1. Ita ese Iehova be ede baita gwauraia toma?

IEHOVA e tomadiho heniamu ruma bese lalonai na Iesu, “e vara ḡaudia iboudiai roboadia,” bona aneru milioni momo. (Kol. 1:15; Sal. 103:20) Iesu tanobada ai e nohova neganai, e hahedinaraia abidadama taudia ese Iehova na bae gwauraia diba, idia Tamadia. Iesu ese ena hahediba taudia e hereva henidiava neganai, Iehova na e gwauraia “Tamagu bona Tamamui.” (Ioa. 20:17) Bona Iehova enai eda mauri ta gwauhamatalaia bona ta bapatiso neganai, ita na tadikaka taihu padadiai ta nohomu, ruma bese ta na heto.​—Mar. 10:29, 30.

2. Ina atikol ai dahaka baita herevalaimu?

² Haida ediai na auka Iehova na Tama lalokauna ta bamona bae laloa. Haida be reana tadikaka taihu ediai lalokau ihahedinaraina dalana na asi dibadia. Ina atikol ai baita itaiamu, edena dalai Iesu ese be durudamu Iehova na Tama lalokauna ta bamona baita laloa, bona baita hetura henia diba. Bona tadikaka taihu ta kara henidiamu neganai, Iehova baita tohotohoa daladia baita herevalaimu.

3. Iesu ese e hahedibalaia ḡuriḡurina amo dahaka ta dibamu?

³ Iehova na Tama lalokauna ta. Iesu na e uramu ita ese Iehova na ia ese e laloamu dalana heḡereḡerena baita laloa. Iehova na hebogahisi bona Tama lalokauna dainai baita hereva henia diba, Ia na se kara aukamu. Iesu ese ena hahediba na ḡuriḡuri dalana e hadibadia neganai, una na e hahedinaraia. Ena ḡuriḡuri matamanai ini e gwau toma: “Tamamai e.” (Mat. 6:9) Iesu na bema gwau diba ita ese Iehova na tama gwauraia “siahu idoinai Diravana,” “ḡau iboudiai Ikaradia Diravana,” eiava “noho hanaihanai King”​—unu iboudiai na mamaoro badina unu na Iehova ena dagi ladadia Baibul ese e gwaurai heḡereḡerena.  (Gen. 49:25; Isa. 40:28; 1 Tim. 1:17, NWT) To, Iesu ese ina hereva e ḡaukaralaia “Tamamai.”

4. Ede ta diba tomamu Iehova na e uramu ia baita hakahikahia?

⁴ Nega haida emu ai e aukamu Iehova na Tama lalokauna ta bamona ba laloa, a? Ita haida na unu bamona. Bema tamada ese ita na e kara auka henidava, reana be aukamu baita laloa ia ese ita na e lalokau henidamu. To, ta moalemu badina ta dibamu Iehova ese eda hemami na e lalopararalaia namonamomu! Ia na e uramu ita dekedekedai baine noho. Una dainai iena hereva ese e hagoadadamu, e tomu: “Dirava ba raka henia kahi, bena ia ese danu baine raka henimui kahi.” (Iak. 4:8) Iehova ese ita na e lalokau henidamu, bona e uramu ita Tamada hereadaena ai bainela.

5. Luka 10:22 heḡereḡerena, edena dalai Iesu ese e durudamu Iehova baita hakahikahia?

⁵ Iesu ese baine duruda diba Iehova turana ai baitala totona. Iesu ese Iehova na e dibaia namonamo bona ena kara na e hahedinarai ḡoevaḡoeva dainai, ini e gwau toma: “Eme itagu tauna ese Tamagu danu vada eme itaia.” (Ioa. 14:9) Kaka badana ta heḡereḡerena, Iesu ese e hadibadamu edena dalai Tamada baita matauraia bona baita kamonai henia, se moalelaimu ḡaudia be ede baita dadarai toma, bona edena dalai Iena lalonamo baita abia. To, Iesu tanobada ai e nohova neganai, ena mauri dalana amo e hahedinaraia Iehova na hebogahisi bona lalokau Diravana. (Luka 10:22 ba duahia.) Mani haheitalai haida aita herevalai.

