တၢ်မၤလိ ၃၈
မၤအါထီၣ် နတၢ်အဲၣ်ယဟိဝၤယွၤဒီး ဒီပုၢ်ဝဲၢ်တဖၣ်တက့ၢ်
“ယကက့ၤထီၣ်လၢ ယပၢ်လၢအမ့ၢ် သုပၢ်အအိၣ်.”—ယိၤဟၣ် ၂၀:၁၇.
တၢ်သးဝံၣ် ၃ ပတၢ်ဂံၢ်တၢ်ဘါ, ပတၢ်မုၢ်လၢ်, ပတၢ်နာ်န့ၢ်အလီၢ်
တၢ်မၤလိအံၤ အတၢ်တိာ်ပာ် *
၁. ပမ့ၢ်အိၣ်ဒီးတၢ်ရ့လိာ်သး ဒီးယဟိဝၤယွၤန့ၣ် ပကိးယဟိဝၤယွၤ ကသ့ဒ်လဲၣ်.
ယဟိဝၤယွၤ အဟံၣ်ဖိဃီဖိတဖၣ်လၢ အဘူၣ်ထီၣ်ဘါထီၣ်အီၤန့ၣ် ပၣ်ဃုာ်ဝဲဒီး ယ့ၣ်ၡူးလၢအမ့ၢ် “တၢ်ဘၣ်တ့ခဲလၢာ် အပှၤဝဲၢ်ကိ” ဒီးမူခိၣ်ကလူးဂီၢ်မုၢ်တဖၣ်လီၤ. (ကလီးစဲ ၁:၁၅; စံးထီၣ်ပတြၢၤ ၁၀၃:၂၀) ဖဲယ့ၣ်ၡူးအိၣ်မူလၢ ဟီၣ်ခိၣ်ချၢအခါ အဝဲမၤစၢၤ ပှၤဟီၣ်ခိၣ်ဖိလၢ အအိၣ်ဒီးတၢ်သးတီတဖၣ် ဒ်သိးကထံၣ်ယဟိဝၤယွၤဒ် အဝဲသ့ၣ်အပၢ်အသိးလီၤ. ဖဲယ့ၣ်ၡူးတဲတၢ်ဒီး အပျဲၢ်အဘီၣ်အခါ အဝဲကိး ယဟိဝၤယွၤလၢ “ယပၢ်လၢအမ့ၢ် သုပၢ်” လီၤ. (ယိၤဟၣ် ၂၀:၁၇) ဒီးဖဲပဟ့ၣ်လုၢ်ထီၣ်ပသးလၢ ယဟိဝၤယွၤအအိၣ်ဒီး ဒိးဘျၢထံအခါ ပကဲထီၣ်ဝဲ ယဟိဝၤယွၤ အဟံၣ်ဖိဃီဖိ လၢနီၢ်သးတခီလီၤ.—မၢ်ကူး ၁၀:၂၉, ၃၀.
၂. လၢတၢ်မၤလိအံၤအပူၤ ပကတဲသကိးတၢ်မနုၤလဲၣ်.
၂ ပှၤတနီၤကထံၣ် ယဟိဝၤယွၤဒ် ပၢ်လၢအပှဲၤဒီး တၢ်အဲၣ်တၢ်ကွံအဂီၢ် တညီဝဲဘၣ်. မ့မ့ၢ်အဂၤတနီၤ ကဘၣ်ပာ်ဖျါထီၣ် တၢ်အဲၣ်တၢ်ကွံ လၢဒီပုၢ်ဝဲၢ်မုၣ်ခွါအဖီခိၣ် ဒ်လဲၣ်န့ၣ် တသ့ၣ်ညါဝဲဘၣ်. လၢတၢ်မၤလိအံၤအပူၤ ပကကွၢ်သကိး ယ့ၣ်ၡူးမၤစၢၤပှၤ ဒ်သိးပကထံၣ် ယဟိဝၤယွၤ ဒ်ပၢ်လၢအပှဲၤဒီး တၢ်အဲၣ်တၢ်ကွံ ဒီးပသုးဘူးပသး လၢအအိၣ်သ့ဝဲလီၤ. ပကတဲသကိးစ့ၢ်ကီး ကျဲတနီၤလၢ ပကကွၢ်လိမၤဒိး ယဟိဝၤယွၤ လၢပကရ့ဒီး ဒီပုၢ်ဝဲၢ်မုၣ်ခွါတဖၣ်ဒ်လဲၣ်.
ယဟိဝၤယွၤအဲၣ်ဒိးလၢ ပကသုးဘူးပသး လၢအအိၣ်
၃. ကစၢ်အတၢ်ထုကဖၣ်န့ၣ် မၤစၢၤပှၤလၢ ပကသုးဘူးပသး လၢယဟိဝၤယွၤ အအိၣ်ဒ်လဲၣ်.
၃ ယဟိဝၤယွၤမ့ၢ်ပၢ် လၢအပှဲၤဒီး တၢ်အဲၣ်တၢ်ကွံတဂၤလီၤ. ယ့ၣ်ၡူးအဲၣ်ဒိးဝဲလၢ ပကထံၣ်ယဟိဝၤယွၤ ဒ်ပၢ်လၢအပှဲၤဒီး တၢ်အဲၣ်တၢ်ကွံ ဒီးပတဲသကိးတၢ်ဒီးအီၤညီဝဲ. အဝဲတအဲၣ်ဒိးလၢ ပကထံၣ် ယဟိဝၤယွၤဒ် ပှၤလၢအတအိၣ်ဒီး တၢ်အဲၣ်တၢ်ကွံ ဒီးအိၣ်ထဲဟ့ၣ်လီၤ တၢ်ကလုၢ်န့ၣ်ဘၣ်. ပသ့ၣ်ညါဘၣ်ဒ်အံၤ ခီဖျိ ဖဲယ့ၣ်ၡူးသိၣ်လိ အပျဲၢ်အဘီၣ်လၢ ကဘၣ်ဃ့ဘါထုကဖၣ် ဒ်လဲၣ်အခါလီၤ. လၢကစၢ်တၢ်ထုကဖၣ်အပူၤန့ၣ် ယ့ၣ်ၡူးစးထီၣ် အတၢ်ကတိၤလၢ အိၣ်လၢမူခိၣ် “ပပၢ်ဧၢ.” (မးသဲ ၆:၉) ယ့ၣ်ၡူးမ့ၢ်သိၣ်လိပှၤလၢ ပကကိး ယဟိဝၤယွၤလၢ သ့တၢ်လၢာ်ကစၢ်, တၢ်ဘၣ်တ့ကစၢ် မ့တမ့ၢ် “စီၤပၤအထူအယိာ်” န့ၣ်သ့ဝဲ မ့ၢ်လၢလံာ်စီဆှံ ပာ်ဖျါထီၣ်ဝဲ လၢယဟိဝၤယွၤအိၣ်ဒီး မံၤလၤသၣ်ကပီၤ ဒ်အံၤလီၤ. (၁ မိၤၡ့ ၄၉:၂၅; ယၡါယၤ ၄၀:၂၈; ၁ တံၤမသ့း ၁:၁၇) ဘၣ်ဆၣ် လၢတၢ်န့ၣ်အလီၢ် ယ့ၣ်ၡူးမၢပကိး ယဟိဝၤယွၤလၢ “ပၢ်” လီၤ.
