1. ¿Keniuj ueli kiitaj Jiova taltikpakneminij akin tatakamatij?

JIOVA kinpia itekitikauan akin kiueyichiuaj uan kinita kemej ichankauan. Se yejua Jesús, akin “ipa yetinemi [...] achtopa ke mochiuaskia nochi ten ongak”, uan miakej ángeles (Col. 1:15; Sal. 103:20). Keman Jesús yetoya nikan taltikpak, kinextij ke taltikpakneminij akin tatakamatij no uelis kiitaskej Jiova kemej ininTajtsin. Se tonal keman iniuan tajtojtoya imomachtijkauan kinextij keniuj kiitaya Jiova keman kijtoj “noTajtsin uan namoTajtsin” (Juan 20:17, TNM). Uan no, keman timotemaktiaj iuan Jiova uan timoauiaj, miakej tokniuan takamej uan siuamej mochiuaj kemej tochankauan uan semi techtasojtaj (Mar. 10:29, 30).

2. ¿Toni tikitaskej itech nejin tamachtilis?

² Seki tokniuan ouij kinkisa kiitaskej Jiova kemej se tePopaj tetasojtakej. Uan okseki tokniuan xa amo kimatij keniuj kinnextiliskej tokniuan ke kintasojtaj. Itech nejin tamachtilis tikitaskej keniuj Jesús techpaleuia maj tikitakan Jiova kemej se tePopaj akin techtasojta uan akin uelis iuan timotokiskej. No tikitaskej keniuj uelis tikinnextiliskej tokniuan ke tikintasojtaj ijkon kemej Jiova kichiua.

3. ¿Keyej netataujtil padrenuestro techpaleuia maj okachi timotokikan iuan Jiova?

³ Jiova se tePopaj tetasojtakej, uan Jesús kineki maj tikitakan kemej yejua kiita: kemej se tepopaj tetasojtakej akin uelis tiknojnotsaskej keman yeski. Amo kineki maj tiknemilikan ke sayoj  technauatia toni tikchiuaskej uan ke amo tetasojta. Jesús kinextij ke kineki nejon keman kinmachtij itatojtokakauan keniuj kitataujtiskej Jiova. Itech netataujtil yekinika kijtoj: “Toueyitajtsin” (Mat. 6:9). Jesús ueliskia techmachtis maj tikiluikan Jiova ‘Akin tikpia nochi chikaualis’, ‘toTachijchiujkauj’ oso “Totayekankau [akin] nachipa yoltinemis”, porin nejin tokaymej semi kinamikij uan moajsij itech Biblia (Gén. 49:25; Is. 40:28; 1 Tim. 1:17). Sayoj ke techmachtij maj tikiluikan “Toueyitajtsin”.

4. ¿Keniuj tikmatij ke Jiova kineki maj iuan timotokikan?

⁴ ¿Ouij techkisa tikitaskej Jiova kemej se tePopaj tetasojtakej? Sekin kemaj ouij techkisa, xa porin keman katkaj tikonemej, topopaj amo technextiliaya ke techtasojta. Semi techyolseuia tikmatiskej ke Jiova kimati keniuj timomachiliaj uan ke kineki touan motokis. Yejua ika iTajtol techiluia: “Ximotokikan iuan Dios uan Yejuatsin no motokis namouan” (Sant. 4:8). Jiova techtasojta uan techiluia ke se kuali tePopaj.

5. Ika tein kijtoua Lucas 10:22, ¿keyej Jesús ueli techpaleuia maj okachi timotokikan iuan Jiova?

⁵ Jesús uelis techpaleuis maj okachi timotokikan iuan Jiova. Kuali kiixmati uan kinextia kualneskayomej tein yejuatsin kipia. Yejua ika kijtoj: “Xikmati ke ijkon keme Nejuatsin tinechitstinemi, no ijkon Totajtsin Dios tikitstinemi” (Juan 14:9). Jesús kemej yeskia toikniuj akin techyekana porin techmachtia maj tikpoujkaitakan toTajtsin Jiova, maj tiktakamatikan uan maj tikyolpaktikan. Sayoj ke tein Jiova kichiuak keman Jesús yetoya nikan taltikpak okachi techpaleuia maj tikitakan ke yejuatsin yolkuali uan ke tetasojta (xikonixtajtolti Lucas 10:22). Maj tikitakan seki taman tein panok.

6. ¿Keniuj tikmatij ke Jiova kikakik Jesús?

