1. Ami Jehovak kitem mhunn ulo korunk zata?

JEHOVACHEA familint konn asa? Tachea ‘rochnnam modlo Malgoddo’ put Jezu, lak’khamnim ainz ani ami pasun. (Kol. 1:15; St. 103:20) Karonn ami Jehova Devak, Bap mhunn ulo korunk zata mhunn Jezun xikoilem. Prithumer astana, Jezun aplea xisank Jehova vixim sangtana oxem sanglem: ‘Mhojo Bap ani tumcho Bap.’ (Juanv 20:17) Tor ami somorponn korun bautizm ghetat tednam Jehovachea familiche bhag zatat, zoim amkam mogall bhav-bhoinnam mellttat.—Marku 10:29, 30.

2. Ami hea lekhant kitem polloitolim?

² Punn thoddea zannank Jehova ek mogall Bapui mhunn manun gheunk vo amchea bhav-bhoinnank mog dakhounk kotthin zaunk xokta. Tor Jehova ek mogall Bapui zaun asa ani ami tachea lagim soronk zata mhunn Jezun koxem dakhoilem, ani Jehovachi dekh gheun ami amchea bhav-bhoinnancho koso mog korunk zata tem ami hea lekhant polloitolim

3. Amchea Bapa magnnea thaun Jehova ek mogall Bapui mhunn Jezun koxem dakhoilem?

³ Jehovak, ami doia naslolo ek patranv nhoi punn ek mogall Bapui mhunn lekhlolo Jezuk zai aslo. Oxem ami kiteak mhunnonk zata? Jezun amkam xikoil’lea “Amchea Bapa” magnnea vixim chintat. Tea magnneant tannem Jehovak “Sorvpodvedar,” ‘Rochnnar,’ vo ‘Kallam-Iugancho Rai’—mhunn ulo korunk zata aslem ani oxem mhunnop chukichem nhoi. (Ut. 49:25; Iz. 40:28; 1 Tim. 1:17). Punn “Amchea Bapa” mhunn ulo korun ami Jehova sangata ek laginchi ixttagot zoddunk zata mhunn tannem dakhoilem.—Mt. 6:9

4. Ami tachim ixtt zalolim Jehovak zai mhunn amkam koxem kolltta?

 ⁴ Tumchea familint tumchea bapai koddlean tumkam mog mellonk na zalear Jehova ek mogall bapui mhunn manun gheunk tumkam kotthin zaunk xokta. Punn tumkam koxem bhogta ani tumkam toxem kiteak dista tem Jehova bore toren zannam mhunn tumi khatri dovrunk zata. Tea pasot, to oxem sangta: “Jitlim tumi Devak lagim sortat, titlo Dev tumkam lagim sortolo.” (Jak. 4:8) Tor hantuntlean, ami Jehovachim ixtt zalolim taka zai ani to amcho mog korta mhunn amkam kollon ieta. Khorench to amcho ekdom boro Bapui zaun asa!

5. Lukas 10:22-a pormonnem, Jehovache ixtt zaunk Jezu amkam koso modot korunk xokta?

⁵ Jehova ek mogall Bapui mhunn zannam zaun tache ixtt zaunk, Jezu amkam modot korunk xokta. Karonn to Jehovak bore toren vollkhota ani tannem tache gunn ekdom bore toren dakhoileat. Hea karonnak lagon Jezu oxem mhunnttlem: “Jim konn Mhaka polletat, tim Mhojea Bapak polletat.” (Juanv 14:9) Familintlo vhoddlo put jea toren dusrea bhurgeank bori dekh dovorta teach toren Jezun, ami Jehovak man diunk, taka khuxal korunk, ani tachi maniotai mellon gheunk kitem korunk zai hea vixim ek bori dekh dovorlea. Punn khas korun Jezuchea jivitantlean Jehova ek doiall ani mogall Bapui mhunn amkam kollon ieta. (Lukas 10:22 vachat.) Hea vixim ami atam polloum-ia.

