1. Ányị angịnyị ehe à tị́ ka wụrụ iJihova myị́?

IJISỌSỊ, ọngọlẹ ká Ohe Oluhye họ ene nya ang ịkịla wuu, bala iru nya alegu-ẹrụ, à ri ụpa nya ugbiyegu nya iJihova lẹ. (Kol. 1:15; Eje. 103:20) Ụka ọlẹ ká iJisọsị jam odehe ọlẹ, ọ da angịnyị ụbwọ wẹ ka jẹ́ nyori ị ka jẹ́-ẹ wụrụ iJihova nya Adaa. Ụka ọlẹ ká iJisọsị wẹẹ ya ẹla je angịjụgbẹyị nyamwụ, ọ wụrụ iJihova nya ‘Adamwụ bala Adaa.’ (Jọn. 20:17) Ịnyịnyị, ụka kahị hu ịlọhị chị ịgọgọ ha iJihova bala o-hu enyi Ohe lẹ aalẹ, ahị ri ụpa nya ugbiyegu nya aanịna alẹng bala anyang ịlẹ kị la ọháha lẹ.​—Mak. 10:29, 30.

2. Ẹlịyẹ ahị tị́ wẹẹ ka kụ ẹhị yẹ a-ang ọjẹ́jẹ ọlẹ?

² Ọ kaa lujwo ha angịhyẹ nyọka yẹ iJihova lala Adịda ọ-la ọháha. Angịkịla á ka jẹ́ jaabwọ kị ka mẹ ọháha jẹ ẹ-ẹga nya aanaa alẹng bala anyang ka myị́. Ẹ-ẹpwụ nya ang ọjẹ́jẹ ọlẹ, ahị ka kụ ẹhi yẹ jaabwọ ká iJisọsị dahị ụbwọ nyọka yẹ iJihova lala Adịda ọ-la ọháha ọlẹ kahị ka jẹ́-ẹ tụ́ ju chwẹẹ. Ịnyịnyị ahị ka yẹ abwọlẹ kahị ka gbịla iJihova u-uhye nya ụgbẹyị ọlẹ kahị ka kpa aanahị alẹng bala anyang.

3. Ányị abwọ ọrịrị ọlẹ ká iJisọsị mẹjẹ à tị́ tụ́ụhị ju iJihova chwẹẹ?

³ IJihova ri Adịda ọ-la ọháha. IJisọsị tịtọ kahị ka yẹ iJihova jaabwọ ọle kọ yọọ​—lala adịda ọ-la ọháha ọlẹ kọ chịkpẹẹ nyọka tụ́ jwoo chwẹẹ, ọ-ọngọ la ọháha ka lẹ ka. Ẹla ọwẹ mẹjẹ gede-gede a-abwọlẹ ká iJisọsị mẹjẹ angịjụgbẹyị nyamwụ nyọka raabwọ. Ọ dọmwụ nya abwọ ọrịrị ọọwa la “Adahị.” (Mat. 6:9) IJisọsị ka byihi myị́ nyori ahị nyị wụrụ iJihova nya “Agụgụ,” ‘Ọngọ Họ Ang,’ lee “Adịrahụ o-gbe oyi myị́ oyi”​—ọlọlọhẹ nya ẹnyị ịwẹ á tị tịpyọ ka, chajị ịBayịbụụ kpa omyi  ẹla ịwẹ chabwọ nya iJihova. (Ọmwụ. 49:25; Ayị. 40:28; 1 Tim. 1:17) Ọkọkọ nya ọọwa, iJisọsị byihi nyị wụrụ iJihova nya “Adahị.”

4. Ányị ahị tị́ họ kahị jẹ́ nyori iJihova tịtọ kahị ka tụ́ jwoo chwẹẹ?

