1. ¿Sãwũã akʉseapanʉ Jeowara iyi odepanʉrabara?

JEOWABARA erbʉ mebẽrã iyi kãgabʉra, maʉ̃ra Jesukristo akʉza angelera iya parãkʉada (Col. 1:15; Sal. 103:20). Jesu nama egorode basidera iya ẽbẽrarã ũdubigasi Jeowara akʉseapanʉta ãyi zeze kĩrãkʼa. Jesu Jeowa ʉ̃rʉ bedʼeabʉrʉta jarasi iyi kʼaidubemara, Jeowara iyi zezeta akʉza ãyi zezeta (Juan 20:17). Dayi bebʉ Jeowa diabʉrʉdera akʉza buru kʼoebʉrʉdera Jeowa odepanʉra mebẽã badogo (Mar. 10:29, 30).

2. ¿Kʼãrẽta akʉdai naʉ̃ artikulodera?

² Ʉ̃kʉrʉ Jeowa odepanʉraitara zare akʉita Jeowara ãyi zeze kĩrãkʼa akʉza ʉ̃kʉrʉita zare sãwũã kãga ũdubita mebẽrãra. Naʉ̃ artikulodera akʉdayi sãwũã Jesuba kʼarebabʉta akʉdamarẽã Jeowara dayi zeze kĩrãkʼa akʉza orraseapanʉta dayirãbara iyira. Akʉza akʉdayi sãwũã Jeowade kĩrãkʼa bia edaseapanʉta dayirã mebẽrãra.

3. Jesuba yiwidʼi jaradiadadebara, ¿sãwũã akʉdaibara Jeowara?

³ Jeowara zeze bia akʉza Jesubara mawũã akʉmarẽã kãgabʉ iya akʉbʉ kĩrãkʼa. Bari jaraita Jesubara iyi kʼaidupanʉraʼa yiwidʼi jaradiasidera jarasi: «Zeze ʉ̃tʉbema» (Mat. 6:9). Jesubara jaradiaseabasi Jeowara trʉ̃gadamarẽã  «Daizeze jõma oseabʉta», «Nokʼo ewari jõmaʉ̃nẽ bakikibarita» akʉza «Jõmaʉ̃ra ʉ̃ta zareabarabʉta» (Gén. 49:25; Is. 40:28; 1 Tim. 1:17). Mamina mawũã jara ẽ basi, awuarabʉrʉ «Zeze» asi.

4. ¿Sãwũã kʼawuapanʉ Jeowabara kãgabʉta iyita orradamarẽã?

⁴ ¿Dayirãitara zareka Jeowara zeze bia kĩrãkʼa akʉita? Ʉ̃kʉrʉitara zare ãyi wika bʉeda zʉbʉria warisi baera. Dayirãra so zarea diabʉ iya kʼawuabʉ baera dayirã sãwũã sentibʉta akʉza iyira dayirã kʼawa bakĩrãbʉ, maʉ̃ kʼarea iya iyi bedʼeade jarabʉ: «Daizeze kʼaita bʼaidua, mawũã iyira mara kʼaita baya» (Sant. 4:8). Iya dayirãra kãga akʉza jarabʉ iyira zeze biata wuabema zezeraira.

5. Lucas 10:22ba jarabʉdebara, ¿Jesubara sãwũã kʼarebaseabʉ dayirãba audre orradamarẽã Jeowata?

⁵ Jesubara kʼarebaseabʉ sãwũã audre orraita Jeowara, iyabʉrʉ biʼia ũdukʼawuabʉ baera akʉza biʼia oũdubibʉ baera Jeowaba nebia erbʉra. Iya jarasi: «Mʉ̃ta ũdu bʼʉbara mʉ Zezeta ũdu bʼʉa» (Juan 14:9). Dayi nabʉde kĩrãkʼa, Jesubara jaradiasi sãwũã kãga ũdubita Jeowaʼa, sãwũã wawiaibarata akʉza kʼẽrẽpa bʼaita iyi nãã. Akʉza iyi nama egorode basidera ũdubisi Jeowara ẽbẽra biata akʉza sobiata dayirãʉ̃me (akʉra Lucas 10:22). Akʉdaya Jesuba sãwũã ũdubibasita.

6. ¿Kʼãrẽa jaraseapanʉ Jeowabara ũrĩbasita Jesu yiwidʼibasidera?