6. Jehovan Jezuchea magnneak kan dilo mhunn ami kiteak mhunnonk zata?

⁶ Ek mogall bapui aplea bhurgeank kan dita. Toxench, Jehova amchea magnneank kan dita. Udharonnak, Jezu prithumer aslo tednam tannem zaite pavtti Jehovak magnnem kelem ani Jehovan tachem aikolem. (Lukas 5:16) Zoxem, aplea 12 apostlank vinchun kaddcho nirnnoi gheunchea poilim tannem magnnem kelem ani Jehovan tachem aikolem. (Lukas 6:12, 13) Toxench, to morchea poilim kitem soglem ghoddttolem tea vixim taka usko zalo tednam tannem magnnem kelem ani Jehovan aikon tachea adarak eka ainzak dhaddlo.—Lukas 22:41-44.

7. Jehova amchim magnnim aikota mhunn zannam zalolean tumkam koxem dista?

 ⁷ Tor Jehovan Jezuchim magnnim aikolim toxim, to aiz amchim magnnim aikota ani sarkea vellar ani sarke ritin tancho zobab dita. (St. 116:1, 2) Hea vixim, Bharotant ravpi ek bhoinnicho onnbhov ami polloum-ia. Tika chodduch usko zatalo ani modotik lagon tinnem Jehovak magnnem kelem. Magir kitem zalem tem ti sangta: “May 2019 JW Broadcasting^® ailo tednam tantunt usko koso pois korunk zata tea vixim mahiti dil’li. Tor hea toren, Jehovan mhojea magnneank zobab dilo mhunn mhaka kollon ailem.”

8. Jehovan Jezucho mog kelo mhunn amkam koxem kolltta?

⁸ Jehova ek mogall Bapui zaun asa mhunn somzonk ami portun Jezu vixim polloum-ia. Jezu prithumer aslo tednam tacho bhavarth ghott samballunk Jehovan taka modot keli. (Juanv 5:20) Toxench, to nirax zalo tednam tannem taka bhuzvonn dili ani tacheo gorzo pasun purnn keleo. Tea bhair, apunn Jezucho mog korta ani to apnnak manvota mhunn sangonk to fattim soronk na. (Mt. 3:16, 17) Haka lagon, aplo sorgincho Bap apleak lagim asa ani apleak modot kortolo mhunn Jezuk sodanch khatri asli. (Juanv 8:16) Teach bhaxen, Jehova aiz amcho pasun mog korta ani kallji gheta.

9. Jehova amcho mog korta mhunn amkam koxem kolltta?

⁹ Hea vixim chintat. Jehovan amkam aple ixtt zaunk ek vatt ukti kelea ani amkam khuxal dovrunk ani ami nirax zatat tednam amkam bhuzvonn diunk bhav-bhoinnam dileant. (Juanv 6:44) Toxench, amcho bhavarth ghott korunk ani amcheo gorzo purnn korunk to amkam modot korta. (Mt. 6:31, 32) Tor Jehovan amkam koso aplo mog dakhoila tacher ami niallttat tednam tachea pasot aslolo amcho mog anik vaddttolo.

10. Jehova amchea bhav-bhoinnancho koso mog korta tea vixim chintlolean amkam koso faido zata?

¹⁰ Atam amchea bhav-bhoinnam pasot mog koso vaddounk zata tem polloum-ia. Hem korop thodde pavtti kotthin zaunk puro. Karonn ami veg-vegllea zagea voilim asat ani amchi sonskruti veg-veglli asa. Tea bhair, ami soglim chuki kortat dekhun ami eka-mekak dukhounk xoktat. Punn Jehova amchea bhav-bhoinnnank mog koso dakhoita tacher ami niall kelo zalear tancho mog korunk amkam sompem zata. (Ef. 5:1, 2; 1 Juanv 4:19) Tor Jehovan hem koxem kelam tem polloum-ia.

11. Jezun Jehovachi dekh gheun ‘doia-maia’ koxi dakhoili?

¹¹ Jehova lokank ‘doia-maia’ dakhoita. (Lukas 1:78) Doia-maia asop mhunnttlear, trasant aslolea munxak polloun fokot churchure disop nhoi punn taka modot korop vo taka bhuzvonn divop. Tor Jehovachi dekh gheun Jezun koxi doia-maia dakhoili tem ami polloum-ia. (Juanv 5:19) Ek pavtti, lokancho vhodd zomo tannem polloilo tednam “tanche vixim To churchurtalo kiteak gonvlli naslolea menddram bhaxen teo dogdovtaleo ani niradari zal’leo asleo.” (Mt. 9:36) Punn tankam polloun Jezun kitem kelem? Taka doia-maia asli dekhun tim “koxtt kortat ani ojeachea bhara khal asat” tem polloun tannem tankam modot keli ani tanchea modem aslolea duentank borim kelim.—Mt. 11:28-30; 14:14.