⁶ Jiova kinkaki ikoneuan. Maj tikitakan keniuj kichiuak nejin keman iKonetsin akin tayekana yetoya nikan taltikpak. Yejuatsin nochipa kikakik Jesús keman kitataujtij (Luc. 5:16). Kikakik keman kitataujtij maj kipaleuiani keman monekia kiixpejpenas seki taman tein semi monekia, kemej neskayot,  keman kinixpejpenak 12 itatitaniluan (Luc. 6:12, 13). Jiova no kikakik keman kitataujtij maj kipaleuiani keman semi motekipachojtoya. Achto ke Judas kitemaktiskia, Jesús kitataujtij iTajtsin maj kipaleuiani porin yaya kipanoti miak tajyouilis. Jiova amo sayoj kikakik iKonetsin, ta no kititanik se ángel maj kiyolchikauati (Luc. 22:41-44).

7. ¿Keniuj tionmomachilia keman tikonmati ke Jiova kikaki tonetataujtiluan?

⁷ Itech nejin tonalmej, Jiova no techkaki keman tiktataujtiaj, uan technankilia keman okachi moneki uan kemej okachi techpaleuis (Sal. 116:1, 2). Se tokniuj siuat kayot India kiitak ke Jiova ijkon kichiua. Yejua semi motekipachojtoya uan kitataujtij Jiova maj kipaleuiani. Yejua kijtoua: “Broadcasting^® tein kisak itech metsti mayo xiuit 2019, tein ika tajtouaya toni uelis se kichiuas keman semi se motekipachojtok, semi nechpaleuij. Jiova ijkon kinankilij nonetataujtiluan”.

8. ¿Keniuj Jiova kinextilij Jesús ke kitasojtaya?

⁸ Jiova technextilia inetasojtalis ijkon kemej kinextilij iKonetsin keman yetoya nikan taltikpak (Juan 5:20). Kipaleuij maj itakuaujtamatilis kisentokani chikauak, kiyolchikauak keman semi motekipachojtoya uan kimakak tein ika moixpanoltiskia. Uan kiluij ke kitasojtaya uan ke kiyolpaktiaya tein kichiujtoya (Mat. 3:16, 17). Jesús amo keman kimachilij ke iselti yetoya, porin kimatia ke iTajtsin nochipa kipaleuiaya (Juan 8:16).

9. ¿Toni kinextia ke Jiova techtasojta?

⁹ Ijkon kemej kipanok Jesús, tinochin miakpa tikmachilianij ke Jiova techtasojta. Maj tiknemilikan nejin: Jiova techkauak maj kuali timouikakan iuan uan kichiuak maj timoajsikan iniuan miakej tokniuan akin tikinitaj kemej tochankauan uan semi techtasojtaj. Yejuan techpaleuiaj maj tiyolpakikan uan techyolchikauaj keman timotekipachojtokej (Juan 6:44). Jiova no techmaka miak tamachtilis tein techpaleuia maj totakuaujtamatilis kisentoka chikauak. Uan techpaleuia maj ueli timoixpanoltikan mojmostaj (Mat. 6:31, 32). Keman itech titanemiliaj ke Jiova semi techtasojta, okachiok tiktasojtaj.

10. ¿Toni techmachtia kemej Jiova kintasojta tokniuan?

¹⁰ Jiova kintasojta tokniuan, sayoj ke kemansa tejuan xa ouij techkisa tikintasojtaskej uan tikinnextiliskej ke tikintasojtaj. Kemansa xa ouij techkisa porin seseko tikayomej oso porin tataman kemej techiskaltijkej. Uan kemansa tikchiuaj seki taman tein uelis kinkualantis oksekin oso kinyolkokos. Maski ijkon, uelis titapaleuiskej maj mochikaua netasojtalis tein tikinpialiaj tokniuan. ¿Keniuj? Komo tikintasojtaj kemej Jiova kintasojta (Efes. 5:1, 2; 1 Juan 4:19). Maj tikitakan tein techmachtia Jiova.

11. ¿Keniuj kinextij Jesús ke Jiova techyoliknelia?

¹¹ Jiova “techyoliknelia” (Luc. 1:78). Akin teiknelia ininka motekipachoua oksekin keman kinita ke tajyouiaj uan kitemoua keniuj uelis kinpaleuis uan kinyolseuis. Ijkon kemej Jesús kinpaleuij taltikpakneminij, kinextij ke Jiova ininka motekipachouaya (Juan 5:19). Biblia kijtoua ke “kuak Jesús kinitak in uel miak tagayot, ijkuakon Yejuatsin semi kinyoliknelij porin in tagayot tajyouijtoyaj uan tayokoyayaj keme ichkame ten kuamoyautokke uan keme ne ichkame ten amo kipiaj in tapixke” (Mat. 9:36). Jesús amo sayoj kiniknelij, ta kitemoj keniuj kinpaleuis. Kinpajtij akin mokokouayaj uan kinpaleuij akin semi tekitiaj uan tajyouijtoyaj (Mat. 11:28-30; 14:14).