6. Iehova ese Iesu e kamonai henia haheitalaidia haida a gwaurai.

⁶ Iehova ese natuna na e kamonai henidiamu. Ia ese Natuna roboana e kamonai henia dalana mani aita laloa. Natuna tanobada ai e nohova neganai, e gwaurai ḡuriḡuridia na e kamonai. (Luka 5:16) Iesu na abi hidi badadia, heḡereḡere aposetolo 12 baine abidia hidi neganai, e gwaurai ḡuriḡuridia na Iehova ese e kamonai. (Luka 6:12, 13) Danu, Iesu na e lalohekwarahi bada herea dainai Iehova e ḡuriḡuri henia neganai, Iehova ese e kamonai henia. Iesu na taona do se tore neganai baine davari hahetoho aukana dainai, Tamana e ḡuriḡuri henia.  Iehova ese Iesu ena ḡuriḡuri na dia e kamonai mo, to danu aneru ta e siaia Natuna lalokauna e hagoadaia.​—Luka 22:41-44.

7. Eda hemami be ede bamona bema ta dibamu Iehova ese eda ḡuriḡuri na e kamonaimu?

⁷ Hari ina negai, Iehova na dounu ena hesiai taudia edia ḡuriḡuri e kamonaimu, bona nega korikori ai bona dala maorona ai e haerelaimu. (Sal. 116:1, 2) India ai taihu ta enai una e vara dalana mani aita laloa. Ia na e lalohekwarahi momova, bona Iehova enai una na e ḡuriḡurilaia goadagoada. E gwa: “May 2019 JW Broadcasting^® program ai lalohekwarahi ihanaidia daladia e herevalai. Una na lau e durugu ḡauna maorona bona egu ḡuriḡuri haerena.”

8. Ededia dalai Iehova ese Iesu enai lalokau e hahedinaraia?

⁸ Iehova ese ita na e lalokau henidamu bona e laloda badamu, Iesu tanobada ai e nohova neganai e lalokau henia bona e laloa bada heḡereḡerena. (Ioa. 5:20) Ia ese Iesu na lauma dalanai e hagoadaia bona tauani dalanai e durua. Bona Iehova ese Natuna enai ena lalokau bona lalonamo na e gwaurai hedinarai. (Mat. 3:16, 17) Iesu na mai dibana Tamana lalokauna gubai ese hanaihanai ia na be duruamu, una dainai se mamia ia na sibona.​—Ioa. 8:16.

9. Ede ta diba tomamu Iehova ese ita na e lalokau henidamu?

⁹ Iesu heḡereḡerena, ita iboudai ese Iehova ena lalokau na dala momo ai ta mamia. Mani ina a laloa: Iehova ese ita na iena lalokau bona lalotamona ruma besena lalonai e hakauda mai, unu amo baita moale bona ta lalomanokamu neganai baine hagoadada. (Ioa. 6:44) Danu, Iehova ese eda abidadama baine hagoadaia totona, hanaihanai lauma aniani e henimu. Bona dina ta ta ai tauani dalanai iduruda ḡaudia e henidamu. (Mat. 6:31, 32) Iehova ena lalokau ita edai baita laloamu neganai, eda lalokau ienai na be badamu.

10. Iehova ese eda tadikaka taihu e kara henidiamu dalana amo dahaka ta dibamu?

¹⁰ Iehova ese eda tadikaka taihu na e lalokau henidiamu. To, nega haida ita ese tadikaka taihu ediai lalokau baita hahedinaraia na auka. Badina eda kastom bona mauri daladia na idauidau. Bona ta karamu kereredia ese ma haida baine habadudia bona baine hahisidia diba. To, dounu tadikaka taihu ediai lalokau na baita hahedinaraia diba. Edena dalai? Tamada baita tohotohoa, tadikaka bona taihu ediai lalokau baita hahedinaraia. (Efe. 5:1, 2; 1 Ioa. 4:19) Mani Iehova ena haheitalai amo baita diba ḡaudia aita lalodia.