၄. ယဟိဝၤယွၤဘၣ်သးလၢ ပကသုးဘူးပသးလၢ အအိၣ်န့ၣ် ပသ့ၣ်ညါဘၣ်ဒ်လဲၣ်.
၄ နကထံၣ်ယဟိဝၤယွၤ ဒ်ပၢ်လၢအပှဲၤဒီး တၢ်အဲၣ်တၢ်ကွံတဂၤအဂီၢ် မ့ၢ်အညီဝဲဧါ. လၢပှၤတနီၤအဂီၢ် တညီဝဲဘၣ်. ပပၢ်တံၢ်နီၢ် မ့ၢ်တအဲၣ်ပှၤဘၣ်န့ၣ် ပကထံၣ်တမှံလၢ ယဟိဝၤယွၤအဲၣ်ပှၤအဂီၢ် ကကီဝဲလီၤ. ပတၢ်တူၢ်ဘၣ်အိၣ်ဒ်လဲၣ် ဒီးဘၣ်မနုၤအဃိ ပတူၢ်ဘၣ်ဒ်အံၤလဲၣ်န့ၣ် ယဟိဝၤယွၤ သ့ၣ်ညါဝဲအဃိ ပသးမုာ်ထီၣ်လီၤ. ယဟိဝၤယွၤအဲၣ်ဒိး အိၣ်ဘူးဒီးပှၤ အဃိ အကလုၢ်ကထါ ဟ့ၣ်ဂံၢ်ဟ့ၣ်ဘါပှၤလၢ “သုးဘူးသုသးဆူ ကစၢ်ယွၤအအိၣ်တက့ၢ်. ဒီးအဝဲကသုးဘူးအသး ဆူသုအိၣ်လီၤ.” (ယၤကိာ် ၄:၈) ယဟိဝၤယွၤအဲၣ်ပှၤဒီး အမ့ၢ်ပၢ်လၢ အဂ့ၤကတၢၢ်လၢ ပဂီၢ်လီၤ.
၅. ဒ် လူၤကၣ် ၁၀:၂၂ ပာ်ဖျါထီၣ်ဝဲအသိး ယ့ၣ်ၡူးမၤစၢၤပှၤလၢ ပသုးဘူးပသးလၢ ယဟိဝၤယွၤအအိၣ် ကသ့ဒ်လဲၣ်.
၅ ယ့ၣ်ၡူးမၤစၢၤပှၤလၢ ပကသုးဘူးပသးလၢ ယဟိဝၤယွၤအအိၣ်လီၤ. ယ့ၣ်ၡူးသ့ၣ်ညါ ယဟိဝၤယွၤ အဂ့ၢ်ဂ့ၤဂ့ၤ ဒီးအကွၢ်လိမၤဒိး ယဟိဝၤယွၤ အတၢ်ဂ့ၤတၢ်ဝါ လၢလၢပှဲၤပှဲၤအဃိ အတဲဝဲလၢ “ပှၤလၢအထံၣ်ယၤန့ၣ် မ့ၢ်အထံၣ်စ့ၢ်ကီး ပၢ်လီၤ.” (ယိၤဟၣ် ၁၄:၉) ဒ်ကၠီတဂၤအသိး ယ့ၣ်ၡူးသိၣ်လိပှၤလၢ ပကဘၣ်ပာ်ကဲဒီး ဒိကနၣ် ပပၢ်အကလုၢ်, ဟးဆှဲးတၢ်လၢတဘၣ်အသး, ဒီးမၤတၢ်ဒ်ပပၢ် အတၢ်ဘၣ်သး အသိးလီၤ. တကးဒံးဘၣ် ယ့ၣ်ၡူးမၤစၢၤပှၤလၢ ပကသ့ၣ်ညါထီၣ်လၢ ယဟိဝၤယွၤမ့ၢ် ပှၤသးဂ့ၤဒီး ပှဲၤဒီးတၢ်အဲၣ်တၢ်ကွံလီၤ. (ဖး လူၤကၣ် ၁၀:၂၂ တက့ၢ်.) ပကကွၢ်သကိး တၢ်အဒိတနီၤ.
ဒ်ပၢ်လၢအပှဲၤဒီး တၢ်အဲၣ်တၢ်ကွံတဂၤအသိး ယဟိဝၤယွၤ ဆှၢလီၤဝဲမူခိၣ်ကလူးတဂၤ လၢကဒုးဆူၣ်ထီၣ် အဖိခွါအဂံၢ်အဘါ (ကွၢ်လံာ်အဆၢ ၆) *
၆. ယဟိဝၤယွၤဒိကနၣ် ယ့ၣ်ၡူးအတၢ်ထုကဖၣ်ဒ်လဲၣ်န့ၣ် ဟ့ၣ်တၢ်အဒိတက့ၢ်.
