1. ¿Mbaʼépa hína Jehová ñandéve g̃uarã?

JEHOVÁ ningo oreko peteĩ família oĩháme heta oadoráva chupe. Upe famíliape oĩ hína Jesús, haʼéva “pe Taʼýra ypykue ojejapo vaʼekue opaite mbaʼe mboyve”, ha avei hetaiterei ánhel (Col. 1:15; Sal. 103:20). Jesús oĩrõ guare ko yvy ape ári ohechauka vaʼekue umi yvypóra ifiélva ikatuha ohecha Jehovápe Itúaicha. Ha Jesús oñeʼẽrõ guare idisipulokuérandi, heʼi vaʼekue Jehováre ‘che Ru, haʼéva avei pende Ru’ (Juan 20:17). Ha ñañemeʼẽvo Jehovápe ha jajevautisa, ñande jaike hína peteĩ família oĩháme ñane ermáno ha ermanakuéra ñanderayhuetéva (Mar. 10:29, 30).

2. ¿Mbaʼépa jahecháta ko artíkulope?

² Oĩ ermáno ijetuʼúvape ohecha hag̃ua Jehovápe Itúaicha, ha ohechakuaa hag̃ua haʼe ohayhuha chupe. Ótrope katu ijetuʼu ohechauka hag̃ua ohayhuha iñermáno ha iñermanakuérape. Ko artíkulope jahecháta mbaʼéichapa Jesús ñanepytyvõ jahecha hag̃ua Jehovápe peteĩ Túa ñanderayhúvaicha, ha ikatuha ñañemoag̃ui hese. Ñaaprendéta avei mbaʼéichapa ikatu jasegi Jehová ehémplo pe tráto ñameʼẽvape ñane ermanokuérape.

3. ¿Mbaʼéichapa pe padrenuéstro rupive Jesús ñanemboʼe ikatuha ñañemoag̃ui Jehováre?

³ Jehová ningo peteĩ Túa ñanderayhúva. Jesús oipota jahecha Jehovápe pe haʼe ohechaháicha chupe: Peteĩ Túa ivuénova ha ñanderayhúva, ikatúvare ñañemoag̃ui oimeha óra, ndahaʼéi hína peteĩ persóna ijarhélva ha omandasénteva voi. Ñande jaikuaa upéva, pórke Jesús omboʼe vaʼekue idisipulokuérape mbaʼépa heʼi vaʼerã oñemboʼe jave. Haʼe omoñepyrũ vaʼekue pe padrenuéstro heʼívo: “Ore Ru” (Mat. 6:9). Jesús ikatu kuri ñanemboʼe jaʼe hag̃ua Jehovápe ‘Todopoderóso’, “Apohare”, térã “Rréi opa ára g̃uarã”. Koʼã título oĩ porãtante avei kuri, pórke la Bíbliape voi ojepuru (Gén. 49:25; Is. 40:28; 1 Tim. 1:17). Péro Jesús  ñanemboʼe jaʼe hag̃ua Jehovápe “ore Ru”, pórke péicha ñañandúta ikatuha ñañemoag̃ui hese.

4. ¿Mbaʼéichapa jaikuaa Jehová oipotaha ñañemoag̃ui hese?

⁴ ¿Ijetuʼúpa ndéve rehecha hag̃ua Jehovápe nde Túaicha ha rehechakuaa hag̃ua haʼe nderayhuha? Hetápe g̃uarã ijetuʼu. Ikatu oime upéicha pórke imitãme itúa heta ombohasa asy vaʼekue chupekuéra, ha upévare ndaikatúi oñeimahina oĩha peteĩ túa ñanderayhúva. Péro tuichaite ningo ñanembopyʼaguapy jaikuaávo Jehová ontendeha mbaʼéichapa ñañeñandu. Haʼe oñemoag̃uise voi ñanderehe, upévare la Biblia ñanemokyreʼỹ: “Peñemoag̃uíkena Ñandejárare, ha haʼe oñemoag̃uíta penderehe” (Sant. 4:8). Jehová ñanderayhu ha heʼi voi haʼetaha ñandéve g̃uarã pe mehór Papa ikatúva jareko.

