1. Taabalɩyɛ nɖɩ pɩzɩɣ nɛ ɖɩwɛɛ ɛyaa siɣsiɣ tɩnaa nɛ Yehowa pɛ-hɛkʋ taa?

 YEHOWA sɛyaa hɔʋ taa, ɖɩnaɣ ɖɔɖɔ Yesu weyi ɛkɛ “wondu kɩlɩzɩtʋ tɩŋa taa kajalaɣ pɩɣa” yɔ, nɛ Ɛsɔ tiyiyaa sakɩyɛ. (Kol. 1:15; Keɣa 102:20) Alɩwaatʋ ndʋ Yesu kaawɛ tɛtʋ yɔɔ yɔ, ɛwɩlaa se ɛyaa siɣsiɣ tɩnaa pɩzɩɣ nɛ pakpaɣ Yehowa ɛzɩ pa-Caa yɔ. Yesu heyaɣ ɛ-tɔmkpɛlɩkɩyaa Yehowa yɔɔ tɔm lɛ, ɛyɔɔdaa se ɛkɛ “man-Caa nɛ mɩ-Caa.” (Yoh. 20:17) Nɛ alɩwaatʋ ndʋ ɖɩhaɣ ɖa-tɩ Yehowa nɛ pamɩyɩsɩ-ɖʋ lɩm yɔ, ɖɩpɩsɩɣ koobiya hɔʋ ŋgʋ kɩ-taa sɔɔlɩm wɛɛ yɔ kɩ-taa tʋ.—Mark. 10:29, 30.

2. Ɛbɛ ɖɩkaɣ naʋ tɔm ñʋʋ kʋnɛ kɩ-taa?

² Pɩwɛ ɛyaa nabɛyɛ kaɖɛ se panaɣ Yehowa ɛzɩ Caja kʋsɔɔlʋ yɔ. Lalaa lɛ, pɩtɩla paasɩŋ ɛzɩma palɩzɩ sɔɔlɩm nɛ pawɩlɩ po-koobiya yɔ. Tɔm ñʋʋ kʋnɛ kɩ-taa, ɖɩkaɣ naʋ ɛzɩma Yesu sɩɣnɩ-ɖʋ se ɖɩnaɣ Yehowa ɛzɩ Caja sɔɔlɩm tʋ weyi ɖɩpɩzɩɣ nɛ ɖɩñɔtɩnɩ-ɩ yɔ. Ðɩkaɣ naʋ ɖɔɖɔ wɛtʋ ndʋ Yehowa wɛnɩ ɖo-koobiya yɔɔ yɔ nɛ ɛzɩma ɖɩpɩzɩɣ nɛ ɖɩmaɣzɩnɩ-ɩ yɔ.

3. Ɛzɩma tɩyɛ kɩɖaʋ adɩma yeki se ɖɩñɔtɩnɩ Yehowa kpam?

³ Yehowa kɛ Caja sɔɔlɩm tʋ. Yesu sɔɔlaa se ɖɩnaɣ Yehowa ɛzɩ ɛnaɣʋ-ɩ yɔ, pʋ-tɔbʋʋ se ɛzɩ lʋlɩyʋ kɩbanʋ nɛ sɔɔlɩm tʋ weyi pɩwɛ kɛlɛʋ se pɔñɔtɩnɩ-ɩ yɔ, nɛ ɖɩtaanaɣ-ɩ ɛzɩ ñʋʋdʋ weyi ɛ-tɔm wɛ kaɖɛ yɔ. Adɩma wena Yesu wɩlɩ ɛ-tɔmkpɛlɩkɩyaa yɔ, awɩlɩɣ kpayɩ kpayɩ se tɔm ndʋ tɩkɛ toovenim. Ɛpaɣzɩ kɩɖaʋ adɩma nɛ tɔm pee anɛ: “Ða-Caa.” (Mat. 6:9) Yesu pɩzaɣ se eheyi-ɖʋ se ɖɩyaa Yehowa se “Ðoŋ Tɩŋa Tʋ,” ‘Lɩzɩyʋ,’ yaa “tamtam Wiyaʋ.” Nɛ ye ɛɛyɔɔdɩ mbʋ yɔ, pɩɩmʋnɩ mbʋ, mbʋ pʋyɔɔ yɔ Bibl lakɩnɩ hɩla kɩsɛsɛna ana tʋmɩyɛ alɩwaatʋ ndʋ kɩyɔɔdʋʋ Yehowa tɔm yɔ. (Kiɖe 49:25;  Iza. 40:28; 1 Tim. 1:17) Ɛlɛ Yesu tɩla mbʋ, eheyi-ɖʋ se ɖɩyaa Yehowa se “Caa.”

