1. Te adesai anɔkwafoi baanyɛ amɛtsɛ Yehowa amɛhã tɛŋŋ?

 YESU, ni ji “bɔɔ nii fɛɛ ateŋ kromɔbi lɛ,” kɛ ŋwɛibɔfoi babaoo fata mɛi ni jáa Yehowa akɛ weku lɛ he. (Kol. 1:15; Lala 103:20) Be ni Yesu yɔɔ shikpɔŋ lɛ nɔ lɛ, ehã adesai anɔkwafoi na akɛ, amɛbaanyɛ amɛtsɛ Yehowa akɛ amɛ-Tsɛ. Be ko be ni ekɛ ekaselɔi lɛ wieɔ lɛ, etsɛ Yehowa akɛ ‘e-Tsɛ kɛ amɛ hu amɛ-Tsɛ.’ (Yoh. 20:17) Kɛ́ wɔjɔɔ wɔhe nɔ wɔhã Yehowa ni wɔhã abaptisi wɔ lɛ, wɔ hu wɔbafataa wɔnyɛmimɛi ni sumɔɔ wɔ waa ni tamɔ weku kɛhã wɔ lɛ he.​—Mar. 10:29, 30.

2. Mɛni he wɔbaasusu yɛ nikasemɔ nɛɛ mli?

² Ewa kɛhã mɛi komɛi akɛ amɛbaana Yehowa akɛ amɛ-Tsɛ ni sumɔɔ amɛ. Mɛi komɛi hu leee bɔ ni amɛbaafee amɛhã amɛnyɛmimɛi Kristofoi lɛ ana akɛ amɛsumɔɔ amɛ. Yɛ nikasemɔ nɛɛ mli lɛ, wɔbaana bɔ ni Yesu baanyɛ eye ebua wɔ ni wɔna Yehowa akɛ wɔ-Tsɛ ni sumɔɔ wɔ ni wɔbaanyɛ wɔbɛŋkɛ lɛ kpaakpa. Agbɛnɛ hu, wɔbaakwɛ bɔ ni Yehowa kɛ wɔnyɛmimɛi lɛ yeɔ ehãa, kɛ bɔ ni wɔbaafee wɔkase lɛ.

3. Be ni Yesu tsɔɔ ekaselɔi lɛ bɔ ni asɔleɔ lɛ, mɛɛ wiemɔ ekɛje shishi? Ni mɛni hewɔ?

³ Yehowa wɔ-Tsɛ lɛ sumɔɔ wɔ. Yesu miisumɔ ni wɔna Yehowa tamɔ bɔ ni enaa lɛ lɛ, akɛ Tsɛ ni sumɔɔ wɔ ni wɔbaanyɛ wɔkɛ lɛ agba sane be fɛɛ be, shi jeee akɛ mɔ ko ni bɛ wɔhe dekã ni nɔ ni etaoɔ wɔfee lɛ pɛ ekɛɔ wɔ. Nɔ ni ekɛɛ ekaselɔi lɛ be ni etsɔɔ amɛ bɔ ni asɔleɔ lɛ hãa wɔnaa enɛ. Wiemɔ ni ekɛje nɔkwɛmɔnɔ ni ekɛtsɔɔ amɛ bɔ ni asɔleɔ lɛ shishi ji: “Wɔ-Tsɛ.” (Mat. 6:9) Be ni Yesu tsɔɔ amɛ bɔ ni asɔleɔ lɛ, kulɛ ebaanyɛ ekɛɛ amɛ akɛ amɛtsɛ Yehowa akɛ “Ofe lɛ,” “Bɔlɔ lɛ,” loo “Naanɔi a-Maŋtsɛ,” ni  eji efee nakai kulɛ etɔ̃ko, ejaakɛ yɛ Ŋmalɛ lɛ mli lɛ, akɛ gbɛ́ii nɛɛ fɛɛ tsɛɔ Yehowa. (1 Mo. 49:25; Rom. 1:25; 1 Tim. 1:17) Shi ekɛɛ amɛ akɛ, amɛtsɛ Yehowa akɛ ‘amɛ-Tsɛ.’

