1. Nama kaul ti ulih dikembuan mensia ti tetap ati enggau Jehovah?

RUANG BILIK Jehovah nyengkaum Jesus, iya nya “Anak ke terubah diadaka ari atas semua utai ti digaga,” enggau bala melikat. (Kol. 1:15; Mas. 103:20) Lebuh Jesus ba dunya, iya nulung orang nemu sida mega ulih ngangauka Jehovah nya Apai sida. Lebuh iya bejaku enggau bala murid iya, Jesus ngumbai Jehovah nya ‘Apai aku enggau Apai kita.’ (Jhn. 20:17) Lebuh kitai nyerahka diri ngagai Jehovah lalu dibaptisa, kitai nyadi sebagi ari ruang bilik bala menyadi Kristian ti bepengerindu.—Mrk. 10:29, 30.

2. Nama deka dipejuraika kitai ba artikel tu?

² Sekeda orang berasai tusah ngumbai Jehovah nya Apai ti bisi pengerindu. Mayuh orang enda nemu chara ngayanka pengerindu ngagai bala menyadi. Ba artikel tu, kitai deka bejuraika baka ni Jesus nulung kitai nemu Jehovah nya Apai ti bisi pengerindu lalu kitai ulih datai semak ngagai Iya. Kitai mega deka belajar chara neladan Jehovah lebuh begulai enggau bala menyadi.

3. Baka ni sampi ke diajar Jesus nulung kitai semak ngagai Jehovah?

³ Jehovah nya Apai ti bisi pengerindu. Jesus deka kitai ngembuan runding ti sama enggau iya pasal Jehovah, iya nya seiku Apai ti manah sereta bepengerindu ke ulih dibai bejaku ba sebarang  maya. Tu ulih dipeda ari chara Jesus ngajar bala murid iya besampi. Iya ngepunka sampi enggau rambai jaku: “Apai kami.” (Mat. 6:9) Kebendar iya, Jesus ulih ngasuh kitai ngangauka Jehovah nya Petara “ti Pemadu Bekuasa,” “Penempa,” tauka “Raja ke meruan belama iya.” Tu enda salah laban Bup Kudus ngena semua kangau tu ke Jehovah. (P-kal. 49:25; Isa. 40:28; 1 Tim. 1:17) Taja pia, Jesus ngasuh kitai ngangauka Jehovah nya “Apai.”

4. Baka ni kitai nemu Jehovah deka kitai semak enggau Iya?

⁴ Kati nuan tusah deka ngumbai Jehovah nya Apai ti bisi pengerindu? Sekeda ari kitai engka ngasaika nya. Sekeda kitai engka dibesaika ba ruang bilik ti nadai pengerindu. Ketegal nya kitai tusah deka meretika, baka ni gaya asai ati kitai enti bisi apai indai ti bepengerindu. Taja pia kitai ulih berasai lantang ati laban Jehovah nemu asai ati kitai ti bendar sereta kebuah kitai berasai baka nya! Iya deka semak ngagai kitai. Nya kebuah Bup Kudus meransang kitai: ‘Datai semak ngagai Petara, lalu Iya deka datai semak ngagai kita.’ (Jas. 4:8) Jehovah sayauka kitai lalu Iya deka nyadi Apai kitai ti pemadu manah.

5. Nitihka Luke 10:22, baka ni Jesus ulih nulung kitai semak ngagai Jehovah?

⁵ Jesus ulih nulung kitai semak ngagai Jehovah. Jesus ngelala Jehovah enggau amat manah lalu neladan pemanah Iya enggau sempurna. Nya kebuah Jesus ulih madah: ‘Barang sapa udah meda aku, udah meda Apai.’ (Jhn. 14:9) Jesus baka menyadi kitai ke tuai. Iya ngajar kitai ngayanka basa sereta ngasika Jehovah. Nambahka nya, Jesus madahka kitai utai ke patut diseliah ngambika enda ngasuh Jehovah tusah ati, lalu iya mega madahka chara kitai ulih diterima Jehovah. Tang kelebih agi, Jesus nulung kitai meretika Jehovah nya amat manah sereta bepengerindu. (Bacha Luke 10:22.) Aram kitai meda sekeda chunto.

