1. Unsang relasyon ang puwedeng mabatonan sa matinumanong mga tawo uban kang Jehova?

ANG pamilya sa mga magsisimba ni Jehova naglakip kang Jesus, “ang panganay sa tanang kalalangan,” ug sa daghan kaayong anghel. (Col. 1:15; Sal. 103:20) Sa dinhi pa si Jesus sa yuta, iyang gipakita nga puwedeng isipon sa matinumanong mga tawo si Jehova ingong ilang Amahan. Sa dihang nakigsulti si Jesus sa iyang mga tinun-an, iyang gitawag si Jehova ingong ‘akong Amahan ug inyong Amahan.’ (Juan 20:17) Ug sa dihang ipahinungod nato ang atong kaugalingon kang Jehova ug magpabawtismo, mahimo tang bahin sa usa ka mahigugmaong espirituwal nga pamilya.—Mar. 10:29, 30.

2. Unsay atong hisgotan niining artikuloha?

² Ang pipila malisdan sa pag-isip kang Jehova ingong mahigugmaong Amahan. Ang uban dili tingali kamao kon unsaon pagpakitag gugma sa ilang mga igsoon sa pagtuo. Niining artikuloha, atong hisgotan kon giunsa ta pagtabang ni Jesus sa pag-isip kang Jehova ingong mahigugmaong Amahan nga puwede natong masuod. Masayran sab nato ang mga paagi nga masundog nato si Jehova sa atong pagtratar sa atong mga igsoon sa pagtuo.

3. Sa unsang paagi ang modelong pag-ampo mas makapasuod nato kang Jehova?

³ Si Jehova mahigugmaon nga Amahan. Gusto ni Jesus nga isipon nato si Jehova sama sa iyang pag-isip Kaniya—ingong mabination ug mahigugmaong ginikanan nga daling duolon, dili ingong way pagbati nga persona nga igo lang mosulti kon unsay angay natong buhaton. Makita ni sa pag-ampo nga gitudlo ni Jesus sa iyang mga tinun-an. Gisugdan niya ang modelong pag-ampo pinaagi sa mga pulong: “Amahan namo.” (Mat. 6:9) Puwede unta tang sultihan ni Jesus nga tawgon si Jehova ingong “ang  Labing Gamhanan,” “ang Maglalalang,” o “Hari nga walay kataposan”—nga pulos haom ug binase sa Bibliya nga mga titulo. (Gen. 49:25; Isa. 40:28; 1 Tim. 1:17) Pero gitudloan ta ni Jesus nga tawgon si Jehova ingong “Amahan.”

4. Nganong nahibalo ta nga gusto ni Jehova nga masuod ta kaniya?

⁴ Nalisdan ka ba sa pag-isip kang Jehova ingong mahigugmaong Amahan? Ang pipila kanato nalisdan. Kon ang atong papa dili mahigugmaon, malisdan tingali ta sa pag-imadyin kang Jehova ingong mahigugmaon nga Amahan. Makapahupay gyod ang pagkahibalo nga si Jehova nakasabot pag-ayo sa atong gibati! Gusto niya nga masuod ta kaniya. Busa ang iyang Pulong nag-awhag kanato: “Duol sa Diyos, ug siya moduol kaninyo.” (Sant. 4:8) Gimahal ta ni Jehova, ug siya nag-ingon nga siya ang kinamaayohang Amahan nga puwede natong mabatonan.

5. Sumala sa Lucas 10:22, sa unsang paagi si Jesus makatabang nato nga mas masuod kang Jehova?

⁵ Si Jesus makatabang nato nga mas masuod kang Jehova. Siya nakaila pag-ayo kang Jehova ug hingpit niyang gisundog ang Iyang mga hiyas mao nga siya miingon: “Kadtong nakakita kanako nakakita usab sa Amahan.” (Juan 14:9) Samag atong magulang, gitudloan ta ni Jesus kon unsaon pagtahod ug pagsunod sa atong Amahan, kon unsaon nga dili Siya mapasuko, ug kon unsaon nga mabatonan ang Iyang pag-uyon. Pero ang tibuok kinabuhi ni Jesus dinhi sa yuta ilabinang nagpakita kon unsa ka buotan ug ka mahigugmaon si Jehova. (Basaha ang Lucas 10:22.) Konsiderahon nato ang pipila ka pananglitan.

