1. Ni bata oku abantu b’abesigwa bari kubasa kureba Yehova?

EKA ya Yehova y’abari kumuramya erimu Yesu ari we ‘[emfura] omu byahangirwe byona,’ hamwe na ba marayika. (Kol 1:15; Zab 103:20) Obu Yesu yabire ari omu nsi, akereka ku abantu b’abesigwa bari kubasa kureba Yehova nka Tata wabo. Yesu ari kugamba n’abegi beye, akereka ku Yehova ari ‘Tata weye kandi Ishe wabo.’ (Yoh 20:17) Kandi n’itwe ku turi kweha Yehova, tukabatizibwa, nituba twaba ab’omu ka ya benetata na banyanyazi abari kutukunda.—Mak 10:29, 30.

2. Ni enki eki twaza kushwijuma omuri eki kicweka?

² Abantu nikibagumira kureba Yehova nk’Ishe ori kubakunda. Abandi bo nikibagumira kwereka rukundo benetata na banyanyazi. Omuri eki kicweka, twaza kureba oku Yesu ari kutukwasa kureba Yehova nka Tata ori kutukunda kandi owu turi kubasa kuhika hihi. Nambwenu, twaza kureba oku turi kubasa kutoreza Yehova omu buryo obu turi kutwarizamu benetata na banyanyazi.

3. Ni bata oku eshara y’ecokureberaho eri kutukwasa kuhika hihi ya Yehova?

³ Yehova ni Tata ori kutukunda. Yesu nayenda ngu turebe Yehova nk’oku ari kumureba, ni okugamba ngu tumurebe nk’omuzire ori kutukunda, owu turi kubasa kugambira oku turi kwehurira omu bwire bwona, kandi tutamurebe nk’ensharizi. Eco nikirebecera aha ku Yesu yayegesize abakurasi beye kushaba. Akatandikisa eshara y’ecokureberaho ari kugamba ngu: ‘Tata.’ (Mat 6:9) Yesu akaba ari kubasa kutugambira ngu twete Yehova ‘Owobushoborozibwona,’ ‘Ruhanga,’ ninga shi ‘Mukama otahwaho’ ahakuba gona ni amazina g’ekitinisa agahikire kandi agari omuri Bibuli. (Kut 49:25; Isa 40:28; 1 Tim 1:17) Konka Yesu akagamba ngu twete Yehova ‘Tata.’

4. Ni enki ekiri kutuhamiza ku Yehova ari kwenda ngu tumuhike hihi?

 ⁴ Mbehi nikikugumira kureba Yehova nka Sho ori kukukunda? Abamwe omuri itwe nikitugumira. Nikibasa kutugumira kutekateka ku hariho omuzire ori kutukunda, abazire bitu baba bataratwerekire rukundo. Mazima nikituhumuriza munonga kumanya ku Yehova ari kumanya enyehurira zitu! Nayenda kuba munywani witu. Ni yo nshonga Ekigambo ca Ruhanga kiri kugira ngu: ‘[Muhike] hihi Ruhanga, na we abone [kubahika] hihi.’ (Yak 4:8) Yehova natukunda kandi nayenda kuba Tata witu ori kutukunda kukira abandi bona.

5. Tukuratize ebiri omuri Luka 10:22, ni bata oku Yesu ari kutukwasa kuhika hihi ya Yehova?

⁵ Yesu natukwasa kuhika hihi ya Yehova. Yesu namanya ge Yehova kandi namutoreza omu bwijwire, ni yo nshonga yagizire ngu: ‘Ondebire buri arebire Tata.’ (Yoh 14:9) Nk’oku omwana mukuru ari kwegesa barumuna beye, Yesu na we akatwegesa oku turi kubasa kuha ekitinisa Tata witu kandi tukamworobera, oku turi kubasa kwerinda ebintu ebiri kumushasha, n’ebi turi kubasa kukora ngu atwikirize. Konka ebi Yesu yakozire ari omu nsi nibitwereka ge oku Yehova ari kutukunda n’oku atwinire embabazi. (Shoma omuri Luka 10:22.) Reka turebe ebyokureberaho bimwe.

