1. Batu babasepahala bakona kuunga cwañi Jehova?

LUBASI lwa balapeli ba Jehova lukopanyeleza Jesu, yena “mweli wa pupo kaufela” ni mangeloi amañata-ñata. (Makolo. 1:15; Samu 103:20) Jesu hanaali fa lifasi, naabonisize kuli batu babasepahala bakona kubiza Jehova kuli ki Ndataa bona. Jesu hanaaambola ni balutiwa bahae, naabizize Jehova kuli ki “Ndate yena Ndataa mina.” (Joa. 20:17) Mi haluineela ku Jehova ni kukolobezwa luba mwa lubasi lwa mizwale ni likaizeli babanani lilato.—Mare. 10:29, 30.

2. Lukanyakisisañi mwa taba ye?

² Batu babañwi kukona kubabela taata kuunga Jehova sina Ndataa bona yalilato. Babañwi mwendi habazibi mwakuboniseza lilato kwa mizwale ni likaizeli babona. Mwa taba ye, lukanyakisisa mo Jesu alutuseza kuunga Jehova sina Ndataa luna yalilato, ni kusutelela ku yena. Hape lukanyakisisa molukona kulikanyiseza Jehova ka molupilisanela ni mizwale ni likaizeli baluna.

3. Tapelo yeli mutala yanaafile Jesu ikona kulutusa cwañi kusutelela ku Jehova?

³ Jehova ki Ndate yalilato. Jesu ubata kuli luunge Jehova sina mwamuungela, sina Ndate yalilato ili yaatumeleha, isiñi sina mutu yanani maata yasa luisi pilu. Taba yeo yaiponahalela hande mwa manzwi anaabulezi Jesu hanaaluta balutiwa bahae mwakulapelela. Naakalisize tapelo yahae yeli mutala ka kubulela kuli: “Ndataa luna.” (Mat. 6:9) Jesu naakakona kulutaluseza kuli lubize Jehova kuli “Yamaata Kaufela,” “Mubupi,” kamba “Mulena wa kamita,” ili malumbatina aitusisizwe mwa Mañolo amuswanela. (Gen. 49:25; Isa. 40:28; 1 Tim. 1:17) Kono Jesu naalutaluselize kuli lubize Jehova kuli “Ndataa luna.”

4. Luziba cwañi kuli Jehova ubata kuli lusutelele ku yena?

 ⁴ Kana kumibela taata kuunga Jehova sina Ndataa mina yalilato? Babañwi ku luna baikutwa cwalo. Haiba bashemi baluna nebasa lubonisangi lilato, kukona kulubela taata kulumela kuli kunani ndate yalulata. Kwaomba-omba luli kuziba kuli Jehova wautwisisa hande moluikutwela! Ubata kuba bukaufi ni luna. Ki lona libaka Linzwi lahae hali lususueza kuli: “Musutelele ku Mulimu, mi ukasutelela ku mina.” (Jak. 4:8) Jehova walulata, mi usepisa kuli ukaba Ndate yomunde hahulu haiba lusutelela ku yena.

5. Ka kuya ka Luka 10:22, Jesu ulutusa cwañi kusutelela ku Jehova?

⁵ Jesu wakona kulutusa kusutelela ku Jehova. Jesu uziba hande Jehova mi ubonisanga tulemeno twahae ka kutala, ki lona libaka hanaabulezi kuli: “Mutu kaufela yaniboni uboni ni Ndate.” (Joa. 14:9) Ka kuswana ni muhulwanaa mutu, Jesu ululuta molukona kuboniseza kuli lwakuteka Ndataa luna mi lwamuutwa, molukona kuambukela kueza lika zesa mutabisi, ni molukona kumutabiseza. Kono Jesu hanaali fa lifasi, sihulu naabonisize kuli Jehova unani sishemo ni lilato. (Mubale Luka 10:22.) Halunyakisiseñi mitala isikai.

6. Mufe mitala yebonisa mo Jehova naatelelelize ku Jesu.

⁶ Jehova wateelezanga kwa bana bahae. Halunyakisiseñi mo Jehova naatelelelize ku Mwanaa hae wa mweli. Kaniti luli, Jehova naautwile litapelo zanaalapezi Mwanaa hae hanaali fa lifasi. (Luka 5:16) Ka mutala, Jehova naautwile litapelo zanaalapezi Jesu hanaabata kueza likatulo za butokwa, inge cwalo hanaabata kuketa baapositola bahae ba 12. (Luka 6:12, 13) Jehova hape naautwile tapelo yanaalapezi Jesu hanaaikutwile kuziyeleha hahulu. Jesu pili asika betekiwa kale, naalapezi ku Ndatahe ka taata ka za muliko omutuna wanaatuha atalimana ni ona. Jehova naasika utwa feela tapelo ya Jesu kono hape naalumile lingeloi kuyo tiisa Mwanaa hae yalatwa.—Luka 22:41-44.

