1. Met aramas mi tuppwél ra tongeni kér ngeni Jiowa?

CHÓN án Jiowa we famili, iir kewe mi fel ngeni, a kapachelong Jesus “Nöün we mwänichi,” me ekkewe chónláng. (Kol. 1:15; Kölf. 103:20) Lupwen Jesus a nóm wóón fénúfan, a erá pwe ekkewe aramas mi tuppwél ra tongeni kér ngeni Jiowa, Semer. Atun Jesus a fós ngeni néún kewe chón káé, a erá pwe Jiowa i ‘Semei pwal Sememi.’ (Joh. 20:17) Iwe, lupwen sia fangóló manawach ngeni Jiowa me papatais, sia chóni eú familien Chón Kraist mi tongfengen.​—Mark. 10:29, 30.

2. Met sipwele káé lón ei lesen?

² A áweires ngeni ekkóch ar repwe meefi pwe Jiowa i Semer mi tong. Pwal ekkóch, neman resap silei ifa usun repwe pwári tong ngeni pwiir kewe Chón Kraist. Lón ei lesen, sipwe pwóróus wóón ifa usun Jesus a álisikich ach sipwe meefi pwe Jiowa i Semach mi tong me emén sia tongeni ririéch ngeni. Sipwe pwal káé ifa usun sia tongeni áppirú Jiowa lón féfférúch ngeni pwiich kewe.

3. Ifa usun ewe iótekin ach Samol a álisikich ach sipwe ririéch ngeni Jiowa?

³ Jiowa i emén Sam mi tong. Jesus a mochen ach sipwe silei Jiowa pwe i wesewesen emén sam mi kirekiréch me tong sia tongeni fós ngeni iteitan, esap i emén mi kirikiringaw me soun ékúnéikich. Sia kúna ei me lón án Jesus we iótek a áiti ngeni néún kewe chón káé. A poputááni ewe iótekin ach Samol ren ei kapas: “Semem.” (Mat. 6:9) Jesus a tongeni kér ngeni Jiowa “ewe Kot mi Unusen Manaman,” “ewe King mi nonom tori feilfeilachök,” are ewe Chón Fératá. Meinisin  ekkena itelap seni Paipel, ra fich ngeni Jiowa. (Ken. 49:25; 1 Tim. 1:17; Ais. 40:28) Iwe nge, Jesus a erenikich ach sipwe kér ngeni Jiowa, “Semem.”

4. Pwata sia silei pwe Jiowa a mochen ach sipwe ririéch ngeni?

⁴ A weires ngonuk óm kopwe meefi pwe Jiowa i emén Sam mi tong? A ina usun meefien ekkóch me leich. Ika semach ese kirekiréch ngenikich, epwe weires ach sipwe ekieki usun emén sam mi tongekich. A ifa me oururun ach silei pwe Jiowa a unusen weweiti meefiach! I a mochen ririéch ngenikich. Ina minne, iei met an we Kapas a pesengenikich: “Oupwe arap ngeni Kot, iwe, epwe arap ngenikemi.” (Jas. 4:8) Jiowa a tongekich me a erá pwe i ewe Sam mi múrinné seni meinisin sia tongeni semeni.

5. Me ren Lukas 10:22, ifa usun Jesus a tongeni álisikich le ririéch ngeni Jiowa?

⁵ Jesus a tongeni álisikich ach sipwe ririéch ngeni Jiowa. I a fókkun silefichi Jiowa me áppirúfichi napanapan, ina popun a apasa: “Iö a künaei, a küna Semei.” (Joh. 14:9) Jesus a usun emén pwiich watte mi áiti ngenikich ifa usun sipwe súféliti me álleasochisi Semach we, met mi lamot sipwe féri pwe sipwe apwapwaai i, me ifa usun sipwe nónnóm lón an chen. Nge manawen Jesus wóón fénúfan a ákkáeúin pwáraaló úkúkún watteen án Jiowa kirekiréch me tong. (Álleani Lukas 10:22.) Sipwele ppii ekkóch pwóróus usun.