6. Nitumanya tuta ku Yehova yahurire Yesu?

⁶ Yehova nahurira abana beye. Reba oku Yehova yahurikize Omwana weye w’emfura. Yehova akaba nahurira eshara z’Omwana weye obu yabire ari omu nsi. (Luk 5:16) Yesu ku yabire naza kukora ensharamu z’omugasho akashaba, akaba namuhurira, nk’obu yabire yaza kutorana entumwa 12. (Luk 6:12, 13) Nambwenu Yesu ku yabire ari omu busaasi, Yehova akamuhurira. Yesu ku yabire yaza kugambanirwa, akashaba Ishe aha bikwatirine n’ekigezo eki yabire yaza kubugana. Yehova akahurira Yesu kandi yayohereza marayika ngu aze kugumya Omwana weye owu ari kukunda.—Luk 22:41-44.

7. Ni bata oku turi kwehurira twamanya ku Yehova ari kugarukamu eshara zitu?

⁷ N’eri izoba, Yehova nagumizamu kuhurira eshara z’abahereza beye kandi azigarukamu mu bwire burungi. (Zab 116:1, 2)  Omunyanyazi w’omuri Indiya akacerebera. Akaba nayemereza omutima munonga, rero yashaba Yehova ari kumugambira oku ari kwehurira. Akahandika ati: “Ekiganiro ca Tivi ya JW^® c’Okwakatano 2019 ecabire kiri kugamba aha kwehanganira okwemereza omutima, kikankwasa. Ni Yehova owabire yagarukamu eshara zange.”

8. Ni buha buryo obu Yehova yayerekiremu ku nakunda Yesu?

⁸ Yehova natukunda kandi natufaho nk’oku yakunzire Yesu kandi akamufaho obu yabire ari omu nsi. (Yoh 5:20) Akakwasa Yesu omu by’omwika n’omu nyehurira kandi yamuha eby’omubiri ebi yabire ari kwetenga. Kandi Yehova tararekire kwereka ku nakunda Omwana weye kandi ku namwikiriza. (Mat 3:16, 17) Ahakuba Yesu yabire ari kumanya ku Ishe yabire ari na we, tarehurire ari wenka.—Yoh 8:16.

9. Ni biha bihamya ebiri kwereka ku Yehova ari kutukunda?

⁹ Nka Yesu, twena tukerebera ku Yehova ari kutukunda. Tekateka ahari eki: Yehova akatweyihiriza hihi kandi yatwikiririza kuza omu ka yeye y’eby’omwika ya benetata na banyanyazi abari kutukwasa kushemererwa kandi bakatugumya twaba twine ebizibu by’omu nyehurira. (Yoh 6:44) Natuha ebyokurya byingi by’omwika. Nambwenu natukwasa kubona ebi turi kwetenga by’omubiri. (Mat 6:31, 32) Ku turi kutekateka oku Yehova ari kutukunda, nitukizaho kumukunda.

10. Ni enki eki turi kwegera aha ku Yehova ari kutwariza benetata na banyanyazi?

¹⁰ Yehova nakunda benetata na banyanyazi, konka itwe nikibasa kutugumira kubereka rukundo. Orebire nituba twakurire omu micwe n’embera ebitari kushushana. Kandi twena nitukora enshobe eziri kubasa kushasha abandi kandi zikatuma batashemererwa. Konka na bwo nitubasa kugumya benetata na banyanyazi. Nitubasa kukikora tuta? Nitubasa kukikora turi kutoreza Tata witu omu kwereka rukundo benetata na banyanyazi. (Efe 5:1, 2; 1 Yoh 4:19) Reka turebe eki turi kubasa kwegera aha cokureberaho ca Yehova.

11. Ni bata oku Yesu yayerekire oku Yehova ayine ‘esaasi’?

¹¹ Yehova nayereka ‘esaasi.’ (Luk 1:78) Omuntu oyine esaasi nashasha yareba abandi bari kubonabona kandi agira eki yakora kugira ngu abakwase kandi abahumurize. Yesu akereka oku Yehova ari kufa aha bantu ari kubatwariza ge. (Yoh 5:19) Yesu ku yarebire emitwe y’abantu bingi ‘akabagirira esaasi ahakuba bakaba baburaburirwe, bashobirwe nk’entama ezitine murisa.’ (Mat 9:36) Esaasi za Yesu zikatuma yagira eki yakora. Akatambira abarwire kandi yagaruramu amani ababire ‘baruhire n’abaremerirwe.’—Mat 11:28-30; 14:14.