4. Ɛzɩma ɖɩlaba nɛ ɖɩna se Yehowa sɔɔlaa se ɖɩñɔtɩnɩ-ɩ?

⁴ Pɩwɛ-ŋ kaɖɛ se ŋnaɣ Yehowa ɛzɩ Caja sɔɔlɩm tʋ yɔ? Pɩwɛ ɖa-taa nabɛyɛ kaɖɛ. Ye ɖa-caa weyi ɛlʋlɩ-ɖʋ yɔ ɛtaakɛ caja kɩbanʋ yɔ, pɩpɩzɩɣ nɛ pɩlabɩ-ɖʋ kaɖɛ se ɖitisi se caja nɔɔyʋ wɛɛ nɛ ɛsɔɔlɩ-ɖʋ. Pɩhɛzɩɣ ɖa-laŋɩyɛ siŋŋ se ɖɩna se Yehowa nɩɣ ɛzɩma pɩlakɩ-ɖʋ yɔ pɩ-taa camɩyɛ. Ɛsɔɔlaa se ɛñɔtɩnɩ-ɖʋ. Pʋyɔɔ ɛ-Tɔm seɣtiɣ-ɖʋ se: “Ɩñɔtɩ mɩ-tɩ nɛ Ɛsɔ, nɛ ɛkaɣ-mɩ ñɔtɩnʋʋ.” (Yak 4:8) Yehowa sɔɔlɩ-ɖʋ, nɛ ɛyɔɔdaa se ɛkaɣ-ɖʋ kɛʋ Caja kɩbanʋ weyi ɛ-wayɩ fɛyɩ yɔ.

5. Ɛzɩ Luka 10:22 yɔɔdʋʋ yɔ, ɛzɩma tɩyɛ Yesu pɩzɩɣ ɛsɩnɩ-ɖʋ nɛ ɖɩñɔtɩnɩ Yehowa kpam?

⁵ Yesu pɩzɩɣ nɛ ɛsɩnɩ-ɖʋ nɛ ɖɩñɔtɩnɩ Yehowa kpam. Yesu sɩm Yehowa camɩyɛ nɛ ɛlɩzɩɣ Ɛ-wɛtʋ kɩbandʋ nɛ ɛwɩlɩɣ pilim, pʋyɔɔ ɛyɔɔdaa se: “Weyi ɛna-m yɔ, ɛna ɖɔɖɔ Caa.” (Yoh 14:9) Yesu wɛ ɛzɩ ɖa-ɖalʋ nɔɔyʋ yɔ, nɛ ɛwɩlɩɣ-ɖʋ ɛzɩma ɖiluzi ɖa-tɩ nɛ ɖɩña ɖa-Caa yɔ, ɛzɩma ɖikizi labʋ mbʋ pɩɩkɛdɩɣnɩ-ɩ yɔ, nɛ mbʋ ɖɩla nɛ ɖɔ-tɔm kɛdɩnɩ-ɩ yɔ. Ɛlɛ kɔzɩ kɔzɩ lɛ, wezuu ŋgʋ Yesu caɣ tɛtʋ yɔɔ yɔ, kɩsɩnɩ-ɖʋ nɛ ɖɩna se Yehowa wɛ ɖeu nɛ ɛkɛ sɔɔlɩm tʋ. (Kalɩ Luka 10:22.) Iyele nɛ ɖɩna kɩɖaŋ nɩɩyɩ.

6. Ha kɩɖaŋ weyi ɩwɩlɩɣ se Yehowa welisi Yesu adɩma yɔ.

⁶ Yehowa welisiɣni e-piya. Iyele nɛ ɖɩna ɛzɩma Yehowa welisini ɛ-Pɩyalʋ kajalaɣ ñɩnʋ yɔ. Pɩtʋʋ fɛyɩ se Yehowa welisi adɩma sakɩyɛ wena ɛ-Pɩyalʋ laba alɩwaatʋ ndʋ ɛɛwɛ tɛtʋ yɔɔ yɔ. (Luka 5:16) Ewelisi adɩma wena Yesu laba alɩwaatʋ ndʋ ɛcaɣaɣ kpaɣʋ lɩmaɣza wena a-tɔm cɛyaa yɔ; a-taa naɖɩyɛ lɛ alɩwaatʋ ndʋ ɛlɩzɩ ɛ-apostoloowaa 12 yɔ. (Luka 6:12, 13) Yehowa welisi ɖɔɖɔ Yesu adɩma alɩwaatʋ ndʋ ɛlɛ kaawɛ nɩɣzɛ taa yɔ. Alɩwaatʋ pazɩ pʋcɔ nɛ Yudaasɩ lɩɣ Yesu wayɩ lɛ, Yesu tɩmnɩ ɛ-Caa siŋŋ nɛ eheyi-i takɩm sɔsɔm mbʋ piileɖiɣ lɛ ɛkaɣ katʋʋ yɔ pɩ-tɔm. Pɩtasɩna se Yehowa welisi Yesu adɩma lɛ, etiyi ɖɔɖɔ e-tiyiyu nɔɔyʋ se ɛlɛ ɛkpazɩ Ɛ-Pɩyalʋ kʋsɔɔlʋ ɛnʋ ɖoŋ.—Luka 22:41-44.

