CIPANDE CA KUSAMBILILAMO 38
Mwalanga Ukuti Mwatemwa Yeova na Ina na ya Nkazi
“Nkuya kuli Tata nupya Tata winu.”—YOA. 20:17.
LWIMBO NA. 3 Wewe Maka Itu, Wewe Twasintililamo
VINO TUMASAMBILILAPO *
1. Uzye Yeova tungamwama uli?
UMU lupwa lwakwe ya kapepa yakwe Yeova mwaya na Yesu wino ali iyeli “pa viumbwa vyonsi,” nupya mwaya na ya malaika aingi. (Kolo. 1:15; Masa. 103:20) Lino Yesu wali pano nsi, wavwile antu ukumanya ukuti yangaama Yeova ukuti Tata. Lino walandanga na asambi yakwe, Yesu walanzile pali Yeova ukuti “Tata nupya Tata winu.” (Yoa. 20:17) Nupya nga twaipeela kuli Yeova nu kubatiziwa, tukaya umu lupwa lwa ina na ya nkazi atemwana.—Mako 10:29, 30.
2. I vyani vino tumasambilila umu cipande cii?
2 Yamwi cikayatalila ukulola Yeova ukuti a Isi uwaya nu kutemwa. Yamwi nayo yatamanya vino yangacita pa kulanga ukutemwa uku ina na ya nkazi. Umu cipande cii, tumasambilila vino Yesu watwavwa ukulalola Yeova ukuti a Tata uwaya nu kutemwa, nu kuti tungapalama kuli aliwe. Tumasambilila na pali vino tungakolanya Yeova muli vino tukacitila aina na ya nkazi.
YEOVA AKALONDA UKUTI MUPALAME KULI ALIWE
3. Uzye ipepo ilyamanyikwa sana likalenga tupalame uli kuli Yeova?
3 Yeova a Tata uwaya nu kutemwa. Yesu akalonda twalola Yeova wakwe vino akamulola kuli kuti wa muvyazi uwaya nu kutemwa wino tungalanda nawe insita ili yonsi, asi wa muvyazi aataya ni cikuuku nupya aakatunena sile vino tulinzile ukucita. Tukasininkizya vino Yesu akalola Yeova muli vino Yesu wasambilizye asambi yakwe ukulapepa. Watandike ipepo ilyamanyikwa sana na mazwi yakuti: “Tata witu.” (Mate. 6:9) Yesu atemwa nga watunenyile ukulaama Yeova ukuti “Wamaka yonsi,” nanti “Leza wino uwaumvile vintu vyonsi,” nanti “Mwene wa manda pe,” nupya mazina ya mucinzi yonsi yaa yaya sile ningo alino yaya nu mu Malembo. (Masa. 91:1; Efes. 3:9; 1 Tim. 1:17) Lelo, Yesu watunenyile ukuti twaama Yeova ukuti “Tata.”
4. Uzye twamanya uli ukuti Yeova akalonda tupalame kuli aliwe?
4 Uzye cikamutalila ukulola Yeova ukuti a Tata uwaya nu kutemwa? Swe yamwi cikatutalila. Ndi cakuti ya tata itu yataali ni cikuuku, cingatutalila ukuzumila ukuti Yeova a tata uwaya nu kutemwa. Nomba tungakomeleziwa ukumanya ukuti Yeova wamanya vino tukayuvwa nu mulandu uno tukayuvwila vivyo. Akalonda ukupalama kuli sweswe. Ali mulandu uno izwi lyakwe likatukomelezya ukuti: “Palamini kuli Leza, nawe alapalama kuli mwemwe.” (Yako. 4:8) Yeova watutemwa nupya watulaya ukuti alaya a Tata umusuma.
