1. Abidadama taudia ese Iehova be edena bamona idia laloa diba?

IEHOVA idia tomadiho henia ruma besena lalonai, Iesu, iena natuna ginigunana bona aneru milioni momo idia noho. (Kol. 1:15; Sal. 103:20) Iesu be tanobada ai ia noho neganai, ia ese abidadama taudia ia hamaoroa Iehova be edia Tamana bamona do idia laloa. Iena hahediba taudia ia hereva henia neganai, ia ese Iehova ia gwauraia “egu Tamana bona emui Tamana.” (Ioa. 20:17) Iehova dekenai eda mauri ita gwauhamatalaia bona ita bapatiso neganai, ita be unai lalokau ruma besena lalonai ita noho.​—Mar. 10:29, 30.

2. Inai stadi ai dahaka do ita herevalaia?

² Haida ese Iehova be edia lalokau Tamana bamona idia laloa be auka. Ma haida be edia tadikaka taihu dekenai lalokau hahedinaraia dalana idia diba lasi. Inai stadi ai, Iesu ena heduru amo do ita itaia Iehova be ita ia lalokau henia Tamana bona ia kahirakahira ita lao diba. Danu, Iehova ena kara ita tohotohoa dalana amo tadikaka taihu dekenai kara namo ita hahedinaraia daladia do ita herevalaia.

3. Edena dala ai Iesu ese ita ia durua Iehova kahirakahira ita lao totona?

³ Iehova be lalokau Tamana ta. Iesu ese Iehova ia laloa hegeregerena ia ura ita danu be unai bamona do ita laloa. Iehova be hebogahisi bona lalokau Tamana, bona mai gari lasi ida ia ita hereva henia diba. Iesu ese ena hahediba taudia dekenai guriguri dalana ia hadibaia neganai, unai ia hahedinaraia. Unai guriguri matamanai, ia gwau: “Aiemai Tamana.” (Mat. 6:9) Iesu ia gwau diba ita ese Iehova ena dagi ladadia, hegeregere “Siahu Ibounai Diravana,” “Havaraia Tauna,” eiava “noho hanaihanai King” ita gaukaralaia diba. Bona unai be  maoro, badina Baibel ese Iehova totona unai dagi ladadia ia gaukaralaia. (Gen. 49:25; Isa. 40:28; 1 Tim. 1:17) To, Iesu ia gwau Iehova do ita gwauraia “Tamana.”

4. Edena dala ai ita diba Iehova ia ura ia kahirakahira ita lao?

⁴ Iehova be emu lalokau Tamana bamona oi laloa be auka, a? Ita haida be unai bamona ita laloa, badina reana ruma bese lalonai iseda tamana ese ita idia kara auka henia. To, ita moale badina Iehova ese iseda hemami ia lalopararalaia! Ia ura ita kahirakahira ia noho. Unai dainai Baibel ia gwau: “Dirava kahirakahira umui lao, bona ia be umui kahirakahira do ia mai.” (Iam. 4:8) Iehova be ita ia lalokau henia, bona ia gwau ia be Tamana namona ai do ia lao.

5. Luka 10:22 hegeregerena, edena dala ai Iesu ese ita ia durua Iehova kahirakahira ita lao totona?

⁵ Iesu ese ita ia durua diba Iehova kahirakahira ita lao totona. Iesu be Iehova ia diba namonamo bona Iena kara ia tohotohoa goevagoeva dainai, ia gwau: “Lau ia itaia tauna be Tamana danu ia itaia vadaeni.” (Ioa. 14:9) Iesu be iseda kakana bamona, ita dekenai iseda guba Tamana ita matauraia, kamonai henia, hamoalea bona ena lalonamo do ita abia dalana ia hahedinaraia. Tanobada ai Iesu ena mauri dalana amo ia hahedinaraia, Iehova be hebogahisi bona lalokau Diravana. (Luka 10:22 duahia.) Mani haheitalai haida ita itaia.