⁴ Ọ kaa lang ujwo nyọka yẹ iJihova lala Adịda ọ-la ọháha? Ọ kaa la angịhyẹ nyahị ịnyị. Ọ ka lahị ujwo nyọka kụ irya nya adịda ọlẹ kọ la ọháha myị́ kori ká adahị ọlẹ kọ mahị á kpahị nwà la ụbwọ ọnyọọngịrị. Ma ahị ka jẹ́-ẹ la ẹjẹ ọkpụ́kpụ, chajị iJihova jẹ́ jaabwọ kọ lahị bala ang odudu kọ lahị ịnyị. Ọ tịtọ nyọka tụ́ juhi chwẹẹ. Ịnyị à du ká Omyi Ẹla nyamwụ juhi ọhụ yẹkẹẹ: “Ó ri kanụ tụ ịlọnụ ju Ohe Oluhye chwẹẹ aalẹ, Ohe Oluhye tịtị ka tụ junu chwẹẹ ịnyịnyị.” (Jem. 4:8) IJihova la ọháha ẹ-ẹga nyahị, ọ tị ya nyori ọwa nya-à ri Adịda ọlẹ kọ hágụ wuu kahị ka jẹ́-ẹ la lẹ.

5. Jaabwọ ká ụpwụ nya iLuku 10:22 mẹjẹ, ányị iJisọsị à tí ka jẹ́-ẹ dahị ụbwọ tụ́ ju iJihova chwẹẹ?

⁵ IJisọsị ka jẹ́-ẹ dahị ụbwọ tụ́ ju iJihova chwẹẹ. IJisọsị jẹ́ iJihova yẹẹyẹẹ bala ọ-kaa ba abwẹla nyamwụ jẹ kpẹẹkpẹẹ. Ịnyị à du kọ yẹkẹẹ: “Ọng myị́ ọng ọlẹ kọ yẹm lẹ aalẹ, ọngọọwa yẹ Ohe Oluhye Adịda lẹ” lẹ. (Jọn. 14:9) Lala ọnyị ọgbahị, iJisọsị mẹjẹ́ẹhị jaabwọ kahị ka ju ihi nya Adahị, abwọlẹ áhị ka cheji ba la ọ-ka họ ẹla wọọ ẹjẹ, bala ọ-họ ẹla ọlẹ kọ ka yehi myị. Ma, ọhịhị nya iJisọsị ụka ọlẹ kọ jam odehe ọlẹ mẹ ọnahị bala ọháha nya iJihova jẹ gụgụụgụ ịnyị. (Wa iLuku 10:22.) Ahị kụ ẹhị yẹ ọ-chụ pwokwita ịhyẹ wẹẹ.

6. Ya ọ-chụ pwokwita ịlẹ kị mẹjẹ jaabwọ ká iJihova kaa ke ụrụ wo la iJisọsị wẹẹ.

⁶ IJihova kaa ke ụrụ la anyị nyamwụ. Kụ ẹhị yẹ jaabwọ ká iJihova ke ụrụ la ọnyị nya ọgbanyẹ nyamwụ wẹẹ. IJihova ke ụrụ wo iru nya abwọ ọrịrị nya Ọnyị nyamwụ ụka kọ jam odehe ọlẹ. (Luk. 5:16) Ọ wẹ abwọ ọrịrị nya iJisọsị u-uhye nya eje ọchịchị ịkpọnchị, lala ụka ọlẹ kọ chụ angịjụgbẹyị nyamwụ iwo kụrụ imiiye. (Luk. 6:12, 13) IJihova ke ụrụ wo abwọ ọrịrị nya iJisọsị ụka ọlẹ kọ juwa ẹ-ẹpwụ nya ajụjụ ịnyịnyị. Ene kịị pịrọọ ha, iJisọsị raabwọ yẹẹyẹẹ ha Adamwụ u-uhye nya ọmayẹ olujwo ọlẹ kọ wẹẹ ka chọọ ọgụ. IJihova-á ke  ụrụ wo abwọ ọrịrị nya iJisọsị kem ka, ọ du olegu-ẹrụ kele kaka ju Ọnyị ọlịkẹjẹ nyamwụ ọngịrị.​—Luk. 22:41-44.