12. Gamba ecokureberaho ekiri kwereka oku turi kubasa kwereka esaasi?

¹² Mbere y’okwereka ku twinire esaasi benetata na banyanyazi, tushemerire kubanza twamanya ebizibu ebi bari kurabamu. Ecokureberaho: Omunyanyazi nabasa kuba ayeyinire ekizibu c’oburwire. N’obu atari kugambira abandi ekizibu eki ayine, nashemererwa hagira owamukwasa. Mbehi yaba atine amani g’okuha ab’eka yeye ebi bari kwetenga, torikubasa kumukwasa ori kumutecera ebyokurya ninga omu buyonjo? Mwenetata nabasa kuba atacayine omurimo. Mbehi tori kubasa kumuha otusete oturije kumukwasa atakabwine ogundi, konka otamugambire ku ari iwe owatumuha?

13-14. Ni bata oku turi kubasa kuba efura nka Yehova?

¹³ Yehova ni efura. (Mat 5:45) Titushemerire  kutegereza ngu benetata na banyanyazi babanze batushabe ngu tubakwase. Tushemerire kubayamba batakabitushabire. Ni ko oku Yehova ari kukikora. Natujwisiza omushana buri izoba tutagumushabire. Kandi obutagasi bw’omushana nibugasira abantu bona. Mbehi n’iwe tori kwikiriza ku kuba Yehova ari kutuha ebi turi kwetenga ari kuba natwereka ku natukunda? Mazima nitukunda Yehova munonga ahakuba ari efura!

¹⁴ Benetata na banyanyazi bingi nibatoreza Tata witu w’omu iguru bari kwereka abandi obufura. Ecokureberaho: Omu mwaka gwa 2013, omuyaga gushambire ogwayesirwe Haiyan gukacwecereza ebintu byingi omuri Filipini. Benetata na banyanyazi bingi bakaferwa amaju gabo n’ebintu byabo. Konka benetata na banyanyazi b’omu nsi yona bakahika bari kubayamba. Abingi bakahayo esente zabo kandi abandi bayekwatanisa omu murimo g’okushana amaju agari kuhika ahari 750 omu bwire obutari kuhika aha mwaka. Omu bwire bw’endwara ya COVID-19, Abahamya bakakora n’amani kugira ngu bakwase benetata na banyanyazi. Ku turi kugira eki twakora tukakwasa benetata na banyanyazi nituba twayereka ku nitubakunda.

15-16. Tukuratize ebiri omuri Luka 6:36, ni buha buryo burungi obu turi kubasa kutorezamu Tata witu?

¹⁵ Yehova ni omunyambabazi kandi nasaasira. (Shoma omuri Luka 6:36.) Burijo nitwerebera ku Tata witu w’omu iguru ayine embabazi. (Zab 103:10-14) Abakurasi ba Yesu bakaba batahikirire, konka akaba nabereka ku abinire embabazi kandi akabasaasira. Akaba ayetegwire n’okuhayo amagara geye kugira ngu tusaasirwe ebibi byitu. (1 Yoh 2:1, 2) Mazima, ahakuba Yehova na Yesu bari kutwereka embabazi kandi bakatusaasira nikituma twayenda kubahika hihi!

¹⁶ Rukundo eyi turi kukundana nekizaho kweyongera ku turi ‘kusaasirana’ tubyihire aha mutima. (Efe 4:32) Ni amazima kusaasira abandi nikibasa kuguma, konka tushemerire kubyega. Eco omunyanyazi omwe akakikora ku yashomire ekicweka c’omu Munara g’Omurinzi ecabire kiri kugira ngu: “Saasira abandi obyihire aha  mutima.” * Akahandika ati: “Ku nashomire eco kicweka bikankwasa kushoborocera ku nasaasira abandi ari inye owu biri kuyamba. Nkashoborocerwa ku kusaasira abandi kitari kumanyisa ngu nosima enshobe zabo, ninga shi ngu tibakushashire. Ahobwe kusaasira nikimanyisa kutabika enzika ahabw’ebi batushobize kandi tukaguma twine obusinge bw’omu mutima.” Twasaasira benetata na banyanyazi tubyihire aha mutima, nitubereka ku nitubakunda kandi twereka ku nitutoreza Tata witu Yehova.

