1. Ano ang puede nga mangin kaangtanan sang matutom nga mga tawo kay Jehova?

NAGASIMBA kay Jehova ang tanan nga miembro sang iya pamilya. Nalakip sa ila si Jesus, nga amo ang “panganay sa tanan nga tinuga,” kag ang madamo nga anghel. (Col. 1:15; Sal. 103:20) Sang ari si Jesus sa duta, ginsiling niya nga puede kabigon sang matutom nga mga tawo si Jehova bilang ila Amay. Sang nagapakighambal si Jesus sa iya mga disipulo, gintawag niya si Jehova nga “akon Amay kag inyo Amay.” (Juan 20:17) Kag sang nagdedikar kita kay Jehova kag nagpabawtismo, nangin bahin kita sang pamilya nga nagapalanggaanay sa isa kag isa.—Mar. 10:29, 30.

2. Ano ang binagbinagon naton sa sini nga artikulo?

² Nabudlayan ang iban nga kabigon si Jehova nga isa ka mahigugmaon nga Amay. Mahimo nga nabudlayan naman ang iban kon paano ipakita ang gugma sa ila mga kauturan. Sa sini nga artikulo, binagbinagon naton kon paano kita ginabuligan ni Jesus nga kabigon si Jehova nga isa ka mahigugmaon nga Amay, kag puede kita mangin suod sa Iya. Tun-an man naton kon paano naton mailog si Jehova sa pagpakita sang gugma sa aton mga kauturan.

3. Paano makabulig sa aton ang pangamuyo nga gintudlo ni Jesus para mangin suod pa gid kita kay Jehova?

³ Si Jehova isa ka mahigugmaon nga Amay. Para kay Jesus, si Jehova isa ka mapinalanggaon nga ginikanan nga mahapos palapitan, kag indi Sia pareho sa isa ka diktador. Gusto ni Jesus nga amo man sini ang pagkabig naton kay Jehova. Makita naton ini sang gintudluan ni Jesus ang iya mga disipulo kon ano ang dapat nila ipangamuyo. Sa umpisa sang pangamuyo, nagsiling sia: “Amay namon.” (Mat. 6:9) Puede kuntani isiling ni Jesus nga tawgon naton si Jehova nga “Labing Gamhanan,” “Manunuga,” ukon  “Hari nga dayon,” kay mabasa man ini sa Biblia nga nagapatuhoy kay Jehova. (Gen. 49:25; Isa. 40:28; 1 Tim. 1:17) Pero nagsiling si Jesus nga tawgon naton si Jehova nga “Amay.”

4. Ngaa makasiling kita nga gusto ni Jehova nga mangin suod kita sa iya?

⁴ Nabudlayan ka bala nga kabigon si Jehova nga isa ka mahigugmaon nga Amay? Amo ini ang ginabatyag sang pila sa aton. Posible ini kon wala naton nabatyagan nga palangga kita sang aton mismo amay. Pero nahangpan gid ni Jehova ang nabatyagan naton, kag makapaumpaw ini. Gusto niya mangin suod sa aton. Gani ginapalig-on kita sang iya Pulong: “Magpalapit kamo sa Dios, kag magapalapit sia sa inyo.” (Sant. 4:8) Palangga kita ni Jehova, kag nagsiling sia nga sia ang aton pinakamaayo nga Amay.

5. Suno sa Lucas 10:22, paano kita mabuligan ni Jesus nga mangin suod pa gid kay Jehova?

⁵ Mabuligan kita ni Jesus nga mangin suod pa gid kay Jehova. Kilala gid ni Jesus si Jehova kag perpekto niya nga gin-ilog ang Iya mga kinaiya. Gani nagsiling sia: “Ang bisan sin-o nga nakakita sa akon nakakita man sa Amay.” (Juan 14:9) Pareho sa isa ka magulang nga utod, ginatudluan kita ni Jesus kon paano respetuhon kag tumanon ang aton Amay, kag kon ano ang himuon naton para indi Sia masubuan kag malipay Sia sa aton. Sang ari si Jesus sa duta, nangin maathag nga maayo gid kag mahigugmaon si Jehova. (Basaha ang Lucas 10:22.) Binagbinagon naton ang pila ka halimbawa.

