1. Cosa relacion el puede tene el maga gente con Jehova?

EL FAMILIA del maga siervo de Jehova ta inclui con Jesus, “el primero na entero creacion,” y el millones de maga angel. (Col. 1:15; Sal. 103:20) Cuando taqui si Jesus na tierra, ya habla le que el maga fiel gente puede llama con Jehova como el diila Tata. Mientras tan cuento si Jesus con el de suyu maga dicipulo, ya refiri le con Jehova como “dimio Tata y de ustedes Tata.” (Juan 20:17) Y cuando ya dedica kita con el diaton vida con Jehova y ya bautiza, ya queda kita parte del un amable familia de maga hermano y hermana.—Mar. 10:29, 30.

2. Cosa kita hay considera na este articulo?

² El cuanto tan dificil mira con Jehova como un amable Tata. El otro posible no sabe dale mira amor na diila maga hermano y hermana. Na este articulo, hay considera kita si paquemodo si Jesus ta ayuda kanaton para mira con Jehova como un amable Tata, con quien kita puede queda cerca. Hay aprende tambien kita si paquemodo kita puede imita con Jehova na manera si paquemodo kita ta trata con el diaton maga hermano y hermana.

3. Paquemodo el modelo rezo puede ayuda kanaton queda mas cerca con Jehova?

³ Un amable Tata si Jehova. Quierre si Jesus que mira kita con Jehova igual si paquemodo le ta mira con Ele—como un bueno y amable mayores con quien facil atraca y gendeh como un persona quien gendeh bueno y ta habla lang kanaton si cosa hace. Ya dale este mira si Jesus cuando ya enseña le con el de suyu maga dicipulo si paquemodo reza. Ya principia le con el modelo rezo na maga palabra: “Tata diamon.” (Mat. 6:9) Puede era enseña si Jesus kanaton que llama con Jehova “el  Todopoderoso,” “el Creador” o “el Rey eterno”—maga justo titulo que ya menciona el Biblia. (Gen. 49:25; Isa. 40:28; 1 Tim. 1:17) Sino, ya habla si Jesus kanaton que llama con Jehova “Tata.”

4. Porque kita sabe que quierre si Jehova que queda kita cerca con ele?

⁴ Tan dificil ba tu mira con Jehova como un amable Tata? El cuanto kanaton ansina. Si el diaton tata gendeh bueno, posible gendeh facil para kanaton imagina un tata quien ta ama kanaton. Ta dale gayot kanaton comforta para sabe que si Jehova ta entende con diaton sentido! Quierre le queda cerca kanaton. Poreso, el de suyu Palabra ta anima kanaton: “Atraca con Dios y Ele ay atraca con ustedes.” (Sant. 4:8) Ta ama kanaton si Jehova y ta habla le kanaton que hay queda le el de con todo buen Tata que puede kita tene.

5. Asegun na Lucas 10:22, paquemodo si Jesus puede ayuda kanaton para queda mas cerca con Jehova?

⁵ Puede si Jesus ayuda kanaton que queda mas cerca con Jehova. Bien conoce si Jesus con Jehova y ya puede gayot le imita con el De Suyu maga calidad poreso ya habla le: “Quien ya mira conmigo, ya mira ya tamen con el Tata.” (Juan 14:9) Como un mayor hermano, ta enseña si Jesus kanaton si paquemodo respeta y obedece con el diaton Tata, si paquemodo evita hace triste con Ele y si paquemodo gana con el De Suyu favor. Pero, el vida de Jesus aqui na tierra ya ayuda kanaton para entende especialmente si paquemodo de bueno y amable si Jehova. (Le con el Lucas 10:22.) Considera kita con el cuanto ejemplo.