7. Ŋtɩlʋʋ se Yehowa welisiɣ ɛ-sɛyaa adɩma yɔ, ɛzɩma pɩlakɩ-ŋ?

 ⁷ Sɔnɔ, Yehowa woki pɩ-yɔɔ nɛ ewelisiɣ ɛ-sɛyaa adɩma, nɛ ecosuu a-yɔɔ alɩwaatʋ kɩbandʋ yɔɔ, nɛ ɛtɩŋɩɣnɩ nʋmɔʋ ŋgʋ kɩkpaɖɩ ɖeu yɔɔ kɩ-yɔɔ nɛ ecosuu a-yɔɔ. (Keɣa 114:1, 2) Koobu halɩñɩnʋ nɔɔyʋ wɛ Ɛndɩ ɛjaɖɛ taa, nɛ ɛna ɛzɩma Yehowa cosi ɛ-adɩma yɔɔ yɔ. Ɛɛwɛɛ nɛ ɛlʋkɩnɩ nɩɣzɛ siŋŋ, nɛ ɛtɩmnɩ Yehowa siŋŋ tɔm ndʋ tɩ-yɔɔ. Ɛmawa se: “Mai 2019 JW Tɔm Ðɩyɔɔdɩyɛ^® yɔɔ ɖʋtʋ yɔɔdɩ ɛzɩma ɖɩpɩzɩɣ nɛ ɖɩlʋbɩnɩ sɔɔndʋ nɛ nɩɣzɛ yɔ pɩ-tɔm nɛ pɩɩkɛ mbʋ pɩɩpɔzaɣ-m ɖeyi ɖeyi yɔ. Pɩɩwɩlɩ-m se ma-adɩma yɔɔ pocosaa.”

8. Nʋmɔŋ weyi yɔɔ Yehowa tɩŋnaa nɛ ɛwɩlɩ Yesu se ɛsɔɔlɩ-ɩ?

⁸ Yehowa sɔɔlɩ-ɖʋ nɛ ɛcɔŋnɩ ɖɔ-yɔɔ ɛzɩ ɛɛsɔɔlʋʋ Yesu nɛ ɛcɔnɩ ɛ-yɔɔ alɩwaatʋ ndʋ payɩ ɛlɛ kaacaɣ wezuu tɛtʋ yɔɔ yɔ. (Yoh. 5:20) Ɛcɔnɩ Yesu fezuu taa kɩcɛyɩm tɩŋa ɖeɖe, ɛkpazɩ-ɩ ɖoŋ alɩwaatʋ ndʋ ɛɛwɛ laŋwɛɛkɩyɛ taa yɔ, nɛ ɛcɔnɩ e-tomnaɣ yɔɔ kɩcɛyɩm ɖeɖe. Nɛ Yehowa heyi ɛ-Pɩyalʋ se ɛsɔɔlɩ-ɩ nɛ ɛ-tɔm kɛdɩnɩ-ɩ. (Mat. 3:16, 17) Yesu kaanawa se ɛpɩzɩɣ nɛ ɛtaa liu ɛ-Caa kʋsɔɔlʋ weyi ɛwɛ ɛsɔdaa yɔ paa ɛzɩmtaa; pʋyɔɔ lɛ, wiɖiyi pɩtɩlabɩ-ɩ ɛzɩ ɛwɛ e-ɖeke yɔ.—Yoh. 8:16.

9. Ɛbɛ wɩlɩɣ-ɖʋ kpayɩ kpayɩ se Yehowa sɔɔlɩ-ɖʋ?