၆ ယဟိဝၤယွၤ ဒိကနၣ်အဖိတဖၣ် ကလုၢ်လီၤ. ပကကွၢ်သကိး ယဟိဝၤယွၤ ဒိကနၣ်အဖိဝဲၢ်ကိ ကလုၢ်ဒ်လဲၣ်. ဖဲယ့ၣ်ၡူးအိၣ်လၢ ဟီၣ်ခိၣ်ချၢအခါ ယဟိဝၤယွၤ နၢ်ဟူ အတၢ်ဃ့ဘါထုကဖၣ် အဘျီအါမးလီၤ. (လူၤကၣ် ၅:၁၆) ဖဲယ့ၣ်ၡူးကဘၣ်မၤ တၢ်ဆၢတဲာ် လၢအရ့ဒိၣ်တဖၣ် ဒ်သိးဒီး ကဘၣ်ဃုထၢထီၣ် တၢ်မၢဖိ ၁၂ ဂၤအခါ ယဟိဝၤယွၤနၢ်ဟူ အတၢ်ဃ့ဘါထုကဖၣ်လီၤ. (လူၤကၣ် ၆:၁၂, ၁၃) ဖဲယ့ၣ်ၡူးသူၣ်ကိၢ်သးဂီၤတၢ်အခါ ယဟိဝၤယွၤ နၢ်ဟူအတၢ်ထုကဖၣ်လီၤ. တချုးလၢ စီၤယူဒၤအံၣ်စကၤရံၤအိာ် ဟ့ၣ် လီၤအီၤဒံးဘၣ်န့ၣ် ယ့ၣ်ၡူးဃ့ဘါထုကဖၣ် လၢအပၢ်အအိၣ် ဘၣ်ဃးဒီးတၢ်မၤကွၢ်လၢ အကထံၣ်ဘၣ်တဖၣ်လီၤ. ယဟိဝၤယွၤနၢ်ဟူ ယ့ၣ်ၡူးအတၢ်ထုကဖၣ်ဒီး ပျဲလီၤမူခိၣ်ကလူးတဂၤလၢ ကဟ့ၣ်ဆူၣ်ထီၣ် အဖိခွါအဂံၢ်အဘါလီၤ.—လူၤကၣ် ၂၂:၄၁-၄၄.
၇. နသ့ၣ်ညါလၢ ယဟိဝၤယွၤဒိကနၣ် အခ့အပှၤအတၢ်ထုကဖၣ်န့ၣ် နသးမၤအသးဒ်လဲၣ်.
၇ မုၢ်မဆါတနံၤအံၤ ယဟိဝၤယွၤ ဒိကနၣ်အခ့အပှၤ တၢ်ထုကဖၣ် ဒီးစံးဆၢက့ၤ အဝဲသ့ၣ်လၢ ဆၢကတီၢ်အကြၢးအဘၣ် ဒီးလၢကျဲလၢအဂ့ၤကတၢၢ်. (စံးထီၣ်ပတြၢၤ ၁၁၆:၁, ၂) ပကကွၢ်သကိး ဒီပုၢ်ဝဲၢ်မုၣ်လၢ အအိၣ်လၢအ့ဒံယါတဂၤ အတၢ်လဲၤခီဖျိ. အဝဲအိၣ်ဒီး တၢ်သူၣ်ကိၢ်သးဂီၤတၢ်ဆါ ဒီးအဃ့ဘါထုကဖၣ် ဘၣ်ဃးဒီးအတၢ်ကီတၢ်ခဲလီၤ. အတဲဝဲလၢ “လါမ့ၤ ၂၀၁၉, JW တၢ်ဂီၤမူလၢ အတဲဘၣ်ဃးဒီး တၢ်သူၣ်ကိၢ်သးဂီၤတၢ်ဆါန့ၣ် ကဲထီၣ်တၢ်မၤစၢၤ လၢယဂီၢ်ဒိၣ်မး. လီၤဂာ်လၢ ယဟိဝၤယွၤစံးဆၢ ယတၢ်ထုကဖၣ်လီၤ.”
၈. ယဟိဝၤယွၤ အဲၣ်ယ့ၣ်ၡူးန့ၣ် အပာ်ဖျါထီၣ်ဝဲဒ်လဲၣ်.
၈ ယဟိဝၤယွၤအဲၣ်ပှၤဒီး ကဟုကယာ်ပှၤဒ် အအဲၣ်ယ့ၣ်ၡူးဒီး ကဟုကယာ် ယ့ၣ်ၡူးဖဲအအိၣ်လၢ ဟီၣ်ခိၣ်ချၢ အဆၢကတီၢ်လီၤ. (ယိၤဟၣ် ၅:၂၀) ယဟိဝၤယွၤမၤစၢၤယ့ၣ်ၡူး ဒ်သိးအတၢ်နာ်ကဂၢၢ်ကျၢၤ, အဟ့ၣ်ဂံၢ်ဟ့ၣ်ဘါယ့ၣ်ၡူးဖဲ အထံၣ်ဘၣ်တၢ်ကီတၢ်ခဲအခါ ဒီးမၤစၢၤယ့ၣ်ၡူးလၢ တၢ်လိၣ်ဘၣ်လၢ နီၢ်ခိတကပၤ စ့ၢ်ကီးလီၤ. ယဟိဝၤယွၤ တဲဘၣ်ယ့ၣ်ၡူးလၢ အအဲၣ်ယ့ၣ်ၡူး ဒီးဘၣ်သူၣ်ဘၣ်သးအီၤလီၤ. (မးသဲ ၃:၁၆, ၁၇) ယ့ၣ်ၡူးသ့ၣ်ညါဝဲလၢ အပၢ်ကအိၣ်ဒီးအီၤဒီး ကမၤစၢၤအီၤထီဘိအဃိ အဝဲတတူၢ်ဘၣ်ဝဲလၢ အအိၣ်ထဲတဂၤဧိၤနီတဘျီဘၣ်.—ယိၤဟၣ် ၈:၁၆.
၉. ယဟိဝၤယွၤအဲၣ်ပှၤန့ၣ် ပသ့ၣ်ညါဘၣ်ဒ်လဲၣ်.
