1. Kouman Jézi aplé Jéova, é kisa sa ka montré nou ?

ANNAN fanmi sa-ya ki ka adoré Jéova i gen Jézi, « prémyé-a ki fèt annan tousa Bondjé kréyé », ké roun lo patché zanj (Col. 1:15 ; Ps. 103:20). Lò Jézi té asou latè-a, i di ki sa-ya ki fidèl té pouvé yé menm osi wè Jéova kou yé Papa. A sa, paské lò i té ka palé pou so disip-ya, i aplé Jéova « mo Papa ki sa zòt Papa » (Jean 20:17). Dipi nou ka vouwé nou kò pou Jéova é nou ka batizé, nou ka antré annan roun fanmi frè ké sò ki kontan yé konpanyen (Marc 10:29, 30).

2. Kisa nou ké wè annan sa artik-a ?

² Roun ran pa ka rivé wè Jéova kou roun papa ki plen ké lanmou. Rounòt ran pa savé kouman pou yé montré yé frè ké sò-ya ki yé kontan yé. Annan sa artik-a, nou ké wè kouman èkzanp Jézi pouvé idé nou wè Jéova kou roun papa ki kontan nou é ki nou pouvé vini pi pròch ké li. Nou ké wè osi ki nou divèt fè ké nou frè ké sò-ya kou Jéova ka fè ké yé.

3. Annan lapriyè Jézi anprann so disip-ya, kisa ki ka montré nou ki Jéova lé nou pròch ké li ?

³ Jéova sa roun papa ki kontan nou, é Jézi lé ki nou wè Jéova kou li menm ka wè li. Pou Jézi, Jéova sa roun papa plen ké lanmou, roun moun nou pouvé palé ké li lò nou lé. A pa roun moun ki pa janti é ki ka fè yenki koumandé nou. Nou ka byen wè sa annan lapriyè Jézi anprann so disip-ya. I ka koumansé konsa : « Nou Papa » (Mat. 6:9). Jézi té pouvé di nou aplé Jéova « Tou-Pwisan », « Kréyatèr »  ouben « Rwa pou tout-tan » (Gen. 49:25 ; Is. 40:28 ; 1 Tim. 1:17). A pa té ké roun mové bagaj paské Labib-a ka sèrvi tout sa tit-ya pou palé di Jéova. Mé a pa sa i fè. I di nou aplé Jéova « Papa ».

4. Kouman nou savé ki Jéova lé vin pi pròch ké nou ?

⁴ Ès sa rèd pou to wè Jéova kou roun papa ki kontan nou ? A pa to rounso ki annan sa sitiasyon-an. Si to papa pa té janti ké to, pitèt sa pa fasil pou to konprann ki nou pouvé gen roun papa ki kontan nou. Mé, sa ka rasiré nou lò nou savé ki Jéova ka byen konprann sa nou gen annan nou tchò ! I lé vin pròch ké nou. A pou sa i ka di nou annan so Paròl : « Vini pi pròch di Bondjé, é i ké vini pi pròch di zòt » (Jacq. 4:8). Jéova kontan nou é i ka promèt nou ki i ké sa pi bon Papa nou pa janmen wè.

5. Dapré Luc 10:22, kouman Jézi ka idé nou vin pi pròch ké Jéova ?

⁵ Jézi pouvé idé nou vin pi pròch ké Jéova. I byen konnèt li é a li ki ka imité so kalité-ya pi byen. A pou sa i té pouvé di : « Moun-an ki wè mo, wè Papa-a osi » (Jean 14:9). Kou roun gran frè, Jézi ka anprann nou rèspèkté ké kouté nou Papa. É i ka èspliké nou kisa nou divèt fè pou nou pa fè li lapenn é pou nou fè so tchò kontan. Mé lò i té asou latè-a, Jézi fè nou konprann èspésyalman kouman nou Papa bon ké plen ké lanmou (li Luc 10:22). Annou wè kouman Jéova ka montré sa bèl kalité-ya.

