1. Bantu ba kishinka bakonsha kwikala na bulunda bwa mutundu ka ne Yehoba?

MU KISEMI kya bapopweshi ba Yehoba muji Yesu, “mubeji wa bilengwa byonse,” ne biumbi bya bamalaika. (Kolo. 1:15; Sala. 103:20) Yesu byo ajinga pano pa ntanda, wakwashishe bantu ba kishinka kuyuka’mba bakonsha kutela Yehoba amba Shabo. Byo aambilenga ku baana banji ba bwanga, Yesu watelele Yehoba amba: “Batata kabiji Bashenu.” (Yoa. 20:17) Kabiji inge twipana kwi Yehoba ne kubatizhiwa, twikala mu kisemi kya balongo ne banyenga baji na butemwe.—Mako 10:29, 30.

2. Tusakufunda pa ka mu uno mutwe?

² Bantu bamo kibakatazha kuswa amba Yehoba ke Shabo wa butemwe. Bakwabo kechi bayuka bya kumwesha balongo ne banyenga butemwe ne. Mu uno mutwe, tusakufunda pe Yesu byo etukwasha kuyuka’mba Yehoba ke Shetu wa butemwe, kabiji mulunda netu wa pa muchima. Kabiji tusakufunda byo twakonsha kulondela Yehoba mu kumwesha balongo ne banyenga yetu butemwe.

3. Lulombelo lwa kulondela lwa kwa Yesu lwitulengela byepi kufwenya kwipi ne Yehoba?

³ Yehoba ke Shetu wa butemwe. Yesu ukeba’mba tumonenga Yehoba byonka byo amumona’mba nsemi wa lusa kabiji wa butemwe ye twakonsha kwisamba nanji. Kechi kumumona nobe muntu washinta witubuulatu byo twafwainwa kuba ne. Kino kimwekela mu kintu Yesu kyo afunjishe baana banji ba bwanga kulombapo. Watendekele na byambo bya kuba’mba: “Tata wetu.” (Mat. 6:9) Yesu wakonsheshe kwitubuula kutela Yehoba amba “wa Bulume Bonse,” “Mulenga,” nangwa amba “Mfumu wa myaka.” Kuba bino inge kechi kwatama ne, mambo Binembelo byaingijisha  bino byambo kulumbulula biji Yehoba. (Nte. 49:25; Isa. 40:28; 1 Timo. 1:17) Pano bino, Yesu witufunjishe kutela Yehoba amba “Tata.”

4. Twayuka byepi amba Yehoba ukeba atweba kufwenya kwipi ne aye?

⁴ Nanchi kimukatazha kumona Yehoba amba Shenu wa butemwe nyi? Atweba bamo byo byo tulanguluka. Umvwe kya kuba bashetu kechi bajinga na kifyele ne, kyakonsha kwitukatazha kuswa amba Yehoba ke Shetu witutemwa. Bino kitutekenesha bingi kuyuka’mba Yehoba wayuka bulongo byo tumvwa ku muchima ne kilengela kumvwa byobyo. Ukeba kufwenya kwipi ne atweba. O ene mambo Baibolo o etutundaikila’mba: “Fwenyai kwipi ne Lesa, ne aye ukafwenya kwipi ne anweba.” (Yako. 4:8) Yehoba witutemwa bingi, kabiji waamba’mba ukekala Shetu wawama.

5. Kwesakana na byaamba Luka 10:22, Yesu wakonsha kwitukwasha byepi kufwenya kwipi ne Yehoba?

⁵ Yesu wakonsha kwitukwasha kufwenya kwipi ne Yehoba. Yesu wamuyuka bulongo Yehoba kabiji umweshatu suka byubilo byanji. O ene mambo o aambijile’mba: “Awa wammona, wamona ne Batata.” (Yoa. 14:9) Nobe kolojetu wamulume, Yesu witufunjisha byo twafwainwa kunemeka ne kukookela Shetu, kuba bintu bimutokesha ku muchima, ne bya kuba pa kuba’mba tumutokeshe ku muchima. Bino Yesu witukwasha kikatakata kuyuka kuba’mba Yehoba uji bingi na lusa ne butemwe. (Tangai Luka 10:22.) Twayai twisambeko pa mashinda amo mo amweshesha bino byubilo.