5. Ukulingana na Luka 10:22, uzye Yesu angatwazwa uli ukupalama kuli Yeova?
5 Yesu angatwazwa ukupalama kuli Yeova. Yesu wamanya ningo Yeova nupya akakolanya imiyele yakwe imalilike. Ali mulandu uno walandiile ukuti: “Wensi uwandola ala walola na Tata kwene.” (Yoa. 14:9) Wakwe tatalenzi, Yesu akatusambilizya ivya kucindika nu kuvwila Tata, vino tungacita pakuti twamuzanzya alino na vino tungacita pakuti atutemwe. Nomba Yesu watwazwile ukumanya ukuti Yeova waya sana ni cikuuku nu kutemwa. (Belengini Luka 10:22.) Lekini tulande pali vimwi vino wacisile.
Vino Yeova a Isi uwaya nu kutemwa watumile malaika ukuti akakomelezye Umwanakwe (Lolini palaglafu 6) *
6. Insita ci zimwi lino Yeova waswike amapepo yakwe Yesu?
6 Yeova akakutika uku yana yakwe. Sambililini vino Yeova wakutikanga uku Mwanakwe iyeli. Yeova wakutikanga uku mapepo aingi yano umwanakwe wapepanga lino wali pano nsi. (Luka 5:16) Wakutikanga amapepo yakwe Yesu ndi cakuti akulonda ukupingulapo ivintu ivicindame, wakwe lino wasoololanga asambi 12. (Luka 6:12, 13) Yeova nupya kwene uvwile ipepo lyakwe Yesu lino wasakamile sana. Lino kwasile panono ukuti Yuda amufutuke, Yesu wapefile pali vino vyali nu kumucitikila. Yeova atakutike sile ukwi pepo lyakwe Yesu lelo watumile na malaika ukuti akakomelezye umwanakwe.—Luka 22:41-44.
7. Uzye tukauvwa uli ukumanya ukuti Yeova akakutika uku mapepo itu?
7 Na ndakai kwene, Yeova akakutika uku mapepo itu pa nsita ilinge nupya umu nzila isuma. (Masa. 116:1, 2) Uvwini vino nkazi uwa ku India waweni vino Yeova waswike amapepo yakwe. Wakweti intazi ya kusakamala, nupya wapefile kuli Yeova ukuti amwazwe ukumanya ivya kucita pa ntazi iyo. Walemvile ukuti: “Puloglamu ya mulabasa wa JW Broadcasting® iya mu Mei 2019, iyalandanga pali vino tungacita nga twasakamikwa, yangavwile sana. Yaswike mapepo yane.”
8. Umu nzila ci zimwi muno Yeova walangiile ukuti watemwa Yesu?
8 Yeova akatulanga ukutemwa umu nzila ili imwi kwene ino walangilangamo Yesu lino wali pano nsi. (Yoa. 5:20) Wazwanga Yesu ukutwalilila ukuya nu utailo ukome, ukumukomelezya ndi cakuti wasakamikwa, nu kusininkizya ukuti akweti vyonsi vino walondekwanga pakuti atwalilile ukuya nu umi. Nupya Yeova wanenyile Umwanakwe ukuti wamutemwa nupya wazangilanga muli aliwe. (Mate. 3:16, 17) Yesu wamanyile ukuti Isi wa kwi yulu wali nu kutwalilila ukumwazwa, fwandi atayuvwanga ukuti wali wenga.—Yoa. 8:16.
9. Twamanya uli ukuti Yeova watutemwa?
9 Wakwe vino cali kuli Yesu, swensi kwene twailolela vino Yeova watulanga ukutemwa umu nzila izingi. Tale elenganyini pali cii: Yeova watwama ukuti tuye ya cuza yakwe nupya watupeela aina na ya nkazi aya nu kutemwa aakalenga twaya ni nsansa nupya aakatukomelezya nga twasakamikwa. (Yoa. 6:44) Nupya Yeova akatupeela vyonsi vino tukalondekwa pakuti tutwalilile ukuya nu utailo ukome. Akatupeela ni vintu vino tukalondekwa pakuti tutwalilile ukuya nu umi. (Mate. 6:31, 32) Nga twelenganya pali vino Yeova watutemwa, tukamutemelwako.
