1. Jotich Jehova nyalo luongo Jehova nade?

JOTICH Jehova oriwo Yesu Kristo ma “en jal makayo kuom chuech duto,” kaachiel gi malaike mang’eny ahinya. (Kol. 1:15; Zab. 103:20) Ka ne Yesu ni e piny ka, nonyiso maler ni jotich Jehova nyalo luongo Jehova ni Wuon-gi. Chieng’ moro ka ne Yesu wuoyo gi jopuonjrene noluongo Jehova ni “Wuora kendo Wuonu.” (Joh. 20:17) Kendo sama wachiwo ngimawa ne Jehova mi obatiswa, wabedo e kind owete gi nyimine manie riwruok makende.​—Mar. 10:29, 30.

2. En ang’o ma wabiro nono e sulani?

² Nitie joma ok yotnegiga neno Jehova kaka Wuoro ma jahera. Jomoko bende ok ong’eyo yore ma ginyalo nyisogo ni gihero Jokristo wetegi. E sulani, wadwaro nono kaka Yesu nokonyowa neno Jehova kaka Wuoro ma jahera ma wanyalo makogo osiep. Bende, wabiro neno yore ma wanyalo nyisogo ni wahero owetewa gi nyiminewa mana kaka Jehova oherogi.

3. Ere kaka lamo ma Yesu nopuonjowa miyo wamedo hero Jehova?

³ Jehova en Wuoro ma jahera. Yesu dwaro ni wane Jehova kaka en owuon onene, tiende ni, kaka janyuol ma jahera ma yot wuoyogo, to ok kaka jatelo ma ketonwa mana chike kendo ma ok ng’won. Waneno mano maler ka wang’iyo yo ma Yesu nopuonjogo jopuonjrene lemo. Nochako lamono gi wechegi: “Wuonwa.” (Mat. 6:9) Yesu ne nyalo yiero nyisowa ni sama walemo waluong Jehova mana ni “Nyasaye Manyalo Duto,” “Jachuech,” kata “Ruoth mochwere,” ma gin nyinge makare  mipakogo Jehova e Muma. (Cha. 49:25; Isa. 40:28; 1 Tim. 1:17) Kar mano, Yesu nonyisowa ni waluong Jehova ni “Wuonwa.”

4. Ang’o momiyo wanyalo wacho ni Jehova dwaro ni wasud machiegni kode?

⁴ Be iyudoga ka tekni neno Jehova kaka Wuoro ma jahera? Moko kuomwa yudoga ka teknegi nene kamano. Nyalo bedonwa matek nene kamano ka po ni samoro wuonewa ne ok ng’won kodwa e kinde ma ne wapon. To mano kaka wamor ng’eyo ni Jehova ong’eyo maber kaka wawinjo e chunywa! Odwaro sudo machiegni kodwa. Mano e momiyo Wachne jiwowa niya: “Suduru machiegni gi Nyasaye to en bende nosud iru.” (Jak. 4:8) Jehova oherowa ahinya kendo osingonwa ni obiro bedonwa Wuoro maber ahinya.

5. Ka luwore gi Luka 10:22, ere kaka Yesu nyalo konyowa sudo machiegni gi Jehova?

⁵ Yesu nyalo konyowa sudo machiegni gi Jehova. Yesu ong’eyo Jehova maber, kendo kinde duto otemoga mondo obed gi kido kaka mag Wuon-gi. Mano e momiyo nowacho kama: “Ng’at ma osenena, oseneno Wuoro bende.” (Joh. 14:9) Yesu chalo kaka owadwa maduong’ ma puonjowa kaka wanyalo winjo Wuonwa kendo miye luor. Bende, onyisowa gik ma ka watimo, to wabiro moro Nyasaye kendo sudo machiegni kode. Kata kamano, gik ma Yesu notimo ka ne en e piny kae konyowa neno kaka Jehova en Nyasaye mang’won kendo ma jahera. (Som Luka 10:22.) Wane ane ranyisi moko.