4. Mɛni hãa wɔnaa akɛ Yehowa miisumɔ ni wɔna lɛ akɛ wɔ-Tsɛ ni sumɔɔ wɔ?

⁴ Ani ewa kɛhã bo akɛ obaana Yehowa akɛ o-Tsɛ ni sumɔɔ bo? Nakai mɛi komɛi nuɔ he. Wɔteŋ mɛi komɛi yɛ ni wɔgbekɛbiiashi lɛ, wɔtsɛmɛi kɛ wɔ yeee jogbaŋŋ, ni no hewɔ lɛ, ewa kɛhã wɔ akɛ wɔbaana Yehowa akɛ wɔ-Tsɛ ni sumɔɔ wɔ. Yehowa le bɔ ni wɔnuɔ he wɔhãa lɛ, ni enuɔ wɔ shishi. Esumɔɔ wɔ waa, ni eesumɔ ni wɔ hu wɔsumɔ lɛ. Enɛ hewɔ lɛ, e-Wiemɔ lɛ kɛɔ wɔ akɛ: “Nyɛtsia nyɛbɛŋkɛa Nyɔŋmɔ, ni ebaatsi ebɛŋkɛ nyɛ.” (Yak. 4:8) Yehowa sumɔɔ wɔ, ni eetao wɔle akɛ, ebaakwɛ wɔ tamɔ bɔ ni tsɛ kpakpa kwɛɔ ebii lɛ.

5. Yɛ nɔ ni aŋma yɛ Luka 10:22 lɛ naa lɛ, mɛɛ gbɛ nɔ Yesu yeɔ ebuaa wɔ ni wɔsumɔ Yehowa waa?

⁵ Yesu baanyɛ eye ebua wɔ ni wɔsumɔ Yehowa waa. Yesu le Yehowa jogbaŋŋ, ni efee enii tamɔ lɛ pɛpɛɛpɛ. Enɛ hewɔ lɛ, ewie akɛ: “Mɔ fɛɛ mɔ ni ena mi lɛ ena Tsɛ lɛ hu.” (Yoh. 14:9) Bɔ ni mɔ ko tsɔɔ enyɛmimɛi bibii amɛfɔlɔi ahe nii lɛ, nakai nɔŋŋ Yesu tsɔɔ wɔ bɔ ni wɔbaafee wɔbu Yehowa wɔ-Tsɛ lɛ ni wɔbo lɛ toi, nibii ni kɛ́ wɔfee lɛ ebaadɔ lɛ, kɛ nibii ni kɛ́ wɔfee lɛ ebaaná wɔhe miishɛɛ. Nɔ ni fe fɛɛ lɛ, bɔ ni Yesu hi shi ehã be ni eba shikpɔŋ lɛ nɔ lɛ hãa wɔnaa akɛ, Yehowa mli hi ni esumɔɔ wɔ. (Kanemɔ Luka 10:22.) Nyɛhãa wɔkwɛa enɛ he nɔkwɛmɔnii komɛi.

6. Mɛni tsɔɔ akɛ Yehowa bo Yesu toi? Okɛ enɛ he nɔkwɛmɔnii ahã.

⁶ Yehowa boɔ ebii atoi. Naa nibii komɛi ni tsɔɔ akɛ ebo Yesu ni ji e-Kromɔbi lɛ toi. Be ni Yesu yɔɔ shikpɔŋ lɛ nɔ lɛ, esɔle shii abɔ, ni ŋwanejee ko bɛ he akɛ, Yehowa bo lɛ toi. (Luka 5:16) Akɛ nɔkwɛmɔnɔ lɛ, be ni Yesu yaakpɛ eyiŋ yɛ saji komɛi ni he hiaa lɛ ahe, tamɔ be ni eyaahala ebɔfoi 12 lɛ nɛkɛ lɛ, esɔle, ni Yehowa bo lɛ toi. (Luka 6:12, 13) Agbɛnɛ hu, be ni ehao waa lɛ, esɔle, ni Yehowa bo lɛ toi. Gbi gbɛkɛ ni Yuda batsɔɔ esɛɛgbɛ lɛ, esɔle waa ehã e-Tsɛ lɛ yɛ kai ni mli wawai ni ekɛbaakpe lɛ ahewɔ. Yehowa bo Yesu sɔlemɔ lɛ toi ni etsu ŋwɛibɔfo ko ni ebawaje lɛ.​—Luka 22:41-44.