⁹ Ɛzɩ Yesu yɔ, ɖa-tɩŋa ɖɩna ɛzɩma Yehowa wɩlaa se ɛsɔɔlɩ-ɖʋ yɔ hɔɔlɩŋ sakɩyɛ taa. Maɣzɩ pazɩ nɛ ŋna: Yehowa hɔm-ɖʋ nɛ ɛkɔnɩ ɛ-cɔlɔ nɛ ɛha-ɖʋ fezuu taa hɔʋ ŋgʋ kɩ-taa sɔɔlɩm nɛ nɔɔ kʋɖʋmaɣ wɛɛ yɔ se pɩsa nɛ ɖihiɣ taa leleŋ. Ɛkpazɩɣ-ɖʋ ɖoŋ alɩwaatʋ ndʋ ɖɩwɛɣ laŋwɛɛkɩyɛ taa yɔ. (Yoh. 6:44) Yehowa haɣ-ɖʋ ɖɔɖɔ mbʋ payɩ pɩpɔzʋʋ-ɖʋ se pɩsa nɛ ɖe-tisuu wɛɛ ɖoŋ tam yɔ. Nɛ halɩ paa evemiye nɖɩ, ɛsɩɣnɩ-ɖʋ se ɖɩwɛɛnɩ mbʋ payɩ pɩpɔzʋʋ-ɖʋ tomnaɣ yɔɔ yɔ. (Mat. 6:31, 32) Alɩwaatʋ ndʋ ɖɩmaɣzɩɣ ɛzɩma Yehowa sɔɔlɩ-ɖʋ yɔ pɩ-yɔɔ yɔ, sɔɔlɩm mbʋ ɖɩwɛnɩ ɛ-yɔɔ yɔ pɩpaɣlɩɣ.

10. Wɛtʋ ndʋ Yehowa wɛnɩ ɖo-koobiya yɔɔ yɔ, ɛbɛ tɩpɩzɩɣ nɛ tɩkpɛlɩkɩ-ɖʋ?

¹⁰ Yehowa sɔɔlɩ ɖo-koobiya Krɩstʋ ñɩma. Ɛlɛ pɩtɩkɛ paa ɛzɩmtaa pɩwɛ-ɖʋ kɛlɛʋ se ɖɩsɔɔlɩ-wɛ nɛ ɖɩwɩlɩ-wɛ se ɖɩsɔɔlɩ-wɛ. Nabʋyʋ taa pɩwɛ-ɖʋ kaɖɛ mbʋ pʋyɔɔ yɔ ɖɩlɩnɩ sɔnzɩ ndɩ ndɩ taa, nɛ wɛtʋ ndʋ tɩ-taa ɖɩcaɣ nɛ ɖɩpaɣlɩ yɔ tɩwɛ ɖɔɖɔ ndɩ ndɩ. Nɛ ɖa-tɩŋa picoɖuu-ɖʋ, nɛ pɩpɩzɩɣ nɛ pɩcɛyɩ lalaa nɛ paawɛɣ taa leleŋ taa. Paa mbʋ yɔ, ɖa-tɩŋa ɖɩpɩzɩɣ nɛ ɖɩñaɣ pana nɛ ɖɩkpazɩ ɖoŋ sɔɔlɩm mbʋ pɩwɛ ɖe-fezuu taa hɔʋ taa yɔ. Ɛzɩma ɖɩpɩzɩɣ nɛ ɖɩla mbʋ? Ðɩpɩzɩɣ nɛ ɖɩla mbʋ ye ɖɩmaɣzɩɣnɩ ɖa-Caa nɛ ɖɩlɩzɩɣ sɔɔlɩm nɛ ɖɩwɩlɩɣ ɖo-koobiya yɔ. (Efɛz. 5:1, 2; 1 Yoh. 4:19) Iyele nɛ ɖɩna mbʋ ɖɩpɩzɩɣ nɛ ɖɩkpɛlɩkɩ Yehowa kɩɖaʋ taa yɔ.

11. Ɛzɩma Yesu maɣzɩnɩ Yehowa ‘pʋtɔdɩyɛ naʋ’?

¹¹ Yehowa “naɣ pʋtɔdɩyɛ siŋŋ.” (Luka 1:78) Ɛyʋ weyi ɛkɛ pʋtɔdɩyɛ nayʋ yɔ, alɩwaatʋ ndʋ ɛnaɣ ɛyaa pɛwɛɛ nɛ pɔtɔkɩ kʋñɔŋ yɔ, pɩcɛyɩɣ-ɩ. Ɛñɩnɩɣ nʋmɔŋ weyi ɩ-yɔɔ ɛtɩŋna nɛ ɛsɩnɩ-wɛ nɛ ɛhɛzɩ pa-laŋɩyɛ yɔ. Yesu tɩŋnɩ wɛtʋ ndʋ ɛlɩzaa nɛ ɛwɩlɩ ɛyaa yɔ tɩ-yɔɔ nɛ ɛwɩlɩ se ɛmaɣzɩɣnɩ Yehowa pʋtɔdɩyɛ naʋ. (Yoh. 5:19) Kɩyakʋ nakʋyʋ, Yesu na samaɣ nakɛyɛ lɛ, “kalabɩ-ɩ pʋtɔdɩyɛ, mbʋ pʋyɔɔ yɔ pawɩlaɣ-kɛ ñaŋ nɛ koyotuu ɛzɩ heŋ weyi ɩfɛyɩnɩ ninɖiɣyu yɔ.” (Mat. 9:36) Pɩtasɩna se samaɣ ŋga kɔ-tɔm labɩ Yesu pʋtɔdɩyɛ lɛ, ɛlabɩ nabʋyʋ nɛ ɛsɩnɩ-kɛ. Ɛwa kʋdɔndɩnaa nɛ ɛhɛzɩ mba ‘palakɩ kʋñɔŋ nɛ sʋʋtʋ nɩ-wɛ yɔ’ pa-laŋa.—Mat. 11:28-30; 14:14.

