1. Мәрьвед амьн дькарьн чьԛас незики Йаһоԝа бьн?

ИСА МӘСИҺ, демәк «Ньхӧрийе Хԝәде», у бь милйона мәләк пʹара малбәта Йаһоԝа нә (Колоси 1:15; Зәбур 103:20). Чахе Иса сәр әʹрде бу, әԝи гот ԝәки мәрьвед амьн дькарьн Йаһоԝа ча Баве хԝә һʹәсаб кьн. Гава әԝи шагьртед хԝәрʹа бәʹса Йаһоԝа кьр, әԝи гот кӧ әз дьчьм щәм «Баве хԝә у щәм Баве ԝә» (Йуһʹәнна 20:17). Чахе әм әʹмьре хԝә тʹәсмили Йаһоԝа дькьн у тенә ньхӧмандьне, әм дьбьн пʹара малбәтәкә бь һʹьзкьрьне тʹьжә (Марԛос 10:29, 30).

2. Ве готареда, әме дәрһәԛа чь пебьһʹәсьн?

² Һьнәкарʹа чәтьн ә кӧ Йаһоԝа ча Бавәки дьлован һʹәсаб бькьн. Һьнәк жи ньзаньн кӧ һʹьзкьрьна хԝә хушк-бьрарʹа ча нишан бькьн. Ве готареда, әме пебьһʹәсьн кӧ Иса чаԝа али мә дькә ԝәки Йаһоԝа ча Баве хԝәйи һʹьзкьри һʹәсаб кьн у әм чаԝа дькарьн дьһа незики ԝи бьн. Ӧса жи, әме пебьһʹәсьн кӧ Йаһоԝа дьхԝазә әм һьндава хушк-бьрада ча бьн.

3. Дӧайе кӧ Иса һин кьр, мә ча дьһа незики Йаһоԝа дькә?

³ Йаһоԝа хԝәйиһʹӧкӧме мәзьн ә, ле әԝ йәки сәрт у дьлсар нинә. Иса дьхԝазә ԝәки әм жи Йаһоԝа ча Бавәки дьлгәрм у дьлован һʹәсаб кьн. Әв йәк жь мәсәла дӧайе ԝи әшкәрә йә, йа кӧ Иса шагьртед хԝә һин кьрьбу. Иса дӧа бь ван гьлийа дәстпекьр: «Баве мәйи әʹзмана» (Мәтта 6:9). Иса дькарьбу мәрʹа бьгота, ԝәки әм Йаһоԝа ча «Йе Һәри-Зор», ча «Әʹфьрандар» йан ча «Пʹадшайе  һʹәта-һʹәтайе» нав бькьн, чьмки әв сәрнавед Хԝәде рʹасти жи һежайи ԝи нә у Кʹьтеба Пирозда жи ньвисар ьн (Дәстпебун 49:25; Ишайа 40:28; 1 Тимотʹейо 1:17). Ле дәԝсе Иса гот ԝәки әм Йаһоԝарʹа бежьн «Баво».

4. Әм жь кʹӧ заньн кӧ Йаһоԝа дьхԝазә ԝәки әм незики ԝи бьн?

⁴ Һьнәкарʹа чәтьн ә Йаһоԝа ча Бавәки һʹьзкьри һʹәсаб кьн, чьмки бавед ԝан мәрьвед сәрт бун. Ле чьԛас баш ә кӧ Йаһоԝа һәстед мә фәʹм дькә. Әԝ дьхԝазә незики мә бә. Ләма жи Кʹьтеба Пироз ӧса дьбежә: «Незики Хԝәде бьбьн, әԝ жи ԝе незики ԝә бьбә» (Аԛуб 4:8, ИМ). Бәле, Йаһоԝа мә һʹьз дькә, у әԝ дьхԝазә мәрʹа бьбә Бавәки баш.

5. Ль гора Луԛа 10:22, Иса ча дькарә али мә бькә ԝәки әм дьһа незики Йаһоԝа бьн?

⁵ Иса дькарә али мә бькә ԝәки әм дьһа незики Йаһоԝа бьн. Иса гәләк рʹьнд Йаһоԝа нас дькә у һʹәму һʹӧнӧред ԝи бь тʹәмами әʹйан дькә. Ләма, әԝи гот: «Йе кӧ әз дитьмә, Бав дитийә» (Йуһʹәнна 14:9). Мина бьраки мәзьн, Иса мә һин дькә ча әм гәрәке ԛәдре Баве хԝә бьгьрьн, гӧһ бьдьнә ԝи у дьле ԝи ша кьн. Ӧса жи әԝи нишани мә кьрийә, кӧ Йаһоԝа чьԛас һʹәйф у бь һʹьзкьрьн ә (Луԛа 10:22 бьхунә). Ԝәрә әм чәнд мәсәла бьньһерʹьн.