7. Te onuɔ he ohãa tɛŋŋ yɛ le ni ole akɛ Yehowa boɔ wɔsɔlemɔi atoi lɛ he?

 ⁷ Ŋmɛnɛ hu lɛ, Yehowa boɔ wɔsɔlemɔi atoi ni ehãa hetoo yɛ be ni sa mli, kɛ agbɛnɛ hu, yɛ gbɛ ni hi fe fɛɛ nɔ. (Lala 116:1, 2) Naa nyɛmi yoo ko ni yɔɔ India lɛ niiashikpamɔ ni tsɔɔ nakai. No mli lɛ ehao waa, ni ekɛ hiɛdɔɔ sɔle ehã Yehowa ni eye ebua lɛ. Ewie akɛ: “May 2019 JW Broadcasting^® nifeemɔ lɛ, ni tsɔɔ nɔ ni wɔbaanyɛ wɔfee koni wɔkahao fe nine lɛ ye ebua mi waa. Minu he akɛ Yehowa ehã misɔlemɔi lɛ ahetoo.”

8. Mɛni Yehowa fee ni hã Yesu na akɛ esumɔɔ lɛ?

⁸ Yehowa sumɔɔ wɔ ni ekwɛɔ wɔ jogbaŋŋ, tamɔ bɔ ni esumɔ Yesu ni ekwɛ lɛ jogbaŋŋ be ni eyɔɔ shikpɔŋ lɛ nɔ lɛ. (Yoh. 5:20) Yehowa ye ebua Yesu koni ehemɔkɛyeli lɛ mli awa, ewo lɛ hewalɛ be ni ehao lɛ, ni edro lɛ nibii ni he hiaa lɛ lɛ. Agbɛnɛ hu, Yehowa kɛɛ e-Bi lɛ akɛ esumɔɔ lɛ ni eyɛ ehe miishɛɛ. (Mat. 3:16, 17) Yesu le akɛ, e-Tsɛ lɛ kɛ lɛ yɛ ni ebaaye ebua lɛ, ni no hewɔ lɛ, enuuu he akɛ ebɛ mɔ ko.​—Yoh. 8:16.

9. Mɛni Yehowa efee ni tsɔɔ akɛ esumɔɔ wɔ?

⁹ Bɔ ni Yehowa fee nibii ni hã Yesu na akɛ esumɔɔ lɛ lɛ, nakai nɔŋŋ efee nibii pii ni hãa wɔnaa akɛ esumɔɔ wɔ. Akɛ nɔkwɛmɔnɔ lɛ, Yehowa ehã wɔbatsɔmɔ enanemɛi, ni ehã wɔ nyɛmimɛi pii ni sumɔɔ wɔ ni hãa wɔnáa miishɛɛ ni shɛjeɔ wɔmii kɛ́ wɔhao. (Yoh. 6:44) Agbɛnɛ hu, etsɔɔ wɔ nii be fɛɛ be koni wɔhemɔkɛyeli lɛ mli awa, ni eyeɔ ebuaa wɔ ni wɔná wɔhiamɔ nii daa gbi. (Mat. 6:31, 32) Kɛ́ wɔsusu nibii ni Yehowa efee kɛtsɔɔ akɛ esumɔɔ wɔ lɛ ahe lɛ, no baahã wɔsumɔ lɛ waa.