5. Ohechaukaháicha Lucas 10:22, ¿mbaʼéichapa Jesús ñanepytyvõ jahechakuaa hag̃ua Jehová haʼeha peteĩ Túa ñanderayhúva?

⁵ Jesús ningo ikatu ñanepytyvõ ñañemoag̃uive hag̃ua Jehováre. Haʼe oikuaa porãiterei chupe, osegi vaʼekue Itúa ehémplo ha ohechauka porãiterei umi kualida haʼe orekóva. Upévare heʼi vaʼekue: “Upe chéve cherecháva ohecháma avei pe Túape” (Juan 14:9). Peteĩ ermáno majórcha Jesús ñanemboʼe mbaʼéichapa jarrespeta ha ñaneñeʼẽrendu vaʼerã ñande Túape, mbaʼépa ndajajapói vaʼerã ani hag̃ua ñamoñeñandu vai chupe, ha mbaʼépa jajapo vaʼerã ñandeguerohory hag̃ua. Péro iñimportantevéva, Jesús ñanepytyvõ ñantende hag̃ua umi kualida Jehová orekóva, mbaʼeichaitépa haʼe ñanderayhu ha imbaʼeporã ñanendive (elee Lucas 10:22). Jahechami unos kuánto ehémplo ohechaukáva Jehová haʼeha peteĩ Túa ñanderayhúva.

6. ¿Mbaʼéichapa jaikuaa Jehová ohendu hague Jesús ñemboʼe? Emoĩ unos kuánto ehémplo.

⁶ Jehová ohendu ifamiliakuérape. Jahechamína mbaʼéichapa haʼe ohendu vaʼekue Itaʼýra ypykuépe. Jesús oĩrõ guare ko yvy ape ári haʼe oñemboʼe vaʼekue heta vése, ha ikatu ñaime segúro Jehová ohendu hague chupe (Luc. 5:16). Jehová ohendu vaʼekue Itaʼýrape oñemboʼérõ guare odesidi mboyve umi mbaʼe iñimportánteva, por ehémplo oiporavótarõ guare umi 12 ijapóstolpe (Luc. 6:12, 13). Avei Jehová ohendu vaʼekue Jesús ñemboʼe haʼe ojepyʼapyetereírõ guare. Judas otraisiona potaitérõ guare Jesúspe, haʼe oñemboʼe vaʼekue Itúape ipyʼaite guive, ha oñeʼẽ  chupe pe pruéva tuichaite ombohovái potaitévare. Péro Jehová ndahaʼéi ohendúnteva Jesús ñemboʼe, síno ombou voi peteĩ ánhel omombarete hag̃ua Itaʼýra ohayhuetévape (Luc. 22:41-44).

7. ¿Mbaʼéichapa nde reñeñandu reikuaávo Jehová ohenduha umi ne ñemboʼe?

⁷ Koʼág̃arupi avei Jehová ohendu umi ñane ñemboʼe, ha ombohovái itiempoitépe ha iporãveháicha (Sal. 116:1, 2). Peteĩ ermána oikóva Índiape ohechakuaa vaʼekue mbaʼéichapa Jehová okontesta iñemboʼe. Ko ermána ningo oreko ansieda ivaietereíva. Upévare oñemboʼe asy Jehovápe ha omombeʼu chupe mbaʼéichapa oñeñandu. Haʼe heʼi: “Pe Broadcasting osẽ vaʼekue mayo 2019-pe ohechauka mbaʼépa ikatu jajapo jarekóramo ansieda térã ñañekevrantaitereíramo. Ha ahechakuaa Jehová okontesta hague umi che ñemboʼe ko prográma rupive, pórke upéva chéve g̃uarãite kuri”.

8. ¿Mbaʼéichapa Jehová ohechauka vaʼekue ohayhuha Jesúspe?

⁸ Jesús oĩrõ guare ko yvy ape ári, Jehová ohechauka vaʼekue ohayhuha chupe ha ojepyʼapyha hese. Ha Jehová upeichaite avei ñanderayhu ha ojepyʼapy ñanderehe (Juan 5:20). Jehová ningo oipytyvõ vaʼekue Jesúspe osegi hag̃ua ijerovia mbarete, omokyreʼỹ chupe ojepyʼapyetereírõ guare ha omeʼẽ chupe opa mbaʼe oikotevẽva. Avei Jehová notĩri vaʼekue heʼi hag̃ua Itaʼýrape ohayhu ha oguerohoryha chupe (Mat. 3:16, 17). Jesús núnka noñeñandúi vaʼekue haʼeño, pórke oikuaa Itúa ohayhuetereiha chupe ha siémpre oĩtaha ijykére (Juan 8:16).

9. ¿Mbaʼéichapa jaikuaa Jehová ñanderayhuha?

