1. Mɔgɔ kantigiw be se ka jɛnɲɔgɔnya sifa juman lo kɛ ni Jehova ye?

JEHOVA sagokɛlaw ye denbaya kelen ye. O denbaya mɔgɔ dɔw ye mɛlɛkɛ caamanba ani Yezu ye, ale min “kɔnna danfɛn bɛɛ ɲa.” (Kɔlɔs. 1:15; Zab. 103:20). Tuma min na Yezu tun be dugukolo kan, a y’a yira ko mɔgɔ kantigiw be se ka Jehova jati u Faa ye. A y’a fɔ a ka kalandenw ye ko Jehova ye “n Faa” ye “a fana y’aw Faa” ye (Zan 20:17). N’an ye an yɛrɛkun di Jehova ma ani ka batize, an be kɛ denbaya dɔ kɔnɔ min mɔgɔw be ɲɔgɔn kanu.—Mariki 10:29, 30.

2. An bena mun lo lajɛ barokun nin na?

² A ka gwɛlɛ dɔw ma ka Jehova jati Faa kanutigi ye. N’a sɔrɔ dɔ wɛrɛw t’a lɔn u be se k’a yira u balimaw na cogo min na ko u be u kanu. Barokun nin na, an bena a ye Yezu b’an dɛmɛ cogo min na ka Jehova jati Faa kanutigi ye, an be se k’an magwɛrɛ min na. Jehova b’an balimaw minɛ cogo min na, an bena a ye fana cogo minw na an be se k’a ladegi o la.

3. Yezu ka delili modɛli b’an dɛmɛ cogo di an k’an magwɛrɛ Jehova la?

³ Jehova ye Faa kanutigi ye. Yezu b’a fɛ an ka Jehova jati i ko ale b’a jati cogo min na. A t’a fɛ an ka Jehova jati i ko kuntigi dɔ, min tɛ mɔgɔw minɛ ni ɲumanya ye ani a b’a fɔ u ye dɔrɔn u ka ɲi ka min kɛ. Nka, a b’a fɛ an k’a jati i ko bangebaga kanutigi dɔ, a ka nɔgɔ min deenw ma k’u magwɛrɛ a la. Yezu y’o lo yira ka gwɛ tuma min na a ye delili kɛcogo yira a ka kalandenw na. A ye a ka delili modɛli daminɛ ko: “An Faa.” (Mat. 6:9). Yezu tun be se k’a fɔ ko an ka Jehova weele ko “Setigi Ala,” “Danbaga” wala “waati bɛɛ Masa.” Mun na do? Sabu o bonyatɔgɔw bɛɛ bɛnnin lo ani u be sɔrɔ Bibulu kɔnɔ (Zɛnɛzi 49:25; Ezayi 40:28; 1 Tim. 1:17). Nka, Yezu ko an ka Jehova weele an “Faa.”

4. An b’a lɔn cogo di ko Jehova b’a fɛ an k’an magwɛrɛ ale la?

 ⁴ Yala a ka gwɛlɛ i ma ka Jehova jati Faa kanutigi ye wa? O ka gwɛlɛ an dɔw ma. An denmisɛn tuma, n’a y’a sɔrɔ ko an facɛ tun t’an minɛ ni ɲumanya ye, a be se ka gwɛlɛya an ma k’a miiri ko faa kanutigi dɔ be yen. Nka, dususalo lo an fɛ k’a lɔn ko Jehova b’a faamu bɛrɛbɛrɛ an dusukunnakow ye min ye ani fɛɛn min kama an be n’o miiriya ye. A b’a fɛ k’a magwɛrɛ an na. O lo kama, a ka Kuma b’an jija ko: “Aw ye gwɛrɛ Ala la, ale fana bena gwɛrɛ aw la.” (Zaki 4:8). Jehova b’an kanu ani a ko a bena kɛ an Faa ye min ɲɔgɔn tɛ yen.