6. Edena dala ai ita diba Iehova ese Iesu ia kamonai henia? Haheitalai haida gwauraia.

⁶ Iehova be ena natudia ia kamonai henia. Iehova ese iena vara guna Natuna ia kamonai henia dalana mani ita laloa. Iesu be tanobada ai ia noho neganai, Iehova ese ena guriguri momo ia kamonai. (Luka 5:16) Iesu be abia hidi badadia, hegeregere aposetolo taudia 12 ia abia hidi gwauraia neganai, Iehova ese ena guriguri ia kamonai. (Luka 6:12, 13) Iesu ia lalohisihisi neganai, Iehova ese ena guriguri ia kamonai danu. Bona Iuda ese Iesu be ena inai taudia dekenai ia do henia lasi neganai, Iesu ese do ia davaria hahetoho badadia be ena Tamana dekenai ia gurigurilaia. Oibe, Iehova be Iesu ena guriguri ia kamonai sibona lasi, to  aneru ta ia siaia ena Natuna lalokauna ia hagoadaia totona.​—Luka 22:41-44.

7. Iehova ese iseda guriguri ia kamonai dainai, iseda hemami be edena bamona?

⁷ Hari, Iehova ese iseda guriguri ia kamonai danu, bona nega bona dala maorodia ai ia haerelaidia. (Sal. 116:1, 2) India ai taihu ta ia itaia Iehova ese ena guriguri ia haerelaia. Ena lalometau gauna be Iehova dekenai ia gurigurilaia goadagoada. Ia gwau: “May 2019 JW Broadcasting^® program ese lau ia durua bada, badina lalohekwarahi haheaukalaia dalana ia herevalaia. Unai be egu guriguri ena haere.”

8. Edena dala ai Iehova ia hahedinaraia Iesu ia lalokau henia?

⁸ Iesu be tanobada ai ia noho neganai, Iehova ese ia naria bona lalokau henia, unai hegeregerena Iehova ese ita danu ia naria bona lalokau henia. (Ioa. 5:20) Iesu ia lalometau neganai Iehova ese goada ia henia bona ia durua ena abidadama ia goada noho totona bona ena dabu gaudia ia henia danu. Bona Iehova ese ena Natuna ia hamaoroa ia lalokau bona lalonamo henia. (Mat. 3:16, 17) Iesu ia diba iena lalokau guba tamana be hanaihanai ia do ia durua unai dainai, ia mamia ia be sibona ia noho lasi.​—Ioa. 8:16, 29.

9. Dahaka ese idia hamomokania Iehova be ita ia lalokau henia?

⁹ Iesu hegeregerena ita ibounai be dala idauidau ai Iehova ena lalokau ita mamia. Mani oi laloa: Iehova ese ia dekenai ita ia veria lao bona tadikaka taihu momo ia henia, unai amo hekwakwanai negadia ai ita idia hagoadaia bona hamoalea diba. (Ioa. 6:44) Danu Iehova ese heduru gaudia momo ia henia iseda abidadama ita hagoadaia totona. Dina ta ta ena mauri durua gaudia ia henia danu. (Mat. 6:31, 32) Oibe, Iehova ena lalokau ita laloa dobu neganai, iseda lalokau ia dekenai do ia goada ia lao.

10. Iehova ese iseda tadikaka taihu ia kara henia dalana amo dahaka ita dibaia?

¹⁰ Iehova be iseda tadikaka taihu ia lalokau henia. To, reana idia ita lalokau henia be auka, badina iseda kastom bona mauri daladia be idauidau. Bona ita be goevadae lasi dainai, nega haida iseda kara o hereva amo ma haida ita habadua eiava hahisia diba. To, namona be ita gaukara goada iseda tadikaka taihu huanai lalokau ita hagoadaia totona. Edena dala ai? Iseda Tamana do ita tohotohoa bona tadikaka taihu dekenai lalokau do ita hahedinaraia. (Efe. 5:1, 2; 1 Ioa. 4:19) Mani Iehova amo ita dibaia gaudia ita herevalaia.

11. Edena dala ai Iesu ese Iehova ena “hebogahisi bada” karana ia hahedinaraia?

¹¹ Iehova be “hebogahisi bada” karana ia hahedinaraia. (Luka 1:78) Hebogahisi tauna be hekwakwanai idia davaria taudia ia laloa bada, bona dala ia tahua idia ia durua bona hagoadaia totona. Iesu ese ma haida ia kara henia dalana amo, Iehova ena hebogahisi bada karana ia hahedinaraia. (Ioa. 5:19) Nega ta Iesu ese hutuma ia itaia neganai, “ia hebogahisi henidia, badina idia be mamoe naria tauna ese ia naria lasi mamoe bamona, haida ese idia haberoa bona idia dadaraia.” (Mat. 9:36) Iesu be taunimanima ia hebogahisi henia sibona lasi, to kara ta ia karaia, hegeregere gorere taudia ia hanamoa bona idia “hesiku bona metau bada” idia huaia taudia dekenai goada matamata ia henia.​—Mat. 11:28-30; 14:14.