10. Kɛ́ wɔkwɛ bɔ ni Yehowa kɛ wɔnyɛmimɛi lɛ yeɔ ehãa lɛ, mɛɛ gbɛ nɔ no baaye abua wɔ?

¹⁰ Yehowa sumɔɔ wɔnyɛmimɛi Kristofoi lɛ waa. Shi bei komɛi lɛ, ewa kɛhã wɔ akɛ wɔbaasumɔ amɛ ni wɔfee nibii ni baahã amɛna akɛ wɔsumɔɔ amɛ. Mɛni hewɔ ebaa lɛ nakai? Nɔ kome ji akɛ, esoro he ni wɔteŋ mɔ fɛɛ mɔ jɛ kɛ bɔ ni atsɔse lɛ ahã. Agbɛnɛ hu, wɔ fɛɛ wɔtɔ̃ɔ ni wɔfeɔ nibii ni gbaa wɔnyɛmimɛi lɛ anaa. Shi fɛɛ sɛɛ lɛ, wɔbaanyɛ wɔsumɔ nyɛmimɛi lɛ. Mɛni baaye abua wɔ ni wɔnyɛ wɔfee nakai? No ji, ni wɔbaakase nibii ni Yehowa wɔ-Tsɛ lɛ feɔ kɛtsɔɔ akɛ esumɔɔ wɔnyɛmimɛi lɛ. (Efe. 5:1, 2; 1 Yoh. 4:19) Nyɛhãa wɔkwɛa bɔ ni wɔbaafee wɔkase Yehowa.

11. Mɛni Yesu fee ni tsɔɔ akɛ ekase bɔ ni Yehowa ‘musuŋ tsɔɔ lɛ’ yɛ mɛi ahe lɛ?

¹¹ Yehowa ‘musuŋ tsɔɔ lɛ’ waa. (Luka 1:78) Mɔ ko ni musuŋ tsɔɔ lɛ lɛ, kɛ́ ena ni mɛi miipiŋ lɛ, enuɔ he ehãa amɛ ni ekwɛɔ nɔ ni ebaanyɛ ni efee kɛye ebua amɛ ni eshɛje amɛmii. Yesu kase Yehowa ni emusuŋ tsɔ lɛ yɛ mɛi ahe. (Yoh. 5:19) Akɛ nɔkwɛmɔnɔ lɛ, be ko be ni Yesu na mɛi babaoo ko bua shi lɛ, “amɛnii fee lɛ mɔbɔ, ejaakɛ afee amɛ niseniianii, ni akpoo amɛ tamɔ gwantɛŋi ni bɛ kwɛlɔ.” (Mat. 9:36) Yesu nu he ehã mɛi nɛɛ, shi efee nɔ ko hu efata he. Etsa amɛteŋ mɛi ni bɛ hewalɛ lɛ, ni ehã amɛteŋ mɛi ni amɛnaagbai efee tamɔ ‘jatsui ni tsii’ lɛ ahe jɔ amɛ.​—Mat. 11:28-30; 14:14.

12. Mɛni wɔbaanyɛ wɔfee kɛtsɔɔ akɛ wɔmusuŋ tsɔɔ wɔ yɛ wɔnyɛmimɛi lɛ ahe?

¹² Ja wɔsusu naagbai ni wɔnyɛmimɛi lɛ kɛkpeɔ lɛ ahe dani wɔmusuŋ baatsɔ wɔ yɛ amɛhe ni wɔye wɔbua amɛ. Akɛ nɔkwɛmɔnɔ lɛ, ŋɔɔ lɛ akɛ nyɛmi yoo ko miiye hela ko ni naa wa. Ewieee he pii etsɔɔɔ mɛi, shi ŋwanejee ko bɛ he akɛ, kɛ́ mɔ ko ye ebua lɛ lɛ, ebaasumɔ waa. Obaanyɛ obi ohe akɛ: ‘Te efeɔ tɛŋŋ etsuɔ eshĩa nii? Ani manyɛ maye mabua lɛ kɛ nihoomɔ loo shĩa saamɔ?’ Aloo ŋɔɔ lɛ akɛ nyɛmi nuu ko nitsumɔ eŋmɛɛ lɛ. Ani obaanyɛ ohã lɛ shika fioo ni ekɛfolɔ ehe fiofio kɛyashi ebaaná nitsumɔ lɛ eko? Ni ani ekolɛ obaanyɛ ofee nakai bɔ ni enaŋ akɛ bo oŋɔɔ shika lɛ jɛ?

13-14. Mɛɛ gbɛ nɔ wɔbaanyɛ wɔfee mɛi ejurɔ tamɔ bɔ ni Yehowa feɔ mɛi ejurɔ lɛ?

