1. Ukamba webhi utena kukala nawu o athu afiyele ni Jihova?

JEZÚ, “o thungunu, wala ku thandu dya ima yoso yobhange,” kumoxi ni jianju, abhanga mbandu ya mwiji wa abhezi a Jihova. (Kol. 1:15; Jisá. 103:20) Kyoso Jezú kyexile mu ixi mwene wakwatekesa o athu kutendela kwila ene atena kwixana Jihova kala Tata yâ. Mwene wazwela kumaxibulu mê, mukwixana Jihova kala: “Tata yami, . . . Tata yenu.” (Nzwá 20:17) Kyoso kitudibhakula kwa Jihova ni kudibatizala etu tubhanga mbandu wamwiji wajiphange wadizolo kyavulu.—Mál. 10:29, 30.

2. Ihi itwandadilonga mumilongi yiyi?

² Sayi yá kya abhonza kutala Jihova kala Tata yâ yahenda. Amukwa nange kejiya kyebhi kyalondekesa o henda yâ kujiphange. Mumilongi yiyi, twandamona se kyebhi Jezú kyatena kutukwatekesa kumona Jihova kala Tata yahenda, ni kyebhi kitutena kuzukama kwa mwene. Twandadilonga we maukexilu ututena kukayela o phangu ya Jihova ni kyebhi kitutena kutalatala o jiphange jetu.

3. Kyebhi o musambu walongo Jezú utuzukamesa dingi kwa Jihova?

³ Jihova Tata yahenda. Jezú wamesena kwila tumona Jihova kala mu ukexilu umutala mwene—kala Tata yambote, Tata yahenda tutena kuzwela né kabasa kithangana, muthu kabhonzo kumuzukama, mwene ngó watokala kututangela itwatokala kubhanga. Tutena kumona o kidi kiki mumusambu walongo Jezú kumaxibulu mê. Mwene wamateka o musambu yú ni izwelu: “Tata yetu.” (Mat. 6:9) Jezú wejitena kwixana Jihova kala: “Muteni-a-Yoso,” “o Mubhangi,” mba “o Mwenexi yó, kene kùfwa,” kikima kyayibha kwixana Jihova mumajina yá a  ujitu, mukonda atokala mwene kwa Jihova. (Dim. 49:25; Iza. 40:28; 1 Tim. 1:17) Maji, Jezú watumbula o kizwelu kyahenda “Tata.”

4. Kyebhi kitwejiya kwila Jihova wamesena kuma tumuzukama?

⁴ O kwila kyene kukubhonza kutala Jihova kala Tata yé yahenda? Amoxi mudyetu kyene mwabhonza. Se o tata yetu muxitu kexile mututalatala ni henda, kiki kitena kutubhonzesa kuxinganeka kwila sayi ko Tata watuzolo. Maji kitena kutuximbakatesa o kwijiya kwila Jihova wejiya ni kidi kyoso kyebhi kitwamudivwa, ni mukonda dyahi tudivwa mu ukexilu yú! Mwene wamesena kwila tukala tumakamba mê. O Maka mê atubhanga o kixanu kiki: “Zukamenu kwa Nzambi, mwène u mi zukama enu.” (Tiya. 4:8) Jihova watuzolo, mwene wamesena kukala o Tata yabeta kota phala etu.

5. Kala kilondekesa Luka 10:22, kyebhi Jezú kyatena kutukwatekesa phala tuzukame dingi kwa Jihova?

⁵ Jezú utukwatekesa kuzukama dingi kwa Jihova. Jezú wejiya kyambote Jihova, mwene walondekesa ni kuyuka kwoso o idifwa ya Tata, mukonda dya kiki mwene wambe: “Woso wa ngi mono eme, wa mono we Tata.” (Nzwá 14:9) Kala kota dyetu, Jezú utulonga kyebhi kitutena kuxila ni kubelesela Tat’etu, ihi itwatokala kubhanga phala kitumuluwalese, ni kutuxikina. Maji o ukexilu wabeta kota watulongo kwila Jihova mukwa henda, o phangu yatuxila Jezú. (Tanga Luka 10:22.) Tutale ifika.