6. Maghatag sing mga halimbawa nga ginpamatian ni Jehova si Jesus.

⁶ Ginapamatian ni Jehova ang iya mga anak. Binagbinaga kon paano ginpamatian ni Jehova ang iya panganay nga Anak. Sang ari si Jesus sa duta, madamo nga beses sia nga nagpangamuyo, kag ginpamatian gid sia ni Jehova. (Luc. 5:16) Nagpamati si Jehova sang nagpangamuyo si Jesus antes sia maghimo sang importante nga mga desisyon, pareho sang tion nga nagpili sia sang iya 12 ka apostoles. (Luc. 6:12, 13) Nagpamati man si Jehova sang nagpangamuyo si Jesus bangod sang grabe nga kabalaka. Antes si Jesus ginluiban ni Judas, hanuot sia nga nagpangamuyo sa iya Amay parte sa mabudlay nga pagtilaw nga iya maeksperiensiahan. Magluwas nga ginpamatian  ni Jehova ang pangamuyo ni Jesus, nagpadala pa gid Sia sang isa ka anghel para pabakuron ang Iya pinalangga nga Anak.—Luc. 22:41-44.

7. Ano ang nabatyagan mo kay ginapamatian ni Jehova ang aton mga pangamuyo?

⁷ Subong, ginapamatian man ni Jehova ang mga pangamuyo sang iya mga alagad, kag ginasabat niya ini sa husto nga tion kag sa pinakamaayo nga paagi. (Sal. 116:1, 2) Binagbinaga kon paano ini naeksperiensiahan sang isa ka sister sa India. Sobra gid ang iya kabalaka, kag hanuot niya ini nga ginpangamuyo kay Jehova. Nagsulat sia: “Nakabulig gid sa akon ang Mayo 2019 nga programa sa JW Broadcasting^®. Parte ini sa mga puede naton himuon para maghaganhagan ang aton kabalaka. Sabat gid ini sa akon mga pangamuyo.”

8. Paano ginpakita ni Jehova nga palangga niya si Jesus?

⁸ Palangga kita ni Jehova kag ginabuligan niya kita pareho sa iya pagpalangga kag pagbulig kay Jesus sang ari sia sa duta. (Juan 5:20) Ginbuligan niya si Jesus para magbakod ang iya pagtuo, ginpalig-on Niya sia sang nabalaka gid sia, kag ginhatagan Niya sia sang iya mga kinahanglanon sa adlaw-adlaw. Kag ginhambal ni Jehova sa iya Anak nga palangga Niya sia kag nahamuot Sia sa iya. (Mat. 3:16, 17) Kabalo si Jesus nga kaupod niya pirme ang iya mahigugmaon nga Amay kag sigurado sia nga buligan Niya sia, gani wala sia nagbatyag nga nagaisahanon.—Juan 8:16.

9. Ngaa masiling naton nga palangga kita ni Jehova?

⁹ Pareho kay Jesus, nabatyagan man naton nga palangga kita ni Jehova, kag ginapakita niya ini sa madamo nga paagi. Binagbinaga ini: Ginbuyok kita ni Jehova para mangin iya abyan, kag ginhatagan niya kita sang isa ka nahiusa nga pamilya nga nagapalanggaanay sa isa kag isa kag nagapalig-on sa aton kon nabalaka kita. Bangod sini, nalipay gid kita. (Juan 6:44) Ginahatag man ni Jehova ang tanan nga kinahanglan naton para magbakod ang aton pagtuo. Kag ginabuligan niya kita sa aton materyal nga mga kinahanglanon sa adlaw-adlaw. (Mat. 6:31, 32) Kon pamalandungan naton ang pagpalangga ni Jehova sa aton, mas palanggaon pa gid naton sia.

10. Ano ang matun-an naton sa pagpakita ni Jehova sang gugma sa aton mga kauturan?

¹⁰ Palangga ni Jehova ang aton mga kauturan. Pero kon kaisa, mahimo nga nabudlayan kita nga palanggaon sila ukon mahimo nga nabudlayan kita nga ipakita nga palangga naton sila. Kay man, lainlain ang aton kultura ukon gindak-an. Kag tanan kita makahimo sang sala nga posible magpasubo sa iban kag magpalain sang ila buot. Pero may mabulig kita para mapabakod naton ang aton gugma sa isa kag isa. Paano? Paagi sa pag-ilog sa aton Amay sa pagpakita sang gugma sa aton mga kauturan. (Efe. 5:1, 2; 1 Juan 4:19) Binagbinagon naton kon ano ang matun-an naton sa halimbawa ni Jehova.

11. Paano gin-ilog ni Jesus ang “mapinalanggaon nga kaluoy” ni Jehova?

¹¹ Nagapakita si Jehova sang “mapinalanggaon nga kaluoy.” (Luc. 1:78) Nabalaka ang maluluy-on nga tawo kon makita niya nga nagaantos ang iban, kag nagapangita sia sang paagi para mabuligan sila kag maumpawan. Gin-ilog ni Jesus si Jehova sa pagpakita sing kaluoy sa mga tawo. (Juan 5:19) Isa ka bes, sang makita ni Jesus ang mga tawo, “naluoy sia sa ila kay ginpanitan sila kag nag-alaplaag kaangay sang mga karnero nga wala sing manugbantay.” (Mat. 9:36) Wala lang si Jesus nagbatyag sing kaluoy sa ila, ginbuligan pa gid niya sila. Gin-ayo niya ang mga masakiton kag ginbuligan niya ang mga “ginabudlayan kag ginabug-atan.”—Mat. 11:28-30; 14:14.