 ¹³ Yehowa mli hi ni efeɔ ejurɔ waa. (Mat. 5:45) Esaaa akɛ wɔmɛɔ ni wɔnyɛmimɛi lɛ babiɔ wɔdɛŋ yelikɛbuamɔ dani wɔye wɔbua amɛ. Esa akɛ wɔkase Yehowa ni wɔ tsutsu wɔfee nɔ ko kɛye wɔbua amɛ dani amɛbi wɔ po. Yehowa emɛɛɛ ni wɔbi lɛ dani ehã hulu lɛ aje ehã wɔ, ni kɛ́ hulu lɛ je lɛ, mɛi ni hiɛ sɔɔ nii kɛ mɛi ni hiɛ esɔɔɔ nii fɛɛ náa he sɛɛ. Bɔ ni Yehowa hãa wɔ nibii ni he hiaa wɔ lɛ hãa wɔnaa akɛ, esumɔɔ wɔ waa. Wɔ hu wɔsumɔɔ lɛ waa, ejaakɛ emli hi ni efeɔ ejurɔ!

¹⁴ Wɔnyɛmimɛi lɛ kaseɔ Yehowa, wɔ-Tsɛ ni yɔɔ ŋwɛi lɛ, ni amɛfeɔ mɛi ejurɔ. Akɛ nɔkwɛmɔnɔ lɛ, yɛ afi 2013 lɛ, kɔɔyɔɔ ko ni naa wa waa ni atsɛɔ lɛ Super Typhoon Haiyan lɛ fite nii waa yɛ Philippines. Wɔnyɛmimɛi lɛ pii ashĩai kɛ amɛnibii fɛɛ ahiɛ kpãtã. Shi wɔnyɛmimɛi ni yɔɔ jeŋ fɛɛ lɛ ye amɛbua amɛ oya nɔŋŋ. Amɛteŋ mɛi komɛi tsu onia ni akɛyaye abua amɛ, ni mɛi komɛi hu ye amɛbua ni asaa loo amamɔ tsũi aaafee 750 yɛ nɔ ni shɛɛɛ afi mli. Yɛ COVID-19 be nɛɛ mli lɛ, wɔnyɛmimɛi lɛ ekomɛi eye amɛbua nyɛmimɛi krokomɛi. Kɛ́ wɔhe fee oya kɛye wɔbua wɔnyɛmimɛi Kristofoi lɛ, no hãa amɛnaa akɛ wɔsumɔɔ amɛ.

15-16. Yɛ nɔ ni awie yɛ Luka 6:36 lɛ naa lɛ, mɛni ji nɔ ko ni he hiaa waa ni kɛ́ wɔfee lɛ no baatsɔɔ akɛ wɔmiikase wɔ-Tsɛ Yehowa?

¹⁵ Yehowa naa wɔ mɔbɔ, ni ekɛ wɔhe eshai keɔ wɔ hu. (Kanemɔ Luka 6:36.) Daa gbi lɛ wɔtɔ̃ɔ, shi wɔ-Tsɛ ni yɔɔ ŋwɛi lɛ naa wɔ mɔbɔ ni ekɛ wɔhe eshai lɛ keɔ wɔ. (Lala 103:10-14) Yesu sɛɛnyiɛlɔi lɛ yeee emuu, shi ena amɛ mɔbɔ ni ekɛ amɛtɔmɔi ke amɛ. Ejɛ esuɔmɔ mli ekɛ ewala po shã afɔle koni anyɛ akɛ wɔhe ‘eshai lɛ ake’ wɔ. (1 Yoh. 2:1, 2) Bɔ ni Yehowa kɛ Yesu naa wɔ mɔbɔ ni amɛkɛ wɔhe eshai keɔ wɔ lɛ hãa wɔsumɔɔ amɛ waa, aloo jeee nakai?

