1. Ovanhu ovo ovadiinini ove na ekwatafano la tya ngahelipi naJehova?

OUKWANEUMBO waJehova owa fikama po muJesus, oo “a shitwa tete koishitwa aishe” nosho yo kovaengeli vahapu. (Kol. 1:15; Eps. 103:20) Jesus eshi a li kombada yedu, okwa li a ulika kutya ovanhu ovadiinini otava dulu okutala ko Jehova e li Xe yavo. Eshi a li ta popi novahongwa vaye, okwa popya ta ulike kuJehova ta ti: ‘Tate, oo e li Xo yeni.’ (Joh. 20:17) Nafye ngeenge otwe liyapulile Jehova nokuninginifwa, ohatu ningi oshitukulwa shoukwaneumbo unahole wovamwatate novamwameme. — Mark. 10:29, 30.

2. Oshike hatu ka kundafana moshitukulwa eshi?

² Vamwe ohava mono shidjuu okutala ko Jehova e li Xe omunahole. Vamwe kave shii nghee ve na okuulikila ovamwaxe ohole. Moshitukulwa eshi ohatu ka tala nghee Jesus e tu kwafela tu tale ko Jehova e li Tate yetu omunahole, oo hatu dulu okweehena popepi naye. Ohatu ka tala yo keenghedi omo hatu dulu okuhopaenena Jehova, nghee tu na okuungaunga novamwatate novamwameme.

3. Eilikano lOmwene wetu ole tu ehenifa ngahelipi popepi elela naJehova?

³ Jehova oku li Tate omunahole. Jesus okwa hala tu tale ko Jehova ngaashi he mu tale ko, e li ngaashi omudali omunahole, oo ha popiwa naye noupu. Ndele hangaashi omudali, oo ehe na ohole noha pula ashike oilonga i longwe. Oumbangi oo, ou liwetikile meilikano, olo Jesus a honga ovahongwa vaye. Okwa hovela eilikano olo neendjovo tadi ti: “Tate yetu.” (Mat. 6:9) Jesus okwa li ta dulu oku tu lombwela tu kale hatu ifana Jehova “Omunaenghono adishe,” “Omushiti,” ile “Ohamba yaalushe,” omadinafimaneko aeshe oo taa wapalele noku li paMishangwa. (Gen. 49:25; Jes. 40:28; 1 Tim. 1:17) Ponhele yaasho, Jesus okwe tu lombwela tu ifane Jehova “Tate.”

4. Otu shi shii ngahelipi kutya Jehova okwa hala tu ehene popepi naye?

 ⁴ Mbela oho mono shidjuu okutala ko Jehova e li Tate omunahole? Vamwe osho ve udite ngaho. Otashi dulika tu mone shidjuu, ngeenge ovadali vetu, ovo ve tu tekula, inave tu ulikila ohole. Itashi hekeleke tuu okushiiva kutya Jehova oku udite ko filufilu omaliudo etu! Okwa hala okweehena popepi nafye. Nomolwaashi Eendjovo daye de tu ladipika tadi ti: “Eheneni popepi naKalunga, opo nee ota ka ehena popepi nanye.” (Jak. 4:8) Jehova oku tu hole nokwa popya kutya ota ka kala Tate yetu a denga mbada.

5. Metwokumwe naLukas 10:22, Jesus okwe tu kwafela ngahelipi tu ehene popepi elela naJehova?

⁵ Jesus ota dulu oku tu kwafela tu ehene popepi elela naJehova. Jesus oku shii Jehova nawanawa nokwa hopaenena omaukwatya aye monghedi ya wanenena, nomolwaasho a ti: “Keshe ou a mona nge, okwa mona yo Tate.” (Joh 14:9) Ngaashi omumwainamati a kula, Jesus ote tu hongo nghee tu na okufimaneka nokudulika kuTate yetu. Ote tu hongo yo okuhenuka oinima oyo hai mu nyemateke nanghee hatu dulu okukala twa hokiwa kuye. Jesus eshi a li kombada yedu okwe tu kwafela tu mone kutya Jehova oku li omunanghenda nomunalukeno. (Lesha Lukas 10:22.) Natu ka taleni koihopaenenwa imwe.