7. Ányị ọ tị́ lang nyọlẹ ká jẹ́ nyori iJihova kaa ke ụrụ wo abwọ ọrịrị nyahị?

⁷ Alẹ ịnyịnyị, iJihova kaa ke ụrụ wo abwọ ọrịrị nya anchẹ nyamwụ, ọ tị kaa wẹ abwọ ọrịrị nyaa ịịwa lụka ọlẹ kọ pwoku bala ụgbẹyị ọlẹ kọ há gụ wuu. (Eje. 116:1, 2) Ọọnahị ọnyang ọhẹ India yẹ jaabwọ ká iJihova wẹ abwọ ọrịrị nyamwụ. Ọ ri ọngọ kaa chuko lụmẹ, ọ tị raabwọ ha iJihova yẹẹyẹẹ u-uhye nya ẹla ọọwa. Ọ da ụpwụ yẹkẹẹ: “JW Broadcasting nya Ọya Ọharụ 2019 ọlẹ kọ ya ẹla u-uhye nya ang ọlẹ áhị ka họ ụka kahị juwa chuko bala o-me imahị ri ang ọlẹ kam baba kpangga. Ọ ri ụgbẹyị ọlẹ ká iJihova bwu wẹm abwọ ọrịrị nyam.”

8. Agbẹyị iyina iJihova à tị́ mẹ ọháha jẹ ẹ-ẹga nya iJisọsị?

⁸ IJihova la ọháha ẹ-ẹga nyahị bala ọ-kaa kpahị juhi, jaabwọ kọ la ọháha ẹ-ẹga nya iJisọsị bala ọ-kpahị jwoo lụka ọlẹ kọ jam odehe ọlẹ. (Jọn. 5:20) Ọ da iJisọsị ụbwọ nyọka la ọmyịmyị ọnyọọngịrị, jwoo ọhụ ụka ọlẹ kọ juwa ẹ-ẹpwụ nya ajụjụ, bala ọ-họ ọ lang ịlẹ kọ baba nyọka hịhị. Ịnyịnyị, iJihova byi Ọnyị nyamwụ nyori ọwa nyị la ọháha ẹ-ẹga nyamwụ bala o-ri ẹla nyamwụ nyị kpụ ọwa ịpyọ. (Mat. 3:16, 17) IJisọsị jẹ́ nyori Adamwụ olepwoohe ka juwa balọọ ụka myị́ ụka bala ọ-dọọ ụbwọ, lẹ ọ́ kaa yẹ ịlọmwu lala ọngọ la ụbwọọmwụ ka.​—Jọn. 8:16.

9. Ányị ahị tị́ họ kahị jẹ́ nyori iJihova la ọháha ẹ-ẹga nyahị?

⁹ Lala iJisọsị, ahị yẹ ọháha nya iJihova u-uhye nyahị a-agbẹyị lụmẹ-lụmẹ lẹ. Kụ irya wẹẹ: IJihova ya iwe da hahị nyọka ri aligu nyamwụ bala o-ya aanahị alẹng bala anyang hahị, ịlẹ kị kaa họ kahị ka chị ọkẹkẹnị bala o-juhi ọhụ ụka kahị la akama. (Jọn. 6:44) IJihova ịnyịnyị ya ang myị́ ang ịlẹ kahị baba nyọka ju ọmyịmyị nyahị ọngịrị hahị. Ịnyịnyị, ọ dahị ụbwọ nyọka la ang ịlẹ kahị baba nyọka kịnyaa la ọhịhị. (Mat. 6:31, 32) Ụka kahị kụ irya u-uhye ọháha nya iJihova, ọháha nyahị ẹ-ẹga nyamwụ ka gụ ọọwa.

10. Ẹlịyẹ ahị tị́ ka jẹ́ bwu ụgbẹyị ọlẹ ká iJihova kaa kpa aanahị alẹng bala anyang?