6. Dale maga ejemplo si paquemodo si Jehova ya oi con Jesus.

⁶ Ta oi si Jehova con el de suyu maga anak. Considera con el manera si paquemodo si Jehova ya oi con el de suyu primer Anak. Asigurao, ya oi si Jehova con el manada rezo del de suyu Anak cuando taqui este na tierra. (Luc. 5:16) Ya oi le el rezo de Jesus acerca na maga importante decision, igual cuando ya iscuji le con el de suyu 12 apostoles. (Luc. 6:12, 13) Ya oi tambien si Jehova con el rezo de Jesus cuando bien malingasa le. Antes con ele traiciona, ya reza si Jesus con el de suyu Tata  acerca na maga cosas que cerca ya sucede con ele. Nuay lang si Jehova oi con el rezo de Jesus sino ya imbia tambien le un angel para hace fuerte con el de suyu Anak con quien le ta ama.—Luc. 22:41-44.

7. Cosa kita debe sinti si sabe kita que ta oi si Jehova con el diaton maga rezo?

⁷ Ahora, ta continua si Jehova oi con el maga rezo del de suyu maga siervo y ta contesta le kanila na justo tiempo y na de con todo buen manera que posible. (Sal. 116:1, 2) Considera si paquemodo el un hermana na India personal ya experiencia con este. Tiene le grabe problema na emocion y ya reza con Jehova acerca con ese. Ya escribi le: “El Mayo 2019 JW Broadcasting^® program amo acerca si paquemodo enfrenta con el lingasa y amo gayot quel el cosa yo necesita. Un contestacion se na de mio maga rezo.”

8. Na cosa maga manera ya dale mira si Jehova que ta ama le con Jesus?

⁸ Ta ama kanaton si Jehova y ta cuida kanaton, igual si paquemodo le ya ama y ya cuida con Jesus durante el de suyu dificil assignment aqui na tierra. (Juan 5:20) Ya dale le con Jesus el todo de suyu maga necesidad na espiritual, emocional y fisical. Y ya habla si Jehova con el de suyu Anak que ta ama y alegre le con ele. (Mat. 3:16, 17) Sabe si Jesus que el de suyu amable Tata na cielo pirmi junto con ele y ta ayuda con ele poreso gendeh le ta sinti solo.—Juan 8:16.

9. Cosa evidencia kita tiene que ta ama kanaton si Jehova?

⁹ Igual con Jesus, todo kita ya experiencia con el amor de Jehova na manada manera. Pensa este: Ya hace si Jehova kanaton cerca con ele y ya dale kanaton un amable y unido espiritual familia quien ta hace kanaton alegre y ta anima kanaton si triste kita. (Juan 6:44) Ya dale tambien si Jehova con el todo cosa kita necesita para esta fuerte el diaton fe. Y gane, ta ayuda le kanaton na diaton maga material necesidad cada dia. (Mat. 6:31, 32) Si pensa kita acerca na amor de Jehova para kanaton, el diaton amor para con ele hay queda hondo.

10. Cosa kita puede aprende na manera si paquemodo si Jehova ta trata con el diaton maga hermano y hermana?

¹⁰ Ta ama si Jehova con el diaton maga hermano y hermana. Pero posible, gendeh facil para kanaton dale mira amor na maga miembro del diaton espiritual familia. Tiene vez, dificil se para hace por causa na diaton diferente cultura o si paquemodo kita ya engranda. Y todo kita tan kamali que ta puede hace consumi y triste con otro. Maskin pa ansina, todo kita puede hace fuerte con el amor na diaton espiritual familia. Paquemodo? Si imita kita si paquemodo el diaton Tata ta dale mira amor con el diaton maga hermano y hermana. (Ef. 5:1, 2; 1 Juan 4:19) Mira kita si cosa kita puede aprende na ejemplo de Jehova.