11. Edena dalai Iesu ese Iehova ena “hebogahisi” karana e hahedinaraia?

¹¹ Iehova ese “hebogahisi” karana na e hahedinaraiamu. (Luka 1:78) Hebogahisi tauna na taunimanima e itadiamu e hisihisimu neganai e bogadia hisimu, bona dala e tahumu baine durudia bona baine hagoadadia. Iesu ese taunimanima e kara henidia neganai, Iehova ena hebogahisi karana e tohotohoa. (Ioa. 5:19) Nega ta Iesu ese hutuma e itadia neganai, “e bogadia hisi, badina be taudia e boera, bona e karoho, mamoe asi ireḡudia na heheto.” (Mat. 9:36) Iesu ese dia e bogadia hisi mo. To, gorere taudia e hanamodia bona ‘tau boera bona maduna metau taudia’ e durudia.​—Mat. 11:28-30; 14:14.

12. Hebogahisi karana baita hahedinaraia diba ena haheitalai ta a gwauraia.

¹² Bema tadikaka taihu ese e davarimu hekwakwanaidia baita lalomu, hebogahisi karana na baita hahedinaraia dibamu. Heḡereḡere, taihu ta na reana gorere badana ta e davaria. Ena be ena gorere na se herevalaiamu, to be moalemu bema ta ese be duruamu. Tauani dalanai  ena ruma bese be ede e naria tomamu? Be uramu baita durua ena aniani baita nadu eiava ruma baita haḡoevaia, a? Eiava, tadikaka ta na reana ena moni ḡaukara amo e hadokoa. Ita ese moni na harihari ḡauna ta heḡereḡerena envalop ai baita udaia, to ladada na basita torea, bona baita henia. Reana unu baita durua toma ela bona ḡaukara ta baine davaria.

13-14. Iehova heḡereḡerena, edena dalai ita ese hariharibada karana baita hahedinaraia diba?

¹³ Iehova na hariharibada Diravana. (Mat. 5:45) Namona na basita nari ela bona tadikakada ese edai heduru bae noi bena hebogahisi baita hahedinaraia. To, Iehova heḡereḡerena, eda heduru do asie noia neganai, namona na kara haida baita kara. Ena be asita noiamu to dina ta ta ai Iehova ese dina e hadaeamu! Bona taunimanima iboudiai ese dina ena namo e moalelaiamu, dia Iehova e tenkiu heniamu taudia mo. Iehova ese eda dabu ḡaudia e henimu karana amo ena lalokau ita edai e hahedinaraiamu, ani? Iehova ena kara namo bona hariharibada karana dainai ta lalokau henia badamu!

¹⁴ Tadikaka taihu momo na Tamadia gubai e tohotohoamu, haida ese ediai heduru do se noi neganai hariharibada karana e hahedinaraia. Heḡereḡere, laḡani 2013 ai, Philippines ai Typhoon badana ladana Haiyan ese dika bada herea e havaraia. Tadikaka taihu momo ese edia ruma bona kohu e haboiodia. To, tadikakadia bona taihudia tanobada heḡeḡemadai ese e durudia. Momo ese moni e heni bona konstraksen ḡaukara badana e durua, una dainai laḡani ta do se abia lalonai ruma 750 e hanamodia lou eiava e haginidia lou! COVID-19 pandemic lalonai, Witnes taudia na e ḡaukara goada tadikaka taihu bae durudia. Bema eda tadikaka taihu baita durudia haraḡamu, baita hahedinaraiamu idia na ta lalokau henidiamu.

15-16. Luka 6:36 heḡereḡerena, edena mai anina bada dalanai Tamada gubai baita tohotohoa diba?

¹⁵ Iehova na hebogahisi bona dika e gwautaomu Diravana. (Luka 6:36 ba duahia.) Dina ta ta ai ena hebogahisi karana na ta mamiamu. (Sal. 103:10-14) Ena be Iesu murinai e raka taudia na dia ḡoḡoevadae, to Iesu ese e bogadia hisiva bona edia dika e gwautaova. Mai  ena ura ida ena mauri e bouboulaia, unu amo eda kara dika bae hegwautao. (1 Ioa. 2:1, 2) Iehova bona Iesu ese e bogada hisimu bona eda dika e gwautaomu dainai idia baita hetura henidia diba, ani?

