1. Kancica tɛ gbejinɔtɔ́ lɛ ka sixu ɖó xá Jehovah?

JEZU e nyí “nukɔngbeví,” bo hugǎn “nǔ e Mawu bló lɛ bǐ é,” kpo wɛnsagun wɔbuwɔbu lɛ kpo ɖò xwédo Jehovah tɔn e mɛ mɛsɛntɔ́ tɔn lɛ ɖè é mɛ. (Kolo. 1:15; Ðɛh. 103:20) Hwenu e Jezu ɖò ayikúngban jí é ɔ, é ɖexlɛ́ ɖɔ gbejinɔtɔ́ lɛ sixu ylɔ́ Jehovah ɖɔ Tɔ́. Jezu ɖò xó ɖɔ nú ahwanvu tɔn lɛ wɛ, bo ylɔ́ Jehovah ɖɔ, “Tɔ́ ce e nyí Tɔ́ mi lɔ tɔn é.” (Jaan 20:17) Gɔ́ na ɔ, enyi mǐ sɔ́ mǐɖée jó nú Jehovah bo bló baptɛm ɔ, mǐ nɔ byɔ xwédo wanyiyinɔ e mɛ nɔví sunnu lɛ kpo nɔví nyɔnu lɛ kpo ɖè é ɖé mɛ.—Mak. 10:29, 30.

2. Etɛ lɛ mǐ ka na gbéjé kpɔ́n ɖò xóta elɔ mɛ?

² É nɔ vɛwǔ nú mɛɖé lɛ bɔ ye na nɔ kpɔ́n Jehovah dó mɔ Tɔ́ wanyiyinɔ ɖé. Mɛ ɖevo lɛ sixu nɔ ma tuùn lee ye na ɖè wanyiyi xlɛ́ nɔví yetɔn lɛ gbɔn é. Ðò xóta elɔ mɛ ɔ, mǐ na gbéjé lee kpɔ́ndéwú Jezu tɔn nɔ d’alɔ mǐ bɔ mǐ nɔ mɔ ɖɔ Jehovah nyí Tɔ́ wanyiyinɔ ɖé, bɔ mǐ kpo é kpo sixu vɛ́ gbɔn é kpɔ́n. Mǐ na lɛ́ kplɔ́n lee mǐ sixu wà nǔ Jehovah ɖɔhun gbɔn, ɖò ali e nu mǐ nɔ wà nǔ xá nɔví mǐtɔn lɛ ɖè é é.

3. Nɛ̌ ɖɛ kpɔ́ndéwú tɔn ɔ ka bló bɔ mǐ sɛkpɔ́ Jehovah gbɔn?

³ Jehovah nyí Tɔ́ wanyiyinɔ ɖé. Nú Jezu ɔ, mɛjitɔ́ e nɔ nyɔ́ xomɛ, bo nɔ yí wǎn nú mɛ, bɔ è sixu sɛkpɔ́ ɛ é ɖé ɖɔhun wɛ Jehovah cí. É nyí mɛ e ma nɔ nyɔ́ xomɛ ǎ, bo nɔ ɖegbe kɛɖɛ nú mɛ é ɖé ǎ. Lee Jezu ba ɖɔ nǔ ni nɔ cí nú mǐ dó Jehovah wu é nɛ. Nǔ e é kplɔ́n ahwanvu tɔn lɛ ɖɔ ye ni nɔ xoɖɛ bo byɔ é xlɛ́ enɛ nyi wɛn. Xógbe elɔ wɛ é bɛ́ ɖɛ kpɔ́ndéwú tɔn ɔ na: “Tɔ́ mǐtɔn.” (Mat. 6:9) Jezu hɛn ɔ é na ko byɔ mǐ ɖɔ mǐ ni ylɔ́ Jehovah ɖɔ “Nǔbǐwukpétɔ́” “Gbɛɖotɔ́” alǒ “Axɔ́su Mavɔmavɔ,” ɖó tɛnmɛ-nyikɔ enɛ lɛ bǐ wɛ sɔgbe bo lɛ́ ɖò Mawuxówema ɔ mɛ. (Bǐb. 49:25; Mat. 19:4; 1 Tim. 1:17) É ɖò mɔ̌ có, Jezu ɖɔ nú mǐ ɖɔ mǐ ni ylɔ́ Jehovah ɖɔ “Tɔ́.”