5. Ka kɛɲɛ ni Luka 10:22 ye, Yezu be se k’an dɛmɛ cogo di an k’an magwɛrɛ kosɔbɛ Jehova la?

⁵ Yezu be se k’an dɛmɛ an k’an magwɛrɛ kosɔbɛ Jehova la. A be Jehova lɔn koɲuman ani a b’a ladegi cogo dafanin na, fɔɔ a y’a fɔ ko: “Ni mɔgɔ min ɲaa lara ne kan, o tigi ye n Faa fana ye.” (Zan 14:9). I ko an kɔrɔcɛ, Yezu b’a yira an na cogo min na an be se k’an Faa bonya ani ka mɛnni kɛ a fɛ. A b’a yira an na fana an be se k’an Faa dusu diya cogo min na ani an be se ka min kɛ walisa an kana a dusu tiɲɛ. Nka, Yezu ye ɲɛnamaya kɛ cogo min na dugukolo kan, o yɛrɛ lo b’a yira kosɔbɛ ko Jehova b’a sagokɛlaw minɛ ni ɲumanya ani kanuya ye (Luka 10:22 kalan). An ka misali dɔw lajɛ.

6. Misali dɔw fɔ minw b’a yira ko Jehova tun be Yezu ka deliliw lamɛn.

⁶ Jehova b’a deenw lamɛn. An k’a filɛ cogo min na, a y’a Dencɛ fɔlɔ Yezu lamɛn. Siga t’a la, k’a Dencɛ to dugukolo kan, Jehova y’a ka delili caaman lamɛn (Luka 5:16). A ye Yezu lamɛn tuma min na a tun b’a delila koo kɔrɔtaninba dɔw koo la i n’a fɔ a ka ciden 12 sugandi wagati la (Luka 6:12, 13). Tuma min na Yezu hakili tun ɲagaminin lo, Jehova y’a ka delili lamɛn fana. Dɔɔni sanni Zuda ka Yezu janfa, Yezu ye a Faa deli kosɔbɛ. Kɔrɔbɔliba min tun bena a sɔrɔ yanni dɔɔni, a ye  delili kɛ o koo la. Jehova ye Yezu ka delili lamɛn. Nka a ma daan o ma, a ye mɛlɛkɛ dɔ ci a nana a Dencɛ kanulen barika bonya.—Luka 22:41-44.

7. K’a lɔn ko Jehova b’an ka deliliw lamɛn, o be mun lo kɛ i la?

⁷ Bi, Jehova bele b’a sagokɛlaw ka deliliw lamɛn. A b’o deliliw jaabi cogo fisaman na ani wagati bɛnnin na (Zab. 116:1, 2). Balimamuso dɔ be Ɛndi jamana na ani a y’a ye Jehova y’a ka delili jaabi. An k’a filɛ Jehova y’o kɛ cogo min na. O balimamuso hakili tun ɲagaminin lo kosɔbɛ ani a ye Jehova deli n’a dusu bɛɛ ye o koo la. A y’a sɛbɛ ko: “Saan 2019, mɛkalo ka JW Telewisɔn tun b’a yira an be se ka see sɔrɔ hamikojugu kan cogo min na. N’ mako tun b’o lo la jaatika! O tun ye n’ ka deliliw jaabili lo ye.”

8. Jehova y’a ka kanuya yira Yezu la cogo jumanw na?

⁸ Tuma min na Yezu tun be dugukolo kan, Jehova y’a kanu ani a y’a janto a la. O cogo kelen na, Jehova b’an kanu ani a b’a janto an na (Zan 5:20). A y’a janto Yezu la Alako, dusukunnako ani bololafɛnw ta fan fɛ. Jehova y’a fɔ Yezu ye fana ko ale b’a kanu ani ko a dusu ka di a kɔrɔ (Mat. 3:16, 17). Yezu tun b’a lɔn ko a sankolola Faa kanutigi be n’a ye tuma bɛɛ ani ko a b’a dɛmɛna. O kama, a tun t’a jati abada ko a b’a kelen na.—Zan 8:16.