17. Tukuratize ebiri omuri Matayo 5:16, ni bata oku turi kubasa kuhimbisa Tata witu w’omu iguru?

¹⁷ Nitushemererwa kuba turi omu ka ya Yehova erimu benetata na banyanyazi b’omu nsi yona. Nitwenda ngu abantu bingi bekwatanise n’itwe omu kuramya Ruhanga witu. Obwe rero, titushemerire kukora ekintu cona ekiri kubasa kutuma abantu batekateka kubi ahari Yehova n’abahereza beye. Nitugezaho kwetwara ge kugira ngu abantu bahurire bagira ecetengo c’okwega obutumwa burungi.—Shoma omuri Matayo 5:16.

18. Ni enki ekiri kubasa kutukwasa kuhwa obwoba bw’okuburira?

¹⁸ Hine obu abamwe bari kubasa kututwariza kubi ninga shi batuhiiga ahakuba turi korobera Tata witu w’omu iguru. Mbwenu shi ni enki eki turi kubasa kukora twaba tutinire kuburira abandi ebiri kukwata aha nyikiriza zitu? Tushemerire kwesiga tutari kubanganisa ku Yehova n’Omwana weye barije kutuha obuyambi obu turi kwetenga. Yesu akagambira abegi beye ku babire batashemerire kwemereza omutima aha bi baragambe n’oku barabigambe. Ahabw’enki yabagambire ngu batariyemereza omutima? Akabagira ati: ‘Ahakuba ebi murigamba, muryabihebwa omu mwanya ogo; mumanye ngu ti imwe murigamba, kureka omwika gwa Sho ni go oguribagambisa.’—Mat 10:19, 20.

19. Gamba ecokureberaho c’omuntu owaburire n’obumanzi?

¹⁹ Reba ebyahikire ahari mwenetata Robert. Obu yabire acari omwegi wa Bibuli  kandi ari kumanya bice ahari Bibuli, bakamutwara omu rubanja omu ishengero ry’amahe omuri Afurika y’amashuma. Akagambira abaramuzi ayine obumanzi ku atari kubasa kuza omu mahe aha bwa rukundo eyi ari kukunda benishe. Akaba nashemerererwa kuba omu ka ya Yehova y’eby’omwika! Omuramuzi akahika ari kumubuza ngu: “Benesho ni baha?” Robert akaba atetegwire eco kibuzo, konka akahika ari kwijuka ecahandikirwe c’eryo izoba. Kikaba kiri ec’omuri Matayo 12:50, ahari kugamba hati: ‘Ahabw’okuba omuntu wena, okora ebi Tata ow’omu iguru akunda, ni we murumuna wange, ni we munyanyazi, ni we mawe.’ N’obu Robert yabire ari omwegi wa Bibuli, omwika gwa Yehova gukamukwasa kugarukamu eco kibuzo n’ebindi bibuzo byingi ebi yabire atetegwire. Yehova akashemererwa aha bwa Robert! Nambwenu Yehova nashemererwa ku turi kumushaba obuyambi bw’okutukwasa kuburira twine obumanzi omu mbera zigumire.

20. Ni enki eki tushemerire kumaririra kukora? (Yoh 17:11, 15)

²⁰ Nimureke turebe omugisha ogu twine g’okuba omu ka ya Yehova y’eby’omwika nk’og’omuhendo. Twine Tata ori kutukunda kusinga abandi bazire kandi twine benetata na banyanyazi bingi abari kutukunda. Titushemerire kubareba nk’abatatwinire omugasho. Sitaane n’abakurasi beye nibagezaho kutuma twabanganisa ahari rukundo ya Tata witu w’omu iguru kandi bagezaho kushisha obumwe obu twine. Konka Yesu akatushabira ngu Tata witu w’omu iguru agumizemu kuturinda kugira ngu eka yitu egume erimu obumwe. (Shoma omuri Yohaana 17:11, 15.) Yehova arimu nagarukamu eyo shara. Nka Yesu, nimureke tutaribanganisa ku Yehova ari kutukunda kandi ku ari kutukwasa. Nimureke tumaririre kuguma twine obunywani burungi n’ab’eka yitu y’eby’omwika.