4. Nɛ̌ mǐ ka wà gbɔn bo tuùn ɖɔ Jehovah ba ɖɔ mǐ ni vɛ́ kpo emi kpo?

 ⁴ Jehovah mimɔ ɖi Tɔ́ wanyiyinɔ ɖé nɔ vɛwǔ nú we wɛ à? É nɔ cí mɔ̌ nú mɛɖé lɛ ɖò mǐ mɛ. Enyi tɔ́ e jì mǐ é ma nɔ wà nǔ xá mǐ kpo wanyiyi kpo ǎ, bonu è ɖò tɔ́ wanyiyinɔ ɖé xó ɖɔ wɛ ɔ, é sixu vɛwǔ bɔ mǐ na mɔ nukúnnú jɛ mɛ. Tuùn e mǐ tuùn ɖɔ Jehovah nɔ mɔ nukúnnú jɛ lee nǔ nɔ cí nú mǐ é mɛ bǐ mlɛ́mlɛ́ é nɔ dó gbɔ nú mǐ tawun! É ba ɖɔ mǐ kpo emi kpo ni vɛ́. Xó tɔn dó wusyɛn lanmɛ nú mǐ ɖɔ: “Mi sɛkpɔ́ Mawu; enɛ ɔ é na sɛkpɔ́ mi.” (Ja. 4:8) Jehovah yí wǎn nú mǐ, bo lɛ́ ɖɔ ɖɔ emi na nyí Tɔ́ ɖagbe hugǎn e mǐ sixu ɖó é nú mǐ.

5. Sɔgbe xá Luki 10:22 ɔ, nɛ̌ Jezu ka sixu d’alɔ mǐ bɔ mǐ na vɛ́ kpo Jehovah kpo gbɔn?

⁵ Jezu sixu d’alɔ mǐ bɔ mǐ kpo Jehovah kpo na vɛ́. Jezu tuùn Jehovah sɔmɔ̌, bo nɔ ɖè jijɔ Tɔn lɛ xlɛ́ bɔ nǔ bǐ nɔ vɔ ɖ’ewu. Enɛ wu wɛ é ɖɔ: “Mɛ e mɔ mì ɔ ko mɔ Tɔ́ ɔ.” (Jaan 14:9) Fofó mɛtɔn ɖé ɖɔhun ɔ, Jezu kplɔ́n mǐ lee mǐ na sí Tɔ́ mǐtɔn, bo lɛ́ setónú n’i gbɔn é, lee mǐ na tɛ́n kpɔ́n bo ma na gblé ɖò así Tɔn ǎ gbɔn é. Kpo lee mǐ na bló gbɔn bɔ nǔ mǐtɔn na nyɔ́ nukún Tɔn mɛ é kpo. Amɔ̌, ɖò taji ɔ, gbɛzán Jezu tɔn ayikúngban jí tɔn ɖè lě dò Jehovah nɔ nyɔ́ xomɛ, bo lɛ́ yí wǎn nú mɛ sɔ é xlɛ́. (Xà Luki 10:22.) Mi nú mǐ ni kpɔ́n kpɔ́ndéwú ɖé lɛ.