⁶ Jeowabara ũrĩbʉ iyi wũãwũãra bedʼeara. Akʉdaya sãwũã ũrĩbʉta ũdubisita iyi warra Jesu bedʼeata (Luc. 5:16). Iyara ũrĩsi Jesuba kʼareba widisidera, 12 panʉra kʼaira bʼaita jʉrʉnʉmaside iyi kʼaidubemara bamarẽã (Luc. 6:12, 13). Akʉza ũrĩsi iyi zʉbʉriade berabarinʉmasidera. Judasba iyi nedoi naweda, Jesubara soiduba widisi iyi zezeba zareata diamarẽã, bedʼea zroma atia iya ũduideba. Jeowabara bari ũrĩ  ẽ basi, awuarabʉrʉ angelta aba zokʼa bʉesi iyaʼa zareata diamarẽã (Luc. 22:41-44).

7. ¿Bʉra sãwũã sentibʉ Jeowaba panʉbʉ baera bʉ yiwidʼibʉra?

⁷ Idibida Jeowabara dayirãra ũrĩbʉ iyaʼa yiwidʼibʉdera. Iyara biʼia panʉbʉ dayirãba nesidabʉ ewaride (Sal. 116:1, 2). Mawũã berabarisi mebẽã Indiadebemata, naʉ̃ mebẽãra mejãcha zʉbʉriabasi aukʼara krĩcha zroma obasi baera. Maʉ̃ kʼarea soiduba jarasi Jeowaʼa kʼarebamarẽã. Iya jarabʉ: «Programa JW Broadcasting^® nebema mayo 2019debemabara, bedʼeabasi kʼãrẽta oibarata krĩcha obʉrʉdera, mʉ̃ara maʉ̃ta nesidabasi. Mawũã panʉsi Jeowabara mʉ̃a iyaʼa yiwidʼibadara».

8. ¿Sãwũã ũdubisi Jeowabara kãgabʉta Jesura?

⁸ Jeowaba Jesu kʼarebada kĩrãkʼa iya zokʼadapeada oita nama egorodebaside, iya dayirãbida iyabaʉ kãgata ũdubibʉ akʉza kʼarebabʉ (Juan 5:20). Iyara kʼarebasi kʼẽrẽpa bʼaita iyiʉ̃me iyi sopʉabaside, iya nekʼãrẽ nesidabasidebida, kãgata ũdubisi adewara iya bia akʉbʉta jarasi (Mat. 3:16, 17). Jesura dobabʉta senti ẽ basi, iyara kʼawuabasi iyi Zezera iyiʉ̃mebʉta ewari jõmaʉ̃nẽ (Juan 8:16).

9. ¿Sãwũã ũdubibʉ Jeowabara dayirã kãgata?

⁹ Jesude kĩrãkʼa dayirãbida ũdubari Jeowaba kãga ũdubibʉra. Krĩchadadrʉ naʉ̃ta: Jeowabara iyita orrabisi akʉza diasi mebẽrã kongregasionebema dayirãʼa kãga ũdubibʉta akʉza kʼarebabʉta (Juan 6:44). Akʉza diabʉ kartarata, bideorata akʉza ãba yi jʉreita dayirãta biapanamarẽã, adewara diabʉ dayirãba ewariza nesidabʉta (Mat. 6:31, 32). Krĩchabʉrʉde Jeowaba dayirã kãgabʉta maʉ̃ba audre kãga wã.

10. ¿Sãwũã Jeowade kĩrãkʼa edadaibara dayirã mebẽrãra?

¹⁰ Jeowabara kãga dayirã mebẽrãra. Mamina edaʉde dayirãitara zarea totoseabʉ ãyi kãgaira akʉza ũdubita. Edaʉde mawũã berabariseabʉ drʉa awuara awuarakade warisi baera, awuara dapʉesida baera akʉza dayirãba ne aña obʉdeba sopʉabiseabʉ wuabemarata, mawũã ẽ bʉrʉ kĩrʉbiseabʉ. Mawũãsidu dayirãba ũdubiseabʉ kãgata dayirã mebẽrã kongregasionebemarãra Jeowaba obʉ kĩrãkʼa (Efe. 5:1, 2; 1 Juan 4:19). Kʼawuadadrʉ Jeowaba yizata ũdubibʉta.

11. ¿Jesubara Jeowa so borekeara sãwũã ũdubisi?

¹¹ Jeowabara ũdubibʉ so borekeabʉta (Luc. 1:78). Ẽbẽra so borekeabʉbara wuabemara zʉbʉrianʉmʉta ũduira, jʉrʉbʉ sãwũã kʼarebaita akʉza so zarea diaita. Jesuba wuabemara sãwũã edabadadeba ũdubibasi Jeowaba kʼãrẽta sentibasita ãyi ʉ̃rʉra (Juan 5:19). Daizeze Bedʼeabara jarabʉ Jesuba «kabana ũdubʉrʉdera so zʉbʉria akʉbasi, popanʉ kĩrãkʼa akʉbasi baera, maʉ̃ba obejarãra yi akʉbari neẽ kĩrãkʼa basi» (Mat. 9:36). Jesubara bari so zʉbʉria akʉ ẽ basi, awuarabʉrʉ bebikʉasi yi kayabera akʉza yi zarea trajabʉra kʼarebasi adewara bedʼea zroma erpanʉrasida (Mat. 11:28-30; 14:14).