⁹ Jesús rehe oiko haguéicha, ñande avei ñañandúma heta hendáicha Jehová ñanderayhuetereiha. Ñapensamíntena: Jehová ningo ñanemoag̃ui kuri ijehe ha omeʼẽ ñandéve peteĩ família ñanderayhuetereíva. Haʼe ojevale ñane ermáno ha ermanakuérare ñanembovyʼa ha ñanemokyreʼỹ hag̃ua ñañeñandu vai jave (Juan 6:44). Jehová omeʼẽ avei ñandéve enteroite mbaʼe ñaikotevẽva jasegi hag̃ua jajerovia mbarete ha ñandefiél chupe. Ha haʼe ñanepytyvõ avei ñakonsegi hag̃ua umi mbaʼe ñaikotevẽva ñañemantene hag̃ua (Mat. 6:31, 32). Ñapensávo mbaʼeichaitépa Jehová ñanderayhu, ñande avei amás día jahayhuve chupe.

10. ¿Mbaʼépa ikatu ñaaprende Jehová otrata lájagui ñane ermáno ha ermanakuérape?

¹⁰ Jehová ningo ohayhu ñane ermáno ha ermanakuérape. Péro sapyʼánte ikatu ijetuʼu ñandéve jahayhu chupekuéra, ha ijetuʼu avei ñandéve jahechauka hag̃ua upéva umi mbaʼe jajapóva rupive. Upéva ningo upéichatante voi, pórke idiferénte hína la ñande kultúra ha mbaʼéichapa ñañemongakuaa vaʼekue. Avei enterovéva jafalla jepi ha ikatu ñambopochy ótrope, térã ojepicha ñandehegui. Péro káda uno ñañehaʼãmbaite vaʼerã amás día jahayhuve hag̃ua ñane ermanokuérape. ¿Mbaʼéichapa ikatu jajapo upéva? Jasegívo ñande Ru Jehová oporohayhuetereíva ehémplo (Efes. 5:1, 2; 1 Juan 4:19). Jahechamína mbaʼe mbaʼépa ikatu ñaaprende iñehémplogui.

11. ¿Mbaʼéichapa Jesús osegi Jehová ehémplo oiporiahuverekóvo umi héntepe?

¹¹ Jehová ningo ñandeporiahuvereko ha imbaʼeporãiterei ñanendive (Luc. 1:78). Peteĩ persóna oiporiahuverekóva ótrope ningo ojepyʼapy ohechávo peteĩ hapicha osufriha, ha oñehaʼã oipytyvõ ha okonsola chupe. Jesús ningo otrata lájare umi héntepe, ohechauka vaʼekue osegiha Itúa ehémplo ha ojepyʼapy hesekuéra (Juan 5:19). Por ehémplo, Jesús ohechárõ guare umi hénte atýpe, “ombyasyeterei chupekuéra, pórke ohecha mbaʼéichapa oñemaltrata umi héntepe ha isarambipaha hikuái. Umi hénte ojogua umi ovecha ndorekóivape pastór” (Mat. 9:36). Péro Jesús ndahaʼéi oiporiahuverekónteva umi héntepe,  síno ojapo voi álgo oipytyvõ hag̃ua chupekuéra. Haʼe omonguera umi hasývape, ha ombopiroʼy umi ‘ikaneʼõ ha ikárga pohýivape’ (Mat. 11:28-30; 14:14).

12. ¿Mbaʼéichapa ikatu jahechauka jaiporiahuvereko ha ñanembaʼeporãha ñane ermanokuérandi?

¹² Ñande ikatúta jahechauka jaiporiahuvereko ha ñanembaʼeporãha ñane ermanokuérandi ñapensáramo umi provléma ohasávare hikuái. Por ehémplo, ñamoĩ chupe peteĩ ermána orekoha peteĩ mbaʼasy igravetereíva. Haʼe ningo núnka ndojekeháiva la imbaʼasýgui, péro katuete omombaʼetereíta oĩramo oipytyvõva chupe. Ikatu oime ijetuʼu ko ermánape okonsegi hag̃ua umi mbaʼe oikotevẽva ifamília. ¿Ikatúnepa ñande ñaipytyvõ ko ermánape ñakosinávo chupe g̃uarã, térã ñamopotĩvo chupe hóga? Térã ñamoĩ chupe peteĩ ermáno operde hague itraváho, ¿ikatúnepa japrepara peteĩ sovreʼi ha ñamoĩ pype michĩmi pláta ñaipytyvõ hag̃ua chupe otopa jey peve ótro itravahorã? Ikatu voi jajapo upéva oikuaaʼỹre mávapa omeʼẽ hína chupe.