6. Nǎ kpɔ́ndéwú lee Jehovah ɖótó Jezu gbɔn é tɔn ɖé lɛ.

⁶ Jehovah nɔ ɖótó vǐ tɔn lɛ. Kpɔ́n ali e nu Jehovah ɖótó nukɔngbeví tɔn ɖè é. É ɖò wɛn ɖɔ Jehovah ɖótó ɖɛ gegě e Vǐ tɔn xò sɛ́dó è hwenu e é ɖò ayikúngban jí é é. (Luk. 5:16) É ɖótó Jezu hwenu e é xoɖɛ sɛ́dó è bo na dó wá gbeta taji lɛ kɔn é, ɖi hwenu e é ɖò mɛsɛ́dó 12 lɛ na cyan wɛ é. (Luk. 6:12, 13) Jehovah lɛ́ ɖótó Jezu sín ɖɛ hwenu e é ɖò aluwɛ mɛ é. Jɛ nukɔn nú hwenu e Judasi flú Jezu é ɔ, Jezu xoɖɛ vívɛ́ sɛ́dó Tɔ́ tɔn dó mɛtɛnkpɔn syɛnsyɛn e na mɔ wɛ é ɖè é takúnmɛ. Jehovah ɖótó Vǐ vívɛ́ná Tɔn sín ɖɛ kpowun ǎ, loɔ, é lɛ́ sɛ́  wɛnsagun ɖé dó è, bonu é na dó wusyɛn lanmɛ n’i.—Luk. 22:41-44.

7. Nɛ̌ nǔ ka ɖó na nɔ cí nú mǐ dó tuùn e mǐ tuùn ɖɔ Jehovah nɔ sè ɖɛ mǐtɔn lɛ é wu?

⁷ Égbé ɔ, Jehovah nɔ lɛ́ ɖótó ɖɛ mǐtɔn lɛ, bo nɔ lɛ́ na sinkɔn nú ye ɖò hwenu e jɛxa dó é, b’ɛ nɔ lɛ́ nyí ɖò ali ɖagbe hugǎn ɔ nu. (Ðɛh. 116:1, 2) Kpɔ́n lee nǔ nyí mɔ̌ nú nɔví nyɔnu e nɔ nɔ Inde é ɖé gbɔn é. É ɖí xwi xá adohu adohu syɛnsyɛn, bo xoɖɛ vívɛ́ sɛ́dó Jehovah dó ninɔmɛ ɔ takúnmɛ. É wlán ɖɔ: “Tuto Televiziɔn JW^® tɔn mai 2019 tɔn ee ɖɔ xó dó lee è na ɖí xwi xá adohu adohu gbɔn é wu é nyí nǔ e sín hudo un ɖó é pɛ́ɛ. Sinkɔn ɖé wɛ é nyí nú ɖɛ ce lɛ.”

8. Ali tɛ lɛ nu Jehovah ka ɖè wanyiyi xlɛ́ Jezu ɖè?

⁸ Jehovah yí wǎn nú mǐ, bo nɔ lɛ́ kpé nukún dó mǐ wu, lee é yí wǎn nú Jezu bo lɛ́ kpé nukún wǔ tɔn hwenu e é ɖò ayikúngban jí é gbɔn é. (Jaan 5:20) É sú nǔ e sín hudo Jezu ɖó ɖò gbigbɔ, lee nǔ nɔ cí nú mɛ é kpo agbaza kpo lixo é bǐ sín dò. Gɔ́ na ɔ, Jehovah gɔn ɖiɖexlɛ́ Vǐ tɔn ɖɔ emi yí wǎn n’i, bɔ nǔ tɔn lɛ́ nyɔ́ nukún emitɔn mɛ ǎ. (Mat. 3:16, 17) Ðó Jezu tuùn ɖɔ emi sixu ganjɛ Tɔ́ emitɔn jixwé tɔn wanyiyinɔ ɔ wu hwebǐnu wutu ɔ, é nɔ mɔ ɖɔ emi ɖò emiɖokpo gbeɖé ǎ.—Jaan 8:16.