12. Edena dala ai iseda tadikaka taihu dekenai hebogahisi ita hahedinaraia diba?

¹² Iseda tadikaka taihu edia hekwakwanai ita laloa neganai, idia dekenai hebogahisi ita hahedinaraia diba. Hegeregere, reana taihu ta be mai ena gorere badana, bona ia herevalaia lasi, to do ia moale bema haida  ese ia idia durua. Edena dala ai ena ruma bese edia dabu gaudia ia henia? Ia totona aniani ita nadua eiava ena ruma ita hagoevaia diba, a? Eiava tadikaka ta be ena moni gaukara ia haboioa. Reana ia dekenai moni sisina ita henia, unai ese ia do ia durua ela bona gaukara ma ta ia davaria. To do ita hamaoroa lasi unai harihari gauna be ita ese ita henia.

13-14. Edena dala ai Iehova ena hariharibada karana ita tohotohoa diba?

¹³ Iehova be hariharibada Diravana. (Mat. 5:45) Namo lasi ita naria ela bona tadikaka taihu be heduru totona idia noinoi, bena hebogahisi ita hahedinaraia. To Iehova bamona, kara ta ita karaia haraga. Iehova ese ita dekenai medu ia siaia, ena be ita noinoi lasi! Bona medu ese taunimanima ibounai ia hanamoa, tanikiu karana idia diba lasi taudia danu. Iehova ese iseda dabu gaudia ia henia karana amo, ia hahedinaraia ita ia lalokau henia. Iehova ita lalokau henia bada, badina ia be hebogahisi bona hariharibada Diravana!

¹⁴ Iseda tadikaka taihu be Iehova idia tohotohoa. bona ma haida dekenai hariharibada karana idia hahedinaraia. Hegeregere lagani 2013 ai, Philippines ai lai gubana (Typhoon Haiyan) ese dika bada ia havaraia. Tadikaka taihu momo be edia ruma bona kohu idia haboioa. To karaharaga tanobada hegegemadai tadikaka taihu be heduru idia henia. Momo ese moni idia siaia eiava konstraksen gaukarana idia durua dainai, hua haida lalonai ruma ibounai 750 idia hanamoa bona haginia lou! COVID-19 gorere ia vara lalonai, Witnes taudia idia gaukara goada edia tadikaka taihu idia durua totona. Bema, karaharaga iseda tadikaka taihu ita durua, ita hahedinaraia idia ita lalokau henia.

15-16. Edena dala ai iseda guba Tamana ita tohotohoa diba?

¹⁵ Iehova be dika gwauatao Diravana. (Salamo 86:5 duahia.) Dina ta ta ai iseda guba Tamana ese eda dika ia gwauatao. (Sal. 103:10-14) Iesu ena murinai idia raka taudia be goevadae lasi, to ia hebogahisi henidia bona edia dika ia gwauatao. Danu, mai ura ibounai ida ena mauri  ia bouboulaia, iseda dika ia gwauatao totona. (1 Ioa. 2:1, 2) Iehova bona Iesu be iseda dika idia gwauatao dainai, oi ura idia kahirakahira oi lao, ani?

¹⁶ Ta ta eda dika ita gwauatao neganai, ita huanai lalokau ita hagoadaia. (Efe. 4:32) Oibe, nega haida ia auka dika ita gwauatao totona, unai dainai ita hekwarahi noho be namo. Gima Kohorona atikol ladana, “Mai Kudouna Ibounai ida Do Umui Gwauatao Heheni” ese taihu ta ia durua unai ia karaia totona. * Ia gwau: “Inai atikol ese lau ia durua ma haida edia dika gwauatao karana ena namo lau lalopararalaia totona. Ia hahedinaraia ma haida edia dika ita gwauatao anina be, ita gwau lasi idia karaia kerere be maoro, eiava ma haida ia hahisia lasi. To dika gwauatao karana ena anina be, edia dika ita laloaboio bona ita badu henidia noho lasi bona iseda kudouna ai maino do ia noho.” Mai kudouna ibounai ida iseda tadikaka taihu edia dika ita gwauatao neganai, ita hahedinaraia idia ita lalokau henia bona iseda guba Tamana, Iehova, ita tohotohoa.