6. Paghatag ug mga pananglitan kon sa unsang paagi si Jehova naminaw kang Jesus.

⁶ Si Jehova maminaw sa iyang mga anak. Tagda kon sa unsang paagi si Jehova naminaw sa iyang panganay nga Anak. Seguradong gidungog ni Jehova ang daghang pag-ampo sa Iyang Anak sa dinhi pa siya sa yuta. (Luc. 5:16) Gidungog niya ang pag-ampo ni Jesus bahin sa importanteng mga desisyon, sama niadtong gipili ni Jesus ang iyang 12 ka apostoles. (Luc. 6:12, 13) Sa dihang nabalaka kaayo si Jesus, gidungog sab ni Jehova ang iyang pag-ampo. Ug sa  hapit nang budhian si Jesus, siya kinasingkasing nga nag-ampo sa iyang Amahan bahin sa lisod nga pagsulay nga iyang maagoman. Gidungog ni Jehova ang pag-ampo ni Jesus, ug nagpadala pa gani Siyag anghel aron palig-onon ang Iyang minahal nga Anak.—Luc. 22:41-44.

7. Unsay atong gibati sa pagkahibalo nga si Jehova maminaw sa atong mga pag-ampo?

⁷ Karon, si Jehova maminaw gihapon sa pag-ampo sa iyang mga alagad, ug tubagon niya sila sa hustong panahon ug sa kinamaayohang paagi. (Sal. 116:1, 2) Tagda kon sa unsang paagi naeksperyensiyahan kini sa usa ka sister sa India. Nag-antos siyag grabeng problema sa emosyon, ug kinasingkasing niya kining giampo kang Jehova. Siya misulat: “Ang Mayo 2019 nga programa sa JW Broadcasting^® bahin sa kon sa unsang paagi maatubang ang kabalaka mao gyoy akong gikinahanglan. Tubag to sa akong mga pag-ampo.”

8. Sa unsang mga paagi gipakita ni Jehova ang iyang gugma kang Jesus?

⁸ Kita gimahal ug giatiman ni Jehova, sama sa iyang gibuhat kang Jesus panahon sa lisod nga asaynment niini sa yuta. (Juan 5:20) Iyang gitagana ang tanang espirituwal, emosyonal, ug pisikal nga panginahanglan ni Jesus. Ug gipahayag gyod ni Jehova nga iyang gimahal ug giuyonan ang iyang Anak. (Mat. 3:16, 17) Kay nahibalo si Jesus nga makasalig siya sa iyang mahigugmaon nga langitnong Amahan, wala gyod siya mobating nag-inusara.—Juan 8:16.

9. Unsay ebidensiya nga gimahal ta ni Jehova?

⁹ Sama kang Jesus, naeksperyensiyahan natong tanan ang gugma ni Jehova sa daghang paagi. Hunahunaa ni: Si Jehova nagkabig nato ug naghatag kanatog mahigugmaon ug nagkahiusang espirituwal nga pamilya aron kita magmalipayon ug aron madasig ta panahon sa kagul-anan. (Juan 6:44) Kanunay sab tang gitagan-an ni Jehova ug makapadasig nga espirituwal nga pagkaon. Ug gitabangan pa gani ta niya nga makabaton sa atong materyal nga mga panginahanglan kada adlaw. (Mat. 6:31, 32) Dihang pamalandongon nato ang gugma ni Jehova kanato, mas molalom ang atong gugma kaniya.

10. Unsay atong makat-onan sa paagi sa pagtratar ni Jehova sa atong mga igsoon?

¹⁰ Gimahal ni Jehova ang atong mga igsoon sa pagtuo. Pero dili tingali kanunayng sayon nga mobati ug mopakitag gugma kanila. Usahay lisod ni kay lainlain tag kultura ug kahimtang nga gidak-an. Ug kitang tanan makahimog sayop, nga makapalagot o makapaguol sa uban. Pero, mapalig-on gihapon nato ang atong gugma sa usag usa. Sa unsang paagi? Pinaagi sa pagsundog sa atong Amahan sa pagpakitag gugma sa atong mga igsoon. (Efe. 5:1, 2; 1 Juan 4:19) Tan-awon nato kon unsay atong makat-onan sa ehemplo ni Jehova.