6. Bhana ifika ilondekesa kyebhi Jihova kyevu Jezú.

⁶ Jihova wivwa an’ê. Tala ukexilu umoxi wa Jihova kyevu Mon’ê wadyanga. Mukidi Jihova wakexile mukwivwa o misambu yavulu yakexile mubhanga Mon’ê kyoso kyexile mu ixi. (Luka 5:16) Mwene wevu Jezú kyoso mwene kyasambe yalungu ni maka adikota, kala o kusola o 12 kya jipoxolo. (Luka 6:12, 13) Jihova wevu we o misambu ya Jezú kyoso kyathandanganyele kyavulu. Ande dyakumusumbisa kwala Juda, Jezú wasambe kwa Tat’ê yalungu ni ima yeji bhita ni mwene. Jihova kevu ngó o misambu ya Jezú maji mwene watumikisa we  anju phala kuswinisa Mon’ê wakazola.—Luka 22:41-44.

7. Kyebhi kitwatokala kudivwa mukwijiya kwila Jihova wivwa o misambu yetu?

⁷ Lelu, Jihova usuluka mukwivwa o misambu ya jiselevende jê, ni ku atambwijila mukithangana ni mu ukexilu watokala. (Jisá. 116:1, 2) Tala o phange yamuhatu watungu ku ixi ya Índia kyamono kyebhi Jihova kyatambwijila o misambu yê. Mwene wakexile mu dibhana ni hele yavulu, yu wasambe ni kidi kyoso yalungu ni maka exile mudibhana nawu. Mwene wasoneka: O “JW Broadcasting^® ya mbeji ya Kasambwadi ka 2019, o milongi yazwelele se ihi itutena kubhanga kyoso kituthandanganya ni kukala ni hele. Yene yabhixila mukithangana kyatokala phala eme. Yiyi yexile o itambwijilu yamisambu yami.”

8. Jihova walondekesa kwila wazolo Jezú mu maukexilu ebhi?

⁸ Jihova watuzolo, utulanga kala kyazolo ni kulanga Jezú kyoso kyadibhana ni ibhidi mu ixi. (Nzwá 5:20) Mwene wakwatekesa Jezú kukolesa o kixikanu kyê, wamuswinisa kyoso mwene kyathandanganyele, wabhana kwa Jezú yoso yabhindamene phala kukala kumwenyu. Jihova watangela kwa Mon’ê kwila wamuzolo, wamuxikina. (Mat. 3:16, 17) Mukonda dya kiki Jezú mu ithangana yoso wadyelele kwila o Tata yê yahenda nuka wandamwehelela.—Nzwá 8:16.

9. Ima yahi ilondekesa kwila Jihova watuzolo?

⁹ Kala Jezú, etwenyoso twene mumona o henda ya Jihova mu maukexilu avulu. Xinganeka ngó: Jihova watwehela kukala tumakamba mê, watubhana jiphange javulu jamala ni ja ahatu atusangulukisa, atuswinisa kyoso kitudibhana ni ibhidi. (Nzwá 6:44) Jihova watubhana we kudya kwavulu muzumbi. Katé mwene utukwatekesa kudikila o ibhindamu yetu yakizuwa ni kizuwa. (Mat. 6:31, 32) Kyoso kituxinganeka o henda yatukwatela Jihova, o henda yetu kwa mwene idibandekesa.

10. Ihi itutena kudilonga mu ukexilu wa Jihova wakutalatala o jiphange jetu?

¹⁰ Jihova wazolo o jiphange jetu joso. Maji sayi ithangana nange kitubhonza kuzola ni kulondekesa o henda kujiphange jetu munzumbi. Sayi ithangana kiki kitubhonza mukonda o ijila yetu ki idifu, atusasela mu ukexilu wengi. Etwenyoso twene mutondala, o kiki kitena kuthathamesa akwetu mba kwaluwalesa. Nékiki etwenyoso tutena kubhanga yoso itutena phala kukolesa o henda yetu kumwiji wetu muzumbi. Kyebhi kitutena kubhanga kiki? Tutena kubhanga kiki mukulondekesa o henda yetu ku jiphange mukukayela o phangu ya Tata yetu. (Efe. 5:1, 2; 1 Nzw. 4:19) Tutale ihi itutena kudilonga mu phangu ya Jihova.

11. Kyebhi Jezú kyakayela o phangu ya “jihenda” ya Jihova?

¹¹ Jihova mukwa “jihenda.” (Luka 1:78) O muthu ulondekesa henda uluwala kyoso kyamona akwa amutala hadi; mwene usota kubhana kima phala ku akwatekesa ni kwaximbakatesa. Mu ukexilu watalatala o athu Jezú wakayela o phangu ya Jihova yakulondekesa o henda. (Nzwá 5:19) Sayi kithangana kyoso Jezú kyamono o mundu, “u a kwatela henda, mukonda atate, a di mwange kala jimbudi ja kambe mubidi.” (Mat. 9:36) O henda ya Jezú kiyakexile ngó kumuxima. Mwene wasake o jihaxi, waswinisa yó ‘a bhwila, a tate.’—Mat. 11:28-30; 14:14.

