pagigin bukas-palad. Halimbawa kan 2013, an Super Typhoon Haiyan (Yolanda) nagdara nin grabeng destroso sa Pilipinas. Dakul na tugang an nawaran nin harong asin mga pagsadiri. Pero tulos-tulos sindang tinabangan kan saindang espirituwal na pamilya hali sa bilog na kinaban. Dakul an nagtao nin donasyon na kuwarta o nagpartisipar sa dakulang programa ni pagtugdok, na huli kaiyan haros 750 harong an nahirahay o naitugdok giraray sa laog sana nin mayo pang sarong taon! Sa panahon kan COVID-19 na pandemya, naghinguwang marhay an mga Saksi para tabangan an saindang mga tugang. Pag alisto kita na tabangan an satong espirituwal na pamilya, ipinapahiling ta sa sainda na namumutan ta sinda.

15-16. Sigun sa Lucas 6:36, ano an importanteng paagi na maaarog ta an satuyang Ama sa langit?

¹⁵ Si Jehova mahihirakon asin mapagpatawad. (Basahon an Lucas 6:36.) Aroaldaw tang naeeksperyensiyahan an pagkahirak kan satong Ama sa langit. (Sal. 103:10-14) An mga parasunod ni Jesus bakong perpekto; pero nagin siyang mahihirakon asin mapagpatawad. Andam pa ngani  siya na isakripisyo an saiyang buhay para mapatawad an satong mga kasalan. (1 Juan 2:1, 2) Dai ka daw napaparani ki Jehova asin ki Jesus huli sa saindang pagigin mahihirakon asin mapagpatawad?

¹⁶ Napapakusog ta an bugkos nin pagkamuot sa satong espirituwal na pamilya pag kita “lubos na nagpapatinarawadan.” (Efe. 4:32) Siyempre, kun minsan masakiton magpatawad, kaya kaipuhan tang pagmaigutan iyan. Sinabi nin sarong sister na an artikulo sa Torrengbantayan na “Lubos na Magpatarawadtawadan” nakatabang sa saiya na magibo iyan. * Nagsurat siya: “An pag-adal sa artikulong ini nagtao sako nin bago, saka mas positibong pagmansay manungod sa bagay na iyan. Ipinaliwanag kaiyan na an pagigin andam na magpatawad dai nangangahulugan na inuuyunan mo an saindang salang paggawi o na pinapaluwas mo na dai iyan nakakakulog. Kundi, an pagpapatawad nangangahulugan na hahalion mo an ano man na paghinanakit huli sa nagibong mga sala asin papagdanayon mo an saimong katuninungan.” Pag lubos tang pinapatawad an satong mga tugang, ipinapahiling ta na namumutan ta sinda asin na inaarog ta an satuyang Ama, si Jehova.

17. Sigun sa Mateo 5:16, paano ta matatawan nin onra an satong Ama sa langit?

¹⁷ Sarong dakulang pribilehiyo na mapabilang sa sarong nagkakaminuruutan na internasyonal na pamilya. Gusto ta na umiba sa sato an pinakadakul na tawong posible para magsamba sa satuyang Diyos. Kaya dapat na mag-ingat kita na dai makagibo nin ano man na makakaraot sa reputasyon kan banwaan ni Jehova o kan satong Ama sa langit. Pinagmamaigutan ta na gumawi sa paagi na makakadagka sa mga tawo na magkainteres sa maugmang bareta.—Basahon an Mateo 5:16.

18. Ano an makakatabang sato na makapaghulit nin daing takot?

¹⁸ Kun minsan, tibaad menuson kita kan iba o persegiron pa ngani huli sa pagsunod niyato sa satong Ama sa langit. Paano kun makamati kita nin takot pag ipinapakipag-ulay ta sa iba an manungod sa satong mga tinutubod? Makakapagtiwala kita na tatabangan kita ni Jehova asin kan saiyang Aki. Inasigurar ni Jesus an saiyang mga  disipulo na dai ninda kaipuhan na mahadit kun paano sinda mataram o kun ano an saindang sasabihon. Taano man? “An itataram nindo itatao sa saindo sa oras na iyan,” an paliwanag ni Jesus, “dahil bako sana kamo an mataram, kundi an espiritu kan saindong Ama an mataram paagi sa saindo.”—Mat. 10:19, 20.

19. Magtao nin halimbawa nin saro na nakapagpatotoo nin may kusog nin buot.

¹⁹ Isip-isipa an halimbawa ni Robert. Kaidto, kan bago pa sana siyang tinutukduan sa Bibliya asin dikit pa sana an aram sa Bibliya, uminatubang siya sa sarong korte militar sa South Africa. Kusog-buot niyang ipinaliwanag sa korte na gusto niyang magdanay na neutral huling namumutan niya an saiyang Kristiyanong mga tugang. Pinahalagahan niyang marhay an saiyang lugar sa satong espirituwal na pamilya! “Si’say an saimong mga tugang?” an biglang ihinapot kan huwes. Dai inasahan ni Robert an hapot na iyan, pero naisip niya tulos an teksto kan aldaw na idto. Iyan an Mateo 12:50: “An siisay man na naggigibo kan kabutan kan sakong Ama na nasa langit, siya an sakuyang tugang na lalaki saka tugang na babayi asin ina.” Dawa ngani si Robert bago pa sanang tinutukduan sa Bibliya, tinabangan siya kan espiritu ni Jehova na masimbag an hapot na iyan asin an iba pang dai inaasahan na mga hapot. Siguradong ugmahon si Jehova ki Robert! Asin ugmahon man si Jehova sa sato pag nagtitiwala kita sa saiya tanganing kusog-buot na makapagpatotoo sa masakit na mga sitwasyon.

20. Ano an dapat na magin determinado tang gibuhon? (Juan 17:11, 15)

²⁰ Lugod na padagos tang pahalagahan na marhay an bendisyon na mapabilang sa sarong nagkakaminuruutan na espirituwal na pamilya. Igwa kita kan pinakamarahay na Ama saka nin dakulon na tugang na namumuot sa sato. Dapat na pirmi niyatong ipagpasalamat iyan. Hinihinguwa ni Satanas asin kan saiyang maraot na mga parasunod na magkaigwa kita nin pagduda sa pagkamuot kan satong Ama sa langit asin rauton an pagkasararo na igwa kita. Alagad namibi si Jesus para sa sato, na hinahagad sa saiyang Ama na bantayan kita tanganing an satuyang pamilya magdanay na nagkakasararo. (Basahon an Juan 17:11, 15.) Sinisimbag ni Jehova an pamibi na iyan. Arog ni Jesus, lugod na nungka niyatong pagdudahan an pagkamuot asin suporta kan satong Ama sa langit. Lugod na magin determinado kita na padagos na magin mas harani pa sa satong espirituwal na pamilya.