6. Yandja oihopaenenwa oyo tai ulike kutya Jehova okwa li ha pwilikine komailikano aJesus.

⁶Jehova oha pwilikine koludalo laye. Natu ka taleni konghedi imwe omo Jehova a ulika kutya okwa li ha pwilikine komailikano Omona waye woshiveli. Jehova okwa li ha pwilikine filufilu komailikano mahapu Omona waye, eshi a li kombada yedu. (Luk. 5:16) Okwa li a pwilikina komailikano aJesus, eshi a li ta ningi omatokolo a fimana, ngaashi lokuhoolola ovayapostoli vaye 12. (Luk 6:12, 13) Jehova okwa li yo a uda eilikano laJesus, eshi a li moudjuu. Jesus okwa li a ilikana kuXe, ofimbo ina kengelelwa kuJudas omolwoinima oyo a li ta ka ningilwa diva konima yaasho. Jehova ka li ashike a pwilikina keilikano lOmona waye omuholike, ndele okwa li yo a tuma omweengeli e ke mu pameke. — Luk. 22:41-44.

7. Ohatu kala tu udite ngahelipi eshi tu shii kutya Jehova oha pwilikine komailikano etu?

 ⁷ Jehova ota twikile nokunena okupwilikina komailikano ovapiya vaye ovadiinini, he a nyamukula pefimbo la wapala nomonghedi ya denga mbada. (Eps. 116:1, 2) Omumwameme wokoIndia okwa li a mona nghee Jehova a nyamukula omailikano aye. Okwa li e na oupyakadi wopamaliudo wa kwata moiti nokwa li a ilikana Jehova a mana mo shi na sha nao. Okwa shanga a ti: “O-JW Broadcasting^® yaMei 2019 oya li tai popi shi na sha naasho tu na okuninga po, ngeenge tu na oisho nosho yo omalipulo, naasho osho naanaa nda li nda pumbwa. Omailikano ange okwa li a nyamukulwa.”

8. Omeenghedi dilipi Jehova a ulikila Jesus ohole?

⁸ Jehova oku tu hole nohe tu file oshisho, ngaashi ashike a li e hole Jesus nohe mu file oshisho, eshi a li kombada yedu noku na oshinakuwanifwa sha kwata moiti. (Joh. 5:20) Okwa li a wanifa po eemhumbwe adishe daJesus dopamhepo, dopamaliudo nodopalutu. Jehova okwa li yo a lombwela Omona waye kutya oku mu hole nokwe mu hokwa. (Mat. 3:16, 17) Jesus okwa kala e shii kutya Xe womeulu oku mu hole, e li alushe pamwe naye nohe mu kwafele, nomolwaasho kapa li nande efiku limwe a li e udite owike. — Joh. 8:16.

9. Oumbangi ulipi tau ulike kutya Jehova oku tu hole?

⁹ Ngaashi Jesus, atusheni otwa mona meenghedi dihapu kutya Jehova oku tu hole. Diladila ashike kwaashi: Jehova okwe tu pitika tu kale ookaume kaye nokwe tu pa ovamwatate novamwameme vahapu ovanahole, ovo have tu hafifa noku tu twa omukumo, ngeenge tu li moudjuu. (Joh. 6:44) Jehova okwe tu pa yo keshe shimwe osho twa pumbwa, opo tu pameke eitavelo letu. Natango, ohe tu kwafele tu dule okuwanifa po eemhumbwe detu dakeshe efiku. (Mat. 6:31, 32) Ngeenge otwa kala hatu dilonga kunghee Jehova e tu hole, ohole yetu yoku mu hola otai ka enda tai kulu.

10. Oshike hatu lihongo monghedi omo Jehova ha ungaunga novamwatate novamwameme?

¹⁰ Jehova oku hole ovamwatate novamwameme. Ndele kashipu kufye oku va ulikila alushe ohole. Otashi dulu okukala shi li ngaho, molwaashi otwa dja momihoko dihapu da yoolokafana nonakudiwa yetu inai faafana. Shikwao vali, atusheni ohatu ningi omapuko oo taa dulu okuudifa nai nokunyemateka vamwe. Ashike nande ongaho, ohatu dulu okuweda ko kohole yetu yokuhola ovamwatate novamwameme. Ngahelipi mbela? Omokuhopaenena Tate yetu, eshi hatu ulikile ovamwatate novamwameme ohole. (Ef. 5:1, 2; 1 Joh. 4:19) Natu ka taleni osho hatu lihongo koshihopaenenwa shaJehova.

11. Jesus okwa ulika ngahelipi kutya Jehova ‘omunalukeno’?

¹¹Jehova oku na ‘olukeno.’ (Luk. 1:78) Omunhu oo e na olukeno oha kala te lipula naasho ta dulu okuninga po, ngeenge okwa didilike kutya ovanhu vonhumba otava mono oixuna. Oha kongo eenghedi omo ta dulu oku va kwafela noku va hekeleka. Onghedi omo Jesus a ungaunga novanhu, otai ulike nghee Jehova ha kala e va uditile. (Joh. 5:19) Pomhito imwe, eshi Jesus a li a mona ongudu yovanhu, ‘okwe i kenukila molwaashi oya li ya hepekwa noya ekelwashi ya fa eedi dihe na omufita.’ (Mat. 9:36) Jesus okwa ninga shihapu shihe fi ashike oku va ulikila ohole. Okwa li a ninga po sha, opo e va kwafele. Okwa li a velula ovanaudu nokwa li a tulumukifa ovo va ‘longa nova lolokifwa.’ — Mat. 11:28-30; 14:14.

