1. Vandhu vakagondeka vangava no ushamwari wo mukhaindinyi na Jehovha?

MBHURI ya Jehovha inobatanija Jesu, uwo ari “dangwe ro zvisikwa zvese” no zviuru no zviuru zvo ngirozi. (Vakorose 1:15; Nduyo 103:20) Paainga pasi pano, Jesu wakakhombija kuti vandhu vakagondeka vangakwanisa kuvona Jehovha inga Baba wavo. Paainga ecibhuya no vajiji vake, Jesu wakadanija Jehovha kuti “Baba wangu na Baba wenyu.” (Johani 20:17) Patinojipira no kubhabhatijwa, itusu tinoguma pa kuva divi ro mbhuri ya Jehovha.—Marko 10:29, 30.

2. Zvicinyi zvatinozovona pa jijo iyi?

² Vandhu vamweni vanovona zvecinesa maningi kuvona Jehovha inga Baba vano rudo. Kuveni vamweni vanonesehwa maningi kukhombija kuti ivona vanoda hama no hambzaji javo. Pa jijo iyi tinozovona kuti Jesu anotibeseresa kudini kuti tivone Jehovha inga Baba vano rudo, Baba vatingakhwedera phedo navo. Tinozovonazve manera otingatevejera Jehovha pa matajiro atinoita hama no hambzaji jedu.

3. Kuitisa kudini mukumbiro wo kuezanisira unotiita kuti tive phedo na Jehovha?

³ Jehovha i Baba vano rudo. Jesu anoda kuti itusu tivone Jehovha inga manera anomuvona iyena, inga Baba vakanaka mwoyo no vano rudo vatingabhuya navo pa mukuvo uri wese, kuciripi kuvavona inga mundhu wakashata anotivhunja basi zvatinodikana kuita. Tinokwanisa kuzvivona izvi ngo manera akajijisa Jesu vajiji vake kuita mukumbiro. Iyena wakatanga mukumbiro wo kuezanisira ngo magama aya: “Baba wedu.” (Mateu 6:9) Jesu waizotivhunja hake kuti itusu tidanije Jehovha inga “Nyakukwanisa bzese,” “Marure” kana “Mambo wo  makore ese.” Izvi azvicaizova zvakashata, ngokuti Bhaibheri rinomashandisa mazina aya ecinangira Jehovha. (Genesi 49:25; Isaia 40:28; 1 Timoti 1:17) Asi Jesu wakashandisa zina rinotikwevera kuna Jehovha, ro kuti “Baba.”

4. Tinozvizivisa kudini kuti Jehovha anoda kuti itusu tikhwedere kwaari?

⁴ Munovona zvecinesa kuvona Jehovha inga Baba vano rudo here? Kuno vamweni vedu zvingatinesera. Kudari Baba wedu vainga vacizivi kunaka mwoyo, zvinganesa maningi kuvona Jehovha inga Baba vano rudo. Zvinotivangisa maningi kuziva kuti Jehovha anozwisisa mazwiro edu. Iyena anoda kuva phedo nesu. Ngo zvinoitisa kuti Soko rake rinange kudari: “Khwederanyi kuna Mwari, iyena anozokhwederavo kwamuri.” (Jakobo 4:8) Jehovha anotida maningi i anonanga kuti anozova Baba vaushoni maningi vataizova navo.

5. Mukuzwirana na Ruka 10:22, Jesu angatibesera kudini kuti tikhwedere phedo na Jehovha?

⁵ Jesu angatibesera kuti itusu tikhwedere phedo kuna Jehovha. Iyena anonasa kuziva Jehovha no kutevejera mugariro jake mu njira yakaperera. Izvo ngo zvakamuitisa kuti iyena anange kudari: “Mundhu wese anondivona, watovonavo Baba.” (Johani 14:9) Inga nevanji wedu, Jesu wakatijijisa manera otingareremeja no kuzwira Baba wedu. Wotijijisazve zviro zvoticikadikani kuita kuti titame kuvanyangajisa no zviro zvatinodikana kuita kuti titendehwe ndivona. Asi Jesu paainga pasi pano, wakatibesera kuzwisisa kuti Jehovha wakanaka i ano rudo. (Verenganyi Ruka 10:22.) Ngatende tivone muezaniso munganani.

