1. Abantu abathembekileyo bangabiza uJehova ngokuthini?

IMULI kaJehova yabantu abamkhonzayo igoqela uJesu, ‘olizibulo lakho konke okudaliweyo’ kanye lezingilosi ezinengi kakhulu. (Kol. 1:15; Hubo. 103:20) Ngesikhathi uJesu esemhlabeni wathi uJehova uphinda abe nguBaba wezinceku zakhe ezithembekileyo. Ekhuluma labafundi bakhe wathi ngoJehova: “Ngiya phezulu kuBaba onguYihlo.” (Joh. 20:17) Nxa singazinikela kuJehova futhi sibhabhathizwe, siyabe sesingamalunga emuli yabafowethu labodadewethu abalothando.—Mak. 10:29, 30.

2. Sizaxoxa ngani esihlokweni lesi?

² Abanye kubathwalisa nzima ukubona uJehova enguBaba olothando. Abanye bangabe bengakwazi ukuthi batshengise njani ukuthi bayabathanda abafowabo labodadewabo. Esihlokweni lesi sizaxoxa ngokuthi uJesu usincedisa njani ukuthi sibone uJehova enguBaba wethu olothando, esingasondela kuye. Sizafunda lokuthi singamlingisela njani uJehova endleleni esiphatha ngayo abafowethu labodadewethu.

3. Amazwi asekuqaliseni komthandazo oyisibonelo asinceda njani ukuthi sisondele kuJehova?

³ UJehova unguBaba olothando. UJesu ufuna sibone uJehova ngendlela yena ambona ngayo. Umbona engumzali olomusa njalo olothando, okulula ukukhuluma laye, hatshi ongelamusa futhi ohlala esitshela okokwenza. Lokhu kukhanya kulokho uJesu athi abafundi bakhe bakutsho nxa bethandaza. Waqalisa umthandazo oyisibonelo ngamazwi athi: “Baba wethu.” (Mat. 6:9) UJesu wayengathi sibize uJehova ngokuthi “Somandla,” “Mdali” kumbe “Nkosi yaphakade” futhi wonke amabizo la okuhlonipha aqondile njalo ayatholakala eBhayibhilini.  (Gen. 49:25; Isaya. 40:28; 1 Tim. 1:17) Kodwa wathi sibize uJehova ngokuthi “Baba.”

4. Sazi njani ukuthi uJehova ufuna sisondele kuye?

⁴ Kukuthwalisa nzima yini ukubona uJehova enguBaba olothando? Abanye bethu kusithwalisa nzima. Indlela ebuhlungu esakhuliswa ngayo ingabangela ukuthi sicabange ukuthi akulamzali olothando. Kuyaduduza ukwazi ukuthi uJehova uyayizwisisa sibili indlela esizizwa ngayo! Ufuna ukuba seduze lathi. Yikho iLizwi lakhe lisikhuthaza lisithi: “Sondelani kuNkulunkulu, laye uzasondela kini.” (Jak. 4:8) UJehova uyasithanda futhi usithembisa ukuthi uzakuba nguBaba omuhle kulabo bonke esingaba labo.

5. Ngokwalokho okutshiwo kuLukha 10:22, uJesu usincedisa njani ukuthi sisondele kuJehova?

⁵ UJesu uyasincedisa ukuthi sisondele kuJehova. Umazi kuhle uJehova njalo ulingisela ubuntu bakhe ngendlela epheleleyo okokuthi wathi: “Loba ngubani ongibonileyo usembonile loBaba.” (Joh. 14:9) Njengoba engumnewethu, uJesu uyasifundisa ukuthi simhloniphe njalo simlalele njani uBaba wethu, ukuthi sixwaye njani lokho okungamdanisa futhi senze izinto ezizamthokozisa. Kodwa esikufunda kakhulu kuJesu yikuthi uJehova ulomusa njalo ulothando. (Bala uLukha 10:22.) Ake sixoxe ngezinye izibonelo.