7. Kuziba kuli Jehova wateelezanga kwa litapelo zaluna kulutusa cwañi?

 ⁷ Ni kacenu, Jehova wateelezanga kwa litapelo za batanga bahae, mi walialabanga ka nako yeswanela ni ka nzila yekona kubatusa. (Samu 116:1, 2) Halunyakisiseñi mo kaizeli yomuñwi kwa India naaiponezi buniti bwa taba yeo. Naakopana ni miinelo yemiñwi yetaata hahulu, ili yenee mutahiseza kuba ni lipilaelo, mi alapela ka taata ku Jehova ka za teñi. Naañozi kuli: “Progilamu ya ka kweli ya JW Broadcasting^® ya May 2019 yeneambola za mwakutiyela lipilaelo nei nitusize hahulu. Neniinga kuba kalabo kwa litapelo zaka.”

8. Jehova naabonisize cwañi kuli naalata Jesu?

⁸ Jehova walulata mi waluisa pilu, sina feela mwanaalatezi Jesu ni kubonisa kuli wamuisa pilu ka nako yetaata ya bukombwa bwahae bwa fa lifasi. (Joa. 5:20) Naatusize Jesu kutiya kwa moya, naamutiisize ka nako yanaaziyelehile, mi naaboni teñi kuli unani lika za kwa mubili zanaatokwa. Hape Jehova naabulelezi Mwanaa hae kuli naamulata mi naatabiswa ki zanaaeza. (Mat. 3:16, 17) Jesu naaziba kuli Ndatahe wa kwa lihalimu yalilato kamita naali ni yena; kacwalo, naasika ikutwa kuli naali anosi.—Joa. 8:16.

9. Luziba cwañi kuli Jehova walulata?

⁹ Ka kuswana ni Jesu, kaufelaa luna luiponezi mo Jehova aboniselize kuli walulata. Ka mutala, Jehova uluhohezi ku yena, mi ulufile lubasi lwa kwa moya, ili mizwale ni likaizeli baluna babaswalisani ni babanani lilato kuli balutuse kuba ni tabo ni kulutiisa halukopana ni miinelo yetaata. (Joa. 6:44) Jehova hape kamita ulufanga lico za kwa moya zetiisa tumelo. Kutuha fo, Jehova ulutusanga kufumana lika zelutokwa kwa mubili zazi ni zazi. (Mat. 6:31, 32) Haiba luzwelapili kunahanisisa mo Jehova aluboniseza lilato, luka mulata hahulu.

10. Luitutañi ku Jehova ka mwaangela mizwale ni likaizeli baluna?

¹⁰ Jehova walata mizwale ni likaizeli baluna. Kono fokuñwi kukona kulubela taata kulata lubasi lwaluna lwa kwa moya. Libaka leliñwi lelikona kutahisa cwalo ki sizo saluna kamba miinelo yene luipumani ku yona hane lusali banana. Mi fokuñwi kaufelaa luna luezanga mafosisa akona kufilikanya babañwi kamba kubautwisa butuku kwa pilu. Nihakulicwalo, luswanela kueza molukonela kaufela kutusa kuli mwa lubasi lwaluna lwa kwa moya kube ni lilato. Lukona kueza cwañi cwalo? Ka kulikanyisa Ndataa luna yalata mizwale ni likaizeli baluna. (Maef. 5:1, 2; 1 Joa. 4:19) Halunyakisiseñi zelukona kuituta kwa mutala wa Jehova.

11. Jesu naalikanyisize cwañi “mukekecima” wa Jehova?

¹¹ Jehova unani “mukekecima.” (Luka 1:78) Mutu yanani mukekecima uikutwanga bumaswe habona babañwi habanyanda; ubatanga mwaku batuseza ni kubaomba-omba. Jesu naalikanyisize Jehova ka mwanaapilisanezi ni batu. (Joa. 5:19) Nako yeñwi Jesu hanaaboni buñata bwa batu, “abashwela makeke, kakuli nebaziyelehile ni kuhasana sina lingu zesina mulisana.” (Mat. 9:36) Niteñi, Jesu naasika bashwela feela makeke. Naafolisize bane bakula ni kukatulusa ‘bane bambindana ni bane baimezwi.’—Mat. 11:28-30; 14:14.