၉ ဒ်ယ့ၣ်ၡူးအသိး ပဝဲဒၣ်ခဲလၢာ် ပထံၣ်ဘၣ် ယဟိဝၤယွၤအဲၣ်ပှၤလၢ ကျဲအါဘိ. ဆိကမိၣ်ကွၢ် ယဟိဝၤယွၤဟ့ၣ်ပှၤ တၢ်ခွဲးတၢ်ယာ်လၢ ပကကဲထီၣ်ဘၣ် အတံၤသကိး ဒီးပအိၣ်ဒီး ဒီပုၢ်ဝဲၢ်မုၣ်ခွါတဖၣ်လၢ ကမၤသးခုပသး ဒီးဟ့ၣ်ဂံၢ်ဟ့ၣ်ဘါပှၤဖဲ ပထံၣ်ဘၣ် တၢ်ကီတၢ်ခဲတဖၣ် အခါလီၤ. (ယိၤဟၣ် ၆:၄၄) ယဟိဝၤယွၤဟ့ၣ်လီၤစ့ၢ်ကီးပှၤ တၢ်လၢကမၤဂၢၢ်ကျၢၤထီၣ် ပတၢ်နာ်လီၤ. တကးဒံးဘၣ် အမၤစၢၤပှၤလၢ နီၢ်ခိတၢ်လိၣ်ဘၣ်တဖၣ်လီၤ. (မးသဲ ၆:၃၁, ၃၂) ဖဲပဆိကမိၣ်ထီၣ်က့ၤ ယဟိဝၤယွၤ အတၢ်အဲၣ်ပှၤအခါ ပအဲၣ်အီၤဒိၣ်ထီၣ်လီၤ.
ရ့ဒီးဒီပုၢ်ဝဲၢ်တဖၣ် ဒ်ယဟိဝၤယွၤ ရ့ဝဲအသိး
၁၀. ယဟိဝၤယွၤရ့ဒီး ပဒီပုၢ်ဝဲၢ်တဖၣ်န့ၣ် ပမၤလိန့ၢ် တၢ်မနုၤလဲၣ်.
၁၀ ယဟိဝၤယွၤအဲၣ် ဒီပုၢ်ဝဲၢ်မုၣ်ခွါတဖၣ် ဘၣ်ဆၣ် ပကအဲၣ်အဝဲသ့ၣ်ဒီး ပာ်ဖျါထီၣ်လၢ ပသူၣ်အိၣ်သးအိၣ်အဝဲသ့ၣ်န့ၣ် တညီဝဲထီဘိဘၣ်. တဘျီတခီၣ် မ့ၢ်လၢကလုာ်ဒူၣ် တၢ်ဆဲးတၢ်လၤ ဒီးပဒိၣ်ထီၣ် တၢ်လီၢ်တၢ်ကျဲ လီၤဆီလိာ်သးအဃိ ပကပာ်ဖျါထီၣ် တၢ်အဲၣ်အဂီၢ် တညီဝဲထီဘိဘၣ်. ခီဖျိလၢ ပတလၢတပှဲၤဘၣ်အဃိ ပမၤဘၣ်တၢ်ကမၣ် ဒီးမၤဘၣ်ဒိဘၣ် ပှၤဂၤအသးသ့လီၤ. ဘၣ်ဆၣ် ပကဘၣ်ဂုာ်ကျဲးစၢး ပာ်ဖျါထီၣ်တၢ်အဲၣ်လၢ ဒီပုၢ်ဝဲၢ်မုၣ်ခွါအဖီခိၣ်. ပပာ်ဖျါထီၣ်အီၤ ကသ့လၢကျဲဒ်လဲၣ်. ပပာ်ဖျါထီၣ်သ့ ခီဖျိ ပကွၢ်လိမၤဒိး ယဟိဝၤယွၤ အတၢ်အဲၣ်လၢ ပဒီပုၢ်ဝဲၢ်တဖၣ်အဖီခိၣ်လီၤ. (အ့းဖ့းစူး ၅:၁, ၂; ၁ ယိၤဟၣ် ၄:၁၉) ပကတဲသကိး ပကွၢ်လိမၤဒိး ယဟိဝၤယွၤ ကသ့လၢကျဲဒ်လဲၣ်.
၁၁. ယ့ၣ်ၡူးကွၢ်လိမၤဒိး ယဟိဝၤယွၤအ “တၢ်သးကညီၤ” ဒ်လဲၣ်.
၁၁ ယဟိဝၤယွၤ အိၣ်ဒီး “တၢ်သးကညီၤ” လီၤ. (လူၤကၣ် ၁:၇၈) ပှၤလၢအအိၣ်ဒီး တၢ်သးကညီၤန့ၣ် ဖဲအထံၣ်ဘၣ်ပှၤဂၤ ဘၣ်ကီဘၣ်ခဲအခါ အသးကညီၤဘၣ်ဝဲ ဒီးဃုကျဲလၢ ကမၤစၢၤပှၤဂၤဒီး မၤမုာ်ထီၣ်ပှၤသးလီၤ. ခီဖျိလၢယ့ၣ်ၡူးကွၢ်လိမၤဒိး ယဟိဝၤယွၤအဃိ အရ့ဒီးပှၤဂၤဂ့ၤဂ့ၤလီၤ. (ယိၤဟၣ် ၅:၁၉) ဘၣ်တဘျီ ယ့ၣ်ၡူးထံၣ်ဘၣ် ပှၤဂီၢ်မုၢ်လၢ “အဝဲသ့ၣ် ဘၣ်ဒိဘၣ်ထံး ဒီးပှၤတကနၣ်ဃုာ်အီၤဘၣ်အဃိ လီၤဂာ်ဒ်သိလၢ ပှၤကွၢ်ထွဲအီၤတအိၣ်ဘၣ် အသိးလီၤ. အဃိ ယ့ၣ်ၡူး သးကညီၤဘၣ် အဝဲသ့ၣ်လီၤ.” (မးသဲ ၉:၃၆) ယ့ၣ်ၡူးအဲၣ်အဝဲသ့ၣ် တကးဒံးဘၣ် ယ့ၣ်ၡူးမၤစၢၤအဝဲသ့ၣ်လီၤ. အမၤဘျါပှၤတၢ်ဆါ ဒီးမၤစၢၤ “ပှၤလၢတၢ်ဘှံးအသး ဒီးဝံတၢ်ယိးတၢ်ဃၢ” တဖၣ်လီၤ.—မးသဲ ၁၁:၂၈-၃၀; ၁၄:၁၄.