MWALOLA INA NA YA NKAZI WAKWE VINO YEOVA AKAYALOLA
10. I vyani vino tungasambilila kuli vino Yeova akalola aina na ya nkazi?
10 Yeova watemwa ina itu na ya nkazi. Nomba limwi cingatutalila ukuyatemwa nu kuyalanga ukuti twayatemwa. Insita zimwi cingatutalila pa mulandu wakuti twakulila ukupusanepusane nupya tukalondela intambi izipusanepusane. Nupya swensi tukaluvyanya icakuti itusosya na yauze. Nomba swensi tungezya na maka ukutwalilila ukutemwa ina na ya nkazi. Tungacita uli vivyo? Nga tukukolanya Tata witu lino tukulanga ukutemwa uku ina na ya nkazi. (Efes. 5:1, 2; 1 Yoa. 4:19) Lekini tulole vino tungasambilila kuli Yeova.
11. Uzye Yesu wakolanyanga uli vino Yeova waya “nu luse”?
11 Yeova waya nu ‘kutemwa.’ (Masa. 145:8) Umuntu uwaya nu luse akauvwa uyi nga walola yamwi yakucuula nupya akalondesya ukuyazwa nu kuyateekezya. Yesu wakolanyanga vino Yeova waya nu luse muli vino wacitilanga antu. (Yoa. 5:19) Pa nsita imwi lino waweni umba lya yantu “wayuvwilile uluse, pano yayacuzyanga nupya yaali atazyelwe wa mfwele izyaula kacema.” (Mate. 9:36) Yesu atayalanzile sile ukutemwa, lelo wacisilepo na vimwi pakuti ayazwe. Wapozizye alwale na yonsi acuulanga alino na asenzile “ivisendo ivifine.”—Mate. 11:28-30; 14:14.
Mwakolanya Yeova lino mukulanga uluse na ukapekape ku ina na ya nkazi (Lolini mapalaglafu 12-14) *
12. Tungalanga uli ukuti twaya nu luse uku ina na ya nkazi?
12 Nga tukwelenganya pa ntazi zino aina na ya nkazi yakweti, tulaayalanga uluse. Limwi nkazi angalwala ulwale uwipisye. Atanga alande pa ntazi ino akweti, lelo angaya sana ni nsansa nga umwi wamwazwa. Uzye akakwanisya ukusakamala ulupwa lwakwe muli vino lukulondekwa? Uzye citanga cizipe ukumwazwako ukweleka nanti ukuzifya ing’anda? Limwi umwina incito ingasila. Tungamupeelako impiya izingamwazwako lino atatala wazana incito yuze ukwaula ukumunena ukuti izifuma kuli sweswe.
13-14. Tungaya uli na ukapekape wakwe vino Yeova waya?
13 Yeova a kapekape. (Mate. 5:45) Tutalinzile ukuloleela ukuti aina na ya nkazi yalenge uwazwilizyo pakuti tuyalange uluse. Wakwe Yeova, tungayacitilako vimwi lino yatatala yatunena. Cila wanda akalenga akasanya ukuwala ukwaula ukuti tumulenge. Nupya yonsi kwene yakaipakizya kasanya, asi sile yayo aakataizya. Uzye musikuzumila ukuti vino Yeova akatupeela vyonsi vino tukalondekwa akalanga ukuti watutemwa? Twatemwa sana Yeova pano waya ni cikuuku na ukapekape!
