1. Ovandu ovaṱakame mave yenene okukara noupanga uṋe na Jehova?

EṰUNḒU rovakarere va Jehova ri kamburira mo Jesus, ngu ri “Omuna omukwatwaerike, ngwa ri po komeho yoviutwa avihe,” novaengeli. (Kol. 1:15; Eps. 103:20) Jesus tja ri kombanda yehi wa raisa kutja ovandu ovaṱakame mave yenene okuvara Jehova otja Tate. Indu tjaa hungire kovahongewa ve, Jesus wa hungira ohunga na Jehova otja “Tate, wina ngu ri Iho yeṋu.” (Joh. 20:17) Indu tji twe riyandja oveni ku Jehova natu papitisiwa, tu rira orupa rweṱunḓu rovakambure.—Mar. 10:29, 30.

2. Morupa ndwi matu katara ku ye?

² Tjiva ve muna ko ouzeu okuvara Jehova otja Tate worusuvero. Varwe kave tjiwa omuano mu mave sokuraisa orusuvero kovakambure ovakwao. Morupa ndwi, matu katara komuano Jesus me tu vatera okuvara Jehova otja Tate ngwe tu suvera, nu ngu matu yenene okutumbuka popezu na ye. Eṱe wina matu katara komiano mu matu yenene okuhorera ku Jehova momuano mu tu tjinda ovakambure ovakwetu.

3. Omomuano uṋe ongumbiro Jesus ndja honga mu i tu vatera okutumbuka popezu na Jehova?

³ Jehova oTate worusuvero. Jesus u vanga kutja eṱe tu vare Jehova otja eye tje mu vara. Eye u vanga kutja tu mu vare otjomunene worusuvero nomupaturuke kuna eṱe, nu ka vanga kutja tu mu vare otjomundu ngu hi norusuvero nu ngu vanga okuturaera kutja ngatu tjite vi uriri. Eṱe tu muna otjiṋa hi okuza koviṋa Jesus mbya honga ovahongewa ve okukumba. Mongumbiro ndja honga, eye wa uta nomambo nga: “Tate yetu.”  (Mat. 6:9) Jesus etje tu raera kutja ngatu isane Jehova kutja, “Omunamasaaehe” “Omuute” poo “Ombara yaaruhe,” mena rokutja Ombeibela i ungurisa omambo ngo tji mai hungire ohunga na Jehova. (Gen. 49:25; Ef. 3:9; 1 Tim. 1:17) Posi yokutja, Jesus we tu raera kutja tu isane Jehova “Tate.”

4. Hapo eṱe matu tjiwa vi kutja Jehova u vanga kutja tu tumbuke popezu na ye?

⁴ Hapo ove u muna ko ouzeu okuvara Jehova otja Iho worusuvero? Ku tjiva ouzeu, mena rokutja omekurisiro wawo ya ri omavi. Tjiri otjihuhumiṋe okutjiwa kutja Jehova u tjiwa omuano mbu tu fula nokutja ongwaye tji matu fula nao. Jehova u vanga kutja tu tumbuke popezu na ye, kunao Embo re ri tu tunduuza kutja, “Tumbukeye ku Ndjambi, nEye ma tumbuka ku eṋe.” (Jak. 4:8) Jehova we tu suvera, nu u vanga okurira Tate wetu.

5. Otja ku Lukas 10:22, Jesus u tu vatera vi okutumbuka popezu na Jehova?

⁵ Jesus ma yenene okutuvatera kutja tu tumbuke popezu na Jehova. Jesus u tjiwa Jehova nawa nu u raisa ovikaṋena vye. Kunao, eye wa tja: “Auhe ngwa munu Ami wa munu Tate.” (Joh. 14:9) Tjimuna erumbi poo omuṱena kwetu omunene, Jesus u tu honga omuano wokuraisa ondengero nokukara nonḓuviro ku Tate wetu, nokutja ovikwaye mbi twa sokutjita kutja tu mu yorokise nu tu yakurwe i Ye. Posi yokutja, tjinenenene Jesus u tu vatera kutja tu tjiwe kutja Jehova u notjari norusuvero. (Lesa Lukas 10:22.) Ngatu tare kovihorera tjiva.

