1. ¿Kasa nikirajaka anain Jesuu nüchiki Jeʼwaa?

WAINMA na nüpüshikana Jeʼwaa jee naʼwaajüin nia. Naʼaka na nüpüshikana, eeshi Jesuu otta na aapiee chakana iipünaa (Col. 1:15; Sal. 103:20). Wanaa sümaa yaajachin Jesuu yaa mmapaʼa, nikirajüin wayuu sükajee nukuwaʼipa eein süpüla müin Jeʼwaa maʼaka naaʼin wanee Nashi namüin. Anuu tü nümakat Jesuu namüin na nikirajüinkana nüchiki Jeʼwaa: «Chi Tashikai, chi Jüshikai wanaa tamaa» (Juan 20:17). Waapapa waaʼin nümüin Jeʼwaa jee woutiisapa waya, nüpüshishii waya na wayuu anoujiraakana wanaa wamaa jee aijiraashii waya namaa (Mar. 10:29, 30).

2. ¿Kasa wekirajaainjatka anain sünain ekirajaayakat tüü?

² Eeshii wawalayuu kapüleekana amüin müin Jeʼwaa maʼaka naaʼin wanee nashi namüin. Eeshii na isakana achiki naaʼinrüin wanee kasa nayaawatüinjatka anainjee na wawalayuukana alin naya napüla. Sünain ekirajaayakat tüü, wekirajaajeerü anain tü naaʼinrakat Jesuu wayaawataka anainjee eein süpüla müin Jeʼwaa maʼaka naaʼin wanee Washi wamüin aikai apüla waya otta eein süpüla warütkaain nünainmüin. Wekirajaajeerü anain tü waaʼinrajatkat süpüla washatüin tü naaʼinrakat Jeʼwaa napüleerua na wawalayuukana.

3. ¿Jamüshii warütkaaka nünainmüin Jeʼwaa wachuntule nümüin maʼaka nümüin Jesuu?

³ Aipürai maʼin wayuu Jeʼwaa. Keeʼireesü naaʼin Jesuu müinjachin Jeʼwaa wamüin maʼaka naaʼin wanee washi eekai süpüla waashajaain amaa. Nnojotsü keeʼireein naaʼin Jesuu müinjachin Jeʼwaa wamüin maʼaka naaʼin wanee wayuu laülaakai waaʼu maalinkai apüla wayuu. Wayaawata aaʼu tü keeʼireekat naaʼin Jesuu  wanaa sümaa nümüin namüin na nikirajüinkana: «Meena jia jüchuntapa nümüin Maleiwa: Taata Maleiwa» (Mateo 6:9). Saashin tü Bibliakat, nia Jeʼwaa chi Pülashikai maʼin, chi Kakumalakai waya otta chi Aluwataai matüjainkai outaa (Gén. 49:25; Is. 40:28; 1 Tim. 1:17). Eepejeʼe süpüla «Taata» wamüin nümüin Jeʼwaa naashin Jesuu.

4. ¿Jamüsü watüjaaka saaʼu keeʼireein naaʼin Jeʼwaa aleewain nia wamaa?

⁴ Eesü kapüleere wamüin müin Jeʼwaa maʼaka naaʼin wanee Washi wamüin aikai apüla waya. Eesüjaʼa müle wakuwaʼipa sutuma sukuwaʼipa wepijia. Anasü waaʼin süka niyaawatüin saaʼu Jeʼwaa jamüin waaʼin otta keeʼireein naaʼin aleewain nia wamaa. Anuu tü sümakat tü Bibliakat: «Müleka jürütkaale nünainmüin Maleiwa, arütkaajeechi nia jünainmüin» (Sant. 4:8). Aishii waya nüpüla Jeʼwaa otta nüküjain wamüin niain anain süpüla Washin.

5. Sünainjee tü sümakat Lucas 10:22, ¿jamüsü watüjaaka saaʼu nükaalinjain waya Jesuu süpüla aleewain maʼin waya nümaa Jeʼwaa?