ကွၢ်လိမၤဒိး ယဟိဝၤယွၤခီဖျိ ပသးအိၣ်ဟ့ၣ်တၢ်ညီ ဒီးအိၣ်ဒီးတၢ်ဒိသူၣ်ဒိသးလၢ ပဒီပုၢ်ဝဲၢ်မုၣ်ခွါအဖီခိၣ် (ကွၢ်လံာ်အဆၢ ၁၂-၁၄) *
၁၂. ပပာ်ဖျါထီၣ် တၢ်သးကညီၤ ကသ့ဒ်လဲၣ်, ဟ့ၣ်တၢ်အဒိတက့ၢ်.
၁၂ တချုးလၢ ပပာ်ဖျါထီၣ်လၢ ပသးကညီၤ ပဒီပုၢ်ဝဲၢ်ဒံးဘၣ်န့ၣ် ပကဘၣ်သ့ၣ်ညါလၢ အဝဲသ့ၣ်ထံၣ်ဘၣ် တၢ်ကီတၢ်ခဲဒ်လဲၣ်.
အဒိ, ဒီပုၢ်ဝဲၢ်မုၣ်တဂၤ အိၣ်ဒီးတၢ်ဆါ နးနးကလဲာ်တခါ. အတတဲဘၣ်ပှၤဂၤ ဘၣ်ဃးဒီး အတၢ်ကီတၢ်ခဲ နီတဘျီဘၣ် ဘၣ်ဆၣ် ဖဲပှၤမၤစၢၤအီၤအခါန့ၣ် အသးခုဝဲ. ဒီပုၢ်ဝဲၢ်မုၣ်အံၤ မ့ၢ်အကွၢ်ထွဲ အဟံၣ်ဖိဃီဖိ အတၢ်လိၣ်ဘၣ်လၢ နီၢ်ခိတခီဒ်လဲၣ်. မ့ၢ်ပဖီန့ၢ်အီၤတၢ်အီၣ် ဒီးမၤကဆှဲကဆှီန့ၢ် အဟံၣ်ကသ့ဧါ. ဘၣ်သ့ၣ်သ့ၣ် ဒီပုၢ်ဝဲၢ်ခွါတဂၤ အတၢ်မၤ တအိၣ်လၢၤဘၣ်. ပဟ့ၣ်မၤစၢၤအီၤ ကျိၣ်စ့တစဲးတမွဲး ဒီးမၤစၢၤအီၤတုၤလၢ အန့ၢ်က့ၤတၢ်မၤ အသီကသ့ဧါ.၁၃-၁၄. ပသးအိၣ်ဟ့ၣ်တၢ်ညီဒ် ယဟိဝၤယွၤအသိး ကသ့ဒ်လဲၣ်.
၁၃ ယဟိဝၤယွၤ မ့ၢ်ပှၤလၢအသးအိၣ် ဟ့ၣ်တၢ်ညီလီၤ. (မးသဲ ၅:၄၅) ပတဘၣ်အိၣ်ခိးတုၤလၢ ပဒီပုၢ်ဝဲၢ်တဖၣ်ဃ့ပှၤ တၢ်မၤစၢၤမး ပပာ်ဖျါထီၣ် တၢ်သးကညီၤန့ၣ်ဘၣ်. ဒ်ယဟိဝၤယွၤအသိး တချုးလၢ ပှၤဃ့ပတၢ်မၤစၢၤဒံးဘၣ်န့ၣ် ပကဘၣ်မၤစၢၤဆိ အဝဲသ့ၣ်လီၤ. တနံၤဘၣ်တနံၤ ယဟိဝၤယွၤဟ့ၣ်လီၤပှၤမုၢ် ဒီးပတလိၣ်ဃ့အီၤဘၣ်. ဒီးမုၢ်အတၢ်ကိၢ်န့ၢ် ကဲဘျုးလၢ ပှၤကိးဂၤဒဲးအဂီၢ်, တမ့ၢ်ထဲပှၤလၢ အသ့ၣ်ညါ စံးဘျုးစံးဖှိၣ်က့ၤအီၤတဖၣ် အဂီၢ်ဘၣ်. ယဟိဝၤယွၤ ပာ်ဖျါထီၣ် အတၢ်အဲၣ်လၢ ပဖီခိၣ် ခီဖျိအဟ့ၣ်လီၤပှၤတၢ်လၢ ပလိၣ်ဘၣ်တဖၣ်လီၤ. ပအဲၣ်ယဟိဝၤယွၤဒိၣ်မး မ့ၢ်လၢအဝဲအဲၣ်ပှၤ ဒီးဟ့ၣ်တၢ်ညီအဃိလီၤ.
၁၄ ပဒီပုၢ်ဝဲၢ်မုၣ်ခွါတဖၣ် ကွၢ်လိမၤဒိး ယဟိဝၤယွၤအဃိ အဝဲသ့ၣ်သးအိၣ်ဟ့ၣ်တၢ်ညီ လၢပှၤဂၤအဖီခိၣ်လီၤ. အဒိ, ဖဲ ၂၀၁၃ ကလံၤမုၢ်ဖးဒိၣ် ဟဲယၢၤ (Super Typhoon Haiyan) ဟဲလီၤဘၣ်ဝဲ ကီၢ်ဖံးလံးဖံ(စ်) ဒီးတၢ်ဘၣ်ဒိဘၣ်ထံး အိၣ်ဝဲအါမး. ဒီပုၢ်ဝဲၢ်မုၣ်ခွါတဖၣ် အဟံၣ်အဃီ ဒီးအတၢ်ဖိတၢ်လံၤ လီၤမၢ်ကွံာ်ဝဲ. ဘၣ်ဆၣ် အဝဲသ့ၣ်အနီၢ်သးဟံၣ်ဖိဃီဖိ လၢဟီၣ်ခိၣ်ဒီဘ့ၣ်န့ၣ် ဟဲမၤစၢၤအဝဲသ့ၣ်လီၤ. ပှၤအါဂၤဟ့ၣ်လီၤကျိၣ်စ့ ဒီးအဂၤတနီၤန့ၣ် ဟဲမၤစၢၤတၢ်လၢ တၢ်သူၣ်ထီၣ်ဘှီထီၣ် တကပၤလီၤ. လၢတနံၣ်အတီၢ်ပူၤန့ၣ် အဝဲသ့ၣ်က့ၤတ့ထီၣ်က့ၤ ဟံၣ်လၢအသီ မ့တမ့ၢ် ဘှီဂ့ၤထီၣ်က့ၤဟံၣ် အိၣ်ဝဲအဖျၢၣ်လၢ ၇၅၀ ဃၣ်ဃၣ်လီၤ. ဖဲ COVID-19 တၢ်ဆါသံသတြိာ် ရၤလီၤအသးအခါ ဒီပုၢ်ဝဲၢ်မုၣ်ခွါတဖၣ် မၤတၢ်ဆူၣ်ဆူၣ်လၢ ကမၤစၢၤလိာ်သးအဂီၢ်လီၤ. ဖဲပမၤစၢၤ ပဒီပုၢ်ဝဲၢ်မုၣ်ခွါလၢ အဆိအချ့အခါ ပပာ်ဖျါထီၣ်လၢ ပအဲၣ်အဝဲသ့ၣ်လီၤ.