6. Annan ki sitiasyon èspésyal Jéova kouté Jézi ?

⁶ Jéova ka kouté so pitit. Parèkzanp, Jéova kouté patché lapriyè so prémyé Pitit fè pou li lò i té asou latè-a (Luc 5:16). Jézi té ka priyè lò i té gen gran désizyon pou pran kou lò i té divèt chwazi so 12 apot-ya, é Jéova té ka kouté l’ (Luc 6:12, 13). Jézi té ka priyè lò i té enkyèt, é Jéova té ka kouté l’. Pou fini, jis anvan Jida trayi l’, Jézi priyè parapòrta tousa ki té ké rivé l’, é Jéova kouté l’. Mé a pa kouté i kouté so Pitit rounso ;  i voyé osi roun zanj pou bay li fòrs (Luc 22:41-44).

7. Kisa sa ka fè to lò to savé ki Jéova ka kouté lapriyè so sèrvitèr-ya ?

⁷ Jòdla kou anvan, Jéova ka kouté lapriyè so sèrvitèr-ya, é i ka réponn lò sa pi bon pou nou mé osi fason-an sa pi bon pou nou (Ps. 116:1, 2). Annou wè kouman Jéova réponn lapriyè roun sò ki ka rété an End. I té ka enkyèt toulong, a roun maladi ki konsa. É i té ka priyè bokou pou sa. Men sa i ékri : « Émisyon Télé JW ki soti an mé 2019, té ka èspliké kouman nou pouvé briga ké sa zafè enkyétid ké angwas, é a té sa menm mo té bézwen. A té répons pou tout lapriyè mo té fè ! »

8. Kouman Jéova montré Jézi ki i té kontan li ?

⁸ Jéova kontan nou é i ka pran swen di nou, menm fason i té kontan Jézi é i pran swen di li pannan tout so lavi asou latè-a (Jean 5:20). I idé Jézi fè so lafwa rété fò, i ankourajé li lò i pa té byen, é i bay li tousa i té bézwen pou viv. É i pa té pè di li ki i té kontan li é ki i té fyèr di li (Mat. 3:16, 17). Kou Jézi té savé ki i té pouvé konté asou so Papa annan syèl-a ki té kontan li, i pa jen santi so kò tousèl (Jean 8:16).

9. Kisa ki ka montré nou ki Jéova kontan nou ?

⁹ Kou Jézi, nou ka wè lanmou Jéova annan plizyèr bagaj. Jéova pèrmèt nou divini so zanmi é i bay nou roun patché frè ké sò ki kontan nou, ki ka fè nou tchò kontan, é ki ka ankourajé nou lò nou pa gen fòrs (Jean 6:44). Anplis di sa, i ka bay nou roun manjé èspirityèl ki ka bay nou fòrs. Pou fini, i jis ka idé nou gen sa nou bézwen pou viv (Mat. 6:31, 32). Pi nou ka réfléchi asou lanmou Jéova gen pou nou pi nou kontan l’.

10. Lò nou ka réfléchi asou fason Jéova ka fè ké nou frè ké sò-ya, kisa sa ka bay nou anvi fè ?

¹⁰ Jéova kontan nou frè ké sò-ya. Mé pitèt sa rèd pou nou kontan nou frè ké sò-ya ouben pou nou di yé ki nou kontan yé. Détan, sa rèd paské nou pa gen menm kiltir-a ouben nou pa lévé menm fason-an. É nou tout ka fè bagaj ki pouvé fè ròt-ya kòlè ouben fè yé lapenn. Mé nou chak nou pouvé fè roun bagaj pou lanmou nou gen pou nou konpanyen vin pi fò. Kouman nou pouvé fè sa ? A pou nou imité nou Papa (Éph. 5:1, 2 ; 1 Jean 4:19). Annou wè sa so èkzanp ka anprann nou.

11. Kouman Jézi montré nou konpasyon Jéova gen pou nou ?

¹¹ Jéova ka montré moun-yan roun « konpasyon ki plen ké tandrès » (Luc 1:78). Roun moun ki gen konpasyon ka santi soufrans ròt-ya ; i ka chaché idé yé ké konsolé yé. Fason Jézi té ka fè ké ròt-ya té ka montré konpasyon Jéova té gen pou yé (Jean 5:19). Roun jou, lò i wè roun patché moun, « so tchò raché, paské yé té tou kanyankanyan ké pédi kou mouton ki pa gen bèrjé » (Mat. 9:36). Mé a pa yenki santi i santi roun bagaj annan so tchò pou tout sa moun-yan, i fè roun bagaj pou yé. I géri sa-ya ki té malad é i konsolé sa-ya ‘ki té las é ki té ka poté roun fardo byen lou’ (Mat. 11:28-30 ; 14:14).