6. Yandja ovihorera mbi mavi raisa kutja Jehova aa puratene kozongumbiro za Jesus.

⁶ Jehova u puratena kovanatje ve. Tara komuano eye maa puratene kOmuna we. Otjiperi kutja Jehova wa puratena kozongumbiro ozengi zOmuna we, indu tja ri kombanda yehi. (Luk. 5:16) Eye wa puratena ku Jesus indu tjaa kumbu ohunga noviṋa ovinanḓengu, tjimuna indu tjaa sokutoorora ovaapostele ve 12. (Luk. 6:12, 13) Jehova wina wa puratena ku Jesus indu tja ri nombameno. Komurungu wa indu Judas tja horora Jesus, eye wa kumba ku Ihe ohunga nomarorero ngaa sokutuurunga. Jehova ka puratenene uriri kozongumbiro za  Jesus, posi yokutja wa hinda omuengeli okuyekuzeuparisa Omuna we omusuverwa.—Luk. 22:41-44.

7. Hapo ove u fula vi okutjiwa kutja Jehova u puratena kozongumbiro zovakarere ve?

⁷ Ndino Jehova wina u puratena kozongumbiro zovakarere ve, neye u ze zira moruveze orusemba na momuano omusemba. (Eps. 116:1, 2) Omukazendu omukambure ngwa tura moIndia wa muna omuano Jehova ma zira ozongumbiro ze. Eye wa ri omundu ngu rikenda tjinene, nu we riyarikaṋa ku Jehova mongumbiro ohunga notjiṋa ho. Eye wa tja: “Oprograma yo-JW Broadcasting^® ya Mei 2019, ndjaa i hungire ohunga nomuano wokutjinda omerikendero ootjiṋa tjee hepa. Oyo ya ri eziriro kozongumbiro zandje.”

8. Omomiano viṋe Jehova ma raisa orusuvero ku Jesus?

⁸ Jehova we tu suvera nu u rikendera eṱe, tjimuna tja suvera Jesus nu tjee rikendere ye indu tja ri kombanda yehi. (Joh. 5:20) Eye aa vatere Jesus kutja ma kare nongamburiro yomasa, nu ee mu yanḓiparisa indu tja ri nozombameno. Nu wina ee mu vatere kutja ma kare noviṋa mbi ma hepa kutja ma hupe. Jehova aa raere Omuna we kutja we mu suvera nu u nonyuṋe mu ye. (Mat. 3:16, 17) Jesus aa tjiwa kutja Ihe womeyuru aruhe wa ri puna ye, nu mena ranao kee rimunu ourike.—Joh. 8:16.

9. Eṱe matu tjiwa vi kutja Jehova we tu suvera?

⁹ Tjimuna Jesus eṱe atuhe twa yenena okumuna kutja Jehova we tu suvera momiano omingi pekepeke. Ripura notjiṋa hi: Jehova we tu yandjera okurira omapanga we, nu we tu pa ovakambure ovakwetu vorusuvero mbe tu pa ondjoroka nu mbe tu yanḓiparisa indu tji tu nozombameno. (Joh. 6:44) Jehova wina u tu pa oviṋa mbi matu hepa kutja tu kare nongamburiro yomasa. Nu nandarire u tu vatera noviṋa mbi matu hepa kutja tu hupe. (Mat. 6:31, 32) Tji matu ripura nomuano Jehova me tu raisira orusuvero, orusuvero rwetu ku ye ru kurira ko.

10. Matu rihongere ko ye komuano Jehova mbwe tjinda ovakambure ovakwetu?

¹⁰ Jehova wa suvera ovakarere ve avehe. Posi yokutja, mape ya a ha rire oupupu ku eṱe okuvesuvera. Mena rokutja twa za mozombazu pekepeke, nu twe kura mozongaro nḓa panguka. Nu wina atuhe tu tjita ozondataiziro nḓe kurungisa varwe nokuvepindikisa. Nungwari, atuhe matu yenene okukondja okukurisa orusuvero rwetu kovakambure ovakwetu. Omomuano uṋe? Orondu tji matu horere ku Tate wetu mokuraisa orusuvero kovakambure ovakwetu. (Ef. 5:1, 2; 1 Joh. 4:19) Ngatu tare kutja matu rihongo ye okuza kotjihorera tja Jehova.

11. Jesus wa raisa vi kutja Jehova “omunatjari”?

¹¹ Jehova “omunatjari.” (Luk. 1:78) Omundu ngu notjari u rikenda indu tji ma munu varwe amave munu ouzeu, nu u paha omiano vyokuvevatera nokuvehuhumiṋa. Jesus aa horere ku Jehova mokutjinda ovandu notjari norusuvero. (Joh. 5:19) Otjikando tjimwe Jesus wa muna otjimbumba tjovandu, neye “wa hara ondjenda na wo, owo tjinga ava kurungisirwe nu ava ningisire ondjenda tjimuna ozonḓu nḓe hi nomurise.” (Mat. 9:36) Jesus kee ve ṱire ondjenda uriri, nungwari wa toora omukambo okuvevatera. Eye wa verura ovavere nu wa vatera imba mba “pungarisiwa i okutjinda omitwaro omizeu.”—Mat. 11:28-30; 14:14.

