1. Nanswalelaka Yehova, isiyani hiiva ni uyova inkhaleehu?

YEHOVA haana aswalyaawe enci akhanle amucyaawe—upacera Yesu, “ule paceriye wumpiya cihinatthi wumpiya citthu cotheene,” ni malayikha menci wiirimu. (Akol. 1:15; Isaa. 103:20) Uhiya commo, ukati Yesu waaryaawe watuninyani aheetthuciha wiira apinaatamu ookhuluvelya pooti ciicammo umwiihana ‘Paapa’ Yehova. Ikwaha imoca nari naattharyaawe, Yesu ahowiirela wiira Yehova khanle ‘Apaapaawe ni Apaapaaya.’ (Joau 20:17) Ukhuma ukati unvaherenreehu Yehova ukumiihu ni upattisiyeehu, hiiva nkhayi ni mayamunneehu ni asirokorihu annifenta nihokhala amuci.—Mark. 10:29, 30.

2. Ula mwahoola unhala uniitthucihani?

² Atthu akiina unawaarika unwehera Yehova Nluku khampa Athumwanaya anaafenta. Ni pooti ukhalaka wiira akhwaawe khancuwela mananna owaathoonyera nifento mayamunnaaya ni asirokoraya o wanlokoni. Ula mwahoola unaahala uttonkaca mananna ntakihero na Yesu cinnikaviheraaya unwehera Yehova khampa Apaapeehu annifenta, ni anlamuliyeehu waaphiyeera. Ciicammo, ninaahala wiitthuca mananna ontakiha Yehova wo waawacera mayamunnehu.

3. Nuulumoni ninnikavihera wiicoona wiira niri wakhiviru ni Yehova Yesu niwiitthucihalyaawe attharyaawe?

³ Yehova khanle Apaapeehu annifenta. Yesu naapheela wiira ninwehere Yehova toko uyova cinonweheraawe—khampa Apaapeehu oonifenta cinene ni anlamuliyeehu uwaattamela, kahi khampa Nluku oohiniwacera ni onnanara nrima. Iyo itthwiiyo inaatepa woonannya nhina nlepelo Yesu naawiitthucihilyaawe attharyaawe. Yesu aapacerihale co ulompa wawe: “Apaapeehu.” (Mat. 6:9) Uyo hataa waahalaawe uwiitthuciha attharyaawe umwiihana Yehova “Nakuru-Cotheene”, “Mumpi” awula “Mwene oowakati wotheene” khawaahala unanarana, kontha moolumo otheennyaayo  anthoonyera makhalelwaawe anoolumiya mbiiblyani. (Upha. 49:25; Isai. 40:28; 1 Tim. 1:17) Masi Yesu niitthucihale wiira nimwiihaneke Yehova “Apaapeehu”, nuulumo ninnikavihera wiicoona wiira niri wakhiviru naayo.

4. Nincuwela cani wiira Yehova naapheela unaattamela?

⁴ Nyuuva unawuurikani unwehera Yehova khampa Apaapeenyu? Atthu enci unawaarika, kontha atthunaka watthokoni wuunuwilyaaya khawaafentaniya. Masi unaanitteela nrima nlattu woocuwela wiira Yehova naawacera inanna cineecooneehu! Uyo mpheela unaattamela. Phimaana Ibiiblya wanniirelaaya co: “Mumphiyeere Nluku, ni uyova naahala wuuphiyeerani.” (Tiya. 4:8) Yehova naanifenta ni naapheela wiira hiiva ninwehere khampa Apaapeehu.

5. Toko cinhimyaaya Luka 10:22, Yesu nonikavihera cani umphiyeera Yehova?

⁵ Yesu pooti unikavihera umwaattamela Yehova. Khaavo ntthu nkiina ntepa uncuwela ratta Yehova unvikana Yesu. Uyo ahotakiha ratta-raatta makhalelo aathumwaane mpaka aheera co: “Ule konne mi, ciicammo howoona Apaapa.” (Joau 14:9) Yesu nokhala khampa anyeenyeehu anniitthuciha waahisima ni waatteeliha nrima Apaapeehu. Ni itthu yuulupale ukhalaka wiira Yesu naanikavihera ucuweleeha makhalelo a Yehova, toko nifento ni unamaana wawe. (Nsome Luka 10:22. *) Nttwee noone matakihero anthoonyera wiira Yehova akhanle Apaapeehu oonifenta venci.