12. Bhana phangu ilondekesa se kyebhi kitutena kulondekesa o henda.

¹² Se tuxinganeka mumaka amudibhana nawu o jiphange jetu twandatena kwa alondekesa  henda. Mukifika, phange yamuhatu nange wamudibhana ni uhaxi wabhonzo. Mwene nuka wazwelele yalungu ni maka mê maji nange mwene wandasanguluka kyavulu se kumoneka muthu umukwatekesa. Kyebhi mwene kyene mulanga o ibhindamu yamwiji wê? O kwila mwene wandasanguluka se tumulambela kama mba kuxixila o inzo yê? Phange yadiyala atena kumukatula kusalu. O kwila utena kumubhana kakitadi sé kumutangela, phala kumukwatekesa katé mwene kyasanga o salu yengi?

13-14. Kyebhi kitutena kukala ni ukexilu wakubhana kala Jihova?

¹³ Jihova mukwa kubhana. (Mat. 5:45) Etu kitutokala kukingila katé mwene o phange yetu kyeza mutubhinga kikwatekesu kyene ngó kitumulondekesa o henda. Kala Jihova etu tutena kubhanga kima ande dyamwene kutubhinga. Jihova ubhangesa o mwanya kumwikina ku athu oso se mwene kumubhinga! Atu oso akatula mbote kumwanya, katé mwene ni yó kalondekesa o kisakidilu kyá. Ki uxikina kwila Jihova mukutubhana o ima itwabhindamena, ulondekesa o henda yê kokwetu? Etu twazolo kyavulu Jihova mukonda mwene muthu wambote mukwa kubhana!

¹⁴ Mukukayela o phangu ya Tata yâ yadyulu, jiphange javulu ala ni ukexilu wakukwatekesa akwa. Mukifika, ku 2013, o kithembu kyadikota kyabulu jinzo javulu ku ixi ya Filipina. Jiphange javulu o jinzo jâ ni ima yâ yadiboto. Maji jiphange jâ kumundu woso ja akwatekesa ni lusolo lwoso. Avulu abhana o kitadi kyâ mba akwatekesa mukuyudika o jinzo jabudika mba kutunga 750 ajinzo ndenge mutumbeji! Mukithangana kyadibhebhu dya COVID-19, o Jimbangi ja Jihova akalakala kyavulu phala kukwatekesa o jiphange jâ. Kyoso kitukwatekesa ni lusolo lwoso o mwiji wetu munzumbi, twamu alondekesa o henda yetu.

15-16. Kala kilondekesa Luka 6:36, webhi o ukexilu wakatunda ututena kukayela o phangu ya Tata yetu yadyulu?

¹⁵ Jihova mukwa kulendukila mukwa kuloloka. (Tanga Luka 6:36.) Izuwa yoso o Tata yetu yadyulu wene mutuloloka. (Jisá. 103:10-14) O akayedi a Jezú exile akwa ituxi; né kiki wa alendukila, wa aloloka. Katé mwene wexile  polondo phala kubhana o mwenyu wê phala o ituxi yetu atene ku iloloka. (1 Nzw. 2:1, 2) Eye ki uzukama dingi kwa Jihova ni Jezú mukonda dya kutulendukila ni kutuloloka?

¹⁶ O henda o itwalanayu mudyetu itubhangesa ‘kuloloka akwetu.’ (Efe. 4:32) Mukidi o kuloloka akwetu sayi ithangana kibhonza, twatokala kubhanga nguzu phala kubhanga kiki. Sayi phange yamuhatu wadivu kwila o milongi ni dyambu “Di Lolokienu Mudienu,” yamoneka mu Mulangidi, yamukwatekesa kubhanga kiki. * Mwene wasoneka: “O milongi yiyi yangikwatekesa kumona kyebhi o kuloloka akwetu kutena kungikwatekesa. Yene yalombolola kwila o kukala polondo phala kuloloka akwetu kikulombolola kuma eye uxikina o kifwa kyê kyayibha mba o kima kyabhange kikitondalu kyadikota. Maji o kuloloka kulombolola kujimba o kima kyakubhange, sé kubhaka phonzo ni kusota o kutululuka kwé.” Kyoso kituloloka o jiphange jetu twamulondekesa kwila twa azolo, twamukayela o phangu ya Tata yetu, Jihova.