12. Ɛzɩma ɖɩpɩzɩɣ nɛ ɖɩwɩlɩ ɖo-koobiya se ɖɩnaɣ pa-pʋtɔdɩyɛ?

 ¹² Pʋcɔ nɛ ɖɩpɩzɩ ɖɩwɩlɩ ɖo-koobiya se ɖɩnaɣ pa-pʋtɔdɩyɛ lɛ, pɩpɔzʋʋ se ɖɩmaɣzɩ nɛ ɖɩna se kala wena pɛwɛɛ nɛ pakatɩɣ. Ðɩkpaɣ se koobu halɩñɩnʋ nɔɔyʋ wɛnɩ kʋdɔŋ sɔsɔʋ nakʋyʋ. Ɛɛyɔɔdʋʋ kʋñɔŋ ŋgʋ kɩ-taa ɛwɛɛ yɔ kɩ-tɔm kpa; ɛlɛ ɛ-taa pɩzɩɣ nɛ pɩla leleŋ siŋŋ ye nɔɔyʋ ɛsɩnɩ-ɩ yɔ. Ɛzɩma ɛlakɩ nɛ ɛcɔŋnɩ ɛ-hɔʋ tomnaɣ yɔɔ kɩcɛyɩm ɖeɖe? Ɛzɩ pɩkɛdɩɣnɩ-ɩ se pasɩnɩ-ɩ nɛ palabɩ-ɩ tɔɔnaɣ yaa pɔñɔɔzɩ-ɩ ɖɩɣa taa nɛ pɩwɛɛ cɩɖɩ cɩɖɩ? Yaa ɖɩkpaɣ se koobu abalɩñɩnʋ nɔɔyʋ lesi ɛ-tʋmɩyɛ. Ðɩpɩzɩɣ nɛ ɖɩha-ɩ liidiye naɖɩyɛ pazɩ, ɛlɛ ɖiiyeki nɛ ɛna se ɖahanɩ-ɩ ɖɩ, se pɩsɩnɩ-ɩ nɛ ɛcɔnɩ ɛ-kɩcɛyɩm ɖeɖe pɩkɔɔ pɩtalɩ alɩwaatʋ ndʋ ehiɣ tʋmɩyɛ lɛɛɖɛ yɔ.

13-14. Ɛzɩma ɖɩpɩzɩɣ nɛ ɖɩkɛ kʋjɔʋ tɩnaa ɛzɩ Yehowa yɔ?

¹³ Yehowa kɛ kʋjɔʋ tʋ. (Mat. 5:45) Pɩfɛyɩ se ɖɩɖaŋ nɛ ɖo-koobiya pɔzɩ-ɖʋ se ɖɩsɩnɩ-wɛ pʋcɔ nɛ ɖɩwɩlɩ-wɛ se ɖɩnaɣ pa-pʋtɔdɩyɛ. Ɛzɩ Yehowa yɔ, ɖa-maɣmaɣ ɖɩpɩzɩɣ nɛ ɖɩkpaɣ lɩmaɣzɩyɛ se ɖɩsɩɣnɩ-wɛ. Yehowa haɣ-ɖʋ wɩsɩ paa evemiye nɖɩ, ɛlɛ ɖɩɩpɔzʋʋ-ɩ nɛ pʋcɔ. Nɛ pɩtɩkɛ mba pɛwɛnɩ ɛsɩmɩyɛ yɔ pe-ɖeke wɩsɩ wazɩɣ ɛlɛ sɩwazɩɣ paa anɩ. Yehowa haɣ-ɖʋ mbʋ payɩ pɩpɔzʋʋ-ɖʋ yɔ nɛ ɛwɩlɩɣnɩ-ɖʋ se ɛsɔɔlɩ-ɖʋ. Ðɩsɔɔlɩ Yehowa pɩdɩɩfɛyɩ mbʋ pʋyɔɔ yɔ ɛwɛ ɖeu nɛ ɛkɛ kʋjɔʋ tʋ.