6. Lumbululai byaubilenga Yehoba kimye Yesu kyo alombelenga.

⁶Yehoba uteleka ku baana banji inge babena kulomba. Langulukai Yehoba byo atelekele ku Mwananji mubeji kimye kyo alombelenga. Yehoba watelekele ku milombelo yavula yalombanga Mwananji kimye kyo ajinga pano pa ntanda. (Luka 5:16) Watelekele Yesu byo alombelenga pa kufuukulapo bintu bikatampe, nabiji kimye kyo asajilenga batumwa banji 12. (Luka 6:12, 13) Kabiji Yehoba watelekele Yesu byo alombelenga kimye kyo ajinga bingi na bijikila. Byo kwashajiletu pacheche kumusolola, Yesu walombele kwi Shanji pa lweseko  lukatampe lwajinga pepi kumufikila. Yehoba kechi waumvwinetu byalombele Yesu ne, bino watumine ne malaika kwiya na kumukosesha.—Luka 22:41-44.

7. Mumvwa byepi pa kuyuka’mba Yehoba umvwa milombelo ya bakalume banji?

⁷ Lelo jino, Yehoba umvwa milombelo ya bakalume banji, kabiji wibakumbula pa kimye kyafwainwa kabiji mu jishinda jawama. (Sala. 116:1, 2) Langulukai pa nyenga wa ku India byo emwenejile kino. Uno nyenga wajinga bingi na bijikila, kabiji walombele kwi Yehoba na muchima yense pa makatazho o apichilengamo. Wanembele’mba: “Mutanchi wa JW Broadcasting^® wa May 2019 waambilenga pa bya kuba na bijikila, waishijile pa kimye kyafwainwa. Uno mutanchi ye wajinga mukumbu wa milombelo yami.”

8. Mu ñanyi mashinda Yehoba mo amwesheshe’mba watemenwe Yesu?

⁸ Yehoba witutemwa ne kwituta muchima byonkatu byo atemenwe Yesu ne kumuta muchima kimye kyo aingijilenga mwingilo wakatezhe pano pa ntanda. (Yoa. 5:20) Wakwashishe Yesu kutwajijila kwikala na lwitabilo lwakosa, kumutundaika kimye kyo ajinga na bijikila ne kumupa byonse byakebewenga mu bwikalo. Kabiji Yehoba wabuujile Mwananji amba wamutemenwe kabiji mo amwenanga lusekelo. (Mat. 3:16, 17) Yesu byo ayukile’mba Shanji wa butemwe ukatwajijila kwikala ne aye ne kumukwasha, kyamulengejile kuchinchika.—Yoa. 8:16.

9. Ñanyi bishinka byo twayuka bitulengela kuswa amba Yehoba witutemwa?

⁹ Byonkatu byo kyajinga kwi Yesu, atweba bavula twimwena Yehoba byo etumwesha butemwe mu bintu byavula. Akilangulukaipotu: Yehoba wituswisha kwikala balunda nanji, kabiji witupa balongo ne banyenga baji na butemwe betukwasha kwikala na lusekelo ne kwitutundaika inge twaikala na bijikila. (Yoa. 6:44) Yehoba witupa kajo ka ku mupashi kavula ketukwasha kwikala na lwitabilo lwakosa. Kabiji witukwasha kwikala na bintu bikebewa mu bwikalo. (Mat. 6:31, 32) Umvwe twalanguluka pe Yehoba byo etutemwa, butemwe bo twamutemwa bubayilako.

10. Twakonsha kufunjilako ka kwi Yehoba byo amwesha butemwe ku balongo ne banyenga?

¹⁰ Yehoba watemwa balongo ne banyenga yetu. Pano bino, kampe atweba kechi kyakonsha kwitupelela kumwesha balongo ne banyenga butemwe ne. Kintu kimo kyakonsha kulengela ke kupusana bisho ne nkomeno. Kabiji atweba bonse tulubankanya ne kufichisha bakwetu ku muchima nangwa kwibalengela kubula kwikala na lusekelo. Nangwa byonkabyo, atweba bonse twakonsha kutundaika butemwe mu kisemi kyetu kya ku mupashi. Twakonsha kuba byepi? Kupichila mu kumwesha balongo ne banyenga butemwe byonka byuba Shetu wa mwiulu. (Efi. 5:1, 2; 1 Yoa. 4:19) Twayai twisambe byo twakonsha kufunjilako kwi Yehoba.