12. ¿Keniuj uelis tiknextiskej teiknelilis?

¹² Komo tiknekij tikinnextiliskej tokniuan ke ininka timotekipachouaj uan ke tikinikneliaj,  moneki itech titanemiliskej toni ouijkayomej kipanotokej. Kemej neskayot, maj tiknemilikan ke se tokniuj siuat mokokoua. Maski xa amo keman kijtoua ke kipia se ouijkayot, xa kitasojkamatis komo tikpaleuiaj. ¿Ueli kichiua tekimej tein kipia kalijtik? ¿Ueliskia tiktakualchiuiskej oso titachipauaskej ichan? Oso maj tiknemilikan ke se tokniuj takat amo kipiaok tekit. ¿Ueliskia tikpaleuiskej ika tepitsin tomin hasta maj oksepa kiajsi se tekit, xa kemej amo kimatis akoni kimakak nejon tomin?

13, 14. ¿Keniuj uelis tiknextiskej ke tikuelitaj titapaleuiskej kemej Jiova?

¹³ Jiova kiuelita tepaleuis (Mat. 5:45). Komo tiknekij tikinnextiliskej tokniuan ke tikinikneliaj, amo monekiskia tikchiaskej maj yejuan techtajtanikan maj tikinpaleuikan, ta tejuan uelis tiktemoskej keniuj uelis tikinpaleuiskej, ijkon kemej kichiua Jiova. Yejuatsin kichiua maj mojmostaj kisa Tonaltsin maski amo tiktajtaniaj. Uan Tonaltsin nochin kinpaleuia, amo sayoj akin motasojkamatij. ¿Melauj ke Jiova technextilia ke techtasojta keman techmaka tein techpaleuia? ¡Jiova semi yolkuali uan kiuelita tepaleuis, uan yejua ika semi tiktasojtaj!

¹⁴ Miakej tokniuan kichiuaj kemej Jiova uan tepaleuiaj. Kemej neskayot, itech xiuit 2013, chikaujkakiouit Haiyan semi tauejueloj itech altepet Filipinas. Miakej tokniuan kinuejuelouilij ininchan uan kipolojkej nochi tein kipiayaj. Sayoj ke tokniuan akin kayomej itech nochi taltikpak niman kinpaleuijkej. Miakej tapaleuijkej ika tomin uan oksekin tapaleuijkej keman kinyektalijkej oso kinyekchijchiujkej kemej 750 kalmej. Uan nochi nejin kichiujkej keman ayamo ajsia nion se xiuit. Uan keman peuak kokolis COVID-19, tokniuan mochikaujkej kinpaleuiskej okseki tokniuan ika tein monekia. Keman niman tikinpaleuiaj tokniuan, tikinnextiliaj ke tikintasojtaj.

15, 16. ¿Toni kijtoua Lucas 6:36 ke monekiskia tiknextiskej komo tiknekij tikchiuaskej kemej toTajtsin Jiova?

¹⁵ Jiova techiknelia uan techtapojpoluia (xikonixtajtolti Lucas 6:36). ToTajtsin Jiova mojmostaj technextilia ke techiknelia (Sal. 103:10-14). No ijkon, maski imomachtijkauan Jesús katkaj tajtakolejkej, Jesús kiniknelij uan  kintapojpoluij. Hasta toka momikilij, porin ijkon Jiova ueliskia techtapojpoluis totajtakoluan (1 Juan 2:1, 2). Kemej Jiova uan Jesús techikneliaj uan techtapojpoluiaj, okachi timotokiaj iniuan.

¹⁶ Keman titetapojpoluiaj tikchikauaj netasojtalis tein tikinpialiaj tokniuan (Efes. 4:32). Melauj ke kemansa ouij techkisa titetapojpoluiskej, sayoj ke moneki timochikauaskej tikchiuaskej. Se tokniuj siuat kijtoua ke semi kipaleuij tamachtilis “Maj timotapojpoluikan se iuan okse” tein kisak itech amaix Tanejmachtijkej. * Tokniuj kijkuiloj: “Nejin tamachtilis nechpaleuij maj nikajsikamati keniuj nechpaleuia komo nikintapojpoluia oksekin. Kijtouaya ke keman tikintapojpoluiaj oksekin amo kijtosneki ke tiknemiliaj ke kuali yetok tein kichiujkej oso ke amo techyolkokoj, ta keman tikintapojpoluiaj kijtosneki ke amo tiksentokaj tikualantokej iniuan, uan nejon kichiua maj tiyolseujtokan”. Keman tikintapojpoluiaj tokniuan tikinnextiliaj ke tikintasojtaj uan ke tikchiuaj kemej toTajtsin Jiova.