¹⁶ Kɛ́ wɔkɛ wɔnyɛmimɛi lɛ atɔmɔi ke amɛ tswaa lɛ, ehãa suɔmɔ ni yɔɔ wɔteŋ lɛ mli waa. (Efe. 4:32) Bei komɛi lɛ, ewa waa akɛ wɔkɛ mɛi atɔmɔi baake amɛ, shi esa akɛ wɔmia wɔhiɛ. Nyɛmi yoo ko tsɔɔ akɛ nɔ ni ye ebua lɛ ni enyɛ efee nakai ji, sane ko ni je kpo yɛ Buu-Mɔɔ lɛ mli ni yitso ji, “Nyɛkɛfafaa Nyɛhe” lɛ. * Ewie  akɛ: “Be ni mikase nakai sane lɛ, eye ebua mi ni mina akɛ, kɛ́ mikɛ mɛi atɔmɔi ke amɛ lɛ, mináa he sɛɛ. Awie yɛ nakai Buu-Mɔɔ lɛ mli akɛ, ‘Kɛ́ wɔkɛ mɛi atɔmɔi fa amɛ lɛ, no etsɔɔɔ akɛ wɔbu nɔ ni amɛfee lɛ akɛ eja, loo wɔfee wɔnii tamɔ nɔ ni amɛnifeemɔ lɛ gbaaa mɛi anaa. Shi no tsɔɔ akɛ esa akɛ wɔjie mlifu lɛ yɛ wɔmli kwraa, ni wɔnu he akɛ wɔyɛ mligbɛ toiŋjɔlɛ.’” Kɛ́ wɔkɛ wɔnyɛmimɛi lɛ atɔmɔi ke amɛ tswaa lɛ, no tsɔɔ akɛ wɔsumɔɔ amɛ ni wɔmiikase wɔ-Tsɛ Yehowa.

17. Yɛ nɔ ni awie yɛ Mateo 5:16 lɛ naa lɛ, mɛni wɔbaanyɛ wɔfee kɛwo Yehowa, wɔ-Tsɛ ni yɔɔ ŋwɛi lɛ, hiɛ nyam?

¹⁷ Eŋɔɔ wɔnaa waa akɛ wɔyɛ nyɛmimɛi ni sumɔɔ wɔ yɛ je lɛŋ fɛɛ ni wɔ kɛ amɛ efee ekome akɛ weku. Wɔmiitao mɛi babaoo abafata wɔhe kɛjá wɔ-Nyɔŋmɔ lɛ. Enɛ hewɔ lɛ, esa akɛ wɔkwɛ jogbaŋŋ ni wɔkafee nɔ ko ni baahã awie Yehowa webii lɛ loo wɔ-Tsɛ Yehowa diɛŋtsɛ po he efɔŋ. Esa akɛ wɔba wɔjeŋ bɔ ni baahã mɛi aná he miishɛɛ akɛ amɛbaabo sane kpakpa lɛ toi.​—Kanemɔ Mateo 5:16.

18. Mɛni baaye abua wɔ ni wɔkashe gbeyei akɛ wɔbaashiɛ?

¹⁸ Bei komɛi lɛ, mɛi baajɛ wɔ loo amɛbaawa wɔyi yɛ Yehowa, wɔ-Tsɛ ni yɔɔ ŋwɛi lɛ toi ni wɔtaoɔ wɔbo lɛ hewɔ. Aloo wɔ diɛŋtsɛ po wɔbaashe gbeyei kɛ́ wɔyaashiɛ wɔhã mɛi. Mɛni baaye abua wɔ yɛ shihilɛi ni tamɔ nakai lɛ amli? Esa akɛ wɔkɛ wɔhiɛ afɔ̃ Yehowa kɛ e-Bi lɛ nɔ akɛ amɛbaaye amɛbua wɔ. Yesu kɛɛ ekaselɔi lɛ akɛ ‘amɛkaye amɛtsui yɛ bɔ ni amɛbaawie loo nɔ ni amɛbaawie lɛ he.’ Mɛni hewɔ? ‘Ejaakɛ akɛ nɔ ni amɛbaawie lɛ baahã amɛ yɛ nakai ŋmɛlɛtswaa lɛ nɔ nɔŋŋ, ejaakɛ jeee amɛ amɛwieɔ lɛ, shi moŋ amɛ-Tsɛ lɛ mumɔ lɛ ni tsɔɔ amɛnɔ ewieɔ lɛ.’​—Mat. 10:19, 20.