12. Ami amchea bhav-bhoinnank doia-maia koxi dakhounk zata?

¹² Ami amchea bhav-bhoinnank doia-maia dakhoitolim zalear tankam koslea oddchonneancho fuddo korunk poddtta astolo tea vixim chintlear modot zatoli. Zoxem ek bhoinn khubuch duent asa. Tika aslolea oddchonneam vixim ti ghoddie sangona. Punn  tika randunk, aplem ghor nitoll korunk, aplea familik samballunk modotichi goroz asa astoli. Tor tea vixim chintun ami tika modot korunk zata. Toxench, ghoddie ek bhavachem kam gelam astolem. Tor taka anik ek kam melltta tea meren, ami dileat mhunn sangonastana thodde poixe diun, taka ami modot korunk zata.

13-14. Jehovachi dekh gheun ami udar kallzachim koxim zaunk xoktat?

¹³ Jehova ek udar kallzacho Dev zaun asa. (Mt. 5:45) Oxem ami kiteak mhunnonk zata? Amkam goroz asat teo vostu ami magchea poilinch Jehova amkam teo dita. Udharonnak tannem amkam suria dila, zachea udexim amkam sogleank, taka upkari nant tankam pasun faido zata. Tor hea vorvim Jehova amcho kitlo mog korta tem to amkam dakhoita. Ani Jehova kitlo udar kallzacho tem ami chintat tednam tachea pasot aslolo amcho mog anik vaddtta. Tor Jehovachi dekh gheun, amchim bhav-bhoinnam amchea lagim modot magchea poilinch, ami tankam modot korunk zata.

¹⁴ Udharonnak 2013-nt, Philippines desant, Haiyan nanvachem ek vhoddlem vaddoll zalemtednam zaitea bhav-bhoinnamnim aplim ghoram ani her vostu hogddaileo. Tednam sonvsarbhor aslolea bhav-bhoinnamnim zaitim denngim dilim vo bankamachea kamant vantto ghetlo. Hea vorvim, ekuch vorsa bhitor tannim sumar 750 ghoram sarkim korunk vo portun bandunk modot keli. Tea bhair, COVID-19 piddechea vellar Jehovachea Sakxeamnim aplea bhav-bhoinnank veg-vegllea toren modot keli. Hea toren, amchim bhav-bhoinnam modot magchea poilinch ami udar kallzan tankam modot korunk fuddem sortat tednam ami tancho kitlo mog kortat tem tankam dakhoitat.

15-16. Lukas 6:36-a pormonnem, ami Jehovachi dekh gheun kitem korunk zai?

¹⁵ Jehova amkam sogleank bhogxita. (Lukas 6:36 vachat.) Ami dor disak kortat teo chuki amcho mogall Bapui bhogxita. (St. 103:10-14) Jezun pasun tachi dekh ghetli. Tache xis opurnn asle ani chuki kortale. Tori astana, Jezun tankam bhogxile ani tankam  bhogsonnem mellonk aplo jiv pasun dilo. (1 Juanv 2:1, 2) Tor Jehovak ani Jezuk aslolo bhogsuncho gunn polloun tanchea pasot amcho mog anik vaddona kai?

¹⁶ Teach bhaxen tanchi dekh gheun ami amchea bhav-bhoinnank ‘bhogxitat’ tednam tanchea pasot amcho mog vaddttolo. (Ef. 4:32) Punn oxem korop sodanch sompem aschem na. Tori astana, tem korop kiteak gorjechem tem ek bhoinnichea udharonnantlean kolltta. Tea bhoinnin, Pahrogopur masikentlo, “Forgive One Another Freely” ho lekh vachlea uprant, bhogsonnea vixim tika kitem kollon ailem tem ti sangta. * Ti oxem mhunntta: “Ho lekh vachlea uprant mhaka hem kollon ailem ki bhogsonnem mhunnttlear, dusreamnim kelam tem chukichem nhoi ani tantuntlean mhaka dukh zaunk na oxem hanv manun ghetam mhunn nhoi. Punn hacho orth, hanv tanchea vixim rag monant dhorun bosona ani taka lagon mhaka monachi xanti melltta.” Tor amcho mogall Dev Jehovachi dekh gheun ami amchea bhav-bhoinnank bhogsun, tankam mog dakhoit ravum-ia.