¹⁴ Ðo-koobiya maɣzɩɣnɩ Yehowa nɛ palakɩ lalaa kʋjɔŋ. Kɩɖaŋ nɩɩyɩ yɔ. Pɩnaɣ 2013 taa, helim sɔsɔm mbʋ payaɣ se Haiyan yɔ: pɩwɛɛkɩ wondu sakɩyɛ Filipiini ɛjaɖɛ taa. Koobiya sakɩyɛ lesi pa-ɖɩsɩ nɛ pa-ñɩm. Ɛlɛ po-koobiya hɔʋ ŋgʋ kɩwɛ ɛjaɖɛ kpeekpe yɔɔ yɔ kɩsɩnɩ-wɛ lɛɛ lɛɛ. Sakɩyɛ ha liidiye yaa paɖʋ nesi kuduyuŋ maʋ tʋmɩyɛ. Piyeba nɛ pʋcɔ nɛ pɩnaɣ tɛ lɛ, ɖɩsɩ nzɩ pɔñɔɔzaa nɛ nzɩ paɖaɣnɩ maʋ yɔ sɩñɔtɩnɩ 750. COVID-19 kʋdɔŋ alɩwaatʋ taa, Yehowa Aseɣɖe Tɩnaa labɩ tʋmɩyɛ nɛ kpekpeka nɛ pasɩnɩ po-koobiya. Alɩwaatʋ ndʋ ɖɩlakɩ lɛɛ lɛɛ nɛ ɖɩsɩɣnɩ ɖe-fezuu taa hɔʋ taa ñɩma yɔ, ɖɩwɩlɩɣ-wɛ se ɖɩsɔɔlɩ-wɛ.

15-16. Ɛzɩ Luka 6:36 yɔɔdʋʋ yɔ, ɛbɛ pɩwɛɛ se ɖɩla nɛ ɖɩmaɣzɩnɩ ɖa-Caa weyi ɛwɛ ɛsɔdaa yɔ?

¹⁵ Yehowa kɛ pʋtɔdɩyɛ nayʋ nɛ ekpeɣu. (Kalɩ Luka 6:36.) Ða-Caa weyi ɛwɛ ɛsɔdaa  yɔ, ɛnaɣ ɖa-taa paa weyi lɛ ɛ-pʋtɔdɩyɛ paa evemiye nɖɩ. (Keɣa 102:10-14) Yesu wayɩ tɩŋɩyaa taatalɩ pilim; paa mbʋ yɔ, ɛna pa-pʋtɔdɩyɛ nɛ ekpeɣ-wɛ. Halɩ etisi faaa nɛ ɛlaa e-wezuu se pɩsa nɛ pekpeɣ-ɖʋ ɖa-kɩwɛɛkɩm. (1 Yoh. 2:1, 2) Ɛzɩma Yehowa nɛ Yesu panaɣ ɖa-pʋtɔdɩyɛ nɛ pekpeɣu-ɖʋ yɔ, piiseɣti-ŋ se ŋñɔtɩnɩ-wɛ kpam nɛ pɩkɩlɩ?

¹⁶ Alɩwaatʋ ndʋ ‘ɖikpeɣu faaa’ yɔ, ɖɩkpazɩɣ ɖoŋ sɔɔlɩm mbʋ pɩwɛ ɖe-fezuu taa hɔʋ taa yɔ. (Efɛz. 4:32) Toovenim taa lɛ, nabʋyʋ taa pɩpɩzɩɣ nɛ pɩwɛɛ kaɖɛ siŋŋ se ɖikpeɣ lalaa; pʋyɔɔ lɛ, pɩwɛɛ se ɖɩñaɣ pana hɔɔlʋʋ ŋgʋ kɩ-taa. Koobu halɩñɩnʋ nɔɔyʋ ɖiɣzinaa se Feŋuu Tilimiye taa tɔm ñʋʋ “Pardonnons-nous volontiers les uns aux autres” kaasɩnɩ-ɩ nɛ ɛla mbʋ ɖeyi ɖeyi. * Ɛmawa se: “Tɔm ñʋʋ ŋgʋ kɩ-kpɛlɩkʋʋ sɩnɩ-m nɛ manɩɩ pɩ-taa se ye menkpeɣ lalaa yɔ pɩwazɩɣ-m. Kɩlɩzɩ pɩ-taa se alɩwaatʋ ndʋ ŋtisiɣ faaa nɛ ŋkpeɣ lalaa yɔ pɩtɩwɩlɩ se ŋmaɣzɩɣ se mbʋ palaba nɛ pɩfɛyɩ ɖeu yɔ pɩtʋʋzaa yaa mbʋ palaba yɔ pɩtɩwɩzɩ-ŋ. Ɛlɛ alɩwaatʋ ndʋ ŋkpeɣu-wɛ yɔ, pɩwɩlɩɣ se ŋtɩcaɣnɩ-wɛ mbʋ palaba nɛ pɩfɛyɩ ɖeu yɔ pɩ-yɔɔ, nɛ piyeki se ŋtaalesi ña-maɣmaɣ ña-laŋhɛzɩyɛ.” Alɩwaatʋ ndʋ ɖikpeɣu ɖo-koobiya faaa yɔ, ɖɩwɩlɩɣ se ɖɩsɔɔlɩ-wɛ nɛ ɖɩmaɣzɩɣnɩ ɖa-Caa, Yehowa.

