1. Inki mutindu beto lenda binga Yehowa?

YEZU, “mwana ya ntete ya lugangu yonso,” bawanzio mpi bansadi ya Yehowa kele na dibuta ya Yehowa. (Bakol. 1:15; Nk. 103:20) Ntangu Yezu vandaka na ntoto, yandi sadisaka bantu na kubakisa nde bo lenda binga Yehowa, Tata na bo. Na dibaku mosi, ntangu Yezu vandaka kusolula ti balongoki na yandi, yandi bingaka Yehowa ‘Tata na yandi mpi Tata na bo.’ (Yoa. 20:17) Ntangu beto ke kudipesaka na Yehowa mpi ke bakaka mbotika, beto ke kotaka na dibuta ya kimpeve ya bampangi na beto yina ke zolaka beto.—Mar. 10:29, 30.

2. Inki beto ta mona na disolo yai?

² Bantu ya nkaka ke ndimaka ve nde Yehowa kele Tata ya zola. Bankaka lenda zaba ve mutindu ya kumonisila bampangi na bo zola. Na disolo yai, beto ta mona mutindu Yezu ke sadisa beto na kundima nde Yehowa kele Tata na beto ya zola mpi na kukwenda pene-pene na yandi. Beto ta mona mpi mitindu yina beto lenda landa mbandu ya Yehowa ntangu beto ke sadila bampangi na beto mambu.

3. Inki mutindu kisambu ya mbandu ke sadisaka beto na kukwenda pene-pene ya Yehowa?

³ Yehowa kele Tata ya zola. Yezu ke zola nde beto baka Yehowa mutindu yandi ke bakaka yandi. Yandi ke zola nde beto baka Yehowa bonso Tata ya zola yina beto lenda solula ti yandi konso ntangu yina. Kansi ve bonso muntu ya mbi yina ke zolaka kaka kusonga beto mambu yina beto fwete sala. Yo ke monana pwelele na mambu yina Yezu longaka balongoki na yandi na kusamba sambu na yo. Yandi yantikaka kisambu ya mbandu ti bangogo yai: “Tata na beto.” (Mat. 6:9) Yezu lendaka kusonga beto na kubinga Yehowa “Nkwa-Ngolo Yonso,” “Ngangi,” to “Ntotila ya kukonda nsuka.” Batitre yai yonso me fwana sambu na yandi mpi yo kele na Biblia. (Kuy. 49:25;  Yez. 40:28; 1 Tim. 1:17) Kansi Yezu songaka beto na kubinga Yehowa nde “Tata.”

4. Inki mutindu beto me zaba nde Yehowa ke zola nde beto kwenda pene-pene na yandi?

⁴ Keti nge ke kukaka ve kundima nde Yehowa kele Tata ya zola? Bantu ya nkaka ke kukaka ve kundima nde yandi kele Tata ya zola. Kana tata yina me butaka beto vandaka kuzola beto ve, yo lenda vanda mpasi sambu beto ndima nde Yehowa kele Tata ya zola. Kansi yo ke pesa beto kikesa na kuzaba nde Yehowa ke zabaka mutindu beto ke kudiwaka mpi sambu na nki beto ke kudiwaka mutindu yina. Yandi ke zolaka kuvanda pene-pene na beto. Yo yina Ndinga na yandi ke tuba nde: “Beno kwenda pene-pene na Nzambi, ebuna yandi ta kwisa pene-pene na beno.” (Yak. 4:8) Yehowa ke zolaka beto mpi yandi ke tuba nde yandi ta vanda Tata na beto ya kuluta mbote.