6. Йаһоԝа чаԝа гӧһ дьда дӧайед Иса?

⁶ Йаһоԝа гӧһ дьдә зарʹед хԝә. Һәла дина хԝә бьде кӧ Йаһоԝа чаԝа гӧһ дьда Кӧрʹе хԝә Иса. Гава Иса сәр әʹрде бу, әԝи гәләк щара дӧа дькьр, у Йаһоԝа гӧһ дьда дӧайед ԝи (Луԛа 5:16). Гава Иса дәрһәԛа сафикьрьнед фәрз дӧа дькьр, мәсәлә дәрһәԛа бьжартьна 12 шандийа, Хԝәде гӧһ дьда ԝи (Луԛа 6:12, 13). Ӧса жи, гава Иса Йаһоԝарʹа бәʹса хәмед хԝә дькьр, Йаһоԝа гӧһ дьда ԝи. Пешийа кӧ Иса һатә гьртьне, әԝи дәрһәԛа чәтьнайед кӧ ԝе бьһатана сәре ԝи, дӧа кьр. Йаһоԝа һьм гӧһ да ве дӧайе һьм жи мәләкәк шанд, ԝәки әԝ дьле Кӧрʹе ԝийи дәлал ԛәԝи бькә (Луԛа 22:41-44).

7. Әв йәк кӧ Йаһоԝа гӧһ дьдә дӧайед мә, ча сәр мә һʹӧкӧм дькә?

 ⁷ Иро жи Йаһоԝа гӧһ дьдә дӧайед хьзмәткʹаред хԝә, у ԝәхта рʹастда бь щурʹе һәри баш щаба ԝан дьдә (Зәбур 116:1, 2). Сәрһатийа хушкәкә жь Һьндьстане ве йәке зәлал нишан дькә. Әԝ гәләк дьлтәнг дьбу у емосийалида хԝә хьраб тʹәхмин дькьр, ләма әԝе дәрһәԛа ве проблеме Йаһоԝарʹа дӧа кьр. Әԝ дьбежә: «Бәрнама JW Бродкастинг йа мәһа Гӧлане, сала 2019, ԝәʹдәда бу у һәма бона мьн бу. Әз һин бум кӧ гәрәке чь бькьм гава хәмгин у дьлтәнг ьм. Бь рʹасти жи әв бәрнамә щаба дӧайед мьн бу!»

8. Йаһоԝа чаԝа һʹьзкьрьна хԝә һьндава Иса нишан дькьр?

⁸ Гава Иса сәр әʹрде бу, Йаһоԝа һʹьзкьрьна хԝә жерʹа әʹйан дькьр у бона ԝи хәм дькьр, у әԝ мә жи һʹьз дькә у бона мә хәм дькә (Йуһʹәнна 5:20). Йаһоԝа бона һʹәԝщед Исайә рʹӧһʹани, емосийали у физики хәм дькьр. Ӧса жи, Йаһоԝа рʹастә-рʹаст әʹйан кьр кӧ әԝ Кӧрʹе хԝә һʹьз дькә у жь ԝи рʹази йә (Мәтта 3:16, 17). Иса заньбу ԝәки Баве ԝи кʹеләка ԝи йә, ләма жи әԝи хԝә тʹӧ щар тʹәне тʹәхмин нәдькьр (Йуһʹәнна 8:16).

9. Әм жь кʹӧ заньн ԝәки Йаһоԝа мә һʹьз дькә?

⁹ Мина Иса, мә жи һʹьзкьрьна Йаһоԝа гәләк щар тʹәхмин кьрийә, ӧса нинә? Һәла бьфькьрә: Йаһоԝа әм кʹьшандьнә бал хԝә, у әԝи әм кьрьн пʹара малбәтәкә дьлгәрм, ԝәки әм бәхтәԝар бьн у бькарьбьн рʹожед чәтьнда аликʹарийе бьстиньн (Йуһʹәнна 6:44). Ӧса жи, Йаһоԝа тʹер-тʹьжә хԝарьна рʹӧһʹани дьдә мә. Сәрда жи, әԝ али мә дькә ԝәки әм бькарьбьн әʹбура хԝә бькьн (Мәтта 6:31, 32). Гава әм дьфькьрьн кӧ Йаһоԝа чьԛас мә һʹьз дькә, һʹьзкьрьна мә жи һьндава ԝи дьһа ԛәԝи дьбә.