14 Aina na ya nkazi yakakolanya Yeova nupya yakalanga ukapekape kuli yauze. Wakwe umu 2013, imvula iya cimuza icipisye ino yakati Super Typhoon Haiyan yononyile sana ivintu uku Philippines. Mang’anda ya ina na ya nkazi aingi yononike kumwi na vyonsi vino yakweti. Nomba zuwa zuwa aina na ya nkazi umu nsi yonsi yayavwilizye. Aingi yasangwile impiya nanti ukwazwako ukuzifya nu kukuula mang’anda mupipi na 750 mu mwaka sile onga! Lino kwali ulwale wakwe COVID-19, ya Nte yaombisye ukwazwa aina yao na ya nkazi. Ndi cakuti tukwazwa aina itu na ya nkazi zuwa zuwa, tukalanga ukuti twayatemwa.
15-16. I vyani vino ilembo lyakwe Luka 6:36 likalanda ukuti avino tulinzile ukucita pakuti twakolanya Tata witu uwa kwi yulu?
15 Yeova wakwata uluse nupya akaeleela. (Belengini Luka 6:36.) Cila wanda Tata witu uwa kwi yulu akatuvwila uluse. (Masa. 103:10-14) Alondezi yakwe Yesu yataali amalilike, lelo wayuvwilanga uluse nu kuyeleela. Waitemiilwe nu kupeela umi wakwe pakuti imembu zitu zyeleelwe. (1 Yoa. 2:1, 2) Vino Yeova na Yesu yakatweleela nu kutulanga uluse cikalenga tupalame kuli aliyo.
16 Kutemwa kuno twatemwana kukakomelako ndi cakuti tukuitemelwa “ukwelelana.” (Efes. 4:32) Kuya kwene, insita zimwi cingatutalila ukweleela yauze, fwandi tulinzile ukuombesya. Nkazi umwi watile icipande icali umu Lupungu Lwa Mulinzi icatangi “Mwaitemelwa Ukweleela” camwavwile sana ukulaeleela yauze. * Walemvile ati: “Icipande cii cangavwile ukumanya vino ukweleela yauze kungangazwa. Calondolwile ukuti ukweleela yauze cisipiliula ukuti mukuzumilizya ukuti vino yacisile vyali sile ningo nanti ukuti vitamusosizye. Ukweleela yauze cikapiliula ukuti mwata ukuyasokela pali vino yacisile na cico cingalenga muye nu mutende.” Nga tukuitemelwa ukweleela aina na ya nkazi, tukalanga ukuti twayatemwa nupya tukakolanya Tata witu Yeova.
MWATAIZYA PALI VINO MWAYA UMU LUPWA LWAKWE YEOVA
Aikolo na acance yakalanga ukutemwa uku ina na ya nkazi (Lolini palaglafu 17) *
17. Ukulingana na Mateo 5:16, tungacita uli pakuti twacindika Tata witu uwa kwi yulu?
17 Twatemwa sana ukukwata ulupwa lwa ina na ya nkazi umu nsi yonsi atemwana. Tukalonda antu aingi ukutandika ukupepa Leza pamwi naswe. Fwandi tutalinzile ukucita icili consi icingalenga yauze ukwelenganya iviipe pali Yeova na pa antu yakwe. Lyonsi tukaezya ukuya ni miyele isuma pakuti antu yalonda ukusambilila pali Yeova nu kumuombela.—Belengini Mateo 5:16.
18. I cani cingatwazwa ukusimikila ukwaula intete?
18 Insita zimwi antu yamwi yangatunenola nanti ukutucuzya pa mulandu wakuti tukuvwila Tata witu uwa kwi yulu. Tungacita uli nga tuvwa intete lino tukunenako yauze pali vino twazumilamo? Tungataila ukuti Yeova nu mwanakwe yamatwazwa. Yesu wanenyile asambi yakwe ukuti yataali nu kusakamala pali vino yali nu kulanda ni nzila ino yali nu kulandilamo. U mulandu ci uno yataali nu kusakamalila? Yesu walondolwile ukuti: “Mazwi yano mulavwanga yalapeelwa kuli mwemwe pa nsita kwene iiyo; pano asi mwemwe sile mulavwanga, lelo umupasi wakwe Tata winu ulamwavwa.”—Mate. 10:19, 20.