5. Mutindu Luka 10:22 ke monisa yo, nki mutindu Yezu ke sadisaka beto na kukwenda pene-pene ya Yehowa?

⁵ Yezu lenda sadisa beto na kukwenda pene-pene ya Yehowa. Yandi ke zabaka Yehowa mbote kibeni mpi yandi ke monisaka bikalulu ya Yehowa na mutindu ya kukuka. Yo yina yandi tubaka nde: “Muntu yina me mona mono me mona mpi Tata.” (Yoa. 14:9) Bonso yaya na kati ya dibuta, Yezu ke longaka beto mutindu ya kuzitisa Tata na beto mpi mutindu ya kulemfukila yandi. Yandi ke longaka beto mpi mutindu ya kusala mambu yina ta sepedisa Tata na beto mpi mutindu ya kusala mambu yina ta sala nde yandi ndima beto. Kansi Yezu ke sadisaka beto mingi-mingi na kubakisa nde Yehowa kele Tata ya mbote kibeni mpi yandi ke zolaka beto. (Tanga Luka 10:22.) Beto tala mwa bambandu ya ke monisa yo.

6. Pesa bambandu ya ke monisa nde Yehowa waka bisambu ya Yezu.

⁶ Yehowa ke widikilaka bana na yandi. Beto tadila mutindu yandi widikilaka Mwana na yandi ya ntete. Ya kieleka, Yehowa waka bisambu mingi ya Mwana na yandi ntangu yandi vandaka awa na ntoto. (Luka 5:16) Yandi waka ntangu Yezu sambaka yandi sambu na kubaka balukanu ya mfunu, mu mbandu ntangu yandi zolaka kupona bantumwa na yandi 12. (Luka 6:12, 13) Yehowa waka mpi ntangu Yezu sambaka yandi ntangu yandi vandaka na mpasi ya ngolo. Na ntwala nde Yudasi kuteka Yezu, yandi sambaka Tata na yandi mingi sambu na mpasi yina yandi zolaka kukutana ti yo. Yehowa waka kisambu ya Yezu mpi yandi tindaka  wanzio sambu na kupesa Mwana na yandi ya yandi ke zolaka mingi kikesa.—Luka 22:41-44.

7. Inki mutindu beto fwete wa mutindu beto me zaba nde Yehowa ke waka bisambu na beto?

⁷ Bubu yai, Yehowa ke landaka kuwa bisambu ya bansadi na yandi mpi yandi ke pesaka mvutu na bisambu yango na ntangu ya mbote mpi na mutindu ya mbote. (Nk. 116:1, 2) Beto tadila mbandu ya mpangi-nkento mosi na Inde yina monaka mutindu Yehowa pesaka mvutu na bisambu na yandi. Yandi vandaka ti basusi ya ngolo mpi yandi sambaka Yehowa mingi sambu na yo. Yandi ke tuba nde: “Manaka ya JW Télédiffusion ya Mayi 2019 tubilaka mambu yina beto fwete sala kana beto kele ti basusi ya ngolo. Yo vandaka kibeni diambu yina mono vandaka ti yo mfunu. Yo vandaka mvutu ya bisambu na mono.”

8. Inki mutindu Yehowa monisaka nde yandi ke zolaka Yezu?

⁸ Yehowa ke zolaka beto mpi yandi ke lungisaka bampusa na beto kaka mutindu yandi zolaka Yezu mpi lungisaka bampusa na yandi ntangu yandi vandaka awa na ntoto. (Yoa. 5:20) Yandi sadisaka Yezu na kulanda kuvanda ti lukwikilu ya ngolo, yandi pesaka Yezu kikesa ntangu yandi vandaka na mpasi ya ngolo mpi yandi lungisaka bampusa ya Yezu ya kinsuni. Yehowa songaka Mwana na yandi nde yandi ke zolaka yandi mpi nde yandi ke sepelaka ti yandi. (Mat. 3:16, 17) Yezu zabaka nde Tata na yandi ya zulu yina ke zolaka yandi ta vanda ntangu yonso ti yandi mpi ta sadisa yandi. Yo yina yandi kudiwaka ve yandi mosi.—Yoa. 8:16.

9. Inki ke monisa kibeni nde Yehowa ke zolaka beto?

⁹ Yehowa ke sadilaka beto yonso mambu mingi yina ke monisaka nde yandi ke zolaka beto mutindu yandi sadilaka Yezu. Mu mbandu, Yehowa me salaka nde beto kuma banduku na yandi mpi yandi me pesaka beto bampangi mingi yina ke zolaka beto, yina ke pesaka beto kiese mpi kikesa kana beto ke kutana ti bampasi. (Yoa. 6:44) Yehowa ke pesaka beto mpi madia mingi ya kimpeve sambu beto landa kukumisa lukwikilu na beto ngolo. Konso kilumbu, yandi ke pesaka beto bima ya kinsuni yina beto ke vandaka ti yo mfunu. (Mat. 6:31, 32) Kana beto yindula mambu yina Yehowa ke sadilaka beto ya ke monisaka nde yandi ke zolaka beto, beto ta kuma kuzola yandi mpi mingi.