11. Paquemodo si Jesus ya imita con el grande compasion de Jehova?

¹¹ Si Jehova ta dale mira “bien grande lastima” o grande compasion. (Luc. 1:78) El un persona quien tiene compasion ta sinti triste si ta puede le mira que ta sufri el otro. Ta busca le manera para dale ayuda y comforta. Na manera si paquemodo le ya trata con el maga gente, ya imita si Jesus con el compasion de Jehova para kanila. (Juan 5:19) Na un ocasion cuando ya puede mira si Jesus con el un grupo de maga gente, “ya tene Le lastima canila cay cansao sila y desanimao, igual sila como maga carnero noay pastor.” (Mat. 9:36) Nuay lang le sinti compasion para kanila. Sino, ya cura le con el maga enfermo y ya ayuda con aquellos “quien ta sufri maga pesao tormento.”—Mat. 11:28-30, El Nuevo Testamento; 14:14.

12. Dale ejemplo si paquemodo kita puede dale mira compasion.

 ¹² Antes kita puede dale mira compasion na diaton maga hermano y hermana, necesita kita sabe si cosa maga problema sila ta enfrenta. Por ejemplo, el un hermana posible tiene grabe problema na salud. Gendeh este ele ta habla con otro pero posible alegre le ricibi cuanto practical ayuda. Ta puede ba le dale con el maga necesidad del de suyu familia? Puede ba kita ayuda prepara comida o limpia con el de suyu casa? O el un hermano posible ya queda nuay trabajo. Puede ba kita dale diutay cantidad de sen, posible maskin gendeh kita habla que estaba este kanaton, hasta puede le incuntra nuevo trabajo?

13-14. Paquemodo kita queda bondadoso igual con Jehova?

¹³ Bondadoso si Jehova. (Mat. 5:45) Gendeh mas kita debe espera que el diaton maga hermano y hermana hay pidi ayuda kanaton antes kita dale mira compasion. Igual con Jehova, puede kita dale mira iniciativo. Ta dale le kanaton el sol cada dia maskin gendeh kita ta pidi con ese! Y ta puede beneficia el todo con el calor del sol, gendeh lang con aquellos sabe rindi gracias. Gendeh ba tu man uyun que si Jehova ta dale mira que ta ama le kanaton cay ta dale le con el cosa kita necesita? Ta ama gayot kita con Jehova cay ele bien bueno y bondadoso!

¹⁴ El diaton maga hermano y hermana ta imita con Jehova y bondadoso con otro. Por ejemplo, del 2013, el Super Typhoon Haiyan ya causa grande destrozo na Pilipinas. Mucho del maga hermano y hermana ya perde el diila casa y propiedad. Pero, el diila espiritual familia na entero mundo ya ayuda dayun kanila. Mucho el ya dale sen o ya ayuda compone o construi con el cerca 750 casa que nuay pa gane llega un año. Durante el COVID-19 pandemic, el maga Testigo ya trabaja para ayuda con el diila maga hermano y hermana. Si ayuda dayun kita con el diaton espiritual familia, ta dale kita mira que ta ama kita kanila.

15-16. Asegun na Lucas 6:36, cosa el un importante manera que puede kita imita con el diaton Tata na cielo?

¹⁵ Lastimoso si Jehova y ta perdona. (Le con el Lucas 6:36.) Todo el dia kita ta experiencia con el lastima del diaton Tata na cielo. (Sal.  103:10-14) Imperfecto el maga siguidores de Jesus pero ya dale le mira lastima y perdon kanila. Gane, preparao le sacrificia de suyu vida para puede perdona con el diaton pecado. (1 Juan 2:1, 2) El perdon y lastima que ya dale mira si Jehova y Jesus mas ta hace kanaton cerca kanila.

¹⁶ Ta hace kita fuerte el diaton amor con el diaton espiritual familia si preparao kita “perdona” kanila. (Ef. 4:32) Siempre, dificil tiene vez perdona con otro poreso necesita kita hace esfuerzo. El un hermana ya sinti que el articulo na Watchtower “Forgive One Another Freely” ya ayuda con ele para hace se. * Ele ya escribi: “Este articulo ya ayuda conmigo para entende que tiene beneficio si ta perdona yo con otro. Este ta explica que si ta perdona tu con otro, gendeh se quierre decir que ta pensa tu que justo el cosa sila ya hace o nuay este hace sinti duele contigo. Sino, quierre decir de este que gendeh mas tu rabiao kanila y tiene ya tu paz na pensamiento.” Si ta perdona kita con el diaton maga hermano y hermana, ta dale kita mira que ta ama kita kanila y ta imita con el diaton Tata, si Jehova.