6. Nincuwela cani wiira Yehova anviriyana ulompa wa Yesu?

⁶ Yehova nawaaviriyana asaanaawe. Moone ikwaha imoca Yehova wanviriyannyaawe Mwanawe. Ukati Yesu waaryaawe watuninyani, aholompa ikwaha cinci ni Yehova khweeliini ahonviriyana. (Luka 5:16) Yehova ahonviriyana Mwanawe alompaka ukati waapheelaawe ulakela citthu cuulupale, toko waathanla maapostolu 12. (Luka 6:12, 13) Ni ukati Yesu waasankilyaawe cinene, Yehova ahoviriyana ulompa wawe. Uhalaka vakaani uphiya ukati Yesu waahalaawe uvariya, uyo aholompa ninrimaawe wotheene  aalepelaka athumwaane unlipiha nhina masakha moolupale yaahala unkhumelela. Uyo ukatyuuyo, Yehova khaaviriyanne paasi nlepelo na Yesu, masi ciicammo ahoruma nlayikha wiira nirwee nanlipihe Mwanawe.—Luka 22:41-44.

7. Nineecoona cani nlattu woocuwela wiira Yehova naaviriyana ulompa wihu?

⁷ Ilelo, Yehova naaviriyana ulompa waatthu anonswalela, ni nawaakhulela ukati woophwanelana. (Isaa. 116:1, 2) Arokorihu ankhala u Índia yahooneeha iwiirannyeelaka iyo itthwiiyo. Ayo yaakhala nimasukhuli menci. Yahonlompa Yehova ninrimaaya wotheene ni yahonhimyera itthu yaawiira. Ayo ahantikha co: “Iporokaraama yo JW Broadcasting^® yo Maio yo 2019 yoolumale mananna oovukula masukhuli khayaareere ukikavihera. Iyo iporokaraameeyo yaari inanna Yehova caakhunlyaawe ulompa waka.”

8. Yehova aathonyenre cani wiira aananfenta Yesu?

⁸ Yehova ahonfenta Yesu ni ahonwacera ukati wo masakha otheene yaakhalannyaawe watuninyani; ni Yehova ciicammo naaniwacera otheene cihu niinanna imocaaru. (Joau 5:20) Yehova ahonkavihera Yesu ulipiha waamini wawe, ahommaaliha ukati waakhalaawe nimasukhuli ni ahonvaha citthu caapheelaawe toko iyoolya, ikuwo ni citthu cikiina. Yehova ahonthoonyera Mwanawe wiira aananfenta ni aanaaciveliya nuuyo. (Mat. 3:16, 17) Khuuvo ukati Yesu wiicoonaawe ukhala veekha kontha ancuwela wiira Athumwaane yanhala unkavihera citthu cotheene.—Joau 8:16.

9. Isiyani inthoonyera wiira Yehova naanifenta?

⁹ Toko Yesu, otheene cihu nihomoona Yehova athoonyeraka unifenta. Muupuwele ila itthwiila: Yehova naanihiya wiira nikhale asipatthannyaawe ni honivaha mayamunna ni asirokorihu aanniwacera wiira unitteele nrima. (Joau 6:44) Yehova ciicammo naaniwacera nhina mminepani kontha naanivaha citthu cotheene cimpheeleehu wiira waamini wihu ukhale woolipa. Ni naanikavihera ukhalana citthu co mwiirutthuni cimpheeleehu toko iyoolya, ikuwo ni citthu cikiina. (Mat. 6:31, 32) Noopuwelaka mananna Yehova cinnifentaawe, hiiva ciicammo ninaatepa unfenta.

10. Ninlamuliya untakiha cani Yehova?

¹⁰ Yehova nawaawacera ninifento mayamunneehu ni asirokorihu. Masi hiiva pooti unirikaka waafenta mayamunneehu. Kontha ilema cihu cinaavirikana ni mananna cuunuwihiyeehu khanlikana. Ni otheene cihu pooti upankelana citthu coohinamaana. Hataa ukhalaka commo, otheene cihu pooti ukhitiri ukavihera wiira ufentana wihu ulipe. Manannani? Naatakihaka Apaapeehu ni neekurumicaka waafenta mayamunna ni asirokorihu o wanlokoni. (Efesu 5:1, 2; 1 Jo. 4:19) Nttwee noone isiyani inniitthucihaaya ntakihero na Yehova.

11. Yesu aatakihile cani Athumwaane uthoonyera ‘uthunku’?

¹¹ Yehova naanithoonyera ‘uthunku.’ (Luka 1:78) Ntthu ummwiira uthunku naasanka amoonaka nkhunanawe ahuvaka ni naatotha mananna onkavihera ni ummaaliha uyo ntthuuyo. Mananna Yesu caawaceraawe atthu, uyo aanaathoonyera wiira anwoonela uthunku, khampa Yehova. (Joau 5:19) Waawonnyaawe atthu, Yesu “ahowoonela ikiriri, kontha yaakhala yarutthuwacaka ni yakakheleliyaka uno nuuno toko ikhontwa coohimakampuci.” (Mat. 9:36) Masi Yesu khaawoonenle uthunku paasi, masi ahopanka itthu wiira aakavihere. Uyo ahaavoniha ale yaawerennya ni ahaamaaliha ale yaakhala ‘yahuvahuvaka ni yasuphyaacaka.’—Mat. 11:28-30; 14:14.