12. Mutaluse molukona kuboniseza mizwale ni likaizeli baluna mukekecima.

¹² Haiba lunahanisisa miinelo yetaata yebakopana ni yona mizwale ni likaizeli baluna, kuka lubela bunolo kubabonisa mukekecima. Ka mutala, mwendi kaizeli yomuñwi ukula butuku bobutuna. Haabilaelangi ka za teñi, kono mwendi wakona kuitebuha haiba afiwa tuso yeñwi. Lukona kuipuza kuli: ‘Kana wakona  kufumanela lubasi lwahae lika zelutokwa kwa mubili? Kana lwakona kumutusa ka kumuapehela lico kamba kukenisa ndu yahae?’ Kamba mwendi muzwale waluna uzwile musebezi. Kana lwakona kumutusa ka kumufanga masheleñinyana, kusina kuitibahaza kuli ki luna lumufile mpo yeo, kufitela afumana musebezi omuñwi?

13-14. Lukona kulikanyisa cwañi bufani bwa Jehova?

¹³ Jehova unani bufani. (Mat. 5:45) Haluswaneli kulibelela kuli konji mizwale ni likaizeli baluna habaka lukupa tuso kona luka babonisa mukekecima. Luswanela kulikanyisa Jehova ka kubaezeza lika zebatokwa mane basika lukupa kale. Jehova yena upazulisanga lizazi lahae zazi ni zazi lusatokwi kumukupa! Mi mufutumala wa lizazi hautusangi feela batu babanani buitebuho kono utusanga batu kaufela. Jehova ubonisa kuli walulata ka kulufa lika zelutokwa. Kaniti luli, lwalata Jehova kabakala kuli unani sishemo ni bufani!

¹⁴ Mizwale ni likaizeli baluna babañata balikanyisa Ndataa bona wa kwa lihalimu ka kuba ni bufani mi baezanga cwalo niha basika kupiwa kutusa. Ka mutala, kwa naha ya Philippines nekubile ni liñungwa lelituna lene lisinyize lika zeñata ka silimo sa 2013. Mandu ni maluwo a mizwale ni likaizeli baluna babañata naasinyehile. Nihakulicwalo, lubasi lwa mizwale ni likaizeli babona ba kwa moya mwa lifasi kaufela nelu batusize kapili-pili. Babañata nebafile linubu za masheleñi kamba kutusa mwa musebezi omutuna wa kuyaha, mi ka kueza cwalo, nebatusize kuli mandu abato eza 750 ayahiwe kamba kulukiswa mwa likweli feela za kubala! Ka nako ya butuku bobuyambukela bwa COVID-19, Lipaki za Jehova nebaezize mone bakonela kaufela kutusa mizwale ni likaizeli babona. Haiba lutusa mizwale ni likaizeli baluna kapili halulemuha kuli batokwa tuso, lubonisa kuli lwabalata.

15-16. Ka kuya ka Luka 6:36, lukona kulikanyisa cwañi Ndataa luna ya kwa lihalimu?

¹⁵ Jehova unani sishemo mi waswalelanga. (Mubale Luka 6:36.) Zazi ni zazi, Ndataa luna ya kwa lihalimu walushemubanga. (Samu 103:10-14) Balutiwa ba Jesu nebaezanga mafosisa kabakala kusapetahala, kono Jesu naabashemubanga ni kubaswalela. Mane  naatobohile bupilo bwahae kuli libi zaluna liswalelwe. (1 Joa. 2:1, 2) Bakeñisa kuli Jehova ni Jesu balushemubanga ni kuluswalela, lutabela kusutelela ku bona.

¹⁶ Haiba ‘luswalelana ka pilu kaufela,’ lilato lelunani lona mwa lubasi lwaluna lwa kwa moya likatiya. (Maef. 4:32) Fokuñwi, kukona kulubela taata kuswalela babañwi. Kaizeli yomuñwi utalusa kuli taba yeli, “Mu Swalelane Ka Pilu Kaufela” yefumaneha mwa Tawala ya Mulibeleli yeñwi nei mutusize kueza cwalo. * Naañozi kuli: “Kubala taba ye kunitusize kulemuha kuli kuswalela babañwi kwanitusa ni na. Taba yeo neitalusize kuli hamuswalela babañwi hakutalusi kuli mwatabela muzamao wabona omaswe kamba muunga kuli zebaezize halisika miutwisa butuku kwa pilu. Kono hamu baswalela hamuna kuzwelapili kuba ni ndimbelela mi mukaba ni kozo ya mwa munahano.” Haiba luswalela mizwale ni likaizeli baluna ka pilu kaufela, lukabonisa kuli lwabalata mi lulikanyisa Ndataa luna, Jehova.