12. ¿Dayirãbara sãwũã so borekea ũdubiseabʉ?

¹² Dayi mebẽrãta so borekea akʉkĩrãbʉrʉ krĩchaseapanʉ kʼãrẽ bedʼea zroma  erbʉta, bari jaraita mebẽã aba kayabʉbʉrʉ iya kʼareba widi ẽ mina nesidabʉ kʼarebadamarẽã. ¿Iyara diaseabʉka iyi mebẽrãba nesidabʉta? ¿Iyira sobia ẽka dayirãba kʼarebara iyi deda de imaita mawũã ẽ bʉrʉ neoita? Mawũã ẽ bʉrʉ mebẽã abaʉba trajo aduasibʉrʉ dayirãba kʼarebaseabʉ plata diaide iya kʼawua ẽãne, trajo ũduyeda.

13, 14. ¿Sãwũã dayirãbara Jeowade kĩrãkʼa ũdubiseabʉ diakĩrãbʉta soiduba dayirãba erbʉra?

¹³ Jeowabara diabʉ iya erbʉta (Mat. 5:45). Dayirãba so borekea ũdubikĩrãbʉbʉrʉ jʉ̃ã ẽ baibara mebẽrã kʼareba widita, nãã kʼarebaibara ãya widi naweda, Jeowaba obʉ kĩrãkʼa. Jeowabara iyi bisiara ʉ̃tʉ zebibʉ dayirã jõmaraita iyaʼa widida ẽ mina, jʉ̃wʉrʉara diabʉ ẽbẽra mejãchaʉʼa ãya bika diada ẽ mina. ¿Bʉmabi, Jeowabara kãgara ũdubibʉ dayirãba nesidabʉta diabʉdeba? Jeowabara mejãcha diabʉ dayirãra, maʉ̃ kʼarea kʼãrẽaba kãga dayirãbara iyira.

¹⁴ Mebẽrã mejãchaʉba Jeowade kĩrãkʼa opanʉ ãya kʼareba diabʉde mebẽrãba widi naweda. 2013baside, Filipinasde nãgʉ zroma Haiyan berabaridabara mejãcha de, aduabisi mebẽrãrãra, mamina Jeowa organizasionbara aramaʉ̃ta kʼarebasida. Donasion platadeba mebẽrãʼa kʼareba odiasida deta, 750 kʼawa poaga aba berabari naweda. Naʉ̃ kaya zroma COVID-19dera Jeowa ʉ̃rʉ Kʼawuabipanʉrãbara kʼarebasida mebẽrãra ãya nesidabʉde. Dayirãba mebẽrã kʼarebabʉde ãya nesidabʉmae, ũdubipanʉ kãgapanʉta.

15, 16. Lucas 6:36 jarabʉdebara, ¿sãwũã ũdubiseapanʉ opanʉta Jeowade kĩrãkʼa?

¹⁵ Jeowabara so zʉbʉria akʉbʉ akʉza kĩrãduabʉ dayirã nemitiara (akʉra Lucas 6:36). Iyira mawũãbʉ ewariza (Sal. 103:10-14). Jesusida abarikabʉ. Iyi kʼaidupanʉraba ne aña osidadera iyara so zʉbʉriata ũdubisi akʉza kĩrãduasi ãyi nemitiara. Adewara iyi bebʉidu diasi dayirã nemitia kĩrãduaita (1 Juan  2:1, 2). Jeowaba akʉza Jesuʉ̃meba dayirã so zʉbʉria akʉbʉde akʉza dayi nemitia kĩrãduabʉdeba, ¿audre orrabibʉ ẽka ãyima?

¹⁶ Dayirãba soiduba kĩrãduadara mebẽrãba aña obʉta mawũãra soiduba audre yi kãgadayi kongregasione (Efes. 4:32). Edaʉde zareamina dayirã mebẽrãba aña obʉta kĩrãduaita, zarea odaibara. Mebẽã abaʉba jarabʉ iyira kʼarebasita karta La Atalaya «Perdónense liberalmente unos a otros» * ʉ̃rʉ jarabʉba. Iya jarasi: «Maʉ̃ artikulo akʉiba audre kʼarebasi krĩcha bia erbaita. Jarabasi, wuabemara nekayirua kĩrãduaira jarakĩrãkʉ ẽ daya kʼãrẽ ẽ kĩrãkʼa akʉita. Awuarabʉrʉ jarakĩrãkʉ mejãcha krĩcha ẽ baita dayi ʉ̃rʉ nekayirua odara akʉza maʉ̃ kʼarea krĩcha zroma oẽ baita». Dayirã mebẽrãba ne aña obʉta soiduba kĩrãduabʉdera opanʉ Jeowade kĩrãkʼa akʉza kãgata ũdubibʉ.