6. Ipanyi muezaniso jinokhombija kuti Jehovha wakapurukira mukumbiro ja Jesu.

⁶ Jehovha anopurukira vana vake. Vonanyi amwe manera anokhombija kamare kuti Jehovha wakapurukira Mwana wake wo dangwe. Zvokadi kamare, Jehovha wakapurukira mukumbiro jakawanda jakaitwa ngo Mwana wake paainga pasi pano. (Ruka 5:16) Iyena wakapurukira mukumbiro wakaita Jesu paaida kutema civaringo cinosisira, cakadari inga co kusana vapostori gumi na vaviri. (Ruka 6:12, 13) Jehovha wakapurukirazve mukumbiro wa Jesu paainga ecithimwa-thimwa. Jesu  acito watengeswa ndi Judha, iyena wakaita mukumbiro kuna Baba wake ngo pamusoro po muejo waaidari kusongana nawo. Jehovha aazivi basi kuzwa mukumbiro ja Jesu, asi wakatotuma ngirozi kuti ivangise Mwana wake anodiwa.—Ruka 22:41-44.

7. Tinojizwa kudini ngo kuziva kuti Jehovha anozwa mukumbiro jedu?

⁷ Nyamasi uno Jehovha ari kwenderera mberi ecipurukira mukumbiro jo vashandiri vake. Iyena anojidavira pa nguva kwayo, zvecikwanisika weya ngo manera kwawo kamare. (Nduyo 116:1, 2) Vonanyi manera Jehovha wakadavira mukumbiro wo hambzaji imweni inogara Indiya. Iyona yaihwisana no cineso co kuthimwa-thimwa maningi, ngo kujidodokesa kwese yakaita mukumbiro kuna Jehovha ngo pamusoro po shwiro iyi. Iyona yakatara kudari: “Urongwa wa Maio wo JW Broadcasting^® wo gore 2019, wakabhuya ngo pamusoro po manera otingahwisana no kuthimwa-thimwa. Izvo zvainga izvona kamare zvondaida. Ndakavona urongwa uhu inga mupinguro wo mukumbiro jangu.”

8. Jehovha wakakhombijisa kudini rudo hwake kuna Jesu?

⁸ Jehovha anokhombija rudo hwake kwatiri ngo manera aanotitaja inga zvaakaitira Jesu paainga pasi pano. (Johani 5:20) Iyena wakabesera Jesu kuti aenderere mberi ano rutendo hwakavanga, kumuvangisa paainga ecithimwa-thimwa no kuva no cokwadi co kuti iyena wainga no zvese zvaaida kuti apone. Jehovha wakavhunja Mwana wake kuti iyena waimuda maningi i waidakajihwa ndiyena. (Mateu 3:16, 17) Zvecivoneka kuti Jesu waithemba besero ra Baba wake vo kudenga, iyena aacaijizwa ari ega.—Johani 8:16.

9. Tinozvizivisa kudini kuti Jehovha anotida?

⁹ Inga ndi Jesu, itusu tinokwanisa kuvona rudo hwa Jehovha mu njira jakasiyana-siyana. Amborangariranyi basi: Jehovha wakatitendera kuti tive shamwari jake no kutipa hama no hambzaji jinotiita kuti tidakare no kutivangisa patinonga tecithimwa-thimwa. (Johani 6:44) Jehovha anotipa zvese zvatinoda kuti tienderere mberi tino rutendo hwakavanga. Cimwenizve, anotibesera kuti tiwane zviro zvatinoda kuti tipone. (Mateu 6:31, 32) Patinorangarira manera Jehovha anotida, rudo hwedu kwaari unokura maningi.

10. Tingajijenyi ngo manera Jehovha anotaja hama no hambzaji jedu?

¹⁰ Jehovha anoda hama no hambzaji jedu. Asi nguva jimweni zvinganesa kukhombija kuti tinoda hama no hambzaji jedu. Nguva jimweni zviro izvi zvinoitika ngokuti tinozvirovejeso zvakasiyana i takakurira ku ndau jakasiyana-siyana. Cimweni ngo co kuti itusu tinoposa, zvoita kuti hama no hambzaji jedu jisuruvare. Pikija zvakadaro, tingavangisa rudo hwedu ku mbhuri yedu yo umwari. Kuitisa kudini? Ngo kutevejera manera Jehovha anotatija rudo hwake kuno hama no hambzaji jedu. (Vaefeso 5:1, 2; 1 Johani 4:19) Ngatende tivone zvatingajija ngo muezaniso wa Jehovha.

11. Jesu wakakhombijisa kudini kuva mundhu ano “pena” inga ndi Jehovha?

¹¹ Jehovha anotatija “pena.” (Ruka 1:78) Mundhu anozwira pena, anoneseka paanovona vandhu vamweni vecitambujika, iyena anopsaka manera kuti avabesere no kuvavangisa. Ngo njira yondhoyo, Jesu wakatevejeravo manera Jehovha anotaja vandhu. (Johani 5:19) Pa vhaza imweni Jesu paakavona mbungano, iyena “wakavazwira pena, ngokuti vainga vacikanasi kutajwa, veciherereka inga mavhuta acina muhavisi.” (Mateu 9:36) Jesu aazivi kuvonesa kuti waivada basi, asi wakaita zviri zvese kuti avabesere. Iyena wakarapa vaihwaja no kubesera vaya vaishanda “ngo simba no kuremehwa.”—Mateu 11:28-30; 14:14.