12. Yandja oshihopaenenwa shanghee hatu dulu okuulika olukeno.

¹² Ofimbo inatu ulikila ovamwatate novamwameme olukeno, otwa pumbwa okuuda ko omaupyakadi oo va taalela. Pashihopaenenwa, omumwameme otashi dulika a kale e na oupyakadi wopalutu wa kwata moiti. Otashi dulika iha  popi kombinga yao, ashike otashi dulika a kale a hafa neenghono, ngeenge okwa pewa ekwafo. Mbela ota dulu ngoo okuwanifa po eemhumbwe dopalutu doukwaneumbo waye? Mbela itatu dulu oku mu kwafela mokuteleka ko, ile tu wapaleke eumbo laye? Ile omumwatate otashi dulika a kanifa oilonga. Ohatu dulu oku mu pa oshimaliwa, opo shi mu kwafele fiyo osheshi a mona oilonga, nopehe na oku mu lombwela kutya osha dja kufye.

13-14. Ongahelipi hatu dulu okukala hatu yandje ngaashi Jehova?

¹³Jehova oha yandje. (Mat. 5:45) Inatu pumbwa okuteelela ovamwatate novamwameme ve tu lombwele kutya otwa pumbwa ekwafo, opo tu va ulikile olukeno. Ngaashi Jehova, ohatu dulu oku va ningila sha, ofimbo inave tu pula. Ohe tu pitifile etango laye efiku keshe, nonande inatu mu pula. Eenhe detango ohadi etela ouwa ovanhu aveshe, ndele havo ovo ashike hava pandula. Mbela ito dimine kutya eshi Jehova he tu wanifile po eemhumbwe detu oku tu hole? Otu hole Jehova neenghono, molwaashi omunahole noha yandje.

¹⁴ Ovamwatate novamwameme vahapu ohava hopaenene Xe womeulu mokukala hava yandje, nonande inava pulwa ekwafo. Pashihopaenenwa, mo 2013, oshikungulu shinene shedina Haiyan osha li sha denga neenghono Philippines. Ovamwatate novamwameme vahapu ova li va kanifa omaumbo noiniwe yavo. Ashike ovamwatate novamwameme mounyuni aushe ova li va ninga eenghendabala, opo ve va kwafele diva. Vahapu ova li va yandja omayambidido opashimaliwa, ile va kufa ombinga moshilonga shinene shokutunga nokuwapekulula omaumbo hanga 750 moule ashike weemwedi. Pefimbo lomukifi wekomba woCOVID-19, Eendombwedi oda longa noudiinini, opo di yambidide ovamwaxe. Ngeenge ohatu kwafele ovamwatate novamwameme meendelelo, kungaho ohatu va ulikile kutya otu va hole.

15-16. Metwokumwe naLukas 6:36, onghedi ya denga mbada ilipi hatu dulu okuhopaenena Tate yetu womeulu?

¹⁵Jehova oku na onghenda noha dimine po. (Lesha Lukas 6:36.) Tate yetu womeulu ohe tu file onghenda efiku keshe. (Eps. 103:10-14) Ovashikuli vaJesus kava li va wanenena, ashike okwa li he va ulikile onghenda noku va dimina po. Okwe liyandja nehalo liwa a fye, opo tu dule  okudiminwa po omatimba etu. (1 Joh. 2:1, 2) Ediminepo nosho yo onghenda oyo twa ulikilwa kuJehova naJesus, otai tu linyengifa tu ehene popepi elela navo.

¹⁶ Ohole yetu youmwainafana otai ka kala ya pama, ngeenge ohatu ‘diminafana po nehalo liwa.’ (Ef. 4:32) Oshoshili kutya okudimina po vakwetu omafimbo amwe ohashi kala shidjuu, ashike otwa pumbwa okulongela ko. Omumwameme umwe okwa li a lesha oshitukulwa mOshungonangelo nosha li she mu kwafela neenghono. Osha li shi na oshipalanyole tashi ti: “Diminafaneni po nehalo liwa.” * Okwa shanga a ti: “Eshi nda konakona oshitukulwa osho onda mona kutya, ngeenge onda dimine po ovanhu vakwetu, otashi ka kwafela nge neenghono. Osha yelifa kutya okudimina po vamwe nehalo liwa inashi hala okutya owa panda osho va ninga, ile kutya inashi ku udifa nai. Ndele ngeenge owe va dimine po, ito ka kala vali we va kwatela onghone noto ka kala u na ombili.” Ngeenge otwa dimine po ovamwatate novamwameme tashi di komutima, ohatu ka ulika kutya otu va hole nohatu hopaenene Tate yetu, Jehova.