13, 14. ¿Mbaʼéichapa ikatu ñandepojera Jehová ojapoháicha?

¹³ Jehová ningo ipojera (Mat. 5:45). Natekotevẽi ningo ñane ermanokuéra heʼi raẽ ñandéve oikotevẽha ajúda jaiporiahuvereko hag̃ua chupekuéra. Ojapoháicha Jehová, ñande ñañemotenonde vaʼerã voi ñaipytyvõ hag̃ua chupekuéra. Jehová ningo oguenohẽ pe kuarahy káda día jajerureʼỹre chupe. Pe kuarahy ojopévo ovenefisia enterovépe, ndahaʼéi umi ijagradesídovapente. Omeʼẽvo ñandéve umi mbaʼe ñaikotevẽva, Jehová ohechauka hína ñanderayhuha, ha ñande katu jahayhueterei chupe imbaʼeporã ha ipojera haguére ñanendive.

¹⁴ Heta ñane ermáno ha ermanakuéra osegi Jehová ehémplo, ha oñemotenonde voi ipojera hag̃ua ótrondi. Por ehémplo, áño 2013-pe pe supertifón Haiyan ojapo tuicha sarambi Filipínaspe. Heta ermánogui oñehundipa hóga ha ikosakuéra mimi. Péro umi ermáno oĩva ko múndo tuichakuére pyaʼe porã oipytyvõ chupekuéra. Heta oĩ okontrivuíva ha ótro katu oho voi ombaʼapo oñemyatyrõ térã oñemopuʼã jey hag̃ua mas de 750 óga, ha ojapopa hikuái upéva ménos de un áñope. Ha ko pandémia de COVID-19 aja, ñande testígo de Jehová ñañehaʼãmbaite avei ñaipytyvõ ñane ermáno ha ermanakuérape. Pyaʼe porã jajapo jave upéva, jahechauka hína mbaʼeichaitépa jahayhu ñane ermanokuérape.

15, 16. ¿Mbaʼépa jajapo vaʼerã jasegi hag̃ua ñande Ru yvagapegua ehémplo? (Colosenses 3:13).

 ¹⁵ Jehová ñaneperdona (elee Colosenses 3:13). Ñande Ru yvagapegua ningo káda día ojapo upéva ñanderehehápe (Sal. 103:10-14). Jesús segidorkuéra iñimperfékto vaʼekue, péro haʼe lomímonte operdona chupekuéra. Jesús ningo omeʼẽ vaʼekue voi hekove jepe ñanderehehápe ikatu hag̃uáicha oñeperdona ñandéve ñande pekadokuéra (1 Juan 2:1, 2). ¡Ajépa ñanemoag̃uive Jehová ha Jesúsre jahechávo mbaʼeichaitépa ñaneperdona ha ñandeporiahuvereko hikuái!

¹⁶ Ñande ningo jajoayhuvéta ñane ermanokuérandi ‘ñañoperdonáramo ñande pyʼaite guive’ (Efes. 4:32). Péro jaikuaaháicha, sapyʼánte ikatu ijetuʼu ñandéve ñaperdona ñande rapichápe, upévare ñañehaʼãmante vaʼerã ñamehora. Peteĩ ermána oñandu oipytyvõ hague chupe pe artíkulo osẽva rrevísta Ñemañaháme, hérava “Peñoperdona pende pyʼaite guive”. * Haʼe heʼi: “Astudiávo ko artíkulo chepytyvõ akambia hag̃ua la apensáva ko témare ha chepositivave hag̃ua. Pe artíkulo omyesakã kuri ñaporoperdona ndeʼiseiha jaheja reitanteha umi mbaʼe vai ojejapóva, térã ñapensa vyroreinteha upéva, ñandeperhudikaʼimíramo jepe. Ñaporoperdonakuaáramo ndajapytamoʼãi ñandepyʼaro pe ofalla vaʼekuéndi ha ñañehaʼãmbaitéta jasegi hag̃ua ñandepyʼaguapy”. Ñaperdonávo ñane ermanokuérape ñande pyʼaite guive, jahechauka hína jahayhuha chupekuéra ha jasegiha ñande Ru yvagapegua ehémplo.