⁵ Nükaalinjain waya Jesuu süpüla aleewain maʼin waya nümaa Jeʼwaa. Niʼraajüin maʼin Jesuu nukuwaʼipa Jeʼwaa jee nüshatüin shia. Anuu nünüiki: «Chi eekai niʼrüin taya, niʼrüin chi Tashikaʼiya» (Juan 14:9). Sutuma müin Jesuu maʼaka naaʼin wanee wepaya wamüin, nikirajüin waya süpüla kojutuinjachin wamüin chi Washikai Jeʼwaa, woonooinjanain sümaa tü nümakat jee nüküjain wamüin tü waaʼinrajatkat süpüla talatüin nia wamaa otta anain wakuwaʼipa noʼuluʼu. Atüjaana aaʼu anamiain Jeʼwaa jee aipüralin nia sünainjee tü naaʼinrakat Jesuu wanaa sümaa yaajachin nia mmapaʼa (paashajeʼera Lucas 10:22). Wekirajaa sünain tia.

6. ¿Jamüsü watüjaaka saaʼu naapajüin Jeʼwaa nünüiki Jesuu?

⁶ Naapajüin Jeʼwaa nanüiki na nüchonniikana. Jamüshijaʼa nia, naapajüin nünüiki Jesuu nuʼuraajapa nümüin yaaiwaʼaya nia yaa mmapaʼa (Luc. 5:16). Naapajüin Jeʼwaa nünüiki Jesuu wanaa sümaa nuchuntuin kaalinwaa nümüin süpülapünaa nüneeküin na polookana piamamüin aluwataaushii (Luc. 6:12, 13). Süpülapünaachon naapünüin ekii Jesuu nutuma Judas, achuntushi maʼin nia nümüin chi Nüshikai süpüla nüchecherüin naaʼin soʼunnaa tü  alatajatkat nümüin. Nnojotsü neʼe naapajüin Jeʼwaa nünüiki, nuluwataainya wanee aapiee süpüla nütütüleʼerüin naaʼin (Luc. 22:41-44).

7. ¿Jamüsü paaʼin sutuma naapajüin Jeʼwaa pünüiki puʼuraajapa nümüin?

⁷ Naapajüin Jeʼwaa wanüiki wanaa sümaa woʼuraajüin nümüin jee asoutushi wamüin soʼu tü kaʼi choʼujaajeetkalü oʼu shia wamüin sümaa anain sukuwaʼipa nutuma (Sal. 116:1, 2). Jülüjataa waaʼin tü alatakat sümüin wanee wawala chejeʼewatka India. Shapaʼawaisü maʼin saaʼin waneepia jee achuntusü maʼin kaalinwaa nümüin Maleiwa. Anuu sünüiki: «Tü programa JW Broadcasting ojuʼitakat maayoʼu soʼu 2019, aashajaasü süchiki tü waaʼinrajatkat shapaale maʼin waaʼin, shiaʼaya choʼujaaka tamüin tia. Tayaawata aaʼu nusoutuin tamüin Jeʼwaa sümüin tü tachuntakat nümüin».

8. ¿Kasa naaʼinraka Jeʼwaa süpüla nütüjaain aaʼu Jesuu alin nia nüpüla?

⁸ Tü sukuwaʼipakat naalin Jeʼwaa nüpüla chi Nüchonkai yaaiwaʼaya nia yaa mmapaʼa shiaʼaya sukuwaʼipa tü waalinkat nüpüla (Juan 5:20). Naapüin tü kasa choʼujaakat nümüin jee tü choʼujaakat sümüin nunoula otta naaʼinrüin kasa nüpüleerua süpüla anain naaʼin. Nüküjain nümüin alin nia nüpüla otta talatüin nia nümaa (Mat. 3:16, 17). Nnojoishi nümüiwaʼain aaʼin Jesuu süka nütüjaain saaʼu eein nümaa chi Nüshi aikai apüla nia (Juan 8:16).

9. ¿Kasa naaʼinraka Jeʼwaa süpüla watüjaain saaʼu alin waya nüpüla?