11. Giunsa pagpakita ni Jesus nga gisundog niya ang “dakong kaluoy” ni Jehova?

¹¹ Si Jehova nagpakitag “dakong kaluoy.” (Luc. 1:78) Ang tawong maluluy-on maguol dihang makita niya nga nag-antos ang uban; mangita siyag mga paagi nga makatabang ug makahupay kanila. Gisundog ni Jesus ang pagkamaluluy-on ni Jehova sa iyang paagi sa pagtratar sa mga tawo. (Juan 5:19) Usa ka higayon niana, dihang nakita ni Jesus ang mga tawo, siya “naluoy kanila kay sila pinanitan ug nagkatibulaag samag mga karnero nga walay magbalantay.” (Mat. 9:36) Gawas nga naluoy si Jesus, milihok sab siya sa pagtabang kanila. Iyang giayo ang mga masakiton ug gipalagsik kadtong “gikapoy ug nabug-atan.”—Mat. 11:28-30; 14:14.

12. Paghatag ug pananglitan kon sa unsang paagi makapakita tag kaluoy.

¹² Una ta makapakitag kaluoy sa mga igsoon, kinahanglan natong hunahunaon kon unsang  mga problema ang ilang giatubang. Pananglitan, ang usa ka sister tingali dunay grabeng sakit. Bisag wala siya magsigeg hisgot bahin sa iyang problema, posibleng maapresyar niya kon dunay motabang niya. Makaatiman pa ba siya sa pisikal nga panginahanglan sa iyang pamilya? Makatabang ba ta niya sa paglutog pagkaon o pagpanghinlo sa iyang balay? O ang usa ka brader tingali nawad-ag trabaho. Makahatag ba tag gamayng kantidad, nga tingali dili magpahibalo nga gikan ni kanato, aron matabangan siya hangtod nga makakita siyag bag-ong trabaho?

13-14. Sa unsang paagi masundog nato ang pagkamahinatagon ni Jehova?

¹³ Si Jehova mahinatagon. (Mat. 5:45) Dili ta angayng maghulat nga ang atong mga igsoon mangayog tabang nato una ta magpakitag kaluoy. Sama kang Jehova, makatabang ta nila bisag wala sila mohangyo. Hunahunaa ra, kada adlaw niyang gipasubang ang adlaw nga dili na ta kinahanglang mohangyo kaniya! Ug ang kainit sa adlaw nakahatag ug kaayohan sa tanan, dili lang niadtong mapasalamaton. Seguradong mouyon ka nga pinaagi sa pagtagana sa atong panginahanglan, gipakita ni Jehova ang iyang gugma kanato. Gimahal gyod nato si Jehova tungod sa iyang pagkamaayo ug pagkamahinatagon!

¹⁴ Ingong pagsundog sa atong langitnong Amahan, daghan sa atong mga igsoon ang nagpakitag pagkamahinatagon. Pananglitan, niadtong 2013, ang Super Typhoon Yolanda nagpahinabog grabeng kadaot sa Pilipinas. Daghan sa atong mga igsoon ang nawad-an sa ilang mga balay ug kabtangan. Pero ang ilang espirituwal nga pamilya sa tibuok kalibotan mitabang dayon nila. Daghan ang miamot ug kuwarta o nakigbahin sa dako kaayong proyekto sa pagpanukod. Tungod niana, wala ra dangtig usa ka tuig, halos 750 ka balay ang naayo o natukod pag-usab! Panahon sa COVID-19 pandemic, ang mga Saksi nagkugi sa pagtabang sa ilang mga igsoon. Kon motabang dayon ta sa atong espirituwal nga pamilya, gipakita nato kanila nga gimahal nato sila.

15-16. Sumala sa Lucas 6:36, unsa ang usa ka importanteng paagi nga masundog nato ang atong langitnong Amahan?

¹⁵ Si Jehova maluluy-on ug mapinasayloon. (Basaha ang Lucas 6:36.) Adlaw-adlaw  natong naeksperyensiyahan ang pagkamaluluy-on sa atong langitnong Amahan. (Sal. 103:10-14) Ang mga sumusunod ni Jesus dili hingpit, pero siya naluoy ug nagpasaylo kanila. Kinabubut-on pa gani niyang gihalad ang iyang kinabuhi aron mapasaylo ang atong mga sala. (1 Juan 2:1, 2) Seguradong mas nasuod ta kang Jehova ug Jesus tungod sa ilang pagkamaluluy-on ug pagkamapinasayloon.