6. Baka ni kitai nemu Jehovah ningaka Jesus? Beri chunto.

⁶ Jehovah ningaka bala anak Iya. Peratika lebuh Jesus ba dunya, Jehovah seruran ningaka sampi Jesus. (Luk. 5:​16) Iya ningaka Jesus besampi lebuh Jesus patut ngaga pemutus ti  berat, baka maya Jesus patut milih 12 iku rasul. (Luk. 6:12, 13) Jehovah mega mendingka sampi Jesus lebuh iya balat tusah ati. Enda lama sebedau Judas nyerahka Jesus ngagai munsuh, Jesus bebendar besampi ngagai Apai iya pasal penguji ti berat ke deka ditapi iya. Jehovah ukai semina ningaka sampi Jesus aja. Kebendar iya, bisi sekali Jehovah nganjung seiku melikat kena ngeringka Anak Iya ti dikesayau.—Luk. 22:41-44.

7. Nama asai ati nuan lebuh nemu Jehovah ninga sereta nyaut sampi nembiak Iya?

⁷ Kemayaharitu, Jehovah agi ningaka sampi bala nembiak Iya lalu nyaut sampi sida ba maya ti ngena sereta enggau chara ti pemadu manah. (Mas. 116:1, 2) Peratika baka ni seiku menyadi indu ba India ngasaika tu. Iya napi asai ati ti balat irau, lalu iya bebendar besampi ngagai Jehovah pasal pekara tu. Iya nulis: “Berita JW bulan Mei taun 2019 bisi ngajar pasal utai ke patut digaga lebuh berasai irau. Nya meh saut ngagai sampi aku.”

8. Nama chara Jehovah nunjukka pengerindu ngagai Jesus?

⁸ Baka chara Jehovah nyaga Jesus, Iya mega rindu sereta deka nyaga kitai. (Jhn. 5:20) Iya nulung Jesus mengkang arapka Iya, meransang iya lebuh berasai tusah ati, lalu nentuka Jesus bisi utai ke diguna iya ba pengidup besehari-hari. Pia mega, Jehovah enda kakang ati nunjukka pengerindu ngagai Anak Iya. Iya mega madahka Diri amat lantang ati enggau Jesus. (Mat. 3:16, 17) Ketegal Jesus seruran bepanggai ba Apai iya ti di serega, Jesus enda kala berasai kediri.—Jhn. 8:16.

9. Baka ni kitai nemu Jehovah rinduka kitai?

⁹ Baka Jesus, mayuh ari kitai udah ngasaika pengerindu Jehovah nengah mayuh chara. Perundingka tu: Jehovah mai kitai datai ngagai Iya lalu meri kitai ruang bilik ti bepengerindu sereta beserakup. Tu ngasuh kitai gaga ati lalu meransang kitai lebuh berasai tusah ati. (Jhn. 6:44) Jehovah mega meri kitai semua utai ti diguna ba pengarap ngambika kitai mengkang tegap. Iya indah meri utai ke diguna kitai ba pengidup besehari-hari. (Mat. 6:31, 32) Lebuh kitai belematika pengerindu Jehovah ngagai kitai, pengerindu kitai ngagai Iya mega deka majak nambah.

10. Nama ulih dipelajarka kitai ari chara Jehovah rinduka bala menyadi Kristian?

¹⁰ Jehovah rinduka bala menyadi Kristian kitai. Tang kitai engka ngasaika tusah deka ngembuan pengerindu ke sida tauka ngayanka pengerindu nya ngagai sida. Tu ketegal semua kitai datai ari bemacham bansa sereta menua. Lalu semua kitai bisi ngereja penyalah ke ulih ngasuh orang pedis ati sereta enda gaga ati. Taja pia, kitai agi ulih negapka pengerindu ngagai bala menyadi. Baka ni? Ketegal neladan Jehovah, kitai rinduka bala menyadi. (Eps. 5:1, 2; 1 Jhn. 4:19) Aram meh kitai meda nama ulih dipelajarka kitai ari teladan Jehovah.