9. Etɛ lɛ ka ɖexlɛ́ ɖɔ Jehovah yí wǎn nú mǐ?

⁹ Jezu ɖɔhun ɔ, ali gegě nu wɛ mǐ bǐ ko mɔ ɖɔ Jehovah yí wǎn nú mǐ ɖè. Lin tamɛ dó nǔ elɔ jí: Jehovah dɔn mǐ, bo lɛ́ na mǐ xwédo gbigbɔ tɔn e ɖò bǔ, bɔ wanyiyi ɖ’emɛ é ɖé, bonu mǐ na ɖó awǎjijɛ, bo lɛ́ sú lee nǔ nɔ cí nú mǐ é sín dò. (Jaan 6:44) Jehovah lɛ́ na mǐ nǔ e sín hudo mǐ ɖó bo na kpò ɖò nǔɖiɖi mǐtɔn hɛn lidǒ wɛ lɛ é bǐ. É tlɛ nɔ lɛ́ d’alɔ mǐ, bɔ mǐ nɔ mɔ dandannú gbɛ̀ mɛ tɔn lɛ. (Mat. 6:31, 32) Tamɛ linlin dó wǎn e Jehovah yí nú mǐ é jí nɔ zɔ́n bɔ wǎn e mǐ yí n’i é nɔ jɛji.

10. Etɛ lee Jehovah nɔ wà nǔ xá nɔví sunnu kpo nɔví nyɔnu kpo mǐtɔn lɛ gbɔn é ka sixu kplɔ́n mǐ?

¹⁰ Jehovah yí wǎn nú nɔví sunnu kpo nɔví nyɔnu kpo mǐtɔn lɛ. Amɔ̌, wǎn yí nú mɛ e ɖò xwédo gbigbɔ tɔn mǐtɔn mɛ lɛ é kpo ɖiɖexlɛ́ ye kpo sixu nɔ ma bɔwǔ nú mǐ hwebǐnu. É sixu nɔ vɛwǔ nú mǐ hweɖelɛnu, ɖó aca mǐtɔn lɛ kpo ninɔmɛ e mɛ mǐ sù ɖè lɛ é kpo gbɔn vovo. Gɔ́ na ɔ, mǐ bǐ wɛ nɔ wà nǔ nyi dò, bɔ enɛ sixu ɖ’akpɔ nú mɛ ɖevo lɛ, bo lɛ́ kú awakanmɛ nú ye. É ɖò mɔ̌ có, mǐ bǐ sixu dó gǎn bo bló bɔ wanyiyi e ɖò xwédo gbigbɔ tɔn mǐtɔn mɛ é na syɛn. Gbɔn nɛ̌ é? Gbɔn kpɔ́ndéwú Tɔ́ mǐtɔn tɔn xwixwedó dó ɖè wanyiyi xlɛ́ nɔví mǐtɔn lɛ gblamɛ. (Efɛ. 5:1, 2; 1 Jaan 4:19) Mi nú mǐ ni kpɔ́n nǔ e kpɔ́ndéwú Jehovah tɔn sixu kplɔ́n mǐ lɛ é.

11. Nɛ̌ Jezu ka ɖè lee Jehovah nyí “nǔblawukúnúmɛtɔ́” gbɔn é xlɛ́ gbɔn?

¹¹ Jehovah ɔ, “nǔblawukúnúmɛtɔ́ wɛ.” (Luk. 1:78) Enyi nǔblawukúnúmɛtɔ́ ɖé ɖ’ayi wu ɖɔ mɛ ɖevo lɛ ɖò wuvɛ̌ mɛ ɔ, é nɔ ɖu ayi mɛ n’i; é nɔ ba ali e nu é na d’alɔ ye bo lɛ́ dó gbɔ nú ye ɖè lɛ é. Lee Jezu wà nǔ xá mɛ lɛ gbɔn é ɖè lee nǔ yetɔn nɔ ɖu ayi mɛ nú Jehovah gbɔn é xlɛ́. (Jaan 5:19) Ðò ninɔmɛ ɖé mɛ ɔ, ee Jezu mɔ ahwan ɖé é ɔ, “nǔ yetɔn blawǔ n’i, ɖó é mɔ ɖɔ nǔ gbɛ́ dó ye, bɔ wǔ kú ye, bɔ ye cí lɛngbɔ̌ e ma ɖó nyinyitɔ́ ǎ lɛ é ɖɔhun.” (Mat. 9:36) Mɛ lɛ sín nǔ e blawǔ nú Jezu é nɔte ɖó lee nǔ nɔ cí nú mɛ é kɛɖɛ jí ǎ. É lɛ́ gbɔ azɔn nú mɛ, bo fá kɔ nú “mɛ e agban kpinkpɛn hinhɛn cikɔ na lɛ é.”—Mat. 11:28-30; 14:14.

