1. Kuzê ki Jeová pode ser pa nos?

FAMÍLIA di Jeová ta inklui Jizus, ki é ‘kel primeru di tudu kriason’ i un monti anju. (Col. 1:15; Sal. 103:20) Tanbê, kantu Jizus staba na Téra, el inxina pesoas pa odja Jeová sima ses Pai. Un bês kantu Jizus staba ta pâpia ku se disiplus el txoma Jeová di ‘nha Pai i nhos Pai’. (João 20:17) Óras ki nu da nos vida pa Jeová i nu batiza, nu ta bira ta faze párti di un família di irmons ku irmans ki ta ama-nu. — Mar. 10:29, 30.

2. Kuzê ki nu sta ben odja na kel studu li?

² Alguns ta atxa difísil odja Jeová sima un Pai ki ta ama-s txeu. Talvês otus ka sabe modi ki es pode mostra amor pa ses irmons ku irmans. Na kel studu li, nu sta ben odja modi ki Jizus pode djuda-nu odja Jeová sima un Pai ki ta ama-nu i un algen ki pode ser nos amigu. Tanbê, nu sta ben prende modi ki nu pode imita Jeová na manera ki nu ta trata nos irmons ku irmans.

3. Modi ki kel orason ki Jizus inxina se disiplus ta pô-nu ta ama Jeová?

³ Jeová é un Pai ki ten txeu amor. Jizus krê pa nu odja Jeová di mésmu manera ki el. El krê pa nu odja Jeová sima un algen ki ta ama-nu txeu i ki nu pode pâpia ku el kalker óra. El ka krê pa nu pensa ma Jeová é un algen ki ka ten bondadi i ki gosta sô di manda. Kel-li fika klaru na un orason ki Jizus inxina se disiplus. El kumesa kel orason ku kes palavra li: ‘Nos Pai’. (Mat. 6:9) Jizus podia inxinaba nos pa nu txoma Jeová di ‘Tudu-Poderozu’, ‘Kriador’ ô di ‘Rei di tudu ténpu’. Tudu kes titlu li sta dretu i es ta parse na Bíblia. (Gén. 49:25; Isa. 40:28; 1 Tim. 1:17) Má, Jizus inxina-nu pa nu txoma Jeová di ‘Pai’, ki é  un palavra ki ta pô-nu xinti más amor pa el.

4. Modi ki nu sabe ma Jeová krê pa nu bira se amigu?

⁴ Bu ta atxa difísil di odja Jeová sima un Pai ki ta ama-u? Alguns algen ta atxa. Kel-li talvês ta kontise pamodi ses pai ka mostra-s amor kantu es éra pikinoti. Má nu pode xinti konsoladu pamodi Jeová sabe dretu modi ki nu ta xinti. El krê ser nos amigu. É pur isu ki se Palavra ta konvida-nu: ‘Nhos ser amigu di Deus i el ta ser nhos amigu’. (Tia. 4:8) Jeová ta ama-nu i el krê ser kel midjór Pai ki un algen pode ten.

5. Sima sta na Lucas 10:22, modi ki Jizus djuda-nu xinti ma Jeová ta ama-nu?

⁵ Jizus pode djuda-nu ama Jeová. Ningen ka konxe Jeová midjór di ki Jizus. El imita kes kualidadi di se Pai di manera perfetu, pur isu el fla: ‘Kenha ki odja-m, dja odja Pai tanbê’. (João 14:9) Jizus é sima un irmon más grandi ki ta inxina-nu modi ki nu ta ruspeta i obi ku nos Pai i modi ki nu pode dexa-l kontenti. I más inportanti inda, Jizus ta djuda-nu ntende kes kualidadi di Jeová, sima kel grandi amor i bondadi ki el ten pa nos. (Lé Lucas 10:22.) Nu ben odja alguns izénplu ki ta mostra modi ki Jeová é un Pai ki ta ama-nu txeu.