9. An b’a lɔn cogo di ko Jehova b’an kanu?

⁹ I ko Yezu, an bɛɛ y’a ye cogo caaman na ko Jehova b’an kanu. An ka miiri nin na: Jehova sɔnna an kɛra a teriw ye ani a ye balima kanulen caaman di an ma. O balimaw b’an ninsɔn diya ani u b’an jija n’an dusu kasinin lo (Zan 6:44). An mako be fɛɛn o fɛɛn na walisa an ka limaniya sabatinin ka to, Jehova b’o fana di an ma. An mako be min na loon o loon, a b’an dɛmɛ yɛrɛ k’o sɔrɔ (Mat. 6:31, 32). Jehova b’an kanu cogo min na, n’an be miiri o la, o be dɔ fara an ka kanuya kan a koo la.

10. Jehova b’an balimaw minɛ cogo min na, an be kalan juman lo sɔrɔ o la?

¹⁰ Jehova b’an balimaw kanu. Nka, n’a sɔrɔ a man nɔgɔ an ma tuma bɛɛ k’an balimaw kanu ani k’an ka kanuya yira u la. O be se ka gwɛlɛya an ma sabu an bɔyɔrɔ n’an ka kokɛcogow tɛ kelen ye. An bɛɛ be fili fana. O be se ka tɔɔw dusu gwan ani k’u dusu tiɲɛ. O bɛɛ n’a ta, an bɛɛ be se k’an jija k’an ka balimaya kanuya sabati. An be se k’o kɛ cogo di do? An Faa b’a yira an balimaw na cogo min na ko a b’u kanu, an k’a ladegi o la (Efɛz. 5:1, 2; 1 Zan 4:19). An k’a filɛ an be kalan min sɔrɔ Jehova fɛ o koo la.

11. Yezu ye Jehova ka “makari” ladegi cogo di?

¹¹ Jehova b’a ka “makari” yira an na (Luka 1:78). Mɔgɔ min be makari, n’a y’a ye ko dɔ be tɔɔrɔla, o b’a dusu tiɲɛ. A be fɛɛrɛw ɲini fana k’o tigi dɛmɛ ani k’a dusu saalo. Jehova be makari mɔgɔw la cogo min na, Yezu tun be makari mɔgɔw la o cogo la (Zan 5:19). Loon dɔ, Yezu ye jama dɔ ye ani “u hinɛ [donna] a la, bari u sigɛnnin tun lo, u dusu kasinin tun lo fana. U tun be i ko sagaw, dɛndɛbaga te minw na.” (Mat. 9:36). Yezu ka makari tun tɛ dusukunnakow dama ye. A tun be dɔ kɛ dɔ ye fana walisa ka mɔgɔw dɛmɛ. A tun be banabagatɔw kɛnɛya ani ‘minw nii tɔɔrɔnin lo, ni sigɛn b’u kan’ a tun be olu lafiya.—Mat. 11:28-30; 14:14.

12. An be se k’a yira cogo di ko an be makari an balimaw na?

 ¹² N’an be miiri an balimaw ka gwɛlɛyaw la, o bena an dɛmɛ ka makari u la. Misali la, n’a sɔrɔ bana jugu dɔ be balimamuso dɔ la. Hali n’a tɛ kuma fewu a ka gwɛlɛyaw koo la, n’a sɔrɔ a bena diya a ye kosɔbɛ mɔgɔ dɔ k’a dɛmɛ. Yala a be sera k’a ka denbaya mɔgɔw mako wasa wa? Yala an be se k’a dɛmɛ an kɛtɔ ka gwa kɛ a ye wala k’a ka boon saniya wa? A be se ka kɛ fana ko balimacɛ dɔ ka baara tiɲɛna. An be se ka wari dennin dɔ di a ma min bena a dɛmɛ yanni a ka baara wɛrɛ sɔrɔ. An be se k’o kɛ ani an t’a fɔ a ye ko anw lo.

13-14. I ko Jehova, an be se k’an tɛgɛ labila ka tɔɔw sɔn cogo jumanw na?