6. UJehova wayemlalela yini uJesu? Nika izibonelo.

⁶ UJehova uyabalalela abantwabakhe. Wayeyilalela iNdodana yakhe elizibulo. Akuthandabuzwa ukuthi wayizwa imithandazo eminengi eyenziwa yiNdodana yakhe ngesikhathi isemhlabeni. (Luk. 5:16) Wayemuzwa uJesu nxa wayethandaza engakenzi izinqumo eziqakathekileyo, njengalapho ekhetha abaphostoli bakhe abangu-12. (Luk. 6:12, 13) Waphinda wamuzwa ngesikhathi ekhuleka ekhathazekile. Esezathengiswa, uJesu wakhuleka kuYise ngenhliziyo yonke ngobunzima ayesezahlangana labo. UJehova kazange awuzwe kuphela umthandazo kaJesu kodwa wathumela ingilosi ukuthi iqinise iNdodana yakhe ayithandayo.—Luk. 22:41-44.

7. Uzwa njani ngokuthi uJehova uyayilalela imithandazo yethu?

 ⁷ Lalamuhla uJehova uyayilalela imithandazo yethu futhi uyiphendula ngesikhathi esifaneleyo langendlela engcono kulazo zonke. (Hubo. 116:1, 2) Udadewethu ose-India wakubona lokhu. Wayelomkhuhlane wokukhathazeka kakhulu njalo wayethandaza ngenhliziyo yonke etshela uJehova ngalokho. Wabhala wathi: “Uhlelo lwe-JW Broadcasting^® lukaMay 2019 olwalukhuluma ngokuthi singenzani nxa sikhathazekile lwafika ngesikhathi sibili. UJehova wayiphendula imithandazo yami.”

8. UJehova watshengisa njani ukuthi uyamthanda uJesu?

⁸ UJehova uyasithanda futhi ulendaba lathi ngendlela ayethanda njalo enakekela ngayo uJesu ngesikhathi esemhlabeni. (Joh. 5:20) Wamncedisa ukuthi ahlale elokholo oluqinileyo, wamkhuthaza lapho ekhathazekile njalo wamnika lokho ayekudinga ukuze aqhubeke ephila. Kanti njalo wamtshela ukuthi uyamthanda lokuthi uyamamukela. (Mat. 3:16, 17) UJesu kazange azizwe elahliwe ngoba wayekwazi ukuthi uYise osezulwini omthandayo wayehlala elaye njalo emnceda.—Joh. 8:16.

9. Sazi njani ukuthi uJehova uyasithanda?

⁹ Lathi njengoJesu sesike sazibonela ngendlela ezinengi ukuthi uJehova uyasithanda. Cabanga ngalokhu: UJehova wasidonsela kuye njalo wasinika imuli yakhe elothando emanyeneyo esenza sithokoze futhi esincedisayo nxa sikhathazekile. (Joh. 6:44) Kanti njalo usinika konke esikudingayo ukuze sihlale silokholo oluqinileyo. Uphinda asincede ukuthi sithole esikudingayo ukuze siqhubeke siphila. (Mat. 6:31, 32) Nxa singaqhubeka sicabanga ngokuthi uJehova usithanda kangakanani sizamthanda kakhulu.

10. Simlingisela njani uJehova endleleni aphatha ngayo abafowethu labodadewethu?

¹⁰ UJehova uyabathanda abafowethu labodadewethu. Kodwa kwezinye izikhathi kungaba nzima kithi ukuthi sibathande njalo sikutshengise lokho. Phela silamasiko angafananiyo futhi sakhuliswa ngendlela ezitshiyeneyo. Kanti njalo sonke siyawenza amaphutha angacaphula njalo adanise abanye. Lanxa kunjalo, singazama ukwenza konke okusemandleni ethu ukuthi kube lothando emulini yabantu bakaJehova. Singakwenza njani lokhu? Ngokulingisela uBaba wethu, sitshengise ukuthi siyabathanda abafowethu labodadewethu. (Efe. 5:1, 2; 1 Joh. 4:19) Ake sixoxe ngokuthi singamlingisela njani uJehova.

11. UJesu walutshengisa njani ‘uzwelo olukhulu’ lukaJehova?

¹¹ UJehova “ulozwelo kakhulu.” (Luk. 1:78) Umuntu olozwelo uyakhathazeka nxa ebona abantu bethwele nzima. Yikho uyadinga izindlela zokuthi abancedise futhi abaduduze. Indlela uJesu ayephatha ngayo abantu itshengisa uzwelo lukaJehova. (Joh. 5:19) Wathi ebona ixuku labantu ‘walizwela usizi ngoba lalihlukuluzekile futhi lilahlelwe iganga njengezimvu ezingelamelusi.’ (Mat. 9:36) UJesu wayengabazweli kuphela abantu kodwa wayesenza okuthile ukuze abancede. Welapha abagulayo njalo waphumuza labo ‘ababekhathele njalo besindwa.’—Mat. 11:28-30; 14:14.