12. Ipanyi muezaniso wo manera otingakhombijira pena.

 ¹² Kudari itusu tikaziva zvineso zviri kusongana no hama no hambzaji jedu, tinozokwanisa kuvazwira pena. Inga muezaniso, imwe hambzaji ingava no zvineso zvakawanda zvo uhomi. Iyona aigari ecibhuya ngo pamusoro po zvineso zvayo, asi inodakara ngo besero rainoashira. Tingajivhunjisa kuti, kunanga kuti iyona inokwanisa kupa zvinodiwa ku mbhuri yayo? Kunanga kuti itusu taizokwanisa kubesa hambzaji iyi ngo kwenda ku nyumba kwayo kobika kana kocenesa nyumba yayo here? Wari ngatiti imwe hama yaruza basa. Kunanga kuti itusu taizokwanisa kuipa zvimare, ticikanangi kuti ndisu tiri kuiparo mareyo kuti tiibesere mbhera yowana basa rimweni here?

13-14. Tingava kudini vandhu vanokova inga ndi Jehovha?

¹³ Jehovha anokova. (Mateu 5:45) Itusu atidikani kuimira kuti hama no hambzaji jedu jiviye kotikumbira besero kuti tizojikhombijire pena. Inga ndi Jehovha itusu tingatovaitira zviri zvese vacito vatikumbira. Iyena anoita kuti zuva ribhwake njiku jese ticikatomukumbiri. Irona rinobesera vese, haiwa basi vaya vanomubonga. Ngo kutipa zvatinoda, Jehovha ari kukhombija kuti iyena anotida. Itusu tinoda maningi Jehovha ngokuti iyena wakanaka mwoyo i anokova.

¹⁴ Hama no hambzaji jedu jinotevejera Jehovha ngo kuva vandhu vanokova. Inga muezaniso, mu gore ra 2013 mbhepo huru yaizwi Haiyani, yakaphwanya zviro zvakawanda maningi ku Firipina. Hama no hambzaji zinji jakaruza nyumba no zvese zvovainga nazvo. Ngo kukasika hama no hambzaji kutendera pasi pese jakaita nasiriro kuti jiende kovabesera. Vazinji vakabesera ngo kupa mare, vamweni ngo kunasirira-nasirira kana kutovakisa nyumba jinodarika kuita 750. Avazivi kupeja gore veciita basa iri. Mukati mo mutungu uwu wo korona vhiru, Zvapupu zva Jehovha zviri kushanda ngo simba kuti zvibesere hama no hambzaji javo. Patinobesera hama no hambzaji jedu ngo kukasika, tinokhombija kuti tinovada.

15-16. Mukuzwirana na Ruka 6:36, ngoyapi njira yatingatevejera ndiyona Baba wedu vo kudenga?

¹⁵ Jehovha ano usizi i anoregerera. (Verenganyi Ruka 6:36.) Njiku jese itusu tinokwanisa kuvona usizi una Baba wedu vo kudenga.  (Nduyo 103:10-14) Vateveri va Jesu vainga vandhu vacikazivi kukwana, ngo kudaro, iyena waivakhombijira usizi no kuvaregerera. Iyena waida kupira upenyu hwake kuti zvishaishi zvedu zviregerehwe. (1 Johani 2:1, 2) Waro imwimwi amujizwi muri phedo na Jehovha na Jesu zvecivoneka kuti ivona i vandhu vanoregerera?

¹⁶ Tinovangisa rudo hwedu kuno hama no hambzaji jedu ‘patinoregerera ngo mwoyo wese.’ (Vaefeso 4:32) Kunasa kunanga, kuregerera vamweni kunganesa nguva jimweni. Asi tinodikana kushanda ngo simba kuti tiregerere. Imwe hambzaji yakavona kuti musoro umweni wo Murindiri wainanga kuti, “Kanganwiranai Nomwoyo Wose” wakaibesera kuti iregerere kamare. * Iyona yakatara kudari: “Musoro uwu wakandibesera kuzwisisa kuti pandinoregerera vamweni, ndinonga ndecijibesera pacangu. Iwona wakasanangura kuti patinoregerera vamweni, azvirevi kuti itusu tinotendera zviro zvakashata zvovakaitaro kana tinotorerusa zvakaitikaro. Asi kuregerera kunoreva kutama kuviga bundu ngo pamusoro po zviro zvakashata zvotakaitihwaya, toramba tino runyararo hwo mukati.” Patinoregerera ngo mwoyo wese hama no hambzaji jedu, tinokhombija kuti tinovada i tinonga tecitevejera Baba wedu, Jehovha.

