1. Mbulunda kayi budi bantu badi ne lulamatu mua kudia ne Yehowa?

 MU DÎKU dia batendeledi ba Yehowa tudi ne Yezu “muanabute wa bifukibua bionso,” ne banjelu bungi bu ntunta ne ngenene. (Kolos. 1:15; Mis. 103:20) Pavua Yezu pa buloba, wakaleja ne: bantu badi ne lulamatu badi mua kumona Yehowa bu Tatu wabu. Pavuaye uyukila ne bayidi bende wakabikila Yehowa ne: “Tatu wanyi ne Tatu wenu.” (Yone 20:17) Patudi tudilambula kudi Yehowa ne tubatijibua, tudi tubuela mu dîku dia bana betu badi banangangane.​—Mâko 10:29, 30.

2. Ntshinyi tshituamona mu tshiena-bualu etshi?

² Bamue batu bamona ne: mbikole bua kumona Yehowa bu Tatu wa dinanga. Bakuabu ki mbamanye pamuapa mushindu wa kuleja bena Kristo nabu dinanga mu bienzedi to. Mu tshiena-bualu etshi, netumone mudi Yezu utuambuluisha bua kumona Yehowa bu Tatu udi mutunange ne mutudi mua kusemena pabuipi nende. Netumone kabidi mutudi mua kuidikija Yehowa mu mushindu utudi tuenzela bena Kristo netu malu.

3. Mmunyi mudi disambila dia tshilejilu ditusemeja pabuipi menemene ne Yehowa?

³ Yehowa nTatu wa dinanga. Yezu mmusue tumone Yehowa mudiye umumona, mmumue ne: tumumone bu muledi muimpe udi ne dinanga utudi mua kukuatshila yetu ya munda bipepele. Ki mmusue tumumone bu muntu wa malu makole, udi utuambila anu tshia kuenza to. Tudi tumona bualu ebu mu tshivua Yezu muine mulongeshe bayidi bende bua kulomba mu disambila. Wakatuadija disambila dia tshilejilu ne mêyi a ne: “Tatu wetu.” (Mat. 6:9) Yezu uvua mua kuikala mutuambile bua kubikila Yehowa ne: “Wa Bukole Buonso,” “Mufuki,” anyi ne: “Mukalenge wa tshiendelele.” Kabivua mua kuikala bibi to, bualu Bible udi utela mianzu yonso eyi bua kuakula bua Yehowa. (Gen. 49:25; Yesh. 40:28; 1 Tim. 1:17)  Kadi Yezu wakatuambila bua kubikila Yehowa ne: “Tatu.”

4. Ntshinyi tshidi tshileja ne: Yehowa mmusue bua tusemene pabuipi nende?

⁴ Bitu bikukolela bua kumona Yehowa bu Tatu wa dinanga anyi? Bamue ba kutudi batu bamona pabu nanku. Pamuapa bidi mua kutukolela bua kumvua bimpe lungenyi lua ne: Yehowa mmuledi udi mutunange bualu tuvua ne muledi mubi. Kadi bidi bitukolesha patudi tumanya ne: Yehowa mmumanye menemene mutudi tumvua. Mmusue kuikala pabuipi netu. Ke bualu kayi, Dîyi diende didi ditukankamija ne: “Semenayi pabuipi ne Nzambi ne yeye neasemene pabuipi nenu.” (Yak. 4:8) Yehowa mmutunange, udi utuambila kabidi ne: neikale Tatu mutambe buimpe wa katshia ututu katuyi banji kupeta.

5. Bilondeshile Luka 10:22, mmunyi mudi Yezu mua kutuambuluisha bua kusemena pabuipi menemene ne Yehowa?

⁵ Yezu udi mua kutuambuluisha bua kusemena pabuipi menemene ne Yehowa. Yezu mmumanye Yehowa bimpe menemene, ne udi widikija ngikadilu yende mu mushindu mutambe buimpe. Ke bualu kayi, wakamba ne: “Muntu yonso udi mummone mmumone kabidi Tatu.” (Yone 14:9) Yezu udi utulongesha mua kunemeka Tatu wetu ne kumutumikila, mua kubenga kumubungamija, ne tshitudi mua kuenza bua atuanyishe, anu mutu muanabute wa muntu wenza. Kadi Yezu udi nangananga utuambuluisha bua kujingulula ne: Yehowa nNzambi muimpe ne mmutunange. (Bala Luka 10:22.) Tumonayi bimue bilejilu.

