1. Onthamwene taani achu oororomeleya anaweryaaya okhalano ni Yehova?

EMUSI ya Yehova enamulapela, enaphitaanyerya Yesu, yoowo ori “ópacherya oyariwa a sopachushiwa sothe sene,” ni macikhwi a ankeelo. (Kol. 1:15, NN; Sal. 103:20) Vaavaa Yesu aareiye veelaponi, owo aahooniherya wi achu oororomeleya ananwerya omoonaka Yehova ntoko Tiithi aya. Alocaka ni arummwa awe, aamuloca Yehova ariki ‘Atiithi aka ni Atiithiinyu.’ (Yoh. 20:17) Nave vaavaa niivelenlaahu wa Yehova ni opatisiwa, noopaka makupa a emusi yoosivela ya anna ni arokora.—Mar. 10:29, 30.

2. Tiheeni nnahaalaahu othokororya mmwaha yoola?

² Wa akina onnakhala woovila omoona Yehova ntoko Tiithi oosivela. Akina akhweya hasuwenle mukhalelo wa wooniherya osivela wa anna ni arokora aya. Mmwaha yoola, nnahaala othokororya mukhalelo Yesu onanikhaviheryeiye omoona Yehova ntoko Tiithi oosivela, yoowo nnaphwanelaahu omwaacamela. Nnahaala tho woona mikhalelo seiho nneeraahu niwerye omutakiherya Yehova vooloca sa mukhalelo wa waakhaliha anna ni arokora ahu.

3. Ti mwawiihai nivekelo na ntakiheryo nnanaacamelihaaya wa Yehova?

³ Yehova Tiithi oosivela. Yesu onachuna wi nimooneke Yehova mmukhalelo owo onamooneiye, eyo tiwi, ntoko tiithi a ikharari ni oosivela yoowo nnaweryaahu olocano elukuluku eri yoothene, ohiya ntoko muchu oohikhalano osivela yoowo pahiru onoona onleela echu ya weera. Ela ennooniheryeya mmukhalelo Yesu aahusinheiye oohuserya awe ovekela. Owo aapacenrye nivekelo na ntakiheryo ni masu ala: “Atiithihu.” (Mat. 6:9) Yesu aanwerya onileela wi nimwiichaneke Yehova ntoko “Ooweryasha,” ‘Mpatuxa,’ naari “Mwene oohimala”—oothene yaala masina a ncicimiho oophwanelela analociwa mu Soorempwa. (Map. 49:25; Isa. 40:28; 1 Tim. 1:17) Ohiya yeeyo, Yesu onileenle wi nimwiichaneke Yehova ‘Tiithi.’

4. Nnasuwela hai wi Yehova onnachuna wi nimwaacamele yoowo?

⁴ Apwanne munnoona okhala woovila omoona Yehova ntoko  Tiithi oosivela? Akina a hiyo ninnoona hiiha. Waakhanle wi asitiithi ahu hiyaari oosivela onanwerya okhala woovila omwaanyiherya tiithi yoowo onahaala onisivela. Nyenya ennanilipiha osuwela wi Yehova onniiwexexa moomalela miyoonelo sahu! Owo onnachuna onaacamela. Ti nthowa nene Masu awe ananceenyeryaaya: “Mwaacameleeni Muluku, yoowo onarwa awaacamelaani nyuwo.” (Tiy. 4:8) Yehova onnanisivela, nave ooloca wi owo onahaala okhala Tiithi aphaama yoowo nihintonkwaahu okhalano.