17. Ɛzɩ Maatiyee 5:16 yɔɔdʋʋ yɔ, ɛzɩma ɖɩpɩzɩɣ nɛ ɖɩɖʋ hɩɖɛ ɖa-Caa weyi ɛwɛ ɛsɔdaa yɔ?

¹⁷ Pɩkɛnɩ-ɖʋ waɖɛ sɔsɔɖɛ se ɖɩwɛ ɛjaɖɛ kpeekpe yɔɔ koobiya hɔʋ ŋgʋ kɩ-taa ñɩma sɔɔlɩ ɖama yɔ kɩ-taa. Ðɩsɔɔlaa se ɛyaa sakɩyɛ ɩkpɛndɩ ɖɔ-yɔɔ nɛ ɖɩsɛɛ ɖɛ-Ɛsɔ. Pʋyɔɔ lɛ, pɩwɛɛ se ɖɩkpa ɖa-tɩ nɛ wiɖiyi ɖɩtaala nabʋyʋ, mbʋ pɩpɩzɩɣ piyele nɛ ɛyaa wɛɛnɩ lɩmaɣza kɩdɛkɛdaa Yehowa yaa ɛ-samaɣ yɔɔ yɔ. Paa ɛzɩmtaa lɛ, ɖɩñakɩ pana se ɖɩcaɣ wezuu kɩbaŋʋ nɛ pɩsa nɛ ɛyaa sɔɔlɩ se pɛkpɛlɩkɩ Yehowa yɔɔ tɔm nɛ pɛsɛɛ-ɩ.—Kalɩ Maatiyee 5:16.

18. Ɛbɛ pɩzɩɣ pɩsɩnɩ-ɖʋ nɛ ɖisusi tɔm nɛ abalɩtʋ?

¹⁸ Nabʋyʋ taa, nabɛyɛ pɩzɩɣ nɛ pɔhɔŋnɩ-ɖʋ tɔm yaa halɩ panazɩɣ-ɖʋ mbʋ pʋyɔɔ yɔ  ɖɩñaŋ ɖa-Caa weyi ɛwɛ ɛsɔdaa yɔ. Ye sɔɔndʋ ɛkpaɣ-ɖʋ alɩwaatʋ ndʋ ɖiheyiɣ lalaa mbʋ pɩ-yɔɔ ɖitisiɣ yɔ pɩ-tɔm yɔ, ɛbɛ ɖɩpɩzɩɣ nɛ ɖɩla? Ðɩpɩzɩɣ nɛ ɖɩtaa liu se Yehowa nɛ ɛ-Pɩyalʋ pasɩɣnɩ-ɖʋ. Yesu heyi ɛ-tɔmkpɛlɩkɩyaa se pɩtɩcɛyɩ se panɩɣzɩɣ ɛzɩma yaa ndʋ pakaɣ yɔɔdʋʋ yɔ tɩ-yɔɔ. Ɛbɛ yɔɔ? Yesu lɩzɩ pɩ-taa se: “Pakaɣ-mɩ heyuu ndʋ ɩkaɣ yɔɔdʋʋ yɔ ñɩɣyʋʋ ŋgʋ kɩ-yɔɔ; mbʋ pʋyɔɔ yɔ pɩtɩkɛ mi-ɖeke ɩkaɣnɩ yɔɔdʋʋ, ɛlɛ mɩ-Caa fezuu kaɣnɩ tɩŋnʋʋ mɩ-yɔɔ nɛ kɩyɔɔdɩ.”—Mat. 10:19, 20.