10. Mutindu Yehowa ke sadilaka bampangi na beto mambu ke longa beto nki?

¹⁰ Yehowa ke zolaka bampangi na beto. Kansi yo ke vandaka ve pete ntangu yonso nde beto zola bampangi ya dibuta na beto ya kimpeve mpi beto monisa bo nde beto ke zolaka bo. Bantangu ya nkaka yo ke vandaka mpasi sambu beto me yelaka ve mutindu mosi, beto me katukaka ve kisika mosi, beto me yelaka ve kisika mosi mpi beto ke salaka ve mambu mutindu mosi. Beto yonso ke salaka bifu yina ke pesaka bantu ya nkaka makasi mpi yina ke salaka nde bo vanda ve na kiese. Ata mpidina, beto lenda sala yonso sambu na kuzola bampangi ya dibuta na beto ya kimpeve. Inki mutindu? Beto lenda sala yo kana beto ke landa mbandu ya Tata na beto ya kumonisila bampangi na beto zola. (Baef. 5:1, 2; 1 Yoa. 4:19) Beto tala malongi yina beto lenda baka na mbandu ya Yehowa.

11. Inki mutindu Yezu landaka mbandu ya Yehowa ya kuwila bantu mawa?

¹¹ Yehowa ke monisaka “mawa ya nene.” (Luka 1:78) Muntu yina ke wilaka bantu mawa ke waka mpasi ntangu yandi ke mona bantu ke niokwama mpi yandi ke salaka yonso sambu na kusadisa bo mpi kupesa bo kikesa. Yezu landaka mbandu ya kikalulu ya Yehowa ya kuwila bantu mawa ntangu yandi vandaka kusadila bantu mambu. (Yoa. 5:19) Kilumbu mosi, ntangu yandi monaka kimvuka mosi ya bantu, “yandi wilaka bo mawa sambu bo vandaka kuniokwama mpi kuyungana bonso mameme yina me konda ngungudi.” (Mat. 9:36) Yezu sukaka kaka ve na kuwila bantu mawa. Yandi salaka mambu ya nkaka sambu na kusadisa bo. Yandi belulaka bambefo mpi yandi sadisaka bantu yina vandaka ‘kumona mpasi mpi kunata kilo ya mingi.”—Mat. 11:28-30; 14:14.

12. Inki beto lenda sala sambu na kumonisa nde beto ke wila bampangi mawa?

 ¹² Kana beto ke yindula bampasi yina bampangi na beto ke kutana ti yo, yo ta sadisa beto na kuwila bo mawa. Yo lenda vanda nde mpangi-nkento mosi ke bela maladi ya ngolo. Yandi ke bokutaka ve sambu na maladi yango kansi yandi ta sepela kana muntu mosi kusadisa yandi. Mbala ya nkaka yandi ke kukaka ve kulungisa bampusa ya kinsuni ya dibuta na yandi. Keti beto lenda sadisa yandi na kulambila yandi to kutudila yandi nzo bunkete? Mpangi mosi lenda vanda diaka ve ti kisalu. Beto lenda pesa yandi mwa mbongo mpi beto lenda songa yandi ve nde beto bantu me pesa yandi yo, sambu yo sadisa yandi tii ntangu yandi ta zwa kisalu ya nkaka.

13-14. Inki mutindu beto lenda monisa kikalulu ya kukaba bonso Yehowa?