17. Kemej kinextia Mateo 5:16, ¿keniuj uelis tikueyitaliskej toTajtsin Jiova?

¹⁷ Semi tiktasojkamatij tikinitaskej kemej tochankauan miakej tokniuan akin moajsij itech nochi taltikpak uan semi techtasojtaj. Uan tiknekij tikinpaleuiskej nochin taltikpakneminij akin tiueliskej maj no touan kiueyichiuakan Jiova. Yejua ika, amo tiknekij tikchiuaskej nion teyi tein kichiuas maj amo kuali ika tajtokan Jiova oso itekitikauan. Nochipa timochikauaj tikchiuaskej tein tapaleuis maj taltikpakneminij kinekikan kiixmatiskej tein Biblia tamachtia (xikonixtajtolti Mateo 5:16).

18. ¿Toni techpaleuis maj amo timouikan keman tikintapouiskej oksekin tein tikneltokaj?

¹⁸ Kemansa, sekin techixnamikiskej oso hasta techtajyouiltiskej porin tiktakamatij toTajtsin Jiova. ¿Toni uelis tikchiuaskej komo timouij keman tikintapouiaj oksekin tein tikneltokaj? Maj tikelnamikikan ke Jiova uan iKonetsin techpaleuiskej. Jesús kiniluij imomachtijkauan maj amo kintekipachouani toni kijtoskiaj oso keniuj kijtoskiaj. Jesús kijtoj keyej:  “Kuak ejkos ne momento, ijkuakon Dios Yejuatsin namechmakas toni ika nantajtoske. Ijkuakon amo namejuan nantajtoske. Ta, tajtos [...] in [y]ektikatsin [e]spíritu namotech ten Totajtsin Dios kualtitanis” (Mat. 10:19, 20).

19. ¿Keniuj se tokniuj akin yankuixtok peujka momachtia Biblia kiteixmatiltij iTajtol Dios ika yolchikaualis?

¹⁹ Maj tikitakan tein kipanok se tokniuj takat akin monotsa Robert. Keman yankuixtok peujka momachtia Biblia uan ayamo semi kiixmatia tein tamachtia, monekik kinitatiuj tekiuanij ompa Sudáfrica. Ika yolchikaualis kiniluij ke amo mochiuaskia tateuijkej porin kintasojta okseki itaixpantijkauan Jiova akin kinita kemej iikniuan. Senkis moita ke kitasojkamatia maj Jiova kiita kemej semej ichankauan. Sayoj ke se tekiuaj kitajtanij: “¿Akonimej mokniuan?”. Robert amo kichiaya maj kitajtaniani nejon, sayoj ke niman kielnamikik tajkuilol tein moixtajtoltij nejon tonal. Katka Mateo 12:50: “Nochi naken kitakamatij [...] Notajtsin Dios ten yetika eluiyaktsinko, yejuan ya ne nikinpouas keme nokniusiuat uan no yejuan ya ne nokniutagat uan no yejuan ya nonantsin”. Maski Robert yankuixtokok peujka momachtia Biblia, iespíritu Jiova kipaleuij maj kinankiliani nejon netajtanil uan okseki taman tein no kitajtanijkej. ¡Jiova xa semi kiyolpaktij tein kichiuak Robert! Uan tejuan no tikyolpaktiskej komo iuan titakuaujtamatij uan tikteixmatiltiaj iTajtol ika yolchikaualis keman timoajsiskej itech se ouijkayot.

20. ¿Toni moneki tiksentokaskej tikchiuaskej? (Juan 17:11, 15).

²⁰ Maj tiksentokakan tiktasojkamatikan maj Jiova techita kemej tiichankauan. Tikpiaj se kuali tePopaj uan moajsij miakej tokniuan takamej uan siuamej akin semi techtasojtaj. Maj nochipa tiktasojkamatikan nejin. Satanás uan akin kitojtokaj kinekij maj tiknemilikan ke toTajtsin Jiova amo techtasojta uan kitemouaj maj amo kuali timouikakanok iniuan tokniuan. Sayoj ke Jesús kitataujtij Jiova maj techpaleui maj tiksentokakan kuali timouikakan (xikonixtajtolti Juan 17:11, 15). Uan Jiova kinankilijtok nejon netataujtil. Maj tikchiuakan kemej Jesús uan maj amo keman tiknemilikan ke toTajtsin Jiova amo techtasojta uan ke amo techpaleuia. Maj tiksentokakan tikchikauakan netasojtalis tein tikpialiaj Jiova uan tein tikinpialiaj tokniuan.