6. Fila bilejilu bidi bileja ne: Yehowa uvua muteleje Yezu.

⁶ Yehowa utu uteleja bana bende. Tumonayi muvuaye muteleje Muanende muanabute. Kakuyi mpata, Yehowa wakateleja masambila a bungi avua Muanende wenza pavuaye pa buloba. (Luka 5:16) Wakateleja Yezu pavuaye usambila bua kuangata mapangadika a mushinga mukole bu mudi dia kusungula bapostolo bende 12. (Luka 6:12, 13) Wakamuteleja kabidi pavuaye usambila muikale ne kanyinganyinga kakole. Katupa kakese kumpala kua Yudasa kumutungila, wakasambila Tatu wende ne muoyo mujima bua diteta dikole dikavuaye pa kutuilangana nadi. Yehowa wakateleja disambila dia Muanende munanga adi, kutumaye kabidi muanjelu bua kumukolesha.​—Luka 22:41-44.

7. Utu umvua mushindu kayi pautu umanya ne: Yehowa utu uteleja masambila etu?

 ⁷ Lelu, Yehowa udi utungunuka ne kuteleja masambila a batendeledi bende, uandamuna mu tshikondo tshiakanyine ne mu mushindu muimpe menemene. (Mis. 116:1, 2) Tuangate tshilejilu tshia muanetu wa bakaji wa mu Inde uvua mumone muvua Yehowa muandamune masambila ende. Wakatata bikole ne kanyinganyinga, yeye kukuatshila Yehowa lutatu luende alu ne muoyo wende mujima. Udi wamba ne: “Ndongamu wa ku TV wa JW wa 5/2019 uvua uleja tshia kuenza patudi ne tunyinganyinga uvua mungambuluishe bikole. Uvua diandamuna ku masambila anyi.”

8. Tela malu adi aleja ne: Yehowa uvua munange Yezu.

⁸ Yehowa mmutunange ne udi ututabalela, anu muvuaye munange Yezu ne umutabalela pavuaye pa buloba wenza mudimu mukole uvuaye mumupeshe. (Yone 5:20) Wakamuambuluisha bua kushalaye anu ne ditabuja dikole, kumukankamijaye pavuaye ne kanyinganyinga, ne kuenzaye bua apete bintu bivuaye nabi dijinga. Wakambila kabidi Muanende ne: uvua mumunange ne uvua umuanyisha. (Mat. 3:16, 17) Bu muvua Yezu mutuishibue ne: Tatu wende wa mu diulu uvua mumunange ne umuambuluisha misangu yonso, kavua udimona nkaya to.​—Yone 8:16.

9. Ntshinyi tshidi tshitujadikila ne: Yehowa mmutunange?

⁹ Anu bu Yezu, tuetu bonso tudi badimuene mudi Yehowa mutunange mu mishindu ya bungi. Anji elabi meji: Yehowa mmutukoke kudiye ne mmutupeshe bana betu ba bungi badi batunange, badi benza anu bua tuikale ne disanka ne batukankamija patudi ne tunyinganyinga. (Yone 6:44) Yehowa udi utupesha kabidi bionso bitudi nabi dijinga bua tushale anu ne ditabuja dikole. Udi utukumbajila too ne majinga etu dituku dionso. (Mat. 6:31, 32) Patudi tuela meji a mudi Yehowa mutunange, tudi tumunanga petu bikole.

10. Mushindu udi Yehowa wenzela bena Kristo netu malu udi mua kutulongesha tshinyi?

¹⁰ Yehowa mmunange bena Kristo netu. Kadi kabitu anu bipepele misangu yonso bua tuetu kubananga ne kubaleja ne: tudi babanange to. Imue misangu, bitu bitukolela nanku bualu tudi bafumine miaba ya bungi mishilangane ne tudi ne bilele bishilashilangane. Tuetu bonso tutu tuenza bilema bidi mua kufiikisha bakuabu munda anyi kubabungamija. Nansha nanku, tutu tudienzeja bua kunanga bena Kristo netu bikole. Mushindu kayi? Mpatudi tuidikija Tatu wetu, tunanga petu bena Kristo netu. (Ef. 5:1, 2; 1 Yone 4:19) Tumonayi tshidi tshilejilu tshia Yehowa mua kutulongesha.

11. Mmushindu kayi uvua Yezu muidikije “luse lunene” lua Yehowa?

¹¹ Yehowa utu ne “luse lunene.” (Luka 1:78) Muntu udi ne luse utu umvua bibi padiye umona bakuabu bakenga; utu ukeba mishindu idiye mua kubambuluisha ne kubakolesha. Mushindu uvua Yezu wenzela bantu malu udi uleja mutu Yehowa ubumvuila luse. (Yone 5:19) Musangu kampanda pakamonaye musumba wa bantu “wakabumvuila luse, bualu bavua batatshishibue, balekelela bu mikoko idi kayiyi ne mulami.” (Mat. 9:36) Pamutu pa kunanga anu bantu abu patupu, wakakeba mushindu wa kubambuluisha. Wakondopa babedi, kukoleshaye bavua “batata ne midimu mikole ne bambule majitu mabapite.”​—Mat. 11:28-30; 14:14.