12. Singabatshengisa njani ukuthi siyabazwela abafowethu labodadewethu?

¹² Sizakwenelisa ukutshengisa abafowethu labodadewethu uzwelo nxa singabazazi inhlupho abaphakathi kwazo. Ngokwesibonelo, udadewethu angabe ethwaliswe nzima ngumkhuhlane othile kodwa ungasoze umuzwe ekhala ngawo. Lanxa kunjalo, angathokoza  kakhulu nxa omunye angamncedisa ngokuthile. Udadewethu uyenelisa yini ukunakekela imuli yakhe ngalokho ekudingayo? Singenelisa yini ukumncedisa ngokumphekela kumbe ngokumklinela indlu? Umfowethu angabe ephelelwe ngumsebenzi. Singamnika yini imali ezamncedisa aze athole omunye umsebenzi? Lokhu singakwenza singazange simtshele ukuthi ivela kithi.

13-14. Singamlingisela njani uJehova endabeni yokuphana?

¹³ UJehova uyaphana. (Mat. 5:45) Akumelanga silindele ukuthi abafowethu labodadewethu baze basicele ukuze sitshengise uzwelo. Kumele silingisele uJehova sibancedise bengazange basicele. Wenza ilanga liphume nsuku zonke singazange silicele. Kanti njalo ilanga linceda bonke abantu, hatshi labo abatshengisa ukuthi bayabonga kuphela. Kuyacaca-ke ukuthi uJehova utshengisa ukuthi uyaphana ngokusipha konke esikudingayo. Siyamthanda kakhulu uJehova ngoba ulomusa futhi uyaphana.

¹⁴ Abafowethu labodadewethu abanengi balingisela uBaba wethu osezulwini ngokuba ngabantu abaphanayo. Ngokwesibonelo, ngo-2013 kwaba lesiphepho esilamandla okuthiwa nguHaiyan esabangela umonakalo omkhulu ePhilippines. Izindlu zabafowethu labodadewethu abanengi zadilika njalo balahlekelwa yimpahla yabo. Kodwa abazalwane babo abasemhlabeni wonke basukumela phezulu ukuze babancedise. Abanengi bancedisa ngemali futhi abanye bancedisa emsebenzini omkhulu wokwakha lokulungisa imizi engaba ngu-750 ngomnyaka owodwa! Ngesikhathi somkhuhlane omemethekayo we-COVID-19, oFakazi basebenze gadalala bencedisa abafowabo labodadewabo. Nxa singazimisela ukuncedisa abazalwane bethu siyabe sitshengisa ukuthi siyabathanda.

15-16. Ngokwalokho okutshiwo kuLukha 6:36, singamlingisela njani uBaba wethu osezulwini?

¹⁵ UJehova ulesihawu futhi uyathethelela. (Bala uLukha 6:36.) Sikubona nsuku zonke ukuthi uBaba wethu osezulwini ulesihawu. (Hubo. 103:10-14) Abalandeli bakaJesu babelesono kodwa uJesu wayebatshengisa isihawu futhi ebathethelela. Wazimisela lokunikela ngokuphila kwakhe ukuze sithethelelwe izono  zethu. (1 Joh. 2:1, 2) Siyafuna ukusondela kuJehova loJesu ngenxa yokuthi bayathethelela futhi balesihawu.

¹⁶ Nxa ‘sibathethelela ngenhliziyo yonke’ abafowethu labodadewethu, siyabe siqinisa uthando olusemulini yabantu bakaNkulunkulu. (Efe. 4:32) Ukuthethelela abanye kungaba nzima kakhulu ngezinye izikhathi yikho kumele sizame ngamandla ukukwenza lokho. Omunye udade wabala isihloko esiku-Nqabayokulinda esithi “Thethelelanani Ngokukhululekile” esamnceda ukuthi athethelele abanye ngenhliziyo yonke. * Wabhala wathi: “Isihloko lesi sanginceda ngazwisisa ukuthi ukuthethelela abanye kungisiza njani mina. Sachasisa ukuthi ukuthethelela abanye akutsho ukuthi uvumelana labakwenzileyo kumbe ukuthi abakwenzileyo akuzange kukuzwise ubuhlungu. Kodwa kutsho ukuthi uyabe ungasabazondelanga njalo lokhu kwenza uhlaliseke.” Nxa sibathethelela ngenhliziyo yonke abafowethu labodadewethu siyabe sitshengisa ukuthi siyabathanda lokuthi silingisela uBaba wethu uJehova.