17. Mukuzwirana na Mateu 5:16, tingakujisa kudini Baba wedu vo kudenga?

¹⁷ Icidakajiso cikuru maningi kuva divi ro mbhuri ya Jehovha. Itusu tinoda maningi kuti vandhu vakawanda vabatane na itusu pakunamata Jehovha, Mwari wedu. Ngo kudaro, atidikani kuita ciri cese cinoshoresa zina ra Jehovha no vandhu vake. Nguva jese tinoeja kuva no mufambiro waushoni unoita kuti vandhu vade kujija ngo pamusoro pa Jehovha no kuda kumushandira.—Verenganyi Mateu 5:16.

18. Zvicinyi zvingatibesera kuti ticumaere no cicunge?

¹⁸ Nguva jimweni, vandhu vamweni vangatishora kana kutotiteverera ngo kuzwira Baba wedu vo kudenga. Zvicinyi zvatingaita kudari tiri kuthya kubhuya no vamweni ngo pamusoro po zvatinotenda? Tingava no cokwadi co kuti Jehovha no Mwana wake vanozotibesera.  Jesu wakavhunja vajiji vake kuti avacaidikana kuneseka ngo zviro zvavaidikana kubhuya kana kuvereketa. Ngenyi avacaidikana kuneseka? Jesu wakati: “Munozopuwa zvokuvereketa pa nguva yondhoyo; ngokuti andimwipi basi munozovereketa, asi mujimu wa Baba wenyu, ndiwona unozovereketa wecishandisa imwimwi.”—Mateu 10:19, 20.

19. Ipanyi muezaniso wo mundhu wakacumaera ngo cicunge cese.

¹⁹ Vonanyi muezaniso wa hama Roberto. Pa mukuvo munganani wakapera povainga mujiji wo Bhaibheri i vacina uzivi wakawanda ngo pamusoro po Bhaibheri, ivona vakakumbihwa kuti vaende kutribhunari kuti vabhuye no mutongi, kuitira kusanangura kuti ngenyi avanghwiniri mu basa ro usoca. Ngo cicunge cese vakasanangura zvaivaitisaro kudaro. Ivona vakananga kuti avacainghwina mu basa ro usoca ngo ndava yo rudo ku hama no hambzaji javo jo Cikristu. Ivona vaireremeja maningi ndau yavo mu mbhuri ya Jehovha. Mutongi wiya naakanyangajwa wakavhunjisa kudari: “Hama jako ndiyani?” Hama Roberto avacaivetera kuti vaizoithwa muvhunjo wondhowo, asi ngo kukasika vakaceukija vhesi yovaidikana kushandisa. Yainga Mateu 12:50, inonanga kudari: “Ngokuti wiya anoita kuda ka Baba wangu vari kumatenga, ndiyena hama yangu, hambzaji yangu na mai wangu.” Pikija Hama iyi yainga mujiji mupsa wo Bhaibheri, mujimu wa Jehovha wakaibesera kuti ikwanise kudavira muvhunjo uwu no muvhunjo jimweni joyaicaivetera. Jehovha wakadada maningi ngo zvakaitari hama Roberto. Jehovha anodadavo na itusu patinokwanisa kucumaera pa mugariro jinonesa.

20. Tinodikana kutema civaringo co kuitenyi? (Johani 17:11, 15)

²⁰ Ngatienderere mberi tecireremeja cidakajiso cedu co kuva pa mbhuri iyi ino rudo. Itusu tina Baba vakanaka maningi vataizova navo pomwe no hama no hambzaji jinotida. Nguva jese tinodikana kubongesera ngo kuva no zviro izvi. Sathana no vateveri vake vakashata vanoda kuti tikane-kane ngo rudo hwatinokhombijihwa ndi Baba wedu no kutivhisira rubatano hwedu. Asi Jesu wakaita mukumbiro kuna Baba wedu kuti mbhuri yedu ienderere mberi yakabatana. (Verenganyi Johani 17:11, 15.) Jehovha ari kudavira mukumbiro uwu. Inga ndi Jesu atidikani kukana-kana kuti Jehovha anotida no kutibesera. Ngatiteme civaringo co kwenderera mberi tiri phedo no hama no hambzaji jedu.