5. Mwawiiwanana ni Luka 10:22, ti mwawiihai Yesu oneereiye anikhaviherye omwaacamela Yehova?

⁵ Yesu onanwerya onikhaviherya omwaacamela Yehova. Yesu oomusuwela phaameene Yehova nave onnachariha mikhalelo sawe moophaameya. Nthowa na yeela, owo aaloca: “Yoowo onakoona miyo, onnawoona atiithi.” (Yoh. 14:9) Ntoko amaanu aatokotoko, Yesu onnanihusiha mukhalelo wa waacicimiha ni owiiwelela Atiithi ahu, mukhalelo wa osepa waahiciha Yaawo, ni mukhalelo wa weemereryiwa ni Yaawo. Nave vaavaa Yesu aareiye veelaponi yavathi owo aahooniherya mukhalelo Yehova oreiye oosivela ni a mahala. (Mwaalakhanye Luka 10:22.) Hankooni nthokororye sootakiherya ikina.

6. Mvahe sootakiherya vooloca sa mukhalelo Yehova aanwiriyaneiye Yesu.

⁶ Yehova onnaawiriyana anaawe. Muthokororye mukhalelo Yehova anwiriyaneiye Mwanawe ooyariwa meekheiye. Yehova aanawiriyana mavekelo mancipale yaawo yaaperekhiwa ni Mwanawe vaavaa aareiye veelaponi yavathi. (Luka 5:16) Owo aahiwiriyana nivekelo na Yesu vooloca sa soolakelela soochuneya, ntoko vaavaa aachuneiye waathanla arummwa awe 12. (Luka 6:12, 13) Yehova tho aawiriyana nivekelo na Yesu vaavaa owo aareiye awuukhuwa. Yutasi ahaakumve omveleela yoowo, Yesu aavekela wa Atiithi awe vooloca sa ichu seiho saahaala weereya ni yoowo. Tahi wi pahiru Yehova aarimoona owiriyana nivekelo na Yesu nyenya tho aamurumiha munkeelo wi amulipihe Mwanawe oosiveliwa.—Luka 22:41-44.

7. Ti mwawiihai nniisoonaahu vaavaa nnasuwelaahu wi Yehova onnawiriyana mavekelo ahu?

⁷ Olelo, Yehova onnatitelela owiriyana mavekelo  a alapeli awe, nave onnaakhula yaawo mu elukuluku yoophwanelela nave tho mmukhalelo woophwanelela. (Sal. 116:1, 2) Moone mukhalelo murokora mmoha o Intiya oonneiye yeela mu okumi awe. Owo aanahooxeya ni makacamiho matokweene a mmuupuweloni, nave aavekela wa Yehova vooloca sa yeeyo. Owo oorepa: “Broadcasting^® a Maiyu a 2019 vooloca sa mukhalelo wa ovilela ni wuukhuwa yaari echu yoophwanelela wa miyaano. Owo aari naakhulo wa mavekelo aka.”

8. Mmikhalelo taani Yehova oonihenryeiye osivela wa Yesu?

⁸ Yehova onnanisivela ni onikhapelela, hiihaa ntoko aamusiveleiye Yesu ni omukhapelela variyari va makacamiho yaawo aahooleleiye mmuteko awe veelaponi yavathi. (Yoh. 5:20) Owo aanamukhaviherya Yesu olipiha nroromelo nawe, omulipiha yoowo vaavaa aakhaleiye awuukhuwa, ni omvaha soothowa sawe soomwiilini. Nave Yehova aahimuleela mwanawe wi aanamusivela yoowo nave aanahakalala ni yoowo. (Mat. 3:16, 17) Nthowa nawi ilukuluku soothene owo aanaroromela wi Atiithi awe oosivela a wirimu ari ni yoowo, Yesu hantonko wiisoona omeekha.—Yoh. 8:16.

9. Yawooniherya taani nryaahuno yawi Yehova onnanisivela?

⁹ Ntoko Yesu, oothene ahu ninnoona wi Yehova onnanisivela mmikhalelo soohiyanahiyana. Muupuwele: Yehova oonikeriha wa yoowo nave oonivaha emusi yoomunepani yawiiwanana ni yoosivela yeeyo enaneeriha okhala oohakalala ni onilipiha vaavaa nnakhalaahu awuukhuwa. (Yoh. 6:44) Yehova tho onnanivaha yoolya yoomunepani wi nilipihe nroromelo nahu. Nave owo onnanikhaviherya ophwanya ichu seiho nnachunaahu wi ntitelele okhala. (Mat. 6:31, 32) Vaavaa nnuupuwelelaahu vooloca sa osivela wa Yehova ntakhara hiyo, osivela wahu ntakhara yoowo onnannuwa.