¹³ Yehowa ke kabaka. (Mat. 5:45) Beto fwete kinga ve nde bampangi kulomba beto lusadisu na ntwala nde beto sadisa bo. Bonso Yehowa, beto lenda sadisa bo na ntwala nde bo lomba beto lusadisu. Yandi ke nokisaka mvula kukonda nde beto lomba yandi yo. Beto yonso ke bakaka mambote ya mvula ata bayina ke pesaka ve mersi. Mutindu Yehowa ke pesaka beto bima yina beto ke vandaka na yo mfunu, yo ke monisaka nde yandi ke zolaka beto. Beto ke zolaka Yehowa mingi sambu yandi kele ntima-mbote mpi yandi ke kabaka.

¹⁴ Bampangi mingi ke landaka mbandu ya Yehowa mpi bo ke kabaka. Mu mbandu, na 2013, mupepe mosi ya ngolo (typhon géant Haiyan) bulaka na Philippines mpi yo bebisaka bima mingi kibeni. Banzo mpi bima ya bampangi mingi bebaka kansi bampangi ya ntoto ya mvimba ya dibuta ya kimpeve sadisaka bo. Bampangi mingi pesaka mbongo mpi bankaka kudipesaka na kisalu ya kutunga. Bo yidikaka mpi bo tungaka diaka banzo kiteso ya 750 mpi yo bakaka ve mvula ya mvimba. Na nsungi ya maladi ya coronavirus, Bambangi ya Yehowa salaka ngolo sambu na kusadisa bampangi na bo. Kana beto ke sadisa bampangi ya dibuta na beto ya kimpeve kukonda kusukinina, beto ta monisa bo nde beto ke zolaka bo.

15-16. Luka 6:36 ke tuba nde beto fwete sala nki sambu na kulanda mbandu ya Tata na beto ya zulu?

¹⁵ Yehowa ke wilaka bantu mawa mpi yandi ke lolulaka. (Tanga Luka 6:36.) Konso kilumbu beto ke monaka mutindu Tata na beto ya zulu ke wilaka beto mawa. (Nk. 103:10-14) Balongoki ya Yezu vandaka bantu ya kukonda kukuka kansi Yezu  vandaka kuwila bo mawa mpi yandi vandaka kulolula bo. Nkutu yandi ndimaka kupesa luzingu na yandi na luzolo yonso sambu Nzambi kulolula masumu na beto. (1 Yoa. 2:1, 2) Kikalulu ya Yehowa mpi ya Yezu ya kuwila bantu mawa mpi ya kulolula ke salaka nde beto kwenda pene-pene na bo.

¹⁶ Kana beto ke “lolulana na ntima ya mvimba, zola na beto ti bampangi na beto ya dibuta ya kimpeve ta kuma ngolo.” (Baef. 4:32) Ya kieleka, yo lenda vanda mpasi bantangu ya nkaka sambu beto lolula bantu ya nkaka. Yo yina, beto fwete sala yonso sambu na kulolula bo. Disolo mosi yina basikaka na Nzozulu ya Nkengi yina vandaka ti ntu-diambu, “Beno Lolulana na Ntima ya Mvimba” sadisaka mpangi-nkento mosi na kulolula bantu ya nkaka. * Yandi ke tuba nde: “Disolo yina sadisaka mono na kubakisa nde kulolula bantu ya nkaka ke sadisaka mono mingi kibeni. Disolo yango monisaka mpi nde kulolula bantu ya nkaka ke tendula ve nde mambu yina bo sadilaka nge vandaka ya mbote mpi nde yo pesaka nge ve mpasi. Kana nge ke lolula bantu ya nkaka, nge ta wila bo diaka ve makasi mpi nge ta vanda na ngemba.” Kana beto ke lolula bampangi na ntima ya mvimba, beto ta monisa nde beto ke zolaka bo mpi nde beto ke landa mbandu ya Tata na beto Yehowa.

17. Mutindu Matayo 5:16 ke monisa yo, nki mutindu beto lenda kumisa Tata na beto ya zulu?

¹⁷ Yo kele dibaku ya nene ya kuvanda na kati ya dibuta ya bampangi ya ntoto ya mvimba yina ke zolanaka. Beto ke zolaka nde bantu mingi kuvukana ti beto sambu na kusambila Yehowa. Yo yina beto fwete sala ve ata fioti diambu yina ta pusa bantu na kukuma ti bangindu ya mbi sambu na Yehowa to sambu na bansadi na yandi. Beto ke salaka yonso sambu na kusala mambu yina ta pusa bantu na kundima nsangu ya mbote.—Tanga Matayo 5:16.