19. Ha kɩɖaʋ nakʋyʋ, ŋgʋ kɩwɩlɩɣ se nɔɔyʋ susi tɔm nɛ abalɩtʋ yɔ.

¹⁹ Iyele nɛ ɖɩmaɣzɩ Robert kɩɖaʋ yɔɔ. Pɩlakɩ alɩwaatʋ natʋyʋ yɔ, alɩwaatʋ ndʋ ɛɛkɛ Bibl kpɛlɩkɩyʋ kɩfalʋ nɛ ɛtaawɛɛnɩ Bibl taa sɩmtʋ sakɩyɛ yɔ, powoni-i sɔɔjanaa tɔm ɖɩhʋyɛ naɖɩyɛ ɛsɩndaa Afrika Hadɛ Kiŋ ɛjaɖɛ taa. Ɛlabɩ abalɩtʋ nɛ ɛlɩzɩ tɔm hʋyaa pɩ-taa se ɛtɩsɔɔlɩ se ɛtɩnɩ hɔɔlʋʋ nakʋyʋ yɔɔ mbʋ pʋyɔɔ yɔ ɛsɔɔlɩ e-koobiya Krɩstʋ mba. Ɛ-taa wɛ leleŋ kpem nɛ lone nɖɩ ɛwɛnɩ e-fezuu taa hɔʋ taa yɔ. Tɔm hʋyʋ caŋ ɛpɔzɩ-ɩ se: “Mba kɛ ño-koobiya?” Robert taaɖʋna se pakaɣ-ɩ tɔm ndʋ pɔzʋʋ, ɛlɛ kpaagbaa mbʋ lɛ, ɛtɔzɩ evemiye nɖɩ, ɖɩ-tɛ evemiye mayaɣ yɔɔ. Pɩɩkɛ Maatiyee 12:50. Pɔyɔɔdɩ peeɖe se: “Weyi ɛlakɩ man-Caa weyi ɛwɛ ɛsɔdaa yɔ ɛ-sɔɔlɩm yɔ, ɛnʋ kɛnɩ me-neu, man-ɖalʋ, mɔn-kɔɔ nɛ mon-ɖoo.” Paa Robert kaakɛ Bibl kpɛlɩkɩyʋ kɩfalʋ yɔ, Yehowa fezuu sɩnɩ-ɩ nɛ ecosi tɔm ndʋ tɩ-yɔɔ nɛ tɔm lɛɛtʋ sakɩyɛ ndʋ ɛtaaɖʋna yɔ tɩ-yɔɔ. Pɩtʋʋ fɛyɩ se Yehowa taa kaalabɩ leleŋ nɛ Robert! Nɛ Yehowa taa lakɩ-ɖʋ nɛ leleŋ ɖɔɖɔ alɩwaatʋ ndʋ ɖɩtaɣ-ɩ liu se ɛha-ɖʋ abalɩtʋ nɛ ɖɩlɩzɩ aseɣɖe kaɖɛ wɛtʋ taa yɔ.

20. Ɛbɛ pɩwɛɛ se ɖɩtɛ ɖa-taa se ɖɩlakɩ? (Yohanɛɛsɩ 17:11, 15)

²⁰ Ðɩwɛnɩ ɛsɩmɩyɛ kpem se ɖɩwɛ fezuu taa hɔʋ ŋgʋ kɩ-taa sɔɔlɩm wɛɛ yɔ kɩ-taa. Ðɩwɛnɩ Caja kɩbanʋ weyi ɛ-wayɩ fɛyɩ yɔ nɛ koobiya sakɩyɛ mba pɔsɔɔlɩ-ɖʋ yɔ. Pɩwɛɛ se paa ɛzɩmtaa lɛ, ɖɩwɛɛnɩ ɛsɩmɩyɛ pɩ-yɔɔ. Sataŋ nɛ ɛ-wayɩ tɩŋɩyaa pañakɩ pana se peyele nɛ ɖɩmaɣzɩ se ɖa-Caa weyi ɛwɛ ɛsɔdaa yɔ ɛtɩsɔɔlɩ-ɖʋ, nɛ pañakɩ pana ɖɔɖɔ se pɛwɛɛkɩ nɔɔ kʋɖʋmaɣ ŋga kɛwɛ ɖɛ-hɛkʋ taa yɔ. Ɛlɛ Yesu tɩmɩ ɖɔ-yɔɔ; ɛpɔzɩ ɖa-Caa se ɛcɔnɩ ɖɔ-yɔɔ nɛ pɩsa nɛ ɖɔ-hɔʋ wɛɛ nɔɔ kʋɖʋmaɣ taa tam. (Kalɩ Yohanɛɛsɩ 17:11, 15.) Yehowa wɛɛ nɛ ecosuu adɩma ana a-yɔɔ. Ɛzɩ Yesu yɔ, tɛtɛ nɛ ɖɩtaapɩtɩ kaaʋ se ɖa-Caa weyi ɛwɛ ɛsɔdaa yɔ ɛsɔɔlɩ-ɖʋ nɛ ɛsɩɣnɩ-ɖʋ. Iyele nɛ ɖɩtɛ ɖa-taa se ɖiwoki pɩ-yɔɔ nɛ ɖɩñɔtʋʋnɩ ɖe-fezuu taa hɔʋ kpam.