17. Mateo 5:16ba jarabʉdebara, ¿dayirãbara sãwũã oseapanʉ Jeowa ʉ̃rʉ ibia bedʼeadamarẽã?

¹⁷ Dayirãitara yibia Jeowa organizasione bʼaira. Adewara kãgapanʉ ẽbẽrarãba dayirãne kĩrãkʼa kãga ũdubidamarẽã Jeowata. Maʉ̃ kʼarea ne aña oda ẽ Jeowa ʉ̃rʉ aña bedʼeada ẽ marẽã akʉza iyi pʉwʉrʉ ʉ̃rʉ. Kʼẽrẽpabʉta ũdubibʉ wuabamaraba ũrĩkĩrãnamarẽã Jeowa bedʼeata (akʉra Mateo 5:16).

18. ¿Kʼãrẽba kʼarebai zowaĩnĩgʉa jaradiaira?

¹⁸ Edaʉde pẽwãnañi Daizeze ʉ̃tʉbema bedʼeata ũrĩpanʉ baera. ¿Kʼãrẽta oseapanʉ perabʉbʉrʉ daya ĩjãbʉ ʉ̃rʉ jaradiaita? Kĩrãbedaibara Jeowaba akʉza Jesuʉ̃meba dayirã kʼarebadaita. Jesubara jarasi iyi kʼaidupanʉrãra krĩcha oda ẽ marẽã sãwũã bedʼeaibara kʼarea mawũã ẽ bʉrʉ kʼãrẽta jaraita. Iyara jarasi: «Maʉ̃nerã Daizezeba marãã diaya sãwũã bedʼeadʼaita. Aramaʉ̃nerã marãta bedʼea ẽã, awuarabʉrʉ Jawurebia  marã Zezedʼeta bedʼeaya marãneba» (Mat. 10:19, 20).

19. ¿Sãwũã pera ẽã jaradiasi nekʼawuabari abaʉba?

¹⁹ Akʉdayi mebẽã Robert kʼãrẽta berabarisita. Iyara ʉ̃rabʉrʉ Daizeze Bedʼea kʼawua jʉ̃drʉside juez kĩrãbita bedʼeaibarabasi Sudáfricade. Iya jarasi kʼãrẽa gorogorora kʼaidura wã ẽãta, iyi mebẽrãta kãga baera. Iyitara yibiabasi Jeowa organizasione bʼaira. Aramaʉ̃ta juezba widisi: «¿Kʼaira bʉ mebẽrãra?». Iyara krĩcha ẽ basi mawũã wididaira, mawũẽ aramaʉ̃ta kĩrãbesi testo maʉ̃ ewaridebemata, yi testora Mateo 12:50basi: «Mʉ Zeze ʉ̃tre bʼʉba krĩñata obʼeta maʉ̃ta mʉ mebea, mʉ nawekʼaua, mʉ papaa». Iya ʉ̃rabʉrʉ Daizeze Bedʼea kʼawuabasimina, Daizeze jaure zareaba kʼarebasi maʉ̃ panʉita akʉza wuabemara bedʼeasida. Jeowara iyi ʉ̃rʉra sobiabʉ akʉza dayirã ʉ̃rʉbida sobiabayi, dayirãba iyi ʉ̃rʉ ĩjãpanʉbʉrʉ jaradiabʉrʉde bedʼea zroma erbʉmina.

20. ¿Kʼãrẽta opanaibara? (Juan 17:11, 15).

²⁰ Bia akʉdadrʉ dayirã Jeowa pʉwʉrʉdebʉra erpanʉ baera zeze biata akʉza mebẽrãra dayirã kãgabʉta. Maʉ̃ra kʼãrẽ ẽ kĩrãkʼa akʉ ẽ baibara. Diarubara (Ãtomĩa) kãgabʉ krĩchadamarẽã dayirã Zeze ʉ̃tʉbemabara kãga ẽãta dayirãra. Maʉ̃ kʼarea Jesura Jeowaʼa yiwidʼisi dayirãra ãba panamarẽã (akʉra Juan 17:11, 15). Maʉ̃ bedʼeara Jeowabara panʉnʉmʉ. Jesude kĩrãkʼa odadrʉ, biʼia kʼawuapanadrʉ dayirã Zeze ʉ̃tʉbemabara kãgata dayirãra. Ewariza audre orradadrʉ dayirã mebẽrã Jeowa pʉwʉrʉdebemarãra.