¹⁰ Aanahị alẹng bala anyang há iJihova yẹẹyẹẹ. Ma, ọ́ kaa chịkpẹẹ ụka myị́ ụka nyọka la ọháha ẹ-ẹga nyaa bala ọ-ka mẹjẹ nyori ị háahị ka. Ọ kaa lahị ujwo ụka ọhẹ chajị nyori ịhọhọ nyahị datị hi awụlẹ lee ị kpahị nwà ẹ-ẹga ịdatị-datị. Nanana nyori ọ lịnyị, ahị ka jẹ́-ẹ maga nyọka ju ọháha nyahị ẹ-ẹga nya aanahị ọngịrị. Ányị ahị tị́ ka bwu họ ịnyị? Bwula ọ-gbịla iJihova ẹ-ẹpwụ nya ọháha ọlala ẹ-ẹga nya aanahị alẹng bala anyang. (Efe. 5:1, 2; 1 Jọn. 4:19) Ahị yẹ ang ọlẹ kahị ka jẹ́ bwu ọgụ-ẹpẹtẹ nya iJihova wẹẹ.

11. Ányị iJisọsị à tị́ gbịla “ahyẹẹrwẹrwa” nya iJihova?

¹¹ IJihova kaa mẹ “ahyẹẹrwẹrwa” jẹ. (Luk. 1:78) Ọ kaa jụ ọngọ la ahyẹẹrwẹrwa ụka kọ yẹ angịnyị kị juwa yẹ akama; ọ kaa mwahị nya agbẹyị ịlẹ kọ ka jẹ́-ẹ bwu dụbwọ bala ọ-ka ju angịlịnyị ọhụ. IJisọsị gbịla ahyẹẹrwẹrwa nya iJihova bwula abwọlẹ kọ kaa kpa angịnyị. (Jọn. 5:19) Ụka ọlẹ ká iJisọsị chẹhị kaka ya iru nya angịnyị i-iwe-ahụrụ ọhẹ, “ọkịlẹtụ nyamwụ myị la ahyẹẹrwẹrwa ẹ-ẹga nyaa. . . . Chajị ịwa wuu chị ẹpẹtẹkẹẹ ẹ-ẹpwụ nya elele ọchịchị lịmahị nyaa. Ị juwa chị ajama lala ịkpịlọ ịlẹ kị byibyi hi ọngọ kpaa kpa.” (Mat. 9:36) IJisọsị họ gụ ọ-ka la ahyẹẹrwẹrwa ẹ-ẹga nyaa kem. Ọ họ alẹdụrụ uda bala ọ-da angịlẹ kị juwa nwụ ịlaa la “olo nya ọkịlẹtụ ọkpakpa bala ayiiji ọbwọbwọ” ụbwọ.​—Mat. 11:28-30; 14:14.

12. Ányị ahị tị́ ka bwu mẹ ahyẹẹrwẹrwa jẹ ẹ-ẹga nya aanahị alẹng bala anyang?

¹² Ene kahị ka jẹ́-ẹ mẹ ahyẹẹrwẹrwa jẹ ẹ-ẹga  nya aanahị, ahị baba nyọka jẹ́ akama ịlẹ kị juwa chịpwụrụ bwu. Ọ-chụ pwokwita, ọọnahị ọnyang ọhẹ ka juwa kọ la ẹdụrụ ọtụka ọhẹ myị́. Ọ́ tị kaa ya bwu ọnụ ẹnẹnẹhẹ ka, ma ọhẹka ọ ka kpọọ ịpyọ kori ká ọngọhẹ á dọọ ụbwọ. Ányị ọ tị́ kaa bwu ha ịbaba nya ugbiyegu nyamwụ haa? Ahị ka jẹ́-ẹ dọọ ụbwọ kpụ́ ang oriri họọ lee ọ-kpa ẹpwa nyamwụ cheri-cheri myị́? Lee ọhẹka ị hu ọọnahị ọlẹng ọhẹ abwọ hi ụkụrwọ. Ahị ka jẹ́-ẹ ya okpoko ọ-myịnyẹng ọhẹ họọ nya ang āhị, ọhẹka la ọ-ka ya joo nyori okpoko ọọwa bwu ẹga nyahị ka myị́. Okpoko ọlịnyị ka jẹ́-ẹ dọọ ụbwọ gbee pwụ ụka ọlẹ kọ ka yé ụkụrwọ ọkịla myị́.