6. Apwóróusa ekkóch atun Jiowa a aúseling ngeni Jesus.

⁶ Jiowa a aúseling ngeni néún kewe. Nengeni ifa usun a aúseling ngeni Néún we mwánichi. Jiowa a aúseling ngeni ekkewe chómmóng iótek Néún na a eáni atun a nóm wóón fénúfan. (Luk. 5:16) A aúseling ngeni Jesus atun a iótek ngeni usun an kewe kefil mi kkóló aúchean, áwewe chék lupwen a filatá néún kewe 12 aposel. (Luk. 6:12, 13) Jiowa a pwal aúseling ngeni án Jesus kewe iótek atun a nóm lón weires. Me mwen chék án Jutas epwele afangemá Jesus, i a iótek ngeni Jiowa usun ekkewe sóssót epwele fis ngeni. Jiowa ese chék aúseling ngeni  án Jesus iótek, nge a pwal tiinaato emén chónláng an epwe apéchékkúla Néún na mi áchengicheng.​—Luk. 22:41-44.

7. Met meefiom ren óm silei pwe Jiowa a kan aúseling ngeni óm kewe iótek?

⁷ Lón ei fansoun, Jiowa a pwal akkaúseling ngeni án néún kewe aramas iótek, me a pélúweniir lón ewe fansoun mi fich me lón ewe napanap mi fókkun fichiiti ewe chón iótek. (Kölf. 116:1, 2) Emén Chón Kraist fefin lón India a kúna ifa usun Jiowa a pélúweni an kewe iótek. I a riáfféú ren an soun aúrek me a tingormaw ngeni Jiowa lón iótek usun an na osukosuk. Iei met a apasa: “Ewe JW Broadcasting^® prokram minen May 2019 mi fósun ifa usun sipwe likiitú ngeni ach lólilen me aúrek, a fókkun weneitiei. Iei pélúwen ai kewe iótek.”

8. Ifa usun Jiowa a pwári an tongei Jesus?

⁸ Jiowa a tongekich me chúngúkich usun chék an tongei Jesus me túmúnú i lón ánein manawan wóón fénúfan. (Joh. 5:20) I a awora ngeni Jesus meinisin met a osupwangan lón pekin lúkú, memmeef, me aion. Jiowa a pwal ereni Néún we pwe a tongei me pwapwa ren. (Mat. 3:16, 17) Jesus a silei pwe Seman we mi tong lón láng a nónnóm ren fansoun meinisin me álisi, ina popun ese meefi pwe a áláeménúló.​—Joh. 8:16.

9. Pwata sia silei pwe Jiowa a tongekich?

⁹ Kich meinisin sia pwal kúna án Jiowa tong lón chómmóng napanap, usun chék Jesus. Ekieki ei: Jiowa a lukiikicheto ngeni pwisin i me fang ngenikich eú famili mi tong me tipeeúfengen mi apwapwakich me apéchékkúlakich lón fansoun weires. (Joh. 6:44) Jiowa a pwal awora met mi lamot ngenikich pwe epwe péchékkúleló ach lúkú i. A pwal mwo nge álisikich pwe sipwe tongeni atufichi osupwangach rán me rán. (Mat. 6:31, 32) Atun sia ekieki usun án Jiowa tongekich, ach tong ngeni i epwe pwal péchékkúleló.

10. Met sia tongeni káé seni féfférún Jiowa ngeni pwiich kewe Chón Kraist?

¹⁰ Jiowa a tongei pwiich kewe Chón Kraist. Nge kich, neman esap fansoun meinisin epwe mecheres ach sipwe tongeer me pwár ngeniir pwe sia tongeer. Popun, pún a sókkofesen eéreniach me nónnómuch. Pwal eú, kich meinisin sia kan mwáálliló le féri are apasa met mi tongeni asonga are eletipengawa ekkewe ekkóch. Iwe nge, oukich meinisin sia tongeni achocho le apéchékkúlaló ewe tong lefilach. Ifa usun? Ren ach áppirú Semach we le pwári tong ngeni pwiich kewe Chón Kraist. (Ef. 5:1, 2; 1 Joh. 4:19) Sipwele ppii met sia tongeni káé seni án Jiowa leenien áppirú.

11. Ifa usun Jesus a áppirú án Jiowa kirekiréch me tong?

¹¹ Jiowa i emén mi kirekiréch me tong. (Luk. 1:78, NW) Lupwen emén mi kirekiréch me tong a kúna pwe emén a nóm lón riáfféú, a pwal weires ren, iwe, a kútta ifa usun epwe álisi me oururu. Napanapen me féfférún Jesus ngeni aramas, a pwáraaló án Jiowa chúngúúr. (Joh. 5:19) Lón eú fansoun, atun Jesus a kúna eú mwichen aramas, i “a fokun tongeer, pun ra nom lon watten osukosuk me weires usun sip kana esap wor nöür chon mas.” (Mat. 9:36) Jesus ese chék meefi an tongeer, nge a pwal féri met epwe álilliséch ngeniir. I a echikara ekkewe mi samaw me álisi ekkewe mi “weiresikis o uwochou.”​—Mat. 11:28-30; 14:14.