12. Nvahe ntakihero ninthoonyera mananna cinlamuliyeehu uthoonyera uthunku.

¹² Wiira naathoonyere uthunku mayamunneehu, woopacera nihaana noopuwelaka masakha anaananaaya. Wootakihera, pooti ukhalaka wiira ahaavo arokorihu wanlokoni anwerennya  cinene. Ayo arokorihwaayo pooti upheelaka ukaviheriya, hataa ukhala wiira khanlepela ukaviheriya. Mwiikohe co: Niireke ayo annokhitiri uwacera saana itthokwaaya? Khawaahala waatteela nrima narweele ntthu wiira aakavihe waapyaa awula ukweca wapuwani? Awula pooti ukhalaka wiira haavo munna hiile nteko waavaraawe wanvaha ipooso. Nnoonela cani unkavihera uyo munnooyo? Wiira munkavihere ukati unhalaawe ukhala atothaka nteko nkhwaawe, nyuuva pooti unvaha nsurukhu woohaahimyeera atthu akiina.

13-14. Ninhala uthoonyera cani ukhala anamavaha toko Yehova?

¹³ Yehova khanle namavaha. (Mat. 5:45) Hiiva khaninlamuliya waaweherera mayamunneehu unilepela wiira naathoonyere uthunku. Toko Yehova, hiiva pooti waakavihera woohiweherera unilepela. Khula nihuku, Yehova naanikumihera ncuwa nawe, hataa hiiva nihinlepelaka! Ni uviha wo ncuwa unaakavihera ukumi waatthu otheene, kahi paasi ukumi wo ale anonsukhuru Yehova. Nlattu woonivaha citthu cotheene cimpheeleehu, Yehova naanithoonyera nifento. Ni hiiva ninanfenta cinene nlattu wookhala Apaapeehu ooreera nrima ni oovaha!

¹⁴ Mayamunneehu ni asirokorihu enci anawaatakiha Apaapeehu o wiirimu ni anawiivaherera uthoonyera unamavaha. Wootakihera, mwaakha wo 2013, naphuvu muulumale eehaniye Haiyan ahowaana ihasara yuulupale u Filipinas. Inupa ni citthu cikiina co mayamunna ni asirokorihu enci cahokwanyuwaca. Masi amuciihu oominepani ntuninyani motheene wowaakuvya yaheevaherera waakavihera ayo mayamunnaayo. Enci yahovaha micanko ni yahokavihera nteko wooteka ni urehererya inupa cookhalaka 750 nhina mwaakha mmoca! Ukati woretta yo COVID-19, Masaahiti a Yehova anneekurumica waakavihera mayamunnaaya ni asirokoraya. Naakuvaka waakavihera mayamunneehu, ninthoonyera wiira ninawaafenta.

15-16. Khampa cinhimyaaya Luka 6:36, ninhala waatakiha cani Apaapeehu o wiirimu?

¹⁵ Yehova naathoonyera uthunku ni khanle nleveleli. (Nsome Luka 6:36. *) Khula nihuku, hiiva ninaakhitiri woona uthunku unnithoonyeraaya Apaapeehu o wiirimu. (Isaa. 103:10-14) Ni Yesu ahaatakiha sana-saana Athumwaane. Hataa acuwelaka wiira attharyaawe akhanle atthu  oopahuwa, Yesu naawoonela uthunku ni nawaalevelela. Uyo haamini uvaha ukumyaawe wiira aleveleliye matampyaaya. (1 Jo. 2:1, 2) Ucuwela wihu wiira Yehova ni Yesu anaanoonela uthunku ni anaanilevelela unaaniiriha utepa waafenta.

¹⁶ Nifento ninniiriha wiiwanana khampa amuci ninaatepa ulipa nakhalaka ‘nilevelelanaka niiraati.’ (Efesu 4:32) Ukati nkiina pooti unirika waalevelela akhwiihu; phimaana nihaana niikurumicaka wiitthuca ulevelela. Itthu yaakavihenre cinene arokorihu amoca waari mwaha wo nrevistani Ukhalenla uneera: “Mwaalevelele akhwiinyu niiraati.” * Ayo arokorihwaayo ahantikha co: “Usoma uyo mwahooyo uhokikavihera urukunusa moopuwelelwaaka ni ukhitiri waalevelela akhwaaka. Uyo mwahooyo wahohimya wiira waalevelela akhwiihu khunakhala wiira inaanicivela itthu yootakhala ipankilyaaya, awula ninaavyaavyeeha itthu yootakhala ipankiyeehu. Ulevelela maanaaya umalamaliha nruukwa nansunkenreehu ntthu nlattu wo citthu cootakhala cinipankilyaawe, ni maanaaya utotha ukhalana nnema wanrimani wihu.” Naalevelelaka niiraati mayamunneehu ni asirokorihu, ninthoonyera wiira ninawaafenta ni ninawaatakiha Apaapeehu, Yehova.