10. Tiheeni nnahuseryaahu orweela wa mukhalelo Yehova onaakhaliheiye anna ni arokora ahu?

¹⁰ Yehova onnaasivela anna ni arokora ahu. Nyenya tahi wookhweya ilukuluku soothene woona osivela waya ntakhara hiyo ni wooniherya osivela wahu ntakhara yaawo. Ikwaha ikina ela ti yoovila nthowa nawi sookhovelela ti soohiyana naari niphwiiwale mmikhalelo soohiyana. Nave oothene ahu ninnapaka soohesa seiho inawerya waanyeenyeiha ni waaceecheiha akina. Naamwi hiiha, nnanwerya wiilipixerya olipiha osivela wahu wa emusi ahu yoomunepani. Mwawiihai? Moorweela wa omutakiherya Tiithi ahu mu wooniherya osivela wa anna ni arokora ahu. (Éfe. 5:1, 2; 1 Yoh. 4:19) Hankooni noone yeeyo nnahuseryaahu orweela wa yootakiherya ya Yehova.

11. Ti mwawiihai Yesu oonihenryeiye “ikharari” sa Yehova?

¹¹ Yehova onnooniherya “ikharari.” (Luka 1:78) Muchu a ikharari hanasiveliwa vaavaa onawooneiye achu ehooxeyaka; owo onnaavya mikhalelo sa ovahererya nikhaviheryo ni nlipiho. Moorweela wa mukhalelo Yesu aakhaliheiye achu, owo anatakiherya ikharari sa Yehova wa yaawo. (Yoh. 5:19) Mu ekwaha emoha vaavaa owo oonneiye mucichi wa achu, Yesu “aamoriwano ikharari, vawi waahaleela ni ohipwachiwa, ntoko ipucepuche ihirino mukukhula.” (Mat. 9:36) Yesu aaheera sincipale opwaha wooniherya osivela wa yaawo; owo aaheera echu yeeyo yaakhavihenrye yaawo. Owo aahaapenuxa awiiceliwa nave aahiwiichuuwiha oothene yaawo yaari “oovelavela ni oonyokoliwa.”—Mat. 11:28-30, BNM; 14:14.

12. Ti mwawiihai nneeraahu nooniherye ikharari wa anna ni arokora ahu?

¹² Wakhala wi ninnuupuwela makacamiho yaawo anna ni arokora ahu anahoolelaaya, nnanwerya wooniherya ikharari wa yaawo. Ntoko  yootakiherya, murokora onanwerya okhalano makacamiho matokweene mookumini. Owo hantonko oloca sa nikacamiho nawe, nyenya tiyawooneya wi onanwerya okhala oohakalala wakhala wi muchu mukina oomukhaviherya. Ti mwawiihai owo onakhapeleleiye soothowa soomwiilini sa emusi awe? Apwanne owo aahaala osiveliwa okhaviheryiwa orehererya yoolya naari orehererya empa awe? Naari munna onanwerya oyeleela muteko. Nnanwerya omvaha yamahala ya ikhorowa vakhaani, akhweya nihimuleenle wi ti hiyaano nimvanhe, wi imukhaviherye ophiyerya aphwannye muteko mukina.

13-14. Ti mwawiihai nneeraahu nikhale amahala ntoko Yehova?