12. Yandja otjihorera tjomuano mu matu yenene okuraisa otjari kovakambure ovakwetu.

¹² Eṱe matu hepa okutjiwa ouzeu wovakambure ovakwetu kutja tu yenene okuveraisira otjari. Otjotjihorera, ngatu tje pe nomukazendu  omukambure ngwa vera tjinene. Nandarire kutja ka hungire ohunga nouvere we, eye ma kara nondjoroka tjinene tji pe nomundu ngwe riyandjere okumuvatera. Hapo eye u tumba vi eṱunḓu re? Eṱe mape ya atu yenene okumuvatera okumuterekera poo okukohorora ondjuwo ye. Omurumendu omukambure mape ya wa pandjara oviungura vye. Eṱe matu yenene okumupa ovimariva otjotjiyandjewa, kutja vi yenene okumuvatera ngandu tja munu oviungura vyarwe, nokuhina okumuraera kutja vya zu ku uṋe.

13-14. Eṱe matu yenene vi okurira ovaharupu tjimuna Jehova?

¹³ Jehova omuharupu. (Mat. 5:45) Katu nakuhepa okuundja ngandu ovakambure ovakwetu tji ve tu ningire ombatero kutja tu ve raisire otjari. Tjimuna Jehova, eṱe matu yenene okuvetjitira oviṋa ngunda ave hi ye tu ningira. Eye u tu pitisira eyuva nandarire ngunda atu hi ya ningira. Nu ovandu avehe nandarire imba mbe hi nondangi, ve muna ouwa kozohanya zeyuva. Otjiperi kutja, Jehova tji me tu pe oviṋa mbi tu hepa omuano we wokuraisa orusuvero rwe ku eṱe. Eṱe tjiri twa suvera Jehova tjinene mena rokutja eye u notjari nomuharupu.

¹⁴ Ovakambure ovakwetu ve horera ku Jehova mokuraisa ouharupu ku varwe. Otjotjihorera, mombura ndji 2013, otjivepo otjinamasa tja yeta onyoneno onyingi moPhilippines. Ovakambure ovakwetu ovengi va pandjara ozonganda nomauini wawo. Posi yokutja, ovakambure ovakwao ongondoroka nouye va hakahana okuyekuvevatera. Ovengi va yandja ombatero yotjimariva nu varwe va kara norupa mokutungurura ozonganda 750 nḓa nyonwa momieze omiṱiṱi uriri. Moruveze ndwi romutjise wo-COVID-19, ovahongonone va Jehova va ungura oukukutu okukondja okuvatera ovakambure ovakwao. Eṱe tji twa hakahanene po okutoora omikambo okuvatera ovakambure ovakwetu, tu ve raisira kutja twe ve suvera.

15-16. Otja ku Lukas 6:36, otjikwaye tji matu sokutjita kutja tu horere ku Tate wetu womeyuru?

¹⁵ Jehova u notjari nu u isira. (Lesa Lukas 6:36.) Eyuva arihe Tate wetu womeyuru u tu raisira otjari. (Eps. 103:10-14) Ovakongorere va Jesus kava ri ohomonena, posi yokutja  Jesus ee ve raisire otjari nokuveisira. Eye nandarire we riyandjera okuṱa kutja omauvi wetu ye isirwe. (1 Joh. 2:1, 2) Jehova na Jesus ve notjari nu ve isira nu iho tji tjita kutja eṱe tu tumbuke ku wo.

¹⁶ Eṱe tu kurisa orusuvero mokati ketu indu tji matu ‘isirasana.’ (Ef. 4:32) Otjiperi kutja povikando tjiva ouzeu okuisira varwe, posi yokutja tu sokuungurira ko kutja tu isire varwe. Omukazendu umwe omukambure wa lesa orupa mokambo kOruhungu ohunga nokuisira varwe ndwe mu vatera okutjita nao. * Eye wa tja: “Okukonḓonona orupa ndwi kwe ndji vatera okumuna ouwa mbu za mokuisira varwe. Orwo rwa kahurura kutja okuisira varwe kaku hee kutja ove mo yakura kutja otjiṋa tji va tjiti katja ri navi, poo katji ku hihamisire. Posi yokutja, okuisira ku ku vatera kutja ove o ha kara nomapindi na wo rukwao nu ku ku vatera kutja u kare nohange momuinyo.” Kunao, okuisira ovakambure ovakwetu ku raisa kutja twe ve suvera nu tu horera ku Tate wetu Jehova.