13-14. Ányị ahị tị́ ka bwu ri ọngọ pyẹ ụbwo maa hu ha lala iJihova?

¹³ IJihova kaa pyẹ ụbwọ maa hu ha. (Mat. 5:45) Ahị dayị gbe ụka ọlẹ ká aanahị ka towo nya ụbwọ ọdada bwu ẹga nyahị ene kahị ka mẹ ahyẹẹrwẹrwa jẹ ka. Lala iJihova, ahị ka jẹ́-ẹ họ ang haa ene kị ka tọhị wo. Ọ kaa chị ẹnụ hahị ahyẹẹnụ ọnyị myị́ ọnyị lahị ọ-towo nyamwụ ene ka! Ịnyịnyị, ọng myị́ ọng wuu kaa ye apyobwuna bwu ẹga nya ẹnụ, a-angịlẹ kọ kaa myaa lẹhị kem ka. Bwula ọ-yang ịlẹ kahị baba hahị, iJihova wẹẹ mẹjẹ́ẹhị nyori ahị họ́ọ. IJihova háahị yẹẹyẹẹ, chajị ọ ri ọlọnahị bala ọ-kaa pyẹ ụbwọ maa hu ha!

¹⁴ Aanahị alẹng bala anyang kaa gbịla iJihova bwula ọ-pyẹ ụbwọ maa hu ha angịkịla. Ọ-chụ pwokwita, la 2013, igbachịwụ ọtụka-ọtụka ọhẹ da bịrị ang lụmẹ-lụmẹ ịị Philippines. Ẹpwa bala ang nya aanahị lụmẹ-lụmẹ tayịreji. Ma, aanahị ịkịla bwu ịkịka nya odehe wuu maga nyọka daa ụbwọ ahyaahị. Aanahị lụmẹ-lụmẹ gba okpoko kpehe lee ọ-da ụbwọ nwụla ebe lala 750 ẹ-ẹpwụ nya ẹka ookpokpo! Lụka nya ẹdụrụ nya COVID-19, aanahị họ ụkụrwọ nya ịlẹhị-ịlẹhị nyọka da aanaa ịkịla ụbwọ. Ụka kahị da aanahị ụbwọ ahyaahị, ahị kaa mẹjáa nyori ị háahị.

15-16. Ẹlịyẹ ụpwụ nya iLuku 6:36 à tị́ ya kahị ka họ nyọka gbịla Adahị olepwoohe?

¹⁵ IJihova ri ọngọ yẹ ahyẹẹrwẹrwa bala ọ-kaa hịnyọhi. (Wa iLuku 6:36.) Ẹ-ẹpwụ nya ahyẹẹnụ ọnyị myị́ ọnyị, Adahị olepwoohe kaa hịnyọhi hahị. (Eje. 103:10-14) Angịjụgbẹyị nya iJisọsị-ị́ la kpẹẹkpẹẹ ka, ọ tị lịnyị  odu lẹ, iJisọsị kaa yẹ ahyẹẹrwẹrwa nyaa bala ọ-hịnyọhi haa. Ọ dọmwụ nwụlanọ nyọka hu ọhịhị nyamwụ kiliya chajị ká Ohe ka jẹ́-ẹ hịnyọhi ịhọbịrị nyahị hahị. (1 Jọn. 2:1, 2) Ọ-hịnyọhi bala ahyẹẹrwẹrwa ọlẹ ká iJihova bala iJisọsị mẹjẹ́ẹhị, tụ́ụhị jwaa chwẹẹ.