6. Chiw ane ranyisi ma nyiso ni Jehova ne winjoga lamo mag Yesu.

⁶ Jehova winjoga nyithinde. Ne ane kaka Jehova chikoga ite ne Wuode makayo. Onge kiawa ni Jehova ne winjoga lamo mang’eny mag Wuode ka ne Wuode ni e piny kae. (Luka 5:16) Kuom ranyisi, nowinjo ka ne Yesu lamo ka ne pok otimo yiero madongo, kaka e kinde ma nodwaro yiero jootene 12. (Luka 6:12, 13) Jehova nowinjo bende ka ne Yesu lame e kinde ma ne chunye onyosore ahinya. Mana matin ka ne pok ondhoge, Yesu nolamo Wuon-gi gi kinda e wi tem maduong’ ma  nochiegni romogo. Jehova ne ok owinjo awinja lamo mar Wuodeno, to ne oorone malaika mondo odhi otege.​—Luka 22:41-44.

7. Iwinjoga nade e chunyi sama ing’eyo ni Jehova winjoga lamogi?

⁷ E ndalowagi, Jehova pod winjoga lamo mag jotichne kendo odwokoga lamogo e kinde mowinjore, kendo e yo maber. (Zab. 116:1, 2) Ne ane ranyisi mar nyaminwa moro manie piny India. Nosebedo konyagore gi chuny monyosore kod parruok mang’eny, kendo nokwayo Jehova gi kinda mondo okonye e wi wachno. Nondiko kama: “Program mar JW Broadcasting^® ma Mei higa 2019 ma ne wuoyo e wi kaka wanyalo nyagore gi luoro kod parruok, nobiro e kinde mowinjore koda ndi. Jehova notiyo gi programno e dwoko lamoga.”

8. Jehova nonyiso nade ni nohero Yesu?

⁸ Jehova oherowa kendo odewowa ahinya mana kaka nohero Yesu kendo nodewe ka ne en e piny ka. (Joh. 5:20) Nokonyo Yesu mondo obed gi yie motegno, nojiwe e kinde ma chunye nonyosore, kendo noneno ni Yesu oyudo gik ringruok duto ma nochuno. Bende, Jehova nowacho achiel kachiel ni ohero Wuode kendo omor kode. (Mat. 3:16, 17) Yesu nong’eyo ni Wuon-gi ma jahera me polo ne ni kode kinde duto kendo noikore konye.​—Joh. 8:16.

9. Gin gik mage ma nyiso ni Jehova oherowa?

⁹ Mana kaka Yesu, waduto waseneno yore mopogore opogore ma Jehova osenyisogo ni oherowa. Parie wachni: Jehova noywayowa ire mondo wabed osiepene, kendo osemiyowa owete gi nyimine moherowa ma miyowaga mor kendo jiwowa sama chunywa onyosore. (Joh. 6:44) Bende, Jehova miyowaga chiemb chuny ma konyowa tego yiewa. E wi mago, okonyowaga yudo gige ringruok mochuno pile ka pile. (Mat. 6:31, 32) Sama waparo gik ma Jehova osetimonwago, hera ma waherego medorega.

10. En ang’o ma wanyalo puonjore kuom yo ma Jehova nenogo owetewa gi nyiminewa?

¹⁰ Jehova ohero owetewa gi nyiminewa. Kata kamano, nitie kinde ma wan to wanyalo yudo ka ok yotnwa herogi. Gima kamano nyalo timore nikech waa e ogendni mopogore opogore kendo ok wapon e yo machalre. Bende, waduto warem, to mano nyalo miyo watim gik ma chwanyo jowetewa. Kata kamano, pod wanyalo timo matek mondo waherre. Wanyalo timo mano e yo mane? En kuom luwo ranyisi mar Jehova. (Efe. 5:1, 2; 1 Joh. 4:19) Wane ane gima wanyalo puonjore kuom ranyisi ma Jehova oseketonwa.

11. Ere kaka Yesu noluwo ranyisi mar Wuon-gi mar kecho ji?

¹¹ Jehova en Nyasaye ma kecho ji. (Luka 1:78) Ng’at ma kecho ji winjoga malit sama ji chandore kendo omanyoga yore monyalo konyogo joma chandorego kata hoyo chunygi. Yesu noluwo ranyisi mar Jehova kuom kecho joma ne chandore. (Joh. 5:19) Chieng’ moro Yesu noneno oganda moro kendo “nokechogi nikech ne isandogi malit, kendo ne gidiwo mana ka rombe ma onge jakwath.” (Mat. 9:36) Yesu ne ok owinjo awinja malit ne joma chandore kae to oweyogi kamano. Nochango joma ne tuo kendo noduogo chuny joma ‘nojony kendo ma ting’ ne turo.’​—Mat. 11:28-30; 14:14.