12. Nǎ kpɔ́ndéwú lee mǐ sixu ɖè nǔblawukúnúmɛ xlɛ́ gbɔn é tɔn ɖé.

¹² Cobonu nɔví mǐtɔn lɛ sín nǔ na blawǔ nú mǐ ɔ, é ɖò dandan ɖɔ mǐ ni lin tamɛ dó  tagba e ɖí xwi xá wɛ ye ɖè lɛ é jí. Ði kpɔ́ndéwú ɔ, nɔví nyɔnu ɖé sixu ɖò azɔn syɛnsyɛn ɖé jɛ wɛ. É nɔ ɖò gbɛ̀ vo sà wɛ ǎ, amɔ̌, vlafo enyi mɛɖé d’alɔ ɛ ɔ, é na hun xomɛ n’i tawun. É ka nɔ kpéwú bo nɔ sú nǔ e sín hudo xwédo tɔn ɖó lɛ é sín dò à? Mǐ ka sixu d’alɔ ɛ ɖò nǔɖiɖá alǒ xwégbezɔ́ lɛ kɔn à? Azɔ̌ sixu gblé dó nɔví sunnu ɖé. Mǐ sixu na ɛ akwɛ klewun ɖé bo na dó d’alɔ ɛ kaka jɛ hwenu e é na mɔ azɔ̌ ɖevo dó é. Vlafo mǐ sixu nɔ ma ɖexlɛ́ ɖɔ mǐ wɛ na ɛ.

13-14. Nɛ̌ mǐ ka sixu nɔ hun alɔ dó na nǔ mɛ Jehovah ɖɔhun gbɔn?

¹³ Jehovah nɔ hun alɔ dó na nǔ mɛ. (Mat. 5:45) Mǐ ɖó na nɔte kpɔ́n hwenu e nɔví mǐtɔn lɛ na wá byɔ alɔdó mǐtɔn dó é, cobo ɖè nǔblawukúnúmɛ xlɛ́ ye ǎ. Jehovah ɖɔhun ɔ, mǐ sixu ɖè afɔ ɔ jɛ nukɔn. Mǐ tlɛ nɔ byɔ ɛ ɖɔ hwe ni tɔ́n cobonu éɖesunɔ nɔ wà mɔ̌ nú mǐ gbè bǐ gbè ǎ. Gɔ́ na ɔ, mɛ bǐ wɛ nɔ ɖu lè tɔn, é nyí mɛ e nǔ nɔ sù nukún mɛ na é kɛɖɛ ǎ. A na yí gbè ɖɔ ɖó Jehovah nɔ sú hudo mǐtɔn lɛ sín dò wutu ɔ, wǎn e é yí nú mǐ é ɖexlɛ́ wɛ é ɖè gbɔn mɔ̌ nɛ à cé? Mǐ yí wǎn nú Jehovah tawun ɖó é nyɔ́ xomɛ ɖesu, bo nɔ lɛ́ hun alɔ dó na nǔ mɛ tawun!