11. Baka ni Jesus neladan “pengasih” Jehovah?

¹¹ Jehovah nunjukka “pengasih.” (Luk. 1:78) Orang ti pengasih ibuhka orang ke benung merinsa, lalu iya ngiga chara kena nulung sereta ngelantangka ati orang nya. Jesus neladan pengasih Jehovah lebuh iya ibuhka orang. (Jhn. 5:19) Bisi sekali maya Jesus meda bala orang mayuh, iya “kasihka sida laban sida irau ati sereta nadai daya, baka bedus ti nadai orang ngibun.” (Mat. 9:36) Jesus ukai semina rinduka sida, tang mega ngiga chara kena nulung sida. Iya ngeraika orang ke sakit lalu ngelantangka ati sida ke “lelak ngema utai ti berat.”—Mat. 11:28-30; 14:14.

12. Padahka sekeda chara kitai ulih nunjukka pengasih.

¹² Enti kitai berundingka penanggul ke ditapi bala menyadi Kristian kitai, kitai senang deka nunjukka pengasih ngagai sida. Ambika chunto, seiku menyadi indu engka benung sakit raya. Iya engka enda kala bekunsika penanggul ke ditapi iya, tang iya tentu berasai gaga ati enti nerima sekeda tulung. Kati ulih kini iya nyediaka utai ke diguna sida iya sebilik? Kati ulih kitai nulung manduk utai ke iya tauka meresi rumah iya? Kelimpah ari nya, engka bisi seiku menyadi lelaki ti lenyau kereja. Kitai ulih meri iya duit lalu engka enda ibuh madahka duit nya pemeri ari kitai. Kitai deka terus nulung iya nyentukka iya tetemuka kereja bukai.

13-14. Baka ni kitai ulih neladan Jehovah ti gerah jari?

 ¹³ Jehovah nya Petara ti gerah jari. (Mat. 5:45) Lebuh deka nulung bala menyadi, kitai enda ibuh nganti sida minta tulung ari kitai. Tang baka Jehovah, kitai deka dulu ngiga chara nulung bala menyadi. Ambika chunto, Iya ngasuh mata panas manchar ninting hari taja pan kitai enda minta Iya ngereja nya! Lalu, pengangat mata panas meri penguntung ngagai semua orang, nyengkaum sida ke enda nemu beterima kasih. Jehovah nunjukka Diri rinduka kitai lebuh Iya nyediaka utai ke diguna kitai ba pengidup. Kitai amat rinduka Jehovah laban Iya manah sereta gerah jari!

¹⁴ Bala menyadi Kristian udah neladan Jehovah lalu nunjukka pengerah jari. Ambika chunto, ba taun 2013, Ribut Taufan Haiyan udah ngerusakka mayuh utai ba menua Filipina. Ketegal tu, mayuh bala menyadi lenyau rumah sereta reta tengkira sida. Tang, bala menyadi di serata dunya jampat nulung sida. Mayuh bala menyadi meri duit tulung, sereta nulung ngaga rumah. Nya alai kurang ari setaun, 750 buah rumah udah digaga baru! Lebuh penyakit COVID-19 ngelekai, bala menyadi bebendar nyukung pangan diri. Lebuh kitai jampat meri tulung ngagai bala menyadi, tu nunjukka kitai amat rinduka sida.

15-16. Nitihka Kolosi 3:13, nama patut digaga kitai ngambika ulih neladan Jehovah?

¹⁵ Jehovah rindu ngampun. (Bacha Kolosi 3:13.) Apai kitai ti di serega ngampunka dosa kitai ninting hari. (Mas. 103:10-14) Taja pan murid Jesus enda sempurna, tang Jesus ngampunka penyalah sida. Indah iya sanggup nyerahka nyawa diri ngambika dosa kitai  ulih diampun. (1 Jhn. 2:1, 2) Ketegal Jehovah enggau Jesus rindu ngampun, kitai ulih semak enggau seduai iya.

¹⁶ Lebuh kitai ngampunka bala menyadi Kristian, pengerindu kitai ngagai sida deka majak tegap. (Eps. 4:32) Endang amat, kekadang bisi maya kitai tusah deka ngampunka orang, tang kitai enggau naka ulih ngereja nya. Seiku menyadi indu ke macha artikel Menara Jaga ke betajuk “Hendaklah Kamu Saling Mengampuni” * ngasaika artikel nya udah meransang iya ngambika deka agi ngampun orang bukai. Ku iya: “Artikel tu udah ngajar aku, enti aku ngampunka orang bukai, nya nulung aku nyadi orang ke manah agi. Artikel tu mega nerangka, lebuh ngampunka orang bukai, tu ukai reti iya nuan enda ingatka penyalah sida tauka utai ke nyadi ketegal penyalah sida. Tang lebuh nuan ngampun, nya nunjukka nuan enda agi ringat enggau sida. Lalu enti nuan ngereja nya, nuan deka lantang agi ati.” Lebuh kitai ngampunka bala menyadi, tu nunjukka kitai rinduka sida lalu kitai neladan Jehovah.