19. Landiniko pa muntu umwi uwasifile pakuti asimikile.
19 Uvwini ivyacitikiile umwina Robert. Lino watandike sile ukusambilila Baibo ala atatala wabatiziwa nu kubatiziwa nupya ale atatala wamanya ivingi pali vino Baibo ikalanda, yamutwazile uku cilye ca ku South Africa ukuti akalondolole ningo umulandu uno wakaniile ukwingila usilika. Wasifile nu kulondolola ukuti walondanga ukutwalilila ukukanayika umu milandu ya nsi pa mulandu wakuti watemilwe aina yakwe. Watemilwe sana ukuya umu lupwa lwakwe ya kapepa yauze! Ukwaula ukwenekela kapingula wamuzizye ati, “aina yako aaweni?” Umwina Robert atenekiile ukuti yamamuzya vivyo, lelo wiwisye ilembo lya wanda pa wanda kwene uwa. Pa wanda uwa, ilembo lya wanda lyali a Mateo 12:50 ilikati: “Pano wensi aakacita ukulonda kwakwe Tata uwa kwi yulu, wiyo kwene ali mwinane nupya ali kaci wane nupya ali mayo.” Nanti icakuti pa nsita iya ale umwina Robert atatala wabatiziwa, umupasi wakwe Yeova wamwazwile ukwasuka iuzyo lili alino na mauzyo yauze yano yamuzizye ukwaula ukwenekela. Yeova afwile uvwile ningo sana pali vino umwina Robert wacisile. Nupya Yeova akauvwa ningo ndi cakuti twamutaila nu kuya asipe lino tukusimikila nanti icakuti ivintu ivitala.
20. I vyani vino tulinzile ukulalondesya ukucita? (Yoani 17:11, 15)
20 Tukataizya sana pa kuya umu lupwa lwa ina na ya nkazi aaya nu kutemwa. Mu lupwa luu mwaya Tata witu umusuma sana alino na ina na ya nkazi atutemwa. Lyonsi tulinzile twataizya pa kuya umu lupwa luu. Satana na antu aipe aakamulondela yakaezya na maka ukulenga twatwisika ukuti Tata witu watutemwa nu kutulenga tutatwalilila ukuvwana na ina na ya nkazi. Lelo Yesu watupepiileko kuli Tata witu ukuti atusakamala nu kulenga tutwalilile ukuya alemane. (Belengini Yoani 17:11, 15.) Yeova akwasuka ipepo lilyo. Wakwe Yesu, tutalinzile ukulatwiska ukuti alatwalilila ukututemwa nu kulonda ukutwazwa. Lekini lyonsi twalanga ukuti twatemwa Yeova na ina itu na ya nkazi.
LWIMBO NA. 99 Umwi Uvi Twaya Aingi Cuze
^ pala. 5 Twaya sana ni nsansa ukuya umu lupwa lwa ina na ya nkazi atemwana. Swensi kwene tukalonda ukulanga ukuti twatemwana sana cila muntu. Tungacita uli vivyo? Tungacita vivyo nga tukukolanya Tata witu uwaya nu kutemwa nu kukolanya Yesu na ina itu na ya nkazi.
^ pala. 57 ULONDOLOZI WA CIKOPE: Yeova watumile malaika ukuyakomelezya Yesu umu calo ca Getisemani.
^ pala. 59 ULONDOLOZI WA CIKOPE: Mu nsita ya ulwale wakwe COVID-19 aingi yaomvileko umulimo wa kupekanya nu kutwala ivyakulya kuli yano yataakweti.
^ pala. 61 ULONDOLOZI WA CIKOPE: Nyina akwazwa umwanakwe umukazyana ukulemba kalata ya kukomelezya iya kutumila umwina ali umu cifungo.