12. Kouman nou pouvé montré nou gen konpasyon pou nou frè ké sò-ya ? Bay roun èkzanp.

¹² Pou nou pouvé montré sa konpasyon-an pou nou frè ké sò-ya, nou divèt konnèt ki problèm yé ka jwenn. Pitèt i gen roun sò annan nou asanblé ki gen roun maladi ki grav, i pa jen ka plenn so  kò, mé, ès i pa té ké kontan roun moun idé l’ ? Ès i ka rivé bay so fanmi sa yé bézwen pou viv ? Ès nou pouvé fè manjé pou li ouben idé li nétwayé so kaz ? Ouben pitèt roun frè annan nou asanblé pédi so travay. Ès nou pouvé bay li roun ti soumaké, san i pa savé a nou, pou idé li tan i pòkò trouvé rounòt travay ?

13-14. Kouman nou pouvé montré ki nou kontan bay kou Jéova ?

¹³ Jéova kontan bay (Mat. 5:45). Nou pa divèt antann nou frè ké sò-ya vini doumandé nou idé yé pou nou pouvé montré yé nou konpasyon. Kou Jéova, annou pran douvan. I ka fè solèy-a lévé chak jou san nou pa doumandé li anyen. É tout moun ka profité di chalò solèy-a, pa sèlman sa-ya ki ka di Jéova mèrsi. Sa ka vréman montré nou ki i kontan nou ! I vréman bon é i kontan bay, é i ka bay nou tousa nou bézwen. Ès sa pa ka bay to anvi kontan l’ ?

¹⁴ Kou nou Papa ki annan syèl-a, roun patché frè ké sò ka pran douvan pou bay yé konpanyen san konté. Annou pran roun èkzanp. An 2013, roun gro tanpèt yé aplé Haiyan pasé o Filipin é i krazé tout bagaj. Roun patché Témwen Jéova pédi yé kaz ké tousa yé té gen. Mé yé frè ké sò-ya asou tout latè-a pa fè ni roun ni dé, yé idé yé. Roun patché annan yé bay soumaké ouben vini idé pou ranjé ouben konstrwi près 750 kaz é yé pa menm pran roun lannen pou fè sa ! I pa gen lontan, pannan pandémi Covid-19-a, nou idé nou konpanyen. A konsa nou montré ki nou kontan tout nou frè ké sò-ya.

15-16. Dapré Luc 6:36, kisa nou divèt fè pou nou imité nou Papa ?

¹⁵ Jéova gen mizérikòrd é i paré pou pardonnen (li Luc 6:36). A touléjou nou Papa ki annan syèl-a ka pardonnen nou (Ps. 103:10-14). Menm fason-an, lò Jézi té asou latè-a, i té ka pardonnen so disip-ya ki pa té parfè ; i pa té ka rété asou sa yé té ka fè ki pa té bon. É i jis asèpté bay so lavi an sakrifis pou Jéova pouvé pardonnen nou péché ! (1 Jean 2:1, 2). Lò to  ka wè ki Jéova ké Jézi gen sa bèl kalité-ya, ès sa pa ka fè to vin pi pròch ké yé ?

¹⁶ Lanmou nou gen pou nou konpanyen ka vin pi fò lò nou ka ‘pardonnen nou konpanyen ké tout nou tchò’ (Éph. 4:32). A vré, détan a pa ti rèd sa rèd pou pardonnen. Mé nou divèt fè tousa nou pouvé pou nou rivé fè l’. I gen roun artik annan La Tour de Garde ki idé roun sò toubonnman. So tèm a té : « Pardonnons-nous volontiers les uns aux autres * ». Men sa i ka di : « Sa artik-a idé mo konprann kouman pardonnen ròt-ya pouvé idé mo. Sa artik-a ka èspliké ki lò to ka pardonnen ròt-ya, sa pa lé di ki to ka pansé ki sa yé fè to a té roun bon bagaj, ouben ki sa pa fè to lapenn. Lò to ka pardonnen, sa lé di ki to pa ka rété faché ké moun-an é a konsa to pouvé kontinyé gen lapè annan to tchò. » Lò nou ka pardonnen nou frè ké sò ké tout nou tchò, nou ka montré yé ki nou kontan yé é nou ka imité nou Papa, Jéova.