¹⁶ Mapalig-on nato ang atong gugma sa usag usa kon kita “kinasingkasing nga magpasaylo.” (Efe. 4:32) Siyempre, lisod usahay ang pagpasaylo sa uban, busa kinahanglan tang maningkamot. Gibati sa usa ka sister nga ang artikulo sa Bantayanang Torre nga “Kinabubut-on nga Magpasaylo sa Usag Usa” nakatabang gyod niya. * Siya misulat: “Ang pagtuon niining artikuloha nakahatag nakog mas positibong panglantaw sa pagpasaylo. Kini nag-ingon nga ang pagkaandam nga magpasaylo wala magpasabot nga imong gikonsentir ang ilang dili maayong binuhatan o gibalewala ang kadaot nga ipahinabo niini. Hinunoa, imong giwala ang bisan unsang kayugot tungod sa daotang gihimo sa uban ug nagpabiling malinawon.” Kon kinabubut-on tang magpasaylo sa atong mga igsoon, atong gipakita nga gimahal nato sila ug gisundog nato ang atong Amahan, si Jehova.

17. Sumala sa Mateo 5:16, sa unsang paagi mapasidunggan nato ang atong langitnong Amahan?

¹⁷ Dako gyong pribilehiyo nga mahimong bahin sa usa ka mahigugmaong internasyonal nga pamilya. Gusto nato nga mas daghan pa ang moduyog kanato sa pagsimba sa atong Diyos. Busa, angay tang mag-amping nga dili gyod mohimog bisan unsa nga makadaot sa reputasyon sa katawhan ni Jehova o sa atong langitnong Amahan. Maningkamot ta nga mogawi sa paagi nga madani ang mga tawo sa maayong balita.—Basaha ang Mateo 5:16.

18. Unsay makatabang nato nga magmaisogon sa pagsangyaw?

¹⁸ Usahay, ang pipila tingali magbiaybiay o maglutos pa gani nato tungod kay atong gisunod ang atong langitnong Amahan. Unsay  atong mahimo kon mahadlok tang makig-estorya sa uban bahin sa atong pagtuo? Makasalig ta sa tabang ni Jehova ug sa iyang Anak. Gipasaligan ni Jesus ang iyang mga tinun-an nga dili sila angayng mabalaka kon unsay isulti o kon unsaon pagsulti. Ngano? “Makadawat mog tabang nianang higayona,” miingon si Jesus, “kay dili lang kamo ang mosulti kondili ang espiritu sa inyong Amahan maoy mosulti pinaagi kaninyo.”—Mat. 10:19, 20.

19. Paghatag ug pananglitan niadtong nagsangyaw nga maisogon.

¹⁹ Konsideraha ang pananglitan ni Robert. Kaniadto, sa bag-o pa siyang nagtuon sa Bibliya ug gamay pag nahibaloan, kinahanglan siyang moatubang sa usa ka korte militar sa South Africa. Maisogon niyang gipatin-aw sa korte nga gusto niyang magpabiling neyutral kay gimahal niya ang iyang mga igsoon sa pagtuo. Gipabilhan niya ang iyang espirituwal nga pamilya! “Kinsa ang imong mga igsoon?” kalit nga nangutana ang huwes. Wala damha ni Robert ang maong pangutana. Pero misantop dayon sa iyang hunahuna ang teksto nianang adlawa, ang Mateo 12:50 nga nag-ingon: “Si bisan kinsa nga nagabuhat sa kabubut-on sa akong Amahan nga anaa sa langit maoy akong igsoon ug inahan.” Bisag bag-o pa lang nagtuon sa Bibliya si Robert, ang espiritu ni Jehova mitabang niya sa pagtubag niana nga pangutana ug sa uban pang wala damhang pangutana. Seguradong nalipay si Jehova sa gihimo ni Robert! Ug malipay sab si Jehova kon mangayo ta niyag kaisog nga mosangyaw sa lisod nga mga situwasyon.

20. Unsay determinado natong himoon? (Juan 17:11, 15)

²⁰ Hinaot nga padayon natong pabilhan ang pribilehiyo nga nahimo tang bahin sa usa ka mahigugmaong espirituwal nga pamilya. Duna tay kinamaayohang Amahan ug daghang igsoon nga nagmahal kanato. Angay gyod nga kanunay tang magmapasalamaton niana. Si Satanas ug ang iyang daotang mga sumusunod naghimog mga paagi aron magduhaduha ta sa gugma sa atong langitnong Amahan ug mabungkag ang atong panaghiusa. Pero si Jesus nag-ampo alang kanato, nga naghangyo sa atong Amahan nga bantayan ta aron ang atong pamilya magpabiling nahiusa. (Basaha ang Juan 17:11, 15.) Gitubag ni Jehova ang maong pag-ampo. Sama kang Jesus, hinaot nga dili gyod ta magduhaduha sa gugma ug tabang sa atong langitnong Amahan. Hinaot nga magmadeterminado ta nga padayong makigsuod sa atong espirituwal nga pamilya.