၁၅-၁၆. ဒ် လူၤကၣ် ၆:၃၆ ပာ်ဖျါထီၣ်ဝဲအသိး ပကကွၢ်လိမၤဒိး ပပၢ်လၢမူခိၣ်အဂီၢ် ပကဘၣ်မၤတၢ်မနုၤလဲၣ်.
၁၅ ယဟိဝၤယွၤအိၣ်ဒီး တၢ်သးကညီၤ ဒီးသးအိၣ်ပျၢ် ပှၤဂၤတၢ်ကမၣ်လီၤ. (ဖး လူၤကၣ် ၆:၃၆ တက့ၢ်.) ပပၢ်လၢမူခိၣ်န့ၣ် သးအိၣ်ပျၢ်ကွံာ် ပဝဲတဂၤစုာ်စုာ် တၢ်ကမၣ်ကိးနံၤဒဲးလီၤ. (စံးထီၣ်ပတြၢၤ ၁၀၃:၁၀-၁၄) ယ့ၣ်ၡူးအပျဲၢ်အဘီၣ်တဖၣ်န့ၣ် တမ့ၢ်ပှၤလၢပှၤပှဲၤဘၣ် ဘၣ်ဆၣ် ယ့ၣ်ၡူးပာ်ဖျါထီၣ် တၢ်သးကညီၤ ဒီးသးအိၣ်ပျၢ်ကွံာ် အဝဲသ့ၣ်အတၢ်ကမၣ်လီၤ. ယ့ၣ်ၡူးသးအိၣ် ဟ့ၣ်လီၤအသးသမူ ဒ်သိးပတၢ်ဒဲးဘး ကပျၢ်ကွံာ်အဂီၢ်လီၤ. (၁ ယိၤဟၣ် ၂:၁, ၂) ယဟိဝၤယွၤဒီးယ့ၣ်ၡူး အိၣ်ဒီးတၢ်သးကညီၤဒီး သးအိၣ်ပျၢ်ကွံာ် ပတၢ်ကမၣ်န့ၣ် မၤစၢၤပှၤလၢ ပကသုးဘူးပသး လၢအဝဲသ့ၣ်အအိၣ်လီၤ.
၁၆ ပတၢ်အဲၣ်ပဒီပုၢ်ဝဲၢ်မုၣ်ခွါ ဟဲအါထီၣ် ဖဲပသးအိၣ်ပျၢ်လိာ်သး တၢ်ကမၣ်အခါလီၤ. (အ့းဖ့းစူး ၄:၃၂) ပကပျၢ်ကွံာ်ပှၤဂၤ အတၢ်ကမၣ်အဂီၢ် တညီဝဲဘၣ် ဘၣ်ဆၣ် ပကဘၣ်ဂုာ်ကျဲးစၢး မၤအီၤလီၤ. ဒီပုၢ်ဝဲၢ်မုၣ်တဂၤ ထံၣ်ဝဲလၢ တၢးထီခိးတၢ် တၢ်မၤလိဘၣ်ဃးဒီး တၢ်သးအိၣ်ပျၢ်ကွံာ် ပှၤဂၤအတၢ်ကမၣ် လၢာ်လၢာ်ဆ့ဆ့န့ၣ် မၤစၢၤအီၤလီၤ. အတဲဝဲလၢ “တၢ်မၤလိအံၤ မၤစၢၤယၤလၢ ယကဘၣ်ပျၢ်ကွံာ် ပှၤဂၤအတၢ်ကမၣ်ဒ်လဲၣ် ဒီးယသ့ၣ်ညါထီၣ်ဘၣ်လၢ ယမ့ၢ်ပျၢ်ပှၤဂၤအတၢ်ကမၣ်န့ၣ် တအဲၣ်ဒိးတဲဝဲလၢ ပှၤလၢအမၤကမၣ်တၢ်တဂၤ အတၢ်ကမၣ်တအိၣ်ဘၣ် ဒီးတမၤဆါနၤဘၣ်န့ၣ် တမ့ၢ်ဘၣ်. ဘၣ်ဆၣ် အဲၣ်ဒိးတဲဝဲလၢ ဖဲပပျၢ်ကွံာ်ပှၤဂၤ အတၢ်ကမၣ်အခါ ပတသးထီၣ်အီၤဘၣ် ဒီးပပာ်ပသးမုာ်မုာ်ခုၣ်ခုၣ်သ့ဝဲ.” ဖဲပသးအိၣ်ပျၢ်ကွံာ် ဒီပုၢ်ဝဲၢ်မုၣ်ခွါတဖၣ် အတၢ်ကမၣ်အခါ ပပာ်ဖျါထီၣ်လၢ ပအဲၣ်အဝဲသ့ၣ် ဒီးပကွၢ်လိမၤဒိး ယဟိဝၤယွၤလီၤ.
သးခုလၢ နကဲထီၣ်ဘၣ် ယဟိဝၤယွၤ အဟံၣ်ဖိဃီဖိ
ဒီပုၢ်ဝဲၢ်သးစၢ်ဒီးသးပှၢ်တဖၣ် ပာ်ဖျါထီၣ် တၢ်အဲၣ်တၢ်ကွံလၢ ဒီပုၢ်ဝဲၢ်မုၣ်ခွါတဖၣ်အဖီခိၣ် (ကွၢ်လံာ်အဆၢ ၁၇) *
၁၇. ဒ် မးသဲ ၅:၁၆ ပာ်ဖျါထီၣ်ဝဲအသိး ပမၤလၤကပီၤ ပပၢ်လၢမူခိၣ် ကသ့ဒ်လဲၣ်.