12. Fila tshilejilu tshia mutudi mua kuditeka pa muaba wa bakuabu.

¹² Tuetu bele meji a ntatu idi bana betu batuilangana nayi, netumanye mua kuditeka pa muaba wabu. Tshilejilu, muanetu wa bakaji kampanda udi mua kuikala ne disama dikole. Nansha mutuye kayi udiabakena, kadi udi pamuapa mua kusanka bikole muntu yeye mumuambuluishe. Utu ukokesha bua kukumbajila bena mu dîku diende majinga abu a ku mubidi anyi? Katuenaku  mua kumulambila tshiakudia anyi kumulongoluela mu nzubu anyi? Muanetu wa balume kampanda udi mua kuikala mujimije mudimu wende. Katuenaku mua kuikala tumupesha tumakuta tshibi kayi umanya ne: tuetu ke badi baafile, bua kumuambuluisha too ne padiye upeta mudimu mukuabu anyi?

13-14. Mmushindu kayi utudi mua kupeshangana bintu bu Yehowa?

¹³ Yehowa mmupeshanganyi wa bintu munene. (Mat. 5:45) Ki mbimpe tuindile bua bena Kristo netu batulombe diambuluisha bua tuetu kushisha kubaleja luse to. Anu bu Yehowa, tudianjile kubenzela malu kampanda bua kubambuluisha. Yehowa utu utubandishila dîba dituku dionso nansha tuetu katuyi bamulombe. Dîba ditu diambuluisha bantu bonso, nansha badi kabayi ne dianyisha. Yehowa udi uleja mudiye mutunange padiye utupesha bitudi nabi dijinga. Tudi petu banange Yehowa bikole bualu nNzambi wa malu mimpe ne udi upeshangana bintu!

¹⁴ Bana betu ba bungi badi bidikija Tatu wetu wa mu diulu bakeba mishindu ya kuikala kupesha bakuabu bintu. Tshilejilu, mu 2013 tshipepele tshikole tshia Haiyan tshivua tshinyangakaje bintu bia bungi mu ditunga dia Philippines. Bana betu bavule bavua bajimije nzubu yabu ne bintu biabu. Kadi bena Kristo nabu ba pa buloba bujima bakabambuluisha ne lukasa luonso. Ba bungi bakafila makuta anyi bakadifila bua kuibakulula nzubu ya bana betu abu mitue ku 750 peshi kuyilongolola bu mu tshidimu tshijima. Mu tshikondo tshia tshipupu tshia korona etshi, Bantemu badi badienzeja bikole bua kuambuluisha bena Kristo nabu. Patudi tuambuluisha bana betu katuyi tujingakana, tudi tuleja mutudi babanange.

15-16. Bilondeshile Luka 6:36, ntshinyi tshitudi ne bua kuenza bua kuidikija Tatu wetu wa mu diulu?

¹⁵ Yehowa utu ne luse ne utu ubuikidilangana. (Bala Luka 6:36.) Dituku dionso edi tudi tumona mudi Tatu wetu wa mu diulu utufuila luse. (Mis. 103:10-14) Bayidi ba Yezu bavua bapange bupuangane. Nansha nanku uvua ubafuila luse ne ubabuikidila. Wakitaba too ne bua kufila muoyo wende bua kutubuikidila mpekatu. (1 Yone 2:1, 2) Mushindu udi Yehowa ne Yezu batufuila luse ne batubuikidila udi utusemeja pabuipi nabu.

¹⁶ Tudi tukolesha dinanga didi munkatshi muetu patudi ‘tufuila bana betu luse ne muoyo  mujima.’ (Ef. 4:32) Bushuwa, bidi mua kutukolela imue misangu bua kufuila bakuabu luse, nanku mbimpe tuikala tudienzeja. Muanetu wa bakaji mukuabu wakamona ne: tshiena-bualu tshia mu Tshibumba tshia Nsentedi tshia ne: “Tufuilangane luse ne muoyo mujima” tshiakamuambuluisha bua kuenza anu nanku. * Udi wamba ne: “Tshiena-bualu atshi ntshingambuluishe bua kumanya mua kufuila bakuabu luse. Tshivua tshileje ne: paudi ufuila bakuabu luse, kabiena biumvuija ne: udi wanyisha bubi budibu bakuenzele abu anyi upepeja lutatu ludibu bakukebele to. Kadi paudi ubafuila luse, kuakubalamina kabidi munda bua bubi abu to, dîba adi udi upeta ditalala.” Patudi tufuila bena Kristo netu luse ne muoyo mujima, tudi tuleja ne: tudi babanange ne tudi tuidikija Tatu wetu Yehowa.