17. Nitihka Matthew 5:16, baka ni kitai ulih ngemuliaka Apai kitai ti di serega?

¹⁷ Kitai amat gaga ati laban ulih nyadi sebagi ari ruang bilik Jehovah ke datai ari serata dunya sereta rinduka pangan diri. Kitai deka mai mayuh orang enggau kitai nyembah Petara. Nya alai, kitai enda patut ngereja nama-nama utai ke ngasuh orang ngembuan runding ti enda manah pasal Jehovah tauka nembiak Iya. Ari ulah ti manah, kitai deka meransang orang belajar sereta nyembah Jehovah.—Bacha Matthew 5:16.

18. Nama ulih nulung kitai nginjil enggau berani?

¹⁸ Kekadang, sekeda orang engka ngelese tauka indah merinsaka kitai ketegal ngasika Jehovah. Nama ulih digaga enti kitai berasai takut lebuh madahka orang bukai pasal pengarap kitai? Kitai ulih andal, Jehovah enggau Jesus deka nulung kitai. Jesus ngasuh bala murid iya andal, sida enda ibuh irau pasal utai ke deka disebut. Nama kebuah? Ku Jesus nerangka: ‘Kita deka diberi utai ti deka disebut kita lebuh maya  nya, laban ukai kita ke bejaku, tang roh Apai kita ti bejaku ngena kita.’—Mat. 10:19, 20.

19. Padahka chunto pasal seiku menyadi ke meri saksi enggau berani.

¹⁹ Peratika peneleba Robert. Suba lebuh iya agi baru belajarka Bup Kudus sereta enda entu bisi mayuh penemu Bup Kudus, iya kala dikangau ngagai kot ba Afrika Selatan. Iya patut nerangka ngagai hakim kebuah iya enggai nyadi soldadu. Iya enggau berani nerangka ngagai kot, iya deka mengkang neutral ketegal pengerindu ke bala menyadi Kristian. Ba iya, bala menyadi Kristian amat berega! Tang iya enda nyangka hakim nya deka nanya, “Sapa bala menyadi nuan?” Robert ingatka ayat Bup Kudus, iya nya Matthew 12:50: ‘Barang sapa ngereja utai ti dikedekaka Apai aku ti di serega, nya meh menyadi lelaki, menyadi indu, enggau indai aku.’ Taja pan Robert agi baru belajarka Bup Kudus, tang Jehovah meri roh kudus ngagai iya ngambika ulih nyaut tanya sereta sekeda tanya ti enda dijangka iya. Jehovah tentu temegahka Robert! Jehovah mega tentu temegahka kitai lebuh kitai bepanggai ba Iya maya meri saksi enggau berani taja pan napi penusah enggau pemerinsa.

20. Nama juluk ati kitai? (Jhn. 17:11, 15)

²⁰ Kitai amat gaga ati laban ulih nyadi sebagi ari ruang bilik Kristian ti bepengerindu. Kitai mega bisi Apai ti pemadu badas sereta bala menyadi Kristian ti rinduka kitai. Kitai deka beterima kasih ke pemeri tu. Sitan enggau sida ke nitihka iya nguji deka ngasuh kitai berasai kakang ati pasal pengerindu Apai kitai ti di serega lalu sida mega deka ngachau penyerakup kitai. Taja pia Jesus udah besampika kitai. Iya minta Jehovah nyaga kitai ngambika ruang bilik tu mengkang beserakup. (Bacha John 17:11, 15.) Jehovah nyaut sampi nya. Baka Jesus, kitai enggai kakang ati enggau pengerindu sereta sukung ari Jehovah. Nya alai, aram meh kitai terus mengkang semak enggau bala menyadi Kristian kitai.