10. Сәва кӧ һʹьзкьрьн нав малбәта мәйә рʹӧһʹанида дьһа ԛәԝи бә, гәрәке әм чь бькьн?

¹⁰ Йаһоԝа хушк-бьред мә һʹьз дькә. Ле мәрʹа щара дькарә чәтьн бә ԝәки һʹьзкьрьна хԝә һәвдӧрʹа әʹйан кьн. Чьрʹа? Чьмки әм жь щурʹә-щурʹә култура нә, мина һәв нәһатьнә мәзьнкьрьне у хәйсәтед мә жи жь һәв щӧдә дьбьн. Хенщи ве йәке, щар-щара әм шашийед ӧса дькьн кӧ дьле хушк-бьра дьешиньн йан жи ԝана әʹщьз дькьн. Ле диса жи әм дькарьн һʹьзкьрьна нав малбәта хԝәйә рʹӧһʹанида дьһа ԛәԝи кьн. Гәло чаԝа? Гәрәке әм һʹьзкьрьнеда чʹәʹв бьдьнә Баве хԝәйи әʹзмана (Әфәси 5:1, 2; 1 Йуһʹәнна 4:19). Ньһа шеԝьр кьн дәрһәԛа һьнә һʹӧнӧред Йаһоԝа у бьфькьрьн ча әм дькарьн чʹәʹв бьдьнә ԝи.

11. Иса чаԝа чʹәʹв дьда дьлшәԝатийа Йаһоԝа?

¹¹ Йаһоԝа йәки дьлшәԝат ә (Луԛа 1:78). Гава мәрьве рʹәʹм у дьлшәԝат дьвинә ԝәки кәсед дьн еше дькʹьшиньн, әԝ дьхԝазә али ԝан бькә у дьле ԝан рʹьһʹәт кә. Иса бь хәбәрдан у кьред хԝә нишан дькьр, кӧ Йаһоԝа ча бона мәрьва хәм дькә (Йуһʹәнна 5:19). Щарәке, гава Иса әʹлаләт дит, «гӧне ԝи ль ԝан һат, чьмки әԝана мина пәзе бе шьван, бәрʹәдайи у бәлабуйи бун» (Мәтта 9:36). Ләма, әԝ һазьр бу али ԝан бькә. Мәсәлә, әԝи кәсед нәхԝәш ԛәнщ дькьрьн у рʹьһʹәти дьда йед «ԝәстийайи у баргьран» (Мәтта 11:28-30; 14:14).

12. Әм ча дькарьн дьлшәԝатийе нишан кьн? Мәсәла биньн.

¹² Сәва кӧ әм бькарьбьн һьндава хушк-бьрада дьлшәԝат бьн, гәрәке әм бьзаньбьн дәрдед ԝан чь нә. Бәʹса хәбәре, хушкәк гәләк нәхԝәш ә. Әԝ тʹӧ щара гьли у газьнед хԝә накә, ле әԝ бешьк  һʹәԝще аликʹарийа мә йә. Гәло әԝ ча шьхӧлед мале тʹәне дькә? Гәло бона һазьркьрьна хԝарьне йан бона паԛьжкьрьна мале жерʹа аликʹари лазьм ә? Йан жи, бәʹса хәбәре бьраки хәбата хԝә ӧнда кьрийә. Гәло әм дькарьн һьнә пʹәрә пʹешкʹеши ԝи кьн – дьбәкә ӧса ԝәки әԝ пенәһʹәсә жи әв пʹәрә жь кʹе йә, сәва кӧ әԝ бькарьбә әʹбура хԝә бькә һʹәта кӧ хәбате хԝәрʹа бьвинә?

13-14. Әм ча дькарьн мина Йаһоԝа дәствәкьри бьн?