17. Dapré Matthieu 5:16, kouman nou pouvé bay nou Papa ki annan syèl-a lònò ?

¹⁷ A pa ti kontan nou kontan fè parti di roun fanmi ki asou tout latè-a, koté tout moun kontan yé konpanyen ! Nou lé plis moun vini jwenn nou pou nou adoré Jéova ansanm. Mé pou nou rivé fè sa, a pou nou panga pa sali répitasyon Jéova ouben sa di so pèp. Nou divèt fè tousa nou pouvé pou aji roun fason ki ké bay yé anvi kouté bon nouvèl-a (li Matthieu 5:16).

18. Kisa ki ké bay nou kouraj pou préché ?

¹⁸ Détan, roun ran ka kritiké nou ouben menm yé ka fè nou méchansté paské nou ka obéyi nou Papa ki annan syèl-a. Kisa nou pouvé fè si nou pè palé di sa nou ka krè ? A pou nou sir ki Jéova ké so Pitit ké idé nou. Jézi èspliké so disip-ya ki yé pa té ké bézwen enkyété pou savé sa yé té ké divèt di ouben fason yé té ké divèt di l’. Poukisa ? I di : « Bondjé ké fè zòt savé sa zòt ké divèt di sa moman-an. Paské a pa  zòt rounso ki ka palé ; mé a lèspri zòt Papa ki ka sèrvi zòt bouch pou palé » (Mat. 10:19, 20).

19. Kisa ki idé Robert gen kouraj pou préché ?

¹⁹ Annou palé di Robert. I gen plizyèr lannen, lò i té fin koumansé étidyé Labib-a é ki i pa té konnèt bokou bagaj annan l’, i té divèt alé douvan roun tribinal militèr an Afrik di Sid pou èspliké jij-a poukisa i pa té lé antré annan larmé. Pou défann so kò, i èspliké ké bokou kouraj ki i pa té lé mélé annan lapolitik paské i té kontan so frè ké sò-ya. I di ki i té kontan fè parti di roun bèl fanmi frè ké sò. Mé roun jij doumandé li : « A kimoun to frè ké sò-ya ? » Robert pa té préparé so kò pou réponn sa késyon-an. Mé lanmenm, i sonjé tèks pou koumansé lajournen-an i té li sa jou-a. A té Matthieu 12:50 : « Paské moun-an ki ka fè volonté mo Papa ki annan syèl-a, a li ki sa mo frè, mo sò ouben mo manman. » Menm si Robert pa té ka étidyé Labib-a dipi lontan, lèspri Jéova-a idé li réponn sa késyon-an ké plizyèr ròt késyon ankò, menm si i pa té préparé so kò pou sa. Jéova té divèt fyèr di Robert ! I fyèr di nou osi lò nou ka konté asou li pou palé di nou lafwa ké kouraj, menm si nou annan roun sitiasyon ki rèd.

20. Dapré lapriyè Jézi fè nou ka jwenn annan Jean 17:11, 15, kisa nou divèt byen désidé fè ?

²⁰ Annou pa janmen arété di Jéova mèrsi paské nou ka fè parti di sa bèl fanmi-a koté tout moun kontan yé konpanyen. Nou gen pi bon Papa nou pouvé gen-an ké frè ké sò ki kontan nou. Annou pa janmen wè sa bagaj-ya kou roun bagaj ki nòrmal. Satan ké sa-ya ki ka maché ké li rayi nou ; yé ka éséyé fè nou douté ki nou Papa ki annan syèl-a kontan nou é i ka éséyé mété dézòrd annan nou fanmi. Érèzman, Jézi priyè pou nou : i doumandé nou Papa louvri wéy asou nou pou nou fanmi rété ansanm ansanm (li Jean 17:11, 15). É Jéova kouté so lapriyè. Kou Jézi, a pou nou sir ki nou Papa ki annan syèl-a kontan nou é ki i ké toujou la pou idé nou. É a pou nou byen désidé toujou vin pi pròch di Jéova ké nou frè ké sò-ya !