17. Khampa cinhimyaaya Matewus 5:16, ninhala waattitthimiha cani Apaapeehu o wiirimu?

¹⁷ Upanka mphantte waamuciihu oominepani ntuninyani motheene ikhanle iparakha yuulupale. Hiiva nimpheela wiira atthu enci anitakaneelane ni ninswalele nkhayi Nluku. Phimaana, nihaana niikurumicaka wiira nihipanke hataa itthu inhala uwiirihiiha atthu uwuuluma pusya Apaapeehu Yehova ni apoovwaaya. Ukati wotheene niikurumice wiira meettelweehu yaapankihe atthu waakhelela ihapari comaana.—Nsome Matewus 5:16. *

18. Isiyani inhala unikavihera uhoova waahimyeera akhwiihu citthu cinkupaliihu?

¹⁸ Ukati nkiina atthunaka ninawuulumiya pusya awula ninaalupatthiya nlattu woowiiwelela  Apaapeehu o wiirimu. Iyo itthwiiyo inawuupankihani woova waahimyeera akhwiinyu citthu cinkupaliinyu? Nkupali wiira Yehova ni Mwanawe anaahala wuukaviherani. Yesu ahaahimyeera attharyaawe wiira khayaahala utepa usanka woohicuwela itthu yoohimya awula mananna owuuluma. Kontha isiyani? Yesu enre co: “Uyo ukatyuuyo nnaarwaa ucuwelihiya itthu yowuuluma. Kontha khannarwaaka wuuluma veekheenyu, masi nnepa wowaarya wa Apaapeenyu phinrwaa wuukaviherani wuuluma.”—Mat. 10:19, 20.

19. Tipani thoonyenre ulipa nrima ukati woolalya ihapari ca Nluku?

¹⁹ Muupuwele ntakihero na Robert. Nancere usoma Ibiiblya mphiyaaruni ni hinaaya wiitthuca citthu cinci, uyo ahaana arwaaka wuuluma utiripunali yo África do Sul. Masi uyo aholipa nrima ni ahomwiirela suwiisi wiira kheekelakeliha myaha cosiyaasa nlattu wo waafenta mayamunnaawe. Uyo ansukhuru cinene nlattu woopanka mphantte waamuci a Yehova! Vano, suwiisi ahonkoha co: “Mayamunnaa phaapani?” Robert nahonrika waakhula nno nikohonno? Masi wowaakuvya ahoopuwela iveerusu yo nne nihunne, Matewus 12:50: “Ule nopanka itthu impheelaaya Apaapa ari wiirimu, yooyo phiri mwanhimaaka, nrokoraka ni amaama.” Hataa Yehova acuwelaka wiira Robert ancere usomihiya Ibiiblya mphiyaaruni, uyo ahonvaha nnepa wowaarya wiira aakhule nno nikohonno ni makoho makhwaawe yaapankiyaawe. Yehova wahontteela nrima cinene umoona Robert alipaka nrima! Ni ciicammo naakhala ootteeliya nrima cinene nankhuluvelaka ni nalipaka nrima wiira nilalyeere ukati woorikarikaca.

20. Isiyani inlamuliyeenyu ulakela upanka? (Nwehe Joau 17:11, 15)

²⁰ Nhihiye ulemeliha iparakha yoopanka mphantte wo mphwinko muulupale waamuciihu oominepani ni oowinciva nifento. Nihaana Apaapeehu oohilikananiya ni mayamunneehu ni asirokorihu ookhuluvelya. Nhuupuwele wiira upanka mphantte wo ayo amucyaayo itthu ihinhaleenyu uhaleela wanihukuni. Sotwani ni atthwaawe ankhala oorusiya cinene ni anaamananiha unihiiha ukupali wiira Yehova naanifenta, ni ciicammo ampheela unihiiha wiiwanana wihu. Masi Yesu aholompa wiira wiiwanana wihu uhimale. (Nsome Joau 17:11, 15. *) Ni Yehova ri mowaakhula nno nlepelonno. Toko Yesu, nkhuluvele nifento na Yehova. Nkupali wiira Yehova khanhala uhiya wuukaviherani. Ni nlakele uhihiya uwaattamela amuciinyu oominepani.