¹³ Йаһоԝа йәки дәствәкьри йә (Мәтта 5:45). Дәԝса кӧ әм һивийе бьн һʹәта кәсәк жь мә аликʹарийе бьхԝазә, ԝе баш бә әм гава пешьн бавежьн кӧ аликʹарийе бьдьн. Ԝәрә әм чʹәʹв бьдьнә Йаһоԝа, йе кӧ һәр рʹож тәʹве сәр мә дәрдьхә у һивийе нинә һʹәта әм әве йәке жь ԝи бьхԝазьн. Сәрда жи, жь гәрмайа тәʹве нә тʹәне кәсед шекьрдар, ле һәр кәс кʹаре дьстинә. Әв йәк кӧ Йаһоԝа бона һʹәԝщед мә хәм дькә, һʹьзкьрьна ԝи нишан дькә. Әм гәләк ша нә кӧ Йаһоԝа һаԛас ԛәнщ у дәствәкьри йә!

¹⁴ Гәләк хушк-бьред мә мина Баве мәйи әʹзмана дәствәкьри нә. Мәсәлә, сала 2013-да, фьртонәкә мәзьн рʹабу у зьрарәкә мәзьн да Филипине. Гәләк хушк-бьред мә һәр тьшт ӧнда кьрьн, ле чьԛас баш ә кӧ хушк-бьред жь ԝәлатед дьн бь ԛӧрбанкьрьнед хԝә али ԝан кьрьн. Ӧса жи, ԝана нава саләкеда ԝәкә 750 мал чекьрьн йан жь тʹәзәда ава кьрьн! Ԝәʹде пандәмийа COVID-19 жи, Шәʹдед Йаһоԝа бь дьл у щан пьштгьрийа хушк-бьред хԝә кьрьн. Бәле, гава әм зу дьчьн һәԝара хушк-бьра, әм нишан дькьн ԝәки әм ԝана һʹьз дькьн.

15-16. Ль гора Луԛа 6:36, кʹижан тьштед фәрзда әм гәрәке чʹәʹв бьдьнә Баве хԝәйи әʹзмана?

¹⁵ Йаһоԝа йәки дьлрʹәʹм ә у һазьр ә бьбахшинә (Луԛа 6:36 бьхунә). Әм рʹәʹма Баве хԝәйи әʹзмана һәр рʹож дьвиньн (Зәбур 103:10-14). Мәрьвед кӧ пәй Иса Мәсиһ дьчун, гӧнәкʹар бун, диса жи әԝи бь дьлрʹәʹми дьбахшандә ԝан. Сәрда жи, Иса бь рʹәзәдьли әʹмьре хԝә ԛӧрбан кьр, ԝәки гӧнед мә бенә  бахшандьне (1 Йуһʹәнна 2:1, 2). Гәло әв дьлрʹәʹмийа Йаһоԝа у Иса дьле мә гәрм накә?

¹⁶ Гава әм һәвдӧ жь дьл дьбахшиньн, һʹьзкьрьна нав мәда дьһа ԛәԝи дьбә (Әфәси 4:32). Һьлбәт щарна нә һеса йә кӧ әм кәсед дьн бьбахшиньн, ләма бь рʹасти жи лазьм ә әм сәр хԝә бьхәбьтьн. Хушкәкә мә дәрһәԛа бахшандьне жь готара «Бьрща Ԛәрәԝьлийе» бь наве «Жь Дьл Һәв Бьбахшиньн», гәләк кʹар станд. * Әԝ дьбежә: «Бь сайа ве готаре, мьн фәʹм кьр, ԝәки бона мьн ԝе чьԛас керһати бә бьбахшиньм мәрьва. Әв готар нишан дькә, ԝәки бахшандьн найе һʹәсабе кӧ әм чʹәʹве хԝә сәр шашийед кәсед дьн дадьдьн, йан зьрара кӧ мә рʹуйе ԝанда стандийә, бьчʹук һʹәсаб дькьн. На, бахшандьн те һʹәсабе ԝәки әм кʹине нажон у дьлрʹьһʹәтийа хԝә ӧнда накьн». Чахе әм жь дьл дьбахшиньн хушк-бьра, әм нишан дькьн кӧ әм ԝана һʹьз дькьн у чʹәʹв дьдьнә Баве хԝә Йаһоԝа.

17. Ль гора Мәтта 5:16, әм чаԝа дькарьн пәсне Баве хԝәйи әʹзмана бьдьн?

¹⁷ Әва ԛәдьрәки мәзьн ә кӧ әм пʹара малбәта һʹәмдьнйайе нә, кʹидәре гьшк һәвдӧ һʹьз дькьн. Әм дьхԝазьн ԝәки кәсед дьн жи тʹәви мә Йаһоԝа бьһʹәбиньн. Ләма жи гәрәке әм һаш жь хԝә һәбьн, ԝәки бь рʹабун-рʹуньштьна хԝә ләкʹә нәйньн сәр наве Йаһоԝа у тʹәшкиләта ԝи. Әм дьхԝазьн кӧ мәрьв бь сайа кьред мәйә ԛәнщ, бьхԝазьн Йаһоԝа нас кьн у ԝирʹа хьзмәт кьн (Мәтта 5:16 бьхунә).