12. Paano naton mapakita ang kaluoy sa aton mga kauturan?

¹² Para mapakita naton ang kaluoy sa aton mga kauturan, dapat naton hunahunaon kon paano sila naapektuhan sang ila mga problema. Halimbawa, ibutang ta nga may malala nga balatian  ang isa ka sister. Wala gid naton sia nabatian nga nagsiling nga nabudlayan sia, pero posible gid nga malipay sia kon may magbulig sa iya. Nabudlayan bala sia sa pag-aman sa mga kinahanglanon sang iya pamilya? Basi puede kita makaluto para sa ila ukon makabulig sa pagpaninlo sa ila balay. Ukon ibutang ta nga nadulaan sang obra ang isa ka brother. Basi puede kita makahatag sang kuarta sa iya nga makabulig sa iya samtang nagapangita pa sia sang obra. Puede kita makahatag nga wala nagapabalo nga halin ini sa aton.

13-14. Paano kita mangin maalwan pareho kay Jehova?

¹³ Maalwan si Jehova. (Mat. 5:45) Indi na naton paghulaton nga mangayo sing bulig ang aton mga kauturan antes naton sila pakitaan sing kaluoy. Buligan naton sila antes pa sila mangayo sing bulig, pareho sang ginahimo ni Jehova. Kada adlaw, ginapabutlak niya ang adlaw kag indi na kinahanglan nga pangabayon pa naton sia. Kag makabenepisyo ang tanan sa silak sang adlaw, pati na ang mga wala nagapasalamat sa iya. Paagi sa paghatag sang aton mga kinahanglanon, ginapakita ni Jehova nga palangga niya kita. Palangga gid naton si Jehova bangod maayo sia kag maalwan.

¹⁴ Gin-ilog sang aton mga kauturan ang aton Amay sa langit kay nangin maalwan man sila sa iban. Halimbawa, sang 2013, grabe gid ang halit sang Bagyo nga Yolanda (Haiyan) sa Pilipinas. Madamo nga kauturan ang nadulaan sang balay kag mga pagkabutang. Pero ginbuligan sila dayon sang ila mga kauturan sa bilog nga kalibutan. Madamo ang nag-amot sang kuarta ukon nagbulig sa pagkay-o ukon pagpatindog sang mga balay sang mga nahalitan. Wala pa isa ka tuig, halos 750 ka balay ang nakay-o kag napatindog. Sa tion sang COVID-19 nga pandemic, nagpanikasog gid ang mga Saksi sa pagbulig sa ila mga kauturan. Kon nagabulig kita dayon sa aton mga kauturan, ginapakita naton nga palangga naton sila.

15-16. Suno sa Lucas 6:36, ano ang dapat naton himuon para mailog naton ang aton Amay sa langit?

¹⁵ Maluluy-on si Jehova kag ginapatawad niya kita. (Basaha ang Lucas 6:36.) Kada adlaw, ginapakitaan kita sing kaluoy sang aton Amay sa langit. (Sal. 103:10-14) Ginpakitaan man ni Jesus sing kaluoy ang iya mga sumulunod kag ginpatawad niya sila bangod indi sila perpekto. Kinabubut-on pa gani niya nga ginhalad ang iya  kabuhi para mapatawad kita sa aton mga sala. (1 Juan 2:1, 2) Indi bala nga nagasuod pa gid kita kay Jehova kag kay Jesus bangod maluluy-on sila kag ginapatawad nila kita?

¹⁶ Nagabakod ang aton gugma sa aton mga kauturan kon ‘nagapatawad kita sing kinabubut-on.’ (Efe. 4:32) Matuod, mabudlay gid magpatawad sa iban kon kaisa. Gani dapat gid naton ini panikasugan. Nakabulig sa isa ka sister ang artikulo sa Ang Lalantawan nga “Patawara sing Kinabubut-on ang Isa kag Isa.” * Nagsulat sia: “Sang gintun-an ko ini nga artikulo, nahangpan ko nga makabenepisyo gid ako kon patawaron ko ang iban. Ginpaathag sini nga kon handa ka magpatawad sa iban, indi buot silingon nga ginakunsinti mo ang ila malain nga ginhimo ukon wala ka sini naapektuhan. Pero kon patawaron mo sila, ginapakita mo nga indi ka na akig sa ila, gani magatawhay ang imo hunahuna.” Kon kinabubut-on naton nga ginapatawad ang aton mga kauturan, ginapakita naton nga palangga naton sila kag ginailog naton ang aton Amay nga si Jehova.