⁹ Niyaawata aaʼu Jesuu alin nia nüpüla Jeʼwaa, müshiʼiya wayakana eesü süpüla wayaawatüin saaʼu alin waya nüpülaya. Süka alin waya nüpüla Jeʼwaa nürütkeʼerüin waya nünainmüin, naapüin wamüin wainma wawalayuu anoujakana wanaa wamaa aikana apüla waya jee atütüleʼeraka waaʼin shapaale waaʼin (Juan 6:44). Wane kasa naaʼinraka Jeʼwaa wapüleerua shia naapüin tü choʼujaakat wamüin otta tü choʼujaakat sümüin wanoula (Mat. 6:31, 32). Wanaa sümaa jülüjain waaʼin tü sukuwaʼipakat waalin nüpüla Jeʼwaa, akooʼomüinraasü tü naalinkat wapüla.

10. ¿Kasa waaʼinrajatka maʼaka naaʼinrüin shia Jeʼwaa?

¹⁰ Aishii na wawalayuukana nüpüla Jeʼwaa, eepejeʼe kapüleere wamüin alin naya wapüla. Eesüjaʼa shiale sutuma naatain wakuwaʼipa otta naatain sukuwaʼipa wepijia. Eesü tü kasa woʼtchejaakalü amaa mojushiika namüin na waneinnua. Mayaainjeʼe müin tia, eeshii süpüla alin wapüla na wawalayuukana maʼaka alin naya nüpüla Jeʼwaa (Éf. 5:1, 2; 1 Juan 4:19). Wekirajaa jooluʼu tü watüjakat sünainjee nukuwaʼipa Jeʼwaa.

11. ¿Kasa naaʼinraka Jesuu wayaawataka anainjee amüliajülin wayuu Jeʼwaa?

¹¹ Amüliajüi wayuu Jeʼwaa (Luc. 1:77, 78). Mojusü naaʼin chi wayuu amüliajüikai niʼrüle müliain wayuu jee nüchajaain sukuwaʼipa süpüla nükaalinjain naya. Nayaawata aaʼu na wayuukana alin naya nüpüla Jeʼwaa sünainjee tü naaʼinrakat Jesuu napüleerua (Juan 5:19). Anuu sünüiki tü Bibliakat: «Niʼrapa Jesús tü wayuu wattakat saalin, nümüliajüin naya süka müliain saaʼin atümaa otta walakatüin shia maa aka saaʼin anneerü eekai marüleejuuin» (Mat. 9:36). Nnojotsü shiain neʼe mojuin naaʼin Jesuu niʼrüle müliain wayuu, niiyajüinya eekai ayuulin, nükaalinjüinya na wayuu mapüsakana maʼin sutuma naʼyataain maʼin otta na shapaakana aaʼin (Mat. 11:28-30; 14:14).

12. ¿Kasa waaʼinrajatka sümülialaale waaʼin naalin na wawalayuukana?

¹² Jülüjale waaʼin tü kasa alatakat namüin na wawalayuukana, amülialaajeerü waaʼin naalin. Jamüsüjaʼa ayuuire maʼin wanee wawala, eesü süpüla nnojoluin saashajaain maʼin süchiki tia, aneetpejeʼe saaʼin sükaalinjünüle. Anasü wasakirüle waaʼin sünain tüü: ¿Kapüleesüche sümüin saapüin tü kasa choʼujaakat sümüin süpüshi?  ¿Jameerü saaʼin wakaalinjale shia sünain aʼlakajawaa otta epitajaa shipia? Jamüshijaʼa eere wanee wawala eekai maʼyataain, eeshii süpüla wasülajüin nneerü nümüin. Nnojotsü choʼujaain maʼin nütüjaainjatüin saaʼu wayain asülajüin tia nneetkat nümüin.

13, 14. ¿Kasa waaʼinrajatka süpüla wasülajüliin maʼaka naaʼin Jeʼwaa?

¹³ Asülajüi maʼin Jeʼwaa (Mat. 5:45). Wakaalinjeere na wawalayuukana nnojotsü choʼujaain nachuntuin kaalinwaa wamüin. Washata nukuwaʼipa Jeʼwaa, nnojotsü choʼujaain wachuntuin nümüin nüntirüin wanainmüin naaʼayula chi Kaʼikai, nüntirüin naaʼayula chi kaʼikai saaʼu wayuu süpüshuaʼa. Naaʼinrüin tia Maleiwa mayaainjeʼe eein wayuu matüjainka aapa analuʼut saaʼu tia. ¿Aashin watüjaain saaʼu alin maʼin waya nüpüla Jeʼwaa süka naapüin tü kasa choʼujaakat wamüin? Anamia maʼin Jeʼwaa jee asülajüi maʼin nia, aishi maʼin nia wapüla sutuma tia.