17. Bilondeshile Matayi 5:16, mmunyi mutudi mua kutumbisha Tatu wetu wa mu diulu?

¹⁷ Tudi ne diakalenga dinene dia kuikala mu dîku dia bana betu ba pa buloba bujima badi banangangane. Tudi basue bua bantu ba bungi balue bua tutendelele nabu Nzambi wetu. Ke bualu kayi, mbimpe tudimuke bua katuenji bualu nansha bumue budi mua kufikisha bantu ku diakula bibi bua batendeledi ba Yehowa anyi bua Tatu wetu wa mu diulu to. Tudi tudienzeja bua kuikala ne bikadilu bimpe bidi mua kukoka bantu ku lumu luimpe.​—Bala Matayi 5:16.

18. Ntshinyi tshidi mua kutuambuluisha bua kuyisha ne dikima dionso?

¹⁸ Misangu mikuabu, bamue bantu badi mua kuakula bibi bua bualu buetu anyi mene kutukengesha bua mutudi tutumikila Tatu wetu wa mu diulu. Ntshinyi tshitudi mua kuenza tuetu tumvua buôwa bua kuambila bakuabu malu atudi tuitabuja? Tudi mua kueyemena Yehowa ne Muanende bua batuambuluishe. Yezu wakambila bayidi bende ne: kabaditatshishi bua mushindu wa kuakula anyi bua tshia kuamba to. Bua tshinyi? Wakabumvuija ne: “Tshinudi ne bua kuamba nebanupeshatshi pa dîba adi; bualu ki nganu nuenu badi bakula to, kadi nyuma wa Tatu wenu ke udi wakuila mukana muenu.”​—Matayi 10:19, 20.

19. Fila tshilejilu tshia muanetu uvua muyishe ne dikima dionso.

 ¹⁹ Tuangate tshilejilu tshia muanetu Robert. Tshikondo kampanda patshivuaye utuadijilaku kulonga Bible muikale anu ne dimanya dikese dia malu a mu Bible, bakamubikidisha ku kabadi ka basalayi mu Afrique du Sud bua kulumbulula. Yeye kumvuija bena ku kabadi aku ne dikima dionso ne: bu muvuaye munange bana betu, kavua musue kubuelakana mu malu a panu to. Uvua ne dianyisha dia bungi dia kuikala mu dîku dia Yehowa. Nzuji wakamuebeja ne: “Bana benu mbanganyi?” Muanetu Robert kavua mudianjile kuelela lukonko alu meji to, kadi wakavuluka diakamue mvese wa dituku adi. Mvese au uvua Matayi 12:50 udi wamba ne: “Muntu yonso udi wenza disua dia Tatu wanyi udi mu diulu, yeye eu ke muanetu wa balume, muanetu wa bakaji, ne mamuanyi.” Nansha mutshivua muanetu Robert utuadijilaku kulonga Bible, nyuma wa Yehowa wakamuambuluisha bua kuandamuna lukonko alu ne mikuabu ya bungi ivuaye kayi muelele meji to. Bushuwa Yehowa uvua ne bua kuikala musanke bikole bua bualu buende! Yehowa udi usanka kabidi patudi tumueyemena bua atupeshe dikima dia kuyisha mu nsombelu mikole.

20. Mbimpe tudisuike bua kuenza tshinyi? (Yone 17:11, 15)

²⁰ Tutungunukayi ne kuanyisha diakalenga ditudi nadi dia kuikala mu dîku dia bana betu badi banangangane. Tudi ne Tatu mutambe buimpe wa katshia ne bana betu ba bungi badi batunange. Mbimpe tuikale tuleja dianyisha misangu yonso bua bualu ebu. Satana ne bena diende babi badi badienzeja bua kutufikisha ku dielakana tubanga kudiebeja bikale Tatu wetu wa mu diulu ni mmutunange. Badi benza kabidi muabu muonso bua kunyanga buobumue buetu. Kadi Yezu wakasambila bua bualu buetu, ulomba Tatu wetu bua atulame bua dîku dietu dikale anu mu buobumue. (Bala Yone 17:11, 15.) Yehowa wakandamuna disambila diende adi. Anu bu Yezu, katuelakanyi musangu nansha umue tuela meji ne: Tatu wetu wa mu diulu ki mmutunange ne kena utuambuluisha to. Tudisuikayi bua kutungunuka ne kusemena kabidi pabuipi bikole ne bana betu.