12. Apwóróusa ekkóch pwóróus ren ifa usun sia tongeni pwári kirekiréch me tong.

¹² Me mwen ach sipwe tongeni pwári ach tongei pwiich kewe Chón Kraist, a lamot sipwe  silei met sókkun osukosuk a toriir. Áwewe chék, neman a úri emén chienach Chón Kraist fefin eú samaw mi chou. Ese kan fósun an na osukosuk, nge neman epwe fókkun pwapwa ika emén epwe álisi. A tongeni awora met an we famili a osupwangan lón pekin aion? Epwe mochen sipwe álisi le kuk anan mwéngé are limeti lón imwan we? Are, emén Chón Kraist mwán mi katowu seni an angang. Itá ach awora ngeni ekis senis lemonomon epwe álisi tori an epwe kúnékúnsefál an angang?

13-14. Ifa usun sia tongeni áppirú fangafangéchún Jiowa?

¹³ Jiowa i mi fangafangéch. (Mat. 5:45) Sisap witiwiti án pwiich kewe repwe tingorekich ach sipwe álisiir me mwen sipwe pwári tong ngeniir. Sia tongeni áppirú Jiowa le akkomw mwékút. I a atétáái ewe akkar iteiten rán inaamwo ika sise tingorei! Me meinisin aramas ra kúna feiéch seni ena akkar, esap chék chókkewe mi pwári ar kilisou ngeni. Kese tipeeú ngeni pwe án Jiowa awora minne sia osupwangan, ina esissillen a tongekich? Sia fókkun tongei Jiowa ren an kirekiréch me fangafangéch!

¹⁴ Chómmóng me lein pwiich kewe Chón Kraist ra áppirú Semach we lón láng ren ar fangafangéch. Áwewe chék, lón ewe 2013, ewe watteen taifun itan Haiyan a atangaweei Philippines. Chómmóng me lein pwiich kewe a ta seniir imwer me pisekiir. Nge pwiir kewe lón pekin lúkú wóón unusen fénúfan ra mwittir álisiir. Chómmóng ra awora ar álillis moni are fiti ewe angangen kaú. Iwe, ren úkúkún kis seni eú ier ra férsefáli are aúetá arapakkan 750 imw! Atun ewe samaw mi chéú itan COVID-19, Chón Pwáraatá ra achocho le álisi pwiir kewe. Atun sia mwittir álisi pwiich kewe Chón Kraist, sia pwár ngeniir pwe sia tongeer.

15-16. Met Lukas 6:36 a apasa sipwe féri pwe sipwe áppirú Semach we lón láng?

¹⁵ Jiowa i mi úméúméch me omusaaló tipis. (Álleani Lukas 6:36.) Iteiten rán, Semach na lón láng a úméúméch ngenikich. (Kölf. 103:10-14) Néún Jesus kewe chón káé rese unuséch, nge i a úméúméch  ngeniir me omusaaló tipisiir. A pwal mwo nge tipemecheres le fangóló manawan pwe omusomusen ach tipis. (1 Joh. 2:1, 2) Kese meefi óm ririéch ngeni Jiowa me Jesus pokiten ar úméúméch ngenikich me omusaaló tipisich?

¹⁶ Epwe péchékkúleló ewe ririin tong lefilach me pwiich kewe ika sia okkomusaló tipisiir. (Ef. 4:32) Ewer, fán ekkóch epwe fókkun weires ach sipwe omusaaló tipisin ekkewe ekkóch, ina popun a lamot sipwe achocho ngeni. Emén Chón Kraist fefin a kúna pwe ewe lesen lón ewe Leenien Mas itelapan “Oupwe Wesewesen Omusomusfengen” a álisi an epwe féri ena. * A apasa: “Ai káé ei lesen a álisiei le weweiti pwe ai omusaaló tipis epwe fókkun álisiei. A áweweei pwe óm tipemecheres le omusaaló tipisin ekkewe ekkóch esap weween pwe ka tipeeú ngeni ewe féffér mi ngaw are tunaló ewe riáfféú a fis seni. Nge a wewe ngeni óm kopwe likitaló óm song ren ar féffér mi ngaw me achocho le akkamwéchú óm kinamwe.” Lupwen sia omusaaló tipisin pwiich kewe, sia pwári pwe sia tongeer me áppirú Semach we, Jiowa.