¹⁶ Ọháha ọlẹ kahị la ẹ-ẹga nya aanahị kaa la ọngịrị gụ ọọwa ụka kahị “hịnyọhi ọhọbịrị nya awụlẹ . . . ha awụlẹ.” (Efe. 4:32) Ẹlịlẹhị ri, ọ-hịnyọhi ha angịkịla kaa lujwo yẹẹyẹẹ ụka ọhẹ, lẹ ahị baba nyọka họ ụkụrwọ jahị da ọọwa. Ọọnahị ọnyang ọhẹ wa ẹlẹhẹ bwu ang ọjẹ́jẹ ọlẹ ká egbeju nyamwu ri, “Forgive One Another Freely,” bwu Ẹpwang ọ-Kụ Gbeji, ọọwa tị dọọ ụbwọ nyọka hịnyọhi ịnyịlẹhị. * Ọ yẹkẹẹ: “Ang ọjẹ́jẹ ọwẹ dam ụbwọ nyọka jẹ́ jaabwọ ká ọ-hịnyọhi ha angịkịla ju apyobwuna ham kaka ba. Ọ ya nyori ọ-hịnyọhi ha angịkịla á mẹjẹ nyori à myị ọnụ ju ang ọtịpyọ ọlẹ kị họ ka lee ẹla ọọwa-á jụng ka lẹ ka. Ma ọ-hịnyọhi ri ọ-ka hwabwọ la ọ-kpa ẹla ọlẹ ká ọngịnyị họng ẹ-ẹpwụ bala ahụ ọ-ka la okpunyi nya ọkịlẹtụ.” Ụka kahị hịnyọhi ha aanahị, ahị mẹjẹ nyori ị háahị bala o-ri ahị wẹẹ gbịla iJihova Adahị.

17. Jaabwọ ká ụpwụ nya ịMatiyu 5:16 ya, ányị ahị tị́ ka chị ihi ju Adahị olepwoohe?

¹⁷ Ọ-myịhị lẹhị yẹẹyẹẹ nyọlẹ kahị la aanịna alẹng bala anyang bwu ịkịka nya odehe wuu ịlẹ kị la ọháha ẹ-ẹga nya awụlẹ. Ahị tịtọ ká angịnyị lụmẹ-lụmẹ ka yẹ julahị gbịgba ha Ohe Oluhye. La ẹla ọwẹ i-irya, áhị tịtọ nyọka họ ịngịngịhyẹ ọlẹ kọ ka du ká angịnyị ka kụ irya ọtịpyọ u-uhye nya iJihova lee angịnyị nyamwụ ka. Ahị kpịlọhị ụ-ụgbẹyị ọlẹ kọ ka gbile angịnyị warị kaka jẹ́ iJihova.​—Wa ịMatiyu 5:16.

18. Ịyẹ à tị́ ka dahị ụbwọ nyọka ya ẹla nya Ohe la o-juhi ka?

¹⁸ Ụka ọhẹ, angịnyị ka ya ẹla ọtịpyọ baahị lee ọ-tụ́ụhị pyịpyị chajị nyọlẹ kahị ju ihi nya Adahị olepwoohe. Ányị ahị tị́ ka họ kori kahị juhi nyọka ya ọmyịmyị nyahị dodehe? Ahị ka jẹ́-ẹ lahị ọdahile nyori iJihova bala ọnyị nyamwụ iJisọsị ka dahị ụbwọ. IJisọsị byi angịjụgbẹyị nyamwụ nyori ị́ baba nyọka chuko u-uhye nya  ẹla ọlẹ kị ka ya lee abwọlẹ kị ka ya ẹla ọọwa ka. Ịyẹ tị́ du? IJisọsị wụlẹ yẹkẹẹ: “Ohe Oluhye ayịdang ka hu egbe nya ala ịlẹ kanụ ka ya junu ọ-ọnụ lụka ọọwa la ịlọmwụ. Chajị aanụ ayịdang a ka juwa ya ẹla ọọwa la ịlọnụ ka. Ma, Olegu Ịgọgọ nya Ohe Oluhye Adanụ a ka juwa kpanụ ya ẹla ọọwa lụka ọọwa lẹlẹ.”​—Mat. 10:19, 20.