¹³ Yehova ta mahala. (Mat. 5:45) Hannaphwanela oweherya wi anna ni arokora ahu eniveke nikhaviheryo wi nooniherye ikharari. Moolikana ni Yehova, nnanwerya weeravo echu naamwi ehinivenke. Owo onnakumiha nsuwa nihiku ti nihiku naamwi nihimuvenke! Nave achu oothene annaphuravo oorweela wa nsuwa, ohiya pahiru yaale anathamalela. Apwanne hamuneemererya wi moorweela wa onivahererya soothowa sahu, Yehova onnooniherya osivela wawe ntakhara hiyo? Hiyaano ninnamusivela Yehova vancipale nthowa na okhala ooreera murima ni amahala!

¹⁴ Emutakiheryaka Tiithi aya a wirimu, anna ni arokora ahu ancipale annooniherya mahala naamwi ehivekiwe. Ntoko yootakiherya, mu 2013 echeku etokweene yaananariha ichu o Filipina. Anna ni arokora ancipale yaayeleela ipa saya ni sookhalano saya. Nyenya emusi aya yoomunepani orukurerya elapo yoothene yaahaakhaviherya yaawo mwawaakuveya. Ancipale yaahiveleela ikhorowa wi ekhaviherye mmuteko wa oreherya naari oteka wanaawiili ipa opwaha 750 ehivinrevo eyaakha! Variyari va epahu ya Koronaviru, Anamoona annalapa moowetha wi yaakhaviherye anna ni arokora aya. Vaavaa nnaakhaviheryaahu amusi ahu oomunepani mwawaakuveya, ninnooniherya wi ninnaasivela yaawo.

15-16. Mwawiiwanana ni Luka 6:36, mukhalelo taani woochuneya nneeraahu nimutakiherye Tiithi ahu a wirimu?

¹⁵ Yehova ta ikharari ni ookhurumuwela. (Mwaalakhanye Luka 6:36.) Nihiku ti nihiku ninnoona ikharari sa Tiithi ahu. (Sal. 103:10-14) Oomuchara a Yesu yaari oohiphaameya; naamwi hiiha, owo aanawooniherya ikharari ni  okhurumuwela. Ophiyerya wi owo aari oolakelela oveleela okumi awe ntoko mukucho wi soocheka sahu ikhurumuweliwe. (1 Yoh. 2:1, 2) Okhurumuwela ni ikharari seiho Yehova ni Yesu yoonihenryaaya wa hiyo sinnanaacameliha wa yaawo.

¹⁶ Ninnalipiha osivela mu emusi ahu yoomunepani vaavaa nnakhalaahu “ookhurumuwelana.” (Éfe. 4:32) Mweeparipari, waakhurumuwela akina onanwerya okhala woovila mu ilukuluku ikina, mwawiihiiha nnaphwanela wiilipixerya weerano yeela. Murokora mmoha aahoona wi mwaha “Perdoem uns aos outros liberalmente” wa Mulipeleli waamukhaviherya weerano yeela. * Owo oorepa: “Mwaha yoola waakikhaviherya wiiwexexa mukhalelo wa waakhurumuwela akina onakikhaviheryaaya. Owo waathariha wi vaavaa onaakhurumuwelaawe akina henataphulela wi echu yoonanara yeeyo weereliwaawe ti yoophwanelela naari wi tahi yawiicela. Nyenya okhurumuwela onataphulela ohiya okhala oonyeenyeya ni okhalano murecele wa mmuupuweloni.” Vaavaa nnaakhurumuwelaahu anna ni arokora ahu, ninnooniherya wi ninnaasivela yaawo nave wi ninnamutakiherya Tiithi ahu, Yehova.

17. Mwawiiwanana ni Mateu 5:16, nni nooniherye hai wi ninnamucicimiha Tiithi ahu a wirimu?

¹⁷ Ninnathamalela okhalano emusi ya anna ni arokora a elapo yoothene anasivelana mukina ni mukhweiye. Ninnachuna wi achu ancipale wakhala wooweryeya ekhale ni hiyaano mu omulapela Muluku ahu. Ni yeela mmuupuweloni, nnaphwanela okhalano ekaasoope wi nihirwe neere echu vyakala yeeyo yaahaala waanyemuliha achu a Yehova naari Tiithi ahu a wirimu. Ilukuluku soothene ninneererya okhala mmukhalelo yoowo onaweeriha achu ochuna ohuserya ni omulapela Yehova.—Mwaalakhanye Mateu 5:16.