17. Suno sa Mateo 5:16, paano naton mapadunggan ang aton Amay sa langit?

¹⁷ Nagapasalamat gid kita nga may pamilya kita sa bilog nga kalibutan nga nagapalanggaanay sa isa kag isa. Gusto naton nga madamo pa ang mag-upod sa aton sa pagsimba sa aton Dios. Gani dapat gid kita maghalong para indi mapakahuy-an ang aton Amay sa langit nga si Jehova ukon ang iya katawhan. Ginatinguhaan naton nga ipakita ang maayo nga pamatasan para mapalig-on ang mga tawo nga mamati sa maayong balita.—Basaha ang Mateo 5:16.

18. Ano ang makabulig sa aton para mangin maisog kita sa pagpanaksi?

¹⁸ Kon kaisa, mahimo pakalainon kita sang iban ukon hingabuton pa gani kita bangod ginatuman naton ang aton Amay sa langit. Ano ang himuon naton kon nakulbaan kita sa pagsugid sa iban sang aton mga ginapatihan? Makasalig kita nga buligan kita ni Jehova kag sang iya Anak. Ginsilingan ni Jesus ang iya mga disipulo nga indi sila dapat mabalaka kon ano ang ila ihambal ukon paano nila ini ihambal. Ngaa? “Sa sina nga tion ang  inyo ihambal ihatag sa inyo,” siling ni Jesus, “kay indi lamang kamo ang nagahambal, kundi nagahambal kamo paagi sa bulig sang gahom sang inyo langitnon nga Amay.”—Mat. 10:19, 20.

19. Maghatag sing halimbawa sang isa nga nangin maisog sa pagpanaksi.

¹⁹ Binagbinaga ang halimbawa ni Robert. Sang bag-o pa lang sia naga-Bible study kag diutay pa lang ang iya nabal-an sa Biblia, ginpatawag sia sa korte sa South Africa para ipaathag sa huwes kon ngaa indi sia magsoldado. May kaisog niya nga ginpaathag sa korte nga gusto niya mangin neutral bangod palangga niya ang iya mga kauturan nga Cristiano. Nalipay sia nga bahin sia sang aton pamilya nga nagasimba kay Jehova. Dayon, gulpi lang nga namangkot ang huwes, “Sin-o ang imo mga kauturan?” Wala gid nahunahuna ni Robert nga ipamangkot ini sa iya, pero nadumduman niya dayon ang teksto sadto nga adlaw. Amo ini ang Mateo 12:50, nga nagasiling: “Ang nagatuman sang kabubut-on sang akon Amay sa langit amo ang akon utod nga lalaki, utod nga babayi, kag iloy.” Bisan pa bag-o pa lang naga-Bible study si Robert sadto, ginbuligan sia sang balaan nga espiritu ni Jehova para masabat niya ang ginpamangkot sa iya kag ang iban pa nga mga pamangkot nga wala niya nahunahuna nga ipamangkot sa iya. Sigurado gid nga nalipay si Jehova kay Robert. Kag malipay man si Jehova sa aton kon magsalig kita nga hatagan niya kita sing kaisog para makapanaksi kita bisan sa mabudlay nga mga sitwasyon.

20. Ano ang dapat naton himuon? (Juan 17:11, 15)

²⁰ Nagapasalamat gid kita nga bahin kita sang isa ka pamilya nga nagapalanggaanay sa isa kag isa. Si Jehova ang aton pinakamaayo nga Amay kag may madamo kita nga kauturan nga nagapalangga sa aton. Dapat gid naton ini pabaloran. Ginatinguhaan ni Satanas kag sang mga nagasunod sa iya nga magduhaduha kita nga palangga kita sang aton Amay sa langit. Ginatinguhaan man nila nga gub-on ang aton paghiusa. Pero nagpangamuyo si Jesus para sa aton, kag ginpangabay niya ang aton Amay nga bantayan kita para padayon nga mahiusa ang aton pamilya. (Basaha ang Juan 17:11, 15.) Ginasabat ni Jehova ini nga pangamuyo. Pareho kay Jesus, indi gid kita magduhaduha nga palangga kita sang aton Amay sa langit kag buligan gid niya kita. Gani dapat naton panikasugan nga pabakuron pa gid ang aton gugma kay Jehova kag sa aton mga kauturan.