19. Ya ọ-chụ pwokwita nya ọngọhẹ ọlẹ kọ ya ẹla nya Ohe la ugbodu ojuju wẹẹ.

¹⁹ Kụ ẹhị yẹ ọ-chụ pwokwita nya Robert wẹẹ. Lụka ọkẹkpẹ, ụka ọlẹ kọ dọmwụ nya ịBayịbụụ ọjẹ́jẹ onyeewe, ọ ka ịKọọtu ka ya je angịleje ang odudu ọlẹ kọ ka ri isoja ka. La ugbodu ojuju, ọ byi ala ịKọọtụ gbagbịla nyori ọwa nyị́ tịtọ nyọka ka ri isoja ka chajị nya ọháha ọlẹ kọ la ha Angịnyị nya ịKịrayịsị aanamwụ. O-ri ụpa nya ugbiyegu nya iJihova myọọ lẹhị! Angịleje tọọ wo yẹkẹẹ, “Oowo anyị à tị́ ri aanang?” Robert á yahị me ịtọ ẹla ọwẹ ka, ma ọ kpịtịya nya Ụpwụ Ịgọgọ nya ahyẹẹnụ ọwẹ. Ụpwụ nya ịMatiyu 12:50 ịnyị: “Ọng myị́ ọng ọlẹ kọ họ irya nya Adam ọlẹ kọ juwa epwoohe lẹ aalẹ, ọngọọwa a ri ọnyịnam, ọlẹng bala ọnyang lee ịnam ịnyịnyị lẹlẹ.” Nanana nyori Robert ri ọngọ jẹ́ ịBayịbụụ onyeewe wẹẹ, olegu ịgọgọ nya iJihova dọọ ụbwọ nyọka wẹ ịtọ ẹla ọwẹ bala ịkịla lụmẹ-lụmẹ ịlẹ kị tọọ la ọ-yahị me ka. Ẹla nya Robert ka kpụ iJihova ịpyọ lụmẹ! IJihova kaa kpahị ụbwọ u-uhye ịnyịnyị ụka kahị kpụnịrọọ nyọka jẹ́-ẹ ri ibeenu nyamwụ ụka olujwo.

20. Ẹlịyẹ ahị tị́ ka chị eje nyọka họ? (Jọn. 17:11, 15)

²⁰ Iwe ọlẹ kahị la nyọka ri ụpa nya ugbiyegu ọ-la ọháha ọwẹ a myịhị lẹhị. IJihova à ri Adịda ọlẹ kọ há gụ wuu kahị ka jẹ́-ẹ la ẹẹ. Ahị tị la aanịna ịlẹ kị la ọháha ẹ-ẹga nyahị ịnyịnyị. Ahị ka ji Ohe obe ụka myị́ ụka chajị nya ọọwa. Olegu Onyobyi bala alakpa nyamwụ kaa maga nyọka họ kahị ka la ịwẹẹ ọdada nyori Adahị olepwoohe-é la ọháha ẹ-ẹga nyahị ka bala ọ-kaa maga nyọka bịrị ọ-yẹjula awụlẹ nyahị. Ma, iJisọsị raabwọ chajị nyahị, bịlẹ Adahị olepwoohe nyọka gbehi chajị kahị ka kịnyaa la ọ-yẹjula awụlẹ. (Wa ịJọn 17:11, 15.) IJihova wẹẹ wẹ abwọ ọrịrị ọwẹ. Lala iJisọsị, áhị la ịwẹẹ ọdada u-uhye nya ọháha bala ụbwọ ọdada nya Adahị olepwoohe ẹnẹnẹhẹ ka. Ahị chị eje nyọka kịnyaa la ọ-tụ́ ju ugbiyegu nya olegu nyahị chwẹẹ.