¹⁴ Wainma wawalayuu ashataka nukuwaʼipa chi Washi iipünaajachikai, nakaalinjamaatüin na wawalayuukana kasale alatüin namüin. Jamüsüjaʼa soʼu 2013 chaa Filipinas, eejatü wanee wawai keemashaatasü maʼin, Haiyan sünülia. Wainma na wawalayuu ajaʼttaleekana epia jee nnojotsü apütaain kasa namaʼana. Akaalinjünamaatünüshii naya natuma wawalayuu sainküinjee mmakat süpüshuaʼa. Sutuma tü nneerü nasülajakat na wawalayuukana otta tü aʼyatawaa naaʼinrakat, akumajünüsü süchikuaʼa 750 piichi süpülapünaa wanee juya. Soʼunnaa tü ayuuliikat COVID-19, na Aküjaliikana Pütchi nachajaain maʼin sukuwaʼipa süpüla nakaalinjain na nawalayuukana. Natüjaweerü aaʼu na wawalayuukana alin naya wapüla wakaalinjamaatüle naya.

15, 16. Saashin Lucas 6:36, ¿kasa waaʼinrajatka süpüla washatüin nukuwaʼipa Jeʼwaa chi Washi iipünaajachikai?

¹⁵ Amüliajüi Jeʼwaa jee motusü naaʼin waainjala (paashajeʼera Lucas 6:36). Motowaisü naaʼin chi Washi iipünaajachikai waainjala (Sal. 103:10-14). Shiaʼaya naaʼinrakat tia Jesuu, motusü naaʼin tü kasa mojusü naaʼinrakat na nikirajüinkana jee nümüliajüin naya. Naapüin nikii waaʼu süpüla motuin naaʼin Jeʼwaa waainjala (1 Juan 2:1, 2). ¿Aashin aleewain maʼin waya nümaa Jeʼwaa otta Jesuu süka namüliajüin waya otta motuin naaʼin waainjala?

¹⁶ Motule waaʼin naainjala na wawalayuukana, aijiraajeena maʼin waya (Éf. 4:32). Eesü  kapüleere wamüin motuin waaʼin naainjala na waneinnua, wachajaainjatpejeʼe sukuwaʼipa süpüla waaʼinrüin tia. Saashajeʼerapa wanee wawala wanee pütchi suluʼujee Aapiria Wayuu shiyaawata aaʼu tü saaʼinrajatkat süpüla motuin saaʼin saainjala wayuu, shia tü pütchi makat «Perdónense liberalmente unos a otros». * Anuu sünüiki: «Saashin tia pütchikat, motule waaʼin tü aainjünakat wamüin nnojotsü maluʼuluin nnojoluin mojuin tia wamüin jee nnojoluin alin shia wamüin. Tü waaʼinrajatkat shia nnojoluinjatüin üttakuʼu müin waaʼin nünain chi wayuu aainjakai kasa mojusü wamüin, aneetkalaka waaʼin waaʼinrüle tia». Motopa waaʼin naainjala na wawalayuukana, aijiraashii maʼin waya otta washatüin nukuwaʼipa chi Washikai Jeʼwaa.

17. Sünainjee tü sümakat Mateo 5:16, ¿kasa waaʼinrajatka süpüla kojutuin wamüin chi Washi iipünaajachikai?

¹⁷ Kojutusü wamüin naʼakain waya na nüpüshikana Jeʼwaa. Eeshii wawalayuu suluʼujeejanakana mmakat süpüshuaʼa otta aijiraashii waya wapüshuaʼa. Keeʼireesü waaʼin wainmain na wayuu aʼwaajakana Jeʼwaa wanaa wamaa. Wayoutuinjeseʼe waaʼinrüin kasa mojusü mojeetka atuma pütchi nüchiki chi Washi iipünaajachikai otta süchiki nupueulose. Wachajaainjatü sukuwaʼipa süpüla anainjatüin wakuwaʼipa suʼupala wayuu süpüla kapülain naaʼin tü pütchi anasükat (paashajeʼera Mateo 5:16).