¹⁴ Nɔví sunnu kpo nɔví nyɔnu kpo mǐtɔn gegě nɔ xwedó kpɔ́ndéwú Tɔ́ mǐtɔn jixwé tɔn ɔ tɔn, bo nɔ ɖè afɔ nukɔntɔn ɔ, lobo nɔ hun alɔ dó na nǔ mɛ. Ði kpɔ́ndéwú ɔ, ɖò 2013 ɔ, jɔhɔn ɖaxó e nɔ nyí Haiyan é hɛn nǔ gblé tawun ɖò Philippines. Nɔví sunnu kpo nɔví nyɔnu kpo gegě hɛn xwé kpo nǔɖokan yetɔn lɛ kpo bú. Amɔ̌, xwédo gbigbɔ tɔn yetɔn e gbɔn gbɛ̀ ɔ bǐ mɛ é yawǔ d’alɔ ye. Mɛ gegě na akwɛ, alǒ d’alɔ bɔ è vɔ́ xwé ɖé lɛ jlaɖó, bo vɔ́ ɖevo lɛ gbá ɖò xwè ɖokpo mɔ̌ vlamɛ; xwé enɛ lɛ bǐ na yì 750 mɔ̌. Ðò jɛmɛji Covid-19 ɔ hwenu ɔ, Kúnnuɖetɔ́ lɛ w’azɔ̌ syɛnsyɛn bo nɔ gudo nú nɔví yetɔn lɛ. Enyi mǐ nɔ yawǔ d’alɔ nɔví gbigbɔ tɔn mǐtɔn lɛ ɔ, xlɛ́xlɛ́ ye wɛ mǐ ɖè ɖɔ mǐ yí wǎn nú ye nɛ.

15-16. Sɔgbe xá Luki 6:36 ɔ, ali taji tɛ nu mǐ ka sixu wà nǔ Tɔ́ mǐtɔn jixwé tɔn ɔ ɖɔhun ɖè?

¹⁵ Jehovah nɔ kú nǔblawu nú mɛ, bo nɔ lɛ́ sɔ́ hwɛ kɛ mɛ. (Xà Luki 6:36.) Gbè bǐ gbè wɛ Tɔ́ mǐtɔn jixwé tɔn ɔ nɔ sɔ́ hwɛ kɛ mǐ  mɛ ɖokpo ɖokpo. (Ðɛh. 103:10-14) Gbɛtɔ́ hwɛhutɔ́ wɛ ahwanvu Jezu tɔn lɛ nyí có, é kú nǔblawu nú ye, bo lɛ́ sɔ́ hwɛ kɛ ye. É tlɛ lɛ́ sɔ́ jlǒ dó sɔ́ gbɛ̀ tɔn dó savɔ̌, bonu è na dó sɔ́ hwɛ mǐtɔn lɛ kɛ mǐ. (1 Jaan 2:1, 2) Nǔblawu e Jehovah kpo Jezu kpo nɔ kú nú mɛ bo nɔ lɛ́ sɔ́ hwɛ kɛ mɛ é dɔn we sɛkpɔ́ ye à cé?

¹⁶ Enyi mǐ nɔ sɔ́ hwɛ kɛ mǐɖée ɔ, wǎn e mǐ yí nú mǐɖée é nɔ syɛn d’eji. (Efɛ. 4:32) Nǔgbo ɔ, hwɛ sísɔ́ kɛ mɛ ɖevo lɛ sixu vɛwǔ tawun hweɖelɛnu, enɛ wu ɔ, é na byɔ gǎndidó tawun ɖò mǐ sí. Nɔví nyɔnu ɖé mɔ ɖɔ xóta “Mì Nọ Jona Ode Awetọ sọn Ojlo mẹ Wá” ee tɔ́n ɖò Atɔxwɛ mɛ é d’alɔ emi ɖò ali enɛ nu. * É wlán ɖɔ: “Xóta enɛ d’alɔ mì, bɔ un mɔ nukúnnú jɛ lee hwɛ sísɔ́ kɛ mɛ ɖevo lɛ nɔ wà ɖagbe nú mì gbɔn é mɛ. É tinmɛ ɖɔ jlǒ sísɔ́ dó sɔ́ hwɛ kɛ mɛ ɖevo lɛ kún nyí gbeyiyi nú nǔwanyido yetɔn lɛ, alǒ nukún kpɛví sɔ́ dó kpɔ́n nǔ e ye jì lɛ é ó. Loɔ, hwɛ sísɔ́ kɛ ye wɛ nyí ɖɔ è ni ma hɛn nǔ e ye wà nyi dò lɛ é dó xomɛ ó, bo lɛ́ kpò ɖò fífá ayi mɛ tɔn ɖó wɛ.” Enyi mǐ nɔ sɔ́ jlǒ dó sɔ́ hwɛ kɛ nɔví sunnu kpo nɔví nyɔnu kpo mǐtɔn lɛ ɔ, enɛ nɔ xlɛ́ ɖɔ mǐ yí wǎn nú ye, bo lɛ́ ɖò nǔ wà wɛ Tɔ́ mǐtɔn Jehovah ɖɔhun.