၁၇ ပအိၣ်ဒီးဒီပုၢ်ဝဲၢ်မုၣ်ခွါလၢ ဟီၣ်ခိၣ်ဒီဘ့ၣ် လၢအဲၣ်လိာ်ကွံလိာ်သးအဃိ ပသးခုဒိၣ်မး. ပအဲၣ်ဒိးလၢ ပှၤကဟဲဘူၣ်ထီၣ်ဘါထီၣ် ယဟိဝၤယွၤဒီးပှၤလီၤ. အဃိ ပတအဲၣ်ဒိးမၤတၢ် တမံၤဂ့ၤတမံၤဂ့ၤလၢ ကမၤဟးဂီၤ ယဟိဝၤယွၤ ဒီးပဒီပုၢ်ဝဲၢ်မုၣ်ခွါတဖၣ် အသးဘၣ်. ပဂုာ်ကျဲးစၢးအိၣ်မူ လၢအဂ့ၤကတၢၢ် ဒ်သိးပှၤကအဲၣ်ဒိး မၤလိအါထီၣ် ယဟိဝၤယွၤအဂ့ၢ်ဒီး မၤယဟိဝၤယွၤ အတၢ်မၤလီၤ.—ဖး မးသဲ ၅:၁၆ တက့ၢ်.
၁၈. ဒ်သိး ပကစံၣ်တဲၤတဲလီၤတၢ်လၢ တၢ်သးဒူပူၤ ကသ့အဂီၢ် တၢ်မနုၤ ကမၤစၢၤပှၤလဲၣ်.
၁၈ ခီဖျိလၢ ပဒိကနၣ် ပပၢ်လၢမူခိၣ်ကလုၢ်အဃိ တဘျီတခီၣ် ပှၤတနီၤ ကဒုၣ်ဒွဲၣ်ပှၤ ဒီးကမၤအၢမၤနးပှၤ. ပမ့ၢ်ဘၣ်ယိၣ်လၢ ပကဘၣ်တဲပၠးပှၤဂၤ တၢ်လၢပနာ်တဖၣ်န့ၣ် ပကြၢးမၤဒ်လဲၣ်. ပနာ်သ့ သပှၢ်တၢၢ်လၢ ယဟိဝၤယွၤဒီးယ့ၣ်ၡူး ကမၤစၢၤပှၤ. ယ့ၣ်ၡူးတဲဘၣ် အပျဲၢ်အဘီၣ်တဖၣ်လၢ အဝဲသ့ၣ်တဘၣ် သူၣ်ကိၢ်သးဂီၤမးသဲ ၁၀:၁၉, ၂၀.
လၢ ကဘၣ်တဲတၢ်ဒ်လဲၣ် ဒီးကတဲတၢ် မနုၤလဲၣ်န့ၣ်ဘၣ်. ဘၣ်မနုၤအဃိလဲၣ်. ယ့ၣ်ၡူးတဲဝဲလၢ “ဖဲနၣ်ရံၣ်အဝဲန့ၣ် သုကဘၣ်တဲ တၢ်မနုၤလဲၣ်န့ၣ် သုကသ့ၣ်ညါဘၣ်လီၤ. ပှၤလၢအတဲတၢ်န့ၣ် တမ့ၢ်ထဲသုဘၣ်. မ့ၢ်ဝဲ သုပၢ်အိၣ်လၢမူခိၣ် အသးစီဆှံ တဲတၢ်ခီဖျိသုလီၤ.”—၁၉. ဟ့ၣ်တၢ်အဒိ ဘၣ်ဃးဒီးပှၤလၢ အစံၣ်တဲၤတဲလီၤတၢ်လၢ တၢ်သးဒူအပူၤတက့ၢ်.
၁၉ ပကကွၢ်သကိး ဒီပုၢ်ဝဲၢ်ခွါရီဘၢၤ လၢအိၣ်လၢ ကလံၤထံး အၤဖြံၤကၤ အတၢ်လဲၤခီဖျိ. ဖဲအမၤလိ လံာ်စီဆှံသီသီ ဒီးတသ့ၣ်ညါ လံာ်စီဆှံတၢ်မ့ၢ်တၢ်တီ အါအါဒံးဘၣ်အခါန့ၣ် အဝဲဘၣ်ထီၣ်ရူလၢ ကဘၣ်တဲဘၣ်ဝဲ စံၣ်ညီၣ်ကွီၢ်လၢ ဘၣ်မနုၤအဃိ အတကဲသုးဘၣ်လဲၣ်. အဝဲအိၣ်ဒီး တၢ်သူၣ်ဒူသးဒူ ဒီးတဲဘၣ်စံၣ်ညီၣ်ကွီၢ်လၢ အဝဲအိၣ်လၢ တၢ်အိၣ်ဘၢၣ်စၢၤ မ့ၢ်လၢအအဲၣ် ဒီပုၢ်ဝဲၢ်မုၣ်ခွါတဖၣ် အဃိလီၤ. အဝဲပာ်လုၢ်ပာ်ပှ့ၤ အတၢ်ရ့လိာ်သးဒီး ဒီပုၢ်ဝဲၢ်မုၣ်ခွါတဖၣ်လီၤ. လၢတၢ်တမုၢ်လၢ်အပူၤ စံၣ်ညီၣ်ကွီၢ်တဂၤ သံကွၢ်အီၤလၢ “နဒီပုၢ်ဝဲၢ်သ့ၣ်တဖၣ်န့ၣ် မ့ၢ်မတဂၤလဲၣ်.” ဒီပုၢ်ဝဲၢ်ခွါရီဘၢၤ တဆိကမိၣ်ဝဲလၢ ပှၤကသံကွၢ်အီၤ ဒ်အံၤဘၣ်. ဘၣ်ဆၣ် အနီၣ်ထီၣ်ဘၣ်ဝဲ လံာ်စီဆှံအဆၢလၢတနံၤအဂီၢ် တဘျီဃီ. လံာ်စီဆှံအဆၢန့ၣ်မ့ၢ်ဝဲ မးသဲ ၁၂:၅၀ “ပှၤလၢအမၤ ယပၢ်အိၣ်လၢမူခိၣ် အတၢ်ဘၣ်သးန့ၣ် အဝဲမ့ၢ်ဝဲ ယဒီပုၢ်ဝဲၢ်မုၣ်, ယဒီပုၢ်ဝဲၢ်ခွါ ဒီးယမိၢ်လီၤ.” ဖဲန့ၣ်အခါ ရီဘၢၤမ့ၢ်ပှၤမၤလိ လံာ်စီဆှံဖိသီသီ သနာ်က့ ယဟိဝၤယွၤ အသးစီဆှံမၤစၢၤအီၤ ဒ်သိးကစံးဆၢက့ၤ တၢ်သံကွၢ်တဖၣ်လီၤ. ယဟိဝၤယွၤ ကဘၣ်သူၣ်ဘၣ်သးဝဲ ရီဘၢၤဒိၣ်မး. ဖဲပထံၣ်ဘၣ် တၢ်ကီတၢ်ခဲအခါ ပမ့ၢ်သန့ၤပသးဒီး ယဟိဝၤယွၤန့ၣ် ယဟိဝၤယွၤ ကဘၣ်သူၣ်ဘၣ်သးပှၤလီၤ.