17. Ohechaukaháicha Mateo 5:16, ¿mbaʼépa ikatu jajapo ñamombaʼeguasu hag̃ua ñande Ru yvagapeguápe?

¹⁷ Jaagradeseterei ningo ñaime haguére peteĩ família tuichaitereívape ha ojoayhuetereíva. Ha jaipota voi heta hetave persóna ñanemoirũ jaadora hag̃ua Ñandejárape. Upévare ñañatende vaʼerã ani hag̃ua ñande káusare oñeñeʼẽ vai ñande Ru Jehováre, térã ipuévlore. Ñande siémpre ñañehaʼãmbaite vaʼerã ñañekomporta porã umi hénte oikuaase ha oservise hag̃ua ñande Ru yvagapeguápe (elee Mateo 5:16).

18. ¿Mbaʼépa ñanepytyvõta japredika hag̃ua kyhyjeʼỹre?

¹⁸ Sapyʼánte oĩ umi ñandeapoʼíva térã ñandepersegíva voi ñaneñeʼẽrendu haguére ñande Ru yvagapeguápe. ¿Mbaʼépa ikatu jajapo jakyhyjéramo  ñañeʼẽ hag̃ua ótrondi umi mbaʼe jagueroviávare? Ñande ñaimekuaa segúro Jehová ha Itaʼýra katuete ñanepytyvõtaha. Jesús oasegura vaʼekue idisipulokuérape natekotevẽiha ojepyʼapy la heʼítavare ni mbaʼéichapa heʼíta. ¿Mbaʼérepa upéva? Jesús heʼi vaʼekue voi: “Upe moméntope Ñandejára penepytyvõta peikuaa hag̃ua mbaʼépa peje vaʼerã. Upe moméntope ndahaʼemoʼãi peẽnte la peñeʼẽtava, síno Ñandejára penepytyvõta peñeʼẽ hag̃ua ijespíritu rupive” (Mat. 10:19, 20).

19. Emombeʼumi peteĩ ermáno opredika vaʼekue pyʼaguasúpe ehémplo.

¹⁹ Jahechamína ermáno Robert ehémplo. Haʼe oñepresenta kuri peteĩ trivunál militár renondépe Sudáfricape, hiʼarive upérõ haʼe oñepyrũ ramo ostudia ha ndoikuaái gueteri heta mbaʼe la Bíbliagui. Upéicharõ jepe, Robert pyʼaguasúpe oexplika pe trivunálpe ndoservimoʼãiha pe ehérsitope pórke ohayhu iñermanokuérape. Haʼe ningo omombaʼeterei pe lugár orekóva Jehová famíliape. Péro derrepentete peteĩ hués oporandu chupe: “¿Máva la ne ermanokuéra?”. Robert nohaʼarõiete kuri oñeporandu chupe upéva. Péro upepete imanduʼa pe téxto upe díape guare, Mateo 12:50: “Oimeraẽ ojapóva che Ru oĩva yvágape volunta, umíva hína che ermáno, che ermána ha che sy”. Robert estudiánte pyahúramo jepe, Jehová espíritu oipytyvõ kuri chupe okontesta hag̃ua upe pregúnta, ha hetave mbaʼe oñeporandúva chupe ohaʼarõʼỹetére. ¡Oiméne Jehová ijorgullosoite raʼe heseve! Ha katuete Jehová ijorgullósota avei ñandereheve pyʼaguasúpe japredikáramo umi situasión ijetuʼúvape.

20. ¿Mbaʼépa jajedesidi vaʼerã jajapotaha? (Juan 17:11, 15).

²⁰ Jasegíkena ñamombaʼe pe priviléhio jarekóva ñaime haguére Jehová família ñanderayhuetévape. Ñande ningo jareko pe mehór Papa ikatu vaʼerã jareko, ha heta ermáno ha ermána ñanderayhuetereíva. ¡Siémprekena jaagradese upévare! Satanás ha isegidorkuéra iñañaitéva katu oñehaʼãmbaite hína ogueroviaka ñandéve ñande Ru yvagapegua nañanderayhuiha, ha ombyaise pe unida oĩva ñande apytépe. Péro Jesús oñemboʼéma vaʼekue voi ñanderehehápe ñande Túape, ha ojerure chupe ojesareko hag̃ua ñanderehe ikatu hag̃uáicha ñane família siémpre oĩ en unida (elee Juan 17:11, 15). Ha Jehová okontesta hína oikóvo upe ñemboʼe. Aníkena núnka jaduda ñande Ru yvagapegua ñanderayhuha ha ñanepytyvõtaha. Jajedesidíkena amás día jahayhuvetaha Jehovápe ha ñane ermanokuérape.