18. Чь дькарә али мә бькә ԝәки әм бетьрс шәʹдәтийе бьдьн?

¹⁸ Һьнә кәс ԛәрфед хԝә мә дькьн йан мә дьзериньн, чьмки әм гӧһ дьдьн Баве хԝәйи әʹзмана. Диса жи, әм гәрәке нәтьрсьн кӧ мәрьварʹа бәʹса баԝәрийа хԝә бькьн, чьмки Йаһоԝа у Иса ԝе али мә бькьн. Иса шагьртед хԝәрʹа ӧса гот: «Тьштед кӧ һуне хәбәр дьн, ԝе дәме ԝәрʹа ԝе бе дайине». Гәло чьрʹа?  Иса ӧса шьровәкьр: «Чьмки нә кӧ һуне хәбәр дьн, ле рʹӧһʹе Баве ԝәйи кӧ нава ԝәда йә ԝе хәбәр дә» (Мәтта 10:19, 20).

19. Роберт чаԝа бь мерхаси бәʹса рʹастийе кьр?

¹⁹ Дина хԝә бьдьн сәрһатийа бьре мә Роберт, йе кӧ Африкайа Башуреда дьжи. Гава әԝи тʹәзә дәстпекьр Кʹьтеба Пироз һин бә у занәбуна ԝи һьндьк бу, лазьм бу ԝәки әԝ һʹакьмәкирʹа шьровәкә кӧ әԝ чьрʹа нахԝазә һәрʹә әскәрийе. Әԝи бь мерхаси ԝирʹа гот ԝәки әԝ хушк-бьра һʹьз дькә у ләма жи дьхԝазә тʹәвнәбуйине хԝәй кә. Әшкәрә йә кӧ әԝи малбәта хԝәйә рʹӧһʹани ԛимәт дькьр! Һьнге һʹакьм ӧса пьрси: «Хушк у бьред тә кʹе нә?» Роберт һивийа пьрсәкә ӧса нибу, ле рʹеза ԝе рʹоже – демәк Мәтта 12:50 – һатә бира ԝи: «Кʹи кӧ хԝәстьна Баве мьни әʹзмана бинә сери, әԝ ә бьре мьн, хушка мьн у дийа мьн». Рʹаст ә Роберт хԝәндәкʹарәки тʹәзә бу, ле рʹӧһʹе Йаһоԝа али ԝи дькьр кӧ әԝ бькарьбә щаба ве пьрсе у чәнд пьрсед дьн бьдә. Йаһоԝа бешьк Робертрʹа фьрнаԛ дьбу! Бәле, гава әм итʹбарийа хԝә Йаһоԝа тиньн у һʹале чәтьнда жи бь мерхаси бәʹса рʹастийе дькьн, әԝ мәрʹа фьрнаԛ дьбә.

20. Гәрәке әм тʹьме чь бькьн? (Йуһʹәнна 17:11, 15)

²⁰ Әм гәләк дьшекьриньн кӧ әм пʹара  малбәта Йаһоԝа нә. Баве мә, Баве һәри баш ә, у хушк-бьред мә жи мә гәләк һʹьз дькьн. Гәрәке әм бона ве йәке тʹьме рʹази бьн. Мире-щьна у пьштгьред ԝи дьхԝазьн шьк бькьнә дьле мә у мә бьдьнә баԝәркьрьне ԝәки Йаһоԝа мә һʹьз накә, у әԝана һәр тьшти дькьн ԝәки йәктийа мә хьраб бькьн. Ләма жи Иса жь Йаһоԝа рʹәща кьр ԝәки Әԝ мьԛати йәктийа малбәта мә бә (Йуһʹәнна 17:11, 15 бьхунә). Баве мә бь рʹасти жи ль гора ве дӧайе али мә дькә. Мина Иса, ԝәрә әм жи тʹӧ щара нәкʹәвьнә шьке кӧ Баве мәйи әʹзмана мә һʹьз дькә у пьштгьрийа мә дькә. Ԝәрә әм тʹьме һәр тьшти бькьн кӧ дьһа незики малбәта хԝәйә рʹӧһʹани бьн!