19. Gbaa niiashikpamɔ ko ni tsɔɔ bɔ ni nyɛmi nuu ko fee ekãa ni eshiɛ.

¹⁹ Naa niiashikpamɔ ni nyɛmi nuu ko ni yɔɔ South Africa ni atsɛɔ lɛ Robert lɛ ná. Be ni akɛ lɛ bɔi Biblia lɛ kasemɔ ni ebɛ Biblia lɛ he nilee pii lɛ, amɔ lɛ ni akɛ lɛ tee kɔɔtu koni eyatsɔɔ nɔ hewɔ ni ekɛ ehe wooo asraafoi anitsumɔ lɛ mli. Efee ekãa ni ekɛɛ kɔɔtu lɛ akɛ esumɔɔ enyɛmimɛi Kristofoi lɛ asane waa, ni no hewɔ esumɔɔɔ  ni ekɛ ehe woɔ asraafoi anitsumɔ lɛ mli lɛ. Nɔ ni ewie nɛɛ hãa wɔnaa akɛ, enaa ehe akɛ efata Yehowa tsuji ni efee ekome tamɔ weku lɛ ahe. Nɔŋŋ ni kojolɔi lɛ eko bi lɛ akɛ: “Namɛi ji onyɛmimɛi lɛ?” Robert kpaaa gbɛ kwraa akɛ abaabi lɛ sane ni tamɔ nakai. Shi amrɔ nɔŋŋ ni ekai nakai gbi lɛ lɛ ŋmalɛ lɛ ni je kpo yɛ Mateo 12:50 lɛ. Jɛmɛ kɛɔ akɛ: “Mɔ fɛɛ mɔ ni feɔ mi-Tsɛ ni yɔɔ ŋwɛi lɛ suɔmɔnaa nii lɛ, nakai mɔ lɛ ji minyɛmi nuu kɛ minyɛmi yoo kɛ mimami.” Eyɛ mli akɛ no mli lɛ kpaako akɛ Robert ebɔi nikasemɔ moŋ, shi Yehowa mumɔ lɛ ye ebua lɛ ni ehã nakai sanebimɔ lɛ kɛ sanebimɔi krokomɛi ni ekpaaa gbɛ lɛ ahetoo. Ŋwanejee ko bɛ he akɛ, Yehowa ná Robert he miishɛɛ waa! Nakai nɔŋŋ enáa wɔhe miishɛɛ kɛ́ wɔkɛ wɔhiɛ fɔ̃ enɔ ni wɔfee ekãa wɔshiɛ yɛ shihilɛi ni mli wawai po amli.

20. Mɛni esa akɛ wɔtswa wɔfai shi akɛ wɔbaafee? (Yohane 17:11, 15)

²⁰ Eŋɔɔ wɔnaa waa akɛ wɔyɛ weku ni sumɔɔ wɔ. Wɔyɛ Tsɛ ni nɔ bɛ kɛ nyɛmimɛi ni shwɛɛɛ wɔhe kwraa. Esa akɛ wɔhiɛ asɔ weku nɛɛ waa. Satan kɛ ewebii lɛ ahe tsɛ̃ɔ wɔ waa, ni amɛmiisumɔ ni wɔnu he akɛ wɔ-Tsɛ ni yɔɔ ŋwɛi lɛ sumɔɔɔ wɔ, ni agbɛnɛ hu, amɛfite ekomefeemɔ ni yɔɔ wɔ kɛ wɔnyɛmimɛi lɛ ateŋ lɛ. Shi Yesu sɔle ehã wɔ ni ekɛɛ wɔ-Tsɛ lɛ akɛ ekwɛ wɔnɔ koni wɔya nɔ wɔfee ekome akɛ weku. (Kanemɔ Yohane 17:11, 15.) Yehowa miihã sɔlemɔ nɛɛ hetoo. Yesu yiŋ efeee lɛ kɔshikɔshi akɛ e-Tsɛ ni yɔɔ ŋwɛi lɛ sumɔɔ lɛ ni ebaaye ebua lɛ, ni nakai nɔŋŋ esaaa akɛ wɔyiŋ feɔ wɔ kɔshikɔshi yɛ enɛ he kɔkɔɔkɔ. Nyɛhãa wɔtswaa wɔfai shi akɛ, wɔbaaya nɔ wɔfee nibii ni baahã wɔsumɔ Yehowa kɛ wɔnyɛmimɛi Kristofoi lɛ waa.