17. Metwokumwe naMateus 5:16, ongahelipi hatu dulu okufimanekifa Tate yetu womeulu?

¹⁷ Oshi li oufembanghenda munene okukala oshitukulwa shoukwaneumbo unahole womounyuni aushe. Otwa hala ovanhu vahapu ngaashi tashi shiiva ve tu waimine mokulongela Kalunga ketu. Tu na osho momadiladilo, inatu ninga nande oshinima shii, osho tashi ningifa ovanhu va kale ve na etaleko lii li na sha naJehova, ile noshiwana shaye. Otwa hala okulihumbata monghedi oyo tai nanene ovanhu konghundana iwa. — Lesha Mateus 5:16.

18. Oshike tashi tu kwafele tuha tile okuyandja oundombwedi?

¹⁸ Omafimbo amwe, ovanhu vamwe otashi dulika ve tu kembaule, ile ve tu hepeke nokuli, molwaashi hatu dulika kuTate yetu womeulu. Ongahelipi ngeenge oho kala wa tila okupopya navamwe kombinga yaasho wa itavela? Ohatu dulu okukala noushili kutya Jehova nosho yo Omona waye otave tu kwafele. Jesus okwa shilipaleka ovahongwa vaye kutya inava kala va limbililwa kutya oshike tava ka popya, ile osho  tava ka tya. Omolwashike vehe na okulipula nasho? Jesus okwa yelifa a ti: “Osho tamu ka popya otamu ke shi pewa pefimbo opo; osheshi hanye ashike vene tamu ka popya, ndele omhepo yaXo yeni oyo tai ka popya munye.” — Mat. 10:19, 20.

19. Yandja oshihopaenenwa shaumwe, oo a li a yandja oundombwedi nouladi.

¹⁹ Natu ka taleni koshihopaenenwa shaRobert. Eshi opo a li ta konakona Ombiibeli noka li e na eshiivo lihapu li na sha nOmbiibeli, okwa li a ya komhangu nokuyelifila omupanguli kutya omolwashike ita waimine etangakwaita moSouth Africa. Okwa popya nouladi momhangu kutya okwa hala okukala ehe na ombinga, molwaashi oku hole ovamwaxe vopamhepo. Okwa lenga onghandangala oyo ta dana moumwainafana wetu womounyuni aushe. Omupanguli okwe mu pula ta ti: “Ovamwaxo oolyelye?” Robert ka li a teelela epulo olo, ashike okwa li a dimbuluka diva omushangwa wefiku olo. Okwa li oMateus 12:50, oo ta ti: “Keshe tuu ou ta longo ehalo laTate womeulu, oye omumwamememati, omumwamemekadona nameme.” Nonande pefimbo opo, Robert okwa li ta konakona Ombiibeli, omhepo iyapuki yaJehova oya li ye mu kwafela a dule okunyamukula epulo olo nosho yo makwao a wedwa po, oo a li ina teelela. Jehova oku na okukala a li e uditile Robert etumba. Jehova oha kala yo e tu uditile etumba, ngeenge otwa kala twe lineekela muye, eshi hatu yandje oundombwedi nouladi, nonande otu li meenghalo didjuu.

20. Otu na okukala twa tokola toko okuninga shike? (Johannes 17:11, 15)

²⁰ Natu twikileni okukala twa lenga onghandangala oyo hatu dana moukwaneumbo wopamhepo unahole. Otu na Tate yetu a denga mbada kuhe na vali nosho yo ovamwatate novamwameme vahapu ovo ve tu hole. Inatu kwata nande oufembanghenda oo okahetengi. Satana neendemoni daye ohava kendabala oku tu ningifa tu kale twa limbililwa ohole yaTate yetu womeulu yoku tu hola nokukendabala okuteya po oukumwe wetu. Ashike Jesus okwa ilikana ponhele yetu, a pula Tate yetu a kale te tu pashukile, opo tu kale twa hangana tu li oukwaneumbo. (Lesha Johannes 17:11, 15.) Jehova ota nyamukula eilikano olo. Ngaashi Jesus, inatu kala nandenande twa limbililwa ohole nosho yo eyambidido laTate yetu womeulu. Onghee hano, natu kale twa tokola toko okweehena popepi elela noukwaneumbo wetu wopamhepo.