17. Sɔgbe xá Matie 5:16 ɔ, nɛ̌ mǐ ka sixu kpa susu nú Tɔ́ mǐtɔn jixwé tɔn ɔ gbɔn?

¹⁷ Wǔjɔmɛ ɖaxó ɖé wɛ é nyí ɖɔ è ni ɖò xwédo e gbɔn gbɛ̀ ɔ bǐ mɛ, bɔ wanyiyi ɖ’emɛ é ɖé mɛ. Mǐ ba ɖɔ mɛ gegě ni xò kpóɖó nú mǐ lee é nyɔ́ bló gbɔn é, bá sɛn Mawu mǐtɔn xá mǐ. Enɛ wu ɔ, mǐ ɖó na lɔn bo na wà nǔ ɖebǔ e na kɔn cí dó togun Jehovah tɔn, alǒ Mawu mǐtɔn jixwé tɔn ɔ wu é gbeɖé ǎ. Mǐ nɔ tɛ́n kpɔ́n, bo nɔ zán gbɛ̀ e na zɔ́n bɔ wɛnɖagbe ɔ na dɔn mɛ lɛ é.—Xà Matie 5:16.

18. Etɛ ka sixu d’alɔ mǐ bɔ mǐ na jlá wɛn ɔ kpo akɔ́nkpinkpan kpo?

¹⁸ Hweɖelɛnu ɔ, mɛɖé lɛ sixu mɔ xó ɖɔ dó mǐ wu, alǒ tlɛ klán gbè xá mǐ ɖó mǐ ɖò tónú sè nú Tɔ́ mǐtɔn jixwé tɔn ɔ wɛ wutu. Enyi xɛsi ka nɔ ɖi mǐ hwenu e mǐ ɖò xó ɖɔ nú mɛ ɖevo lɛ dó nǔ e mǐ ɖi nǔ na lɛ é wu  wɛ ɔ, etɛ mǐ ka sixu wà? Mǐ sixu ɖeji ɖɔ Jehovah kpo Vǐ tɔn kpo na d’alɔ mǐ. Jezu lɛ́ vɔ́ ganjɛwu na ahwanvu tɔn lɛ ɖɔ nǔ e ye na ɖɔ é, alǒ lee ye na ɖɔ gbɔn é ni ma ɖó linkpɔ́n nú ye ó. Etɛwu? Jezu tinmɛ ɖɔ: “È na sɔ́ nǔ e mi na ɖɔ ɖò dɔ̌n hwenɛnu lɛ dó ayi mɛ nú mi. Ðó miɖesunɔ wɛ ɖò xó na ɖɔ wɛ ǎ; [Gbigbɔ] Tɔ́ mitɔn tɔn wɛ na ɖò xó ɖɔ wɛ gbɔn mi jí.”—Mat. 10:19, 20.