17. Ngokwalokho okutshiwo kuMathewu 5:16, singamdumisa njani uBaba wethu osezulwini?

¹⁷ Kuyisibusiso sibili ukuba semulini ethandanayo yabafowethu labodadewethu abasemhlabeni wonke. Sifuna abantu abanengi bazokhonza uNkulunkulu ndawonye lathi. Yikho akumelanga senze loba yini engabangela ukuthi abantu bakhulume kubi ngoJehova kumbe ngabantu bakhe. Kumele sizame ukuziphatha ngendlela ezakwenza abantu bafune ukuzwa izindaba ezinhle.—Bala uMathewu 5:16.

18. Kuyini okungasinceda ukuthi sitshumayele ngesibindi?

¹⁸ Kwesinye isikhathi abanye bangaseyisa kumbe basihlukuluze ngenxa yokuthi silalela uBaba wethu osezulwini. Kuyini okungasinceda nxa sisesaba ukutshela abanye ngalokho esikukholwayo? Yikuqiniseka ukuthi uJehova leNdodana yakhe bazasincedisa. UJesu watshela abafundi bakhe ukuthi kwakungamelanga bakhathazeke ngokuthi bazawabeka njani amazwi abo loba ngokuthi bazakuthini. Kungani kwakungamelanga bakhathazeke?  Wathi: “Elizakukhuluma lizakuphiwa ngalesosikhathi. Kayisini elizikhulumelayo, kodwa ngumoya kaYihlo okhuluma usebenzisa lina.”—Mat. 10:19, 20.

19. Nika isibonelo somunye owaba lesibindi sokutshumayela.

¹⁹ Ake sixoxe ngoRobert. Eminyakeni eyadlulayo esesengummemezeli ongabhabhathizwanga njalo engelalwazi olunengi ngeBhayibhili wamiswa phambi komthethwandaba eSouth Africa njalo wachasisela umahluli ukuthi kungani wayengeke abe lisotsha. Wayelesibindi njalo wachasisela umthethwandaba ukuthi wayengafuni ukungena esisotsheni ngenxa yokuthi wayebathanda abafowabo abangamaKhristu. Wayeyiqakathekisa indawo ayelayo emulini kaJehova! Umahluli wambuza wathi, “Ngobani abafowenu?” URobert wayengawulindelanga umbuzo lowo kodwa wahle wakhumbula umbhalo wosuku wamhlalokho. KwakunguMathewu 12:50 othi: “Loba ngubani owenza intando kaBaba osezulwini, nguye umfowethu lodadewethu kanye lomama.” Lanxa uRobert wayengakabhabhathizwa, uJehova wamncedisa ngomoya wakhe ukuthi aphendule umbuzo lowo leminye eminengana ayengayilindelanga. UJehova wathokoza ngalokho okwenziwa nguRobert! UJehova uyathokoza nxa lathi sithembela kuye ukuze sibe lesibindi sokutshumayela lanxa izimo zinzima.

20. Kuyini okumele sizimisele ukukwenza? (UJohane 17:11, 15)

²⁰ Sengathi singaqhubeka sisiqakathekisa isibusiso sokuba semulini yabantu bakaJehova abathandanayo. SiloBaba omuhle kulabo bonke esingaba labo kanye labafowethu labodadewethu abasithandayo. Kumele sihlale sikuqakathekisa lokho. USathane labalandeli bakhe abasizondayo bazama ukwenza ukuthi sithandabuze ukuthi uBaba wethu osezulwini uyasithanda futhi bazama ukuphambanisa ukumanyana esilakho. Kodwa uJesu wasithandazela ecela ukuthi uBaba wethu asikhangele ukuze sihlale simanyene. (Bala uJohane 17:11, 15.) UJehova uyawuphendula umthandazo lo. Asilingiseleni uJesu, singaqali ukuthandabuza ukuthi uBaba wethu osezulwini uyasithanda lokuthi uzasisekela. Asizimiseleni ukuqhubeka sisondela kuJehova lakubafowethu labodadewethu.