11. Yesu wamwesheshe byepi “kifyele” kya Yehoba?

¹¹Yehoba umwesha “kifyele.” (Luka 1:78) Muntu wa kifyele utako muchima inge wamona bakwabo na kuyanda, kabiji umonapo mashinda a kwibakwashishamo ne kwibatekenesha. Yesu byo atele muchima bantu, wamwesheshenga kifyele kya Yehoba. (Yoa. 5:19) Pa kimye kimo Yesu byo amwene mabumba a bantu, “wiobijile lusa, mambo basubakene ne kupelelwa nobe mikooko yabula kafunga.” (Mat. 9:36) Yesu kechi wapelejiletu pa kwibamwesha lusa ne, bino wibakwashishe. Wabukile bakolelwe ne kutekenesha boba “[bakookele] ne kunemenwa.”—Mat. 11:28-30; 14:14.

12. Twakonsha kumwesha byepi kifyele ku balongo ne banyenga?

¹² Saka tukyangye kumwesha balongo ne banyenga kifyele, patanshi twafwainwa kuyuka makatazho o babena kupitamo. Twambe’mba  nyenga uji na kikola kikatampe. Uno nyenga kechi wijizhanya pa lukatazho lwanji ne, bino wakonsha kusanta bingi inge muntu umo wamukwasha. Nanchi ukonsha kukebela ba mu kisemi kyanji bikebewa mu bwikalo nyi? Abya twakonsha kumukwashako kunengezha kajo nangwa kumuwamishishako mu nzubo nyi? Nangwa kampe mulongo nkito yapwa. Twakonsha kumukwasha kupichila mu kumupapo mali, kampe kwa kubula kumubuula’mba yetu twamupa, pa kuba’mba ekwashishemo pa kimye kyo abena kukeba nkito.

13-14. Twakonsha kwikala byepi bampanyi byonka biji Yehoba?

¹³Yehoba mpanyi. (Mat. 5:45) Kechi twafwainwa kupembelela’mba kana balongo ne bayenga bakalombe bukwasho apa bino tukebakwashe ne. Twakonsha kwitendekelakotu kwibakwasha byonka byuba Yehoba. Aye usamisha juba pe atweba moba onse kwa kubula ne kumulomba. Kabiji bantu bonse bamwenamo, kubikakotu ne boba babula kusanta. Yehoba byo etupa byonse bikebewa, umwesha’mba witutemwa. Twamutemwa bingi Yehoba mambo uji na kifyele kabiji mpanyi.

¹⁴ Balongo ne banyenga balondela Yehoba, kabiji bapapo bakwabo bintu byabo. Mu 2013, ku Philippines kwapichile kinkunkwila kikatampe kyaonawine bintu byavula. Mazubo ne bintu bya balongo ne banyenga byavula byaonaikile. Bino balongo ne banyenga mwaya ntanda bebakwashishe bukiji bukiji. Bavula bapaine mali, bakwabo baingijileko mwingilo wa kuwamisha nangwa kushimukulula mazubo aonaikile afikile ku 750 mwaka saka akyangye kupwa. Kabiji mu kimye kya mwalo wa COVID-19, Bakamonyi baingijile na ngovu kukwasha balongo ne banyenga. Umvwe twapelawizha kukwasha bakwetu bena Kilishitu, tumwesha’mba twibatemwa.

15-16. Kwesakana na byaamba Luka 6:36, mu ñanyi jishinda mo twakonsha kulondela Shetu wa mwiulu?

¹⁵Yehoba witubila lusa ne kwitulekelako mambo. (Tangai Luka 6:36.) Shetu wa mwiulu witulekelako mambo etu pa juba pa juba. (Sala. 103:10-14) Baana ba bwanga ba kwa Yesu bajinga bambulwa kulumbuluka, bino Yesu wibamweshanga lusa ne kwibalekelako mambo. Waswile ne kupana bumi bwanji pa kuba’mba  mambo etu alekelwe. (1 Yoa. 2:1, 2) Yehoba ne Yesu betubila lusa ne kwitulekelako mambo. Kino kitulengela kufwenya kwipi ne abo.

¹⁶ Butemwe bo twatemwa balongo ne banyenga bukosa bingi inge ke ‘twilekeleko mambo’ atweba bene na bene. (Efi. 4:32) Kishinka ke kya kuba’mba bimye bimo kyakonsha kukatazha kulekelako mambo bakwetu, onkao mambo, twafwainwa kwibikako. Nyenga umo wamwene kuba’mba mutwe wajinga mu Kyamba kya Usopa wa kuba’mba “Ilekelaingako Mambo” wamukwashishe bingi. * Wanembele’mba: “Kufunda uno mutwe kwankwashishe kuyuka kulekelako bakwetu mambo byo kwakonsha kunkwasha. Uno mutwe walumbulula’mba, kulekelako bakwetu mambo kechi kulumbulula’mba twaswisha bilubo byabo nangwa kuvulañanyakotu ne. Bino kulekelako bakwetu mambo kulumbulula kubula kwikala na kizhingijisha ne kutwajijila kwikala na mutende.” Umvwe twalekelako mambo balongo ne banyenga, tumwesha’mba twibatemwa kabiji tulondela Shetu aye Yehoba.