19. Nǎ kpɔ́ndéwú mɛ e ɖekúnnu kpo akɔ́nkpinkpan kpo é tɔn ɖé.

¹⁹ Ð’ayi kpɔ́ndéwú Robert tɔn wu. Hweɖenu wá yì ɖò hwenu e é jɛ Biblu kplɔ́n jí tlolo, bo ma ko tuùn nǔ kaka ɖé dó Biblu jí ǎ é ɔ, é yì hwɛ nukɔn ɖò Afrique du Sud, bo ɖɔ nǔ e wu é ma jló na byɔ ahwan mɛ ǎ é nú hwɛɖɔtɔ́ ɖé. É tinmɛ kpo akɔ́nkpinkpan kpo ɖò hwɛ nukɔn ɖɔ emi ba na kpò ɖò wǔ ɖó zɔ wɛ, ɖó wǎn e emi yí nú nɔví ɖò nǔɖiɖi mɛ emitɔn lɛ é wutu. Tɛn e mɛ é ɖè ɖò xwédo gbigbɔ tɔn mǐtɔn mɛ é xɔ akwɛ n’i! Hwɛɖɔtɔ́ ɔ kanbyɔ ɛ ajijimɛ ɖɔ, “Mɛ̌ ka nyí nɔví towe lɛ?” Robert ɖó nukún nǔkanbyɔ enɛ ɖebǔ ǎ, amɔ̌, wemafɔ e mɛ è ɖè tɛ́si azǎn enɛ tɔn sín é jɛn wá ayi mɛ n’i tlolo. Matie 12:50 wɛ, é ɖɔ: “Mɛ ɖebǔ bló Tɔ́ ce e ɖò [jixwé] ɔ sín jlǒ ɔ, mɛ enɛ wɛ nyí nɔví ce sunnu, bo nyí nɔví ce nyɔnu, bo nyí nɔ ce.” Yɔyɔ̌ wɛ Robert jɛ Biblu kplɔ́n jí có, gbigbɔ mímɛ́ Jehovah tɔn d’alɔ ɛ, bɔ é na xósin nú nǔkanbyɔ enɛ kpo nǔkanbyɔ gegě ɖevo e é ma ɖó nukún tɔn ǎ é kpo. É ɖò wɛn ɖɔ Jehovah na ko gó ɖó Robert wu! Gɔ́ na ɔ, enyi mǐ lɔ nɔ ganjɛ Jehovah wu, bo nɔ ɖekúnnu kpo akɔ́nkpinkpan kpo ɖò hwenu vɛwǔ lɛ mɛ ɔ, é nɔ gó ɖó mǐ lɔ wu.

20. Etɛ mǐ ka ɖó na kánɖeji bá wà? (Jaan 17:11, 15)

²⁰ Xwédo wanyiyinɔ elɔ e mɛ mǐ ɖè é nɔ sù nukún mǐtɔn mɛ tawun. Tɔ́ ɖagbe hugǎn e è sixu ɖó é wɛ mǐ ɖó, bo lɛ́ ɖó nɔví sunnu kpo nɔví nyɔnu kpo ɖěɖee yí wǎn nú mǐ lɛ é gegě. Mǐ ɖó na nɔ dókú hwebǐnu ɖó enɛ wu. Satáan kpo awoví tɔn lɛ kpo nɔ tɛ́n kpɔ́n bá bló bɔ mǐ na xò nǔ kpɔ́n dó wǎn e Tɔ́ mǐtɔn jixwé tɔn ɔ yí nú mǐ é wu, bo nɔ lɛ́ tɛ́n kpɔ́n, bá d’avaja bǔninɔ mǐtɔn mɛ. Amɔ̌, Jezu xoɖɛ dó ta mǐtɔn mɛ, bo byɔ Tɔ́ mǐtɔn ɖɔ é ni nya xɛ ɖò mǐ jí bonu xwédo mǐtɔn ni kpò ɖò bǔ. (Xà Jaan 17:11, 15.) Jehovah ɖò sinkɔn na nú ɖɛ enɛ wɛ. Jezu ɖɔhun ɔ, mi nú mǐ ni ma xò nǔ kpɔ́n dó wǎn e Tɔ́ mǐtɔn jixwé tɔn ɔ yí nú mǐ é kpo gudo e é nɔ nɔ nú mǐ é kpo wu gbeɖé ó. Mi nú mǐ ni kánɖeji bo kpò ɖò xwédo gbigbɔ tɔn mǐtɔn sɛkpɔ́ d’eji wɛ hugǎn.