17. Otja ku Mateus 5:16, eṱe matu yenene vi okuyozika Tate wetu womeyuru?

¹⁷ Ondjingonekero onene kutja oweṱe orupa rwovakambure mba handjauka mouye auhe nu mba suverasana. Eṱe tu vanga kutja ovandu ovengi ve ute okurikotamena ku Jehova puna eṱe. Kunao, twa sokukondja kutja atu ha tjiti otjiṋa tji matji zunḓa ena ra Jehova poo rOvahongonone ve. Eṱe aruhe tu kondja okuritjinda momuano mbu mau tjiti kutja ovandu ve vange okurihonga ohunga na Jehova nokuvanga okumukarera.—Lesa Mateus 5:16.

18. Otjikwaye tji matji tu vatere okuzuvarisa nouvanḓe?

¹⁸ Povikando tjiva, tjiva mape ya ave tu hungire omambo omavi nokututatumisa mena rokutja tu nonḓuviro ku Tate wetu womeyuru. Matu sokutjita vi indu tji matu tira okuhungira kuna varwe ohunga nongamburiro yetu? Eṱe matu sokukara nongamburiro kutja Jehova na Jesus mave tu vatere. Jesus wa raera ovahongewa ve kutja kave nakuhepa okurikenda ohunga noviṋa mbi mave sokuhungira.  Omena raye? Jesus wa tja: “Oruveze tji rwa tumbuka eṋe mamu raerwa imbi mbi mamu sokuhungira, omambo ngu mamu kahungira tjinga aye hi nokurira oweṋu oveni nu amaye zu kOmbepo ya lho ndji mai hungire mu eṋe.”—Mat. 10:19, 20.

19. Yandja otjihorera tjomundu ngwa zuvarisa nouvanḓe.

¹⁹ Tara kotjihorera tja Robert. Indu tja ri omuhongwa wOmbeibela omupe nu tje ha ri nondjiviro osemba yOmbeibela, eye wa yetwa komurungu wotjombanguriro tjorupa rwovita moSouth Africa. Eye wa raisa ouvanḓe nu wa kahururira otjombanguriro kutja kaa vanga okukara norupa movita mena rokutja wa suvera omarumbi novaṱena kwe. Eye wa ri nondangi okurira orupa rweṱunḓu ra Jehova. Tjimanga omupangure we mu pura kutja, “Omarumbi novaṱena kwoye oouṋe?” Robert kaa undjire ko epuriro ndo, posi yokutja tjimanga eye wa zemburuka Etjangwa reyuva ndo. Oro ra ri Mateus 12:50 ndi tja: “Auhe ngu ma tjiti ombango ya Tate ngu ri meyuru, eye omuzamumwe wandje nomuṱena kwandje, neye mama.” Nandarire kutja Robert wa ri omuhongwa wOmbeibela omupe, ombepo ya Jehova ye mu vatera kutja ma zire epuriro ndo nomapuriro warwe nge hi na aa undjire ko. Jehova wa ri nonyuṋe na Robert. Nu Jehova wina u kara nonyuṋe na eṱe indu tji matu riyameke ku ye okuzuvarisa mozongaro ozonḓeu.

20. Eṱe matu sokurimanena okutjita ye? (Johanes 17:11, 15)

²⁰ Eṱe tu nondangi okurira orupa rweṱunḓu rovakambure vorusuvero. Eṱe tu na Tate omusembasemba nu wina tu novakambure ovakwetu ovengi mbe tu suvera. Aruhe matu sokuraisa ondangi koviṋa mbi. Satan novemukongorere, ve kondja kutja tu mune kutja Tate wetu womeyuru kee tu suvera nu ve kondja kutja atu ha kara nombwaneno mokati ketu. Posi yokutja, mongumbiro Jesus wa kumba kutja Tate me tu tjevere nokutja eṱunḓu retu ri kare nombwaneno. (Lesa Johanes 17:11, 15.) Jehova u zira ongumbiro ndjo. Tjimuna Jesus, eṱe katu sokukeyakeya kutja Tate wetu womeyuru wetu suvera nu u vanga okutuvatera. Ngatu rimanene okukayenda komurungu okutumbuka popezu novakambure ovakwetu.