¹³ Jehova b’a tɛgɛ labila ka tɔɔw sɔn (Mat. 5:45). An man ɲi ka kɔnɔni kɛ an balimaw ka dɛmɛ ɲini an fɛ an be sɔrɔ k’u dɛmɛ. I ko Jehova, an be se ka koo dɔw kɛ u ye sanni u k’o ɲini an fɛ. Jehova be tile bɔ an ye loon o loon, hali k’a sɔrɔ an m’a deli o la! Tile funteni tɛ ɲumanlɔnbagaw dɔrɔn lo nafa, nka an kelen kelen bɛɛ be nafa sɔrɔ o la. Jehova b’an mako wasa minkɛ, o b’a yira ko a b’an kanu. A b’an minɛ ni ɲumanya ye kosɔbɛ ani a b’a tɛgɛ labila k’an sɔn. O kama, an b’a kanu yɛrɛ le!

¹⁴ An balima caaman be Jehova ladegi u kɛtɔ k’u tɛgɛ labila ka tɔɔw sɔn. Misali la, saan 2013 fɔɲɔba dɔ (Haiyan) ye tiɲɛniba kɛ Filipine jamana na. Balima caaman ka boonw n’u ka bololafɛnw halakira. Nka, u balima minw be duniɲa kuru bɛɛ kɔnɔ, olu ye dɛmɛ lase u ma joona joona. Mɔgɔ caaman ye wari di wala u ye dɛmɛ don boonlɔ baaraba la. O kɛra sababu ye boon 750 ɲɔgɔn lɔra kokura wala u lalagara. O baaraba yɛrɛ ma se saan kelen ma! COVID-19 fɔɲɔbana tuma na fana, Jehova Seerew y’u jija kosɔbɛ k’u balimaw dɛmɛ. N’an be teliya k’an balimaw dɛmɛ, an b’a yira ko an b’u kanu.

15-16. Ka kɛɲɛ ni Luka 6:36 ye, an ka ɲi ka mun lo kɛ walisa k’an sankolola Faa ladegi?

¹⁵ Jehova be makari ani a be yafa an ma (Luka 6:36 kalan). Loon o loon,  an sankolola Faa be makari an na (Zab. 103:10-14). Yezu ka kalandenw tun ye mɔgɔ dafabaliw ye. O bɛɛ n’a ta, a tun be makari u la ani ka yafa u ma. A yɛrɛ sɔnna k’a niin di walisa an ka jurumuw ka se ka yafa (1 Zan 2:1, 2). Jehova ni Yezu be makari ani u be yafa an ma minkɛ, o b’an magwɛrɛ u la kosɔbɛ.

¹⁶ N’an be to ka “yafa ɲɔgɔn ma” n’an dusu bɛɛ ye, o b’a to an be ɲɔgɔn kanu kosɔbɛ (Efɛz. 4:32). Tiɲɛn lo ko ka yafa tɔɔw ma, o be se ka gwɛlɛya kosɔbɛ tuma dɔw la. O kama, an ka ɲi ka jijalibaw kɛ. Balimamuso dɔ y’a ye ko Kɔrɔsili Sangaso ka barokun nin y’a dɛmɛ kosɔbɛ k’o lo kɛ: “Pardonnons-nous volontiers les uns aux autres.” * A y’a sɛbɛ ko: “O barokun ye n’ dɛmɛ k’a faamu ko ni n’ be yafa tɔɔw ma, o be ne yɛrɛ nafa. A ɲɛfɔra yen ko n’i be yafa tɔɔw ma, o kɔrɔ tɛ ko u ye min kɛ i la, i b’a jati k’o tɛ koo jugu ye wala ko o koo ma i tɔɔrɔ. Nka ka yafa, o kɔrɔ ko i tɛ dimi mara i kɔnɔ ani i hakili siginin be to.” N’an be yafa an balimaw ma n’an dusu bɛɛ ye, an b’a yira ko an b’u kanu ani an be an sankolola Faa Jehova lo ladegira.

17. Ka kɛɲɛ ni Matiyo 5:16 ye, an be se ka bonya la an sankolola Faa kan cogo di?

¹⁷ Nɛɛmaba lo an fɛ ka kɛ denbaya dɔ la min mɔgɔw be duniɲa kuru bɛɛ kɔnɔ ani u be ɲɔgɔn kanu. An b’a fɛ mɔgɔ caamanba ka fara an kan ka an ka Ala bato. O kama, an man ɲi ka koo si kɛ min bena a to mɔgɔw be koo jugu miiri Jehova wala a sagokɛlaw koo la. An b’an jija tuma bɛɛ ka kɛ ni kɛwale ɲumanw ye. O la, mɔgɔw bena a ɲini ka Jehova lɔn ani k’a sago kɛ.—Matiyo 5:16 kalan.