17. Matev 5:16 pormonnem, lok Jehovachea familicho bhag zatole zalear ami kitem korop gorjechem?

¹⁷ Ami Jehovachea familicho bhag zaunk khub khuxal. Karonn hea familint eka-mekacho mog kortat toslim sonvsarbhor aslolim amchim bhav-bhoinnam asat. Toxench, anikui lokamnim hea familicho bhag zaun Jehovachi bhokti keloli amkam zai. Punn tim oxem kortolim zalear amchi vagnnuk bori asonk zai. Tednanch tim Jehova ani tachea famili vixim borem chint’tolim ani tache vixim xikonk fuddem sortolim.—Matev 5:16 vachat.

18. Dhumallo ieta tednam dhiran ulounk amkam kitem modot korunk xokta?

¹⁸ Punn thodde pavtti ami Jehovachea familicho bhag asat ani tachem utor pallttat dekhun lok amchim fokannam korunk vo dhumallo diunk puro. Punn tea vellar ami kitem korunk zai vo kitem ulounk zai tea vixim ami huskeunchi vo bhieunchi goroz na.  Karonn Jehovan ani Jezun amkam modot kortole mhunn khatri dilea. Udharonnak, Jezun aplea xisank hem utor dil’lem: “Te ghoddier tumi kitem ulounchem tem Dev tumkam kolloitolo; kiteak uloitolim tim tumi nhoi; punn tumchea Bapacho Atmo tumche udexim uloitolo.”—Mt. 10:19, 20.

19. Dhumallea vellar ami dhiran koso zobab diunk zata hea vixim ek udharonn diat.

¹⁹ Dhumallea vellar Jehova amkam aplea povitr xokte udexim koso modot korta tem zannam zaunk ami bhav Robert-achem udharonn polloum-ia. Ek pavtti taka Dokxinn Afrikechea eka korttant apoun, to military-nt kiteak bhag ghena mhunn taka vicharlem. Tednam to sotant novo aslo ani taka Bible-a vixim titli mahiti nasli. Punn to aplea bhav-bhoinnancho mog korta dekhun tannem ho nirnnoi ghetla mhunn tannem dhiran sanglem. Tor neai korpean taka okosmat, “Tujim bhav-bhoinnam konn?” mhunn vicharlem. Taka kitem zobab diuncho mhunn chint’ta tednam bhav Robert-ak tea disacho vers ugddas ailo. To zaun aslo Matev 12:50, zoim mhunnttlam: “Sorgar astea Mhojea Bapachi khuxi kortat titlim-i Mhozo bhav, Mhoji bhoinn ani Mhoji avoi.” Hea toren, povitr xoktechea modotin, bhav Robert neai korpeachea hea prosnacho ani her prosnanche-i bore toren zobab diunk pavlo. Hem polloun Jehova kitlo khuxal zalo astolo nhoi? Teach bhaxen, oddchonneanchea vellar ami Jehovacher patieun dhiran zobab ditat tednam Jehova khub khuxal zata.

20. Ami kitem korcho nichov korum-ia? (Juanv 17:11, 15)

²⁰ Ami Jehovachea familicho bhag asat mhunn sodanch upkari asonk zai. Karonn Jehova poros boro Bapui ani amcho mog kortat titlim bhav-bhoinnam amkam anik khoincheach familint mellonk xokonant. Punn Soitan ani tacho sonvsar, Jehova amcho mog korta kai na mhunn amchea monant dubhav ghalunk ani amchea modem aslolo mog ani ekvottkai pidd’ddear korunk proitn korta. Punn Jezun amcho ekvott rakhonk Jehova lagim maglolem. (Juanv 17:11, 15 vachat.) Tor Jehova modot kortolo mhunn amkam khatri asa. Jezu Jehovachea mogacher kednanch dubhavunk na. Tor ami tachi dekh gheum-ia, Jehova ani amchea bhav-bhoinnam pasot aslolo mog vaddoit ravum-ia ani sodanch ekvottkai samballum-ia.