12. Chiw ane ranyisi ma nyiso kaka wanyalo kecho jomamoko.

¹² Ka waparo chandruoge ma Jokristo wetewa kaloe, biro bedonwa mayot kechogi. Kuom ranyisi, nyalo bedo ni nitie nyaminwa  moro ma tuore ahinya. Kata obedo ni samoro ok ohero wuoyo e wi tuoneno, onyalo winjo maber ka wakonye e yo moro. Be dibed ni oyudoga ka tekne pidho joode? Donge wanyalo chiwore mondo wakonye tedo kod luoko? Samoro nitie owadwa moro ma tich orumone. Donge wanyalo chiwore miye pesa moro ma ok wafulo nyingwa mondo okonye ka pok oyudo tich machielo?

13-14. Ere kaka wanyalo luwo ranyisi mar Jehova mar bedo jachiwo?

¹³ Jehova en Nyasaye ma jachiwo. (Mat. 5:45) Ok onego warit nyaka Jokristo wetewa okwawa kony e ka wakechgi. Mana kaka Jehova timoga, wan bende wanyalo konyogi kata ka ok gikwayowa. Jehova miyowaga chieng’ pile kata ka ok wakwaye. Kendo waduto wayudoga ber mar chieng’, moriwo nyaka joma ok gonega erokamano. Donge en adier ni Jehova nyisoga ni oherowa kuom miyowa gige ringruok mochuno? To mano kaka wahero Jehova nikech ong’won kendo ojachiwo!

¹⁴ Jokristo mang’eny osenyiso ni giluwo ranyisi mar Jehova kuom bedo jochiwo. Kuom ranyisi, e higa mar 2013, yamo mager miluongo ni Super Typhoon Haiyan nokelo masira maduong’ e piny Philippines. Owetewa gi nyiminewa mang’eny nolalo utegi kod mwandugi. Kata kamano, owete gi nyimine moa e piny mangima nochiwore mondo okonygi. Thothgi nooro pesa, to moko nochiwore dhi konyo e gero ute manyien ne owetego kata losonegi kuonde ma nokethore e utegi. Kuom dweche manok kende, ne giseloso ute ma dirom 750. E kinde tuo mar korona, owete gi nyimine nochiwore gi chunygi duto mondo gikony jowetegi ma ne kalo e pek. Sama wachiwore mapiyo mondo wakony Jokristo wetewa, wanyiso ni waherogi.

15-16. Ka luwore gi Luka 6:36, en yo mane makende ma wanyalo luwogo ranyisi mar Wuonwa manie polo?

¹⁵ Jehova en Nyasaye mang’won, ma kechoga ji, kendo moikore weyo ne ji kethogi. (Som Luka 6:36.) Odiechieng’ kodiechieng’, wanenoga yore ma Jehova nyisowago ng’wonone. (Zab. 103:10-14) Jolup Yesu ne gin joma orem, kata kamano, Yesu ne ng’won kodgi  kendo noweyonegiga kethogi. Yesu noyie nyaka chiwo ngimane nikech richowa. (1 Joh. 2:1, 2) Yo ma Jehova kod Yesu osenyisowago ng’wono kendo weyonwa kethowa miyo wagombo sudo machiegni ahinya kodgi.

¹⁶ Watego hera manie kindwa sama waweyo ne jowetewa kethogi gi “chuny man thuolo.” (Efe. 4:32) Mano seche moko dwaroga kinda ahinya. Nyaminwa moro nowacho ni sula ma wiye wacho ni “Ng’ato ka Ng’ato Owene Nyawadgi Kethone” ma yudore e Ohinga mar Jarito nokonye ahinya e wachno. * Nondiko kama: “Sulano nokonya neno kaka weyo ne jomamoko kethogi en gima ber. Nolero ni weyo ne jomoko ok nyis ni koro wayie gi gik maricho ma gitimo, kata wawuondore ni ok wachwanyore. Kar mano, weyo ne jomamoko kethogi nyiso ni ok wadwar dhi nyime bedo kodgi gi ich-wang’, kendo wadwaro rito kuwe e chunywa.” Sama waweyo ne Jokristo wetewa kethogi gi chuny man thuolo, wanyiso ni waherogi kendo waluwo ranyisi mar Jehova Wuonwa.