18. Mun lo be se k’an dɛmɛ ka seereya kɛ ni jagwɛlɛya ye?

¹⁸ Tuma dɔw la, dɔw be se k’an mafiɲɛya wala k’an kɛlɛ sabu an be mɛnni kɛ an sankolola Faa fɛ. Nka, n’an be siran k’an ka lannakow fɔ tɔɔw ye do? An ka la a la ko Jehova n’a Dencɛ bena an dɛmɛ. Yezu  y’a ka kalandenw hakili sigi ko u man ɲi ka jɔrɔ u ka kuma fɔta ani a fɔcogo koo la. Mun na do? A y’o ɲɛfɔ ko: “Ni kuma sera aw ma tuma min na, aw ka kan ka kuma min fɔ, Ala bena o don aw daa la, bari aw bena kuma min fɔ, o tena kɛ aw yɛrɛ ka kuma ye, nga Faa Ala ka Nii Senuman le bena o don aw daa la.”—Mat. 10:19, 20.

19. Mɔgɔ dɔ ka koo lakali min ye waajuli kɛ ni jagwɛlɛya ye.

¹⁹ An ka Robert ka koo lajɛ. A wagati damanin ye nin ye, a tun y’a daminɛ kura ye ka bibulukalan kɛ ani a tun tɛ bɛrɛ lɔn Bibulu koo la. O tuma na, u y’a weele Afirikidisidi ka kititigɛso la walisa a k’a ɲɛfɔ fɛɛn min kama a t’a fɛ ka sɔrɔdasiya kɛ. A y’a jaa gwɛlɛya k’a ɲɛfɔ kititigɛla ye ko a t’a fɛ k’a seen don kɛlɛkow la sabu a b’a balima kerecɛnw kanu. A dusu ka di ka kɛ an balima dɔ ye! Kititigɛla barila k’a ɲininga ko: “Jɔnw lo ye i balimaw ye?” Robert tun ma kɔn ka miiri o ɲiningali la. Nka, a hakili sinna ka jigi o loon ka vɛrise la. O tun ye Matiyo 12:50 lo ye. A fɔra yen ko: “Mɔgɔ min be ne Faa Ala sago kɛ, o tigi le ye ne dɔgɔcɛ, walima ne dɔgɔmuso, ani ne bamuso ye.” Tiɲɛn lo ko Robert tun ye Bibulu kalanden kura ye. Nka, Jehova ka hakili senu y’a dɛmɛ ka o ɲiningali ani ɲiningali caaman jaabi, hali k’a sɔrɔ a tun labɛnnin tɛ u kama. Siga t’a la, Jehova dusu diyara Robert kɔrɔ! Jehova dusu ka di an fana kɔrɔ, n’an b’an jigi la a kan walisa ka se ka seereya kɛ ni jagwɛlɛya ye gwɛlɛyaw wagati la.

20. An ka ɲi k’an cɛsiri ka mun lo kɛ? (Zan 17:11, 15).

²⁰ An dusu ka di kosɔbɛ ka kɛ ni balimaw ye minw be ɲɔgɔn kanu. An Faa ɲɔgɔn tɛ yen ani an be ni balima caaman ye minw b’an kanu. An ka to ka Jehova waleɲuman lɔn tuma bɛɛ o kosɔn. Sutana n’a kɔmɔgɔw ka jugu. U b’a fɛ an k’a miiri ko an sankolola Faa t’an kanu. U b’a ɲinina fana k’an ka kelenya nagasi. Nka, Yezu y’an Faa deli ko a k’a janto an na walisa an ka denbaya ka to kelenya la (Zan 17:11, 15 kalan). Jehova b’o delili jaabira. I ko Yezu, an man ɲi ka sigasiga abada ko an sankolola Faa b’an kanu ani ko a bena an dɛmɛ. An k’an cɛsiri ka to k’an magwɛrɛ kosɔbɛ Jehova n’an balimaw na.