18. Tiheeni enahaala onikhaviherya olaleerya moolipa murima?

¹⁸ Ilukuluku ikina, akina ananwerya oniica naari oniikara nthowa na omwiiwelela Tiithi ahu a wirimu. Tiheeni nnaphwanelaahu weera wakhala wi ninnoovelela oloca soororomela sahu wa akina? Nnaphwanela ororomela wi Yehova  ni Mwanawe anahaala onikhaviherya. Yesu aahaaleela oohuserya awe wi awo hiyaaphwanela okhala awoova vooloca sa mukhalelo wa oloca ni yeeyo yaaphwanelaaya oloca. Ntakhara heeni? Yesu oothariha: “Muni mvahiwe masu ene mu elukuluku yeeyo. Tiwi, tahi nyuwo muni muloce, nto munepa wa atiithinyu toni oloce mwa nyuwo.”—Mat. 10:19, 20.

19. Mvahe yootakiherya ya muchu yoowo aavanhe onaamoona moolipa murima.

¹⁹ Muthokororye yootakiherya ya Robert. Elukuluku vakhaani owo amanle opacerya omuhuserya Piipiliya nave ahirino masuwelelo awaakhwanela a Mpiipiliyani, owo aaphwanela oya wa muthoriha wi amutharihele ntakhara heeni owo haahaala okhala mukhoco. Owo aathariha moolipa murima wa muthoriha wi owo haahaala opaka makupa mu ekhoco nthowa nawi owo aanaasivela annawe Eekristu. Owo aakhapelela nipuro nawe mu emusi ahu yoomunepani! Mulipa oothoriha aamukoha: “Annawo taani?” Robert haareherenrye naakhulo nyenya mwawaakuveya aahuupuwelela yoorepa ya nihiku nenle nave yoorepa eyo yaari Mateu 12:50: “Yoole oneera yookhwela ya Atiithi aka a wirimu, yoowo tori munnaka, murokoraka, ni amaani.” Naamwi Robert aari oohuserya muvyaani, munepa wa Yehova waamukhaviherya waakhula nikoho nenle ni makina oohiwehereryeya. Yehova aahiirumiha ni Robert. Nave Yehova tho onniirumiha ni hiyaano vaavaa nnamuroromelaahu yoowo wi nivahe onamoona moolipa murima mmikhalelo soovila.

20. Tiheeni nnaphwanelaahu olakelela opaka? (Yoh. 17:11, 15)

²⁰ Nnanwerya otitelela ovaha esisapo mareeliho yaawo nryaahuno a opaka makupa mu emusi yoosivela yoomunepani yeeyo nryaahuno. Nookhalano Tiithi aphaama ompwaha ori oothene ni anna ni arokora ancipale yaawo ananisivela. Nihirwe nuupuwele wi ichu seiha ti sawiikhalelaru. Nthowa nawi Satana ni masololo awe anneererya oneeriha okhwa minikwa osivela wa Tiithi ahu a wirimu ni waakanyerya wiiwanana yoowo nnapuhaahu. Ti nthowa nene, Yesu aavekenleiye mu nipuro nahu, amvekaka Tiithi ahu a wirimu onivareryela wi emusi ahu etitelele okhala yawiiwanana. (Mwaalakhanye Yohani 17:11, 15.) Yehova onnaakhula nivekelo nenla. Ntoko Yesu, hannaphwanela okhwa minikwa osivela nnikhaviheryo na Tiithi ahu a wirimu. Hankooni nikhale oolakelela okhala awaacamelana ni emusi ahu yoomunepani.