17. Kwesakana na byaamba Mateo 5:16, twakonsha kunemeka byepi Shetu wa mwiulu?

¹⁷ Tusanta bingi pa kwikala mu kisemi kya balongo ne banyenga betemwa baji mwaya ntanda yonse. Tubena kukeba bantu bavula kwiya mu kisemi kyetu ne kukwatankena pamo mu kupopwela Lesa. Onkao mambo, twafwainwa kuchinuzhuka kuba bintu byakonsha kulengela bantu kulanguluka byatama pe Yehoba nangwa pa bantu banji. Twibikako kimye kyonse kwikala na byubilo byawama pa kuba’mba tulengele bantu kukeba kufunda mambo awama.—Tangai Mateo 5:16.

18. Ñanyi kintu kyakonsha kwitukwasha kusapwila kwa kubula moyo?

¹⁸ Bimye bimo, bantu bamo bakonsha kwitulengulula nangwa kwitumanyika na mambo a kukookela Shetu wa mwiulu. Twakonsha kuba byepi umvwe tumvwa moyo kubuulako bantu bintu byo twaitabilamo? Twafwainwa kushiinwa kuba’mba Yehoba ne Mwananji baketukwasha. Yesu wabuujile baana banji ba bwanga amba kechi bafwainwe kwakamwa pa bya kwamba  ne. Mambo ka? Yesu waambile’mba: “Bakemubula byo mukamba mu kyokya kimye; mambo akya kikambanga kechi anweba ne, bino mupashi wa Shenu ye ukemukwasha kwamba.”—Mat. 10:19, 20.

19. Shimikizhaipo umo byo achinchikile pa kushimuna bukine.

¹⁹ Langulukai pa byapichilemo ba Robert. Mu myaka ya kunyumakwe ba Robert saka bajitu ba katataka mu bukine, bebechile ku kije kya mambo kya bashilikale kya mu South Africa, kuba’mba balumbulule ene mambo o bakanyijile kutwela bushilikale. Baambile na kuchinchika kuba’mba kutemwa balongo babo bena Kilishitu ko kwalengejile kukana kutwela bushilikale. Banemekele bingi kifulo kyabo mu kisemi kya bantu ba Lesa. Mutonyi wibepwizhe’mba: “Balongo bobe bo bañanyi?” Ba Robert kechi baketekejilenga’mba bakonsha kwibepuzha buno bwipuzho ne, bino bukiji bukiji bavulukile Kinembelo kya pa jo ja juba. Kino kinembelo kyajinga kya Mateo 12:50. Kyaamba’mba: “Mambo yense uba kyaswa muchima wa Batata ba mwiulu, ye nkasami wa mulume, ye nyenga yami kabiji bo bamama.” Nangwa kya kuba ba Robert bajinga ba katataka mu bukine, mupashi wa Yehoba wibakwashishe kukumbula bobwa bwipuzho ne mepuzho akwabo o babujile kuketekela. Yehoba wasangalele bingi pa byaubile ba Robert. Kabiji Yehoba umvwa bulongo inge ne atweba twamuketekela ne kuchinchika pa kushimuna bukine mu kimye kyakatazha.

20. Twafuukulapo kuba byepi? (Yoano 17:11, 15)

²⁰ Mwane twayai tutwajijile kusanta pa kwikala mu kisemi kya balongo ne banyenga betemwa bene na bene. Tuji na Shetu wawama bingi ne balongo ne banyenga betutemwa. Twafwainwa kusantanga bingi pa kino. Satana ne bantu banji betushikwa bakeba’mba tulangulukenga’mba Yehoba kechi witutemwa ne, kabiji bakeba konauna lukwatankano lwetu. Nangwa byonkabyo, Yesu witulombejileko kwi Shanji kuba’mba etuzhikijile ku yewa mubi pa kuba’mba kisemi kyetu kitwajijile kukwatankana. (Tangai Yoano 17:11, 15.) Yehoba ubena kukumbula luno lulombelo. Byonka biji Yesu, twafwainwa kushiinwa kuba’mba Shetu wa mwiulu witutemwa kabiji witukwasha. Onkao mambo, twayai tutwajijile kukosesha bulunda bwetu na balongo ne banyenga mu kisemi kya Yehoba.