၂၀. ပပာ်လီၤသးလၢ ပကမၤတၢ်မနုၤလဲၣ်. (ယိၤဟၣ် ၁၇:၁၁, ၁၅)
၂၀ မ်ပဆဲးပာ်လုၢ်ပာ်ပှ့ၤ တၢ်ခွဲးတၢ်ယာ်လၢ ပကဲထီၣ်ဘၣ် ယဟိဝၤယွၤ အဟံၣ်ဖိဃီဖိတက့ၢ်. ပအိၣ်ဒီးပၢ်လၢ အဂ့ၤကတၢၢ် ဒီးဒီပုၢ်ဝဲၢ်မုၣ်ခွါ လၢအဲၣ်ပှၤဒိၣ်မး. အဃိ ပကြၢးပာ်လုၢ်ပာ်ပှ့ၤ တၢ်ခွဲးတၢ်ယာ်အံၤလီၤ. မုၣ်ကီၤလံၢ် ဒီးပှၤလၢပိာ်အခံတဖၣ် ဂုာ်ကျဲးစၢး မၤဟးဂီၤ ပတၢ်အဲၣ်ယဟိဝၤယွၤ ဒီးတၢ်ဃူတၢ်ဖိးလၢ ဒီပုၢ်ဝဲၢ်မုၣ်ခွါတဖၣ် အကျါလီၤ. ဘၣ်ဆၣ် ယ့ၣ်ၡူးဃ့ထုကဖၣ် န့ၢ်တၢ်လၢပဂီၢ်ဒ်သိး ယဟိဝၤယွၤကကွၢ်ထွဲပှၤ လၢပကအိၣ်ဒီး တၢ်ဃူတၢ်ဖိးအဂီၢ်လီၤ. (ဖး ယိၤဟၣ် ၁၇:၁၁, ၁၅ တက့ၢ်.) ယဟိဝၤယွၤစံးဆၢ ယ့ၣ်ၡူးအတၢ်ထုကဖၣ်လီၤ. ဒ်ယ့ၣ်ၡူးအသိး ပကဘၣ်နာ်လၢ ယဟိဝၤယွၤအဲၣ်ပှၤ ဒီးသးအိၣ်မၤစၢၤပှၤလီၤ. အဃိ မ်ပပာ်လီၤပသးလၢ ပကဆဲးမၤအါထီၣ်ပတၢ်အဲၣ် ယဟိဝၤယွၤဒီး ဒီပုၢ်ဝဲၢ်မုၣ်ခွါတဖၣ်တက့ၢ်.
တၢ်သးဝံၣ် ၉၉ ဒီပုၢ်ဝဲၢ်ဂီၢ်မုၢ်ဂီၢ်ပၤ
^ လံာ်အဆၢ. 5 ပအိၣ်ဘၣ်လၢ ဟံၣ်ဖိဃီဖိလၢ အပှဲၤဒီးတၢ်အဲၣ်တၢ်ကွံ အကျါန့ၣ် ပသးခုဒိၣ်မး. ပဝဲခဲလၢာ် ပကဘၣ်မၤအါထီၣ် တၢ်အဲၣ်တၢ်ကွံလၢ ပဒီပုၢ်ဝဲၢ်မုၣ်ခွါအဖီခိၣ်လီၤ. ပမၤအါထီၣ် တၢ်အဲၣ်ကသ့ဒ်လဲၣ်. ပမၤအါထီၣ်သ့ ခီဖျိ ပကွၢ်လိမၤဒိး ယဟိဝၤယွၤ ပာ်ဖျါထီၣ် တၢ်အဲၣ်လၢ ပဖီခိၣ်ဒီး မၤထွဲယ့ၣ်ၡူးဒီးဒီပုၢ်ဝဲၢ်တဖၣ် အဒိအတဲာ်လီၤ.
^ လံာ်အဆၢ. 56 တၢ်တဲဖျါထီၣ်တၢ်ဂီၤ အခီပညီ– ယဟိဝၤယွၤ ဆှၢလီၤမူခိၣ်ကလူးတဂၤ လၢကဟ့ၣ်ဆူၣ်ထီၣ် ယ့ၣ်ၡူးအဂံၢ်အဘါ လၢက့ၤသစ့းမနၤကရၢၢ်ပူၤလီၤ.
^ လံာ်အဆၢ. 58 တၢ်တဲဖျါထီၣ်တၢ်ဂီၤ အခီပညီ– ဖဲ COVID-19 တၢ်ဆါသံသတြိာ်ရၤလီၤသးအခါ ဒီပုၢ်ဝဲၢ်အါဂၤ ကတဲာ်ကတီၤ တၢ်အီၣ်တၢ်အီ လၢကဟ့ၣ်နီၤလီၤ ပှၤဂၤအဂီၢ်လီၤ.
^ လံာ်အဆၢ. 60 တၢ်တဲဖျါထီၣ်တၢ်ဂီၤ အခီပညီ– မိၢ်တဂၤမၤစၢၤအဖိမုၣ် ဒ်သိးကကွဲးလံာ်ပရၢတဘ့ၣ်လၢ ကဟ့ၣ်ဂံၢ်ဟ့ၣ်ဘါဒီပုၢ်ဝဲၢ်ခွါတဂၤလၢ အအိၣ်လၢဃိာ်ပူၤလီၤ.