¹⁶ Dika ta gwautao hehenimu karana ese eda lalokau tadikaka taihu ediai e hagoadaiamu. (Efe. 4:32) Momokani, nega haida ma haida edia dika baita gwautaomu na auka, una dainai una kara baita hanamoa na namo. Taihu ta na e mamia Watchtower atikol ta ladana “Forgive One Another Freely” ese e durua unu e kara toma. * Ia na e gwa: “Una atikol na stadilaia karana ese e durugu lalohadai maorona na abia dika igwautaona karana ai. E hahedinaraia mai eda ura ida ta ena dika ta gwautaomu karana anina na dia ena kerere ta abia daemu eiava una kerere ena dika ta hamaraḡiamu. To, ta ena dika baita gwautao anina na basita badu noho badu noho bona laloda baine maino.” Tadikaka taihu edia dika ta gwautaomu neganai, ta hahedinaraiamu idia ta lalokau henidiamu bona Tamada Iehova ta tohotohoamu.

17. Mataio 5:16 heḡereḡerena, edena dalai Tamada gubai baita hanamoa?

¹⁷ Ta moalemu badina ita na tanobada heḡeḡemadai tadikaka oreana lalonai ta nohomu. Ta uramu taunimanima momo na ita ida eda Dirava baita tomadiho henia hebou. Una dainai, namona na eda kara amo Iehova ena taunimanima bona Tamada gubai ladadia na basita hadika. To, namona na eda kara amo haida baita veridia sivarai namona bae abia dae.​—Mataio 5:16 ba duahia.

18. Dahaka ese baine duruda diba baita haroro basita gari?

¹⁸ Tamada gubai ta kamonai heniamu dainai, nega haida ita na haida ese be gwau henidamu eiava be daḡedaḡe henidamu. Haida vairadiai eda abidadama baita gwaurai hedinarai neganai, bema baita gari dahaka baita kara na namo? Ta dibamu Iehova bona Natuna ese na be durudamu. Iesu ese ena hahediba taudia e hagoadadia basie lalohekwarahi idia be dahaka bae gwaurai, eiava ede bae hereva toma. Dahaka dainai? Iesu na e gwa:  “Una hora ai ba gwaurai herevadia na baine henimui. Badina be igwauraina tauna na dia umui, a Tamamui Laumana na lalomui ai baine hereva.”​—Mat. 10:19, 20.

19. Asi garina ida e haroro tauna ta ena haheitalai mani a herevalaia.

¹⁹ Mani Robert ena haheitalai a laloa. Ia na Baibul stiuden matamatana bona ena diba Baibul ai na do dia bada neganai, South Africa edia ami edia kota vairanai e gini. Ia na mai goadana ida kota vairanai e gwa, ia na se ura baine tuari badina tadikakana e lalokau henidiamu. Ia ese ena gabu Iehova ena ruma bese lalonai na e laloa bada! Maoromaoro judge ese e nanadaia “Oi tadikakamu be daidia?” Robert na se lalo una henanadai bae henia, to maoromaoro una dina ena siri e laloa. Una na Mataio 12:50, e gwaumu: “Tamagu guba ai e nohomu na ena ura bae kara taudia, idia hari tadigu bona taihugu bona sinagu.” Ena be Robert na Baibul stiuden matamatana, to Iehova ena lauma helaḡa ese e durua dainai una henanadai bona ia ese se lalo henanadaidia ma haida e haerelaidia. Iehova na Robert enai e moale bada! Iehova na ita edai danu be moalemu bema nega aukadiai ienai baita tabekaumu bona asi garida ida baita haroromu.

20. Laloda baita hadai dahaka baita kara? (Ioane 17:11, 15)

²⁰ Namona na Iehova ena ruma bese lalonai ta nohomu karana na hanaihanai baita laloa bada. Ita Tamada na Tama Hereadaena bona tadikaka taihu ese e lalokau henidamu. Una na basita laloa maraḡi. Satana bona ia murinai e rakamu taudia na e uramu Tamada gubai ena lalokau karana baita daradaralaia, bona e uramu ta moalelaiamu lalotamona karana bae hadikaia. To, Iesu na ita daidai Tamada e noia baine narida, unu amo eda ruma bese na lalotamona ai baine noho. (Ioane 17:11, 15 ba duahi.) Iehova ese una ḡuriḡuri na e haerelaiamu. Iesu heḡereḡerena, Tamada gubai e nohomu ena lalokau bona heduru karana na basita daradaralaia. Namona na laloda baita hadai, hanaihanai Iehova ena ruma bese lalonai baita noho.