6. Da izénplus ki ta mostra ma Jeová ta obiba kes orason di Jizus.

⁶ Jeová ta obi óras ki se fidjus ta pâpia ku el. Odja alguns situason ki Jeová obi se primeru Fidju. Kantu Jizus staba na Téra, txeu bês el faze orason i Jeová obi-l. (Luc. 5:16) Jeová obi orason di se Fidju kantu el tinha ki tomaba disizons inportanti, sima pur izénplu kantu el skodje kes 12 apóstlu. (Luc. 6:12, 13) Tanbê kantu Jizus staba txeu preokupadu, Jeová obi se orason. Un poku antis di Judas trai-l, Jizus faze orason pa se Pai sobri kes kuza ki ta ben kontiseba ku el. Na kel situason la, Jeová obi orason  di se Fidju ki el krê txeu i el manda un anju pa ba da-l forsa. — Luc. 22:41-44.

7. Modi ki bu ta xinti di sabe ma Jeová ta obi nos orason?

⁷ Oji Jeová sta kontinua ta obi orason di se sérvus i el ta responde-s na óra sértu i di midjór manera. (Sal. 116:1, 2) Un irman na Índia odja modi ki Jeová responde se orason. El staba ta sufri pamodi el sta xintiba preokupadu dimás. Nton, el faze orason di korason pa Jeová i el fla-l modi ki el staba ta xinti. El skrebe: “Kantu N odja kel prugrama di Broadcasting^® di maiu di 2019, sobri modi ki nu ta lida ku preokupason, N xinti ma éra kel-li própi ki N staba ta meste. Foi un respósta pa nhas orason.”

8. Kal ki é alguns manera ki Jeová mostra ma el ta amaba Jizus?

⁸ Jeová ta ama-nu i el ta kuida di nos sima el ama Jizus i el kuida di el na kes situason difísil ki el pasa pa el li na Téra. (João 5:20) El djuda Jizus kontinua ta ten un fé fórti, el nkoraja-l kantu el staba dizanimadu, el ranja manera pa Jizus tinha kes kuza ki el mesteba pa el vive. Tanbê, Jeová fla se Fidju ma el ta ama-l i ma el staba kontenti ku el. (Mat. 3:16, 17) Jizus nunka ka xinti el sô pamodi sénpri el podia kontaba ku se Pai. — João 8:16.

9. Modi ki nu sabe ma Jeová ta ama-nu?

⁹ Sima Jizus, nos tudu dja nu xinti amor di Jeová di txeu manera. Pensa na kel-li: Jeová dexa-nu ser se amigu i el da-nu txeu irmon ku irmans ki ta ama-nu pa djuda-nu sta kontenti i pa nkoraja-nu óras ki nu sta dizanimadu. (João 6:44) Tanbê, Jeová ta da-nu tudu kes kuza ki nu meste pa nu kontinua ta ten un fé fórti. I ti el ta djuda-nu ten kes kuza ki nu meste pa nu vive. (Mat. 6:31, 32) Óras ki nu ta pensa na amor ki Jeová ten pa nos, nos amor pa el ta bira mutu más txeu.

10. Kuzê ki nu pode prende na manera ki Jeová ta trata nos irmons ku irmans?

¹⁰ Jeová ta ama nos irmons ku irmans. Má nen sénpri é ka fásil nu xinti amor pa es i mostra ma nu ta ama-s. Alvês é difísil faze kel-li pamodi nos é di kultura diferenti i nu kriadu di manera diferenti. I nos tudu nu ta faze kuza ki pode dexa-s xatiadu i tristi. Má simé, nu pode djuda pa kel amor ki ta uni-nu bira más fórti. Modi? Óras ki nu ta imita Jeová i mostra nos irmons ku irmans amor. (Efé. 5:1, 2; 1 João 4:19) Nu ben odja kuzê ki nu pode prende ku izénplu di Jeová.

11. Modi ki Jizus mostra ‘konpaxon’ sima Jeová?

¹¹ Jeová ta mostra ‘konpaxon’. (Luc. 1:78) Un algen ki ten konpaxon ta fika preokupadu óras ki el odja ma un algen sta sufri i el ta djobe manera di djuda-l i konsola-l. Jizus mostra konpaxon sima Jeová na manera ki el trata pesoas. (João 5:19) Óras ki el ta odjaba kes monti di algen, el ta ‘xintiba péna di es, pamodi es ta staba sfoladu i botadu di un ladu pa kel otu, sima ovelhas sen pastor.’ (Mat. 9:36) Jizus ta xintiba konpaxon di pesoas i el ta djudaba es. El kura duentis i el anima kes ki staba ta ‘trabadja duru i ki staba kansadu’. — Mat. 11:28-30; 14:14.