17. Mataio 5:16 hegeregerena, edena dala ai iseda guba Tamana ita hanamoa diba?

¹⁷ Ita moale badina ita be tanobada hegegemadai idia lalokau heheni taudia huanai ita noho. Ita ura taunimanima momo ese ita idia bamoa Dirava ita tomadiho henia hebou totona. Unai dainai, iseda kara ita naria namonamo, ita ura lasi Iehova eiava ena taunimanima edia ladana ita hadikaia. Namona be hanaihanai kara namodia ita hahedinaraia, unai ese taunimanima edia lalona do ia veria Iehova idia diba bona idia tomadiho henia totona.​—Mataio 5:16 duahia.

18. Dahaka ese ita ia durua mai gari lasi ida ita haroro totona?

¹⁸ Iseda guba Tamana ita badinaia dainai, nega haida taunimanima ese ita do idia gwauraia dika eiava dagedage henia. Ita abidadama henia gaudia be ma haida dekenai ita gwauraia totona ita gari neganai, dahaka ita karaia diba? Ita diba momokani Iehova bona ena Natuna ese ita do idia durua.  Iesu ese ena hahediba taudia ia hagoadaia do idia herevalaia gaudia bona edia hereva dalana do idia laloa momo lasi. Dahaka dainai? Iesu ia gwau: “Edena bamona do umui hereva bona dahaka do umui gwauraia umui lalohekwarahilaia lasi, badina do umui gwauraia gauna be unai nega dekenai do umui diba, badina umui sibona do umui hereva lasi, to emui Tamana ena lauma helaga ena heduru amo do umui hereva.”​—Mat. 10:19, 20.

19. Mai gari lasi ida ia haroro tauna ta ena sivarai mani oi gwauraia.

¹⁹ Mani South Africa ai tadikaka Robert ena haheitalai ita laloa. Guna ia be Baibel stiuden matamata bona Baibel ia do diba namonamo lasi neganai, tuari ia lao lasi dainai kota vairanai ia gini. Mai gari lasi ida ia gwau ena Keristani tadikaka ia lalokau henia dainai tuari lalonai ia vareai lasi. Ia ese ena Keristani ruma bese ia laloa bada! Diadi tauna ia henanadai, “Oiemu tadikaka be daidia?” Robert ia laloa lasi unai henanadai do idia henia, to karaharaga unai dina ena siri ia laloatao. Unai be Mataio 12:50: “Egu guba Tamana ena ura ia karaia tauna be egu tadikaka, egu taihuna bona egu sina.” Ena be Robert be Baibel stadi sibona, to Iehova ena lauma helaga ese ia durua unai henanadai bona henanadai ma haida ia haerelaia totona. Ita diba Iehova be Robert dekenai ia moale bada! Oibe, nega aukadia ai mai gari lasi ida ita haroro neganai, Iehova be ita dekenai ia moale danu.

20. Iseda lalona ita hadaia dahaka ita karaia totona? (Ioane 17:11, 15)

²⁰ Keristani ruma besena lalonai ita noho be hahenamo badana. Iseda Tamana be hereadae bona ita idia lalokau henia tadikaka taihu momo herea idia noho. Nega ibounai unai do ita laloa bada. Satani bona ena taunimanima dikadia idia ura iseda guba Tamana ena lalokau ita daradaralaia bona iseda lalotamona karana idia hadikaia. To, Iesu be ita totona ena Tamana ia noia ita do ia naria, unai amo lalotamona ai do ita noho. (Ioane 17:11, 15 duahia.) Iehova be Iesu ena guriguri ia haerelaia noho. Iesu hegeregerena, namona be iseda guba Tamana ena lalokau bona heduru dekenai ita daradara lasi. Namona be hanaihanai iseda Keristani ruma bese kahirakahira ita noho.