18. ¿Jaralii akaalinjeenaka waya süpüla waküjain pütchi sümaa yalayalain waaʼin?

¹⁸ Eesü süpüla süʼürülaain wayuu wanain jee süpüleeruain waaʼin sutuma jüüjüüin waya nümüin chi Washi iipünaajachikai. ¿Kasa waaʼinrajatka mmorüle waya sünain aküjaa süchiki tü wanoujakalü anain namüin na waneinnua? Soto waaʼin, nükaalinjeenain waya Jeʼwaa otta chi Nüchonkai. Nüküjain Jesuu namüin na nikirajüinkana nnojoluinjatüin shapaain maʼin naaʼin sünain tü nanüikinjatkat sümüin wayuu. Anuu nünüiki: «Aapüneerü jümüin soʼu maʼi kaʼikat tia tü pütchi jümüinjatkat namüin. Otta tü pütchi jüsouktüinjatkat aka, nnojoleerü jüleʼeruʼujeejatüin, aapüneerü shia jümüin nütüma chi Naaʼinkai chi Jüshikai Maleiwa» (Mat. 10:19, 20).

19. Püküja tü naaʼinrakat wanee wayuu süpüla nüküjain pütchi sümaa yalayalain naaʼin.

 ¹⁹ Jülüjataa waaʼin tü naaʼinrakat wanee wawala kanüliakai Robert, chejeʼewai Sudáfrica. Amaanüshi nia laülaapialuʼumüin süpüla nusoutuinjachin jamüin niyoutaka surulaalüinjachin nia. Jekechi nia sünain ekirajawaa sünain tü Bibliakat soʼu tia. Nüküjaka sümaa yalayalain naaʼin nnojolinjachin surulaalüin nia süka alin nüpüla na nuwalayuu anoujiraakana wanaa nümaa. Jaʼyasü naaʼu kojutuin nümüin saʼakain nia nüpüshi Jeʼwaa. «¿Jaralii na puwalayuukana?», nümaka chi juezkai nümüin. Ainküsü naaʼin Robert sutuma tia. Sotomaataka naaʼin tü pütchi aashajeʼennakat wattaʼa maalü soʼu tia, shia tü sümakat Mateo 12:49, 50, tü makat: «Tü wayuu “teikat” je na wayuu “tawalayuukana” tamüinjanakana amüin, naya na eekai naaʼinrüin waneepia tü nuluwataakat anain chi Tashikai Maleiwa chakai iipünaa». Nükaalinjain Jeʼwaa nia nükajee chi naaʼinkai süpüla nusoutuin shiʼipajee tü asakinnakalü anain nia. Talatakajasaʼa naaʼin Jeʼwaa nümaa. Talateechiaʼaya Jeʼwaa wamaa weʼitaale waaʼin nünain sümaa yalayalain waaʼin waküjapa pütchi soʼunnaa müliaa.

20. ¿Kasa ayatüinjatka waaʼinrüin? (Juan 17:11, 15).

²⁰ Ayataʼaya kojutuin wamüin naʼakain waya wawalayuu aijiraakana maʼin. Aishii waya nüpüla Jeʼwaa chi Washi aipüraikai. Nnojo motuin waaʼin tia. Keeʼireesü naaʼin Satanaa namaa na nümaajanakana jülüjainjatüin waaʼin maalin waya nüpüla chi Washi iipünaajachikai jee nnojoliinjanain paaʼinwajiraain waya. Nuchuntapejeʼe Jesuu nümüin Jeʼwaa naaʼinmajüin waya süpüla paaʼinwajiraain waya (paashajeʼera Juan 17:11, 15). Shiaʼaya naaʼinraka Jeʼwaa tia. Washata nukuwaʼipa Jesuu, nnojo jülüjain waaʼin maalin waya nüpüla chi Washi iipünaajachikai otta nnojo jülüjain waaʼin nnojoleenain nükaalinjain waya. Ayataʼaya aleewajiraain waya namaa na nüpüshikana Jeʼwaa.