12. Da un izénplu di modi ki nu pode mostra konpaxon.

¹² Si nu pensa na kes prubléma ki nos irmons ku irmans sta pasa pa el, nu ta konsigi mostra-s konpaxon. Pur izénplu,  talvês un irman ten un prubléma gravi di saúdi. Nunka el ka ta pâpia di se prubléma, má talvês el ta fikaba kontenti si algen djuda-l. Nu podia perguntaba nos kabésa: ‘El sta konsigi kuida di nisisidadis di se família? El ta fikaba kontenti si algun algen djuda-l linpa kaza i pripara kumida?’ Ô pode ser ki un irmon perde se trabadju. Kuzê ki bu ta atxa di da-l algun ajuda timenti el ka atxa otu trabadju? Talvês bu pode da-l algun dinheru sen dexa-l sabe ma é bo ki da-l.

13-14. Modi ki nu pode mostra ma nu gosta di da sima Jeová?

¹³ Jeová gosta di da. (Mat. 5:45) Nu ka meste spéra ti ki nos irmons ku irmans pidi-nu ajuda pa nu mostra-s konpaxon. Sima Jeová, nu pode djuda-s antis di es pidi-nu. Jeová ta poi sól ta sai tudu dia sen nu pidi-l! Kalor di sól ta sustenta vida di tudu algen na Téra, ka sô di kes algen ki ta mostra Jeová ses gratidon. Jeová ta mostra ma el ta ama-nu pamodi el ta da-nu tudu kuza ki nu meste pa nu vive. Nu ta ama Jeová txeu pamodi el ta mostra-nu bondadi i el gosta di da!

¹⁴ Txeu irmon ku irmans sta ta mostra ma es gosta di da, sima Jeová. Pur izénplu, na 2013 kel furakon Haiyan faze txeu stragu na Filipinas. Monti irmon ku irmans perde ses kaza i otus kuza ki es tinha. Má nos família spritual na mundu interu aji faxi pa da-s kel ajuda ki es mesteba. Txeu irmon da dinheru ô es djuda konpo i faze kuazi 750 kaza na ménus di un anu! Duránti duénsa di COVID-19, Tistimunhas di Jeová faze txeu sforsu pa djuda ses irmons ku irmans. Óras ki nu ta aji faxi pa djuda nos família spritual, nu ta mostra ma nu ta ama-s txeu.

15-16. Sima sta na Lucas 6:36, modi ki nu pode imita nos Pai ki sta na Séu?

¹⁵ Jeová ten mizerikórdia i el ta púrdua. (Lé Lucas 6:36.) Tudu dia nu ta xinti mizerikórdia di nos Pai ki sta na Séu. (Sal. 103:10-14) Jizus sabia ma se sigidoris éra inperfetu, má simé el mostra-s mizerikórdia i el ta purduaba es. I ti el da se  vida pa es, pa ses pekadu pode purduadu. (1 João 2:1, 2) Sabe ma Jeová ku Jizus ta mostra-nu mizerikórdia i ma es ta purdua-nu ta pô-nu ta ama-s más txeu inda.

¹⁶ Nos amor pa nos irmons ku irmans ta bira más fórti óras ki nu ta ‘púrdua kunpanheru sénpri’. (Efé. 4:32) É verdadi ki alvês é ka fásil púrdua, má nu meste sforsa pa nu midjora na kel asuntu li. Un irman fla ma kel artigu di Sentinéla “Nhos púrdua kunpanheru di korason” djuda-l txeu. * El skrebe: “Kel artigu djuda-m ntende ma óras ki N ta púrdua otus, N sta djuda nha kabésa tanbê. El ta splika ma óras ki nu ta púrdua otus, kel-li ka krê fla ma nu ta konkorda ku kes kuza mariadu ki es faze ô ma kes kuza ka magua-nu. Má óras ki nu ta púrdua un algen, kel-li krê fla ma nu ka sta xatiadu ku el más i nu ta xinti pas déntu nos.” Óras ki nu ta púrdua nos irmons ku irmans di korason, nu ta mostra ma nu ta ama-s i ma nu sta imita nos Pai, Jeová.