17. Ka luwore gi Mathayo 5:16, ere kaka wanyalo miyo Wuonwa manie polo duong’?

¹⁷ Wan gi thuolo makende mar bedo e kind owete gi nyimine ma wuok e piny mangima kendo moherore gadier. Wagombo ni ji mang’eny kaka nyalore oriwre kodwa e lamo Nyasachwa. Nikech mano, watang’ gi gimoro amora ma nyalo miyo ji obed gi paro ma ok owinjore e wi Jehova kata Joneno wetewa. Watemoga matek mondo kinde duto watim gik mabeyo ma nyalo ywayo ji ir Jehova.​—Som Mathayo 5:16.

18. Ang’o ma nyalo konyowa lero yiewa ma ok waluor?

¹⁸ Nitie kinde ma jomoko nyalo jarowa kata sandowa mana nikech waluwo chike mag Wuonwa manie polo. Ang’o ma wanyalo timo ka po ni waluor lero ne jomamoko yiewa? Wanyalo bedo gadier ni Jehova kod Yesu oikore konyowa. Yesu nonyiso jopuonjrene ni ok nonego giparre kuom gima gibiro wacho. Nikech ang’o? Nonyisogi kama: “Gima onego uwach ibiro miu gie sechego; nikech un ok e ma  uwuo, to roho mar Wuonu e ma wuoyo kokalo kuomu.”​—Mat. 10:19, 20.

19. Chiw ane ranyisi mar owadwa ma nolero yiene gi chir.

¹⁹ Ne ane ranyisi mar Robert. Higni moko mokalo ka ne pod opuonjore Muma kendo ne ok ong’eyo weche mang’eny e wi Muma, notere e kot mar jolweny e piny South Africa mondo oler gimomiyo ne ok odwar donjo e lweny. Nolero gi chir e nyim kotno ni ne ok onyal donjo e lweny nikech ohero owetene ma Jokristo, kendo ni nomor gi thuolo mar bedo e riwruokwa mar owete. Jaj nopenje mapiyo kama: “Owetenigo gin jomage?” Penjono nopoyo Robert, kata kamano, mapiyo nono, noparo ndiko modiechieng’no. Ne en Mathayo 12:50 ma wacho kama: “Ng’at ma timo dwaro mar Wuora manie polo, ng’atno e owadwa gi nyamera kod minwa.” Kata obedo ni Robert ne en mana japuonjre manyien, Jehova nokonye gi rohone e dwoko penjono kaachiel gi penjo mamoko ma nopenje. Onge kiawa ni Jehova ne mor ahinya gi Robert! Wan bende omor kodwa sama wagene mondo omiwa chir mar lero yiewa kata e kinde ma weche tek.

20. En ang’o monego wang’ad e chunywa ni wabiro timo? (Johana 17:11, 15)

²⁰ Wadhiuru nyime nyiso ni wamor bedo e riwruokwa mar oganda Jehova, kama nitie hera madier. Wan gi Wuoro maberie mogik kaachiel gi owete gi nyimine moherowa ahinya. Onego wakaw wechego mapek kinde duto. Satan kod lange temoga ahinya mondo gimi wabed gi kiawa e wi hera ma Wuonwa manie polo oherowago, kendo gitemoga ahinya mondo giketh kuwe ma wan-go e riwruokwa. Kata kamano, Yesu nokwayonwa Wuoni-gi mondo oritwa kendo okonywa siko ka wan e achiel. (Som Johana 17:11, 15.) Jehova osebedo ka dwoko lamono. Mana kaka Yesu, wabeduru gadier ni Wuonwa manie polo oherowa kendo oikore konyowa. Wang’aduru e chunywa ni wabiro siko ka wan machiegni ahinya gi Jokristo wetewa.