17. Me ren Mateus 5:16, ifa usun sia tongeni elingaaló Semach we lón láng?

¹⁷ Sia fókkun kilisou ren ach chóni eú familien pwipwi wóón unusen fénúfan iir mi tongfengen. Sia mochen pwe chómmóng aramas repwe fitikich le fel ngeni ach we Kot. Ina minne, a lamot sipwe túmúnú pwe sisap féri och mettóch epwe eitengawa néún Jiowa kewe aramas are Semach we lón láng. Sia achocho le eáni féffér mi múrinné epwe efisi án aramas repwe mochen silei ewe kapas allim.​—Álleani Mateus 5:16.

18. Met a tongeni álisikich ach sipwe pwora le ereni ekkewe ekkóch minne sia lúkú?

¹⁸ Fán ekkóch, neman epwe wor chón esiitakich are pwal mwo nge eriáfféwúmwáálikich pokiten ach álleasochisi Semach we lón láng. Met sipwe féri ika sia pireir le ereni ekkewe ekkóch met sia lúkú? Sia tongeni lúkúlúk pwe Jiowa me Néún we repwe álisikich. Jesus a  ereni néún kewe chón káé pwe resap lólilen ren ifa usun repwe kapas are met repwe apasa. Pwata? Jesus a erá: “Lupwen repwe emwenikemiila ngeni kapwüng, ousap öüreki ämi kapas are mine oupwe apasa, pun ekewe kapas oupwe apasa repwe torikemi lupwen a tori ena otun. Pun sap ämi oupwe kapas, nge ewe Ngünün Sememi epwe ngenikemi mine oupwe apasa.”​—Mat. 10:19, 20.

19. Apwóróusa eú pwóróus usun án emén pwora le affata an lúkú.

¹⁹ Nengeni pwóróusen Robert ei. Atun a kerán poputá le káé Paipel me a chék ekis sileian, a ló ngeni ewe imwen kapwúng lón South Africa me affata ngeni ewe soukapwúng popun esap chóni ewe mwichen soufiu. I a pwora le áweweei popun an esap fiti angangen soufiu pokiten a tongei pwiin kewe Chón Kraist. A fókkun aúcheani an chóni ach we famili lón pekin lúkú. Ewe soukapwúng a eisini: “Ié kana pwiim?” Robert ese tepereni pwe epwe eisini ena kapas eis, nge a mwittir cheme ngeni ewe lesenin rán lón na ránin. Ina lón Mateus 12:50: “Iö kana ra föri letipen Semei lon läng, ir pwii me fefinei me inei.” Inaamwo ika Robert a kerán chék poputá le káé Paipel, nge án Jiowa ngún mi fel a álisi le pélúweni ena kapas eis me ekkewe pwal ekkóch ese fen tepereni pwe epwe pwal eisini. Jiowa a fókkun pwapwa ren Robert. Me Jiowa a pwal pwapwa rech atun sia lúkúlúk wóón i an epwe apworaikich le affatawu minne sia lúkú inaamwo ika sia kúna weires.

20. Met a lamot sipwe tipeppós le féri? (Johannes 17:11, 15)

²⁰ Sia fókkun kilisou ren ach chóni eú famili lón pekin lúkú mi tongfengen lefiler. Sia semeni emén Sam mi múrinné seni meinisin me a wor pwiich kewe mi fókkun tongekich. Fansoun meinisin, sipwe pwári ach aúcheani ekkena mettóch. Satan me chiechian kewe mi kirikiringaw ra achocho le efisi ach sipwe tipemwaramwareiti án Semach we lón láng tongekich me atai ewe tipeeú lefilach. Iwe nge, Jesus a iótek fán itach, a tingorei Semach we an epwe túmúnú ewe tipeeú lón ach we famili. (Álleani Johannes 17:11, 15.) Jiowa a pélúweni ena iótek. Amwo sipwe usun Jesus, sisap fókkun tipemwaramwareiti án Semach we lón láng tong me álillis. Sipwe tipeppós le apéchékkúlaló ach riri ngeni chón ach we famili lón pekin lúkú.