17. Sima sta na Mateus 5:16, modi ki nu pode da ónra pa nos Pai na Séu?

¹⁷ Nu sta kontenti di faze párti di un família di irmons ku irmans ki ta ama kunpanheru na mudu interu. Nu krê pa maioria di algen ben adora nos Deus djuntu ku nos. Pur isu, nu krê toma kuidadu pa nu ka faze nada ki ta mantxa nómi di nos Pai i di se povu. Sénpri nu krê konporta di un manera ki ta poi otus algen ta krê prende sobri Jeová i sirbi-l. — Lé Mateus 5:16.

18. Kuzê ki pode djuda-nu ka xinti medu di da tistimunhu?

¹⁸ Alvês alguns algen pode kritika-nu ô ti pirsigi-nu pamodi nu ta obi ku nos Pai na Séu. Má i si nu xinti medu di pâpia ku otus algen sobri kes kuza ki nu ta kridita na el? Nu pode ten sertéza ma Jeová i se Fidju ta djuda-nu. Jizus flaba se disiplus  ma es ka meste fikaba preokupadu sobri kuzê ki es ta flaba i modi ki es ta flaba. Pamodi? Jizus splika: ‘Na kel óra nhos ta dadu kuzê ki nhos ta fla. Pamodi ken ki ta pâpia é ka sô nhos, má é spritu di nhos Pai ki ta pâpia através di nhos.’ — Mat. 10:19, 20.

19. Da izénplu di un algen ki da tistimunhu ku koraji.

¹⁹ Odja izénplu di Robertu. Dja tinha poku ténpu ki el kumesa ta studa Bíblia i el tinha poku konhisimentu. Má el mostra koraji kantu el bai pa un tribunal di trópa, na Áfrika di Sul. El splika kel juís ma el ka krê baba pa trópa pamodi el ta ama se irmons ku irmans i ma el ta da valor pa priviléjiu di faze párti di família di Jeová! Dirapenti, kel juís pergunta-l: “Ken ki é bus irmon?” Robertu ka staba ta spéra ma juís ta fazeba el kel pergunta la. Kel óra el lenbra di kuzê ki testu di kel dia ta flaba. Éra Mateus 12:50 ki ta fla: ‘Ken ki ta faze vontadi di nha Pai, ki sta na Séu, kel ki é nha irmon, nha irman i nha mai.’ Sikrê dja tinha poku ténpu ki Robertu kumesa ta studa Bíblia, spritu di Jeová djuda-l responde kel pergunta i monti otu pergunta ki el ka staba ta spéra. Di sertéza Jeová xinti txeu orgulhu di Robertu! I Jeová sénpri ta xinti orgulhu di nos óras ki nu ta kunfia na el pa nu da tistimunhu ku koraji, sikrê na situason difísil.

20. Kuzê ki bu debe sta disididu na faze? (João 17:11, 15)

²⁰ Kontinua ta da valor pa priviléjiu di faze párti di es família spritual ki ta ama kunpanheru. Nu ten kel midjór Pai ki ten i txeu irmon ku irmans ki é lial. Nunka nu ka debe pensa ma nada ka ta tra-nu di kel família li. Satanás ku se sigidoris sta xeiu di ódiu i es krê pa nu pensa ma Jeová ka ta ama-nu i es krê kaba ku nos union. Má Jizus faze orason pa nos. El pidi se Pai pa sta sienti na nos, asi pa nos família spritual kontinua unidu. (Lé João 17:11, 15.) I Jeová sta ta responde kel orason li. Sima Jizus, nunka ka bu ten dúvida ma Jeová ta ama-u i ma el ta apoia-u. Sta disididu na kontinua ta bira bu amor más fórti pa bus irmon ku irmans.