17. Kala kilondekesa Matesu 5:16, kyebhi kitutena kubhana kijingu kwa Tata yetu yadyulu?

¹⁷ Twatokala kusakidila mukukala ni mwiji wajiphange kumundu woso wadizolo mudya. Etu twamesena kukwatekesa o athu utwatena phala kudibunda netu mu ubhezelu wetu kwa Nzambi. Ni kibanzelu kiki, etu twatokola kudilanga phala kitubhange kima kiluwalesa o mundu wa Jihova mba o Tata yetu yadyulu. Mu ithangana yoso twamesena kusota o athu amesena kudilonga ni kusidivila Jihova.—Tanga Matesu 5:16.

18. Ihi itena kutukwatekesa kuboka se woma?

¹⁸ Sayi ithangana, sayi yá atena kutuzwela kyayibha mba kutuzukutisa mukonda dya kubelesela Tata yetu yadyulu. Ihi itutena kubhanga se tukala ni woma? Tutena kudyelela ni kidi kyoso kwila, Jihova ni Mon’ê andatukwatekesa. Jezú wambe ku maxibulu mê kwila, katokalele kuthandanganya ni kyebhi kyejizwela ni ihi yejizwela. Mukonda dyahi? Jezú wajimbulula: “Bhu kumbi dyenyódyo, Nzambi  kyene kya kà mi bhana kyoso ki mu zwela. Mbata ki enu dingi mu zwela, maji o nzumbi ya Tat’enu, [yene i] zwelela moxi dyenu.”—Mat. 10:19, 20.

19. Bhana phangu yamuthu waboko ni kuswina koso.

¹⁹ Tala o phangu ya Robert. Mivu kudima kyoso mwene kyakexile dixibulu dya Bibidya kexile hanji ni kwijiya kwavulu kwa Bibidya, amwambata mu inzo yakufundisa mu ixi ya Africa do Sul, phala kujimbulula kumufundixi se mukonda dyahi kaxikina kuya mu usoladi. Ni nguzu yoso, mwene wajimbulula mu inzo yakufundisa kwila mwene kamesenene kudita mumaka ajinguvulu mukonda dya kuzola o jiphange jê. Mwene wabhana valolo kumwiji we munzumbi! Mukithangana kyenyokyo o mufundixi wamwibhwidisa: “Ananyi o jiphange jê?” Robert kejidile se kyebhi kyejitambwijila, maji mukithangana kyenyokyo walembalala velusu ya Bibidya. O divulu dya Matesu 12:50, dyambe: “Woso u bhanga o vondadi ya Tata yami wene mu dyulu, mwène phange yami ya diyala, mwène phange yami ya muhatu, mwène mam’etu.” Sumbala Robert wexile ngó dixibulu dya Bibidya, maji Jihova wamubhana o nzumbi ikôla yamukwatekesa kutambwijila o kibhwidisu kya mubhange ni ibhwidisu yamukwa ka ifikile yamubhange. Se phata Robert wasangulukisa kyavulu o muxima wa Jihova! Jihova usanguluka we netu kyoso kitumudyelela kyoso kitubhana umbangi ni kuswina kwoso mu ithangana yabhonzo.

20. Ihi itwatokala kusuluka o kubhanga? (Nzwá 17:11, 15)

²⁰ Twatokala kusuluka kubhana valolo mudibesá ditwalanadyu dyakubhanga mbandu ya mwiji mu nzumbi wadizolo. Etu twala ni Jihova, o Tata yabeta kota, twala we ni jiphange jatuzolo. Ithangana yoso twatokala kusakidila mu ima yiyi itwala nayu. Satanaji ni akayedyê aphulu, andabhanga yoso phala kutukwatesa jiphata ja henda ya Tata yetu ni kuzanga o ukamba wetu ni jiphange. Jezú wasambe phala o mbote yetu, wabhingi kwa Tata yetu yadyulu phala kutulangidila, ni kwila phala o ukamba wetu mudyetu unangenena. (Tanga Nzwá 17:11, 15.) Jihova wene mutambwijila mwene o musambu yú. Kala Jezú, tubhangyenu yoso phala kitukale ni phata yakwila Tata yetu yadyulu watuzolo, wandatukwatekesa. Tubhangyenu yoso phala kuzukama dingi kumwiji wetu mu nzumbi.