17. Asegun na Mateo 5:16, paquemodo kita puede honra con el diaton Tata na cielo?

¹⁷ Un grande privilegio que parte kita del un amable familia na entero mundo. Quierre kita que mas manada gente el man junto kanaton adora con el diaton Dios, si posible. Poreso, debe kita queda con cuidao que gendeh kita causa con el maga gente para pensa malo acerca con Jehova o con el de suyu maga siervo. Ta pricura kita actua na manera que el maga gente hay queda interesao na buen noticia.—Le con el Mateo 5:16.

18. Cosa kanaton puede ayuda para predica con coraje?

¹⁸ Tiene vez, posible el cuanto hay insulta o persigui pa gane kanaton cay ta obedece kita con el diaton Tata na cielo. Cosa kita puede hace si ta nervia kita converza con otro acerca na diaton maga creencia? Puede kita asigura que si Jehova y el de suyu Anak hay ayuda kanaton. Si Jesus ya asigura con el de suyu  maga dicipulo que gendeh sila debe man lingasa acerca si paquemodo o cosa sila habla. Porque? “Cay na ese hora ay manda yo con [ustedes] sabe si cosa ustedes ay habla,” ya explica si Jesus, “cay gendeh gayot ustedes el quien ay comversa, sino el Espiritu del de ustedes Tata el quien ay comversa por medio de ustedes.”—Mat. 10:19, 20.

19. Dale ejemplo del un persona quien ya predica con coraje.

¹⁹ Considera con el ejemplo de Robert de South Africa. Del antes, cuando nuevo pa lang le ta aprende y poco pa lang el de suyu saber na Biblia, necesita le anda na corte y explica na juez si porque gendeh le puede queda soldao. Con coraje le ya explica na corte que quierre le esta neutral por causa na de suyu amor para na de suyu maga hermano. Ya aprecia le con el de suyu papel na diaton espiritual familia! “Quien el de tuyu maga hermano?” ya pregunta el juez. Nuay expecta si Robert con ese pregunta pero ya puede dayun le acorda con el texto de aquel dia que puede le na Mateo 12:50: “Todo quien ta hace el voluntad del dimio Tata na cielo amo el dimio maga hermano, maga hermana, y mi nana.” Maskin pa un nuevo Bible study pa lang si Robert, el espiritu de Jehova ya ayuda con ele para contesta con aquel pregunta y con el cuanto otro pregunta que nuay le expecta. Asigurao bien proud gayot si Jehova con Robert! Y proud tambien kanaton si Jehova si confia kita con ele si ta predica kita con coraje na maga dificil situacion.

20. Cosa kita debe determinao hace? (Juan 17:11, 15)

²⁰ Ojala, hay continua kita aprecia con el bendicion que queda parte del un amable espiritual familia. Tiene kita el de con todo buen Tata y manada maga hermano y hermana quien ta ama kanaton. Gendeh kita debe hace no vale nada con este maga cosas. Si Satanas y el de suyu maga siguidores ta pricura causa kanaton para man duda que gendeh kanaton ta ama el diaton Tata na cielo y ta pricura quita con el unidad que tiene kita. Pero, ya reza si Jesus para na diaton bien y ya pidi con el de suyu Tata que vicia kanaton para el diaton familia hay esta unido. (Le con el Juan 17:11, 15.) Ta contesta si Jehova con ese rezo. Igual con Jesus, ojala gendeh kita man duda con el amor y suporta del diaton Tata na cielo. Queda kita determinao que continua queda mas cerca con el diaton espiritual familia.