17. Ka kuya ka Mateu 5:16, lukona kukanyisa cwañi Ndataa luna ya kwa lihalimu?

¹⁷ Ki tohonolo yetuna kuba mwa lubasi lwa mizwale ni likaizeli babafumaneha mwa lifasi kaufela. Lubata kuli batu babañata baswalisane ni luna kulapela Mulimu waluna. Kacwalo, luswanela kutokomela kuli haluezi nto ifi kamba ifi yekatahisa kuli batu banyaze batanga ba Jehova kamba kunyaza Ndataa luna ya kwa lihalimu. Luswanela kueza molukonela kaufela kuba ni muzamao omunde ilikuli lutuse batu kutabela taba yende.—Mubale Mateu 5:16.

18. Ki nto mañi yekona kulutusa kukutaza ka bundume?

¹⁸ Fokuñwi, babañwi bakona kulusheununa kamba kulunyandisa bakeñisa kuli lueza zalubulelela Ndataa luna ya kwa lihalimu. Lukona kueza cwañi haiba lusaba kutaluseza babañwi litaba zelulumela? Luswanela kuba ni buikolwiso bwa kuli Jehova ni Mwanaa hae baka lutusa. Jesu naataluselize balutiwa bahae kusaikalelwa zebaka bulela kamba mwaku  libulelela. Kabakalañi? Jesu naabulezi kuli: “Zemuka bulela muka lifiwa ka yona nako yeo; kakuli bababulela haki mina feela, kono ki moya wa Ndataa mina obulela ka mina.”—Mat. 10:19, 20.

19. Mufe mutala wa muzwale yanaakutalize ka bundume.

¹⁹ Halunyakisiseñi mutala wa muzwale yabizwa Robert. Ka nako yanaasazo kalisa kuituta Bibele mi naaziba feela litaba lisikai, aisiwa kwa kuta mwa naha ya South Africa kuli ayo talusa libaka hanaahanile kukena busole. Ka bundume, ataluseza kuta kuli naasalati kukena busole kabakala kuli naalata mizwale ni likaizeli bahae. Naaitebuha kuli naali mwa lubasi lwaluna lwa kwa moya. Ka sipundumukela, muatuli yomuñwi amubuza kuli: “Mizwale ni likaizeli bahao ki bo mañi?” Bo Robert nebasika libelela kuli nebaka buziwa puzo yeo, kono kapili-pili bahupula liñolo la zazi lene linyakisiswa fa lizazi leo. Neli liñolo la Mateu 12:50, lelibulela kuli: “Mutu kaufela yaeza tato ya Ndate ya kwa lihalimu, yena yo ki yena munyanaaka ni kaizelaaka ni me.” Nihaike kuli bo Robert ki hona hane basazo kalisa kuituta Bibele, moya wa Jehova neu batusize kualaba puzo yeo ni lipuzo zeñwi lisikai zene basika libelela. Kusina kukakanya, Jehova naatabisizwe hahulu ki bo Robert! Mi Jehova watabanga haluitinga ku yena ni kubonisa bundume ka kukutaza taba yende mwa miinelo yetaata.

20. Luswanela kuikatulela kuezañi? (Joani 17:11, 15)

²⁰ Haike luzweleñipili kuitebuha tohonolo yelunani yona ya kuba mwa lubasi lwa kwa moya lolunani lilato. Lunani Ndate yomunde ka kufitisisa ni mizwale ni likaizeli baba lulata. Kamita luswanela kuitebuhanga tohonolo ya kuba ni lubasi lolucwalo. Satani ni balateleli bahae babamaswe babata kuli lukakanye kuli Ndataa luna ya kwa lihalimu walulata mi ubata kufelisa swalisano yelunani yona. Nihakulicwalo, Jesu naalulapelezi, kukupa Ndataa luna kuli alusileleze ilikuli lubasi lwaluna luzwelepili kuswalisana. (Mubale Joani 17:11, 15.) Jehova usweli waalaba tapelo yeo. Sina Jesu, lusike lwakakanya kuli Ndataa luna ya kwa lihalimu walulata mi uka lutusa. Haike luikatulele kuzwelapili kulata hahulu lubasi lwaluna lwa kwa moya.