18. Inki lenda sadisa beto na kulonga nsangu ya mbote kukonda boma?

¹⁸ Bantangu ya nkaka, bantu lenda tubila beto mambu ya mbi to bo lenda niokula beto sambu beto ke lemfukilaka Tata na beto ya zulu. Inki beto lenda sala kana beto ke wa boma ya kusonga bantu ya nkaka mambu yina beto ke kwikilaka? Beto fwete ndima nde Yehowa mpi Mwana na yandi  ta sadisa beto. Yezu songaka balongoki na yandi nde bo fwete kudiyangisa ve sambu na mambu yina bo ta tuba. Sambu na nki? Yezu tubaka nde: “Sambu mambu yina beno ta tuba bo ta pesa beno yo na ngunga yina; sambu bantu ke tuba kele kaka beno ve, kansi yo kele mpeve ya Tata na beno yina ke tuba na nzila na beno.”—Mat. 10:19, 20.

19. Pesa mbandu ya mpangi mosi yina longaka nsangu ya mbote ti kikesa yonso.

¹⁹ Beto tadila mbandu ya mpangi Robert. Mwa bamvula me luta, ntangu yandi yantikaka kulonguka Biblia, yandi zabaka ve mambu mingi ya Biblia. Yo lombaka nde yandi kwenda na tribinale sambu na kutendudila zuzi mosi sambu na nki beto ke salaka ve kisalu ya kisoda. Ti kikesa yonso, yandi tendudilaka bazuzi nde yandi ke zolaka ve kukota na mambu ya politiki sambu yandi ke zolaka bampangi na yandi Bakristu. Yandi ke zolaka kuvanda na dibuta ya kimpeve. Zuzi yina yulaka yandi mbala mosi nde: “Bampangi na nge yango kele banani?” Mpangi Robert yindulaka ve nde bo ta yula yandi ngiufula yina. Kansi yandi yibukaka mbala mosi verse ya mukapu ya kilumbu yina. Verse yango vandaka Matayo 12:50. Yo ke tuba nde: “Konso muntu yina ke salaka luzolo ya Tata na mono yina kele na zulu, yandi muntu kele mpangi na mono ya bakala, mpangi na mono ya nkento, mpi mama na mono.” Mpangi Robert vandaka longoki ya Biblia ya mpa kansi mpeve ya Yehowa sadisaka yandi na kupesa mvutu na ngiufula yina mpi na bangiufula ya nkaka yina yandi yindulaka ve nde bo ta yula yandi. Yehowa sepelaka mingi kibeni ti mpangi Robert. Yehowa ke sepelaka mpi mingi ti beto ntangu beto ke tudilaka yandi ntima mpi ke longaka nsangu ya mbote ti kikesa yonso na bantangu ya mpasi.

20. Inki beto fwete sala? (Yoane 17:11, 15)

²⁰ Beto fwete landa kumonisa ntonda mutindu beto kele na dibuta ya kimpeve ya bampangi yina ke zolaka beto. Beto kele ti Tata mosi ya kuluta mbote mpi bampangi mingi yina ke zolaka beto. Beto fwete landa kumonisa ntonda sambu na mambu yai. Satana ti bantu na yandi ya mbi ke sosaka kupusa beto na kuyindula nde Tata na beto ya zulu ke zolaka beto ve mpi bo ke salaka yonso sambu na kusala nde beto vanda diaka ve na bumosi. Kansi Yezu sambaka sambu na beto. Yandi lombaka Tata na beto na kutanina beto sambu dibuta na beto kulanda kuvanda na bumosi. (Tanga Yoane 17:11, 15.) Yehowa ke pesaka mvutu na kisambu yina. Bonso Yezu, beto fwete ndima kibeni nde Tata na beto ya zulu ke zolaka beto mpi nde yandi ta sadisa beto. Beto fwete landa kukangama ti bampangi ya dibuta na beto ya kimpeve.